Chapter 271

[English text for this chapter is available]

sūta uvāca |
athānyadapi tatrāsti supuṇyaṃ liṃgasaptakam |
yenārcitena dṛṣṭena pūjitena viśeṣataḥ || 1 ||
[Analyze grammar]

dīrghāyurjāyate martyaḥ sarvarogavivarjitaḥ |
mārkaṇḍeśvara ityuktastatra devo maheśvaraḥ || 2 ||
[Analyze grammar]

indradyumneśvaro'nyastu sarvapāpaharo haraḥ |
pāleśvarastathā caiva sarvavyādhivināśanaḥ || 3 ||
[Analyze grammar]

tato ghaṃṭaśivaḥ khyāto yo ghaṃṭena pratiṣṭhitaḥ |
kalaśeśvarasaṃjñastu vānareśvarasaṃyutaḥ || 4 ||
[Analyze grammar]

īśāna śiva ityuktastatra kṣetreśvareśvaraḥ |
pūjito mānavairbhaktyā kāmānyacchatyamānuṣān || 5 ||
[Analyze grammar]

vāṃchitānmanasā sarvānkalikāle'pi saṃsthite || 6 ||
[Analyze grammar]

ṛṣaya ūcuḥ |
ko'yaṃ mārkaṃḍasaṃjñastu yena liṃgaṃ pratiṣṭhitam |
indradyumno mahīpālaḥ katamo vada sūtaja || 7 ||
[Analyze grammar]

tathā pālakanāmā ca yenāyaṃ sthāpito haraḥ |
tathā yo ghaṇṭasaṃjñastu kasmiñjātaḥ sa cānvaye || 8 ||
[Analyze grammar]

kalaśākhyastu yaḥ khyāto vānareṇa samanvitaḥ |
īśānopyakhilaṃ brūhi paraṃ naḥkautukaṃ sthitam || 9 ||
[Analyze grammar]

yato'tra jāyate śreyaḥ punaḥ puṃsāṃ prakīrtaya |
yairetaiḥ sthāpitā devāḥ kṣetre'sminmānavottamaiḥ || 10 ||
[Analyze grammar]

tathā teṣāṃ samācāraṃ prabhāvaṃ caiva sūtaja |
dānaṃ vāpi yathākālaṃ maṃtrāṃśca vistarādvada || 11 ||
[Analyze grammar]

sūta uvāca |
ahaṃ vaḥ kīrtayiṣyāmi kathāmetāṃ purātanīm |
kathitāṃ bhartṛyajñena ānartādhipateḥ svayam || 12 ||
[Analyze grammar]

śrutayāpi yayā martyo dīrghāyurjāyatenaraḥ |
nāpamṛtyumavāpnoti kathaṃcittatprabhāvataḥ || 13 ||
[Analyze grammar]

yo mārkaṃḍa iti khyātaḥ prathamaṃ parikīrtitaḥ |
saṃbhūtistasya saṃproktā yuṣmākaṃ pāpanāśinī || 14 ||
[Analyze grammar]

iṃdradyumnaṃ pravakṣyāmi sāṃprataṃ munisattamāḥ |
yadvaṃśo yatprabhāvaśca sarvabhūpālamānitaḥ || 15 ||
[Analyze grammar]

iṃdradyumno mahīpāla āsītpūrvaṃ dvijottamāḥ |
brāhmaṇyaśca śaraṇyaśca sādhulokaprapālakaḥ |
yajvā dānapatirdakṣaḥ sarvabhūtahite rataḥ || 16 ||
[Analyze grammar]

na durbhikṣaṃ na ca vyādhirna ca caurakṛtaṃ bhayam |
tasmiñchāsati dharmajñe āsīllokasya kasyacit || 17 ||
[Analyze grammar]

yathaiva varṣato dhārā yathā vā divi tārakāḥ |
gaṃgāyāṃ sikatā yadvatsaṃkhyayā parivarjitāḥ || 18 ||
[Analyze grammar]

tadvattena kṛtā yajñāḥ sarve saṃpūrṇadakṣiṇāḥ |
agniṣṭomo'tirātraśca ukthaḥ ṣoḍaśikāstathā || 19 ||
[Analyze grammar]

sautrāmaṇyā'tha paśavaścāturmāsyā dvijottamāḥ |
vājapeyāśvamedhāśca rājasūyā viśeṣataḥ || 20 ||
[Analyze grammar]

pauṇḍarīkāstathaivānye śraddhāpūtena cetasā || 21 ||
[Analyze grammar]

tena dānāni dattāni tīrtheṣu ca viśeṣataḥ |
miṣṭānnāni dvijeṃdrāṇāṃ dakṣiṇāsahitāni ca || 22 ||
[Analyze grammar]

na tadasti dharāpṛṣṭhe nagaraṃ pattanaṃ tathā |
tīrthaṃ vā yatra no tasya vidyate tridaśālayaḥ || 23 ||
[Analyze grammar]

tena kanyāsahasrāṇi acyutānyarbudāni ca |
brāhamaṇebhyaḥ pradattāni brāhmaṇānāṃ dhanārthinām || 24 ||
[Analyze grammar]

daśamīdivase tasya rātrau ca gajapṛṣṭhigaḥ |
dundubhistāḍyamānastu babhrāma sakalaṃ puram || 25 ||
[Analyze grammar]

pratyūṣe vaiṣṇavaṃ bhāvi pāpahāri ca vāsaram |
upavāsaḥ prakarttavyo muktvā vṛddhaṃ ca bālakam |
anyathā nigrahiṣyāmi bhojanaṃ yaḥ kariṣyati || 26 ||
[Analyze grammar]

iṃdradyumnaḥ sa rājarṣistadā viṣṇoḥ prasādataḥ |
tenaiva svaśarīreṇa brahmalokaṃ tadā gataḥ || 27 ||
[Analyze grammar]

tatra kalpasahasrāṃte sa prokto brahmaṇā svayam |
iṃdradyumna dharāṃ gaccha na sthātavyaṃ tvayā'dhunā || 28 ||
[Analyze grammar]

iṃdradyumna uvāca |
kasmāccyāvayase brahmannijalokāddrutaṃ hi mām |
apāpamapi deveśa tathā me vada kāraṇam || 29 ||
[Analyze grammar]

śrībrahmovāca |
tava kīrtisamucchedaḥ saṃjāto'dya dharātale |
yāvatkīrtirdharāpṛṣṭhe tāvatsvarge vasennaraḥ || 30 ||
[Analyze grammar]

etasmātkāraṇāllokāḥ svanāmāṃkāni cakrire |
vāpīkūpataḍāgāni devatāyatanāni ca || 31 ||
[Analyze grammar]

tasmādgaccha dharāpṛṣṭhaṃ svāṃ kīrtiṃ nūtanāṃ kuru |
yadi vāṃchasi loke'sminmāmake vasatiṃ ciram || 32 ||
[Analyze grammar]

athātmānaṃ sa rājeṃdro yāvatpaśyati tatkṣaṇāt |
tāvatprāptaṃ dharāpṛṣṭhe kāṃpilya nagaraṃ prati || 33 ||
[Analyze grammar]

atha papraccha lokānsa kimetannagaraṃ smṛtam |
ko'yaṃ deśaḥ ko'tra rājā kiṃ puraṃ nagaraṃ ca kim || 34 ||
[Analyze grammar]

te tamūcuḥ paraṃ caitatkāṃpilyamiti viśrutam |
ānartanāmā deśo'yaṃ rājātra pṛthivījayaḥ || 35 ||
[Analyze grammar]

ko bhavānkimihāyātaḥ kiṃcitkāryaṃ vadasva naḥ || 36 ||
[Analyze grammar]

iṃdradyumna uvāca || iṃdradyumno mahīpālaḥ purāsīdrocake pure |
deśe vaijaruke pūrvaṃ sa deśaḥ kva ca tatpuram || 37 ||
[Analyze grammar]

janā ūcuḥ |
na vayaṃ tatpuraṃ vidmo na deśaṃ na ca bhūpatim |
indradyumnābhidhānaṃ ca yaṃ tvaṃ pṛcchasi bhadraka || 38 ||
[Analyze grammar]

iṃdradyumna uvāca |
cirāyurasti ko'pyatra yastaṃ vetti mahīpatim |
deśaṃ vā tatpuraṃ vāpi tanme vadatha mā ciram || 39 ||
[Analyze grammar]

janā ūcuḥ |
saptakalpasmaro nāma mārkaṃḍeyo mahāmuniḥ |
śrūyate naimiṣāraṇye taṃ gatvā pṛccha vetsyasi || 40 ||
[Analyze grammar]

athāsau satvaraṃ gatvā vyomamārgeṇa taṃ munim |
papraccha praṇipatyoccairnaimiṣāraṇyamāśritam || 41 ||
[Analyze grammar]

iṃdradyumneti vai bhūpastvayā dṛṣṭaḥ śruto'tha vā |
cirāyustvaṃ śruto'smābhiḥ pṛcchāmastena sanmune || 42 ||
[Analyze grammar]

śrīmārkaṃḍeya uvāca || saptakalpāṃtare bhūpo na dṛṣṭo na mayā śrutaḥ |
iṃdradyumnābhidhāno'tra tatra kiṃ nu vadāmi te || 43 ||
[Analyze grammar]

tasya tadvacanaṃ śrutvā nirāśaḥ sa mahīpatiḥ |
vairāgyaṃ paramaṃ gatvā maraṇe kṛtaniścayaḥ || 44 ||
[Analyze grammar]

tena cānīya dārūṇi prajvālya ca hutāśanam |
praveṣṭukāmaḥ sa prokta indradyumno mahīpatiḥ || 45 ||
[Analyze grammar]

tvayā cātra na kartavyamahaṃ te mitratāṃ gataḥ |
nāśayiṣyāmi te mṛtyuṃ yadyapi syānmahattaram || 46 ||
[Analyze grammar]

nīrogo'si subhavyo'si kasmānmṛtyuṃ pravāṃchasi |
vada me kāraṇaṃ mṛtyoḥ pratīkāraṃ karomi te || 47 ||
[Analyze grammar]

iṃdradyumna uvāca |
cirāyurme bhavānproktaḥ kāṃpilyapuravāsibhiḥ |
tenāhaṃ tava pārśve'tra samāyāto mahāmune || 48 ||
[Analyze grammar]

iṃdradyumnodbhavāṃ vārtāṃ tvaṃ vadiṣyasi sanmune |
matkīrtirna parijñātā tato mṛtyuṃ vrajāmyaham || 49 ||
[Analyze grammar]

sūta uvāca |
tasya taṃ niścayaṃ jñātvā dayāvānsa munīśvaraḥ |
vṛthāśramaṃ ca taṃ jñātvā dākṣiṇyādidamabravīt || 50 ||
[Analyze grammar]

yadyevaṃ mā viśāgniṃ tvamahaṃ jñāsyāmi taṃ nṛpam |
nāḍījaṃgho bako nāma mamāsti paramaḥ suhṛt || 51 ||
[Analyze grammar]

ciraṃtanaśca so'smākaṃ nūnaṃ jñāsyati taṃ nṛpam |
tasmādāgaccha gacchāvastasya pārśve himācale || 52 ||
[Analyze grammar]

sādhūnāṃ darśanaṃ jātu na vṛthā jāyate kvacit || 53 ||
[Analyze grammar]

evamuktvā tatastau tu prasthitau munipārthivau |
vyomamārgeṇa saṃtuṣṭau bakaṃ prati himācale || 54 ||
[Analyze grammar]

bako'pi taṃ samālokya mārkaṇḍeyaṃ samāgatam |
saṃmukhaḥ prayayau tuṣṭaḥ svāgatenābhyapūjayat || 55 ||
[Analyze grammar]

dhanyo'haṃ kṛtapuṇyo'haṃ yasya me tvatsamāgamaḥ |
bho bho brahmavidāṃ śreṣṭha ātithyaṃ te karomi kim || 56 ||
[Analyze grammar]

śrīmārkaṃḍeya uvāca |
mattopi tvaṃ cirāyuśca yato mitraṃ vyavasthitaḥ |
indradyumno mahīpālastvayā dṛṣṭaḥ śruto'thavā || 57 ||
[Analyze grammar]

etasya mama mitrasya tena dṛṣṭena kāraṇam |
anyathā jāyate mṛtyustato'haṃ tvāṃ samāgataḥ || 58 ||
[Analyze grammar]

baka uvāca || saptadviguṇitānkalpānsmarāmyahamasaṃśayam |
na smarāmi kathāmeva iṃdradyumnasamudbhavām || 59 ||
[Analyze grammar]

āstāṃ hi darśanaṃ tāvatsatyametanmayodim || 60 ||
[Analyze grammar]

iṃdradyumna uvāca |
tapasaḥ kiṃ prabhāvo'yaṃ dānasya niyamasya ca |
yadāyurīdṛśaṃ jātaṃ bakatve'pi vadasva naḥ || 61 ||
[Analyze grammar]

baka uvāca || ghṛtakaṃbalamāhātmyāddevadevasya śūlinaḥ |
mamāyurīdṛśaṃ jātaṃ bakatvaṃ muniśāpataḥ || 62 ||
[Analyze grammar]

ahamāsaṃ purā bālo brāhmaṇasya niveśane |
camatkārapure ramye pārāśaryasya dhīmataḥ || 64 ||
[Analyze grammar]

nāmnā ca viśvarūpākhyo nāmnā 'nyena baka smṛtaḥ |
atīva capalatvena saṃyuktaḥ pitṛvallabhaḥ || 64 ||
[Analyze grammar]

kasyacittvatha kālasya saṃkrāṃtau makarasya bhoḥ |
saṃprāpyātīva cāpalyālliṃgaṃ jāgeśvaraṃ mayā |
ghṛtakumbhe parikṣiptaṃ pūjitaṃ janakena yat || 65 ||
[Analyze grammar]

atha rātryāṃ vyatītāyāṃ pṛṣṭo'haṃ janakena ca |
tvayā putra parikṣiptaṃ nūnaṃ jāgeśvaraṃ kvacit |
tasmādvada prayacchāmi tena te bhakṣyamuttamam || 66 ||
[Analyze grammar]

tato mayājyakumbhācca tasmādādāya satvaram |
bhakṣyalaulyātpiturhaste vinyastaṃ ghṛtasaṃplutam || 67 ||
[Analyze grammar]

kasyacittvatha kālasya paṃcatvaṃ ca samāgataḥ |
jātismarastato jātastatprabhāvānnṛpālaye || 68 ||
[Analyze grammar]

ānartādhipaterharmye nāmnā khyātastvahaṃ bakaḥ |
camatkārapure devo haraḥ saṃsthāpito mayā || 69 ||
[Analyze grammar]

tatprabhāveṇa vipreṃdra prāptaḥ paitāmahaṃ padam || 70 ||
[Analyze grammar]

tato yāni dharāpṛṣṭhe suliṃgāni sthitāni ca |
ghṛtenacchādayāmyeva makarasthe divākare |
mayā yatsthāpitaṃ liṃgaṃ camatkārapure śubham || 71 ||
[Analyze grammar]

ārādhitaṃ divā naktaṃ rājye saṃsthāpya putrakam |
niyojya sarvato bhṛtyāndhanavastrasamanvitān || 72 ||
[Analyze grammar]

tataḥkālena mahatā tuṣṭo me bhagavāñchivaḥ |
matsamīpaṃ samāsādya vākyametaduvāca saḥ || 73 ||
[Analyze grammar]

parituṣṭo'smi bhadraṃ te tava pārthivasattama |
ghṛtakaṃbaladānena saṃkhyayā rahitena ca || 74 ||
[Analyze grammar]

tasmādvaraya bhadraṃ te varaṃ yanmanasi sthitam |
adeyamapi dāsyāmi yadyapi syātsudurlabham || 75 ||
[Analyze grammar]

tato mayā haraḥ prokto yadi tuṣṭo'si me prabho |
kuruṣva māṃ gaṇaṃ deva nānyatkiṃcidvṛṇomyaham || 76 ||
[Analyze grammar]

śrībhagavānuvāca |
bakaihi tvaṃ mahābhāga kailāsaṃ parvatottamam |
mayā sārdhamanenaiva śarīreṇa gaṇo bhava || 77 ||
[Analyze grammar]

anyo'pi martyaloketra yaḥ kariṣyati mānavaḥ |
makarasthe ravau mahyaṃ saṃkrāṃtau rajanīmukhe |
sa nūnaṃ madgaṇo bhāvī sakṛtkṛtvā'tha kaṃbalam || 78 ||
[Analyze grammar]

tvaṃ punarmāmakaṃ liṃgaṃ samaṃ kurvanbhaviṣyasi |
dharmaseneti vikhyāto vikṛtyā parivarjitaḥ || 79 ||
[Analyze grammar]

evamuktvā sa bhagavānmāmādāya tataḥ param |
kailāsaṃ parvataṃ gatvā gaṇakoṭīśatāmadāt || 80 ||
[Analyze grammar]

kasyacittvatha kālasya bhramamāṇo yadṛcchayā |
gato'haṃ parvataśreṣṭhaṃ himavaṃtaṃ mahāgirim || 81 ||
[Analyze grammar]

yatrāste gālavo nāma sadaiva tapasi sthitaḥ |
tasya bhāryā viśālākṣī sarvalakṣaṇalakṣitā || 82 ||
[Analyze grammar]

saptaraktā trigaṃbhīrā gūḍhagulphā kṛśodarī |
tāṃ dṛṣṭvā manmathāviṣṭaḥ saṃjāto'haṃ munīśvara || 83 ||
[Analyze grammar]

ciṃtitaṃ ca mayā citte kathametāṃ harāmyaham |
tasmācchiṣyatvamāsādya bhaktimasya karomyaham || 84 ||
[Analyze grammar]

śuśrūṣānirato bhūtvā yena prāpnomi bhāminīm || 85 ||
[Analyze grammar]

tato baṭukarūpeṇa saṃprāpto gālavo mayā |
saṃsārasya virakto'haṃ kariṣyāmi mahttapaḥ || 86 ||
[Analyze grammar]

dīkṣāṃ yaccha vibho mahyaṃ yena śiṣyo bhavāmi te || 87 ||
[Analyze grammar]

āhariṣyāmyahaṃ darbhāṃstathā sumanasaḥ sadā |
samidhaśca sadaivāhaṃ phalāni jalameva ca || 88 ||
[Analyze grammar]

sa māṃ vinayasaṃpannaṃ jñātvā brāhmaṇarūpiṇam |
dadau dīkṣāṃ tato mahyaṃ śāstradṛṣṭena karmaṇā || 89 ||
[Analyze grammar]

atha dīkṣāṃ samāsādya toṣayāmi dinedine |
taṃ caiva tasya patnīṃ tāṃ yathoktaparicaryayā |
aśuddhenāpi cittena chidrānveṣaṇatatparaḥ || 90 ||
[Analyze grammar]

anyasmindivase prāpte sā strīdharmasamanvitā |
uṭajaṃ dūratastyaktvā rātrau suptā manasvinī || 91 ||
[Analyze grammar]

so'haṃ rūpaṃ mahatkṛtvā tāmādāya tapasvinīm |
sukhasuptāṃ suviśrabdhāṃ prasthito dakṣiṇāmukhaḥ || 92 ||
[Analyze grammar]

athāsau saṃparityaktā saṃsparśānmama nidrayā |
caurarūpaṃ parijñāya māṃ śiṣyaṃ praruroda ha || 93 ||
[Analyze grammar]

sābravīcca svabhartāraṃ gālavaṃ munisattamam |
eṣa śiṣyo durācāro harate māmitaḥ prabho || 94 ||
[Analyze grammar]

tasmādrakṣa mahābhāga yāvaddūraṃ na gacchati || 95 ||
[Analyze grammar]

tacchrutvā gālavaḥ prāha tiṣṭhatiṣṭheti cāsakṛt |
pāpācāra suduṣṭātmangatiste staṃbhitā mayā || 96 ||
[Analyze grammar]

tasya vākyāttato mahyaṃ gatistaṃbho vyajāyata |
yadvallikhita evāhaṃ pratiṣṭhāmi suniścalaḥ || 97 ||
[Analyze grammar]

tatastena ca śapto'haṃ gālavena mahātmanā |
vaṃcito'haṃ tvayā yasmādbako bhava sudurmate || 98 ||
[Analyze grammar]

tataḥ paśyāmi cātmānaṃ sahasā bakarūpiṇam |
bakatve'pi na me naṣṭā yā smṛtiḥ pūrvasaṃbhavā || 99 ||
[Analyze grammar]

tataḥ sā'pi ca tatpatnī sacailaṃ snānamāśritā |
matsparśāduḥkhitāṃgī ca śāpāya samupasthitā || 100 ||
[Analyze grammar]

yasmātpāpa tvayā spṛṣṭā prasuptāhaṃ rajasvalā |
bakadharmaṃ samāśritya bharttā me vaṃcitastvayā |
anyarūpaṃ samāsthāya tasmātsatyaṃ bako bhava || 101 ||
[Analyze grammar]

evaṃ śaptastato dvābhyāṃ tābhyāṃ vai duḥkhasaṃyutaḥ |
caraṇābhyāṃ pralagnastu gālavasya mahātmanaḥ || 102 ||
[Analyze grammar]

gaṇo'haṃ devadevasya trinetrasya mahātmanaḥ |
pālaketi ca vikhyāto gaṇakoṭiprabhuḥ sthitaḥ || 103 ||
[Analyze grammar]

so'hamatra samāyātaḥ prabhoḥ kāryeṇa kenacit |
tava bhāryāṃ samālokya kāmadevavaśaṃ gataḥ || 104 ||
[Analyze grammar]

kṣamāparādhaṃ tvaṃ mahyamevaṃ jñātvā munīśvara |
durvinītaḥ śriyaṃ prāpya vidyāmaiśvaryameva ca || 105 ||
[Analyze grammar]

na tiṣṭhati ciraṃ sthāne yathāhaṃ madagarvitaḥ |
śiṣyarūpaṃ samāsthāya tataḥ prāptastavāṃtikam || 106 ||
[Analyze grammar]

asyā haraṇahetośca mahāsatyā munīśvara |
tasmātkuru prasādaṃ me dīnasya praṇatasya ca || 107 ||
[Analyze grammar]

anugrahapradānena kṣamā yasmāttapasvinām |
kokilānāṃ svaro rūpaṃ nārīrūpaṃ pativratā |
vidyā rūpaṃ kurūpāṇāṃ kṣamā rūpaṃ tapasvinām || 108 ||
[Analyze grammar]

sūta uvāca |
tasya tatkṛpaṇaṃ śrutvā sopi māheśvaro muniḥ |
jñātvā taṃ bāṃdhavasthāne dayāṃ kṛtvā'bravīdvacaḥ || 109 ||
[Analyze grammar]

satyavāktiṣṭhate vipraścamatkārapure śubhe || 110 ||
[Analyze grammar]

bharttṛyajña iti khyātastadā tasyopadeśataḥ |
bakatvaṃ yāsyate nūnaṃ mama vākyādasaṃśayam || 111 ||
[Analyze grammar]

tataḥ paśyāmi cātmānaṃ bakatvena samāśritam || 112 ||
[Analyze grammar]

evaṃ me dīrghamāyuṣyaṃ saṃjātaṃ śivabhaktitaḥ |
ghṛtakambalamāhātmyādbakatvaṃ muniśāpataḥ || 113 ||
[Analyze grammar]

iṃdradyumna uvāca || etadarthaṃ samānītastvatsakāśaṃ vihaṃgama |
iṃdradyumnasya vārtārthaṃ maraṇe kṛtaniścayaḥ || 114 ||
[Analyze grammar]

sā tvayā naiva vijñātā mamābhāgyairvihaṃgama |
sevayiṣyāmyahaṃ tasmātpradīptaṃ havyavāhanam || 115 ||
[Analyze grammar]

pratijñātaṃ mayā pūrvametanniścitya cetasi |
iṃdradyumne hyavijñāte saṃsevyaḥ pāvako mayā || 116 ||
[Analyze grammar]

tasmāddehi mamādeśaṃ mārkaṃḍeyasamanvitaḥ |
praviśāmi yathā vahniṃ bhraṣṭakīrtirahaṃ baka || 117 ||
[Analyze grammar]

mārkaṃḍeya uvāca |
vetsi cānyaṃ naraṃ kañcidvayasā cātmano'dhikam |
pṛcchāmi yena taṃ gatvā kṛte hyasya mahātmanaḥ || 118 ||
[Analyze grammar]

śraddhayā parayā yuktaḥ saṃprāpto'yaṃ mayā saha |
tatkathaṃ tyajati prāṇānsahāye mayi saṃsthite || 119 ||
[Analyze grammar]

aparaṃ ca kṣamaṃ vākyaṃ yattvāṃ vacmi vihaṃgama |
ayaṃ duḥkhena saṃyuktaḥ sādhayiṣyati pāvakam |
ahamenamanuddhṛtya kasmādgacchāmi cāśramam || 120 ||
[Analyze grammar]

sūta uvāca |
tayostaṃ niścayaṃ jñātvā bakaḥ paramadurmanā |
suciraṃ ciṃtayāmāsa kathaṃ syādetayoḥ sukham || 121 ||
[Analyze grammar]

tato rājā muniścaiva dārūṇyāhṛtya pāvakam |
praveṣṭukāmau tau dṛṣṭvā bako vacanamabravīt || 122 ||
[Analyze grammar]

mama vākyaṃ kuru prājña yadi jīvitumicchasi |
jñātaḥ so'dya mayā vyaktamindradyumnaṃ narādhipam || 123 ||
[Analyze grammar]

yo jñāsyati mama jyeṣṭhaḥ sarvaśāstravicakṣaṇaḥ |
tattvamenaṃ samādāya maraṇe kṛtaniścayam || 124 ||
[Analyze grammar]

niśvasantaṃ yathā nāgaṃ bāṣpavyākulalocanam |
samāgaccha mayā sārdhaṃ kailāsaṃ parvataṃ prati || 125 ||
[Analyze grammar]

yatrāsti dayito mahyamulūkaścirajīvabhāk |
sa nūnaṃ jñāsyate taṃ hi mā vṛthā maraṇaṃ kṛthāḥ || 126 ||
[Analyze grammar]

tato'sau tena saṃyukto bakena sumahātmanā |
mārkaṃḍeyena saṃprāptaḥ kailāsaṃ parvatottamam || 127 ||
[Analyze grammar]

so'pi dṛṣṭvā bakaṃ prāptaṃ mitraṃ paramasaṃmatam |
samāgacchadasau hṛṣṭaḥ svāgatenābhyanandayat || 128 ||
[Analyze grammar]

atha taṃ caiva viśrāntaṃ samāliṅgya muhurmuhuḥ |
prākāravarṇanāmāsau vākyametaduvāca ha || 129 ||
[Analyze grammar]

svāgataṃ te dvijaśreṣṭha bhūpa susvāgataṃ ca te |
sakhye'dya yacca te kāryaṃ vadāgamanakāraṇam || 130 ||
[Analyze grammar]

kāvetau puruṣau prāptau tvayā sārdhaṃ mamāṃtikam |
divyarūpau mahābhāgau tejasā parivāritau || 131 ||
[Analyze grammar]

baka uvāca |
eṣa mārkaṃḍasaṃjño'tra prasiddho bhuvanatraye |
maheśvaraprasādena saṃsiddhiṃ paramāṃ gataḥ |
dvitīyo'sau suhṛccāsya kaścinno vedmi tattvataḥ |
mārkaṃḍena samāyātaḥ suhṛdā va mamāṃtikam || 132 ||
[Analyze grammar]

yadi jānāsi taṃ bhūpamindradyumnaṃ mahāmate |
tattvaṃ kīrtaya yenāsau maraṇādvinivartate || 135 ||
[Analyze grammar]

cirāyustvaṃ mayā jñāto hyataḥ prāpto'smi teṃ'tikam || 136 ||
[Analyze grammar]

ulūka uvāca |
aṣṭāviṃśatpramāṇena kalpā jātasya me sthitāḥ |
na dṛṣṭo na śrutaḥ kaścidiṃdradyumno mahīpatiḥ || 137 ||
[Analyze grammar]

iṃdradyumna uvāca |
tava kasmādulūkatvaṃ śīghraṃ tanme prakīrtaya |
etanme kautukaṃ bhāvi yatte hyāyuranantakam |
ulūkatvaṃ ca saṃjātaṃ raudraṃ lokavigarhitam || 138 ||
[Analyze grammar]

ulūka uvāca |
śṛṇu te'haṃ pravakṣyāmi dīrghāyurme yathā sthitam |
maheśvaraprasādena bilvapatrārcanānmayā |
ulūkatvaṃ mayā prāptaṃ bhṛgoḥ śāpānmahātmanaḥ || 139 ||
[Analyze grammar]

ahamāsaṃ purā vipraḥ sarvavidyāsu pāragaḥ |
camatkārapure śreṣṭhe nāmnā khyātastu ghaṃṭakaḥ |
brahmacārī damopeto harapūjārcane rataḥ || 140 ||
[Analyze grammar]

akhaṃḍitairbilvapatrairagrajātaistripatrakaiḥ |
trikālaṃ pūjitaḥ śaṃbhurlakṣamātraiḥ sadā mayā || 141 ||
[Analyze grammar]

tato varṣasahsrāṃte tuṣṭo me bhagavānharaḥ |
provāca darśanaṃ gatvā meghagaṃbhīrayā girā || 142 ||
[Analyze grammar]

ahaṃ tuṣṭo'smi te vatsa varaṃ varaya suvrata |
akhaṃḍitairbilvapatraistrikāle yattvayārcitaḥ || 143 ||
[Analyze grammar]

bilvasya prasavāgreṇa tripatreṇa prajāyate |
ekenāpi yathātuṣṭistathānyeṣāṃ na koṭibhiḥ || 144 ||
[Analyze grammar]

puṣpāṇāmapi bhadraṃ te sugaṃdhānāmapi dhruvam |
sakhe mayā praṇamyoccaiḥ sa proktaḥ śaśiśekharaḥ || 145 ||
[Analyze grammar]

yadi tuṣṭosi me deva yadi deyo varo mama |
tanmāṃ kuru jagannātha jarāmaraṇavarjitam || 146 ||
[Analyze grammar]

sa tatheti pratijñāya mahādevo maheśvaraḥ |
kailāsaṃ prati deveśaḥ kṣaṇāccādarśanaṃ gataḥ || 147 ||
[Analyze grammar]

tatohaṃ parituṣṭotha varaṃ prāpya maheśvarāt |
kṛtakṛtyamivātmānaṃ ciṃtayāmi praharṣitaḥ || 148 ||
[Analyze grammar]

etasminneva kāle tu bhārgavo munisattamaḥ |
kuśalaḥ sarvaśāstreṣu vedavedāṃga pāragaḥ || 149 ||
[Analyze grammar]

tasya bhāryā'bhavatsādhvī nāmnā khyātā sudarśanā |
prāṇebhyo'pi priyā tasya gālavasya muneḥ sutā || 150 ||
[Analyze grammar]

tasya kanyā samabhavadrūpeṇāpratimā bhuvi |
sā mayā sahasā dṛṣṭā krīḍamānā yathecchayā || 151 ||
[Analyze grammar]

madhyakṣāmā sukeśī ca biṃboṣṭhī dīrghalocanā |
tāmahaṃ vīkṣayitvā tu kāmadevavaśaṃ gataḥ || 152 ||
[Analyze grammar]

tataḥ pṛṣṭā mayā kasya kanyeyaṃ cārulocanā |
vibhaktasarvāvayavā devakanyeva rājate || 153 ||
[Analyze grammar]

sakhībhiḥ kīrtitā mahyaṃ bhārgavasya muneḥ sutā |
eṣā cādyāpi kanyātve vartate cāruhāsinī || 154 ||
[Analyze grammar]

tato'haṃ bhārgavaṃ gatvā vinayena samanvitaḥ |
yayāce kanyakāṃ tā ca kṛtāṃjalipuṭaḥ sthitaḥ || 155 ||
[Analyze grammar]

savarṇaṃ māṃ parijñāya so'pi bhārgavanaṃdanaḥ |
dattavāṃstāṃ mahābhāga virūpasyāpi kanyakām || 156 ||
[Analyze grammar]

atha sā kanyakā jñātvā pitrā dattāsmi dharmataḥ |
virūpāya tato gatvā mātaraṃ vākyamabravīt || 57 ||
[Analyze grammar]

sulajjā sā'tiduḥkhārtā paśyāṃba janakena ca |
virūpāya pradattāsmi nāhaṃ jīvitumutsahe || 158 ||
[Analyze grammar]

viṣaṃ vā bhakṣayiṣyāmi pravekṣyāmi hutāśanam |
tasyāstadvacanaṃ śrutvā niṣiddhaḥ sa dvijastayā || 159 ||
[Analyze grammar]

kasmānnātha pradattāsau virūpāya tvayā vibho |
kanyakeyaṃ surūpāḍhyā sarvalakṣaṇasaṃyutā || 160 ||
[Analyze grammar]

etacchrutvā tu vacanaṃ bhārgavo munisattamaḥ |
tatastāṃ garhayitvāsau dhiṅnārī puruṣāyate || 161 ||
[Analyze grammar]

anena prārthitā kanyā mayā cāsmai pradīyate |
tatkiṃ niṣedhayasi māṃ dīyamānāṃ sutāmimām || 162 ||
[Analyze grammar]

ityuktvā sa prasuṣvāpa patnyātha kanyayā samam || 163 ||
[Analyze grammar]

tato'rddharātre cāgatya mayā suptā ca bhārgavī |
hṛtvā svabhavane nītā niśi supte jane tadā || 164 ||
[Analyze grammar]

niyuktā kāmadharmeṇa hyanicchaṃtī balānmayā |
vipraḥ prātarjajāgāra pitā tasyāstataḥ param || 165 ||
[Analyze grammar]

kvāsau sā duhitā kena hṛtā naṣṭā madīyikā |
athāsau vīkṣituṃ bāhye babhrāma svavanāṃtikam || 166 ||
[Analyze grammar]

padasaṃhatimārgeṇa munibhirbahubhirvṛtaḥ |
tena dṛṣṭā'tha sā kanyā kṛtakautukamaṃgalā || 167 ||
[Analyze grammar]

rudaṃtī sasvanaṃ tatra lajjamānā hyadhomukhī |
tataḥ kopaparītātmā māṃ provāca sa bhārgavaḥ || 168 ||
[Analyze grammar]

niśācarasya dharmeṇa yasmādūḍhā sutā mama |
niśācaro bhavānastu karmaṇānena sāṃpratam || 169 ||
[Analyze grammar]

ghaṃṭaka uvāca |
nirdoṣaṃ māṃ dvijaśreṣṭha kasmāttvaṃ śapasi drutam |
tvayaiṣā me svayaṃ dattā tena rātrau hṛtā mayā || 170 ||
[Analyze grammar]

yo datvā kanyakāṃ pūrvaṃ paścādyacchenna durmatiḥ |
sa yāti narakaṃ ghoraṃ yāvadābhūtasaṃplavam || 171 ||
[Analyze grammar]

athāsau ciṃtayāmāsa satyametena jalpitam |
paścāttāpasamopeto vākyametaduvāca ha || 172 ||
[Analyze grammar]

satyametattvayā proktaṃ na me vacanamanyathā |
ulūkarūpasaṃyukto bhaviṣyasi na saṃśayaḥ || 173 ||
[Analyze grammar]

utpatsyate yadā cātra bhartṛyajño mahāmuniḥ |
tasyopadeśamāsādya bhūyaḥ prāpsyasi svāṃ tanum || 174 ||
[Analyze grammar]

tataḥ kauśikarūpaṃ tu paśyāmyātmānameva ca |
tathāpi na smṛtirnaṣṭā mama yā pūrvasaṃbhavā || 175 ||
[Analyze grammar]

atha yā tatsutā coḍhā mayā tasmingirau tadā |
sāpi māṃ saṃnirīkṣyātha tadrūpaṃ duḥkhasaṃyutā |
praviṣṭā havyavāhaṃ sā vidhavātvamanicchatī || 176 ||
[Analyze grammar]

evaṃ me kauśikatvaṃ hi saṃjātaṃ tu mahādyute |
bhārgavasya tu śāpena kanyārthe yattavoditam || 177 ||
[Analyze grammar]

akhaṃḍabilvapatreṇa pūjito yanmaheśvaraḥ |
cirāyustenasaṃjātaṃ satyametanmayoditam || 178 ||
[Analyze grammar]

satyaṃ kathaya yatkṛtyaṃ gṛhāyātasya kiṃ tava |
prakaromi mahābhāga yadyapi syātsudurlabham || 179 ||
[Analyze grammar]

indradyumna uvāca |
indradyumnasya jñānāya prāpto'haṃ yattavāṃtikam |
nāḍījaṃghena cānīto maraṇe kṛtaniścayaḥ || 180 ||
[Analyze grammar]

yadi no jñāsyati bhavāṃstaṃ kīrtyā ca kulena ca |
praviśāmi tato nūnaṃ pradīptaṃ havyavāhanam || 181 ||
[Analyze grammar]

no cetkīrtaya me kañcidanyaṃ tu cirajīvinam |
pṛcchāmi tena taṃ gatvā yena vetti na vā ca saḥ || 182 ||
[Analyze grammar]

baka uvāca |
yuktamuktamanenādya tatkuruṣva vadāsya bhoḥ |
yadi jānāsi kaṃcitvamātmanaścirajīvinam || 183 ||
[Analyze grammar]

no cedahamapi kṣipraṃ praviśāmi hutāśanam |
mārkaṃḍenāpi sahitaḥ sāṃprataṃ tava paśyataḥ || 184 ||
[Analyze grammar]

evam jñātvā mahābhāga cintayasva ciraṃtanam |
kaṃcidbhūmitale'nyatra yatastvaṃ cirajīvadhṛk || 185 ||
[Analyze grammar]

āśayā parayā prāptastavāhaṃ kila maṃdire |
pumāneṣa viśeṣeṇa mārkaṃḍeyaḥ priyo mama || 186 ||
[Analyze grammar]

saṃtyatra parvataśreṣṭhāḥ śataśo'tha sahasraśaḥ |
yeṣu santi mahābhāgāstāpasāścirajīvinaḥ |
nānyathā jīvitaṃ cāsya kathaṃcitsaṃbhaviṣyati || 187 ||
[Analyze grammar]

iṃdradyumnasya rājarṣerhitaṃ paramakaṃ bhavet |
tathāvayordvayoścāpi tasmācciṃtaya satvaram || 188 ||
[Analyze grammar]

tasya taṃ niścayaṃ jñātvā maraṇārthaṃ mahīpateḥ |
sa ulūkaḥ kṛpāṃ gatvā tato vacanamabravīt || 189 ||
[Analyze grammar]

yadyevaṃ tu mahābhāga martukāmo'si sāṃpratam |
tadāgaccha mayā sārdhaṃ gandhamādanaparvatam || 190 ||
[Analyze grammar]

tatra saṃtiṣṭhate gṛdhraḥ sa ca me paramaḥ suhṛt |
ciraṃtanastathā samyaksa te jñāsyati taṃ nṛpam |
kathayiṣyatyasaṃdigdhaṃ mama vākyādasaṃśayam || 191 ||
[Analyze grammar]

tasya tadvacanaṃ śrutvā mārkaṃḍeyādibhistribhiḥ |
proktaḥ sarvairmahābhāga mā tvaṃ praviśa pāvakam || 192 ||
[Analyze grammar]

vayaṃ yāsyāmahe sarve tvayā sārdhaṃ ca tatra hi |
kadācitso'pi jānāti iṃdradyumnaṃ mahīpatim || 193 ||
[Analyze grammar]

teṣāṃ tadvacanaṃ śrutvā āśayā parayā yutaḥ |
sa rājā saha taiḥ sarvaiḥ prayayau gaṃdhamādanam || 194 ||
[Analyze grammar]

gṛdhrarājo'pi tāndṛṣṭvā sarvāneva kṛtāṃjaliḥ |
ulūkaṃ purato dṛṣṭvā prahṛṣṭaḥ sanmukho yayau || 195 ||
[Analyze grammar]

tato'bravītprahṛṣṭātmā svāgataṃ te dvijottama |
cirakālātpradṛṣṭo'si ka ete'nye'tra ye sthitāḥ || 196 ||
[Analyze grammar]

ulūka uvāca |
eṣa me paramaṃ mitraṃ nāḍījaṃgho bakaḥ smṛtaḥ |
etasyāpi tu mārkaṇḍaḥ saṃsthitaḥ paramaḥ suhṛt || 197 ||
[Analyze grammar]

asau trailokyavikhyātaḥ saptakalpasmaro bhuvi |
etasyāpi suhṛtkaścinnainaṃ jānāmi satvaram || 198 ||
[Analyze grammar]

mriyamāṇo mayā hyeṣa samānī tastavāṃtikam |
ayaṃ jīvati vijñāta iṃdradyumne nareśvare |
no cetpraviśati kṣipraṃ pradīptaṃ havyavāhanam || 199 ||
[Analyze grammar]

sa tvaṃ jānāsi cedbrūhi indradyumnaṃ mahīpatim |
ciraṃtano mayāpi tvaṃ tena praṣṭuṃ samāgataḥ || 200 ||
[Analyze grammar]

gṛdhra uvāca |
indradyumneti vikhyātaṃ rājānaṃ na smarāmyaham |
na dṛṣṭo na śrutaścāpi indradyumno mahīpatiḥ || 201 ||
[Analyze grammar]

tasya tadvacanaṃ śrutvā so'pi rājā sudurmanāḥ |
manasā cintayāmāsa maraṇe kṛtaniścayaḥ || 202 ||
[Analyze grammar]

tatastu kautukāviṣṭastaṃ papraccha dvijottamam |
karmaṇā kena saṃprāptamāyuṣyaṃ cedṛśaṃ vada || 203 ||
[Analyze grammar]

tataḥ saṃbhāvayiṣyāmi śrutvā te'haṃ vibhāvasum || 204 ||
[Analyze grammar]

gṛdhra uvāca || ahamāsaṃ camatkārapure markaṭakaḥ kila |
upatyakāyāṃ tatraiva raktaśṛṃgasya bhūbhṛtaḥ || 205 ||
[Analyze grammar]

tatraivāsti mahacchaṃbhormaṃdiraṃ maṃdaropamam |
citreśvarābhidhānaṃ ca sarvapātakanāśanam || 206 ||
[Analyze grammar]

vasaṃte tatra saṃprāpte paurajānapadaistathā |
āgatya caiva sumahānutsavo vihito'bhavat || 207 ||
[Analyze grammar]

liṃgasya savidhai ramye sarvartuphalitadrume |
kānane kāminīlokakāṃte janamanohare |
liṃgamāropitaṃ cāru tarorāṃdolake mudā || 208 ||
[Analyze grammar]

kṛtvā damanakenārcāṃ sthāpyāṃdole suyaṃtrite |
yayuste svagṛhaṃ paścādarcayitvā trilocanam || 209 ||
[Analyze grammar]

tato'haṃ rajanīvaktre tāṃ dolāṃ sumanoharām |
kautukāviṣṭahṛdayo dolayāmi muhurmuhuḥ || 210 ||
[Analyze grammar]

evaṃ saṃdolayānasya mama prāptā narāstadā |
kaiścittaistrāsito hatvā laguḍaiḥ sarvatodiśam || 211 ||
[Analyze grammar]

tataḥ paṃcatvamāpannastatraivāyatane drutam |
tato jātismaro bhūtvā saṃjāto nṛpamaṃdire || 212 ||
[Analyze grammar]

koṭīśvarasyavikhyāto nāmnā caiva kuśadhvajaḥ |
pitṛpaitāmahaṃ rājyaṃ mayā prāptaṃ tataḥ kramāt || 213 ||
[Analyze grammar]

koṭīśe samanuprāpte paralokaṃ svakarmaṇā |
jāgeśvaraṃ mahābhāgaṃ dolayāmi yathecchayā || 214 ||
[Analyze grammar]

śivasiddhāṃtajairmaṃtrairguruṇā saṃniveditaiḥ |
tataḥ kālena mahatā tuṣṭo devo haro mama |
bhavato varadaścāsmi vākyametaduvāca ha || 215 ||
[Analyze grammar]

kuśadhvaja pratuṣṭo'smi śraddhayā parayā tava |
varaṃ vṛṇīṣva bhadraṃ te yaḥ sadā manasi sthitaḥ || 216 ||
[Analyze grammar]

tato mayā praṇamyoccaiḥ sa prokto bhagavānharaḥ || 217 ||
[Analyze grammar]

yadi tuṣṭosi me deva tanmāṃ kuru nijaṃ gaṇam |
trailokyarājyamapi me nānyatsaṃprati rocate || 218 ||
[Analyze grammar]

evamukto mayā devo vimāne māṃ nidhāya saḥ |
śivalokaṃ mahāpuṇyaṃ sahasā māṃ samānayat || 219 ||
[Analyze grammar]

tataḥ prasādataścāhaṃ bhavānyāśca harasya ca |
krīḍāmi svecchayā tatra gaṇamadhye vyavasthitaḥ || 220 ||
[Analyze grammar]

kasyacittvatha kālasya vimānavaramāśritaḥ |
svecchayābhramamāṇastu prāpto'traiva mahāgirau || 221 ||
[Analyze grammar]

vasaṃtasamaye prāpte pravṛtte dakṣiṇānile |
agniveśyasutā dṛṣṭā vivastrā jalama dhyagā || 222 ||
[Analyze grammar]

ālibhirbahubhiryuktā krīḍamānā yathecchayā |
muṣṭigrāhyā tu madhye sā biṃboṣṭhī vārijekṣaṇā || 223 ||
[Analyze grammar]

bilvastanī śaśāṃkāsyā sarvalakṣaṇalakṣitā |
tato'haṃ manmathāviṣṭaḥ samabhūvaṃ hi tatkṣaṇāt || 224 ||
[Analyze grammar]

avatīrya vimānāgryādgṛhītātha kare mayā |
prakurvāṇātha karuṇaṃ pakṣiṇīkurarī yathā || 225 ||
[Analyze grammar]

tataḥ kanyā munīṃdrāṇāṃ yāḥ sthitāstatra vāriṇi |
rudaṃtyaḥ saṃprayātāstā agniveśyasya saṃnidhau || 226 ||
[Analyze grammar]

nīyate tvatsutā brahmanvimānavaramāśritā |
vaimānikena kenāpi krandamānā nirargalam || 227 ||
[Analyze grammar]

tacchrutvā kupitaḥ so'tha vyomamārgāvalokanaḥ |
svāśramātsaṃprayātaḥ sa bhartsamāno muhurmuhuḥ || 229 ||
[Analyze grammar]

tiṣṭhatiṣṭheti ca procya staṃbhayāmāsa sarvataḥ |
tapasogreṇa viprasya vimānaṃ mama saṃsthitam || 229 ||
[Analyze grammar]

abravīcca tato māṃ sa kopena mahatā'nvitaḥ |
yasmātpāpa tvayā kanyā krīḍatī vihṛtādhunā || 230 ||
[Analyze grammar]

akāmā māṃsapeśīva yathā gṛdhreṇa durmate |
tasmādgṛdhro bhavatvāśu mama vākyādasaṃśayam || 231 ||
[Analyze grammar]

evamuktastatastena lajjayā'haṃ pariplutaḥ |
nivedya kanyakāṃ tasmai praṇipatya muhurmuhuḥ || 232 ||
[Analyze grammar]

tataḥ prokto mayā viprastvagniveśyo mahātapāḥ |
na mayā te sutā jñātā na kopayitumarhasi || 233 ||
[Analyze grammar]

gṛdhratvaṃ me yathā na syāttathākuru munīśvara || 234 ||
[Analyze grammar]

tato'haṃ tena ca prokto na mithyāvacanaṃ mama |
kathaṃcijjāyate tasmādgṛdhratvaṃ prabhaviṣyati || 235 ||
[Analyze grammar]

ānartasyopadeśena yadā yāsyasi bho'dhama |
bhartṛyajñaṃ mahābhāgamupadeśakṛte tadā || 236 ||
[Analyze grammar]

tasmācca niṣkṛtiṃ prāpya gṛdhratvaṃ te prayāsyati |
sa mayā'nveṣamāṇena na dṛṣṭo naiva ca śrutaḥ |
nirviṇṇo gṛdhrabhāvena śāpāṃto na ca me'bhavat || 237 ||
[Analyze grammar]

gṛdhra uvāca |
etatte sarvamākhyātaṃ gṛdhatvasya ca kāraṇam |
āyuṣyaṃ ca yathā jātaṃ mama saṃkhyāvivarjitam || 238 ||
[Analyze grammar]

indradyumna uvāca |
anujñāṃ dehi me śīghraṃ praviśāmi hutāśanam |
yena vairāgyamāpanno na hi jīvitumutsahe || 239 ||
[Analyze grammar]

evamuktaḥ sa tenātha ciṃtayāmāsa cetasi |
mamāṃtikaṃ samāyāta evaṃ mitrasamanvitaḥ |
tatkaromi yathāśaktyā svopakāraṃ sudurlabham || 24 ||
[Analyze grammar]

tataḥ provāca taṃ prītyā dākṣiṇyaṃ paramaṃ gataḥ |
mā sādhaya cāgniṃ bhoḥ śṛṇu tāvadvaco mama || 241 ||
[Analyze grammar]

ahaṃ te kīrtayiṣyāmi matto yo'pi ciraṃtanaḥ || 242 ||
[Analyze grammar]

yo jñāsyati na saṃdeha iṃdradyumnaṃ mahīpatim || 242 ||
[Analyze grammar]

tadāgaccha mayā sārdhaṃ tatsamīpaṃ mahātmanaḥ |
sahāyaiḥ sahitaḥ sarvairmayā sārdhaṃ tathaiva ca || 243 ||
[Analyze grammar]

iṃdradyumna uvāca |
kastavāpyadhiko'pyasti jīvitavyena saddvija |
etanme kautukaṃ bhūri tasmādvada mahāmate || 244 ||
[Analyze grammar]

gṛdhra uvāca |
asti maṃtharakonāma kamaṭhaścirajīvitaḥ |
mānase sarasi khyāta indradyumnaṃ sa vetsyati || 245 ||
[Analyze grammar]

tasya tadvacanaṃ śrutvā mārkaṃḍādyāśca te trayaḥ |
tamūcuḥ pārthivaśreṣṭhaṃ maraṇe kṛtaniścayam || 246 ||
[Analyze grammar]

yuktamuktaṃ mahābhāga gṛdharājena dhīmatā |
tatra yāsyāmahe sarve yatrāsau kamaṭhaḥ sthitaḥ || 247 ||
[Analyze grammar]

anirvedaḥ śriyo mūlaṃ yataḥ śaṃsaṃti paṃḍitāḥ |
nītiśāstravidaḥ sarve tasmādāgaccha gamyatām || 248 ||
[Analyze grammar]

sūta uvāca |
teṣāṃ tadvacanaṃ śrutvākṛcchrānnirvartya pārthivaḥ |
maraṇādbrāhmaṇaśreṣṭhā vairāgyaṃ paramaṃ gataḥ || 249 ||
[Analyze grammar]

atha te prasthitāḥ sarve gaṃdhamādanaparvatāt |
paṃcāpi ca samādiśya mānasaṃ sara uttamam |
atha prāptāḥ krameṇaiva gacchamānā vihāyasā || 250 ||
[Analyze grammar]

mānasaṃ tatsaro ramyaṃ kūrmastoyādvinirgataḥ |
nidāghe sevamānastu saṃtiṣṭhati yadṛcchayā || 251 ||
[Analyze grammar]

sa ca tāṃścaturo dṛṣṭvā suciraṃ ca nirīkṣya tān |
parijñāya tataḥ sarvānpranaṣṭaḥ salilaṃ prati || 252 ||
[Analyze grammar]

atha taṃ kauśikaḥ prāha gacchamānaṃ parāṅmukham |
bhobho mitrāya māṃ dṛṣṭvā saṃjāto'si parāṅmukhaḥ || 253 ||
[Analyze grammar]

sunīco'pi gṛhaṃ prāpto bhavetpūjya tamaḥ satām || 254 ||
[Analyze grammar]

athāsau toyamadhyasthaḥ śiromātraṃ bahirgataḥ |
pratyuvācātha taṃ gṛdhraṃ vinayāddvijasattamāḥ || 255 ||
[Analyze grammar]

nāhaṃ parāṅmukho jāta stvāṃ dṛṣṭvā'naṃtarāvubhau |
paṃcamo'yaṃ samabhyeti yo yuṣmākaṃ mahāpumān || 256 ||
[Analyze grammar]

bhayāttasya praṇaṣṭo'hamiṃdradyumnasya bhūpateḥ |
anena tu pradagdhā me purā pṛṣṭhirmakhāgninā |
satataṃ yajamānena rocake satpurottame || 257 ||
[Analyze grammar]

etadīyaṃ punaḥ smṛtvā bhayaṃ me sumahatsthitam |
iṃdradyumnasya rājarṣeḥ kīrti saṃśrayaṇaṃ mahat || 258 ||
[Analyze grammar]

ityevamukte vacane kamaṭhena tadā divaḥ |
devadūtaḥ samāgacchacchāsanātparameṣṭhinaḥ || 259 ||
[Analyze grammar]

devadūta uvāca |
āgacchāgaccha rājarṣe sāṃprataṃ brahmaṇoṃ'tikam |
ukto'haṃ brahmaṇā rājankīrtiścāsya pṛthagvidhā || 260 ||
[Analyze grammar]

yadā prakāśatāṃ yāti svalpāpi jagatī tale |
tadā'neyo drutaṃ rājā mama loke sudurlabhe || 261 ||
[Analyze grammar]

tasmādāgaccha gacchāmo vimānārohaṇaṃ kuru |
nayāmi yena tatpārśvaṃ brahmaṇo'vyaktajanmanaḥ || 262 ||
[Analyze grammar]

iṃdradyumna uvāca |
yadyete suhṛdo mahyaṃ bakakauśikakacchapāḥ |
mārkaṃḍeyena sahitā āgacchaṃti mayā saha || 263 ||
[Analyze grammar]

āgacchāmi tvayā sārdhaṃ tadahaṃ brahmaṇoṃ'tikam |
anyathā nāgamiṣyāmi satyametanmayoditam || 264 ||
[Analyze grammar]

devadūta uvāca |
ete haragaṇāḥ sarve śāpabhraṣṭā kṣitiṃ gatāḥ |
śāpāṃte harapārśve tu yo yāsyaṃtyasaṃśayam || 265 ||
[Analyze grammar]

tasmādāgaccha gacchāmo muktvātraitāndrutaṃ nṛpa |
na caiṣāṃ rocate svargo muktvā devaṃ maheśvaram || 266 ||
[Analyze grammar]

iṃdradyumna uvāca |
yadyevaṃ gaccha te bhadraṃ nāhaṃ gaṃtā triviṣṭapam |
tathātathā yatiṣyāmi bhaviṣyāmi yathā gaṇaḥ || 267 ||
[Analyze grammar]

tatrasthasya dhruvaṃ bhāvi nityaṃ ca patanādbhayam |
evamuktaḥ sa tenātha samādāya vimānakam || 268 ||
[Analyze grammar]

brahmalokaṃ gato dūto vailakṣyaṃ paramaṃ gataḥ |
iṃdradyumnopi prapaccha taṃ kūrmaṃ vinayānvitaḥ || 269 ||
[Analyze grammar]

ākhyāhi kūrma svaṃ karma yadīdṛktvaṃ ciraṃtanaḥ |
karmaṇā kena tatprāptaṃ kūrmatvaṃ śaṃsa me drutam || 270 ||
[Analyze grammar]

kūrma uvāca |
ahamāsaṃ purā vipro bālabhāve vyavasthitaḥ |
camatkārapure ramye śāṃḍilyo nāma viśrutaḥ || 271 ||
[Analyze grammar]

bālakrīḍāsu sarvāsu krīḍamāno yadṛcchayā |
pakveṣṭikamayaṃ śaṃbhoḥ krīḍatā nirmitaṃ gṛham |
tatra jāgeśvaraṃ liṃgaṃ hṛtvā'tha viniveśitam || 272 ||
[Analyze grammar]

tato'haṃ bhaktisaṃyuktaḥ pūjayāmi dinedine |
krīḍamāno vinā maṃtraiḥ śiśubhiḥ parivāritaḥ || 273 ||
[Analyze grammar]

kasyacittvatha kālasya maraṇe samupasthite |
jātismaro hyahaṃ vipro jāto vai vaidiśe pure || 274 ||
[Analyze grammar]

tato me'bhyadhikā jātā bhaktirdevaṃ haraṃ prati |
kṛttvā bhikṣāṭanaṃ nityaṃ yācayitvā dhanaṃ bahu || 276 ||
[Analyze grammar]

kṛtvā prāsādamātraṃ tu liṃgaṃ saṃsthāpitaṃ mayā |
pūjayāmi tato bhaktyā devaṃ paśupatiṃ haram || 276 ||
[Analyze grammar]

brahmavidyāsamopeto bhikṣānnakṛtabhojanaḥ |
brahmacaryasamopetastrikālaṃ ca japañchivam || 277 ||
[Analyze grammar]

tatastena prabhāvena saṃjā to'haṃ bhavāṃtare |
sārvabhaumo mahīpālo jātismaraṇasaṃyutaḥ || 278 ||
[Analyze grammar]

tataḥ saṃkhyāvihīnāśca prāsādāḥ kāritā mayā |
trinetrasya mahārāja kailāsa śikharopamāḥ || 279 ||
[Analyze grammar]

tathā nirūpitā pūjā bahupuṣpasamudbhavā |
nānyatkiṃcitkaromyatra dharma dānādikaṃ nṛpa || 280 ||
[Analyze grammar]

tataḥ kālena mahatā tuṣṭo me śaśiśekharaḥ |
tataḥ provāca rājarṣe prahasañchlakṣṇayā girā || 281 ||
[Analyze grammar]

jayadatta pratuṣṭo'smi tava pārthivasattama |
bhaktyā'nayā drutaṃ brūhi kiṃ te yacchāmi vāṃchitam || 282 ||
[Analyze grammar]

praṇipatya tato'ṣṭāṃgaṃ stutvā caiva pṛthigvidham |
mayā prokto haro rājankuru māmajarāmaram |
sa tatheti pratijñāya gatoṃ'tardhānameva hi || 283 ||
[Analyze grammar]

aprameyagatirdevaścaturdaśajagatpatiḥ |
tato'haṃ tuṣṭisaṃyukto jarāmaraṇavarjitaḥ |
vicarāmi mahīpṛṣṭhe svecchayā śatru varjitaḥ || 284 ||
[Analyze grammar]

tataḥ kālena mahatā gatena nṛpasattama |
bahukāmāgnisaṃtaptaḥ śivabhaktivivarjitaḥ || 285 ||
[Analyze grammar]

yāṃyāṃ paśyāmi rūpāḍhyāṃ paranārīṃ manoramām |
tāṃtāṃ nirīkṣya suciraṃ dharṣayāmi tataḥ param || 286 ||
[Analyze grammar]

dharmarājabhayatyaktaḥ pārthivatvaṃ samāśritaḥ || 287 ||
[Analyze grammar]

etasminnaṃtare rājanmama pāpena karmaṇā |
hāhākārastato jātaḥ samagre dharaṇītale || 288 ||
[Analyze grammar]

etasminnaṃtare prāpto dharmarājaḥ śivāṃtikam |
abravītpraṇipatyoccairduḥkhita stadanaṃtaram || 289 ||
[Analyze grammar]

tvayā deva mahīpālo jayadatto mahītale |
yo nirmitaḥ pratuṣṭena jarāmaraṇavarjitaḥ || 29 ||
[Analyze grammar]

sa satīnāṃ satītvaṃ ca balānnāśayate kudhīḥ |
sarvo bhūpabhayāllokaḥ sarvadharmabahiṣkṛtaḥ || 291 ||
[Analyze grammar]

saṃjāto vibudhaśreṣṭha na svabhāvātkathaṃcana |
tasyaikamapi me nāsti bhayaṃ satyaṃ bravīmi te || 292 ||
[Analyze grammar]

tasmādvāraya taṃ śīghraṃ yāvaddharmo na naśyati |
martyalokādaśeṣeṇa satīnāṃ dharṣaṇena ca || 293 ||
[Analyze grammar]

evamuktastato devaḥ kopena mahatānvitaḥ |
śaśāpa māṃ samānīya vepamānaṃ kṛtāñjalim || 294 ||
[Analyze grammar]

yasmādduṣṭasamācāra kṛtaṃ karma vigarhitam |
tasmānmacchāpa nirdagdhaḥ kamaṭho vai bhaviṣyasi || 295 ||
[Analyze grammar]

tato mayā sudīnena prārthitaḥ parameśvaraḥ |
śāpāṃtaṃ me kuruṣveśa kuruṣva ca dayāṃ mama || 296 ||
[Analyze grammar]

tatastena punaḥ proktaṃ kalpāṃte ṣaṣṭisaṃjñite |
svaśarīraṃ punaḥ prāpya madgaṇastvaṃ bhaviṣyasi || 297 ||
[Analyze grammar]

etasminnaṃtare kūrmaḥ saṃjāto'haṃ mahīpate |
samudrasalilaṃ prāpya saṃsthito duḥkhito'niśam || 298 ||
[Analyze grammar]

kasyacittvathakālasya rājaṃstvaṃ bhūtale sthitaḥ |
yajanārthaṃ samānītaḥ samudrasalilastvayā || 299 ||
[Analyze grammar]

sthāpito bhūmipṛṣṭhe tu maṃtrai saṃstaṃbhitastathā |
mamopari tato yajñāḥ kṛtāḥ śatasahasraśaḥ || 300 ||
[Analyze grammar]

kriyamāṇaiśca yairdagdhā mama pṛṣṭhiḥ samaṃtataḥ || |
dahyato'pi mahārāja tena yajñāgninā tadā |
prasādanānmaheśasya na me prāṇātyayo 'bhavat || 301 ||
[Analyze grammar]

kevalaṃ jāyate dāho yathā pāpaṃ purā kṛtam |
anubhūtaṃ ca tatsarvaṃ harakopādasaṃśayam || 302 ||
[Analyze grammar]

atha prāpte divaṃ caiva tvayi pārthivasattama |
ekārṇave tu saṃjāte jalapūrṇe dharātale |
saṃprāptaḥ plavamānastu tato'haṃ mānasaṃ saraḥ || 303 ||
[Analyze grammar]

ṣaḍpaṃcāśatpramāṇena kalpā mama ca saṃsthitāḥ |
caturbhiraparairmokṣaḥ kūrmatvātsaṃbhaviṣyati || 304 ||
[Analyze grammar]

etatte sarvamākhyātaṃ dīrghāyuṣṭvasya kāraṇam |
haraprasādakaraṇādbahupuṣpārcanādvibhoḥ || 305 ||
[Analyze grammar]

kūrmatvaṃ ca yathā jātaṃ kāmadevasya kopataḥ |
sa tvaṃ vada mahābhāga gṛhāyātasya kiṃ tava |
karomi sāṃprataṃ kṛtyaṃ śatrorapi hṛdi sthitam || 306 ||
[Analyze grammar]

tvayā me suciraṃ kālaṃ dagdhā pṛṣṭhirmakhāgninā |
adyāpi ca prapaśyāmi tāṃ jvalaṃtīmiva sthitām || 307 ||
[Analyze grammar]

etasmātkāraṇānnaṣṭastvāṃ dṛṣṭvāhaṃ mahīpate |
kasmāttvaṃ na gataḥ svargaṃ vimāne'pi samāgate |
etasmātkāraṇāddharmaṃ prakurvaṃti narādhipāḥ || 308 ||
[Analyze grammar]

indradyumna uvāca |
svargasthāne ca lokānāṃ nityaṃ ca patanā dbhayam |
tanna yāsyāmyahaṃ tatra yatiṣyāmi vimuktaye || 309 ||
[Analyze grammar]

sa tvaṃ karoṣi cetkṛtyaṃ gṛhāyātasya me makhe |
ciraṃtanaṃ kathaya me yadyasti tava sauhṛdam || 310 ||
[Analyze grammar]

kūrma uvāca |
lomaśo nāma viprarṣiḥ sa matto'sti ciraṃtanaḥ |
śrūyate sa mayā dṛṣṭo nadītīraṃ samāśritaḥ || 311 ||
[Analyze grammar]

indradyumna uvāca |
tadāgacchata gacchāmo yataḥ sarve drutaṃ svayam |
pṛcchāmo bahukālasya jīvitasya ca kāraṇam || 312 ||
[Analyze grammar]

atha te sahitāḥ pañca vyomamārgeṇa saṃsthitāḥ |
atha te dadṛśustatra lomaśaṃ ca nirāśrayam || 313 ||
[Analyze grammar]

svādhyāyanirataṃ dāṃtaṃ japahomaparāyaṇam |
savya haste tṛṇaughena chāyārthaṃ vidhṛtena ca || 314 ||
[Analyze grammar]

dadhataṃ cākṣamālāṃ ca dakṣiṇena kareṇa hi |
te taṃ dṛṣṭvā mahātmānaṃ kṛtvā tasya pradakṣiṇām |
upaviṣṭāstataḥ sarve svāgatenābhinanditāḥ || 315 ||
[Analyze grammar]

pṛṣṭāstena tataścaiva ke yūyaṃ kimihāgatāḥ |
viśrabdhaṃ kathyatāṃ mahyaṃ yena sarvaṃ karomyaham || 316 ||
[Analyze grammar]

kūrma uvāca |
mārkaṃḍo nāma viprarṣiḥ saptakalpasmaro hyayam |
indradyumnena cānīto bhūbhujānena sanmune || 317 ||
[Analyze grammar]

bakasyāsya samīpe tu nāḍījaṃghasya dhīmataḥ |
cirāyuriti vijñāya ātmanaścāyuruttamam |
indradyumnasya vārtārthaṃ dviguṇāyuṣamātmanaḥ || 318 ||
[Analyze grammar]

atha tena na vijñāto yadā sa pṛthivīpatiḥ |
tadā dvāvapi cāyātāvulūkasyāsya saṃnidhau || 319 ||
[Analyze grammar]

dviguṇāstatpramāṇena kalpāścāsya mahātmanaḥ |
vartaṃte naiva vijñāto nṛpo hyetena saddvija || 320 ||
[Analyze grammar]

tatastrayo'pi cānītā gṛdhrarājasya cāntikam || 321 ||
[Analyze grammar]

ṣaṭpañcāśatpramāṇena kalpāścāsya mahātmanaḥ |
vartante naiva vijñāto nṛpo hyetena saddvija || 322 ||
[Analyze grammar]

catvāro'pi samānītā etenaiva mamāntikam |
cirāyuṣaṃ ca māṃ jñātvā mitrabhāvena te dvija || 323 ||
[Analyze grammar]

mayāpyasau parijñāto dūrādeva samāgataḥ |
indradyumno dhruvaṃ hyeṣa dagdhā pṛṣṭhiḥ purā mama || 324 ||
[Analyze grammar]

yena yajñāgninā maṃtrai staṃbhayitvā kṣiteradhaḥ |
tato'haṃ tadbhayānnaṣṭo gṛdhrādyaiśca nivāritaḥ || 325 ||
[Analyze grammar]

upālaṃbhaistu bahubhiḥ praṇayā jjalamāviśat |
mayokto'tha sa bhūyo'pi nāhaṃ tava parāṅmukhaḥ || 326 ||
[Analyze grammar]

indradyumnena me pṛṣṭhiryena dagdhā makhāgninā |
etasminnantare svargāddevadūto mahāmanāḥ |
vimānavaramārūḍhaḥ prāptaścāsya mahātmanaḥ || 327 ||
[Analyze grammar]

kīrtilopācyutaḥ svargādayamāsīnmahīpatiḥ |
tato vimānamāyātamuktamātre mayā divaḥ || 328 ||
[Analyze grammar]

athāsau na gataḥ svargaṃ vinā'smābhirdvijottama |
mārkaṃḍeyaṃ parityajya tiryagyonigataistribhiḥ || 329 ||
[Analyze grammar]

pṛcchato'sya mayā proktamāyuṣyaṃ cātmanaḥ punaḥ |
ṣaṇṇavatipramāṇena kalpā me jīvato gatāḥ || 330 ||
[Analyze grammar]

pṛṣṭo'haṃ pūrvamevātra saṃsthitastava pārśvataḥ |
ciraṃtanatamo brūhi mayā tvaṃ tu niveditaḥ || 331 ||
[Analyze grammar]

etasmātkāraṇātprāptā vayaṃ sarve tavāṃtikam |
tasmādyatpṛcchate bhūpa eṣa tvāṃ tatprakīrtaya || 332 ||
[Analyze grammar]

bhartṛyajña uvāca |
lomaśo'pyatha taṃ prāha viśrabdhaṃ pṛccha pārthiva |
avaśyaṃ kathayiṣyāmi yanmāṃ tvaṃ paripṛcchasi || 333 ||
[Analyze grammar]

iṃdradyumna uvāca |
kasmāttvaṃ grīṣmakāle'pi madhyaṃ prāpte divākare |
nivāsārthaṃ gṛhaṃ ramyaṃ kimarthaṃ na kariṣyasi || 334 ||
[Analyze grammar]

lomaśa uvāca |
kasyārthe kriyate gehamanityaṃ jīvitaṃ yataḥ |
yadi syācchāśvato dehastadarthaṃ kriyate ca tat || 335 ||
[Analyze grammar]

indradyumna uvāca |
sarveṣāmeva lokānāṃ cirāyuḥ śrūyate bhavān |
tenāhamapi saṃprāpto bhavaddarśanakāmyayā || 336 ||
[Analyze grammar]

lomaśa uvāca |
kalpe kalpe tu saṃprāpte romakaṃ mama naśyati |
abhāve sarvaromṇāṃ ca tato nāśo bhaviṣyati || 337 ||
[Analyze grammar]

paśya tvaṃ maccharīre'sminprakāśaṃ romavarjitam |
na karomi gṛhaṃ tena kāraṇena mahāmate || 338 ||
[Analyze grammar]

indradyumna uvāca |
kiṃ tvayā vihitaṃ karma yenedṛgjīvitaṃ sthitam |
kiṃ dānasyaprabhāvo'yaṃ tapaso niyamasya vā || 339 ||
[Analyze grammar]

lomaśa uvāca |
ahamāsaṃ purā śūdro daridreṇa pariplutaḥ |
bhramāmi medinīpṛṣṭha udarasya kṛte sadā || 34 ||
[Analyze grammar]

karmayogena mahatā saṃprāpto hāṭakeśvaram |
kṣutkṣāmastu pipāsārto yatraitalliṃgamuttamam |
avadhūtaṃ tato liṃgaṃ mayā dṛṣṭvā svayaṃbhu tat || 341 ||
[Analyze grammar]

snāpitaṃ toyamādāya śītametatsunirmalam |
tatastu kamalairetairmayā pūjā vinirmitā || 342 ||
[Analyze grammar]

atha pūjāṃ vinirvartya yāvanmārgasamāśritaḥ || kṣu |
tkṣāmakaṇṭhasya tataḥ prāṇā naṣṭāstadā mama || 343 ||
[Analyze grammar]

athāhaṃ brāhmaṇagṛhe jāto jātismarastataḥ |
sarvaṃ smarāmi bhūpāla devadevasyapūjanāt || 344 ||
[Analyze grammar]

tato mūkatvamāpanno naiva jalpāmi kiṃcana |
īśāna iti me nāma pitā cakre praharṣitaḥ || 345 ||
[Analyze grammar]

īśānena yato dattaḥ pūrvamārādhitena ca |
vairāgyaṃ paramaṃ prāpto iṣṭvā saṃsārasaṃsthitim || 346 ||
[Analyze grammar]

pitā me bahuvātsalyādbheṣajāni prayojayet |
vācārthaṃ maṃtravādāṃśca tathā caivopayācitam |
brāhmaṇānpṛcchate nityaṃ divārātrimataṃdritaḥ || 347 ||
[Analyze grammar]

tato me jāyate hāsyaṃ nijacitte narādhipa |
dṛṣṭvā saṃsārasaṃsaktiṃ piturmātuśca bhūriśaḥ || 348 ||
[Analyze grammar]

tataśca yauvanaṃ prāptaḥ krameṇa nṛpasattama |
yadā tadā niśi tyaktvā tāvubhau cātra saṃgataḥ || 349 ||
[Analyze grammar]

tato hṛṣṭamanā nityaṃ pūjayāmi samāhitaḥ |
īśānaṃ parayā bhaktyā saṃsnāpya salilena ca || 35 ||
[Analyze grammar]

brāhmaṇītīrthajātena trikālaṃ nṛpasattama |
śiloṃchavṛttimāsādya prāṇayātrāṃ samācaran |
nīvārairbadaraiḥ śākaiścirbhaṭaiḥ phalapatrakaiḥ || 351 ||
[Analyze grammar]

tato me bhagavānrudraḥ sarvadeveśvaro haraḥ |
abravīddarśanaṃ gatvā meghagambhīrayā girā || 352 ||
[Analyze grammar]

parituṣṭo'smi te vatsa varaṃ varaya suvate |
adeyamapi dāsyāmi yadyapi syātsudurlabham || 353 ||
[Analyze grammar]

tatastaṃ praṇipatyoccaiḥ stutvā vākyaiḥ pṛthagvidhaiḥ |
mayā proktaṃ kuru vibho jarāmaraṇa varjitam || 354 ||
[Analyze grammar]

śrībhagavānuvāca || amaratvaṃ yato nāsti martyaloke'tra karhicit |
maryādāṃ kuru tasmāttvaṃ jīvitasya svakasya vai || 355 ||
[Analyze grammar]

tato me bhagavānuktaḥ kalpāṃte samupasthite |
romṇa ekasya me nāśo jāyatāṃ tridaśeśvara || 356 ||
[Analyze grammar]

yadā ca sarvaromṇāṃ me vināśaḥ saṃprajāyate |
tadā mama gaṇatvaṃ ca jāyatāṃ tāvakaṃ vibho || 357 ||
[Analyze grammar]

evaṃ bhaviṣyatītyuktaṃ paraṃ liṃga sadā mama |
snāpyaṃ jalena caitena brāhmaṇīsaṃbhavena ca || 398 ||
[Analyze grammar]

brahmādyaiḥ pūjanīya ca trikālaṃ dvijasattama |
mamakaivāsaraṃ yāvattava cāyurbhaviṣyati || 359 ||
[Analyze grammar]

anyo'pi yo naro bhaktyā pūjayiṣyati māmiha |
snāpayiṣyati sadbhaktyā vipāpmā sa bhaviṣyati || 360 ||
[Analyze grammar]

nāpamṛtyurbhavettasya kadāciddvijasattama |
sakṛtsaṃpūjite 'pyevaṃ brahmādyairmatkalevare || 361 ||
[Analyze grammar]

sakṛtpibati yastoyaṃ brahmatīrthasamudbhavam |
sarvapāpaviśuddhātmā tatkṣaṇājjāyate hi saḥ || 362 ||
[Analyze grammar]

evamuktvātha deveśastataścādarśanaṃ gataḥ || 363 ||
[Analyze grammar]

ahaṃ tu saṃsthitaścātra tataḥ prabhṛti pārthiva |
pūjayānaśca sadbhaktyā liṃgametatsadaiva hi || 364 ||
[Analyze grammar]

etasmātkāraṇājjātaṃ mamāyurativistṛtam |
śaṃkarasya prasādena nānyadastīha kāraṇam || 365 ||
[Analyze grammar]

indradyumna uvāca |
ahamapyarcayiṣyāmi liṃgameta ttvayā saha |
nānyatra vā gamiṣyāmi mamaivaṃ hṛdi niścayaḥ || 366 ||
[Analyze grammar]

lomaśa uvāca |
evaṃ kuru mahābhāga tvamavāpsyasi vāṃchitam |
harabhaktasya lokasya vāṃchitaṃ nāsti dularbham || 367 ||
[Analyze grammar]

nāḍījaṃgho gṛhaṃ yātu mārkaṃḍagṛdhakauśikāḥ |
kacchapena samāyuktastvaṃ hi tiṣṭha mamā śrame || 368 ||
[Analyze grammar]

tataḥ procuśca te sarve na vayaṃ tu nareśvara |
tvāṃ vinā saṃprayāsyāmo bhūya eva nijālayam |
liṃgamārādhayiṣyāmo yadetadbhavatā rcitam || 369 ||
[Analyze grammar]

evamuktvā tu te sarve lomaśasya varāśrame |
tasthuḥ saṃpūjayāmāsustrikālaṃ liṃgameva tat || 370 ||
[Analyze grammar]

saṃsnāpya brāhmaṇītoyaiḥ padmā dyaiḥ pūjayaṃti ca || 371 ||
[Analyze grammar]

kasyacittvatha kālasya nārado munisattamaḥ |
tīrthayātrāprasaṃgena saṃprāptastatra yatra te || 372 ||
[Analyze grammar]

atha  nāradaṃ dṛṣṭvā kṛtvā caivārhaṇakriyām |
viśrāṃtaṃ ca tato jñātvā papracchurvinayānvitāḥ || 373 ||
[Analyze grammar]

śāpabhraṣṭā vayaṃ sarve yataḥ saṃvartadarśanāt |
bakādyāścaiva catvāraḥ kūrmāṃtāśca mahāmune || 374 ||
[Analyze grammar]

na sa vijñāyate kvāpi kasminsthāne vyavasthitaḥ |
kiṃrūpaḥ kiṃpramāṇaśca kimācāraḥ kva saṃsthitaḥ || 375 ||
[Analyze grammar]

sa tvaṃ yadi vijānāsi yatra taṃ saṃsthitaṃ munim |
tadvadasva mahābhāga na kiṃcitte'styagocaram || 376 ||
[Analyze grammar]

śrīnārada uvāca |
ahaṃ jānāmi taṃ samyaksaṃvartaṃ munisattamam |
guptācāreṇa tiṣṭhaṃtaṃ nānyo vetti kathaṃcanam || 377 ||
[Analyze grammar]

vārāṇāsyāṃ sthito nityaṃ so'vadhūto mahāmuniḥ |
vivastro maladigdhāṃgaḥ sadāraṇyaṃ samāśritaḥ || 378 ||
[Analyze grammar]

bhikṣārthaṃ kutape kāle samāgacchati tāṃ purīm |
pāṇipātrakṛtāhāro gṛhaiḥ kaiścitsadaiva hi || 379 ||
[Analyze grammar]

bhūyopi yāti sāyāhne kiṃcideva vanāṃtaram |
tasyāṃ puryāṃ tathārūpāḥ śataśo'tha sahasraśaḥ || 380 ||
[Analyze grammar]

tiṣṭhaṃti tāpasaśreṣṭhāstasya vakṣyāmi lakṣaṇam |
bhavadbhiḥ sa yathā jñeyo mama vākyādasaṃśayam || 381 ||
[Analyze grammar]

vārāṇasyāḥ pratolyāṃ ca sthāpanīyaṃ suyatnataḥ ḥ |
kuṇapaṃ caiva guptaṃ ca yathā no vetti kaścana || 382 ||
[Analyze grammar]

yāsyaṃti tāpasāḥ sarve tamatikramya bhūriśaḥ |
saṃvarto divyadṛṣṭistu śalyaṃ nātikramiṣyati || 383 ||
[Analyze grammar]

nivartanaṃ tu yaścakre bhūbhāgātkuṇapāśrayāt |
sa saṃvartaḥ parijñeyaḥ praṣṭavyaśca tataḥ param || 384 ||
[Analyze grammar]

yadi pṛcchati kenāhaṃ bhavatāṃ saṃniveditaḥ |
nāradena tato vācyaṃ sa tvāṃ jānāti vai sadā || 385 ||
[Analyze grammar]

yadi pṛcchati bhūyaḥ sa nāradaḥ kva sa tiṣṭhati || 386 ||
[Analyze grammar]

tato vācyo nivedya tvāṃ pratiṣṭo havyavāhanam || 387 ||
[Analyze grammar]

tacchrutvā nāradavacaḥ sarve vai lomaśādayaḥ |
vārāṇasīṃ purīṃ prāptāstasya darśanalālasāḥ || 388 ||
[Analyze grammar]

pratolyāṃ kuṇapaṃ sthāpya guptaṃ lokairalakṣitam |
svayaṃ caiva sthitā dūraṃ prekṣamāṇāḥ prayatnataḥ || 389 ||
[Analyze grammar]

tatastu kutape kāle saṃvartastu samāgataḥ |
yādṛgrūpaḥ purā prokto nāradena mahātmanā || 390 ||
[Analyze grammar]

sa dṛṣṭvā kuṇapaṃ tatra divyadṛṣṭyā mahāmuniḥ |
nivṛttaḥ kṣutpipāsārto naiva śalyamalaṃghayat || 391 ||
[Analyze grammar]

atha te taṃ samuddiśya pṛṣṭhato'nuyayustadā |
tiṣṭhatiṣṭheti jalpaṃtaḥ prasādaḥ kriyatāmiti || 3920 ||
[Analyze grammar]

so'pi nirbhartsayannetānnivartadhvamiti bruvan |
mā gacchata matsamīpamiti procya palāyitam || 393 ||
[Analyze grammar]

atha dūrataraṃ gatvā sa provāca kṣudhānvitaḥ || 394 ||
[Analyze grammar]

kenādiṣṭo'smi yuṣmākaṃ sa śīghraṃ me nivedyatām |
śāpāgnau yena taṃ pāpaṃ bhasmasātprakaromyaham || 395 ||
[Analyze grammar]

ta ūcuḥ |
nāradena samākhyāto bhavānatra sthito hi naḥ |
kathayitvā tato vahnau saṃpraviṣṭaḥ sa tatkṣaṇāt || 396 ||
[Analyze grammar]

saṃvarta uvāca |
ahaṃ tadeva kartā ca tasya duṣṭasya sāṃpratam |
nirdiṣṭo yena yuṣmākaṃ guptācāraṃ samāśritaḥ || 397 ||
[Analyze grammar]

ta ūcuḥ |
bhagavannāradenoktastvamasmākaṃ mahāmune |
cirādanveṣyamāṇānāṃ nānyastvāṃ vetti kaścana || 398 ||
[Analyze grammar]

tāvannivedya cāsmākaṃ praviṣṭo havyavāhanam |
tatkṣaṇādeva vipreṃdra na vidmastatra kāraṇam || 399 ||
[Analyze grammar]

saṃvarta uvāca |
ahamapyatisaṃkruddhaḥ śāpātkartuṃ samudyataḥ || 40 ||
[Analyze grammar]

etadevahi tasmācca svayameva kṛtaṃ ca yat || 0 ||
[Analyze grammar]

tasmādvadatha me śīghraṃ kasmādyūyaṃ samāgatāḥ || 401 ||
[Analyze grammar]

ciraṃ sthāsyāmi nātrāhaṃ bhramiṣyāmi purīṃ prati |
prāṇayātrākṛte bhikṣāṃ kariṣyāmi svayaṃ yataḥ || 402 ||
[Analyze grammar]

viśalyaḥ kriyatāṃ mārgaḥ kuṇapaṃ hriyatāṃ ca yat |
nocecchāpaṃ pradāsyāmi yadyevaṃ na kariṣyatha || 403 ||
[Analyze grammar]

tathāhaṃ naiva vaktavyaḥ kasyaciccātra saṃsthitaḥ |
anveṣayati māṃ nityaṃ maruttaḥ pṛthivīpatiḥ || 404 ||
[Analyze grammar]

yajñārthaṃ naiva taṃ bhūpaṃ yājayiṣye kathaṃcana |
dhiṣaṇena parityakto guruṇā sa mahīpatiḥ || 405 ||
[Analyze grammar]

guruputraṃ ca māṃ jñātvā tato'nveṣayate hi mām || 406 ||
[Analyze grammar]

ta ūcuḥ |
śāpabhraṣṭā vayaṃ sarve catvāro'pi bakādayaḥ |
pakṣitvaṃ caiva saṃprāptā brahmaśāpena sanmune || 407 ||
[Analyze grammar]

maheśvaragaṇāścaiva vayaṃ trailokyavaṃditāḥ |
tiryagyoniṃ samānītā vairāgyaṃ paramaṃ gatāḥ || 408 ||
[Analyze grammar]

śāpāṃtastu samādiṣṭastairvipraiḥ strīsamu dbhavaḥ |
tavopadeśatastena bakādyāḥ śaraṇaṃ gatāḥ || 409 ||
[Analyze grammar]

tasmāttrāhi mahābhāga pakṣitvātsāṃprataṃ vibho || 410 ||
[Analyze grammar]

nirviṇṇāścirakālaṃ ca pakṣitvasya niṣevaṇāt |
etacca kāraṇaṃ nānyattava saṃgasamudbhavam || 413 ||
[Analyze grammar]

saṃvarta uvāca |
yadyevaṃ gamyatāṃ śīghraṃ camatkārapuraṃ prati |
bhartṛ yajñaḥ sthito'pyatra sarvasaṃdehahārakaḥ || 412 ||
[Analyze grammar]

sa vai dāsyati sarveṣāmupadeśaṃ suśobhanam |
tena prāpsyatha saṃdehaṃ pūrvīyaṃ ca yathāsthitam || 413 ||
[Analyze grammar]

sa pūrvaṃ yājñavalkyo'bhūtsarvaśāstrārthapāragaḥ |
tato bhavāṃtare'nyasminkātyāyana iti smṛtaḥ || 414 ||
[Analyze grammar]

tato dehāṃtaraṃ prāpya khyāto vararucirdvijaḥ |
tato dehāṃtare'nyasminveśyāputro babhūva ha || 415 ||
[Analyze grammar]

ārādhitā brahmasutā devī vāgrūpiṇī sadā |
na ca tuṣṭā svayaṃ devī kāraṇaṃ vīkṣya kiṃcana || 416 ||
[Analyze grammar]

brāhmaṇena prajātastu dehāṃtaṃ prāpya kiṃcana |
tasya vaktraṃ samāpannā svayameva sarasvatī || 417 ||
[Analyze grammar]

pūrvamārādhitā nityaṃ na sā tyajati karhicit |
tasyāścaryamabhūccānyadyajñe veśyāsutasya hi || 419 ||
[Analyze grammar]

brahmasūtraṃ samabhyeti skaṃdhe niryāti gacchati || 419 ||
[Analyze grammar]

pūrveṣāmeva lokānāṃ yajñakarmasu saṃsthitān |
sa saṃdehānharatyeva yathā nānyo'tra kaścana || 420 ||
[Analyze grammar]

sūta uvāca |
tasya tadvacanaṃ śrutvā praṇipatya muhurmuhuḥ |
gatāste kuṇapaṃ yatra saṃvartena praṇoditāḥ || 421 ||
[Analyze grammar]

taccākṛṣya tataḥ sarve camatkārapuraṃ gatāḥ |
vāstusthānapade tīrthe taṃ dṛṣṭvā tatra saṃsthitam || 422 ||
[Analyze grammar]

praṇipatya tataḥ procuḥ sarve vinayasaṃsthitāḥ |
brahmaśāpena nirdagdhā vayaṃ catvāra eva hi || 423 ||
[Analyze grammar]

pakṣitvaṃ samanuprāptāstrayaḥ kūrmatvamanyakaḥ |
ya ete ca trayo'smākaṃ sthitāḥ pārśve mahattarāḥ || 424 ||
[Analyze grammar]

mārkaṃḍaḥ kathito hyeṣa iṃdradyumnastathā paraḥ |
tṛtīyo lomaśo nāma vikhyātaḥ sumahātapāḥ || 425 ||
[Analyze grammar]

jīvitavyasya nirviṇṇāstraya eva ca sāṃpratam |
upadeśapradānena prasādaṃ kartumarhasi || 426 ||
[Analyze grammar]

sūta uvāca |
teṣāṃ tadvacanaṃ śrutvā bhartṛyajño mahāmuniḥ |
abravītsuciraṃ dhyātvā jñātvā divyena cakṣuṣā || 427 ||
[Analyze grammar]

yūyaṃ saptaiva liṃgāni sthāpayadhvaṃ samāgatāḥ |
hāṭakeśvaraje kṣetre nāmnā caivāṃtike nibhoḥ || 428 ||
[Analyze grammar]

tato dānāni saptaiva teṣāmagre prayacchata |
kulaparvatasaṃjñāni sarvapāpaharāṇi ca || 429 ||
[Analyze grammar]

tataḥ prāpsyatha cābhīṣṭaṃ vapurdivyaṃ manoramam |
gaṇatvaṃ devadevasya trine trasya mahātmanaḥ || 430 ||
[Analyze grammar]

ta ūcuḥ |
prakīrtaya vibho dānaṃ teṣāṃ yacchāmahe yathā |
pramāṇaṃ ca vidhānaṃ ca vistareṇa mahāmune || 431 ||
[Analyze grammar]

bhartṛyajña uvāca |
deyo hemamayo meruḥ kailāso rajatodbhavaḥ |
kārppāsena himādristu guḍajo gaṃdhamādanaḥ || 432 ||
[Analyze grammar]

suvelastu tilairdeyo viṃdhyaḥ śarkarayā tathā |
lavaṇena tathā śṛṃgī yathoktavidhinā tataḥ || 433 ||
[Analyze grammar]

sūta uvāca |
tasya tadvacanaṃ śrutvā saṃsthāpya vidhipūrvakam || 100 ||
[Analyze grammar]

saptaliṃgāni taiḥ paścātpradattāḥ kulaparvatāḥ || 434 ||
[Analyze grammar]

iṃdradyumneśvarasyāgre iṃdradyumnaḥ pratāpavān |
meruṃ hemamayaṃ kṛtvā bhartṛyajñamate sthitaḥ || 435 ||
[Analyze grammar]

mārkaṃḍeśvaradevasya mārkaṃḍena ca dhīmatā |
kailāso rājato datto bhaktipūrvaṃ dvijottamāḥ || 436 ||
[Analyze grammar]

kārpāso himavāndattaḥ pālakena dvijātaye |
gaṃdhamādanasaṃjñastu pradatto guḍajaḥ puraḥ || 437 ||
[Analyze grammar]

ghaṃṭakeśvaradevasya ghaṃṭakena dvijottamāḥ |
kacchapena tu saṃdattaḥ suvelaḥ parvatottamaḥ || 438 ||
[Analyze grammar]

kacchapeśvaradevasya purastilamayastathā |
śārkarastu tadā śailaḥ pradatto bhaktipūrvakam || 439 ||
[Analyze grammar]

śaila īśānasaṃjñena nijadevasya cā'grataḥ |
vānareśvara devasya purato dvijasattamāḥ || 440 ||
[Analyze grammar]

gṛdhreṇātha pradattastu lavaṇākhyo mahāgiriḥ |
śṛṃgī nāma mahābhāgaḥ śraddhāpūtena cetasā || 441 ||
[Analyze grammar]

tatrāścaryamabhūdviprā dattamātrairnagottamaiḥ |
pakṣitvaṃ nirgataṃ teṣāṃ kūrmatvamitarasya ca || 442 ||
[Analyze grammar]

etasminneva kāle tu sarve te tatprabhāvataḥ |
divyamālyāṃbaradharā divyagaṃdhānulepanāḥ |
saṃjātā brāhmaṇaśreṣṭhā ye ca tatsaṃmukhe sthitāḥ || 443 ||
[Analyze grammar]

vimānāni ca sarveṣāṃ samāyātāni tatkṣaṇāt || 1 ||
[Analyze grammar]

bhartṛyajñamanuprāpya praṇipatya ca tāndvijān |
kailāsaṃ parvataṃ prāptā vimānavaramāśritāḥ || 444 ||
[Analyze grammar]

etadvaḥ sarvamākhyātaṃ yathā talliṃgasaptakam |
hāṭakeśvaraje kṣetre saṃjātaṃ pāpanāśanam || 445 ||
[Analyze grammar]

anyo'pi yaḥ punasteṣāṃ liṃgānāṃ bhaktisaṃyutaḥ |
kulaparvatadānaṃ ca kuryātso'pi śivaṃ vrajet || 448 ||
[Analyze grammar]

tāni liṃgāni yo martyaḥ prātarutthāya vīkṣate |
ajñānavihitātpāpātso'pi muktimavāpnuyāt || 447 ||
[Analyze grammar]

yaścaitānparvatānsapta krameṇātra prayacchati |
dvijātibhyaḥ svaliṃgānāṃ puratastridivaṃ vrajet || 448 ||
[Analyze grammar]

sthitvā kalpāṃtaraṃ tatra saṃsevya ca varāpsarāḥ |
divyānbhogāṃśca saṃsevya yadā bhūmau prajāyate |
cakravartitvamāsādya sārvabhaumaḥ prajāyate || 449 ||
[Analyze grammar]

ekena tu pradattena jāyate pāpasaṃkṣayaḥ |
dvābhyāṃ putrāśca pautrāśca vāṃchitāni phalāni ca || 450 ||
[Analyze grammar]

tribhiḥ saṃjāyate rājā caturbhirmaṃḍaleśvaraḥ |
bhāratasya ca khaṇḍasya svāmī bhavati paṃcabhiḥ || 451 ||
[Analyze grammar]

jaṃbudvīpādhipaḥ ṣaṅbhiścakravartī ca saptabhiḥ |
vidhivatparvatairdattaireta dāha pitāmahaḥ || 452 ||
[Analyze grammar]

naraḥ syādbrāhmaṇaśreṣṭhāḥ sadājanmanijanmani |
na duḥkhito daridro vā vyādhito vā prajāyate || 453 ||
[Analyze grammar]

saubhāgyasukhasaṃyuktaḥ sudeho ratnavānbhavet |
sarvarājyavinirmuktaḥ pratāpī vijitendriyaḥ || 454 ||
[Analyze grammar]

tasmātsarvaprayatnena bhūmipālairviśeṣataḥ |
etaṃ ca parvatā deyā uddiśya nijadevatāḥ || 455 ||
[Analyze grammar]