Chapter 19

[English text for this chapter is available]

devyuvāca |
yadyevaṃ sakalaścaṃdraḥ kathaṃ na vidhṛtastvayā |
antabhāve kalānāṃ tatkāraṇaṃ kathaya prabho || 1 ||
[Analyze grammar]

īśvara uvāca |
amā ṣoḍaśabhedena devi proktā mahākalā |
saṃsthitā paramā māyā dehināṃ deha dhāriṇī || 2 ||
[Analyze grammar]

amādipaurṇamāsyaṃtā yā eva śaśinaḥ kalāḥ |
tithayastāḥ samākhyātāḥ ṣoḍaśaiva prakīrtitāḥ || 3 ||
[Analyze grammar]

amā sūkṣmā parā śaktiḥ sā tvaṃ devi prakīrtitā |
pralayotpattiyogena sthitāḥ kālakramoditāḥ || 4 ||
[Analyze grammar]

ṣoḍaśaiva svarā ye tu ādyāḥ sṛṣṭayaṃtakāḥ priye |
kālasyāvayavāste ca vijñeyāḥ kālavedibhiḥ || 5 ||
[Analyze grammar]

truṭirlavo nimeṣaśca kalā kāṣṭhā muhūrtakam |
rātryahaḥpakṣamāsāśca ayanaṃ vatsaraṃ yugam || 6 ||
[Analyze grammar]

manvataraṃ tathā kalpaṃ mahākalpaṃ ca ṣoḍaśa |
kalā visarjanī yā tu jīvamāśritya vartate || 7 ||
[Analyze grammar]

sā sṛjatyakhilaṃ viśvaṃ viṣuvadvayasaṃyutam |
tathā saṃvaraṇī yā tu viśvaṃ saṃharate priye |
netrapātāccaturbhāgastruṭikālo nigadyate |
tasmācca dviguṇaṃ viddhi nimiṣaṃ tanmaheśvari || 9 ||
[Analyze grammar]

nimiṣaistriṃśadbhiḥ kāṣṭhā tābhirviṃśatibhiḥ kalā |
viṃśatikalo muhūrtaḥ syāddinaṃ paṃcadaśaistu taiḥ || 10 ||
[Analyze grammar]

dinamānā niśā jñeyā ahorātraṃ dvayādbhavet |
taiḥ paṃcadaśabhiḥ pakṣo dvipakṣo māsa ucyate || 11 ||
[Analyze grammar]

māsaiścaivāyanaṃ ṣaḍbhirvarṣaṃ syādayanadvaye |
catvāriṃśacca lakṣāṇi lakṣāṇāṃ tritayaṃ punaḥ || 12 ||
[Analyze grammar]

viṃśatiśca sahasrāṇi jñeyaṃ sauraṃ caturyugam |
caturyugaikasaptatyā manvaṃtaramudāhṛtam || 13 ||
[Analyze grammar]

aiṃdrametadbhavedāyuḥ samāsāṃtaṃ ca kīrtitam |
caturdaśendraiḥ pralīnaiḥ kalpaṃ brahmadinaṃ bhavet || 14 ||
[Analyze grammar]

rātriśca tāvatī caiva caturyugasahasrikā |
anena dinamānena śatābdaṃ jīvati priye || 15 ||
[Analyze grammar]

mamaiva nimiṣārddhena sahasrāṇi caturddaśa |
vinaśyaṃti tato viṣṇorasaṃkhyātāḥ pitāmahāḥ || 16 ||
[Analyze grammar]

evaṃ krameṇa deveśi samutpannamidaṃ jagat |
śaśisūryavibhāgena citrarūpamanaṃtakam || 17 ||
[Analyze grammar]

kalā devi yadādyaṃtamanādimajamavyayam |
tadānvitaḥ śaśī tasyāmadhomukhamavasthitaḥ || 18 ||
[Analyze grammar]

evaṃ kṣayodayaṃ jñeyaṃ caṃdrārkābhyāmavasthitam |
sṛṣṭikramaṃ mayā proktaṃ saṃhāramadhunā śṛṇu || 19 ||
[Analyze grammar]

mahākalpaṃ hataṃ kalpaiḥ kalpaṃ manvaṃtarairhatam |
māsaṃ pakṣāhataṃ kṛtvā taṃ cāhorātribhājitam || 2 ||
[Analyze grammar]

ahorātraṃ muhūrtena muhūrtaṃ tu kalāhatam |
kalāṃ kāṣṭhā hatāṃ kṛtvā kāṣṭhāṃ nimiṣabhājitām || 21 ||
[Analyze grammar]

nimiṣaṃ ca lavairhatvā lavaṃ truṭivibhājitam |
tadatītaṃ praśāṃtaṃ ca nirvikāramalakṣaṇam || 22 ||
[Analyze grammar]

tasya ceyaṃ parā māyā kalā śirasi dhāritā |
sā śaktirdevadevasya viśvākārā parā priye |
mohayitvā tu saṃtānaṃ saṃsārayati pārvati || 23 ||
[Analyze grammar]

evametajjagaddevi utpattisthitilakṣaṇam |
yatraivotpadyate kṛtsnaṃ punastatraiva līyate || 24 ||
[Analyze grammar]

seyaṃ māyāmayī śaktiḥ śuddhāśuddhasvarūpiṇī |
caṃdrarūpā sthitā sā tu tava devi prakāśayet || 25 ||
[Analyze grammar]

devyuvāca |
paṃcāgninopasantaptā varṣakoṭīranekadhā |
tattapaḥ saphalaṃ jātaṃ me'dya deva jagatpate || 26 ||
[Analyze grammar]

sṛṣṭiyogo mayā jñātaḥ saṃhāraśca maheśvara |
candrotpattisvarūpaṃ ca kalāmānaṃ tathaiva ca || 27 ||
[Analyze grammar]

adhunā mama deveśa sandeho hṛdi saṃsthitaḥ |
kautūhalaṃ paraṃ deva kathayasva maheśvara || 28 ||
[Analyze grammar]

amṛtādeva saṃbhūtaḥ sarvāhlādakaraḥ śaśī |
priyaśca tava deveśa vallabhaścaṃdramāstathā || 29 ||
[Analyze grammar]

caṃdre ca cadi ityeṣa hlādane dhāturiṣyate |
śuklatve cāpatattve ca mayā tveṣa vibhāvyate || 3 ||
[Analyze grammar]

sarvauṣadhīnāmadhipaḥ pitṝṇāṃ prīṇanaṃ param |
tadāśrayaśca tvadbhaktastva tsevātatparaḥ śaśī || 31 ||
[Analyze grammar]

tathāpi sakalaṃko'yaṃ kautukaṃ kurute mama |
devi brahmāṃḍasaṃghaṭṭamālāmaṃḍitaśekharaḥ || 32 ||
[Analyze grammar]

śīrṣe tava niviṣṭasya kaṣṭaṃ caṃdrasya cedyadi |
tarhi nātha na śocyā vai saṃsāre duḥkhabhāginaḥ || 33 ||
[Analyze grammar]

na cāsti triṣu lokeṣu na caitatsaṃbhaviṣyati |
yatra śakto bhavatkartuṃ duḥkhasyāsya ca saṃkṣayam || 34 ||
[Analyze grammar]

sarveṣāṃ vartate śaṃkā yathā mama maheśvara |
utpannaṃ kāraṇaṃ kiṃtadyena somasya lāṃchanam || 35 ||
[Analyze grammar]

kimetatkāraṇaṃ deva kathayasva maheśvara |
amṛte saṃbhavo yasya kathaṃ tasyāpi lāṃchanam || 36 ||
[Analyze grammar]

priyaśca tava deveśa lāṃchanaṃ cāpi tiṣṭhati |
kautūhalaṃ paraṃ deva tattvaṃ me vaktumarhasi || 37 ||
[Analyze grammar]

evamuktaḥ sa pārvatyā devadevo maheśvaraḥ |
uvāca paramaprītaḥ premṇā śailasutāṃ prabhuḥ || 38 ||
[Analyze grammar]

īśvara uvāca |
kiṃ te devi mahāśaṃkādyotpannā varavarṇini |
mamopari na karttavyā nirudvignā bhava priye |
pitustava prabhāvena lāṃchanaṃ śaśino'bhavat || 39 ||
[Analyze grammar]

bhāvitvātkarmaṇo devi dakṣasyājñāvyatikramāt |
samaṃ varttasva bhāryābhirityuktaḥ śaśalāṃchanaḥ || 40 ||
[Analyze grammar]

tadvākyamanyathā cakre tataḥ śaptaḥ śaśī priye |
idaṃ pṛṣṭaṃ tu yaddevi tvayā lāṃchanakāraṇam || 41 ||
[Analyze grammar]

kalpekalpe pṛthagbhāvaṃ kāraṇairasti bhāmini |
asaṃkhyātaṃ ca tadvaktuṃ śakyaṃ naiva mayā priye || 42 ||
[Analyze grammar]

asaṃkhyeyāścandramasaḥ saṃbhavaṃti punaḥpunaḥ |
vinaśyaṃti ca deveśi sarvamanvantarāntaram || 43 ||
[Analyze grammar]

asaṃkhyātāśca kalpākhyā asaṃkhyātāḥ pitāmahāḥ |
harayaścāpyasaṃkhyātā eka eva maheśvaraḥ || 44 ||
[Analyze grammar]

koṭikoṭyayutānyatra brahmāṇḍāni mama priye |
jalabudbudavaddevi saṃjātāni tu līlayā || 45 ||
[Analyze grammar]

tatratatra caturvaktrā brahmāṇo harayo bhavāḥ |
sṛṣṭāḥ pradhānena tadā labdhā śaṃbhostu saṃnidhiḥ || 46 ||
[Analyze grammar]

layaṃ caiva tathānyonyamādyaṃtaṃ prakaroti ca |
sargasaṃhārasaṃsthānāṃ karttā devo maheśvaraḥ || 47 ||
[Analyze grammar]

sarge ca rajasā pṛktaḥ sattvasthaḥ paripālane |
pratisarge tamoyuktaḥ so'haṃ devi tridhā sthitaḥ || 48 ||
[Analyze grammar]

tasmānmāheśvaro brahmā brahmaṇo'dhipatiḥ śivaḥ |
sadāśivo bhavedviṣṇurbrahmā sarvātmako hyataḥ || 49 ||
[Analyze grammar]

sa eva bhagavānrudro viṣṇurviśva jagatprabhuḥ |
asminnaṇḍe tvimelokā antarviśvamidaṃjagat || 50 ||
[Analyze grammar]

candrasūryagrahā devi brahmāṇḍe'sminmanasvini |
saṃkhyātuṃ naiva śakyante ye bhaviṣyaṃti ye gatāḥ || 51 ||
[Analyze grammar]

asminvārāhakalpe tu vartamāne manasvini |
ṣaḍatītā mahādevi rohiṇīpatayaḥ purā || 52 ||
[Analyze grammar]

saptamo'yaṃ mahādevi vartate'mṛtasaṃbhavaḥ |
dakṣaśāpena yo devi saṃkṣīṇo dṛśyate'dhunā || 53 ||
[Analyze grammar]

atha dvitīye saṃprāpte parārddhe caiva vedhasaḥ |
tasya triṃśattime kalpe pitṛ kalpeti viśrute || 54 ||
[Analyze grammar]

svāyaṃbhuveṃ'tare prāpte tasyādau tvaṃ satī kila |
tasminkāle mahādevi yobhūddakṣaḥ pitā tava || 55 ||
[Analyze grammar]

prāṇātprajāpaterjanma tasya dakṣasya kīrtitam |
asminmanvantare devi dakṣaḥ prācetaso'bhavat || 56 ||
[Analyze grammar]

aṃguṣṭhāddakṣiṇāddakṣo bhaviṣyatyadhunā priye |
yugeyuge bhavantyete sarve dakṣādayo dvijāḥ || 57 ||
[Analyze grammar]

punaścaiva vinaśyanti vidvāṃstatra na muhyati |
tasyāpamānāttvaṃ devi dehaṃ tatyaktha vai purā || 58 ||
[Analyze grammar]

tāvadviyukto'haṃ devi tvayā mukto'bhavaṃ purā |
yāvadvarāhakalpasya cākṣuṣasyāntaraṃ priye || 59 ||
[Analyze grammar]

ekaviṃśo manuścāyaṃ kalpe vārāhasaṃjñake |
kalpekalpe mahādevi bhavennāmāntaraṃ tava || 60 ||
[Analyze grammar]

asminkalpe tu vārāhe himavattapasārjjite |
saṃbhūtā pārvatī devi cākṣuṣasyāṃtare gate || 61 ||
[Analyze grammar]

brahmaṇo dinamekaṃ tu ṣaṇmāsena tavāvadhiḥ |
tvaṃ viyuktā mayā sārddhaṃ dakṣakopena bhāmini || 62 ||
[Analyze grammar]

tava krodhena ye śaptā ṛṣayo vai mayā purā |
te'pi devi tvayā sārddhaṃ jātā vaivasvateṃtare || 63 ||
[Analyze grammar]

bhṛguraṃgirā marīcistu pulastyaḥ pulahaḥ kratuḥ |
atriścaiva vasiṣṭhaśca aṣṭau te brahmaṇaḥ sutāḥ || 64 ||
[Analyze grammar]

dakṣasya yajñe te śaptāḥ pūrvaṃ svāyaṃbhuventare |
jātā devi punaste vai kalpesmiṃścākṣuṣe gate || 65 ||
[Analyze grammar]

devasya mahato yajñe vāruṇīṃ bibhratastanum |
brahmaṇo juhvataḥ śukramagnau pūrvaṃ prajepsayā || 66 ||
[Analyze grammar]

ṛṣayo jajñire pūrvaṃ sūryabiṃbasamaprabhāḥ |
pitustava samīpaṃ te varaṇāya tava priye |
prasthāpitā mayā pūrvaṃ tattvaṃ jānāsi suvrate || 67 ||
[Analyze grammar]

atha kiṃ bahunoktena vacmi te praśnamuttamam |
dvitīye tu parārddhe'sminvarttamāne ca vedhasaḥ || 68 ||
[Analyze grammar]

śvetakalpātsamārabhya yāvadvārāhagocaram |
samatītāśca ye candrāstāñchṛṇuṣva varānane || 69 ||
[Analyze grammar]

catuḥśatāni deveśi ṣaḍviṃśatyadhikāni tu |
gatāni śītaraśmīnāṃ saptaviṃśo'dhunā priye || 70 ||
[Analyze grammar]

vaivasvateṃ'tare prāpte yaścāyaṃ vartate'dhunā |
tretāyuge tu daśame dattātreyapuraḥsaraḥ || 71 ||
[Analyze grammar]

saṃjāto rohiṇīnātho yo'dhunā varttate priye |
tasyotpattiprasaṃgena viṣṇormānuṣasaṃbhavān || 72 ||
[Analyze grammar]

dehāvatārānvakṣyāmi prāraṃbhātprathamānpriye |
pañcamaḥ paṃcadaśyāṃ sa tretāyāṃ tu babhūva ha || 73 ||
[Analyze grammar]

māṃdhātā cakravarttitve tasyotathyapuraḥsaraḥ |
ekonaviṃśatretāyāṃ sarvakṣatrāṃtako'bhavat || 74 ||
[Analyze grammar]

jāmadagnyastathā ṣaṣṭho viśvāmitrapuraḥsaraḥ |
caturviṃśe yuge rāmo vasiṣṭhena purodhasā || 75 ||
[Analyze grammar]

saptamo rāvaṇasyārthe jajñe daśarathātmajaḥ |
aṣṭame dvāpare viṣṇuraṣṭāviṃśe parāśarāt || 76 ||
[Analyze grammar]

vedavyāsastato jajñe jātūkarṇyapuraḥsaraḥ |
tatraiva navamo viṣṇuraditeḥ kaśyapātmajaḥ || 77 ||
[Analyze grammar]

devakyāṃ vasudevāttu brahmagargapuraḥsaraḥ |
ekaviṃśatamasyāsya dvāparasyāṃśasaṃkṣaye |
naṣṭe dharme tadā jajñe viṣṇurvṛṣṇikule svayam || 78 ||
[Analyze grammar]

kartuṃ dharmavyavasthānamasurāṇāṃ praṇāśanaḥ |
pūrvajanmani viṣṇuḥ sa pramatirnāma vīryavān || 79 ||
[Analyze grammar]

gotreṇa vai caṃdramasaḥ saṃdhyāmiśre bhaviṣyati |
kalkirviṣṇuyaśānāma pārāśaryapratāpavān || 80 ||
[Analyze grammar]

daśamo bhāvyasaṃbhūto yājñavalkyapuraḥsaraḥ |
anukarṣaśca vai senāṃ hastyaśvarathasaṃkulām || 81 ||
[Analyze grammar]

pragṛhītāyudhairviprairbhṛśaṃ śatasahasraśaḥ |
niḥśeṣāñchūdrarājñastāṃstadā sa tu kariṣyati || 82 ||
[Analyze grammar]

pākhaṃḍānmlecchajātīṃśca dasyūṃścaiva sahasraśaḥ |
nātyarthaṃ dhārmikā ye ca brahmabrahmadviṣaḥ kvacit || 83 ||
[Analyze grammar]

pravṛttacakro balavāñcchūrāṇāmaṃtako balī |
adṛśyaḥ sarvabhūtānāṃ pṛthivīṃ vicariṣyati || 84 ||
[Analyze grammar]

mānavasya tu soṃ'śena devasya bhuvi vai prabhuḥ |
kṣapayitvā tu tānsarvānbhāvinārthena noditān |
gaṃgāyamunayormadhye niṣṭhāṃ prāpsyati sānugaḥ || 85 ||
[Analyze grammar]

tato vyatīte kalkau tu sāmātye sahasainike |
nṛpeṣvapi ca naṣṭeṣu tadātvapraharāḥ prajāḥ || 86 ||
[Analyze grammar]

rakṣaṇe vinivṛtte ca hatvā cānyonyamāhave |
parasparahatāstāśca nirākraṃdāḥ suduḥkhitāḥ || 87 ||
[Analyze grammar]

kṣīṇe kaliyuge cāsmindaśavarṣasahasrake |
sa saṃdhyāṃśe tu niḥśeṣe kṛtaṃ vai pratipatsyati || 88 ||
[Analyze grammar]

yadā caṃdraśca sūryaśca tathā tiṣyabṛhaspatī |
ekarāśau sameṣyaṃti prapatsyati tadā kṛtam || 89 ||
[Analyze grammar]

abhijinnāma nakṣatraṃ jayaṃtīnāma śarvarī |
muhūrto vijayo nāma yatra jāto janārddanaḥ || 90 ||
[Analyze grammar]

devyuvāca |
noktaṃ yathāvadakhilaṃ bhṛguśāpaviceṣṭitam |
pūrvāvatārānme brūhi noktapūrvānmaheśvara || 91 ||
[Analyze grammar]

īśvara uvāca |
yadā tu pṛthivī vyāptā dānavairbalavattaraiḥ |
tataḥ prabhṛti śāpena bhṛgunaimittikena ha || 92 ||
[Analyze grammar]

jajñe punaḥpunarviṣṇuḥ karttuṃ dharmavyavasthitim |
dharmānnārāyaṇaḥ sādhyaḥ saṃbhūtaścākṣuṣeṃtare || 93 ||
[Analyze grammar]

yajñaṃ pravartayāmāsa sa ca vaivasvateṃ'tare |
prādurbhāve tadā tasya brahmā cāsītpurohitaḥ || 94 ||
[Analyze grammar]

caturthyāṃ tu yugākhyāyāmāpanneṣu sureṣviha |
saṃbhūtaḥ sa samudrāttu hiraṇyakaśiporvadhe || 95 ||
[Analyze grammar]

dvitīyo narasiṃho'bhūdrudrastasya puraḥsaraḥ |
lokeṣu balisaṃstheṣu tretāyāṃ saptame yuge || 96 ||
[Analyze grammar]

daityaistrailokya ākrāṃte tṛtīyo vāmanobhavat |
saṃkṣipyātmānamaṃgeṣu bṛhaspatipuraḥsaraḥ || 97 ||
[Analyze grammar]

tretāyuge tu daśame dattātreyo babhūva ha |
naṣṭe dharme caturthāṃśe mārkaṃḍeyapuraḥsaraḥ |
ete divyāvatārā vai mānuṣye kathitāḥ purā || 98 ||
[Analyze grammar]