Chapter 243

[English text for this chapter is available]

| brahmovāca |
śūdraḥ paijavanonāma gārhasthyācchuddhimāptavān |
dharmamārgāvirodhena tannibodha mahāmate || 1 ||
[Analyze grammar]

āsītpaijavanaḥ śūdraḥ purā tretāyuge kila |
svadharmanirataḥ khyāto viṣṇubrāhmaṇapūjakaḥ || 2 ||
[Analyze grammar]

nyāyāgatadhano nityaṃ śāṃtaḥ sarvajanapriyaḥ |
satyavādī vivekajñastasya bhāryā ca sundarī || 3 ||
[Analyze grammar]

dharmoḍhā vedavidhinā samānakulajā śubhā |
pativratā mahābhāgā devadvijahite ratā || 4 ||
[Analyze grammar]

kāśyāṃ saṃbaṃdhitā bālā vaijayaṃtyāṃ vivāhitā |
sā dharmācaraṇe dakṣā vaiṣṇavavratacāriṇī || 5 ||
[Analyze grammar]

bhartrā saha tathā samyakcikrīḍe suvinītavat |
so'pi reme tayā kāle hastinyeva mahāgajaḥ || 6 ||
[Analyze grammar]

arthāptiḥ pūrvapuṇyena jātā tasya mahātmanaḥ |
vāṇijyaṃ svajanairnityaṃ svadeśaparadeśajam || 7 ||
[Analyze grammar]

kārayatyarthajātaiśca parakīyasvakīyajaiḥ |
evamarthaśca bahudhā saṃjāto dharmadarśinaḥ || 8 ||
[Analyze grammar]

putratrayaṃ ca saṃjātaṃ pituḥ śuśrūṣaṇe ratam |
tasya putrāḥ piturbhaktā dravyādimadavarjitāḥ || 9 ||
[Analyze grammar]

pitṛvākyaratāḥ śreṣṭhāḥ svadharmācāraśobhanāḥ |
pitroḥ śuśrūṣaṇādanyannābhinaṃdaṃti kiṃcana || 10 ||
[Analyze grammar]

te sambandhaiḥ susaṃbaddhāḥ pitrā dharmārthadarśinā |
tatpatnyo mātṛpitrarcāṃ kārayaṃtyanivāritam || 11 ||
[Analyze grammar]

ṛddhimadbhavanaṃ tasya dhanadhānyasamanvitam |
so'pi dharmarato nityaṃ devatātithipūjakaḥ || 12 ||
[Analyze grammar]

gṛhāgato na vimukho yasya jātu kadācana |
śītakāle dhanaṃ prādāduṣṇakāle jalānnadaḥ || 13 ||
[Analyze grammar]

varṣā kāle vastradaśca babhūvānnapradaḥ sadā |
vāpīkūpataḍāgādiprapādevagṛhāṇi ca || 14 ||
[Analyze grammar]

kārayatyucite kāle śivaviṣṇuvratasthitaḥ |
iṣṭadharmastu varṇānāṃ samācīrṇo mahāphalaḥ || 15 ||
[Analyze grammar]

anyeṣāṃ pūrtadharmāṇāṃ teṣāṃ pūrtakaraḥ sadā |
sa babhūva dhanāḍhyopi vyasanairna samāśritaḥ || 16 ||
[Analyze grammar]

viṣṇubhaktirato nityaṃ cāturmāsye viśeṣataḥ || 18 ||
[Analyze grammar]

ekadā gālavamuniḥ śiṣyairbahubhirāvṛtaḥ || 17 ||
[Analyze grammar]

brahmajñānarataḥ śāṃtastaponiṣṭho mahāvaśī |
abhyājagāma śūdrasya gehe paijavanasya saḥ || 18 ||
[Analyze grammar]

sa vāgbhirmadhubhistasya abhyutthānāsanādibhiḥ |
upacāraiḥ punaryuktaḥ kṛtārtha iva mānayan || 19 ||
[Analyze grammar]

adya me saphalaṃ janma jātaṃ jīvitamuttamam |
adya me saphalo dharmaḥ kuśalaścoddhṛtastvayā || 20 ||
[Analyze grammar]

mama pāpasahasrāṇi dṛṣṭyā dagdhāni te mune |
gṛhaṃ mama gṛhasthasya sakalaṃ pāvitaṃ tvayā || 21 ||
[Analyze grammar]

tasya bhaktyā prasanno'bhūdgatamārgapariśramaḥ |
uvāca muniśārdūlaḥ sacchūdraṃ taṃ kṛtāṃjalim || 22 ||
[Analyze grammar]

kaccitte kuśalaṃ saumya mano dharme pravartate |
arthānubaṃdhāḥ satataṃ bandhudārasutādayaḥ || 23 ||
[Analyze grammar]

govinde satataṃ bhaktistathā dāne pravartate |
dharmārthakāma kāryeṣu saprabhāvaṃ manastava || 24 ||
[Analyze grammar]

viṣṇupādodakaṃ nityaṃ śirasā dhāryate na vā |
pādodbhavaṃ ca gaṃgodaṃ dvādaśābdaphalapradam || 25 ||
[Analyze grammar]

cāturmāsye viśeṣeṇa tatphalaṃ dviguṇaṃ bhavet |
haribhaktirharikathā haristotraṃ harernatiḥ || 26 ||
[Analyze grammar]

haridhyānaṃ hareḥ pūjā supte deve ca mokṣakṛt |
evaṃ bruvāṇaṃ sa muniṃ punarāha natiṃ gataḥ || 27 ||
[Analyze grammar]

bhavaddṛṣṭyāśramaphalametajjātaṃ na saṃśayaḥ |
tathāpi śrotumicchāmi tava vāṇīmanāmayīm || 28 ||
[Analyze grammar]

bhavādṛśānāṃ gamanaṃ sarvārtheṣu prakalpate |
tatastau sumudā yuktau saṃjātau hṛṣṭacetasau || 29 ||
[Analyze grammar]

muniṃ paijavanonāma sacchūdraḥ prāha saṃmataḥ |
kimāgamanakṛtyaṃ te kathayasva prasādataḥ || 30 ||
[Analyze grammar]

ko vā tīrthaprasaṃgaśca cāturmāsye samīpage |
gālavaḥ prāha sacchūdraṃ dhārmikaṃ satyavādinam || 31 ||
[Analyze grammar]

mama tīrthāvasiktasya māsā bahutarā gatāḥ |
idānīmāśramaṃ yāsye cāturmāsye samāgate || 32 ||
[Analyze grammar]

āṣāḍhaśuklaikādaśyāṃ kariṣye niyamaṃ gṛhe |
nārāyaṇasya prītyarthaṃ śreyo'rthaṃ cātmanastathā |
pratyuvāca munirdharmānvinayānatakandharam || 33 ||
[Analyze grammar]

paijavana uvāca |
māmanugrahajāṃ buddhiṃ brūhi tvaṃ dvijapuṃgava |
vede'dhikāro naivāsti vedasārajapasya vā || 34 ||
[Analyze grammar]

purāṇasmṛtipāṭhasya tasmātkiṃcidvadasva me |
tattvātmasadṛśaṃ kiṃcidbhāti rūpaṃ mahāphalam || 35 ||
[Analyze grammar]

cāturmāsye viśeṣeṇa muktisaṃsādhakaṃ vada || 36 ||
[Analyze grammar]

gālava uvāca |
śāligrāmagataṃ viṣṇuṃ cakrāṃkita puṭaṃ sadā |
ye'rcayanti narā nityaṃ teṣāṃ bhuktistvadūrataḥ || 37 ||
[Analyze grammar]

śāligrāme mano yasya yatkiṃcitkriyate śubham |
akṣayyaṃ tadbhavennityaṃ cāturmāsye viśeṣataḥ || 38 ||
[Analyze grammar]

śāligrāmaśilā yatra yatra dvārāvatī śilā |
ubhayoḥ saṃgamaḥ prāpto muktistasya na durlabhā || 39 ||
[Analyze grammar]

śāligrāmaśilā yasyāṃ bhūmau saṃpūjyate nṛbhiḥ |
pañcakrośaṃ punātyeṣā api pāpaśatānvitaiḥ || 40 ||
[Analyze grammar]

taijasaṃ piṃḍametaddhi brahmarūpamidaṃ śubham |
yasyāḥ saṃdarśanādeva sadyaḥ kalmaṣanāśanam || 41 ||
[Analyze grammar]

sarvatīrthāni puṇyāni devatāyatanāni ca |
nadyaḥ sarvā mahāśūdra tīrthatvaṃ prāpnuvaṃti hi || 42 ||
[Analyze grammar]

sannidhānena vai tasyāḥ kriyā sarvatraśobhanāḥ |
vrajaṃti hi kriyātvaṃ ca cāturmāsye viśeṣataḥ || 43 ||
[Analyze grammar]

pūjyate bhavane yasya śāligrāma śilā śubhā |
komalaistulasīpatrairvimukhastatra vai yamaḥ || 44 ||
[Analyze grammar]

brāhmaṇakṣatriyaviśāṃ sacchūdrāṇāmathāpi vā |
śāligrāmādhikāro'sti na cānyeṣāṃ kadācana || 45 ||
[Analyze grammar]

sacchūdra uvāca |
brahmanvedavidāṃ śreṣṭha sarvaśāstraviśārada |
strīśūdrādiniṣedho'yaṃ śāligrāme hi śrūyate || 46 ||
[Analyze grammar]

mādṛśastvaṃ kathaṃ śāligrāmapūjāvidhiṃ vada || 47 ||
[Analyze grammar]

gālava uvāca |
asacchūdragataṃ dāsa niṣedhaṃ viddhi mānada |
strīṇāmapi ca sādhvīnāṃ naivābhāvaḥ prakīrtitaḥ || 48 ||
[Analyze grammar]

mā bhūtsaṃśayastenātra nā'pnuṣe saṃśayātphalam |
śāligrāmārcanaparāḥ śuddhadehā vivekinaḥ || 49 ||
[Analyze grammar]

na te yamapuraṃ yāṃti cāturmāsye ca pūjakāḥ |
śāligrāmārpitaṃ mālyaṃ śirasā dhārayaṃti ye || 50 ||
[Analyze grammar]

teṣāṃ pāpasahasrāṇi vilayaṃ yāṃti tatkṣaṇāt |
śāligrāma śilāgre tu ye prayacchaṃti dīpakam || 51 ||
[Analyze grammar]

teṣāṃ saurapure vāsaḥ kadācinnaiva hīyate |
śāligrāmagataṃ viṣṇuṃ sumanobhirmanoharaiḥ |
ye'rcayaṃti mahāśūdra supte deve harau tathā || 52 ||
[Analyze grammar]

paṃcāmṛtena snapanaṃ ye kurvaṃti sadā narāḥ |
śāligrāmaśilāyāṃ ca na te saṃsāriṇo narāḥ || 53 ||
[Analyze grammar]

mukternidānamamalaṃ śāligrāmagataṃ harim |
hṛdi nyasya sadā bhaktyā yo dhyāyati sa muktibhāk || 54 ||
[Analyze grammar]

tulasīdalajāṃ mālāṃ śāligrāmopari nyaset |
cāturmāsye viśeṣeṇa sarvakāmānavāpnuyāt || 55 ||
[Analyze grammar]

na tāvatpuṣpajā mālā śāligrāmasya vallabhā |
sarvadā tulasī devī viṣṇornityaṃ śubhā priyā || 56 ||
[Analyze grammar]

tulasī vallabhā nityaṃ cāturmāsye viśeṣataḥ |
śāligrāmo mahāviṣṇustulasī śrīrna saṃśayaḥ || 57 ||
[Analyze grammar]

ato vāsitapānīyaiḥ snāpyaṃ caṃdanacarcitaiḥ |
maṃjarībhiryutaṃ devaṃ śālagrāmaśilāharim || 58 ||
[Analyze grammar]

tulasīsaṃbhavābhiśca kṛtvā kāmānavāpnuyāt |
patre tu prathame brahmā dvitīye bhagavāñchivaḥ || 59 ||
[Analyze grammar]

maṃjaryāṃ bhagavānviṣṇustadekasthatrayā sadā |
maṃjarī dalasaṃyuktā grāhyā budhajanaiḥ śubhā || 60 ||
[Analyze grammar]

tāṃ nivedya gurau bhaktyā janmādikṣayakāraṇam |
śāligrāme dhūparāśiṃ nivedya haritatparaḥ || 61 ||
[Analyze grammar]

cāturmāsye viśeṣeṇa manuṣyo naiva nārakī |
śāligrāmaṃ naro dṛṣṭvā pūjitaṃ kusumaiḥ śubhaiḥ || 62 ||
[Analyze grammar]

sarvapāpaviśuddhātmā yāti tanmayatāṃ harau |
ya stautyaśmagataṃ viṣṇuṃ gaṃḍakījalasaṃbhavam || 63 ||
[Analyze grammar]

śrutismṛtipurāṇaiśca so'pi viṣṇupadaṃ vrajet |
śāligrāmaśilāyāśca caturviṃśatisaṃkhyakāḥ |
bhedāḥ saṃti mahāśūdra tāñchṛṇuṣva mahāmate || 64 ||
[Analyze grammar]

imāḥ pūjyāśca loke'tra caturviṃśatisaṃkhyakāḥ |
tāsāṃ ca daivataṃ viṣṇuṃ nāmāni ca vadāmyaham || 65 ||
[Analyze grammar]

sa eva mūrttaścaturuttarāsirviṃśadbhireko bhagavānyathā'dyaḥ |
sa eva saṃvatsaranāmasaṃjñaḥ sa eva grāvāgata ādidevaḥ || 66 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetra māhātmye śeṣaśāyyupākhyāne brahmanāradasaṃvāde cāturmāsyamāhātmye paijavanopākhyāne śāligrāmapūjanamāhātmyavarṇanaṃnāma tricatvāriṃśatyuttaradviśatatamo'dhyāyaḥ || 243 ||
[Analyze grammar]