Chapter 2

[English text for this chapter is available]

ṛṣaya ūcuḥ |
kathāyā lakṣaṇaṃ brūhi guṇadoṣānsavistarān |
ārṣeyapauruṣeyāṇāṃ kāvyacihnaparīkṣaṇam |
kathaṃ jñeyaṃ mahābuddhe śrotumicchāmahe vayam || 1 ||
[Analyze grammar]

sūta uvāca |
atha saṃkṣepato vakṣye purāṇānāmanukramam |
lakṣaṇaṃ caiva saṃkhyāṃ ca uktabhedāṃstathaiva ca || 2 ||
[Analyze grammar]

purā tapaścacārogramamarāṇāṃ pitāmahaḥ |
āvirbhūtāstato vedāḥ saṣaḍaṃgapadakramāḥ || 3 ||
[Analyze grammar]

tataḥ purāṇamakhilaṃ sarvaśāstramayaṃ dhruvam |
nityaśabdamayaṃ puṇyaṃ śata koṭipravistaram || 4 ||
[Analyze grammar]

nirgataṃ brahmaṇo vaktrādbrāhmaṃ vaiṣṇavameva ca |
śaivaṃ bhāgavataṃ caiva bhaviṣyaṃ nāradīyakam || 5 ||
[Analyze grammar]

mārkaṇḍeyamathāgneyaṃ brahmavaivartameva ca |
laiṅgaṃ tathā ca vārāhaṃ skāṃdaṃ vāmanameva ca || 6 ||
[Analyze grammar]

kaurmyaṃ mātsyaṃ gāruḍaṃ ca vāyavīyamanantaram |
aṣṭādaśaṃ samuddiṣṭaṃ sarvapātakanāśanam || 7 ||
[Analyze grammar]

ekameva purā hyāsīdbrahmāṇḍaṃ śatakoṭidhā || 8 ||
[Analyze grammar]

tato'ṣṭādaśadhā kṛtvā vedavyāso yugeyuge |
prakhyāpayati loke'sminsākṣānnārāyaṇāṃśajaḥ || 9 ||
[Analyze grammar]

anyānyupapurāṇāni muninā kathitāni tu |
tāni vaḥ kathayiṣyāmi saṃkṣepādavadhāryatām || 10 ||
[Analyze grammar]

ādyaṃ sanatkumāroktaṃ nārasiṃhamataḥ param |
tṛtīyaṃ skāndamuddiṣṭaṃ kumāreṇānubhāṣitam || 11 ||
[Analyze grammar]

caturthaṃ śivadharmākhyaṃ sākṣānnandīśabhāṣitam |
durvāsasoktamāścaryyaṃ nāradoktamataḥ param || 12 ||
[Analyze grammar]

kāpilaṃ mānavaṃ caiva tathaivośanaseritam |
brahmāṇḍaṃ vāruṇaṃ cānyatkālikāhvayameva ca || 13 ||
[Analyze grammar]

māheśvaraṃ tathā sāṃbaṃ sauraṃ sarvārthasaṃcayam || |
parāśaroktaṃ paramaṃ mārīcaṃ bhārgavāhvayam || 14 ||
[Analyze grammar]

etānyupapurāṇāni kathitāni dvijottamāḥ || 15 ||
[Analyze grammar]

ṛṣaya ūcuḥ |
purāṇasaṃkhyāmācakṣva sūta vistaraśaḥ kramāt |
dānadharmamaśeṣajña yathāvadanupūrvaśaḥ || 16 ||
[Analyze grammar]

sūta uvāca |
idameva purāṇe'sminpurāṇapuruṣastadā |
yaduktavānsa viśvātmā manave tannibodhata || 17 ||
[Analyze grammar]

purāṇaṃ sarvaśāstrāṇāṃ brahmāṇḍaṃ prathamaṃ smṛtam |
anantaraṃ ca vaktrebhyo vedāstasya vinirgatāḥ || 18 ||
[Analyze grammar]

purāṇamekamevāsīttasminkalpāntaretathā |
trivargasādhanaṃ puṇyaṃ śatakoṭipravistaram || 19 ||
[Analyze grammar]

vinirdagdheṣu lokeṣu kṛṣṇenānantarūpiṇā |
sāṅgāṃśca caturo vedānpurāṇanyāyavistaram || 20 ||
[Analyze grammar]

mīmāṃsāṃ dharmaśāstraṃ ca parigṛhyātmasātkṛtam |
matsyarūpeṇa ca punaḥ kalpādāvudakārṇave || 21 ||
[Analyze grammar]

aśeṣameva kathitaṃ brahmaṇe divyacakṣuṣe |
brahmā jagāda ca munīṃstrikālajñānadarśanaḥ || 22 ||
[Analyze grammar]

pravṛttiḥ sarvaśāstrāṇāṃ purāṇasyābhavattataḥ || 23 ||
[Analyze grammar]

tataḥ kālakrameṇāsau vyāsarūpadharo hariḥ |
aṣṭādaśapurāṇāni saṃkṣepsyati yugeyuge || 24 ||
[Analyze grammar]

caturlakṣapramāṇāni dvāparedvāpare sadā |
tadāṣṭādaśadhā kṛṣṇā bhūrloke'sminprabhāṣate || 25 ||
[Analyze grammar]

adyā'pi devaloke tu śatakoṭipravistaram |
tadartho'tra caturlakṣaḥ saṃkṣepeṇa niveśitaḥ || 26 ||
[Analyze grammar]

purāṇāni daśāṣṭau ca sāṃprataṃ tadihocyate |
nāmatastāni vakṣyāmi saṃkhyāṃ ca munisattamāḥ || 27 ||
[Analyze grammar]

brahmaṇā'bhihitaṃ pūrvaṃ yāvanmātraṃ marīcaye |
brāhmaṃ taddaśasāhasraṃ purāṇaṃ tadihocyate || 28 ||
[Analyze grammar]

likhitvā tacca yo dadyājjaladhenusamanvitam |
vaiśākhyāṃ paurṇamāsyāṃ ca brahmaloke mahīyate || 29 ||
[Analyze grammar]

etadeva yadā padmamabhūddhairaṇmayaṃ jagat |
tadvṛttāṃtāśrayāṃtaṃ tatpādmamityucyate budhaiḥ || 30 ||
[Analyze grammar]

pādmaṃ tatpañcapañcāśatsahasrāṇīha paṭhyate |
tatpurāṇaṃ ca yo dadyātsuvarṇakamalānvitam |
jyeṣṭhe māsi tilairyuktaṃ so'śvamedhaphalaṃ labhet || 31 ||
[Analyze grammar]

vārāhakalpavṛttāntamadhikṛtya parātparaḥ |
yatrāha dharmānakhilāṃstaduktaṃ vaiṣṇavaṃ viduḥ || 32 ||
[Analyze grammar]

caritairañcitaṃ viṣṇostalloke vaiṣṇavaṃ viduḥ |
trayoviṃśatisāhasraṃ purāṇaṃ tatprakīrtitam || 33 ||
[Analyze grammar]

tadāṣāḍhe ca yo dadyādghṛtadhenusamanvitam |
paurṇamāsyāṃ viśuddhāyāṃ saṃ padaṃ yāti vaiṣṇavam || 34 ||
[Analyze grammar]

śrutakalpaprasaṅgena dharmānvāyurathābravīt |
yatra tadvāyavīyaṃ syādrudramāhātmyasaṃyutam || 35 ||
[Analyze grammar]

caturviṃśatisāhasraṃ nānā vṛttāntasaṃyutam |
dharmārthakāmamokṣaiśca sādhuvṛttasamanvitam || 36 ||
[Analyze grammar]

śrāvaṇyāṃ śrāvaṇe māsi guḍadhenusamanvitam |
yo dadyāddadhisaṃyuktaṃ brāhmaṇāya kuṭumbine |
śivaloke sa pūtātmā kalpamekaṃ vasennaraḥ || 37 ||
[Analyze grammar]

punaḥ saṃjāyate martyo brāhmaṇo vedavittamaḥ |
vedavidyārthatattvajño vyākhyātattvārthavittamaḥ || 38 ||
[Analyze grammar]

yatrādhikṛtya gāyatrīṃ varṇyate dharmavistaraḥ |
vṛtrāsuravadhopetaṃ tadbhāgavatamucyate || 39 ||
[Analyze grammar]

sārasvatasya kalpasya madhye ye syurnarāmarāḥ |
tadvṛttāntodbhavaṃ puṇyaṃ puṇyodvāhasamanvitam || 40 ||
[Analyze grammar]

likhitvā tacca yo dadyāddhemasiṃhasamanvitam |
paurṇamāsyāṃ prauṣṭhapadyāṃ sa yāti paramāṃ gatim || 41 ||
[Analyze grammar]

aṣṭādaśasahasrāṇi purāṇaṃ tatprakīrtitam || 42 ||
[Analyze grammar]

yatrāha nārado dharmānbṛhatkalpāśrayāṃstviha |
pañcaviṃśatsahasrāṇi nāradīyaṃ taducyate || 43 ||
[Analyze grammar]

tadiṣe pañcadaśyāṃ tu yo dadyāddhenusaṃyutam |
uttamāṃ siddhimāpnoti iha loke paratra ca |
sarvānkāmānavāpnoti nātra kāryā vicāraṇā || 44 ||
[Analyze grammar]

yatrādhikṛtya śakunīndharmādharmavicāraṇam |
purāṇaṃ navasāhasraṃ mārkaṇḍeyaṃ taducyate || 45 ||
[Analyze grammar]

parilikhya ca yo dadyātsauvarṇakarisaṃyutam |
kārtikyāṃ pauṇḍarīkasya yajñasya phalabhāgbhavet || 46 ||
[Analyze grammar]

yattadīśānakalpasya vṛttāntamadhikṛtya ca |
vaśiṣṭhāyā'gninā proktamāgneyaṃ tatpracakṣate || 47 ||
[Analyze grammar]

likhitvā tacca yo dadyāddhemapadmasamanvitam |
mārgaśīrṣe vidhānena tiladhenuyutaṃ tathā |
tacca ṣoḍaśasāhasraṃ sarvakratuphalapradam || 48 ||
[Analyze grammar]

yatrādhikṛtya māhātmyamādityasya caturmukhaḥ |
aghorakalpavṛttāntaprasaṃgena jagatpatiḥ |
manave kathayāmāsa bhūtagrāmasya lakṣaṇam || 49 ||
[Analyze grammar]

caturdaśasahasrāṇi tathā pañcaśatāni ca |
bhaviṣyacaritaprāyaṃ bhaviṣyaṃ tadihocyate || 50 ||
[Analyze grammar]

tatpauṣamāsi yo dadyātpaurṇamāsyāṃ vimatsaraḥ |
guḍakumbhasamāyuktamagniṣṭomaphalaṃ labhet || 51 ||
[Analyze grammar]

rathaṃtarasya kalpasya vṛttāntamadhikṛtya ca |
sāvarṇinā nāradāya kṛṣṇamāhātmyasaṃyutam |
proktaṃ brahmavarāhasya caritaṃ varṇyate'tra ca || 52 ||
[Analyze grammar]

tadaṣṭādaśasāhasraṃ brahmavaivartamucyate |
purāṇaṃ brahmavaivartaṃ yo dadyādbrāhmaṇottame |
māghamāse paurṇamāsyāṃ brahmaloke mahīyate || 53 ||
[Analyze grammar]

yatrāgniliṅgamadhyasthaḥ prāha devo maheśvaraḥ |
dharmārthakāmamokṣārthānāgneyamadhikṛtya ca || 54 ||
[Analyze grammar]

kalpaṃ tallaiṅgamityuktaṃ purāṇaṃ brahmaṇā svayam || 55 ||
[Analyze grammar]

tadekādaśasāhasraṃ phālgunyāṃ yaḥ prayacchati |
tiladhenusamāyuktaṃ sa yāti śivasātmyatām || 56 ||
[Analyze grammar]

mahāvarāhasya punarmāhātmyamadhikṛtya ca |
viṣṇunā'bhihitaṃ kṣoṇyai tadvārāhamihocyate || 57 ||
[Analyze grammar]

mānavasya prasaṃgena dhanyasya munisattamāḥ |
caturviṃśatsahasrāṇi tatpurāṇamihocyate || 58 ||
[Analyze grammar]

kāñcanaṃ garuḍaṃ kṛtvā tiladhenusamanvitam |
paurṇamāsyāmatho dadyādbrāhmaṇāya kuṭumbine |
vārāhasyaprasādena padamāpnoti vaiṣṇavam || 59 ||
[Analyze grammar]

yatra māheśvarāndharmānadhikṛtya ca ṣaṇmukham |
kalpe tatpuruṣe vṛtte caritairupabṛṃhitam || 6 ||
[Analyze grammar]

skāṃdaṃ nāma purāṇaṃ tadekāśīti nigadyate |
sahasrāṇi śataṃ caikamiti martyeṣu paṭhyate || 61 ||
[Analyze grammar]

parilekhya ca yo dadyāddhemaśūlasamanvitam |
śaivaṃ sa padamāpnoti makaropagame raveḥ || 62 ||
[Analyze grammar]

trivikramasya māhātmyamadhikṛtya caturmukhaḥ |
trivargamabhyadhāttattu vāmanaṃ parikīrtitam || 63 ||
[Analyze grammar]

purāṇaṃ daśasāhasraṃ kaurmakalpānugaṃ śivam || 64 ||
[Analyze grammar]

yaḥ śaradviṣuve dadyāddhemavastrasamanvitam |
kṣaumāvṛtaṃ yutaṃ dhenvā sa padaṃ yāti vaiṣṇavam || 65 ||
[Analyze grammar]

yacca dharmārthakāmānāṃ mokṣasya ca rasātale |
māhātmyaṃ kathayāmāsa kūrmarūpī janārdanaḥ || 66 ||
[Analyze grammar]

indradyumnaprasaṃgena ṛṣīṇāṃ śakrasannidhau |
saptadaśasahasrāṇi lakṣmīkalpānuṣaṅgikam || 67 ||
[Analyze grammar]

yo dadyādayane kaurmaṃ hemakūrmasamanvitam |
gosahasrapradānasya sa phalaṃ prāpnuyānnaraḥ || 68 ||
[Analyze grammar]

śrutīnāṃ yatra kalpādau pravṛttyarthaṃ janārdanaḥ |
matsyarūpī ca manave narasiṃhopavarṇanam || 69 ||
[Analyze grammar]

adhikṛtyābravītsaptakalpavṛttaṃ munivratāḥ || |
tanmātsyamiti jānīdhvaṃ sahasrāṇi catudarśa || 70 ||
[Analyze grammar]

viṣuve haimamatsyena dhenvā kṣaumayugānvitam |
yo dadyātpṛthivī tena dattā bhavati cākhilā || 71 ||
[Analyze grammar]

yadā vā garuḍe kalpe viśvāṇḍādgaruḍo'bhavat |
adhikṛtyābravītkṛṣṇo gāruḍaṃ tadihocyate || 72 ||
[Analyze grammar]

tadaṣṭādaśa caikaṃ ca sahasrāṇīha paṭhyate || |
svarṇahaṃsasamāyuktaṃ yo dadyādayane pare |
sa siddhiṃ labhate mukhyāṃ śivaloke ca saṃsthitim || 73 ||
[Analyze grammar]

brahmā brahmāṇḍamāhātmyamadhikṛtyābravītpunaḥ |
tacca dvādaśasāhasraṃ brahmāṇḍaṃ dviśatādhikam || 74 ||
[Analyze grammar]

bhaviṣyāṇāṃ ca kalpānāṃ śrūyate yatra vistaraḥ |
tadbrahmāṇḍaṃ purāṇaṃ tu brahmaṇā samudāhṛtam || 79 ||
[Analyze grammar]

yo dadyāttu vyatīpāta ūrṇāyugasamanvitam |
rājasūyasahasrasya phalamāpnoti mānavaḥ || 76 ||
[Analyze grammar]

hemadhenvāyutaṃ tacca brahmalokaphalapradam |
caturlakṣamidaṃ proktaṃ vyāsenādbhutakarmaṇā || 77 ||
[Analyze grammar]

idaṃ lokahitārthāya saṃkṣiptaṃ dvāpare dvijāḥ || 78 ||
[Analyze grammar]

idamadyāpi deveṣu śatakoṭipravistaram |
upabhedānpravakṣyāmi loke ye saṃpratiṣṭhitāḥ || 79 ||
[Analyze grammar]

pādme purāṇe yatproktaṃ nārasiṃhopavarṇanam |
taccāṣṭādaśasāhasraṃ nārasiṃhamihocyate || 80 ||
[Analyze grammar]

nandine yatra māhātmyaṃ kārtikeyena varṇitam |
loke nandipurāṇaṃ vai khyātametaddvijottamāḥ || 81 ||
[Analyze grammar]

yatra sāmbaṃ puraskṛtya bhaviṣyati kathānakam |
procyate tatpunarloke sāṃbameva munivratāḥ || 82 ||
[Analyze grammar]

evamādityasaṃjñaṃ tu tatraiva paripaṭhyate |
aṣṭādaśabhyastu pṛthakpurāṇaṃ yacca dṛśyate |
vijānīdhvaṃ dvijaśreṣṭhāstadetebhyo vinirgatam || 83 ||
[Analyze grammar]

pañcāṅgāni purāṇasya cākhyānamitaratsmṛtam |
sargaśca pratisargaśca vaṃśo manvantarāṇi ca |
vaṃśānuvaṃśacaritaṃ purāṇaṃ pañcalakṣaṇam || 84 ||
[Analyze grammar]

brahmaviṣṇvarkarudrāṇāṃ māhātmyaṃ bhuvanasya ca |
saṃhāraśca pradṛśyeta purāṇaṃ pañcalakṣaṇam || 85 ||
[Analyze grammar]

dharmaścārthaśca kāmaśca mokṣaśca parikīrtyate |
sarveṣvapi purāṇeṣu tadvirūḍhe ca yatphalam || 86 ||
[Analyze grammar]

sātvikeṣu ca kalpeṣu māhātmyamadhikaṃ hareḥ |
rājaseṣu ca māhātmyamadhikaṃ brahmaṇo viduḥ || 87 ||
[Analyze grammar]

tadvadagre ca māhātmyaṃ tāmaseṣu śivasya hi |
saṃkīrṇe ca sarasvatyāḥ pitṝṇāṃ ca nigadyate || 88 ||
[Analyze grammar]

caturbhirbhagavānviṣṇurdvābhyāṃ brahmā tathā raviḥ |
aṣṭādaśapurāṇeṣu śeṣeṣu bhagavāñchivaḥ || 89 ||
[Analyze grammar]

vedavanniścalaṃ manye purāṇaṃ vai dvijottamāḥ |
vedāḥ pratiṣṭhitāḥ sarve purāṇe nātra saṃśayaḥ || 90 ||
[Analyze grammar]

bibhetyalpaśrutādvedo māmayaṃ cālayiṣyati |
itihāsapurāṇaistu niścalo'yaṃ kṛtaḥ purā || 91 ||
[Analyze grammar]

yanna dṛṣṭaṃ hi vedeṣu na dṛṣṭaṃ smṛtiṣu dvijāḥ |
ubhayoryatra dṛṣṭaṃ ca tatpurāṇeṣu gīyate || 92 ||
[Analyze grammar]

yo veda caturo vedānsāṃgopaniṣado dvijaḥ |
purāṇaṃ naiva jānāti na ca sa syādvicakṣaṇaḥ || 93 ||
[Analyze grammar]

aṣṭādaśapurāṇāni kṛtvā satyavatīsutaḥ |
bhāratākhyānamakarodvedārthairupabṛṃhitam || 94 ||
[Analyze grammar]

lakṣeṇaikena tatproktaṃ dvāparānte mahātmanā |
vālmīkinā ca yatproktaṃ rāmopākhyānamuttamam || 95 ||
[Analyze grammar]

brahmaṇā vihitaṃ yacca śatakoṭipravistaram |
āha tannāradāyaiva tena vālmīkaye punaḥ || 96 ||
[Analyze grammar]

vālmīkinā ca loke tu dharmakāmārthasādhakam || 97 ||
[Analyze grammar]

evaṃ sapādāḥ pañcaite lakṣāḥ puṇyāḥ prakīrtitāḥ |
purātanasya kalpasya purāṇe tu vidurbudhāḥ || 98 ||
[Analyze grammar]

itihāsapurāṇāni bhidyante kāla gauravāt |
skāndaṃ tathā ca brahmāṇḍaṃ purāṇaṃ laiṅgameva ca || 99 ||
[Analyze grammar]

vārāhakalpe viprendrāsteṣāṃ bhedaḥ pravartate |
aṣṭādaśaprakāreṇa brahmāṇḍaṃ bhinnameva hi || 100 ||
[Analyze grammar]

aṣṭādaśapurāṇāni tena jātāni bhūtale |
laiṅgamekādaśavidhaṃ prabhinnaṃ dvāpare śubham || 101 ||
[Analyze grammar]

skāndaṃ tu saptadhā bhinnaṃ veda vyāsenadhīmatā |
ekāśītisahasrāṇi śataṃ caikaṃ tu saṃkhyayā || 102 ||
[Analyze grammar]

tasyā'dyo yo vibhāgastu skandamāhātmyasaṃyutaḥ |
māheśvaraḥ samākhyāto dvitīyo vaiṣṇavaḥ smṛtaḥ || 103 ||
[Analyze grammar]

tṛtīyo brahmaṇaḥ proktaḥ sṛṣṭisaṃkṣepasūcakaḥ |
kāśīmāhātmyasaṃyuktaścaturthaḥ paripaṭhyate || 104 ||
[Analyze grammar]

revāyāḥ pañcamo bhāgaḥ sojjayinyāḥ prakīrtitaḥ |
ṣaṣṭhaḥ kalpo nāgaraśca tīrthamāhātmyasūcakaḥ || 105 ||
[Analyze grammar]

saptamo yo vibhāgo'yaṃ smṛtaḥ prābhāsiko dvijāḥ |
sarve dvādaśasāhasrā vibhāgāḥ saṃprakīrtitāḥ || 106 ||
[Analyze grammar]

asminprābhāsikaḥ sarvo varṇyate kṣetravistaraḥ |
tīrthānāṃ caiva māhātmyaṃ māhātmyaṃ śaṃkarasya ca || 107 ||
[Analyze grammar]

anyeṣāṃ caiva devānāṃ māhātmyaṃ ca prakīrtyate |
iti bhedaḥ purāṇānāṃ saṃkṣepātkathito dvijāḥ || 108 ||
[Analyze grammar]

imamaṣṭādaśānāṃ tu purāṇānāmanukramam |
yaḥ paṭheddhavyakavyeṣu sa yāti bhavanaṃ hareḥ || 109 ||
[Analyze grammar]

idaṃ pavitraṃ hi yaśonidhānamidaṃ pitṝṇāmapi vallabhaṃ ca |
idaṃ ca deveṣvamṛtāya nityamidaṃ mahāpātakahṛcca puṃsām || 11 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye sasaṃkhyākāṣṭādaśamahāpurāṇopapurāṇavarṇanapūrvaka purāṇapustakadānaphalavarṇanaṃ nāma dvitīyo'dhyāyaḥ || 2 ||
[Analyze grammar]