Chapter 7

[English text for this chapter is available]

sūta uvāca |
evaṃ tatra tadā devī śrutvā māhātmyamuttamam |
harṣotkaṃṭhitayā vācā punaḥ papraccha śaṃkaram || 1 ||
[Analyze grammar]

devyuvāca |
devadeva jagannātha bhaktānugrahakāraka |
samastajñānasaṃpanna namaste'stu maheśvara || 2 ||
[Analyze grammar]

namo'stu vai tripuraprahartre mahātmane tārakamardanāya |
namo'stu te kṣīrasamudra dāyine śiśormunīndrasya samāhitasya || 3 ||
[Analyze grammar]

namo'stu te sarvajagadvidhātre sarvatra sarvātmaka sarvakartre |
namo bhavāyāstu namo'bhavāya namo'stu te sarvagatāya nityam || 4 ||
[Analyze grammar]

īśvara uvāca |
kiṃ devi pṛcchase'dyāpi sarvaṃ te kathitaṃ mayā |
saṃdigdhamasti kiṃciccetpunaḥ pṛcchasva bhāmini || 5 ||
[Analyze grammar]

devyuvāca |
someśvareti yannāma kasminkāle babhūva tat |
kiṃ nāmāgre'bhavalliṃgaṃ nāma kiṃ bhavitā'dhunā || 6 ||
[Analyze grammar]

evaṃ yasya prabhāvo vai noktaḥ pūrvaṃ tvayā vibho |
anyeṣāṃ tīrthadevānāṃ māhātmyaṃ varṇitaṃ tvayā |
na tvīdṛśaṃ tu kathitaṃ śrīsomeśasya yādṛśam || 7 ||
[Analyze grammar]

īśvara uvāca |
pūrvamevāhamevāsaṃ sparśaliṃgasvarūpavān |
na ca māṃ tattvato veda janaḥ kaścidiheśvari || 8 ||
[Analyze grammar]

mahākalpe tu sañjāte brahmaṇaḥ prati saṃcare |
nāmabhāvaṃ bhavedanyaddevi liṃge punaḥpunaḥ || 9 ||
[Analyze grammar]

atītaṃ brahmaṇāṃ ṣaṭkaṃ saptamo'yaṃ prajāpatiḥ |
varttate yo'dhunā devi śatānanda iti śrutaḥ || 1 ||
[Analyze grammar]

asminbrahmaṇi deveśi saṃjāte hyaṣṭavārṣike |
tadā kālātsamārabhya someśa iti viśrutaḥ || 11 ||
[Analyze grammar]

atīteṣu ca deveśi brahmasuptalayādanu |
babhūvuryāni nāmāni tāni tvaṃ śṛṇu pārvati || 12 ||
[Analyze grammar]

ādyo viraṃcināmāsīdyadā brahmā pitāmahaḥ |
mṛtyuñjayastadā nāma somanāthasya kīrtitam || 13 ||
[Analyze grammar]

dvitīyo'bhūdyadā brahmā padmabhūriti viśrutaḥ |
tadā kālāgnirudreti nāma proktaṃ śubheṃ'bike || 14 ||
[Analyze grammar]

tṛtīyo'bhūdyadā brahmā svayaṃbhūriti viśrutaḥ |
amṛteśeti devasya tadā nāma prakīrtitam || 15 ||
[Analyze grammar]

caturtho'bhūdyathā brahmā parameṣṭhīti viśrutaḥ |
anāmayeti devasya tadā nāma smṛtaṃ śubhe || 16 ||
[Analyze grammar]

paṃcamo'bhūdyadā brahmā surajyeṣṭha iti smṛtaḥ |
kṛttivāseti devasya nāma proktaṃ tadāmbike || 17 ||
[Analyze grammar]

ṣaṣṭhaścābhūdyadā brahmā hemagarbha iti śrutaḥ |
tadā bhairavanātheti nāma devasya kīrtitam || 18 ||
[Analyze grammar]

ayaṃ yo varttate brahmā śatānaṃda iti smṛtaḥ |
somanātheti devasya vartate nāma sāṃpratam || 19 ||
[Analyze grammar]

ataḥ paraṃ caturvaktro brahmā yo bhavitā yadā |
prāṇanātheti devasya tadā nāma bhaviṣyati || 20 ||
[Analyze grammar]

atītā ye vidhātāro bhaviṣyaṃti ca ye'dhunā |
tāvattadvarttate nāma yāvadanyoṣṭavārṣikaḥ |
saṃdhyāsaṃdhyāṃśabhedena viṣṇvanaṃtasanātanāḥ || 21 ||
[Analyze grammar]

evaṃ nāmāni devasya saṃkṣepātkīrtitāni me |
vistarātkathituṃ naiva śakyaṃte kālagauravāt || 22 ||
[Analyze grammar]

devyuvāca |
āścaryaṃ devadeveśa yattvayā kathitaṃ prabho |
pūrvoktāni ca nāmāni na smaraṃti ca me katham || 23 ||
[Analyze grammar]

etadvistarato brūhi kāraṇaṃ ca jagatpate |
sarvabhūtahitārthāya mamānugrahakāmyayā || 24 ||
[Analyze grammar]

īśvara uvāca |
kalpekalpe mahādevi avatāraṃ karoṣi yat |
tena te smaraṇaṃ nāsti prabhāvātprakṛteḥ priye || 25 ||
[Analyze grammar]

tattvāvaraṇamadhye tu tatrādyā tvaṃ pratiṣṭhitā |
sā'vatīryāṃḍamadhye tu mayā sārddhaṃ varānane || 26 ||
[Analyze grammar]

anugrahārthaṃ lokānāṃ prādurbhūtā punaḥpunaḥ |
ādye kalpe jaganmātā jagadyonirdvitīyake || 27 ||
[Analyze grammar]

tṛtīye śāṃbhavīnāma caturthe viśvarūpiṇī |
pañcame naṃdinīnāma ṣaṣṭhe caiva gaṇāṃbikā || 28 ||
[Analyze grammar]

vibhūtiḥ saptame kalpe subhūtiścāṣṭame tadā |
ānandā navame kalpe daśame vāmalocanā || 29 ||
[Analyze grammar]

ekādaśe varārohā dvādaśe ca sumaṅgalā |
kalpe trayodaśe caiva mahāmāyā hyudāhṛtā || 30 ||
[Analyze grammar]

tataścaturdaśe kalpe'nantānāma prakīrtitā |
bhūtamātā paṃcadaśe ṣoḍaśe cottamā smṛtā || 31 ||
[Analyze grammar]

tataḥ saptadaśe kalpe pitṛkalpe tu viśrutā |
dakṣasya duhitā jātā satīnāmnī mahāprabhā || 32 ||
[Analyze grammar]

apamānāttu dakṣasya svāṃ tanūmatyajatpunaḥ |
umāṃ kalāṃ tu candrasya purāpūrya ca saṃsthitā || 33 ||
[Analyze grammar]

tataḥ pravṛtte vārāhe kalpe tvaṃ surasundari |
punarhimavatārādhya duhitā tvamataḥ kṛtā || 34 ||
[Analyze grammar]

tato devyadbhutaṃ taptvā tapaḥ paramaduścaram |
bharttāraṃ māṃ punaḥ prāpya pārvatīti nigadyase || 35 ||
[Analyze grammar]

kailāsanilayaścāhaṃ tvayā sārddhaṃ varānane |
krīḍāmi tava deveśi yāvatkalpāvasānakam || 36 ||
[Analyze grammar]

idaṃ caturguṇaṃ prāpya dvāpare viṣṇunā saha |
mahiṣasya vadhārthāya utpannā kṛṣṇapiṃgalā || 37 ||
[Analyze grammar]

kātyāyanīti durgeti vividhairnāmaparyayaiḥ |
navakoṭiprabhedena jātāsi vasudhātale || 38 ||
[Analyze grammar]

yāni te kalpanāmāni pūrvamuktāni sundari |
tāni trayodaśākalpādudaktātkathitāni me || 39 ||
[Analyze grammar]

atītāni bhaviṣyāṇi varttamānāni sundari |
evaṃ jñeyāni sarvāṇi brahmakalpāvadhi priye || 40 ||
[Analyze grammar]

devyuvāca |
somanātheti yannāma tvayā pūrvamudāhṛtam |
tatkathaṃ niścalaṃ nāma manyate tripurāṃtaka || 41 ||
[Analyze grammar]

asaṃkhyatvācca caṃdrāṇāṃ janmanāmaprabhedataḥ |
manvantare tu saṃjāte yugānāmekasaptatau || 42 ||
[Analyze grammar]

caṃdrasūryādayo devāḥ saṃhriyaṃte punaḥpunaḥ |
saptarṣayaḥ surāḥ śakro manustatsūnavo nṛpāḥ || 43 ||
[Analyze grammar]

ekakālaṃ ca sṛjyaṃte saṃhriyaṃte ca pūrvavat |
etanme saṃśayaṃ deva yathāvadvaktumarhasi || 44 ||
[Analyze grammar]

īśvara uvāca |
sādhu pṛṣṭaṃ tvayā devi rahasyaṃ pāpanāśanam |
yanna kasyacidākhyātaṃ tatte vakṣyāmyaśeṣataḥ || 45 ||
[Analyze grammar]

ayaṃ yo varttate brahmā śatānanda iti śrutaḥ |
tasya caivāṣṭame varṣe manuryaḥ prathamo bhavet || 46 ||
[Analyze grammar]

tasminmanvantare devi yaścādau rohiṇīpatiḥ |
samudragarbhātsaṃjātaḥ salakṣmīkaustubhādibhiḥ || 47 ||
[Analyze grammar]

tena cārādhitaṃ liṃgaṃ kālabhairavanāmataḥ |
mahatā tapasā pūrvaṃ yugāni ca caturddaśe || 48 ||
[Analyze grammar]

tasyādbhutaṃ tapo dṛṣṭvā tuṣṭo'haṃ tasya sundari |
varaṃ vṛṇīṣveti mayā sa ca prokto niśākaraḥ || 49 ||
[Analyze grammar]

sahovāca tadā devi bhaktyā saṃstutya māṃ śubhe || 50 ||
[Analyze grammar]

caṃdra uvāca |
yadi prasanno deveśa varārho yadi vā'pyaham |
somanātheti taṃ nāma bhūyādbrahmāvadhi prabho || 51 ||
[Analyze grammar]

ye kecidbhavitāro'nye manvante śītaraśmayaḥ |
teṣāṃ bhavatu deveśa devo'yaṃ kuladevatā || 52 ||
[Analyze grammar]

ārādhayaṃtu te sarve kṣetre'sminsaṃsthitā vibho |
svakīyāyuḥpramāṇena brahmaṇaḥ pralayādanu || 53 ||
[Analyze grammar]

somanātheti te nāma brahmāṃḍe sacarācare |
khyātiṃ prayātu deveśa tejoliṃga namo'stu te || 54 ||
[Analyze grammar]

īśvara uvāca |
evamastvityahaṃ procya punarliṃge layaṃ gataḥ |
etatte kāraṇaṃ devi proktaṃ sarvamaśeṣataḥ || 55 ||
[Analyze grammar]

niḥsandigdhaṃ tu saṃkṣepātpurā pṛṣṭaṃ yatastvayā |
uddeśamātraṃ kathitaṃ śrīsomeśaguṇānprati |
samudrasyeva ratnānāmacintyastasya vistaraḥ || 56 ||
[Analyze grammar]

mohanaṃ tadabhaktānāṃ bhaktānāṃ buddhivarddhanam |
mūḍhāste naiva paśyaṃti svarūpaṃ mama mohitāḥ || 57 ||
[Analyze grammar]

devyuvāca |
īdṛśaṃ yasya māhātmyaṃ tejoliṃgasya śaṃkara |
kutra tiṣṭhati talliṃgaṃ kṣetre tasminsureśvara || 58 ||
[Analyze grammar]

īśvara uvāca |
śṛṇu devi prayatnena śrutvā caivāvadhāraya |
prabhāsaṃ paramaṃ devi kṣetrametanmama priyam || 59 ||
[Analyze grammar]

devānāmapi saṃsthānaṃ tacca dvādaśayojanam |
paṃcayojanamānena pīṭhaṃ tatra prakīrttitam || 60 ||
[Analyze grammar]

tanmadhye madgṛhaṃ devi tacca gavyūtimātrakam |
samudrasyottare devi devikāmukhasaṃjñitam || 61 ||
[Analyze grammar]

vajriṇyāḥ pūrvataścaiva yāvannyaṃkumatī nadī |
catuṣṭayaṃ ca vistārādāyāmātpaṃcayojanam || 62 ||
[Analyze grammar]

kṣetrapīṭhamiti proktamato garbhagṛhaṃ śṛṇu |
samudrātkauravī yāvaddakṣiṇottaramānataḥ |
pūrvapaścimato jñeyaṃ gomukhādā'śvamedhakam || 63 ||
[Analyze grammar]

etanmama gṛhaṃ devi na tyajāmi kadācana |
tasya madhye sthitaṃ liṃgaṃ yatra tatte prakīrtitam || 64 ||
[Analyze grammar]

vāruṇīṃ diśamāśritya sāgarasya ca sannidhau |
kṛtasmarasyāparato dhanvantaraśatatraye || 65 ||
[Analyze grammar]

liṃgaṃ mahāprabhāvaṃ tuṃ svayaṃbhūtaṃ vyavasthitam |
tatra saṃnihito devaḥ śaṃkaraḥ parameśvaraḥ || 66 ||
[Analyze grammar]

etasminnantare devi someśasya samīpataḥ |
caturddaśe vibhāge tu dhanuṣāṃ ca śatadvayam || 67 ||
[Analyze grammar]

samaṃtānmaṃḍalākārā karṇikā sā mama priyā |
tasyāṃ ye prāṇinaḥ sarve mṛtāḥ kālena pārvati || 68 ||
[Analyze grammar]

kṛmikīṭapataṃgādyā jīvā uttama madhyamāḥ |
nirddhūtakalmaṣāḥ sarve yāṃti lokaṃ mamāpi te || 69 ||
[Analyze grammar]

uttaraṃ dakṣiṇaṃ cāpi ayanaṃ na vicārayet |
sarvasteṣāṃ śubhaḥ kālo ye mṛtāḥ kṣetramadhyataḥ || 70 ||
[Analyze grammar]

ādināthena śarveṇa sarvaprāṇihitāya vai |
ādyatattvānyathānīya kṣetrametanmahāprabham |
prabhāsitaṃ mahādevi yatra siddhyaṃti mānavāḥ || 71 ||
[Analyze grammar]

hanyamāno'pi yo vidvānvasedvighnaśatairapi |
kṛtapratijño deveśi yāvajjīvaṃ sureśvari || 72 ||
[Analyze grammar]

sa gacchetparamaṃ sthānaṃ yatra gatvā na śocati |
tasya kṣetrasya māhātmyātsthāṇoścādbhutakarmaṇaḥ || 73 ||
[Analyze grammar]

kṛtvā pāpasahasrāṇi paścātsantāpameti vai |
prabhāse tu viyujyeta na soṃ'takapurīṃ vrajet || 74 ||
[Analyze grammar]

jñātvā kaliyugaṃ ghoraṃ hāhābhūtamacetanam |
niyuktastatra deveśi rakṣārthaṃ vighnanāyakaḥ || 75 ||
[Analyze grammar]

ye tu brāhmaṇavidviṣṭāḥ śivabhaktivitaṃḍakāḥ |
brahmaghnāśca kṛtaghnāśca tathā naiṣkṛtikāśca ye || 76 ||
[Analyze grammar]

lokadviṣṭā gurudviṣṭāstīrthāyatanakaṇṭakāḥ |
sarvapāparatāścaiva ye cānye tu vikutsitāḥ || 77 ||
[Analyze grammar]

rakṣaṇārthaṃ ha vai teṣāṃ niyukto vighnanāyakaḥ |
kālāgnirudrapārśve tu rudratulyaparākramaḥ || 78 ||
[Analyze grammar]

kṣetraṃ rakṣati deveśi pāpiṣṭhānāṃ niyāmakaḥ |
mriyaṃte yadi brahmaghnāstathā pātakino narāḥ || 79 ||
[Analyze grammar]

kṣetre cāsminvarārohe teṣāṃ devi gatiṃ śṛṇu |
daśavarṣasahasrāṇi divyāni kamalekṣaṇe || 80 ||
[Analyze grammar]

dāsī putrāśca jāyante tadaṃte brahmarākṣasāḥ |
tataḥ pāpakṣaye devi punaryāṃti viyonitām || 51 ||
[Analyze grammar]

tasmātsarvaprayatnena pāpaṃ tatra na kārayet |
anyatrā'vartitaṃ pāpaṃ kṣetre cāsminvinaśyati || 82 ||
[Analyze grammar]

asminpunaḥ kṛtaṃ pāpaṃ paiśācanarakāvaham |
bhaktānukaṃpī bhagavāṃstiryagyonigateṣvapi || 83 ||
[Analyze grammar]

dadāti paramaṃ sthānaṃ na tu brahmadviṣāṃ priye |
ye ca dhyānaṃ samāsādya yuktātmānaḥ samāhitāḥ || 84 ||
[Analyze grammar]

saṃniyamyendriyagrāmaṃ japaṃti śatarudriyam |
prabhāse tu sthitā devi te kṛtārthā na saṃśayaḥ || 85 ||
[Analyze grammar]

yadi gacchennaraḥ kaścitprabhāsaṃ kṣetramuttamam |
tamupāyaṃ prakurvīta nirgacchenna punaryathā || 86 ||
[Analyze grammar]

etadgopyaṃ varārohe na deyaṃ yasya kasyacit |
gopanīyamidaṃ śāstraṃ yathā prāṇāḥ svakāḥ priye || 87 ||
[Analyze grammar]

yenedaṃ vihitaṃ śāstraṃ prabhāsakṣetradīpakam |
sa śivaścaiva vijñeyo mānuṣīṃ prakṛtiṃ sthitaḥ || 88 ||
[Analyze grammar]

tasyavigrahasaṃstho'haṃ sadā tiṣṭhāmi pārvati |
vaṃditaḥ pūjito dhyāto yathāhaṃ nātra saṃśayaḥ || 89 ||
[Analyze grammar]

kalau ca durllabhaṃ devi prabhāsakṣetramuttamam |
idānīṃ tava snehena viśeṣaṃ kathayāmi vai |
satyaṃsatyaṃ punaḥ satyaṃ triḥsatyaṃ surasundari || 90 ||
[Analyze grammar]

yāni liṃgāni bhūrloke someśasteṣu me priyaḥ |
asmiṃlliṃge guṇā ye tu te devi viditā mama || 91 ||
[Analyze grammar]

ahameva vijānāmi nānyo veda kathaṃcana |
anyeṣu caiva liṃgeṣu ahaṃ pūjyaḥ surāsuraiḥ || 92 ||
[Analyze grammar]

liṃgaṃ cemaṃ punardevi pūjayāmo vayaṃ svayam || 93 ||
[Analyze grammar]

yasminkāle na vai brahmā na bhūmirna divākaraḥ |
sarvaṃ caiva jagannātha tasminkāle yaśasvini || 94 ||
[Analyze grammar]

imaṃ liṃgaṃ paraṃ caiva brahmaṇaḥ pralaye tadā |
bhāvinīṃ vṛttimāsthāya idaṃ sthānaṃ tu rakṣati || 95 ||
[Analyze grammar]

daśakoṭyastu liṃgānāṃ gaṃgādvārādvarānane |
āgatya tāni madhyāhne liṃge'sminyāṃti saṃlayam || 96 ||
[Analyze grammar]

pṛthivyāṃ yāni tīrthāni gaganasthāni yāni tu |
snānārthamasya liṃgasya samāgacchaṃti sarvadā || 97 ||
[Analyze grammar]

dhanyāstu khalu te marttyāḥ prabhāse saṃvyavasthitāḥ |
someśvaraṃ ye drakṣyaṃti saṃsārabhayamocanam || 98 ||
[Analyze grammar]

devi someśvaraṃ liṃgaṃ ye smariṣyaṃti bhāvitāḥ |
sarvapāpakṣayasteṣāṃ bhaviṣyati na saṃśayaḥ || 99 ||
[Analyze grammar]

etatsmṛtaṃ priyatamaṃ mama devi nityaṃ kṣetraṃ pavitramṛṣisiddhagaṇābhiramyam |
asminmṛtāḥ sakalajīvamṛto'pi devi svargātparaṃ samupayāṃti na saṃśayo'tra || 100 ||
[Analyze grammar]

yaṃ devā na vijānaṃti brahmaviṣṇupurogamāḥ |
na sāṃkhyena na yogena naiva pāśupatena ca || 101 ||
[Analyze grammar]

kaivalyaṃ niṣkalaṃ yattadasmiṃlliṃge tu labhyate |
tāvadbhramaṃti saṃsāre devādyāstu yaśasvini || 102 ||
[Analyze grammar]

yāvatsomeśvaraṃ devaṃ na viṃdaṃti trilocanam |
kṣetraṃ prabhāsamityuktaṃ kṣetrajño'haṃ na saṃśayaḥ || 103 ||
[Analyze grammar]

etaṃ tavoktaṃ nanu bodhanāya someśvarasyaiva mahāprabhāvam |
ye vai paṭhiṣyaṃti narā nitāṃtaṃ yāsyaṃti te tatpadamiṃdumauleḥ || 104 ||
[Analyze grammar]

someśvaraṃ devavaraṃ manuṣyā ye bhaktimaṃtaḥ śaraṇaṃ prapannāḥ |
te ghorarūpe ca bhayāvahe ca saṃsāracakre na punarbhramaṃti || 105 ||
[Analyze grammar]

ye dakṣiṇā mūrttimupāśritāḥ syurjapaṃti nityaṃ śatarudriyaṃ dvijāḥ |
te'sminbhave naiva punarbhavaṃti saṃsārapāraṃ paramaṃ gatā vai || 106 ||
[Analyze grammar]

uddeśamātraṃ kathito mayā te śrīsomanāthasya kṛtaikadeśaḥ |
abdairanekairbahubhiryugairvā na śakyamekena mukhena vaktum || 107 ||
[Analyze grammar]

iti śrīskānde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye śrīsomanāthaprādurbhāvavarṇanaṃnāma saptamo'dhyāyaḥ || 7 ||
[Analyze grammar]