Chapter 4

[English text for this chapter is available]

sūta uvāca |
evaṃ munīndrāḥ kathite prabhāve śaṃkareṇa tu |
punaḥ papraccha sā devī kṛtāṃjalipuṭā satī || 1 ||
[Analyze grammar]

devyuvāca |
devadeva jagannātha kṣetratīrthamaya prabho |
prabhāsakṣetramāhātmyaṃ vistarātkathayasva me || 2 ||
[Analyze grammar]

kathaṃ tuṣyasi martyānāṃ kṣetre tatra vicetasām |
japtaṃ dattaṃ hutaṃ yaṣṭaṃ tapastaptaṃ kṛtaṃ ca yat |
prabhāse tu mahākṣetre kasmāttatrākṣayaṃ bhavet || 3 ||
[Analyze grammar]

jātyaṃtarasahasreṣu yatpāpaṃ pūrvasaṃcitam |
tatkathaṃ kṣayamāpnoti tanmamācakṣva śaṃkara || 4 ||
[Analyze grammar]

yadi prabhāsaṃ sarveṣāṃ tīrthānāṃ pravaraṃ matam |
kimanyairbahubhistatra karttavyaṃ tīrthavistaraiḥ || 5 ||
[Analyze grammar]

ekaṃ yadi bhavettīrthaṃ mano niḥsaṃśayaṃ bhavet |
bahutve sati tīrthānāṃ mano vicalate nṛṇām || 6 ||
[Analyze grammar]

tasmātsarvaṃ parityajya tīrthajālaṃ savistaram |
prabhāsasyaiva māhātmyaṃ kathayasva sureśvara || 7 ||
[Analyze grammar]

kṣetrapramāṇaṃ sīmāṃ ca kṣetrasāraṃ hi yatprabho |
vaktumarhasi tatsarvaṃ paraṃ kautūhalaṃ hi me || 8 ||
[Analyze grammar]

īśvara uvāca |
śṛṇu devi pravakṣyāmi kṣetrāṇāṃ kṣetramuttamam |
sarvakṣetreṣu yatkṣetraṃ prabhāsaṃ tu priyaṃ mama || 9 ||
[Analyze grammar]

prabhāse tu parā siddhiḥ prabhāse tu parā gatiḥ |
yatra saṃnihito nityamahaṃ bhadre nirantaram || 10 ||
[Analyze grammar]

tasya pramāṇaṃ vakṣyāmi sarvasīmāsamanvitam |
kṣetraṃ tu trividha proktaṃ tatte vakṣyāmyanukramāt || 11 ||
[Analyze grammar]

kṣetraṃ pīṭhaṃ garbhagṛhaṃ prabhāsasya prakīrtyate |
yathākramaṃ phalaṃ tasya koṭikoṭiguṇaṃ smṛtam || 12 ||
[Analyze grammar]

kṣetraṃ tu prathamaṃ proktaṃ tacca dvādaśayojanam |
pañcayojanamānena kṣetrapīṭhaṃ prakīrtitam || 13 ||
[Analyze grammar]

garbhagṛhaṃ ca gavyūtiḥ karṇikā sā mama priyā |
kṣetrasīmā pravakṣyāmi śṛṇu devi yathākramam || 14 ||
[Analyze grammar]

āyāmavyāsataścaiva ādimadhyāntasaṃsthitam |
pūrve taptodaka svāmī paścime mādhavaḥ smṛtaḥ || 15 ||
[Analyze grammar]

dakṣiṇe sāgarastadvadbhadrā nadyuttare matā |
evaṃ sīmāsamāyuktaṃ kṣetraṃ dvādaśayojanam || 16 ||
[Analyze grammar]

etatprābhāsikaṃ kṣetraṃ sarvapātakanāśanam |
tanmadhye pīṭhikā proktā pañcayojanavistṛtā || 17 ||
[Analyze grammar]

nyaṃkumanyapareṇaiva vajriṇyāḥ pūrvatastathā |
māheśvaryā dakṣiṇataḥ samudrottaratastathā || 18 ||
[Analyze grammar]

āyāmavyāsataścaiva pañcayojanavistaram |
pīṭhametatsamākhyātamatho garbhagṛhaṃ śṛṇu || 19 ||
[Analyze grammar]

dakṣiṇottarato yāvatsamudrā tkauraveśvarī |
pūrvapaścimato yāvadgomukhāccāśvamedhikam |
etadgarbhagṛhaṃ proktaṃ kailāsānmama vallabham || 20 ||
[Analyze grammar]

atrāntare tu deveśi yāni tīrthāni bhūtale |
vāpīkūpataḍāgāni devatāyatanāni ca || 21 ||
[Analyze grammar]

sarāṃsi saritaścaiva palvalāni hradāstathā |
tāni medhyāni sarvāṇi sarvapāpaharāṇi ca || 22 ||
[Analyze grammar]

yatra tatra naraḥ snātvā svargaloke mahīyate |
kṣetrasya prathamo bhāgo medhyo māheśvaraḥ smṛtaḥ || 23 ||
[Analyze grammar]

dvitīyo vaiṣṇavo bhāgo brahmabhāgastṛtīyakaḥ |
tīrthānāṃ koṭirekā tu brāhme bhāge vyavasthitā || 24 ||
[Analyze grammar]

vaiṣṇave koṭirekā tu tīrthānāṃ varavarṇini |
sārddhakoṭistu saṃproktā rudrabhāge ca madhyataḥ || 25 ||
[Analyze grammar]

evaṃ devi samākhyātaṃ tatkṣetraṃ hi tridaivatam |
guhyādguhyataraṃ kṣetraṃ mama priyataraṃ śubhe || 26 ||
[Analyze grammar]

tisraḥ koṭyo'rddhakoṭiśca kṣetre proktā vibhāgataḥ |
yātrā tu trividhā jñeyā tāṃ śṛṇuṣva varānane || 27 ||
[Analyze grammar]

raudrī tu prathamā yātrā vaiṣṇavī ca dvitīyikā |
brāhmī tṛtīyā saṃkhyātā sarvapātakanāśinī || 28 ||
[Analyze grammar]

brāhme vibhāge saṃproktā icchāśaktirvarānane |
kriyā ca vaiṣṇave bhāge dvitīye tu prakīrtitā || 29 ||
[Analyze grammar]

raudre bhāge tṛtīye tu jñānaśaktirvarānane |
yadi pāpo yadi śaṭho yadi naiṣkṛtiko naraḥ || 30 ||
[Analyze grammar]

nirmuktaḥ sarvapāpebhyo madhyabhāge vasettu yaḥ |
himavaṃtaṃ parityajya parvataṃ gaṃdhamādanam || 31 ||
[Analyze grammar]

kailāsaṃ niṣadhaṃ caiva merupṛṣṭhaṃ mahādyutim |
ramyaṃ triśikharaṃ caiva mānasaṃ ca mahāgirim || 32 ||
[Analyze grammar]

devodyānāni ramyāṇi naṃdanaṃ vanameva ca |
svargasthānāni ramyāṇi tīrthānyāyatanāni ca |
tāni sarvāṇi saṃtyajya prabhāse tu ratirmama || 33 ||
[Analyze grammar]

yastatra vasate devi saṃyatātmā samāhitaḥ |
trikālamapi bhuṃjāno vāyubhakṣasamo bhavet || 34 ||
[Analyze grammar]

vighnairāloḍyamāno'pi yaḥ prabhāsaṃ na muṃcati |
sa muṃcati jarāṃ mṛtyuṃ janmacakramaśāśvatam || 35 ||
[Analyze grammar]

janmāṃtaraśatairdevi yogo vā yadi labhyate |
mokṣasya ca sahasreṇa janmanāṃ labhyate na ca || 36 ||
[Analyze grammar]

prabhāse tu mahādevi ye sthitā kṛtaniścayāḥ |
ekena janmanā teṣāṃ mokṣo naivātra saṃśayaḥ || 37 ||
[Analyze grammar]

prabhāse tu sthitā ye vai brāhmaṇāḥ saṃśitavratāḥ |
mṛtyuṃjayena saṃyuktaṃ japaṃti śatarudriyam || 38 ||
[Analyze grammar]

kālāgnirudrasāṃnidhye dakṣiṇāṃ diśamāśritāḥ |
jñānaṃ cotpadyate tatra ṣaṇmāsābhyaṃtareṇa tu || 39 ||
[Analyze grammar]

śivastu procyate vedo nāmaparyāyavācakaiḥ |
tasya cātmasvarūpaṃ tu śatarudraṃ prakīrtitam || 40 ||
[Analyze grammar]

kalpeṣu vedāśca punaḥpunarāvartakāḥ smṛtāḥ |
maṃtrāścaiva tathā devi muktvā tu śatarudriyam || 41 ||
[Analyze grammar]

īḍyaṃ caiva tu maṃtreṇa māmeva hi yajaṃti ye |
prabhāsakṣetramāsādya te muktā nātra saṃśayaḥ || 42 ||
[Analyze grammar]

samaṃtro'maṃtrako vāpi yastatra vasate naraḥ |
so'pi yāṃ gatimāpnoti yajñairdānairna sādhyate || 43 ||
[Analyze grammar]

asmikṣetre svayaṃbhūśca sthitaḥ sākṣānmaheśvaraḥ |
rudrāṇāṃ koṭayaścaiva prabhāse saṃvyavasthitāḥ || 44 ||
[Analyze grammar]

dhyāyamānāstathoṃkāraṃ sthitāḥ someśadakṣiṇe || 45 ||
[Analyze grammar]

brahmāṃḍodaramadhye tu yāni tīrthāni suvrate |
someśvaraṃ gamiṣyaṃti vaiśākhasya caturdaśī || 46 ||
[Analyze grammar]

manobuddhirahaṃkāraḥ kāmakrodhau tathā'pare |
ete rakṣaṃti satataṃ someśaṃ pāpanāśanam || 47 ||
[Analyze grammar]

na sā gatiḥ kurukṣetre gaṃgādvāre tripuṣkare |
yā gatirvihitā puṃsāṃ prabhāsakṣetravāsinām || 48 ||
[Analyze grammar]

tiryagyonigatāḥ sattvā ye prabhāse kṛtālayāḥ |
kālena nidhanaṃ prāptāstepi yāṃti parāṃ gatim || 49 ||
[Analyze grammar]

tadguhyaṃ devadevasya tattīrthaṃ tattapovanam |
tatra brahmādayo devā nārāyaṇapurogamāḥ || 50 ||
[Analyze grammar]

yoginaśca tathā sāṃkhyā bhagavaṃtaṃ sanātanam |
upāsate prabhāsaṃ tu madbhaktā matparāyaṇāḥ || 51 ||
[Analyze grammar]

aṣṭau māsānvihāraḥ syādyatīnāṃ saṃyatātmanām |
eke ca caturo māsānaṣṭau vā niyataṃ vaset || 52 ||
[Analyze grammar]

prabhāse tu praviṣṭānāṃ vihārastu na vidyate |
atra yogaśca mokṣaśca prāpyate durlabho naraiḥ || 53 ||
[Analyze grammar]

tasmātprabhāsaṃ saṃtyajya nānyadgacchettapovanam |
prabhāsaṃ ye na sevaṃte mūḍhāste tamasā vṛtāḥ || 54 ||
[Analyze grammar]

viṇmūtraretasāṃ madhye saṃbhavaṃti punaḥpunaḥ |
kāmaḥ krodhastathā lobho daṃbhaḥ staṃbho'tha matsaraḥ || 55 ||
[Analyze grammar]

nidrā taṃdrā tathā'lasyaṃ paiśunyamiti te daśa |
ete rakṣaṃti satataṃ someśaṃ tīrthanāyakam || 56 ||
[Analyze grammar]

na prabhāse mṛtaḥ kaścinnarakaṃ yāti kilbiṣī |
yāvajjīvaṃ naro yastu vasate kṛtaniścayaḥ || 57 ||
[Analyze grammar]

agnihotraiśca saṃnyāsairāśramaiśca supālitaiḥ |
tridaṃḍairekadaṃḍaiśca śaivaiḥ pāśupatairapi || 58 ||
[Analyze grammar]

etairanyaiśca yatibhiḥ prāpyate yatphalaṃ śubham |
tatsarvaṃ labhyate devi śrīsomeśvarayātrayā || 59 ||
[Analyze grammar]

eko hyarcayate liṃgaṃ tapasyati tathāparaḥ |
tayormadhye tu śreṣṭho yaḥ someśaṃ ca prapūjayet || 6 ||
[Analyze grammar]

yattadyoge ca sāṃkhye ca siddhāṃte paṃcarātrike |
anyaiśca śāstrairvijñeyaṃ prabhāse saṃvyavasthitam || 61 ||
[Analyze grammar]

liṃge caiva sthitaṃ sarvaṃ jagadetaccarācaram |
tasmālliṃge sadā devaḥ pūjanīyaḥ prayatnataḥ || 62 ||
[Analyze grammar]

mamaiva sā parā mūrtiḥ śrīsomeśākhyayā sthitā |
tena caiṣā tmanātmānamārādhanaparo hyaham || 63 ||
[Analyze grammar]

anekajanmasāhasrairbhramamāṇastu janmabhiḥ |
kastāṃ prāpnoti vai muktiṃ vinā someśapūjanāt || 64 ||
[Analyze grammar]

yatkiñcidaśubhaṃ karma kṛtaṃ mānuṣabuddhinā |
tatsarvaṃ vilayaṃ yāti śrīsomeśvarapūjanāt || 65 ||
[Analyze grammar]

anekajanmakoṭībhirjaṃtubhiryatkṛtaṃ hyagham |
tatsarvaṃ nāśamāyāti śrīsomeśvarapūjanāt || 66 ||
[Analyze grammar]

tīrthāni yāni loke'sminsevyaṃte pāpamokṣibhiḥ |
tāni sarvāṇi śuddhyarthaṃ prabhāse saṃviśaṃti hi || 67 ||
[Analyze grammar]

yo'sau kālāgnirudrastu procyate vedavādibhiḥ |
so'yaṃ bhairavanāmnā tu prabhāse saṃvyavasthitaḥ || 68 ||
[Analyze grammar]

janānāṃ duṣkṛtaṃ sarvaṃ kṣetramadhye vyavasthitaḥ |
bhairavaṃ rūpamāsthāya nāśayāmi sureśvari || 69 ||
[Analyze grammar]

jagatsarvaṃ caritvā tu sthito'haṃ sacarācaram |
tena bhairavanāmāhaṃ prabhāse saṃvyavasthitaḥ || 70 ||
[Analyze grammar]

agninā yatra taptaṃ tu divyābdānāṃ caturyugam |
meghavāhanakalpe tu tatra liṃgaṃ babhūva ha || 71 ||
[Analyze grammar]

agnimīḍeti vedoktaprabhāvaḥ surasuṃdari |
kālāgnirudranāmā ca devaiḥ sarvairudāhṛtam || 72 ||
[Analyze grammar]

agnīśāneti deveśi nāmatritayamucyate |
kalpekalpe tu nāmāni kathituṃ naiva śakyate |
asaṃkhyatvācca kalpānāṃ brahmaṇā ca varānane || 73 ||
[Analyze grammar]

evaṃ caiva rahasyaṃ ca mahāgopyaṃ varānane |
snehānmahatyā bhaktyā ca mayā te parikīrtitam || 74 ||
[Analyze grammar]

ekatastu jagatsarvaṃ karma kāṃḍe pratiṣṭhitam |
yajñadānatapohomaiḥ svādhyāyaiḥ pitṛtarpaṇaiḥ || 75 ||
[Analyze grammar]

upavāsairvrataiḥ kṛtsnaiścāṃdrāyaṇaśataistathā |
ṣaḍrātraiśca trirātraiśca tīrthādigamanaiḥ paraiḥ || 76 ||
[Analyze grammar]

āśramairvividhākārairyatibhirbrahmacāribhiḥ |
vānaprasthairgṛhasthaiśca vedakarmaparāyaṇaiḥ || 77 ||
[Analyze grammar]

anyaiśca vividhākārairlokamārgasthitaiḥ śubhaiḥ |
na tatpadaṃ paraṃ devi śakyaṃ vīkṣayituṃ kvacit || 78 ||
[Analyze grammar]

yāvanna cārcayeddevi someśaṃ liṃganāyakam |
līlayā vāpi tairdraṣṭuṃ tatpadaṃ durlabhaṃ param || 79 ||
[Analyze grammar]

pūjito yairjagannāthaḥ someśaḥ kila bhairavaḥ |
tiryagyonigatā ye tu paśupakṣipipīlikāḥ || 80 ||
[Analyze grammar]

antarjjalagatā ye tu kṛmikīṭapataṃgakāḥ |
sthāvarā jaṃgamāścānye manuṣyāḥ paśavaḥ striyaḥ || 8 || |
bālā vṛddhāstathā ṣaṇḍhāḥ śvānagarddabhavāyasāḥ |
caṃḍālāḥ puṣkasāḥ śūdrā mlecchā ye'nye viyonijāḥ || 82 ||
[Analyze grammar]

mūrkhāstu paṇḍitāścāpi ye cānye kutsitā bhuvi |
te sarve muktimāyāṃti prabhāse ye mṛtāḥ śubhe || 83 ||
[Analyze grammar]

kālānalasya rudrasya kālarājena cāgninā |
dagdhāste jantavaḥ sarve prabhāse ye mṛtāḥ śubhe || 84 ||
[Analyze grammar]

durllabhaṃ tu mama kṣetraṃ prabhāsaṃ devi pāpinām |
na tatra labhate mṛtyuṃ pāpātmā lokavaṃdite || 85 ||
[Analyze grammar]

mayā dakṣiṇabhāge ca vighneśaḥ saṃpratiṣṭhitaḥ |
uttare daṇḍapāṇistu kṣetrametacca rakṣati || 86 ||
[Analyze grammar]

tathānye gaṇapāḥ sarve madājñāvaśavartinaḥ |
kṣetraṃ rakṣaṃti deveśi teṣāṃ nāmāni me śṛṇu || 87 ||
[Analyze grammar]

mahābalastu caṇḍīśo ghaṃṭākarṇastu gomukhaḥ |
vināyako mahānādaḥ kākavaktraḥ śubhekṣaṇaḥ |
ekākṣo dundubhiścaṃḍastālajaṃghastathaiva ca || 88 ||
[Analyze grammar]

bhūmidaṃḍaśca caṃḍaśca śaṃkukarṇaśca vaidhṛtiḥ |
tālacaṇḍo mahātejā vikaṭāsyo hayānanaḥ || 989 ||
[Analyze grammar]

hastivaktraḥ śvānavaktro biḍālavadanastathā |
siṃhavyāghramukhāścānye vīrabhadrādayastathā || 90 ||
[Analyze grammar]

vināyakaṃ puraskṛtya deva devaṃ kaparddinam |
ekādaśa tathā koṭyo niyutāni trayodaśa || 91 ||
[Analyze grammar]

arbudaṃ ca gaṇānāṃ ca prabhāsaṃ kṣetramāśritāḥ |
dvāridvāri pracaṃḍāste śūlamudgarapāṇayaḥ || 92 ||
[Analyze grammar]

prabhāsakṣetraṃ rakṣaṃti devadevasya vai gṛham |
na kaścidduṣṭabuddhyā tu praviśediti saṃsthitiḥ || 93 ||
[Analyze grammar]

śatakoṭigaṇaiścāpi pūrvadvāri tu saṃvṛtaḥ |
aṭṭahāso gaṇo nāma prabhāsaṃ tatra rakṣati || 94 ||
[Analyze grammar]

kālākṣo bhīṣaṇaścaṃḍo vṛto'ṣṭādaśakoṭibhiḥ |
ghaṃṭākarṇagaṇo nāma dakṣiṇaṃ dvāramāśritaḥ || 95 ||
[Analyze grammar]

paścimadvāramāśritya sthitavānviṣṭaro gaṇaḥ |
daṇḍapāṇiḥ sthitastatra devadevasya cottare || 96 ||
[Analyze grammar]

yogakṣemaṃ vahannityaṃ prabhāse bhāvitātmanām |
bhīṣaṇākṣastathaiśānyāmāgneyyāṃ chāgavaktrakaḥ || 97 ||
[Analyze grammar]

nairṛtyāṃ caṃḍanādastu vāyavyāṃ bhairavānanaḥ |
nandī caiva mahākālo daṇḍapāṇirvināyakaḥ || 98 ||
[Analyze grammar]

eteṅgarakṣakā madhye śatakoṭigaṇairvṛtāḥ |
evaṃ rakṣaṃti bahavo hyasaṃkhyeyā gaṇeśvarāḥ || 99 ||
[Analyze grammar]

kalikalmaṣasaṃbhūtyā yeṣāṃ copahatā matiḥ |
na teṣāṃ tadbhavedgamyaṃ sthānamardhendumaulinaḥ || 100 ||
[Analyze grammar]

gaṃdharvaiḥ kinnarairyakṣairapsarobhistathoragaiḥ |
siddhaiḥ saṃpūjya deveśaṃ someśaṃ pāpanāśanam || 101 ||
[Analyze grammar]

antardhānaṃ gatairnityaṃ prabhāsaṃ tu niṣevyate |
saptalokeṣu ye santi siddhāḥ pātālavāsinaḥ |
pradakṣiṇaṃ te kurvaṃti someśaṃ kālabhairavam || 102 ||
[Analyze grammar]

pṛthivyāṃ yāni tīrthāni puṇyānyāyatanāni ca |
lākuliṃ bhārabhūtiṃ ca āṣāḍhiṃ daṇḍameva ca || 103 ||
[Analyze grammar]

puṣkaraṃ naimiṣaṃ caiva amareśaṃ tathāparam || |
bhairavaṃ madhyamaṃ kālaṃ kedāraṃ kaṇavīrakam || 104 ||
[Analyze grammar]

haricaṃdrastu śaileśastathā vastrāṃtikeśvaraḥ |
aṭṭahāsaṃ mahendraṃ ca śrīśailaṃ ca gayā tathā || 105 ||
[Analyze grammar]

etāni sarvatīrthāni devaṃ someśvaraṃ prabhum |
pradakṣiṇaṃ prakurvaṃti tatra liṃgaṃ stuvaṃti ca || 106 ||
[Analyze grammar]

brahmā janārdanaścānye ye devā jagati sthitāḥ |
agniliṃgasamīpasthāḥ saṃdhyākāle stuvaṃti ca || 107 ||
[Analyze grammar]

ṣaṣṭikoṭisahasrāṇi ṣaṣṭikoṭiśatāni ca |
sarve someśvaraṃ yāṃti māghakṛṣṇacaturddaśīm || 108 ||
[Analyze grammar]

tasminkāle ca yo dadyātsomeśe ghṛtakambalam || 109 ||
[Analyze grammar]

ghṛtaṃ rasaṃ tilāndugdhaṃ jalaṃ caṃdrādhivāsitam |
ekatra kṛtvā kāśmīramityetadghṛtakaṃbalam || 110 ||
[Analyze grammar]

śivarātryāṃ tu karttavyametadgopyaṃ mama priyam |
evaṃ kṛte ca yatpuṇyaṃ gadituṃ tanna śakyate || 111 ||
[Analyze grammar]

tatra dakṣiṇabhāge tu svayaṃ bhūtavināyakam |
prathamaṃ pūjayeddevi yadīcchetsiddhimātmanaḥ || 112 ||
[Analyze grammar]

ūṣarāṇāṃ ca sarveṣāṃ prabhāsakṣetramūṣaram |
pīṭhānāṃ caiva pīṭhaṃ ca kṣetrāṇāṃ kṣetramuttamam |
sandehānāṃ ca sarveṣāmayaṃ saṃdeha uttamaḥ || 113 ||
[Analyze grammar]

ye kecidyoginaḥ saṃti śatakoṭipravistarāḥ |
teṣāṃ kṣetre prabhāse tu ratirnnānyatra kutracit || 114 ||
[Analyze grammar]

liṃgādīśānabhāge tu saṃsthitā surasundari || 115 ||
[Analyze grammar]

mayā yā kathitā tubhyamumā nāma kalā śubhā |
sā satī procyate devi dakṣasya duhitā purā || 116 ||
[Analyze grammar]

dakṣakopāccharīraṃ tu saṃtyajya paramā kalā |
himavaṃtagṛhe jātā umānāmnā ca viśrutā || 117 ||
[Analyze grammar]

tena devi tvayā sārddhaṃ tatrasthā varadāḥ smṛtāḥ |
navakoṭyastu cāmuṃḍāstasminkṣetre sthitāḥ svayam || 118 ||
[Analyze grammar]

caitre māsi sitāṣṭamyāṃ tatra tvāṃ yadi pūjayet |
eka viṃśatijanmāni dāridryaṃ tasya no bhavet || 119 ||
[Analyze grammar]

amā somena saṃyuktā kadācidyadi labhyate |
tasyāṃ someśvaraṃ dṛṣṭvā koṭiyajñaphalaṃ labhet || 120 ||
[Analyze grammar]

etatkṣetraṃ mahāguhyaṃ sarvapātakanāśanam |
rudrāṇāṃ koṭayo yatra ekādaśa samāsate || 121 ||
[Analyze grammar]

dvādaśātra dineśānāṃ vasavo'ṣṭau samāgatāḥ |
gandharvayakṣarakṣāṃsi asaṃkhyātā gaṇeśvarāḥ || 122 ||
[Analyze grammar]

umāpi tatra pārśvasthā sarvadevaistu saṃstutā |
nandī ca gaṇanātho yo devadevasya śūlinaḥ || 123 ||
[Analyze grammar]

mahākālasya ye cānye gaṇapāḥ saṃti pārśvagāḥ |
gaṃgā ca yamunā caiva tathā devī sarasvatī || 124 ||
[Analyze grammar]

anyāśca saritaḥ puṇyā nadāścaiva hradāstathā |
samudrāḥ parvatāḥ kūpā vanaspataya eva ca || 125 ||
[Analyze grammar]

sthāvaraṃ jaṃgamaṃ caiva prabhāse tu samāgatam |
anye caiva gaṇāstatra prabhāse saṃvyavasthitāḥ || 126 ||
[Analyze grammar]

na mayā kathitāḥ sarva uddeśena kvacitkvacit |
bhaktyā paramayā yukto devadevi vināyakam |
tṛtīyaṃ pūjayettatra vāṃchetkṣetraphalaṃ yadi || 127 ||
[Analyze grammar]

dvādaśaivaṃ tathā cāṣṭau catvāriṃśacca koṭayaḥ |
nadīnāmagnitīrthasya dvāre tiṣṭhaṃti bhāmini || 128 ||
[Analyze grammar]

nirmālyalaṃghanaṃ kiṃcidajñātādyadi vai kṛtam |
tatsarvaṃ vilayaṃ yāti agnitīrthasya darśanāt || 129 ||
[Analyze grammar]

devi kiṃ bahunoktena kṣetrametanmahāprabham |
na te varṇayituṃ śakyaṃ kalpakoṭiśatairapi || 13 ||
[Analyze grammar]

ye cāṃtarikṣe bhuvi ye ca devāstīrthāni vai yāni digaṃtareṣu |
kṣetraṃ prabhāsaṃ pravaraṃ hi teṣāṃ someśvaraṃ devi tathā variṣṭham || 131 ||
[Analyze grammar]

ye cāṃḍajāścodbhijāścaiva jīvāḥ sasvedajāścaiva jarāyujāśca |
devi prabhāse tu gatāsavo'tha muktiṃ paraṃ yāṃti na saṃśayo'tra || 132 ||
[Analyze grammar]

iti nigaditametaddevadevasya citraṃ caritamidamaciṃtyaṃ devi te śaṃkarasya |
kalikaluṣavidāraṃ sarvaloko'pi yāyādyadi paṭhati śṛṇoti stauti nityaṃ ya ittham || 133 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye kṣetrapramāṇavarṇanaṃ nāma caturtho'dhyāyaḥ || 4 ||
[Analyze grammar]