Chapter 24

[English text for this chapter is available]

devyuvāca |
kasminkāle jagannātha tatra liṃgaṃ pratiṣṭhitam |
kathamārādhanaṃ cakre kṛtārtho rohiṇīpatiḥ || 1 ||
[Analyze grammar]

īśvara uvāca |
tretāyuge ca daśame manorvaivasvatasya hi |
saṃjāto rohiṇīnātho yukto durvāsasā priye || 2 ||
[Analyze grammar]

tasminkāle tadā tatra gate varṣasahasrake |
tataḥ kṛtvā tapaścāyaṃ pratyakṣīkṛtaśaṃkaraḥ || 3 ||
[Analyze grammar]

liṃgaṃ pratiṣṭhayāmāsa brahmaṇā lokakartṝṇā |
punarvarṣasahasraṃ tu pūjayāmāsa śaṃkaram || 4 ||
[Analyze grammar]

tataḥ saṃpūjya vidhinā nijakāryārthasiddhaye |
stutiṃ cakre niśānāthaḥ pratyakṣīkṛtaśaṃkaraḥ || 5 ||
[Analyze grammar]

caṃdra uvāca |
nāsti śarvasamo devo nāsti śarvasamā gatiḥ |
nāsti śarvasamo devo nāsti śarvasamā gatiḥ || 6 ||
[Analyze grammar]

yaṃ paṭhaṃti sadā sāṃkhyāścitayaṃti ca yoginaḥ |
paraṃ pradhānaṃ puruṣaṃ tasmai jñeyātmane namaḥ || 7 ||
[Analyze grammar]

utpattau ca vināśe ca kāraṇaṃ yaṃ vidurbudhāḥ |
devāsuramanuṣyāṇāṃ tasmai jñānātmane namaḥ || 8 ||
[Analyze grammar]

yamavyayamanādyaṃtaṃ yaṃ nityaṃ śāśvataṃ dhruvam |
niṣkalaṃ paramaṃ brahma tasmai yogātmane namaḥ || 9 ||
[Analyze grammar]

yaḥ pavitraṃ pavitrāṇāmādidevo maheśvaraḥ |
punāti darśanādeva tasmai tīrthātmane namaḥ || 10 ||
[Analyze grammar]

yataḥ pravarttate sarvaṃ yasminsarvaṃ vilīyate |
pālayedyo jagatsarvaṃ tasmai sarvātmane namaḥ || 11 ||
[Analyze grammar]

aniṣṭomādibhiryajñairyaṃ yajaṃti dvijātayaḥ |
saṃpūrṇadakṣiṇaireva tasmai yajñātmane namaḥ || 12 ||
[Analyze grammar]

īśvara uvāca |
evaṃ sa saṃstute yāvaddivārātrau niśākaraḥ |
abravīdbhagavānprītaḥ prahasanniva śaṃkaraḥ || 13 ||
[Analyze grammar]

śaṃkara uvāca |
parituṣṭo'smi te vatsa stotreṇānena śītago |
varaṃ varaya bhadraṃ te bhūyo yatte manogatam || 14 ||
[Analyze grammar]

caṃdra uvāca |
yadi deyo varo'smākaṃ yadi tuṣṭo'si me prabho |
sāṃnidhyaṃ kuru deveśa liṃge'sminsarvadā vibho || 15 ||
[Analyze grammar]

ye tvāṃ paśyaṃti cātrasthaṃ bhaktyā paramayā yutāḥ |
teṣāṃ tu paramā siddhistvatprasādātsureśvara || 16 ||
[Analyze grammar]

śaṃbhuruvāca |
agre tu mama sāṃnidhyamasmiṃlliṃge mahāprabho |
viśeṣato'dhunā caṃdra tava bhaktyā niraṃtaram || 17 ||
[Analyze grammar]

sthātavyamadyaprabhṛti kṣetre'sminnumayā saha |
yasmāttvayā prabhā labdhā kṣetre'sminmatprasādataḥ |
tasmātprabhāsamityevaṃ nāmāsya prabhaviṣyati || 18 ||
[Analyze grammar]

yasmātpratiṣṭhitaṃ liṃgaṃ tvayā soma śubhaṃ mama |
somanātheti me nāma tasmātkhyātiṃ gamiṣyati || 19 ||
[Analyze grammar]

yanmamāgretanaṃ nāmakhyātaṃ brahmāvasānikam |
somanātheti ca punastadeva pracariṣyati |
drakṣyaṃti hi narā ye māmatrasthaṃ bhaktitatparāḥ || 20 ||
[Analyze grammar]

śṛṇu teṣāṃ phalaṃ vatsa bhaviṣyati niśākara |
na teṣāṃ jāyate vyādhirna dāridryaṃ na durgatiḥ |
na ceṣṭena viyogaśca mama caṃdra prabhāvataḥ || 21 ||
[Analyze grammar]

yātrāṃ kurvaṃti ye bhaktyā mama darśanakāṃkṣiṇaḥ |
pade padeśvamedhasya teṣāṃ phalamudāhṛtam || 22 ||
[Analyze grammar]

kiṃ kṛtairbahubhiryajñairupavāsairniśākara |
sakṛtpaśyaṃti māṃ ye'tra te sarve lebhire phalam || 23 ||
[Analyze grammar]

ekamāsopavāsaṃ tu kurute bhaktitatparaḥ |
yāvadvarṣasahasraṃ tu ekaḥ paśyaṃti māmiha || 24 ||
[Analyze grammar]

dvābhyāmapi phalaṃ tulyaṃ nāsti kācidvicāraṇā || 25 ||
[Analyze grammar]

eko bhavedbrahmacārī yāvajjīvaṃ niśākara |
sakṛtpaśyati māmatra samaṃ tābhyāṃ phalaṃ smṛtam || 26 ||
[Analyze grammar]

eko dānāni sarvāṇi prayacchati dvijātaye |
ekaḥ paśyati māmatra samaṃ tābhyāṃ phalaṃ smṛtam || 27 ||
[Analyze grammar]

eko vratāni sarvāṇi kurute mṛgalāṃchana |
anyaḥ paśyati māmatra samaṃ tābhyāṃ phalaṃ smṛtam || 28 ||
[Analyze grammar]

ekastīrthāni kurute japajāpyāni bhūriśaḥ |
anyaḥ paśyati māmatra phalaṃ tābhyāṃ samaṃ smṛtam || 29 ||
[Analyze grammar]

eko jñānādiyogena mumukṣurjāyate dhruvam |
anyaḥ paśyati māmatra phalaṃ tābhyāṃ samaṃ smṛtam || 3 ||
[Analyze grammar]

ekastu bhṛgupātena yāti mṛtyuṃ niśākara |
anyaḥ paśyati māmatra samaṃ tābhyāṃ phalaṃ smṛtam || 31 ||
[Analyze grammar]

ekaḥ snāti sadā māghaṃ prayāge narasattamaḥ |
anyaḥ paśyati māmatra phalaṃ tābhyāṃ samaṃ smṛtam || 32 ||
[Analyze grammar]

ekaḥ piṇḍapradānaṃ ca pitṛtīrthe samācaret |
anyaḥ paśyati māmatra phalaṃ tābhyāṃ samaṃ smṛtam || 33 ||
[Analyze grammar]

gosahasraprado hyeko brāhmaṇe vedapārage |
ekaḥ paśyati māmatra phalaṃ tābhyāṃ samaṃ smṛtam || 34 ||
[Analyze grammar]

pañcāgniṃ sādhayedeko grīṣmakāle sudāruṇe |
ekaḥ paśyati māmatra phalaṃ tābhyāṃ samaṃ smṛtam || 35 ||
[Analyze grammar]

snātaḥ somagrahe candra somavāre ca bhaktitaḥ |
yo māṃ paśyati sarveṣāmeteṣāṃ labhate phalam || 36 ||
[Analyze grammar]

sarasvatī samudraśca somaḥ somagrahastathā |
darśanaṃ somanāthasya sakārāḥ pañca durllabhāḥ || 37 ||
[Analyze grammar]

nairaṃtaryeṇa ṣaṇmāsānvidhinā yaḥ prapūjayet |
puṇyaṃ tadeva saphalaṃ labhate viṣuvārcanāt || 38 ||
[Analyze grammar]

etadeva tu vijñeyaṃ grahaṇe cottarāyaṇe |
saṃkrāṃtidinacchidreṣu ṣaḍaśītimukheṣu ca || 39 ||
[Analyze grammar]

māsaiścaturbhiryatpuṇyaṃ vidhinā'pūjya śaṃkaram |
kārttikyāṃ sa labhetpuṇyaṃ caitryāṃ taddviguṇaṃ smṛtam |
puṇyametattu phālgunyāmāṣāḍhyāmevameva tu || 40 ||
[Analyze grammar]

eko dadyādgavāṃ lakṣaṃ dogdhrīṇāṃ vedapārage |
eko mamārcayelliṃgaṃ tasya puṇyaṃ tato'dhikam || 41 ||
[Analyze grammar]

māsemāse ca yo'śnīyādyāvajjīvaṃ sureśvari |
yaścārccayetsakṛlliṃgaṃ samametanna saṃśayaḥ || 42 ||
[Analyze grammar]

tapaḥśīlaguṇopete pātre vedasya pārage |
suvarṇakoṭiṃ yaddattvā tatphalaṃ kusumena tu || 43 ||
[Analyze grammar]

arkapuṣpe'pi caikasmiñchivāya vinivedite |
daśa dattvā suvarṇāni yatphalaṃ tadavāpnuyāt || 44 ||
[Analyze grammar]

arkapuṣpasahasrebhyaḥ karavīraṃ viśiṣyate |
karavīra sahasrebhyo droṇapuṣpaṃ viśiṣyate || 45 ||
[Analyze grammar]

droṇapuṣpasahasrebhyo hyapāmārgaṃ viśiṣyate |
apāmārgasahasrebhyaḥ kuśapuṣpaṃ viśiṣyate |
kuśapuṣpa sahasrebhyaḥ śamīpuṣpaṃ viśiṣyate || 46 ||
[Analyze grammar]

śamīpuṣpaṃ bṛhatyāśca kusumaṃ tulyamucyate |
karavīrasamā jñeyā jātīvijayapāṭalāḥ || 47 ||
[Analyze grammar]

śvetamaṃdāra kusumaṃ sitaṃpadmasamaṃ bhavet |
nāgacaṃpakapunnāgadhattūrakusumaṃ smṛtam || 48 ||
[Analyze grammar]

ketakījātimuktaṃ ca kandayūthīmadantikāḥ |
śirīṣasarjajaṃbūkakusumāni vivarjjayet || 49 ||
[Analyze grammar]

ākulīkusumaṃ patraṃ karaṃjendrasamudbhavam |
bibhītakāni puṣpāṇi kusumāni vivarjjayet || 50 ||
[Analyze grammar]

kanakāni kadaṃbāni rātrau deyāni śaṃkare |
devaśeṣāṇi puṣpāṇi divā rātrau ca mallikā || 51 ||
[Analyze grammar]

praharaṃ tiṣṭhate mallī karavīramaharniśam |
kīṭakeśāpaviddhāni rātrau paryuṣitāni ca || 52 ||
[Analyze grammar]

svayaṃ patitapuṣpāṇi tyajedupahatāni ca |
tulasī śatapatraṃ ca gandhārī damanastathā || 53 ||
[Analyze grammar]

sarvāsāṃ patrajātīnāṃ śreṣṭho marubakaḥ smṛtaḥ |
etaiḥ puṣpaviśeṣaistu pūjyaḥ someśvaraḥ sadā || 54 ||
[Analyze grammar]

yātrāyāḥ phalamāpnoti svargaloke mahīyate |
etāvaduktvā vacanaṃ tatraivāntaradhīyata || 55 ||
[Analyze grammar]

candramā yakṣmaṇā muktaḥ svasthānanirato'bhavat |
āhūya viśvakarmāṇaṃ prāsādaṃ paryakalpayat |
śuddhasphaṭikasaṃkāśaṃ gokṣīradhavalojjvalam || 56 ||
[Analyze grammar]

prāsādaṃ merunāmānaṃ hemaprākāratoraṇam |
caturdaśānye paritaḥ prāsādāḥ parikalpitāḥ |
teṣāṃ nāmāni vakṣyāmi pratyekaṃ tāni me śṛṇu || 57 ||
[Analyze grammar]

kesarī sarvatobhadro nadano nandiśālakaḥ |
nandīśo mandaraścaiva śrīvṛkṣo hyamṛtodbhavaḥ || 58 ||
[Analyze grammar]

himavānhemakūṭaśca kailāsaḥ pṛthivījayaḥ |
indranīlo mahānīlo bhūdharo ratnakūṭakaḥ || 59 ||
[Analyze grammar]

vaiḍūryaḥ padmarāgaśca vajrako mukuṭojjvalaḥ |
airāvato rājahaṃso garuḍo vṛṣabhastathā || 60 ||
[Analyze grammar]

meruḥ prāsādarājā ca devānāmālayo hi saḥ |
ādau pañcāṇḍako jñeyaḥ kesarīnāmataḥ sthitaḥ || 61 ||
[Analyze grammar]

caturthāṃśā ca tadvṛddhiryāvanmeruḥ prakīrtitaḥ || 62 ||
[Analyze grammar]

evaṃ pṛthakkārayitvā prāsādāṃśca caturdaśa |
brahmādīnāṃ devatānāṃ samīpasthānavāsinām || 63 ||
[Analyze grammar]

daśa cānyānbhūdharādīnvṛṣabhāntānvarānane |
ādau kaparddinaṃ kṛtvā prāsādānparyakalpayat || 64 ||
[Analyze grammar]

meruḥ prāsādarājo vai sa tu someśvare kṛtaḥ |
tretāyuge tu daśame manovairvasvatasya ca || 65 ||
[Analyze grammar]

kārayitvā maṃḍapāṃśca pratiṣṭhāpya yathāvidhi |
nadānāṃ tu śataṃ kṛtvā vāpīkūpa sahasrakam || 66 ||
[Analyze grammar]

gṛhāṇāṃ tu sahasrāṇi dīnānāthāśrayāṇi ca |
kārayitvā vidhānena viprebhyaḥ pradadau pṛthak || 67 ||
[Analyze grammar]

niveśya nagaraṃ somaḥ śrīsomeśvarasannidhau |
svakarmaṇāṃ pracārārthamathābhyarthayata dvijān || 68 ||
[Analyze grammar]

somo'smi bhavatāṃ rājā prasādātparameṣṭhinaḥ |
tathāpi vinayenaiva bhaktyāṃ vijñāpayāmi vaḥ || 69 ||
[Analyze grammar]

dhanaṃ hiraṇyaratnādi dhānyaṃ vrīhiyavādikam |
gomahiṣyādipaśavo vastrāṇi vividhāni ca || 70 ||
[Analyze grammar]

kadalīnālikerāṇi tāṃbūlīpūgamālinaḥ |
mano'bhirāmacaramā ārāmāḥ paritaḥ sthitāḥ || 71 ||
[Analyze grammar]

jaṃbūdvīpādhipāḥ sarve bhavatāmatravāsi nām |
ādeśaṃ ca kariṣyaṃti śirasyādhāya śobhanam || 72 ||
[Analyze grammar]

dvīpāṃtarādāgataiśca karpūrāgurucaṃdanaiḥ |
anyaiśca vividhairdravyaiḥ saṃpūrṇā bhavatāṃ gṛhāḥ || 73 ||
[Analyze grammar]

paṇyānāṃ śatasaṃkhyānāṃ vyavahāranidarśinaḥ |
brahmottarāṇi tanvaṃti vaṇijo lābhakāṃkṣiṇaḥ || 74 ||
[Analyze grammar]

bhavatsu bhṛtyabhāvena varttamānā hitaiṣiṇaḥ |
te cānye ca tathā paurā nāvasīdaṃti karhicit || 75 ||
[Analyze grammar]

evaṃ saṃpūrṇavibhavairbhavadbhiḥ śreyase mama |
kratukriyā vitanyaṃtāṃ vidhivadbhūridakṣiṇāḥ || 76 ||
[Analyze grammar]

brahmādīni ca sarvāṇi pravartaṃtāmaharniśam |
dīnāṃdhakṛpaṇādīnāṃ kriyatāmārtināśanam || 77 ||
[Analyze grammar]

abhyāgatānāmaucityādātithyaṃ ca vidhīyatām |
tīrthayātrāprasaṃgena sametānāṃ mahātmanām || 78 ||
[Analyze grammar]

brahmarṣīṇāmāśrameṣu dīyatāmāśrayāḥ sadā |
mayātra sthāpitaṃ liṃgaṃ sarvakālaṃ dṛḍhavratāḥ || 79 ||
[Analyze grammar]

pavitrairupacāraiśca pūjayaṃtu dvijottamāḥ |
aṣṭau pramāṇapuruṣāḥ paurāṇāṃ kāryadarśinaḥ || 80 ||
[Analyze grammar]

vyavahārānavekṣadhvaṃ smṛtyācāraviśāradāḥ |
vyavasthāṃ matkṛtāmetāṃ bhavaṃto'tra dvijottamāḥ || 81 ||
[Analyze grammar]

dhārayaṃtu mahātmāno diggajā iva medinīm |
evaṃ prabhutvamāsthāya sthāne'smiñchivaśālini || 82 ||
[Analyze grammar]

śrutismṛtipurāṇoktāndharmānācarata dvijāḥ |
niśamya somasya vaco vinītamiti te dvijāḥ || 83 ||
[Analyze grammar]

uvāca kauśikasteṣu gotrāṇāṃ prathamo dvijaḥ |
sādhūpadiṣṭamasmākaṃ dvijarājena sarvathā || 84 ||
[Analyze grammar]

sarvametatkariṣyāmaḥ kiṃtu kiṃcinniśāmaya |
niyogataḥ pūjayatāṃ śivanirmālyasevinām || 85 ||
[Analyze grammar]

pātityaṃ jāyate'smākaṃ śrutismṛtivigarhitam |
śrutismṛtī hi rudrasya yasmādājñādvayaṃ mahat || 86 ||
[Analyze grammar]

kastadullaṃghayenmūḍhaḥ prāṇaiḥ kaṃṭhaga tairapi || 87 ||
[Analyze grammar]

aṣṭamūrteḥ punarmūrttāvagnau devamukhe makhān |
kurvāṇāḥ śrutimārgeṇa prīṇayāmo'khilaṃ jagat || 88 ||
[Analyze grammar]

jagadbhagavato rūpaṃ vyaktameta tpuradviṣaḥ |
mitho vibhinnamityetadabhinnaṃ punarīśvarāt || 89 ||
[Analyze grammar]

agnau prāstāhutiḥ samyagādityamupatiṣṭhate |
ādityājjāyate vṛṣṭirvṛṣṭerannaṃ tataḥ prajāḥ || 90 ||
[Analyze grammar]

śrutismṛtipurāṇādisadabhyāsaprasaṃginām |
tattadartheṣu puṇyārthaṃ pravṛttākhilakarmaṇām || 91 ||
[Analyze grammar]

asmākamavakāśo'pi viralo liṃga pūjane |
rudrajāpyairmahāyajñairyajānāścaivamīśvaram || 92 ||
[Analyze grammar]

yathākṣaṇaṃ yathākālaṃ liṃgaṃ vedamupāsmahe |
yattu te'bhimataṃ soma śrīsomeśvarapūjanam |
tacca saṃpādayiṣyāmaḥ saviśeṣaṃ mahāmate || 93 ||
[Analyze grammar]

yena tvadīpsitaṃ sidhyettamupāyaṃ niśāmaya |
gaurīśaṃkarasaṃvādaṃ śrutvā bhagavato mukhāt || 94 ||
[Analyze grammar]

nāradaḥ prāha naḥ pūrvaṃ kathayāmastameva te |
brahmadevadviṣaḥ pūrvaṃ śataśo daityadānavāḥ |
tapobhirugrairvividhaiḥ śaṃkaraṃ pratipedire || 95 ||
[Analyze grammar]

teṣāmatyugratapasāmananyāsaktacetasām |
prasādamīśvaraścakre kāruṇyāmṛtasāgaraḥ || 96 ||
[Analyze grammar]

sa hi tribhuvanasvāmī devadevo maheśvaraḥ |
apekṣate varaṃ dātuṃ bhaktimevānapāyinīm || 97 ||
[Analyze grammar]

dadau sa bhuvanaiśvaryyaprāyānabhimatānvarān |
teṣāṃ bhaktyaiva saṃtuṣṭo devabrahmadviṣāmapi || 98 ||
[Analyze grammar]

brahmaṇā viṣṇunā cāpi yasyāṃto nādhigamyate |
tasyātarkyaprabhāvasya ko nu vedāśayaṃ prabhoḥ || 99 ||
[Analyze grammar]

durvṛttebhyo'pi daityebhyastapobhirvaradāyinam |
papraccha svacchhṛdayā pārvatī parameśvaram || 100 ||
[Analyze grammar]

pārvatyuvāca |
bhagavanprasādaṃ te prāpya dhṛṣyaṃto bhuvanatrayam |
upadravaṃtīṃdramukhāndevānsaṃkṣobhayaṃti ca || 101 ||
[Analyze grammar]

varaṃ dadāsi kiṃ teṣāṃ tādṛśānāṃ durātmanām |
jagataḥ svastaye yeṣāṃ na manāgapi ceṣṭitam || 102 ||
[Analyze grammar]

tvayā dattavarānetāndivyānbhogopabhoginaḥ |
avadhīrya tavaiśvaryaṃ kathaṃ viṣṇurnihaṃti ca || 103 ||
[Analyze grammar]

hatānāṃ ca punasteṣāṃ kā gatiḥ syādvada prabho || 104 ||
[Analyze grammar]

īśvara uvāca |
sāttvikā rājasāścaiva tāmasāśceti vai tridhā |
bhavaṃti lokāsteṣvete tamaḥprāyā durāsadāḥ || 105 ||
[Analyze grammar]

suraiḥ saha spardhamānāstapobhirapi tāmasaiḥ |
māṃ bhajaṃte muhurmohājjagadutsādanodyatāḥ || 106 ||
[Analyze grammar]

varaṃ dadāmi yatteṣāṃ bhaktistatra tu kāraṇam |
ahaṃ hi bhaktyā sugrāhyo nātra kāryā vicāraṇā || 107 ||
[Analyze grammar]

taponurūpānāsādya varāṃste pāpakāriṇaḥ |
viṣṇunā yannihanyate tacca devi nibodha me || 108 ||
[Analyze grammar]

ahaṃ hariśca yadbhinnau guṇabhāgo'tra kāraṇam |
paramārthādabhinnau ca rahasyaṃ paramaṃ hyadaḥ || 109 ||
[Analyze grammar]

ārādhyārādhakādiśca bhedaḥ sāmānya eva nau |
tathā hyahamimāṃ gaṃgāṃ viṣṇoḥ pādāgraniḥsṛtām || 11 ||
[Analyze grammar]

vahāmi śirasā bhaktyā tvadīkṣāśaṃkito'pi san |
api viṣṇustribhuvanaṃ paritrātuṃ vyavasthayā || 111 ||
[Analyze grammar]

māmupāsya ciraṃ lebhe cakraṃ duṣṭanibarhaṇam |
tvāṃ ca tasya mahāmāyāmaprameyātmano hareḥ || 112 ||
[Analyze grammar]

ārādhayāmi tadbhaktyā trijagajanmakāraṇam |
śirasyādhāya cānyāṃ me śaktirūpāṃ tathā hariḥ || 113 ||
[Analyze grammar]

ajo'pi janmānyāsādya lokarakṣāṃ karoti vai |
haṃtuṃ hiraṇyakaśipuṃ narasiṃhavapuśca saḥ || 114 ||
[Analyze grammar]

jagajjighāṃsuḥ śamito mayā śarabha rūpiṇā |
māṃ ca bāṇaparitrāṇe triśūlodyamakāriṇam || 115 ||
[Analyze grammar]

mānuṣye'pyavatāre'sau staṃbhayitvā sa līlayā |
prabhāvaṃ mahimānaṃ ca varddhayanmāmakaṃ hariḥ |
varivasyati māṃ nityamaṃtarātmāpi me vibhuḥ || 116 ||
[Analyze grammar]

athāhaṃ paramātmānamenamādyaṃtavarjitam |
dhyānayogaiḥ samādhau ca bhāvayāmi niraṃtaram || 117 ||
[Analyze grammar]

tadevaṃ nāvayorbhedo vidyate pāramārthikaḥ |
bhedaṃ ca tāratamyaṃ ca mūḍhā eva vitanvate || 119 ||
[Analyze grammar]

vaiṣṇavaṃ rūpamāsthāya durvṛttānhanmi tānaham |
gatiṃ ca teṣāmadhunā maheśvari niśāmaya || 119 ||
[Analyze grammar]

mayi bhaktyavasāne tu hareḥ saṃdarśanena ca |
krodhadarpābhibhūtatvānna muktiṃ prāpnuvaṃti te || 120 ||
[Analyze grammar]

āvayostu prabhāvena te punarddhautakalmaṣāḥ |
brahmarṣīṇāṃ kule janma saṃprāptā muktihetukam || 121 ||
[Analyze grammar]

brahmacārivratā dūrdhvaṃ yogaṃ pāśupataṃ śritāḥ |
prācīnakarmasaṃskārātte punarmāmupāsate || 122 ||
[Analyze grammar]

bhaktiyogena cāsthāya vrataṃ pāśupatādikam |
śmaśānavāsino nagnā apare caikavāsasaḥ || 123 ||
[Analyze grammar]

bhikṣābhujo bhūtibhṛto malliṃgānyarccayaṃti te |
tathā madekāgradhiyo maddhyānaikadṛḍhavratāḥ || 124 ||
[Analyze grammar]

ye tvāmapi namasyaṃti jagatāṃ mama ceśvarīm |
dehāvasānayogena muktiṃ teṣāṃ dadāmyaham || 125 ||
[Analyze grammar]

sārūpyasālokyamayīṃ mayyāveśitacetasām |
sāyujyamuktaye nāyaṃ yogaḥ pāśupato yataḥ |
smṛtyācāreṇa munibhiḥ sa sadbhistena garhitaḥ || 126 ||
[Analyze grammar]

dvijā ūcuḥ |
tīrthayātrāprasaṃgena tāni hopagatāndvijān |
svamānamupaneṣyāmo bhaktyāvarjjitamānasān || 127 ||
[Analyze grammar]

śucibhikṣānnakaupīnakamaṇḍalvādisatkṛtāḥ |
ananyakāryyāḥ satatamihāgatya tapasvinaḥ || 128 ||
[Analyze grammar]

bhavatpradattairvividhairupahārairataṃdritāḥ |
tattvatastattvasaṃkhyāste śivadharmaikatatparāḥ || 129 ||
[Analyze grammar]

śrīsomeśvaramabhyarcya tava śreyo'bhivarddhakāḥ |
muktimaṃte gamiṣyaṃti devasyātisudurllabhām || 130 ||
[Analyze grammar]

tato'nye'tha tato'pyanye tataścānye tapodhanā |
parīkṣitāstu te'smābhirbhavitāro niśāpate || 131 ||
[Analyze grammar]

dvijā ūcuḥ |
ityāha bhagavāndevyā pṛṣṭaḥ sa ca trilocanaḥ |
tatraiva nāradaḥ sarvaṃ saṃvādaṃ śivayeritam || 132 ||
[Analyze grammar]

śrutvā naḥ kathayāmāsa kathāṃ goṣṭhīṣu pṛcchatām |
tava cāsmābhiradhunā sarvametadudīritam || 133 ||
[Analyze grammar]

evamuktastu taiḥ prītaḥ somaḥ svabhavanaṃ yayau |
tadājñayā ca tatsarvaṃ yathoktaṃ te'pi kurvate || 134 ||
[Analyze grammar]

devyuvāca |
evaṃ prabhāvo deveśaḥ someśaḥ pāpanāśanaḥ |
kenopāyena tuṣyeta vratena niyamena vā || 135 ||
[Analyze grammar]

īśvara uvāca |
kathayāmi sphuṭaṃ dharmmaṃ mānuṣāṇāṃ hitāya vai |
sa yena tuṣyate devaḥ śṛṇu tvaṃ surasundari || 136 ||
[Analyze grammar]

nityopavāsanaktāni vratāni vividhāni ca |
tīrthe dānāni sarvāṇi pātre dattānyaśeṣataḥ || 137 ||
[Analyze grammar]

tapaśca taptaṃ tenaiva snātaṃ tenaiva puṣkare |
kedāre tu jalaṃ tena gatvā pītaṃ tu niścitam || 138 ||
[Analyze grammar]

tena dṛṣṭaṃ varārohe jyotirliṃgaṃ mahāprabham |
somavāravrataṃ divyaṃ yena cīrṇaṃ tu saṃśraye || 139 ||
[Analyze grammar]

kimanyairbahubhirdānairdattaiḥ pātreṣu sundari || 140 ||
[Analyze grammar]

pūjitaṃ yena bhāvena somavāradināṣṭa kam |
tena sarvaṃ kṛtaṃ devi cīrṇaṃ tatra mahāvratam || 141 ||
[Analyze grammar]

itihāsamimaṃ pūrvaṃ kathayāmi tava priye |
yathāvṛttaṃ mahādevi somavāravrataṃ prati || 142 ||
[Analyze grammar]

īśvara uvāca |
kailāsasya maheśāni uttare ca vyavasthitā |
niṣadhopari vistīrṇā purī nāma svayaṃprabhā || 143 ||
[Analyze grammar]

nānāratnasuśobhāḍhyā nānāgandharvasaṃkulā |
sarvāvayavasaṃpūrṇā śakrasyevāmarāvatī || 144 ||
[Analyze grammar]

ghanavāhananāmā ca gandharvastatra tiṣṭhati |
bhuṃkte tatra mahābhogāndevairapi sudurlabhān || 145 ||
[Analyze grammar]

navayauvanasaṃyuktā bhāryā tasya manoharā |
prauḍhavākyā suśīlā ca pīnonnatapayodharā || 146 ||
[Analyze grammar]

tayā sārddhaṃ tu sambhogānbhuṃkte gaṃdharvanāyakaḥ |
utpannā tasya kālena putrī putrāṣṭakopari || 147 ||
[Analyze grammar]

sarvāvayavasaṃpannā sarvavijñānavedinī |
gaṃdharvasenā vikhyātā nāmnā sā parameśvari || 148 ||
[Analyze grammar]

kanyānāṃ tu sahasreṣu pravarā rūpaśālinī |
kautūhalena sā pitrā proktā krīḍasva bhāmini || 149 ||
[Analyze grammar]

udyāne ramaṇīye'tra nānādrumalatākule |
vṛkṣairanekaiḥ saṃkīrṇe phalapuṣpasamanvite || 150 ||
[Analyze grammar]

evaṃ sā ramate nityaṃ kanyāparivṛtā sadā |
evaṃ dṛṣṭvā krīḍamānā mātā bhartāramabravīt || 151 ||
[Analyze grammar]

jīvitaṃ niṣphalaṃ svāminmama te saha bāṃdhavaiḥ |
yasyedṛśī gṛhe kanyā tiṣṭhate bhartṛvarjjitā || 152 ||
[Analyze grammar]

ityuktaḥ sa tu gaṃdharvo bhāryāṃ vacanamabravīt |
anveṣayāmi bharttāraṃ putryarthe tu manoharam || 153 ||
[Analyze grammar]

ityuktvā'hvāpa yāmāsa putrīṃ tāṃ ghanavāhanaḥ |
āhūtā pitṛmātṛbhyāṃ tvaritā'gatya sundari || 154 ||
[Analyze grammar]

anukrameṇa sarveṣāṃ patitā pādayoḥ śubhā |
ādeśaṃ dehi me tāta ki nu kāryaṃ mayā'dhunā || 155 ||
[Analyze grammar]

uktaṃ ca ghanavāhena harṣitena vacastataḥ |
he putri tava yaḥ kaścidvaraḥ saṃprati rocate |
divyaṃ drakṣye tvatsadṛśaṃ gaṃdharvāṇāṃ śiromaṇim || 156 ||
[Analyze grammar]

ityuktā krodhatāmrākṣī pitaraṃ vākyamabravīt |
mama rūpasya koṭyaṃśe kiṃ kopyasti jagattraye |
tacchrutvā cādbhutaṃ vākyaṃ pitā mātā ca mohitau || 157 ||
[Analyze grammar]

sarve viṣādamāpannā bāṃdhavāśca pare janāḥ |
aśobhanamidaṃ vākyaṃ kanyayā yatprabhāṣitam |
ityuktvā tu gatāḥ sarve jananījanabāṃdhavāḥ || 158 ||
[Analyze grammar]

sā tatraiva mahodyāne ramate sakhisaṃyutā |
hiṃḍolake samārūḍhā vasaṃte māsi bhāmini || 159 ||
[Analyze grammar]

tāvaddivyavimānasthaḥ śikhaṇḍī gaṇanāyakaḥ |
gacchankhe dadṛśe kanyāṃ rūpaudāryyasamākulām || 160 ||
[Analyze grammar]

gītavādyena nṛtyena ramatīṃ dudubhisvanaiḥ |
sa mādhyāhnikasaṃdhyāyāmavatīrya vimānataḥ || 161 ||
[Analyze grammar]

krīḍamāno'psarobhistu tatrodyāne sthitastataḥ |
śuśrāva vākyaṃ kanyāyā gaṃdharvaduhitustadā || 162 ||
[Analyze grammar]

na ko'pi sadṛśo loke mama rūpeṇa dṛśyate |
devo vā dānavo vāpi koṭyaṃśe mama rūpataḥ || 163 ||
[Analyze grammar]

iti vākyaṃ tataḥ śrutvā gaṇaḥ krodhasamanvitaḥ |
śaśāpa tāṃ sucārvaṃgīṃ sāhaṃkārāṃ gaṇeśvaraḥ || 164 ||
[Analyze grammar]

gaṇa uvāca |
māṃ dṛṣṭvā yadviśālākṣi rūpasaubhāgyagarvitā |
samākṣipasi gaṃdharvāndevādyāṃścaiva garvitā || 165 ||
[Analyze grammar]

tasmātte garvasaṃyukte kuṣṭhamaṃge bhaviṣyati |
śrutvā śāpaṃ tataḥ kanyā bhayabhītā tapasvinī || 166 ||
[Analyze grammar]

sāṣṭāṃgaṃ praṇipatyāthānugrahārthamayācata |
bhagavanmama dīnāyāḥ śāpasyānugrahaṃ prabho |
prayaccha tvaṃ mahā bhāga naivaṃ kartrī punaḥ kvacit || 167 ||
[Analyze grammar]

ityuktastava kāruṇyācchikhaṇḍī gaṇanāyakaḥ |
anugrahaṃ dadau tasyā gaṃdharvaduhitustadā || 168 ||
[Analyze grammar]

śikhaṇḍyuvāca |
jātirūpeṇa saṃyukto vidyāhaṃkārasaṃpadā |
yo yena garvitaḥ prāṇī sa taṃ prāpya vinaśyati || 169 ||
[Analyze grammar]

tasmādgarvo naiva kāryo garvasyaitatphalaṃ smṛtam |
śṛṇuṣvānugrahaṃ bāle śrutvā caivāvadhāraya || 170 ||
[Analyze grammar]

himavadvanamadhyastho gośṛṃga ṛṣipuṃgavaḥ |
kariṣyatyupakāraṃ sa evamuktvā gataḥ priye || 171 ||
[Analyze grammar]

tāvatsaṃdhyā samāyātā tatkṣaṇādbhuvanāṃtare || 172 ||
[Analyze grammar]

tato gaṃdharvvatanayā bhagnotsāhā natānanā |
parityajya vanaṃ ramyamāgatā pituraṃtike || 173 ||
[Analyze grammar]

kathayāmāsa tatsarvaṃ kāraṇaṃ kuṣṭhasaṃbhavam |
tacchrutvā śokasaṃtaptau pitarau vigataprabhau || 174 ||
[Analyze grammar]

himavaṃtaṃ giriṃ prāptau tvaritau sutayā saha |
gośṛṃgasya ṛṣestatra dadṛśāte tathāśramam || 175 ||
[Analyze grammar]

tatra madhyasthitaṃ dṛṣṭvā gośṛṃgamṛṣipuṃgavam |
praṇamya daṇḍavadbhūmau stutvā stotrairanekadhā || 176 ||
[Analyze grammar]

upaviṣṭogratastasya praṇipatya punaḥpunaḥ |
provāca vacanaṃ tatra pūrvavṛttaṃ yathā'bhavat || 177 ||
[Analyze grammar]

kathite caiva vṛttāṃte punaḥ papraccha kāraṇam |
pṛṣṭe tu kāraṇe tatra gaṃdharvaḥ proktavāṃstadā || 178 ||
[Analyze grammar]

gaṃdharva uvāca |
duhiturme śarīraṃ tu vyādhikuṣṭhenapīḍitam |
yenopaśamanaṃ yāti tattvaṃ karttumihārhasi || 179 ||
[Analyze grammar]

prasādaṃ kuru viprarṣe mama dīnasya sāṃpratam |
yathā kuṣṭhaṃ śamaṃ yāti mama putryāstu kāraṇam || 180 ||
[Analyze grammar]

gośṛṃga uvāca |
bhārate tu mahātejāstiṣṭhatyudadhisannidhau |
devaḥ someśvaronāma sarvadevanamaskṛtaḥ || 181 ||
[Analyze grammar]

kṣaṇaṃ kṛtvā hi saṃpūjya ekāhāreṇa mānavaiḥ |
sarvavyādhivināśāya sarvakāryārthasiddhaye || 182 ||
[Analyze grammar]

somavāravrateneśaṃ samārādhaya śaṃkaram |
evaṃ kṛte vyādhināśastava putryā bhaviṣyati || 183 ||
[Analyze grammar]

īśvara uvāca |
iti tadvacanaṃ śrutvā maharṣerbhāvitātmanaḥ |
tatra gaṃtuṃ manaścakre someśārādhanaṃ prati || 184 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye śrīsomeśvara varṇane somavāravratamāhātmyavarṇanaṃnāma caturviṃśo'dhyāyaḥ || 24 ||
[Analyze grammar]