Chapter 1

[English text for this chapter is available]

vyāsa uvāca |
yaścādyaḥ puruṣaḥ purāṇa iti yaḥ saṃstūyate sarvataḥ someśaḥ surasaṃyutaḥ kṣititale yairvīkṣito hīkṣaṇaiḥ |
te tīrtvā vitatāṃtaraṃ bhavabhayaṃ bhūtyā'bhisaṃbhūṣitāḥ svargaṃ yānavaraiḥprayānti sukṛtairyajñai yathā yajvinaḥ || 1 ||
[Analyze grammar]

prasaradbindunādāya śuddhāmṛtamayātmane |
ṣaḍtriṃśattattvadehāya namaścinmātramūrtaye || 2 ||
[Analyze grammar]

amṛtenodarasthena mriyante sarvadevatāḥ |
kaṃṭhasthita viṣeṇāpi yo jīvati sa pātuḥ vaḥ || 3 ||
[Analyze grammar]

satrānte sūtamanaghaṃ naimiṣeyā maharṣayaḥ |
purāṇasaṃhitāṃ puṇyāṃ papracchū romaharṣaṇam || 4 ||
[Analyze grammar]

tvayā sūta mahā buddhe bhagavānbrahmavittamaḥ |
itihāsapurāṇārthe vyāsaḥ samyagupāsitaḥ || 5 ||
[Analyze grammar]

tasya te sarvaromāṇi vacasā harṣitāni yat |
dvaipāyanasyānubhāvāttato'bhū romaharṣaṇaḥ || 6 ||
[Analyze grammar]

bhavantameva prathamaṃ vyājahāra svayaṃ prabhuḥ |
munīnāṃ saṃhitāṃ vaktuṃ vyāsaḥ paurāṇikīṃ kathām || 7 ||
[Analyze grammar]

tvaṃ hi svāyaṃbhuve yajñe sutyāhe vitate hariḥ |
saṃbhūtaḥ saṃhitāṃ vaktuṃ svāṃśena puruṣottamaḥ || 8 ||
[Analyze grammar]

tasmādbhavantaṃ pṛcchāmaḥ purāṇe skandakīrtite |
prabhāsakṣetramāhātmye brāhmī yātrā śrutā purā || 9 ||
[Analyze grammar]

adhunā vaiṣṇavīṃ raudrīṃ yātrāṃ sarvārthasaṃyutām |
vaktumarhasi cāsmākaṃ purāṇārthaviśārada || 10 ||
[Analyze grammar]

munīnā vacanaṃ śrutvā sūtaḥ paurāṇikottamaḥ |
praṇamya śirasā prāha vyāsaṃ satyavatīsutam || 11 ||
[Analyze grammar]

romaharṣaṇa uvāca |
śrīvatsāṃkaṃ jagadyoniṃ harimoṃkārarūpiṇam |
aprameyaṃ guruṃ devaṃ nirmalaṃ nirmalāśrayam || 12 ||
[Analyze grammar]

haṃsaṃ śuciṣadaṃ vyoma vyāpakaṃ sarvadaṃ śivam |
udāsīnaṃ nirāyāsaṃ niṣprapañcaṃ nirañjanam || 13 ||
[Analyze grammar]

śūnyaṃ biṃdusvarūpaṃ tu dhyeyaṃ dhyānavivarjitam |
asti nāstīti yaṃ prāhuḥ sudūre cāntike ca yat || 14 ||
[Analyze grammar]

manogrāhyaṃ paraṃ dhāma puruṣākhyaṃ jaganmayam |
hṛtpaṃkajasamāsīnaṃ tejorūpaṃ nirindriyam || 15 ||
[Analyze grammar]

evaṃvidhaṃ namaskṛtya paramātmānamīśvaram |
kathāṃ vadiṣye dvividhāṃ dviśarīrāṃ tathaiva tu || 16 ||
[Analyze grammar]

divyabhāṣāsamopetāṃ vedādhiṣṭhānasaṃyutām |
pañcasaṃdhisamāyuktāṃ ṣaḍalaṃkārabhūṣitām || 17 ||
[Analyze grammar]

saptasādhanasaṃyuktāṃ rasāṣṭaguṇaraṃjitām |
guṇairnavabhirākīrṇāṃ daśadoṣavivarjitām || 18 ||
[Analyze grammar]

vibhāṣābhūṣitāṃ tadvadekāyattāṃ manoharām |
pañcakāraṇasaṃyuktāṃ catuṣkaraṇasammatām || 19 ||
[Analyze grammar]

punaśca dvividhāṃ tadvajjñānasaṃdohadāyinīm |
vyāsena kathitāṃ puṇyāṃ śṛṇudhvaṃ pāpanāśinīm || 20 ||
[Analyze grammar]

yāṃ śrutvā pāpakarmāpi gaccheddhi paramāṃ gatim |
duḥkhatrayavinirmuktaḥ sarvātaṅkavivarjitaḥ || 21 ||
[Analyze grammar]

na nāstike kathāṃ puṇyāmimāṃ brūyātkadācana |
śraddadhānāya śāntāya kīrtanīyā dvijātaye || 22 ||
[Analyze grammar]

niṣekādiḥ śmaśānānto mantrairyasyodito vidhiḥ |
tasya śāstre'dhikāro'sti jñeyo nānyasya kasyacit || 23 ||
[Analyze grammar]

catuḥpakṣāvadātasya viśuddhirbrāhmaṇasya ca |
sadvṛttasyādhikāro'sti śāstre'sminvedasammate || 24 ||
[Analyze grammar]

yathā surāṇāṃ pravaro devadevo maheśvaraḥ |
nadīnāṃ ca yathā gaṃgā varṇānāṃ brāhmaṇo yathā || 25 ||
[Analyze grammar]

akṣarāṇāṃ tu sarveṣāmoṃkāraḥ prathamo yathā |
pūjyānāṃ tu yathā mātā gurūṇāṃ ca yathā pitā |
tathaiva sarvaśāstrāṇāṃ pradhānaṃ skandakīrtitam || 26 ||
[Analyze grammar]

purā kailāsaśikhare brahmādīnāṃ ca sannidhau |
skāndaṃ purāṇaṃ kathitaṃ pārvatyagre pinākinā || 27 ||
[Analyze grammar]

pārvatyā ṣaṇmukhasyāgre tena nandigaṇāya vai |
nandinā tu kumārāya tena vyāsāya dhīmate || 28 ||
[Analyze grammar]

vyāsena me samākhyātaṃ bhavadbhyo'haṃ prakīrtaye || 29 ||
[Analyze grammar]

yūyaṃ sadbhāvasaṃyuktā yataḥ sarve maharṣayaḥ |
tena me bhāṣituṃ śraddhā bhavatāṃ skandasaṃhitām || 30 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye praśnādhyāyavarṇanaṃ nāma prathamo'dhyāyaḥ || 1 ||
[Analyze grammar]