Chapter 200

[English text for this chapter is available]

viśvāmitra uvāca |
tataḥ prabhāte saṃjāte prodgate ravimaṇḍale |
sā cāpi duhitā tasya dīkṣitasya mahātmanaḥ || 1 ||
[Analyze grammar]

rorūyamāṇā'bhyagamatpitaraṃ mātaraṃ prati |
provāca gadgadaṃ vākyaṃ bāṣpavyākulalocanā || 2 ||
[Analyze grammar]

tātāmba kimidaṃ pāpaṃ yuvābhyāṃ samanuṣṭhitam |
antyajasya pradattā'haṃ yatpāpasya durātmanaḥ || 3 ||
[Analyze grammar]

sa naṣṭo rajanīvaktre mamāvedya nijaṃ kulam |
tasmādahaṃ pravekṣyāmi pradīpte havyavāhane || 4 ||
[Analyze grammar]

tasyāstadvacanaṃ śrutvā dīkṣitaḥ sa subhadrakaḥ |
niśceṣṭaḥ patito bhūmau vātabhagna iva drumaḥ || 5 ||
[Analyze grammar]

tataḥ sa śītatoyena saṃsiktaśca punaḥpunaḥ |
labdhvāśu cetanāṃ kṛcchrātsvajanaiḥ parivāritaḥ |
pralāpānvividhāṃścakre tāḍayansvaśiro muhuḥ || 6 ||
[Analyze grammar]

atha te brāhmaṇāḥ sarve tasya saṃparkadūṣitāḥ |
bhartṛyajñaṃ samāsādya tenaiva sahitāstataḥ || 7 ||
[Analyze grammar]

procurvinayasaṃyuktāḥ proccaistatsutayā saha |
subhadreṇa nije harmye sutāṃ dattvā niveśitaḥ || 8 ||
[Analyze grammar]

caṇḍālo dvijarūpotra caṃdraprabha iti smṛtaḥ || 9 ||
[Analyze grammar]

yāvatsaṃvatsaraṃ sārdhaṃ daive pitrye ca yojitaḥ |
pāpakarmā na vijñātaḥ so'dhunā prakaṭo'bhavat || 10 ||
[Analyze grammar]

subhadrasyānuṣaṃgeṇa sthānaṃ sarvaṃ pradūṣitam |
antyajena mahābhāga tatkuruṣva vinigraham || 11 ||
[Analyze grammar]

kaiścittasya gṛhe bhuktaṃ jalaṃ pītaṃ tathā paraiḥ |
anyaiśca gṛhamānīya pradattaṃ bhojanaṃ tathā || 12 ||
[Analyze grammar]

kiṃ vā te bahunoktena na sa ko'sti dvijottama |
saṃkaro yasya no jātastasya pāpasya saṃbhavaḥ || 13 ||
[Analyze grammar]

tvayā sthānamidaṃ puṇyaṃ kṛtaṃ pūrvaṃ mahāmate |
sarveṣāṃ ca gurustvaṃ hi tasmācchuddhiṃ vadasva naḥ || 14 ||
[Analyze grammar]

tataḥ saṃcintya suciraṃ smṛtiśāstrāṇyanekaśaḥ |
prāyaścittaṃ dadau teṣāṃ sarveṣāṃ sa dvijanmanām || 15 ||
[Analyze grammar]

cāṃdrāyaṇaśataṃ prādātsubhadrāyāhitāgnaye |
sarvabhaṃḍaparityāgaṃ punarādhānameva ca || 16 ||
[Analyze grammar]

lakṣahomavidhānaṃ ca gṛhamadhyaviśuddhaye |
vahnipraveśanaṃ tasyāstatsutāyāḥ prakīrtitam || 17 ||
[Analyze grammar]

yena yāvaṃti bhojyāni tasya bhuktāni maṃdire |
tasya tāvaṃti kṛcchrāṇi tenoktāni mahātmanā || 18 ||
[Analyze grammar]

yairjalāni prapītāni yāvanmātrāṇi tadgṛhe |
prājāpatyāni dattāni tebhyastāvaṃti pārthiva || 19 ||
[Analyze grammar]

brāhmaṇānāṃ tathānyeṣāṃ tatra sthāne nivāsinām |
tatsparśadūṣitānāṃ ca prājāpatyaṃ pṛthakpṛthak || 20 ||
[Analyze grammar]

strīśūdrāṇāṃ tadardhaṃ ca tadardha bālavṛddhayoḥ |
mṛnmayānāṃ ca bhāṃḍānāṃ parityāgo niveditaḥ || 21 ||
[Analyze grammar]

sarveṣāmeva lokānāṃ rasatyāgastathaiva ca |
koṭihomastu nirdiṣṭo brahmasthāne yathoditaḥ |
sarvasthānaviśuddhyarthaṃ sthānavittena kevalam || 22 ||
[Analyze grammar]

athovāca punarviprānsa kṛtvā cocchritaṃ bhujama |
tāranādena mahatā sarvāṃstānnāgarodbhavān || 23 ||
[Analyze grammar]

subhadreṇa ca sarvasvaṃ deyaṃ viprebhya eva ca |
caturthāṃśaśca yairbhuktaṃ tadgṛhe svadhanasya ca || 24 ||
[Analyze grammar]

aṣṭāṃśaṃ yairjalaṃ pītaṃ godānaṃ sparśasaṃbhavam |
śeṣāṇāmapi lokānāṃ yathāśaktyā tu dakṣiṇā || 25 ||
[Analyze grammar]

dīkṣitena japaḥ kāryo lakṣagāyatrisaṃbhavaḥ |
śeṣairviprairyathā vittaṃ tathā kāryo japo'khilaḥ || 26 ||
[Analyze grammar]

ahaṃ caiva kariṣyāmi prāṇāyāmaśatatrayam |
nityameva dvijaśreṣṭhāḥ ṣaṣṭhakālakṛtāśanaḥ || 27 ||
[Analyze grammar]

yāvatsaṃvatsarasyāṃtaṃ tataḥ śuddhirbhaviṣyati |
jana saṃparkasaṃjātā saivaṃ tasya durātmanaḥ || 28 ||
[Analyze grammar]

evamuktvā tato bhūyaḥ sa provāca dvijottamān |
athā'dyānmadhyagāsyena brahmasthānasamāśrayān || 29 ||
[Analyze grammar]

adyaprabhṛti yaḥ kanyāmaviditvā tu nāgaram |
nāgaro dāsyati kvāpi patitaḥ sa bhaviṣyati || 30 ||
[Analyze grammar]

aśrāddheyo hyapāṃkteyo nāgarāṇāṃ viśeṣataḥ || 31 ||
[Analyze grammar]

yaḥ śrāddhaṃ nāgaraṃ muktvā hyanyasmai saṃpradāsyati |
vimukhāstasya yāsyaṃti pitaro vibudhaiḥ saha || 32 ||
[Analyze grammar]

nāgareṇa vinā yastu somapānaṃ kariṣyati |
sa kariṣyatyasaṃdigdhaṃ madyapānaṃ tu nāgaraḥ |
tanmatena vinā yastu śrāddhakarma kariṣyati || 33 ||
[Analyze grammar]

tataḥ sarvaṃ vṛthā tasya bhaviṣyati na saṃśayaḥ |
viśuddhirahitaṃ yastu nāgaraṃ bhojayiṣyati || 34 ||
[Analyze grammar]

śrāddhe tasyāpi tatsarvaṃ vyarthatāṃ saṃprayāsyati |
sarveṣāṃ nāgarāṇāṃ ca maryādeyaṃ kṛtā mayā || 35 ||
[Analyze grammar]

tasmātsarvaprayatnena śuddhiḥ kāryā dvijottamaiḥ |
varṣevarṣe tu saṃprāpte svasthānasya viśuddhaye || 36 ||
[Analyze grammar]

viśvāmitra uvāca |
etatte sarvamākhyātaṃ yatpṛṣṭo'smi nṛpottama |
śrāddhārhā nāgarā yena nāgarāṇāṃ vyavasthitāḥ |
bhartṛyajñena maryādā kṛtā teṣāṃ yathā purā || 37 ||
[Analyze grammar]