Chapter 32

[English text for this chapter is available]

īśvara uvāca |
tatasteṣu prayāteṣu devadeveṣvasau muniḥ |
śatavarṣāṇi tatrasthastapase prasthito dvijaḥ || 1 ||
[Analyze grammar]

āśramāduttarāttasmāddivyāṃ diśamatho ttarām |
subhadrāpi mahābhāgā tasya yā paricārikā || 2 ||
[Analyze grammar]

astrādāne'samarthā sā ṛṣiṃ provāca bhāminī |
nāhaṃ netuṃ samarthāsmi śastrāṇyālabhya pāṇinā || 3 ||
[Analyze grammar]

jalena saha tadvīryaṃ pītavānsa ṛṣistataḥ |
ātmasaṃsthāni sarvāṇi divyānyastrāṇyasau muniḥ |
kārayitvottarāmāśāṃ jagāma tapasāṃ nidhiḥ || 4 ||
[Analyze grammar]

gaṃgādharaṃ śuklatanuṃ sarppairākīrṇavigraham |
śivavatsukhadaṃ puṃsāmapaśyatsa himācalam || 5 ||
[Analyze grammar]

tathāśramaṃ dadarśoccairaśvatthaiḥ paripālitam |
caṃdrabhāgopakaṃṭhasthaṃ samitpuṣpakuśānvitam || 6 ||
[Analyze grammar]

sa tasminmuniśādūlo hyavasanmunibhiḥ saha |
subhadrayā ca saṃyuktaścaṃdraścaṃdrikayā yathā || 7 ||
[Analyze grammar]

ekadā vasatastasya subhadrā paricārikā |
snānārthaṃ yātumārabdhā caturthe'hni rajasvalā || 8 ||
[Analyze grammar]

vrajantyā ca tayā dṛṣṭaṃ kaupīnācchādanaṃ punaḥ |
pari tyaktaṃ viditvaivaṃ daivayogādgṛhāṇa sā || 9 ||
[Analyze grammar]

paridhāya punaḥ sā tu kaupīnaṃ retasāyutam |
ekāṃte snātumārabdhā jalābhyāśe yathāsukham || 10 ||
[Analyze grammar]

tato devī yathākāmamakasmādvīkṣate hi sā |
svodarasthaṃ samutpannaṃ garbhaṃ gurubharālasā || 11 ||
[Analyze grammar]

śocayitvātmanātmānamagarbhāhamihāgatā |
tatkena mandabhāginyā mamaivaṃ dūṣaṇaṃ kṛtam || 12 ||
[Analyze grammar]

lajjābhibhūtā sā tatra praviśyāśvatthavāṭikām |
tatra taṃ suṣuve garbhamavijñāya kuto hyayam || 13 ||
[Analyze grammar]

punareva hi sā snātvā avijñāyātmaduṣkṛtam |
śāpaṃ dātuṃ samārabdhā garbhakarttari duḥsaham || 14 ||
[Analyze grammar]

jñānādvā yadi vājñānādyeneyaṃ dūṣaṇā kṛtā |
so'dyaiva paṃcatāṃ yātu yadyahaṃ syāṃ pativratā || 15 ||
[Analyze grammar]

yadyahaṃ manasā vāpi kāmaye nāparaṃ patim |
etena satyavākyena yātu jāraḥ svayaṃ kṣayam || 16 ||
[Analyze grammar]

evaṃ śaptvā tu taṃ devī hyajñātvā garbhakāriṇam |
punaryātuṃ samārabdhā taddadhīciniketanam || 17 ||
[Analyze grammar]

tatra cārkapratīkāśaṃ garbhamutsṛjya sā tadā |
prāptā tapovanaṃ ramyaṃ yatrāsau munipuṃgavaḥ || 18 ||
[Analyze grammar]

atrāṃtare sarvadevā lokapālā mahābalāḥ |
astrāṇāṃ kāraṇārthāya munerāśramamāgatāḥ || 19 ||
[Analyze grammar]

uvāca taṃ muniṃ śakro nyāso yastava suvrata |
datto'smābhistu śastrāṇāṃ tāni kṣipraṃ prayaccha naḥ || 20 ||
[Analyze grammar]

ṛṣirāha purā yatra sthāpi tāni mamāśrame |
tatraiva tāni tiṣṭhaṃti na cānītāni vāsava || 21 ||
[Analyze grammar]

yattu teṣāṃ balaṃ vīryaṃ saṃgrāme śatrusūdana |
tanmayā pītamakhilaṃ saha toyena vāsava || 22 ||
[Analyze grammar]

evaṃ sthite mayā'strāṇi yadi deyāni te'nagha |
tatosthīni prayacchāmi tadākārāṇi suvrata || 23 ||
[Analyze grammar]

evamuktaḥ sahasrākṣastamāha munisattamam |
nānyeṣu tadbalaṃ raudraṃ yattu teṣu vyavasthitam || 24 ||
[Analyze grammar]

yasmātteṣu vinikṣipya sahasrāṃśaṃ svatejasām |
asmākaṃ dattavānrudro rakṣārthaṃ jagatāṃ śivaḥ || 25 ||
[Analyze grammar]

tadvayaṃ tāni sarvāṇi gṛhītvā ca vyavasthitāḥ |
lokasya rakṣaṇārthāya saṃjñeyaṃ tena lokapāḥ || 26 ||
[Analyze grammar]

amīṣāmapi śastrāṇā muttamaṃ vajramiṣyate |
taddhāraṇādyato'smākaṃ devarājatvamiṣyate || 27 ||
[Analyze grammar]

vajrādapyuttamaṃ cakraṃ yattadviṣṇuparigrahe |
daityadānavasaṃghānāṃ tadāyatto jayo'bhavat || 28 ||
[Analyze grammar]

tasmāttāni yathāsmābhiḥ prāpyate munisattama |
tathā kuruṣva saṃcintya kāryaṃ kāryavidāṃ vara || 29 ||
[Analyze grammar]

evamukte muniḥ prāha taṃ śakraṃ purataḥ sthitam |
tatprāptyarthamupāyaṃ tu kathayāmi tavāparam || 30 ||
[Analyze grammar]

yānyetāni mamāsthīni yūyaṃ taistāni sarvaśaḥ |
nirmāpayadhvaṃ śastrāṇi tadākārāṇi sarvaśaḥ || 31 ||
[Analyze grammar]

etāni tatsamutthāni teṣāmapyadhikaṃ balam |
sādhayiṣyati bhavatāṃ saṃgrāme yanmamehitam || 32 ||
[Analyze grammar]

tamuvāca tataḥ śakro dadhīciṃ tapasonidhim |
prāṇahāraṃ prakartuṃ te nāhaṃ śakto yamicchasi || 33 ||
[Analyze grammar]

na cāmṛtasya te'sthīni grahītuṃ śaktirasti naḥ |
tasmātsarvaṃ samālocya yatkartavyaṃ taducyatām || 34 ||
[Analyze grammar]

evamukto muniḥ prāha etadeva kalevaram |
tyajāmi svayamevāhaṃ deva kāryārthasiddhaye || 35 ||
[Analyze grammar]

adhruvaṃ sarvaduḥkhānāmāśrayaṃ sujugupsitam |
yadā hyetattadā yuktaḥ parityāgo'sya sāṃpratam || 36 ||
[Analyze grammar]

asya tyāgena me duḥkhaṃ saṃsārotthaṃ na jāyate |
yasmājjanmāṃtare jāto mṛtopi hi bhavetpunaḥ || 37 ||
[Analyze grammar]

bhāryā bhaginī duhitā svakarmaphalayojanāt |
jātā tenaiva saṃsāre ratikārye jugupsitā || 38 ||
[Analyze grammar]

yasmācca svayamevaitadvapustyajati vai dhruvam |
tasmādasya parityāgo varaḥ kāryo'cirātsvayam || 39 ||
[Analyze grammar]

evaṃ puraṃdarasyāgre saṃkīrtya sa mahāmuniḥ |
dadhīciḥ prāṇasaṃhāraṃ kṛtavānsatvaraṃ tadā || 40 ||
[Analyze grammar]

gatāsuṃ taṃ viditvaivaṃ vibudhāstatkalevaram || māṃ |
saśoṇitanirmuktaṃ kathaṃ kāryaṃ vyaciṃtayan || 41 ||
[Analyze grammar]

tatastadasthiśuddhyarthamuvācedaṃ sureśvaraḥ |
gaurīṇāṃ karkaśā jihvā tā etadutkhidaṃtviti || 42 ||
[Analyze grammar]

tatastairvibudhairnaṃdā yadā lokeṣu saṃsthitā |
dhyātā tadopayātā sā sakhībhiḥ parivāritā || 43 ||
[Analyze grammar]

naṃdā subhadrā surabhiḥ suśīlā sumanāstathā |
iti gomātaraḥ paṃca golokācca samāgatāḥ || 44 ||
[Analyze grammar]

ūcustānvibudhānsarvānasmābhiryatprayojanam |
karttavyaṃ tatkariṣyāmaḥ kathyatāṃ suvicāritam || 45 ||
[Analyze grammar]

devā ūcuḥ |
yadetadṛṣiṇā tyaktaṃ svayameva kalevaram |
etanmāṃsādinirmuktaṃ kriyatāmasthipaṃjaram || 46 ||
[Analyze grammar]

tatkṛtvā garhitaṃ karma devādeśātsudāruṇam |
punaḥ pitāmahaṃ draṣṭuṃ gatāstāḥ surasattamāḥ || 47 ||
[Analyze grammar]

tatastu dāruṇaṃ karma yacca tābhiranuṣṭhitam |
pitāmahasya tatsarvaṃ samācakhyuryathātatham || 48 ||
[Analyze grammar]

tacchrutvā vibudhānsarvānsamāhūya pitāmahaḥ |
sarvagātreṣvaspṛśata surabhīḥ śuddhikāmyayā || 49 ||
[Analyze grammar]

tāstu tairvibudhaiḥ spṛṣṭāḥ supūtāḥ samavasthitāḥ |
mukhamekaṃ paraṃ tāsāṃ na spṛṣṭamaśuci smṛtam || 50 ||
[Analyze grammar]

apavitraṃ bhavettāsāṃ mukhamekaṃ jugupsitam |
śeṣaṃ śarīraṃ sarvāsāṃ viśiṣṭaṃ tu suraiḥ kṛtam || 51 ||
[Analyze grammar]

sarasvatyā tu tāḥ proktā bhavaṃtyo brahmaghātikāḥ |
anyathā kāraṇātkasmānna spṛṣṭamamarairmukham || 52 ||
[Analyze grammar]

tatastābhistu sā proktā devī tatra sarasvatī |
naitatte vacanaṃ yuktaṃ vaktumevaṃvidhaṃ mukham || 53 ||
[Analyze grammar]

asmākameva hṛdayamanena vacasā tvayā |
nirdagdhaṃ yena tasmāttvamacirāddāhamāpsyasi || 54 ||
[Analyze grammar]

śāpaṃ dattvā tatastasyāḥ sarasvatyāstu tāstadā |
golokaṃ gatavatyastu surabhyaḥ surapūjitāḥ || 55 ||
[Analyze grammar]

āhūya viśvakarmāṇaṃ takṣāṇaṃ surasattamāḥ |
asmākaṃ kuru śastrāṇi tamāhuryuddhakāraṇāt || 56 ||
[Analyze grammar]

etadvacanamākarṇya tāni pūtairnavairdṛḍhaiḥ || |
astrāṇi kārayāmāsa dardhocerasthisaṃcayaiḥ || 57 ||
[Analyze grammar]

pramāṇākārayuktāni devānāṃ tāni saṃyuge |
ajeyāni yathā cāsaṃstathā cāsau vinirmame || 58 ||
[Analyze grammar]

vajramiṃdrasya śaktiṃ ca vahnerdaṃḍaṃ yamasya ca |
khaḍgaṃ tu niṛteḥ pāśaṃ samyakcakre pracetasaḥ || 59 ||
[Analyze grammar]

vāyordhvajaṃ kuberasya gadāṃ gurvīṃ ca nirmame |
viśvakarmā tathā śūlamīśānasya ca nirmame || 60 ||
[Analyze grammar]

gṛhītvaitāni vai devāḥ śastrāṇyastrabalaṃ tadā |
vijetuṃ ca tato daityāndānavāṃśca gatāstadā || 61 ||
[Analyze grammar]

atrāṃtare subhadrāpi dadhīceraurdhvadaihikam |
kṛtvā tairmunibhiḥ sārdhamanveṣṭuṃ sā gatā sutam || 62 ||
[Analyze grammar]

aśvatthavāṭikāyāṃ ca tamapaśya nmanoramam |
dṛṣṭvā roditi jīvaṃtaṃ muktvā bāṣpamathāciram || 63 ||
[Analyze grammar]

aṃbetyābhāṣya tenoktā mā rodīstvaṃ yaśasvini |
sarvaṃ purākṛtasyaitatphalaṃ tava mamāpi hi || 64 ||
[Analyze grammar]

yadyathā yatra yeneha karma janmāṃtarārjitam |
tadavaśyaṃ hi bhoktavyaṃ tyaja śokamato'khilam || 65 ||
[Analyze grammar]

matparityāgalajjā ca na te kāryeha sundari |
phalaṃ purākṛtasyaitadbhoktavyaṃ tanmayāpi hi || 66 ||
[Analyze grammar]

mātarmamopari kuru putrasnehaṃ yaśasvini |
bālasya hi parityāgā nmātā doṣeṇa lipyate || 57 ||
[Analyze grammar]

bālenābhihitā sā tu dhyātvā devaṃ janārddanam |
kṛtāṃjaliruvācedaṃ kathyatāṃ me suniścitam || 68 ||
[Analyze grammar]

na vijānāmyahaṃ tathyaṃ kasyāyaṃ vīryasaṃbhavaḥ |
tasmātkathaya deveśa mama te niścitaṃ vacaḥ || 69 ||
[Analyze grammar]

āhokte mātaraṃ kṛṣṇaḥ subhadrāṃ vai janārddanaḥ |
dadhīcestana yaścāyaṃ bhartuste kṣetrasaṃbhavaḥ || 70 ||
[Analyze grammar]

tasyotpattiṃ viditvaivaṃ subhadrā hṛṣṭamānasā |
bālamaṃke samāropya arodīdārtayā girā || 71 ||
[Analyze grammar]

āha bālaka utpannaḥ śokasya vada kāraṇam |
athoktaḥ stanyarahitaṃ kathaṃ te jīvitaṃ dhṛtam || 72 ||
[Analyze grammar]

yasmāccaturvidhā sṛṣṭirjīvānāṃ brahmaṇā kṛtā |
jarāyujāṃḍajodbhijja svedajāśca tathā smṛtāḥ || 73 ||
[Analyze grammar]

narastrīnapuṃsakākhyāśca jātibhedā jarāyujāḥ |
catuṣpadāśca paśavo grāmyāścāraṇyajāstathā || 74 ||
[Analyze grammar]

aṇḍajāḥ pakṣiṇaḥ sarve mīnāḥ kūrmasarīsṛpāḥ |
svedajā matkuṇā yūkā daṃśāśca maśakāstathā || 75 ||
[Analyze grammar]

udbhijjāḥ sthāvarāḥ proktāstṛṇagulmalatā dayaḥ |
anye'pyevaṃ yathāyogamaṃtarbhūtāḥ sahasraśaḥ || 76 ||
[Analyze grammar]

aṇḍajāḥ pakṣapātena jīvaṃti śiśavo bhuvi |
ūṣmaṇā svedajāḥ sarve udbhijjāḥ salilena hi || 77 ||
[Analyze grammar]

samudāyena bhūtānāṃ pañcānāmudbhijaṃ bhuvi |
jarāyujāśca stanyena vinā jīvitumakṣamāḥ || 78 ||
[Analyze grammar]

vinā tena kathaṃ putra tvayā prāṇā vidhāritāḥ |
tāṃ tathā jananīṃ prāha sa ca bāṣpāvilekṣaṇām || 79 ||
[Analyze grammar]

aśvatthaphalaniryāsapānātprāṇā mayā dhṛtāḥ |
gauṇaṃ tadā tayā tasya pippalādeti kalpi tam || 80 ||
[Analyze grammar]

nāma tena jagatyasminnityaṃ khyātaṃ mahātmanaḥ |
tatrasthairmunibhistasya kṛtāḥ sarvairyathākramam || 81 ||
[Analyze grammar]

saṃskārāḥ pippalādasya vedoktā veda pāragaiḥ |
ṣaḍaṃgopāṃgasaṃyuktā vedāstena samuddhṛtāḥ |
tadāśramanivāsibhyo munibhyaśca supuṣkalāḥ || 82 ||
[Analyze grammar]

punastatra sthitaścāsau dṛṣṭvā munikumārakān |
svapitraṃkagatānprāha jananīṃ tāṃ śucismitām || 83 ||
[Analyze grammar]

pitā me kutra bhadraṃ te subhadre kathaya sphuṭam |
tadekāṃtasthito yena bālakrīḍāṃ karomyaham || 84 ||
[Analyze grammar]

evaṃ sā jananī tena yadā pṛṣṭā tapasvinī |
tadā roditumārabdhā nottaraṃ kiñcidabravīt || 85 ||
[Analyze grammar]

rudantīṃ tāṃ samālokya kuddho'sau munidārakaḥ |
kimasau kutsitaḥ kaścidyena nākhyāsi taṃ mama || 86 ||
[Analyze grammar]

ityukte sutamāhaivaṃ vibudhaiste pitā hataḥ |
kopaṃ tyajasva bhadraṃ te dadhīciḥ kathito mayā || 87 ||
[Analyze grammar]

kopavahnipradīptātmā prāha tāṃ jananīṃ punaḥ |
kimapakṛtaṃ surāṇāṃ matpitrā kathayasva tat || 88 ||
[Analyze grammar]

subhadrovāca |
śastrāṇāṃ kāraṇānmūḍhairhato'sau munipuṃgavaḥ || pra |
yacchannapi cānyāni tadākārāṇi suvrata || 89 ||
[Analyze grammar]

śrutvaitadvacanaṃ so'pi munirugratapāstadā |
pitā me yo hato devaisteṣāṃ kṛtyāṃ mahābalām || 90 ||
[Analyze grammar]

utthāpya pātayiṣyāmi mūrddhni prāṇāpahārikām |
pitāmahamahaṃ muktvā naiva hanyo bhavedyadi || 91 ||
[Analyze grammar]

anyānpramathayiṣyāmi kṛtyāśastreṇa saṃgatān |
śaraṇaṃ yadi yāsyaṃti gīrvāṇā madbhayāturāḥ |
tathāpi pātayiṣyāmi tenaiva saha saṃgatān || 92 ||
[Analyze grammar]

matvaivaṃ tamṛṣiṃ kuddhaṃ sarve te surasattamāḥ |
brahmāṇaṃ śaraṇaṃ prāptā bhayena mahatā'rdditāḥ || 93 ||
[Analyze grammar]

tāṃstasya śaraṇaṃ prāptāñjñātvā devaḥ kṛpānvitaḥ || |
tatraiva gatvā tvaritaṃ prāha devāñjanārddanaḥ || 94 ||
[Analyze grammar]

bhavatāṃ rakṣaṇopāyaściṃtito'tra mayā'dhunā |
tena tāṃ mohayiṣyāmi kṛtyāṃ haṃtumupasthitām || 95 ||
[Analyze grammar]

atrāṃtare pippalādaḥ piturvairamanusmaran |
haṃtuṃ surānvyavasitaḥ praviveśa himācalam || 96 ||
[Analyze grammar]

śrutvā tadapriyaṃ vākyaṃ māturvaktrādvinirgatam |
pippalādaḥ punaryātastasmātsthānāddhimācalam || 97 ||
[Analyze grammar]

svargasopānavatpuṃsāṃ sthalībhūtamivāṃbaram |
śeṣasyābhogasaṃkāśaṃ prāpto'sau tuhināca lam || 98 ||
[Analyze grammar]

pratijñāṃ kurute yatra sthitaḥ sthāṇurivācalaḥ |
haṃtāro ye mama pitustānhaniṣyāmi cāraṇāt || 99 ||
[Analyze grammar]

kṛtyāśastreṇa sakalānamara tvena garvitān |
tasminsthitaḥ prakupitaḥ śivāyatanasaṃsadi || 100 ||
[Analyze grammar]

atrasthaḥ sādhayiṣyāmi tāṃ kṛtyāṃ ciṃtayanhṛdi |
kṛtyāṃ vā sādhayiṣyāmi yāsye vā yamasādanam || 101 ||
[Analyze grammar]

nirdvandvo nirbhayo bhūtvā nirāhāro hyaharniśam |
savyena pāṇinā savyaṃ nirmathyorumahaṃ punaḥ || 102 ||
[Analyze grammar]

tasmā dutpādayiṣyāmi mahākṛtyāmiti sthitaḥ |
saṃvatsare tasya gate ūrugātrādviniḥsṛtā || 103 ||
[Analyze grammar]

vaḍavā gurubhārārttā vāḍavenānvitā tadā |
ūro rnirgatya sā tasmātsuṣuve sumahābalam || 104 ||
[Analyze grammar]

vaḍavā svodarādgarbhaṃ jvālāmālāsamākulam |
vimucya tamṛṣestasya puro garbhaṃ samujjavalam || 105 ||
[Analyze grammar]

punargatā kvāpi tadā na jñātā muninā hi sā |
vaḍavānalo narastasyāḥ sa garbho niḥsṛtastadā || 106 ||
[Analyze grammar]

kalpāṃta iva bhūtānāṃ kālāgniriva varcasā |
vidyutpuñjapratīkāśaṃ taṃ dṛṣṭvā purataḥ sthitam || 107 ||
[Analyze grammar]

sa cāpi vismito'tyaṃtaṃ kimetaditi ciṃtayan |
tatastena puraḥsthena vāḍavena ca vahninā || 108 ||
[Analyze grammar]

ṛṣiḥ proktaḥ pippalādaḥ sādhito'haṃ tvayā balāt |
idānīṃ te mayā kāryaṃ karttavyaṃ yatsamāhitam || 109 ||
[Analyze grammar]

kariṣyāmīha tatsarvama sādhyamapi sādhyatām |
svoruṃ nirmathya janito yena saṃvatsarādaham |
tātoruṇā vihīno'pi kariṣye tvatsamīhitam || 110 ||
[Analyze grammar]

tacchrutvā vacanaṃ tasya muniḥ kopasamanvitaḥ |
provāca vibudhānsarvānmaddattānbhakṣaya svayam || 111 ||
[Analyze grammar]

piturvadhātkrodhakṛtāvadhānaṃ matvā surā raudramatīva ghoram |
sametya sarve puruṣaṃ purāṇaṃ samāśritāste sahasā sabhāryāḥ || 112 ||
[Analyze grammar]

sa tānsamāśvāsya surānvariṣṭhaṃ kopānalaṃ tatra yayau prahṛṣṭaḥ |
dṛṣṭvā ca taṃ vai ravipuṃjakāśamuvāca viṣṇurvacanaṃ variṣṭham || 113 ||
[Analyze grammar]

ahaṃ sureśāna tavaiva pārśvaṃ visarjito jātabhayaiśca devaiḥ |
mattaḥ śṛṇu tvaṃ vacanaṃ hi pathyaṃ yaccāraṇānāṃ bhavato'pi pathyam || 114 ||
[Analyze grammar]

jñātaṃ balaṃ te vibudhairaciṃtyaṃ vināśanaṃ cātmavatāṃ hyavaśyam |
evaṃ sthite kuru vākyaṃ surāṇāmekaikamaddhi prativāsaraṃ tvam || 115 ||
[Analyze grammar]

mukhyānāṃ koṭayastriṃśatsurāṇāṃ balaśālinām |
kathaṃ tu bhakṣaṇaṃ teṣāṃ yugapattvaṃ kariṣyasi || 116 ||
[Analyze grammar]

tasmādekaikaśasteṣāṃ karttavyaṃ bhakṣaṇaṃ tvayā |
naikena bhavatā śakyā vidhātuṃ bhakṣaṇakriyā || 117 ||
[Analyze grammar]

tathā ca pāṃḍurogitvaṃ hutabhukprāptavānpurā |
atibhakṣaṇaṃ na yuktaṃ tasmātkuru matiṃ mama || 118 ||
[Analyze grammar]

tathā ca yugapatteṣu bhakṣiteṣu punastvayā |
pratyahaṃ bhakṣaṇopāyaściṃtitavyo bubhukṣayā || 119 ||
[Analyze grammar]

saphalaiva pratijñā te nānṛtaṃ munibhāṣitam |
evaṃ kṛte'pi te sarvaṃ bhaviṣyati samīhitam || 12 ||
[Analyze grammar]

tatkariṣyāyahaṃ sarvamāhaivaṃ sa janārdanaḥ |
ekaikaśaḥ sa vibudhānbhakṣayiṣyati vāḍavaḥ || 121 ||
[Analyze grammar]

tataḥ surāḥ sureśānaṃ taṃ viṣṇumamitaujasam |
praṇamyāhuryathāyuktaṃ śobhanaṃ bhavatā kṛtam || 122 ||
[Analyze grammar]

bhūyo'dya punarevāsya doṣasyopaśamakriyām |
kartuṃ tvameva śakto'si nānyastrātā divauka sām || 123 ||
[Analyze grammar]

tataḥ pītāṃbaradharaḥ śaṃkhacakragadādharaḥ |
yuṣmadbhayaṃ hariṣyāmi tatsurānāha mādhavaḥ || 124 ||
[Analyze grammar]

śrutvaitadvibudhāḥ sarve harṣeṇotphulla locanāḥ || 125 ||
[Analyze grammar]

tatastānvibudhāndṛṣṭvā provāca sa tu vāḍavaḥ |
kimidānīṃ mayā kāryaṃ bhavatāṃ kathyatāṃ hi tat || 126 ||
[Analyze grammar]

atrāntare viśva tanurmahaujā vimohayaṃstaṃ jvalanaṃ svabuddhyā |
provāca pūrvaṃ vihitā yadāpastā bhakṣayasveti mahānubhāvaḥ || 127 ||
[Analyze grammar]

etadvyavasitaṃ viṣṇoryaḥ śṛṇoti samāhitaḥ |
so'ticārabhayānmukto jñānaṃ muktimavāpnuyāt || 128 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye vaḍavānalavaṃcanavṛttāntavarṇanaṃnāma dvātriṃśo'dhyāyaḥ || 32 ||
[Analyze grammar]