Chapter 33

[English text for this chapter is available]

devyuvāca |
piturvadhāmarṣasujāta manyunā yadyatkṛtaṃ karma purā maharṣiṇā |
dadhīciputreṇa suraprasādhinā sarvaṃ śrutaṃ taddhi mayā samādhinā || 1 ||
[Analyze grammar]

punaḥpunarvai vibudhaiḥ samānaṃ yadvṛttamāsī tkimapi pradhānam |
kāryaṃ hi tatsarvamanukrameṇa vijñātumicchāmi kutūhalena || 2 ||
[Analyze grammar]

īśvara uvāca |
ukto yadāsau vibudhaiḥ samastairāpaḥ purā tvaṃ bhuvi bhakṣayasva |
yato'marāṇāṃ prathamaṃ hi jātā āpo'grajāḥ sarvasurāsurebhyaḥ || 3 ||
[Analyze grammar]

tenaivamuktastu mahātmanā tadā pradarśayadhvaṃ mama tā yataḥ sthitāḥ |
pītvā surāḥ sarvamahaṃ purastātkṛtyaṃ kariṣye surabhakṣaṇaṃ hi || 4 ||
[Analyze grammar]

tatrāpi netuṃ yadi māṃ samarthā yatrāsate vāricayāḥ sametāḥ |
ato'nyathā nāhamalīkavādī prāṇe prayāte munivākyakārī || 5 ||
[Analyze grammar]

āhokte puṃḍarīkākṣa aurvaṃ hi vāḍavaṃ tadā |
tvāṃ prāpayiṣye yatrāpaḥ kena yānena vāḍava || 6 ||
[Analyze grammar]

vāḍava uvāca |
nāhaṃ hayādibhiryānairgaṃtuṃ tatra samutsahe |
kumārīkarasaṃparkamekaṃ muktvā mataṃ hi me || 7 ||
[Analyze grammar]

viṣṇuruvāca |
etatte sulabhaṃ yānaṃ tāṃ kanyāmānayāmyaham |
yā tvāṃ netuṃ samarthā syādapāṃ sthānaṃ suniścitam || 8 ||
[Analyze grammar]

īśvara uvāca |
surabhīśāpasaṃtaptā prāgupāttadaśāphalā |
sarasvatī yānabhūtā tasya sā viṣṇunā kṛtā || 9 ||
[Analyze grammar]

tato'bravīdvibhurgaṃgāṃ pārśvataḥ samupasthitām |
enaṃ vahniṃ mahābhāge vegānnaya mahodadhim |
nānyā śaktā samānetuṃ tvāṃ vinā lokapāvani || 10 ||
[Analyze grammar]

gaṅgovāca |
nāsti me bhagavañchakti raurvaṃ voḍhuṃ jagatpate |
raudrarūpī mahāneṣa dahatyevānalo bhṛśam || 11 ||
[Analyze grammar]

tatastu yamunāṃ prāha sindhuṃ tasyā hyanantaram |
anyā nadīśca vividhāḥ pṛthakpṛthagudāradhīḥ || 12 ||
[Analyze grammar]

aśaktāstāḥ samānetuṃ pṛṣṭāśca surasattamaiḥ |
tataḥ sarasvatīṃ prāha devadevo janārddanaḥ |
tvameva vaja kalyāṇi pratīcyāṃ lavaṇodadhau || 13 ||
[Analyze grammar]

evaṃ kṛte surāḥ sarve bhaviṣyanti bhayojjhitāḥ |
anyathā vāḍavenaite dahyaṃte svena tejasā || 14 ||
[Analyze grammar]

tasmāttvaṃ rakṣa vibudhāne tasmāttumulādbhayāt |
māteva bhava suśroṇi surāṇāmabhayapradā || 15 ||
[Analyze grammar]

evamuktā hi sā tena viṣṇunā prabhaviṣṇunā |
āha nāhaṃ svatantrāsmi pitā me dhriyate cirāt || 16 ||
[Analyze grammar]

tasyāhaṃ kāriṇī nityaṃ kumārī ca dhṛtavratā |
kālatrayepyasvatantrā śrūyate vibudhaiḥ sutā || 17 ||
[Analyze grammar]

pitrādeśaṃ vinā nāhaṃ padamekamapi kvacit |
gacchāmi tasmātko'pyanya upāyaściṃtyatāṃ hare || 18 ||
[Analyze grammar]

tatsvarūpaṃ viditvaivaṃ samabhyetya pitāmaham |
tamabravīdvāsudevo devakāryamidaṃ kuru || 19 ||
[Analyze grammar]

nānyathā śakyate netuṃ vāḍavo'gnirmahābalaḥ |
adṛṣṭadoṣāṃ muktvemāṃ kumārīṃ tanayāṃ tava || 20 ||
[Analyze grammar]

tacchrutvā viṣṇunā proktaṃ kumārīṃ tanayāṃ tadā |
śirasyādhāya sasnehamuvāca prapitāmahaḥ || 21 ||
[Analyze grammar]

yāhi devi surānsarvānrakṣa tvaṃ bhayamāgatān |
vinikṣipa tvaṃ nītvainaṃ vāḍavaṃ lavaṇāṃbhasi |
piturvākyaṃ hi sā śrutvā provāca śrutilakṣaṇā || 22 ||
[Analyze grammar]

sarasvatyuvāca |
eṣāsmi prasthitā tāta tava vākyā dasaṃśayam |
raudro'yaṃ vāḍavo vahnistanuṃ me bhakṣayiṣyati || 23 ||
[Analyze grammar]

prāptaṃ kaliyugaṃ raudraṃ sāṃprataṃ pṛthivītale |
lokaḥ pāpasamācāraḥ sparśayiṣyati māṃ prabho || 24 ||
[Analyze grammar]

tato duḥkhataraṃ kiṃ syādyatpāpaiḥ saha saṃgamaḥ || 25 ||
[Analyze grammar]

brahmovāca |
yadi pāpajanākīrṇaṃ na vāṃchasi dharātalam |
pātālatalasaṃsthā tvaṃ naya vahniṃ mahodadhau || 26 ||
[Analyze grammar]

yadātiśramasaṃyuktā vahninā dahyase bhṛśam |
tadā vibhidya vasudhāṃ pratyakṣā bhava putrike || 27 ||
[Analyze grammar]

kṛtvā vaktraṃ viśālākṣi prācī bhava sumadhyame |
tato yāsyaṃti tīrthāni tvāṃ śrāṃtāṃ cāruhāsinīm || 28 ||
[Analyze grammar]

tāni sarvāṇi cāgatya sāhāyyaṃ te varānane |
kariṣyaṃti trayastriṃśatkoṭyo vai mama śāsanāt || 29 ||
[Analyze grammar]

gaccha putri na saṃtāpastvayā kāryaḥ kathaṃcana |
ariṣṭaṃ vraja paṃthānaṃ mā santu paripaṃthinaḥ || 30 ||
[Analyze grammar]

īśvara uvāca |
evamuktā tadā tena brahmaṇātha sarasvatī |
tyaktvā bhayaṃ hṛṣṭamanāḥ prayātuṃ samupasthitā || 31 ||
[Analyze grammar]

tasyāḥ prayāṇasamaye śaṃkhaduṃdubhiniḥsvanaiḥ |
maṃgalānāṃ ca nirghoṣairjagadāpūritaṃ śubhaiḥ || 32 ||
[Analyze grammar]

sitāṃbaradharā devī sitacaṃdanaguṃṭhitā |
śāradāṃbudasaṃkāśā tārahāravibhūṣitā || 33 ||
[Analyze grammar]

saṃpūrṇacaṃdravadanā padmapatrāyatekṣaṇā |
kīrtiryathā maheṃdrasya pūrayantī diśo daśa || 34 ||
[Analyze grammar]

svatejasā dyotayaṃtī sarvamābhāsayajjagat |
anuvrajaṃtī gaṃgā vai tayoktā varavarṇini || 35 ||
[Analyze grammar]

drakṣyāmi tvāṃ punarahaṃ kutra vai vasatīṃ sakhi |
evamuktā tayā gaṃgā provāca snigdhayā girā || 36 ||
[Analyze grammar]

yadaiva vīkṣase prācīdiśi prāpsyasi māṃ tadā |
suraiḥ parivṛtā sarvaistatrāhaṃ tava suvṛte || 37 ||
[Analyze grammar]

darśanaṃ saṃpradāsyāmi tyaja śokaṃ śucismite |
tāmāpṛcchya tato gaṃgāṃ punardarśanamastu te || 38 ||
[Analyze grammar]

gaccha svamālayaṃ bhadre smarttavyā'haṃ tvayā'naghe |
yamunāpi tathā caivaṃ gāyatrī sumanoramā || 39 ||
[Analyze grammar]

sāvitrīsahitāḥ sarvāḥ sakhyaḥ saṃpreṣitāstadā |
tato visṛjya tāṃ devī nadī bhūtvā sarasvatī || 40 ||
[Analyze grammar]

himavaṃtaṃ giriṃ prāpya plakṣāttatra vinirgatā |
avatīrṇā dharāpṛṣṭhe matsyakacchapasaṃkulā || 41 ||
[Analyze grammar]

grāhaḍiṃḍimasaṃpūrṇā timinakragaṇairyutā |
hasaṃtī ca mahādevī phenaughaiḥ sarvato diśam || 42 ||
[Analyze grammar]

puṇyato yavahā devīstūyamānā dvijātibhiḥ |
vāḍavaṃ vahnimādāya hayavegena niḥsṛtā || 43 ||
[Analyze grammar]

bhittvā vegāddharāpṛṣṭhaṃ praviṣṭātha mahītalam |
yadāyadābhavacchrāṃtā dahyate vāḍavāgninā |
tadātadā martyaloke yāti pratyakṣatāṃ nadī || 44 ||
[Analyze grammar]

tatastu jāyate prācī saṃtaptā vāḍavena tu |
tato vai yāni tīrthāni kīrttitāni purātanaiḥ || 45 ||
[Analyze grammar]

divyāṃtarikṣabhaumāni sāṃnidhyaṃ yāṃti bhāmini |
tataścāśvāsitā taiḥ sā sarasvatī punarnadī |
pātālatalamā sādya jagāma makarālayam || 46 ||
[Analyze grammar]

khadirāmodamāsādya tatra sā vīkṣya sāgaram |
gaṃtuṃ pravṛttā taṃ vahnimādāya surasuṃdari || 47 ||
[Analyze grammar]

nirūḍhabhāramātmānaṃ devādeśādviciṃtya sā |
prahṛṣṭā sumanāstasmātpravṛttā dakṣiṇāmukhī || 48 ||
[Analyze grammar]

etasminneva kāle tu ṛṣayo vedapāragāḥ |
catvāraśca mahādevi prabhāsaṃ kṣetramāśritāḥ || 49 ||
[Analyze grammar]

hariṇaścātha vajraśca nyaṃkuḥ kapila eva ca |
tapastapyaṃti tatrasthāḥ svādhyāyāsaktamānasāḥ || 50 ||
[Analyze grammar]

pṛthakpṛthaksamāhūtāḥ snānārthaṃ taiḥ sarasvatī |
sāgaraḥ sammukhastasyāḥ sahasā sammupasthitaḥ || 51 ||
[Analyze grammar]

tataḥ sā cintayāmāsa kathaṃ me sukṛtaṃ bhavet |
śāpabhītā ca sā sādhvī paṃcasrotāstadā'bhavat || 52 ||
[Analyze grammar]

ekaikaṃ toṣayāmāsa tamṛṣiṃ varavarṇini |
tato'syāḥ paṃca nāmāni jātāni pṛthivītale || 53 ||
[Analyze grammar]

hariṇī vajriṇī nyaṃkuḥ kapilā ca sarasvatī |
pānāvagāhanānnṛṇāṃ paṃcasrotāḥ sarasvatī || 54 ||
[Analyze grammar]

brahmahatyā surāpānaṃ steyaṃ gurvaṃganāgamaḥ |
eṣāṃ saṃyogajaṃ cānyannarāṇāṃ paṃcamaṃ hi yat || 55 ||
[Analyze grammar]

etatpaṃcavidhaṃ puṃsāṃ paṃcadhā'vasthitā satī |
nāśayetpātakaṃ ghoraṃ sakhībhiḥ sahitā nadī || 56 ||
[Analyze grammar]

brahmahatyāṃ mahāghorāṃ pratilomā sarasvatī |
pānāvagāhanānnṛṇāṃ nāśayatyakhilaṃ hi sā || 57 ||
[Analyze grammar]

pramādānmadirāpānadoṣeṇopahatātmanām |
tadvyapohāya kapilā dvijānāṃ vahate nadī || 58 ||
[Analyze grammar]

upavāsājjapāddhomātsnānātpānāddvijanmanām |
saptāhānnāśayetpāpaṃ tattadbhāvena cetasā || 59 ||
[Analyze grammar]

svayaṃ te'pi viśudhyaṃti yathoktavidhikāriṇaḥ |
nyaṃkuṃ nadīṃ samāsādya mahataḥ pātakātkṛtāt || 60 ||
[Analyze grammar]

snānopāsanapānena vajriṇī gurutalpagam |
nāśayatyakhilaṃ puṃsāṃ pāpaṃ bhūribhayaṃkaram || 61 ||
[Analyze grammar]

saṃyogajasya pāpasya haraṇāddhariṇī smṛtā |
nadī puṇyajalopetā saptāhamavagāhanāt || 62 ||
[Analyze grammar]

evametāni pāpāni sarvāṇi surasuṃdari |
nadī nāśayate tathyaṃ paṃcasrotā sarasvatī || 63 ||
[Analyze grammar]

tato'paśyatpunaścāru sā devī pathi saṃsthitam |
parvataṃ sāgarasyāṃte roddhuṃ mārgamiva sthitam || 64 ||
[Analyze grammar]

brahmāṇḍamānadaṇḍo'yaṃ purato girisattamaḥ |
vrajantyāḥ surakāryeṇa mama vighnakaraḥ sthitaḥ || 65 ||
[Analyze grammar]

uccaistaraṃ mahāśailamavalokya sarasvatī |
atha vegena ruddhena giriṇā vismitā satī || 66 ||
[Analyze grammar]

evaṃ saṃcintayedyāvanmanasā tanma hādbhutam |
tāvanmaṃgalaśabdena pratibuddhaḥ kṛtasmaraḥ || 67 ||
[Analyze grammar]

giriśṛṃgadvaṃdvacaraṃ dadarśa puruṣaṃ ca sā |
tāmāha devīṃ sa nago mārgo nāstīha suvrate || 68 ||
[Analyze grammar]

anyatra kvāpi gaccha tvaṃ yatra te'bhimataṃ śubhe |
āhaivamukte sā devī naraṃ nagaśiraḥsthitam || 69 ||
[Analyze grammar]

devādeśātsamāyātā na nirodhyā gire tvayā |
evamukte giriḥ prāha tāṃ devīṃ sumanoramām || 70 ||
[Analyze grammar]

parvato'haṃ tvayā bhadre kiṃ na jñātaḥ kṛtasmaraḥ |
tvatsparśanānna doṣosti kumārī tvaṃ yato'naghe || 71 ||
[Analyze grammar]

atastvāṃ varaye devi bhāryā me bhava suvrate || 72 ||
[Analyze grammar]

sarasvatyuvāca |
pitā me dhriyate yasmāttena nāhaṃ svayaṃvarā |
tava bhāryā bhaviṣyāmi mārgaṃ yaccha mamādhunā || 73 ||
[Analyze grammar]

evamukto giriḥ prāha anicchaṃtīṃ mahābalāt |
udvāhayiṣye tvāṃ bhadre kastrātā sti tavādhunā || 74 ||
[Analyze grammar]

sā taṃ manobhavākrāntaṃ matvā divyena cakṣuṣā |
āha nāsti mama trātā tvāmeva śaraṇaṃ gatā || 75 ||
[Analyze grammar]

tvayodvāhyā yadya vaśyamahamevaṃ mahābala |
asnātāṃ nodvaha vibho snānaṃ karttuṃ ca dehi me || 76 ||
[Analyze grammar]

tāmuvāca tataḥ śailaḥ svasaṃpadabhimānavān |
saukhyadaṃ paśya subhage mayi saṃpūrṇavaibhavam || 77 ||
[Analyze grammar]

dvaṃdvāni yatra gāyaṃti kiṃnarāṇāṃ manoramam |
śrūyate ca sunidhvānaṃ taṃtrīvādyamathāparam || 78 ||
[Analyze grammar]

tatra tālāstamālāśca pippalāḥ panasāstathā |
sadaiva phalapuṣpāścā dṛśyaṃte sumanoramāḥ || 79 ||
[Analyze grammar]

kuṭajaiḥ kovidāraiśca kadaṃbaiḥ kurabaistathā |
mattālikulaghuṣṭaiśca bhūdharo bhāti sarvataḥ || 80 ||
[Analyze grammar]

harāṃgarāgavadbhāti kvacitkuṭajakuḍmalaiḥ |
kvacittu karṇikāraiśca viṣṇorvāsaḥsamaprabhaḥ || 81 ||
[Analyze grammar]

tamāladalasaṃchannaḥ kvacidvaivasvatadyutiḥ |
kvaciddhātuviliptāṃgo gaṇādhyakṣavapurnagaḥ || 82 ||
[Analyze grammar]

caturmukha ivābhāti haritālavapuḥ kvacit |
kvacitsaptacchadairviṣṇorvapuṣā bhātyayaṃ giriḥ || 83 ||
[Analyze grammar]

kvacitkātyāyanīprakhyaḥ priyaṃgususamākulaḥ |
kvacitkesarasaṃyuktairanalābho vibhātyasau || 84 ||
[Analyze grammar]

vṛttaiḥ sapulakaiḥ snigdhaiḥ strīṇāmiva payodharaiḥ |
duṣprāpyairalpapuṇyānāṃ kvacidābhāti bilvakaiḥ || 85 ||
[Analyze grammar]

siṃhairvyāghrairmṛgairnāgairvarāhairvānaraistathā |
kvacitkvacidasau bhāti parasparamanuvrataiḥ || 86 ||
[Analyze grammar]

śūlikodbhinnamākāśamiva kurvadbhiruccakaiḥ |
evamukte pratyuvāca śāradā taṃ nagottamam || 87 ||
[Analyze grammar]

yadi māṃ tvaṃ pariṇaye rudaṃtīmekikāṃ tathā |
gṛhāṇa vāḍavaṃ haste yāvatsnānaṃ karomyaham || 88 ||
[Analyze grammar]

evamukte sa jagrāha ta nagedro'pavarjim |
kṛtasmarastatsaṃsparśātkṣaṇādbhasmatvamāgataḥ || 89 ||
[Analyze grammar]

tataḥ prabhṛti te tasya pāṣāṇā mṛdutāṃ gatāḥ |
gṛhadevakulārthāya gṛhyaṃte śilpibhiḥ saha || 90 ||
[Analyze grammar]

dagdhvā kṛtasmaraṃ devī punarādāya vāḍavam |
samudrasya samīpe sā sthitā hṛṣṭatanūruhā || 91 ||
[Analyze grammar]

tatrasthā sā mahādevī tamāha vaḍavānalam |
paśya vāḍava garjantaṃ sāgaraṃ purataḥ sthitam || 92 ||
[Analyze grammar]

garjaṃtaṃ so'pi taṃ dṛṣṭvā prasarpaṃtaṃ ca vīcibhiḥ |
tāmāha kimidaṃ bhadre bhīto me lavaṇodadhiḥ || 93 ||
[Analyze grammar]

prahasyovāca sā bālā ko na bhītastavānala |
bhakṣyaste vihito yasmāttava devairmahābala || 94 ||
[Analyze grammar]

sa tasyāstadvacaḥ śrutvā saṃprahṛṣṭastu pāvakaḥ |
dāsyāmi te varaṃ bhadre yatheṣṭaṃ prārthayasva naḥ || 95 ||
[Analyze grammar]

tenaivamuktā sā devī vāḍavenāgninā tadā |
sasmāra kāraṇātmānaṃ viṣṇuṃ kamalalocanam || 96 ||
[Analyze grammar]

dṛṣṭosāvātmahṛtsaṃsthastayā devo janārddanaḥ |
smṛtamātraḥ sarasvatyā parastribhuvaneśvaraḥ || 97 ||
[Analyze grammar]

manodṛṣṭyā vilokyāha sā tamaṃtaḥsthamacyutam |
vāḍavo yacchati varamahaṃ taṃ prārthayāmi kim || 98 ||
[Analyze grammar]

tatastena hṛdisthena proktā devī sarasvatī |
prārthanīyo varo bhadre sūcīvaktratvamādarāt || 99 ||
[Analyze grammar]

tatastvabhihito devyā yadi me tvaṃ varapradaḥ |
tataḥ sūcīmukho bhūtvā tvaṃ pibāpo mahābala || 100 ||
[Analyze grammar]

evamuktena tattena sūcīvedhasamaṃ kṛtam |
ghaṭikāpūraṇaṃ yadvatpapau tadvadanaṃ jalam || 101 ||
[Analyze grammar]

evaṃ sa vāḍavo vahniḥ surāṇāṃ bhakṣaṇodyataḥ |
vaṃcito viṣṇunā yāti medhāmādhāya yatnataḥ || 102 ||
[Analyze grammar]

sargametaṃ naraḥ puṇyaṃ vācyamānaṃ śṛṇoti yaḥ |
sa viṣṇu lokamāsādya tenaiva saha modate || 103 ||
[Analyze grammar]