Chapter 3

[English text for this chapter is available]

ṛṣaya ūcuḥ |
kathito bhavatā sargaḥ pratisargastathaiva ca |
vaṃśānuvaṃśacaritaṃ purāṇānāmanukramaḥ || 1 ||
[Analyze grammar]

manvantarapramāṇaṃ ca brahmāṃḍasya ca vistaraḥ |
jyotiścakrasvarūpaṃ ca yathāvadanuvarṇitam |
śrotumicchāmahe tvattaḥ sāṃprataṃ tīrthavistaram || 2 ||
[Analyze grammar]

pṛthivyāṃ yāni tīrthāni pāpaghnāni śubhāni ca |
tāni sūtaja kārtsnyena yathāvadvaktumarhasi || 3 ||
[Analyze grammar]

sūta uvāca |
idaṃ pṛṣṭaṃ purā devyā kailāsaśikharottame |
nānādhātuvicitrāṃge nānāratnasamanvite || 4 ||
[Analyze grammar]

nānādrumalatākīrṇe nānāpuṣpopaśobhite |
yakṣavidyādharākīrṇe hyapsarogaṇasevite || 5 ||
[Analyze grammar]

tatra brahamā ca viṣṇuśca skandanandigaṇeśvarāḥ |
caṃdrādityau grahaiḥ sārdhaṃ nakṣatradhruvamaṇḍalam || 6 ||
[Analyze grammar]

vāyuśca varuṇaścaiva kubero dhanadastathā |
īśānaścāgniriṃdraśca yamo nirṛtireva ca || 7 ||
[Analyze grammar]

saritaḥ sāgarāḥ sarve parvatā uragāstathā |
brāhmyādyā mātaraścaiva ṛṣayaśca tapodhanāḥ || 8 ||
[Analyze grammar]

mūrtimaṃti ca tīrthāni kṣetrāṇyāyatanāni ca |
dānavāsuradaityāśca piśācā bhūtarākṣasāḥ || 10 ||
[Analyze grammar]

tatra siṃhāsanaṃ divyaṃ śatayojanavistṛtam || 11 ||
[Analyze grammar]

lakṣāyutasahasraiśca rudrakoṭibhirāvṛtam |
tanmadhye sarvatobhadraṃ siṃhadvāraiḥ sutoraṇaiḥ || 12 ||
[Analyze grammar]

svacchamauktikasaṃkāśaṃ prākāraśikharāvṛtam |
nandīśvaramahākāladvārapālagaṇairvṛtam || 13 ||
[Analyze grammar]

kiṃkiṇījālamukharaiḥ satyatākairalaṃkṛtam |
vitānacchatrakhaṃḍaiśca muktādāmapralaṃbitaiḥ || 14 ||
[Analyze grammar]

ghaṃṭācāmaraśobhāḍhayairdarpaṇaiścopaśobhitam |
kalaśairdvāravinyastaratnapallavasaṃyutaiḥ || 15 ||
[Analyze grammar]

citritaṃ citraśāstrajñai ratnacūrṇaiḥ samu्jvalaiḥ |
svastikaiḥ patravalyādyairliṃgodbhavalatādibhiḥ || 16 ||
[Analyze grammar]

śatasiṃhāsanākīrṇaṃ vedikābhiśca śobhitam |
āsīnai rudravṛndaiśca rudrakanyākadambakaiḥ || 17 ||
[Analyze grammar]

lakṣapatradalāḍhyaiśca śvetapadmaiśca bhūṣitam |
apsarobhiḥ samākīrṇaṃ puṣpaprakaravistṛtam || 18 ||
[Analyze grammar]

dhūpitaṃ dhūpavarttībhiḥ kuṃkumodakasecitam |
vaṃśavīṇāmṛdaṃgaiśca gomukhairmukhavādanaiḥ || 19 ||
[Analyze grammar]

śaṃkhabherīninādena dundubhidhvanitena ca |
garjadbhirgaṇavṛndaiśca meghasvanitanisvanaiḥ || 20 ||
[Analyze grammar]

gaṇānāṃ stotraśabdena sāmavedaraveṇa ca |
prekṣaṇīyairmahānādairgeyahuṅkāraśobhitam || 21 ||
[Analyze grammar]

vṛṣanarditaśabdena gajavājiraveṇa ca |
kāṃcīnūpuraśabdena samākīrṇadigaṃtaram || 22 ||
[Analyze grammar]

sarvasaṃpatkaraṃ śrīmacchaṃkarasyaiva maṃdiram |
vaṃśa vīṇāmṛdaṃgaiśca nāditaṃ tatra tatra ha |
ṛgvedo mūrtimāṃścaiva śakranīlasamadyutiḥ || 23 ||
[Analyze grammar]

divyagandhānuliptāṃgo divyābharaṇabhūṣitaḥ |
saṃsthitaḥ pūrvatastasya dīpyamānaḥ svatejasā || 24 ||
[Analyze grammar]

uttareṇa yajurvedaḥ śuddhasphaṭikasannibhaḥ |
divyakuṇḍaladhārī ca mahākāyo mahābhujaḥ || 25 ||
[Analyze grammar]

sthitaḥ paścima digbhāge sāmavedaḥ sanātanaḥ |
raktāṃbaradharaḥ śrīmānpaprarāgasamaprabhaḥ || 26 ||
[Analyze grammar]

sragdāmadhārī citraśca gītabhūṣaṇabhūṣitaḥ |
athavāṃ'janavacchayāmaḥ sthito dakṣiṇatastathā || 27 ||
[Analyze grammar]

piṃgākṣo lohitagrīvo harikeśo mahātanuḥ |
itihāsaṣaḍaṃgāni purāṇānyakhilāni ca || 28 ||
[Analyze grammar]

vedopaniṣadaśchando mīmāṃsāraṇyakaṃ tathā |
svāhākāravaṣaṭkārau rahasyāni tathaiva ca || 29 ||
[Analyze grammar]

etaiḥ samanvitaiścaiva tatra brahmā svayaṃ sthitaḥ |
śaktirūpadharairmantrairyogaiśvaryasamanvitaiḥ || 30 ||
[Analyze grammar]

sahasrapatrakamalairaṃkitaiḥ surapūjitaiḥ |
pūjitairgaṇarudraiśca brahmaviṣviṃdravaṃditaiḥ || 31 ||
[Analyze grammar]

cāmarākṣepavyajanairvījitaiśca samantataḥ |
śobhitaśca sadā śrīmāṃścaṃdrakoṭisamaprabhaḥ || 32 ||
[Analyze grammar]

jñānāmṛtasutṛptātmā yogaiśvaryaprasādakaḥ |
yogīṃdramānasāṃbhoja rājahaṃso dvijottamaḥ || 33 ||
[Analyze grammar]

ajñānatimiradhvaṃsī ṣaṭtriṃśattattvabhūṣaṇaḥ |
sarvasaukhyapradātā ca tatrāste caṃdraśekharaḥ || 34 ||
[Analyze grammar]

tasyotsaṃgagatā devī taptakāṃcanasaprabhā |
pūjito yoginīvṛndaiḥ sādhakaiḥ surakinnaraiḥ || 35 ||
[Analyze grammar]

sarvalakṣaṇasaṃpūrṇā sarvābharaṇabhūṣitā |
yogasiddhipradā nityaṃ mokṣābhyudayadāyinīm || 36 ||
[Analyze grammar]

saubhāgyakadalīkandamūlabījaṃ ca pārvatī |
devasya mukhamālokya vismitā cārulocanā || 37 ||
[Analyze grammar]

ānaṃdabhāvaṃ saṃjñāya ānandāsrāvilekṣaṇam |
uvāca devī madhuraṃ kṛtāṃjalipuṭā satī || 38 ||
[Analyze grammar]

devyuvāca |
janmakoṭisahasrāṇi janmakoṭiśatāni ca |
śodhitastvaṃ jagannātha mayā prāṇanaciṃtayā || 39 ||
[Analyze grammar]

arddhāṃga saṃsthayā vāpi tvadvaktradhyānakāmyayā |
tathāpi te jagannātha nāṃto labdhvo maheśvara || 40 ||
[Analyze grammar]

anantarūpiṇe tubhyaṃ devadeva namo'stu te |
namo vedarahasyāya namo vedaiḥ stutāya ca || 41 ||
[Analyze grammar]

śmaśānaratinityāya namo gaganacāriṇe |
jyeṣṭhasāmarahasyāya śatarudrapriyāya ca || 42 ||
[Analyze grammar]

namo vṛṣakṛtāṃkāya yajurvedadharāya ca |
brahmāṃḍakoṭisaṃlagnamāline gaganātmane || 43 ||
[Analyze grammar]

maṇicitritakandāya namaḥ sarvārthasiddhaye |
namo vedasvarūpāya dvija siddhipriyāya ca || 44 ||
[Analyze grammar]

puṃstrīvikārarūpāya namaścaṃdrārddhadhāriṇe |
namognaye sahomāya ādityavaruṇāya ca || 45 ||
[Analyze grammar]

pṛthivyai cāṃtarikṣāya vāyave dīkṣitāya ca |
saṃyogāya viyogāya dhātre kartre'pahāriṇe || 46 ||
[Analyze grammar]

pradīptaśūlahastāya brahmadaṇḍadharāya ca |
namaḥ patīnāṃ pataye mahatāṃ pataye namaḥ || 47 ||
[Analyze grammar]

namaḥ kālāgnirudrāya saptalokanivāsine |
tvaṃ gatiḥ sarvabhūtānāṃ bhūtānāṃ pataye namaḥ || 48 ||
[Analyze grammar]

namaste bhagavanrudra namaste bhagavañchiva |
namaste parataḥ śreṣṭha namaste parataḥ para || 49 ||
[Analyze grammar]

jihvācāpalyabhāvena khedito'si mayā prabho |
tatkṣantavyaṃ maheśāna jñānadivya namo'stu te || 50 ||
[Analyze grammar]

īśvara uvāca |
mamotsaṃgasthitā devi kiṃ tvaṃ sāsrāvilekṣaṇā |
adyāpi kimapūrṇaṃ te tatsarvaṃ karavāṇyaham || 51 ||
[Analyze grammar]

varaṃ bravīhi bhadraṃ te stavenānena suvrate |
dadāmi te na saṃdehaḥ śokaṃ tyaja maheśvari || 52 ||
[Analyze grammar]

niṣkale sakale devi sthūle sūkṣme carācare |
na tatpaśyāmi deveśi yattvayā rahitaṃ bhavet || 53 ||
[Analyze grammar]

ahaṃ te hṛdaye gauri tvaṃ ca me hṛdi saṃsthitā |
ahaṃ bhrātā ca putraśca baṃdhurbhartā tathaiva ca || 54 ||
[Analyze grammar]

tvaṃ tu me bhaginī bhāryā duhitā bāṃdhavī snuṣā |
ahaṃ yajñapatiryajvā tvaṃ ca śraddhā sadakṣiṇā || 55 ||
[Analyze grammar]

oṃkāro'haṃ vaṣaṭkāraḥ sāmāhamṛgyajustathā |
ahamagniśca hotā ca yajamānastathaiva ca || 56 ||
[Analyze grammar]

adhvaryurahamudgātā brahmāhaṃ brahmavittathā |
tvaṃ tu devyaraṇī caiva patnī tu parikīrtyase || 57 ||
[Analyze grammar]

svāhā svadhā ca suśroṇi tvayi sarvaṃ pratiṣṭhitam |
ahamiṣṭo mahāyajñaḥ pūrvo yajñastvamucyase || 58 ||
[Analyze grammar]

puruṣo'haṃ varārohe prakṛtistvaṃ nigadyase |
ahaṃ viṣṇurmahāvīryastvaṃ lakṣmīrlokabhāvinī || 59 ||
[Analyze grammar]

ahamindro mahātejāḥ prācī tvaṃ parameśvarī |
prajāpatīnāṃ rūpeṇa sarvamāhaṃ vyavasthitaḥ || 60 ||
[Analyze grammar]

teṣāṃ yā nāyikāstāstvaṃ rūpaistaistairavasthitā |
divaso'haṃ mahādevi rajanī tvaṃ nigadyase || 61 ||
[Analyze grammar]

nimeṣo'haṃ muhūrtaśca tvaṃ kalā siddhireva ca |
ahaṃ tejo'dhikaḥ sūryastvaṃ tu saṃdhyā prakīrttyase || 62 ||
[Analyze grammar]

ahaṃ bījadharaḥ śreṣṭhastvaṃ tu kṣetraṃ varānane |
ahaṃ vanaspatiḥ plakṣastvaṃ vanaspatirucyase || 63 ||
[Analyze grammar]

śeṣarūpadharo nitye phaṇāmaṇivibhūṣitaḥ |
revatī tvaṃ viśālākṣi madavibhramalocanā || 64 ||
[Analyze grammar]

mokṣo'haṃ sarvaduḥkhānāṃ tvaṃ tu devi parā gatiḥ |
apāṃ patirahaṃ bhadre tvaṃ tu devi saridvarā || 65 ||
[Analyze grammar]

vaḍavāgnirahaṃ bhadre tvaṃ tu dīptiḥ prakīrtitā |
prajāpatirahaṃ karttā tvaṃ prajā prakṛtistathā || 66 ||
[Analyze grammar]

nāgānāmadhipaścāhaṃ pātālatalavāsinām |
tvaṃ nāgī nāgarājo'haṃ sahasraphaṇabhūṣitaḥ || 67 ||
[Analyze grammar]

niśākaravaraścāhaṃ śreṣṭhā tvaṃ rajanīkarī |
kāmo'haṃ kāmado devi tvaṃ ratiḥ smṛtireva ca || 68 ||
[Analyze grammar]

durvāsāścāpyahaṃ bhadre tvaṃ kṣamā samacāriṇī |
lobhamohatapaścāhaṃ tvaṃ tṛṣṇā tāmasī smṛtā || 69 ||
[Analyze grammar]

kakudmānvṛṣabhaścāhaṃ yogamātā tapasvinī |
vāyurapyahamavyaktastvaṃ gatirmanasūdanī || 70 ||
[Analyze grammar]

ahaṃ mocayitā lobhe nirmamā tvaṃ yaśasvini |
nayo'haṃ sarvakāryeṣu nītistvaṃ kamalekṣaṇā || 71 ||
[Analyze grammar]

ahamannaṃ ca bhoktā ca oṣadhī tvaṃ nigadyase |
ahamagniśca dhūmaśca tvamūṣmā jvālameva ca || 72 ||
[Analyze grammar]

ahaṃ saṃvarttako meghastvaṃ ca dhārā hyanekaśaḥ |
ahaṃ munīnāṃ rūpeṇa tvaṃ tatpatnī prakīrtitā || 73 ||
[Analyze grammar]

ahaṃ saṃsārakarttā vai tvaṃ tu sṛṣṭirvarānane |
ahaṃ śukrāsthiromāṇi tvaṃ majjā balameva ca || 74 ||
[Analyze grammar]

parjanyo'haṃ mahābhāge tvaṃ vṛṣṭiḥ parameśvari |
ahaṃ saṃvatsaro devi tvamṛtuḥ parikīrttitā || 75 ||
[Analyze grammar]

ahaṃ kṛtayugo devi tvaṃ tu tretā nigadyase |
yugo'haṃ dvāparaḥ śrīmāṃstvaṃ kaliḥ parameśvari || 76 ||
[Analyze grammar]

ākāśaścāpyahaṃ bhadre pṛthivī tvamihocyase |
ahamadṛśyamūrtiśca dṛśyamūrtistvamucyase || 77 ||
[Analyze grammar]

varado'haṃ varārohe maṃtrastvamiti cocyase |
ahaṃ draṣṭā ca śrotā ca tvaṃ dṛśyā śrutireva ca || 78 ||
[Analyze grammar]

ahaṃ vaktā ramayitā tvaṃ vācyā parameśvari |
ahaṃ śrotā ca gātā ca tvaṃ gītirgeyameva ca || 79 ||
[Analyze grammar]

ahaṃ trātā ca gandhaśca tvaṃ tu nighrāṇameva ca |
ahaṃ sparśayitā kartā sparśyastvaṃ sṛṣṭameva ca || 80 ||
[Analyze grammar]

ahaṃ sarvamidaṃ bhūtaṃ tvaṃ tu devi na saṃśayaḥ |
sraṣṭā'haṃ tava deveśi tvaṃ sṛjasyakhilaṃ jagat || 81 ||
[Analyze grammar]

tvayā mayā ca deveśi otaprotamidaṃ jagat |
ekadhā daśadhā caiva tathā śatasahasradhā || 82 ||
[Analyze grammar]

aiśvaryeṇa tu saṃyuktau sarvaprāṇi vyavasthitau |
ahaṃ tvaṃ ca viśālākṣi satataṃ saṃpratiṣṭhitau || 83 ||
[Analyze grammar]

krīḍāmi krīḍayā devi tvayā sārddhaṃ varānane |
tvaṃ dhṛtirdhāriṇī lakṣmīḥ kāṃtā matprakṛtirdhruvam || 84 ||
[Analyze grammar]

ratiḥ smṛtiḥ kāmacārī mama cāṃganivāsinī |
devi kiṃ bahunoktena prāṇebhyo'pi garīyasī || 85 ||
[Analyze grammar]

varaṃ varaya devaśi yatkiṃcinmanasi sthitam |
tatte dadāmi tuṣṭo'haṃ yadyapi syātsudurllabham || 86 ||
[Analyze grammar]

devyuvāca |
dhanyāhaṃ kṛtapuṇyāhaṃ tapaḥ sucaritaṃ mayā |
yattvayā'haṃ jagannātha harṣadṛṣṭyā'valokitā || 87 ||
[Analyze grammar]

yadi tuṣṭo'si me deva varaṃ dātuṃ mamecchasi |
tanme kathaya deveśa sāṃprataṃ tīrthavistaram || 88 ||
[Analyze grammar]

pṛthivyāṃ yāni tīrthāni pāpaghnāni śivāni ca |
tāni deveśa kārtsnyena yathāvadvaktumarhasi || 89 ||
[Analyze grammar]

īśvara uvāca |
śṛṇu devi pravakṣyāmi tīrthamāhātmyamuttamam |
sarvapāpaharaṃ nṛṇāṃ puṇyaṃ devarṣisatkṛtam || 90 ||
[Analyze grammar]

tīrthānāṃ darśanaṃ śreṣṭhaṃ snānaṃ caiva sureśvari |
śravaṇaṃ ca praśaṃsaṃti sadaiva ṛṣisattamāḥ || 91 ||
[Analyze grammar]

pṛthivyāṃ naimiṣaṃ tīrthamaṃtarikṣe ca puṣkaram |
kedāraṃ ca prayāgaṃ ca vipāśā cormilā tathā || 92 ||
[Analyze grammar]

karṇaveṇā mahādevī caṃdrabhāgā sarasvatī |
gaṃgāsāgarasaṃbhedastathā vārāṇasī śubhā || 93 ||
[Analyze grammar]

arghatīrthaṃ samākhyātaṃ gaṃgādvāraṃ tathaiva ca |
himasthānaṃ mahātīrthaṃ tathā māyāpurī śubhā || 94 ||
[Analyze grammar]

śatabhadrā mahābhāgā sindhuścaiva mahā nadī |
airāvatī ca kapilā śoṇaścaiva mahānadaḥ || 95 ||
[Analyze grammar]

payodhiḥ kauśikī tadvattathā godāvarī śubhā |
devakhātaṃ gayā caiva tathā dvārāvatī śubhā || 96 ||
[Analyze grammar]

prabhāsaṃ ca mahātīrthaṃ sarvapātakanāśanam || 97 ||
[Analyze grammar]

evamādīni tīrthāni yāni saṃti mahītale |
tāni dṛṣṭvā tu deveśi punarjanma na vindate || 98 ||
[Analyze grammar]

tisraḥ koṭyo'rdhakoṭī ca tīrthānāmiha bhūtale |
saṃjātāni pavitrāṇi sarvapāpaharāṇi ca || 99 ||
[Analyze grammar]

gaṃtavyāni mahādevi svadharmasya vivṛddhaye |
aśakyāni śivānyevaṃ gaṃtuṃ caiva sureśvari |
manasā tāni sarvāṇi gaṃtavyāni samāhitaiḥ || 100 ||
[Analyze grammar]

|devyuvāca |
bhagavanprāṇinaḥ sarve sarvopadravasaṃkulāḥ |
alpāyuṣaḥ sadā baddhā vyāmohairmaṃdirodbhavaiḥ || 101 ||
[Analyze grammar]

tretāyāṃ dvāpare caiva kiṃ nu vai dāruṇe kalau |
tasmātteṣāṃ hitārthāya tattīrthaṃ tvaṃ prakīrtaya |
yena dṛṣṭena sarveṣāṃ tīrthānāṃ labhyate phalam || 102 ||
[Analyze grammar]

evamuktastu pārvatyā prahasya parameśvaraḥ |
uvāca parayā prītyā vācā madhurayā prabhuḥ || 103 ||
[Analyze grammar]

īśvara uvāca |
tvameva hi carāḥ prāṇāḥ sarvasya jagatoraṇiḥ |
tvayā virahito devi muhūrtamapi notsahe || 104 ||
[Analyze grammar]

śivasya ca tathā śakteraṃtaraṃ nāsti pārvati |
na tadasti mahādevi yanna jānāsi śobhane || 105 ||
[Analyze grammar]

tvayā vinā'haṃ na kvāsmi na tvaṃ devi mayā vinā |
caṃdracaṃdrikayoryadvadagneruṣṇatvameva hi || 106 ||
[Analyze grammar]

tava devi mamāpīha nāsti caivāṃtaraṃ priye |
sarvaṃ caiva sureśāni yathāvatkathayāmyaham || 107 ||
[Analyze grammar]

rahasyānāṃ rahasyaṃ tu gopanīyaṃ prayatnataḥ |
nāstikāya na dātavyaṃ na ca pāparatāya ca || 108 ||
[Analyze grammar]

dātavyaṃ bhakti yuktāya svaśiṣyāya sutāya vā |
pūrvameva mayā khyātaṃ sārātsārataraṃ priye || 109 ||
[Analyze grammar]

tīrthopaniṣadaḥ khyātā liṃgopaniṣadastathā |
yogopaniṣado devi pūrvaṃ vai kathitāstava || 110 ||
[Analyze grammar]

pārvatyuvāca |
leśenāpi na siddhyaṃti kāṃkṣamāṇāḥ paraṃ padam |
yonīrbhramaṃto dṛśyaṃte narā nāstikavṛttayaḥ || 111 ||
[Analyze grammar]

tīrthavratāni sevante pratyayo naiva jāyate |
mohitaṃ tu jagatpūrvaṃ mithyājñānena śaṃkara || 112 ||
[Analyze grammar]

kiṃ te phalaṃ suraśreṣṭha jagadvyāmohane kṛte || 113 ||
[Analyze grammar]

sārātsārataraṃ nātha tava prāṇapriyaṃ hi yat |
tanme kathaya deveśa priyāhaṃ yadi te prabho || 114 ||
[Analyze grammar]

ityuktaḥ sa tayā devyā śrīkaṃṭhaḥ suranāyakaḥ |
prahasyovāca bhagavāngaṃbhīrārthamidaṃ vacaḥ || 115 ||
[Analyze grammar]

īśvara uvāca |
śṛṇuṣvāvahitā bhūtvā pṛṣṭo'haṃ yastvayā'dhunā |
niṣphalaṃ tatpravakṣyāmi vastutattvaṃ yathāsthitam || 116 ||
[Analyze grammar]

pūrvamuktāni tīrthāni yāni te surasuṃdari |
tisraḥ koṭyo'rddhakoṭī ca brahmāṃḍe sacarācare || 117 ||
[Analyze grammar]

teṣāṃ ca gopitaṃ tīrthaṃ prabhāsaṃ caiva suvrate || 118 ||
[Analyze grammar]

evamuktaṃ mahādevi prabhāsaṃ kṣetramuttamam |
dṛṣṭvā saṃskārarahitāḥ kalau pāpena mohitāḥ || 119 ||
[Analyze grammar]

rājasāstāmasāścaiva pāpopahatacetasaḥ |
paradāraparadravyaparahiṃsāratā narāḥ || 120 ||
[Analyze grammar]

udvegaṃ ca paraṃ yāṃti pratapyaṃti yatastataḥ |
ātmasaṃbhāvitā mūḍhā mithyājñānena mohitāḥ |
varṇāśramaviruddhaṃ tu tīrthe ku्rvanti ye'dhamāḥ || 121 ||
[Analyze grammar]

tīrthayātrāṃ prakurvaṃti daṃbhena kapaṭena ca |
tīrthe mṛtā na sidhyaṃti te narā varavarṇini || 122 ||
[Analyze grammar]

etadarthaṃ mayā devi tīrthāni vividhāni ca |
liṃgāni caiva suśroṇi gopitāni prayatnataḥ |
na siddhidāni deveśi kalau kalmaṣakāriṇām || 123 ||
[Analyze grammar]

ye narāstu jitakrodhā jitalobhā jiteṃdriyāḥ |
brāhmaṇāḥ kṣatriyā vaiśyāḥ śūdrāścādambhamatsarāḥ || 124 ||
[Analyze grammar]

madbhāvabhāvitā devi tīrthaṃ sevaṃti suvratāḥ |
teṣāṃ caiva hitārthāya kathayāmi yaśaśvini || 125 ||
[Analyze grammar]

prabhāsamiti vikhyātaṃ kṣetraṃ trailokyavaṃditam |
tatkṣetraṃ naiva jānaṃti mama māyāvimohitāḥ || 126 ||
[Analyze grammar]

parohaṃ tvekacittaiśca bahujanmabhirarcitaḥ |
te vidaṃti paraṃ kṣetraṃ prabhāsaṃ pāpanāśanam || 127 ||
[Analyze grammar]

madbhāvabhāvitā devi mama vrataniṣeviṇaḥ |
teṣāṃ prabhāsikaṃ kṣetraṃ viditaṃ nātra saṃśayaḥ || 128 ||
[Analyze grammar]

yamaiśca niyamairyuktā ahaṃkāravivarjjitāḥ |
teṣāmarthe vadiṣyāmi tava praśnaṃ sudurllabham |
brahmaviṣṇvindradevānāṃ purāṇaṃ kathitaṃ mayā || 129 ||
[Analyze grammar]

so'haṃ devi vadiṣyāmi karṇaṃ dehi varānane |
pṛthivyāmapi sarveṣāṃ tīrthānāṃ surasuṃdari || 130 ||
[Analyze grammar]

ekaṃ me vallabhaṃ tatra prabhāsaṃ kṣetramuttamam |
tasmiṃścaiva mahākṣetre tīrthaiḥ somena pūjitaḥ |
varāṃstasmai pradāyātha sadaikāṃte sthito hyaham || 131 ||
[Analyze grammar]

tena guhyaṃ kṛtaṃ sthānaṃ tava devi prakāśitam |
tatra me yogayuktasya divyaṃ liṃgaṃ babhūva ha || 132 ||
[Analyze grammar]

divyatejassamā yuktaṃ vahnimekhalamaṃḍitam |
lakṣamātrasthitaṃ śāṃtaṃ durnirīkṣyaṃ tu mānavaiḥ || 133 ||
[Analyze grammar]

icchājñānakriyākhyāśca tisro vai śaktayaśca yāḥ |
tasmālliṃgātsamutpannā jagatkartṛtvahetave || 134 ||
[Analyze grammar]

tasmiṃlliṃge layaṃ yāti jagadetaccarācaram |
punastenaiva saṃbhūtaṃ dṛśyate sacarācaram || 135 ||
[Analyze grammar]

guhyaṃ caiva tu saṃbhūtaṃ na kaścidveda tatparam |
janmābhyāsena talliṃgaṃ jñāyate bhuvi mānavaiḥ || 136 ||
[Analyze grammar]

kṣetraṃ prabhāsikaṃ proktaṃ kṣetrajño'haṃ na saṃśayaḥ |
tatra someśanāmāhamasminkṣetraṃ varānane || 137 ||
[Analyze grammar]

mamāṃśasaṃbhavā ye ca asminkṣetre samudbhavāḥ |
teṣāṃ tu viditaṃ liṃgaṃ pūrvakalpe tu bhairavam || 138 ||
[Analyze grammar]

anyairapi yugairdevi idaṃ liṃgaṃ sudurlabham |
ghore kaliyuge pāpe viśeṣeṇa ca durlabham || 139 ||
[Analyze grammar]

anyannidarśanaṃ tatra tatpravakṣyāmi pārvati || 140 ||
[Analyze grammar]

kalau yuge mahāghore hetuvādaratā narāḥ |
vadiṣyaṃti mahāpāpāḥ sarve pākhaṇḍasaṃsthitāḥ || 141 ||
[Analyze grammar]

mithyā caitatkṛtaṃ sarvaṃ mūrkhaiścāpi prakīrtitam |
kva kṣetraṃ kva prabhāvaśca kutra vai santi devatāḥ || 142 ||
[Analyze grammar]

sarvaṃ cāpi tathālīkaṃ mūḍhaiścāpi prakīrtitam || 143 ||
[Analyze grammar]

evaṃ mūrkhā vadiṣyaṃti prahasiṣyanti cāpare |
nārakā nāstikā lokāḥ pāpopahatacetasaḥ |
siddhiṃ naiva prayāsyaṃti saṃprāpte tu kalau yuge || 144 ||
[Analyze grammar]

tīrthe caiva mṛtā ye tu śivanindāparāyaṇāḥ |
tiryagyoniprasūtāśca dṛśyante sarvayoniṣu || 145 ||
[Analyze grammar]

etasmātkāraṇāddevi tīrthe caiva suduḥkhitāḥ |
dṛśyante yugamāhātmyātsatyaśaucavivarjitāḥ || 146 ||
[Analyze grammar]

idaṃ hi kāraṇaṃ proktaṃ kṣetrāṇāṃ caiva gopane |
etatte kathitaṃ sarvaṃ siddhiryena sudurllabhā || 147 ||
[Analyze grammar]

yugeyuge tu tīrthāni kīrtitāni sureśvari |
teṣāṃ me vallabhaṃ devi prabhāsaṃ kṣetrameva ca || 148 ||
[Analyze grammar]

ityetatkathitaṃ devi rahasyaṃ pāpanāśanam |
kṣetrabījaṃ mahādevi kimanyatparipṛcchasi || 149 ||
[Analyze grammar]

idaṃ mahāpātakanāśanaṃ ye śroṣyaṃti vai kṣetramahāprabhāvam |
te cāpi yāsyanti mama prabhāvāttriviṣṭapaṃ puṇyajanādhivāsam || 150 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prabhāsakṣetramāhātmye devīpraśnavarṇanaṃ nāma tṛtīyo'dhyāyaḥ || 3 ||
[Analyze grammar]