Chapter 187

[English text for this chapter is available]

sūta uvāca |
caturthe divase prāpte tato yajñasamudbhave |
ṛtvigbhiryājñikaṃ karma prārabdhaṃ tadanaṃtaram || 1 ||
[Analyze grammar]

somapānādikaṃ sarvaṃ paśorhiṃsādikaṃ tathā |
paśorgudaṃ samādāya prasthātā ca vyadhārayat || 2 ||
[Analyze grammar]

ekāṃte sadaso madhye homārthaṃ dvijasattamāḥ |
tasminvyākulatāṃ yāte brāhmaṇaḥ kaścidāgataḥ || 3 ||
[Analyze grammar]

yuvā tatra praviṣṭastu māṃsa bhakṣaṇalālasaḥ |
tato gudaṃ paśordṛṣṭvā bhakṣayāmāsa cotsukaṃ || 4 ||
[Analyze grammar]

etasminnaṃtare prāptaḥ prasthātā tasya saṃnidhau |
bhakṣamāṇaṃ samālokya taṃ śaśāpa tataḥ param || 5 ||
[Analyze grammar]

dhigdhikpāpasamācāra homārthaṃ yadgudaṃ dhṛtam |
tattvayā dūṣitaṃ laulyādyajñavighnakaraṃ kṛtam || 6 ||
[Analyze grammar]

ucchiṣṭena mayā homaḥ kartavyo naiva sāṃpratam |
rākṣasānāmidaṃ karma yattvayā samanuṣṭhitam || 7 ||
[Analyze grammar]

tasmāttvaṃ mama vākyena rākṣaso bhava mā ciram || 8 ||
[Analyze grammar]

etasminneva kāle tu hyūrdhvakeśo'bhavaddhi saḥ |
raktākṣaḥ śaṃkukarṇaśca kṛṣṇadanto'tibhairavaḥ || 9 ||
[Analyze grammar]

lamboṣṭho vikarālāsyo māṃsamedovivarjitaḥ |
tvagasthisnāyuśeṣaśca |cāmuṇḍākṛtireva ca || 10 ||
[Analyze grammar]

sa ca viśvāvasurnāma pulastyasya suto muniḥ |
maṃtrapūtasya māṃsasya bhakṣaṇārthaṃ samāgataḥ || 11 ||
[Analyze grammar]

vedavedāṃgatattvajaḥ pautrastu parameṣṭhinaḥ |
taṃ dṛṣṭvā rākṣasākāraṃ vitresuḥ sarvato dvijāḥ || 12 ||
[Analyze grammar]

rākṣoghnāni ca sūktāni jajapuścāpare tathā |
keciccharaṇamāpannā viṣṇo rudrasya cāpare || 13 ||
[Analyze grammar]

pitāmahasya cānye tu gāyatryāḥ śaraṇaṃ gatāḥ |
rakṣarakṣeti jalpanto bhayasaṃtrastamānasāḥ || 14 ||
[Analyze grammar]

so'pi dṛṣṭvā tadātmānaṃ gataṃ rākṣasatāṃ dvijāḥ |
bāṣpapūrṇekṣaṇo dīnaḥ pitāmahamupādravat || 15 ||
[Analyze grammar]

sa praṇamya tato vākyaṃ kṛtāṃjaliruvāca tam || 16 ||
[Analyze grammar]

pautro'haṃ tava deveśa pulastyasya suto dvijaḥ |
nīto rākṣasatāmadya prasthātrā kopato vibho || 17 ||
[Analyze grammar]

jihvālaulyena deveśa paśorgudamajānatā |
bhakṣitaṃ tanmayā deva homārthaṃ yatprakalpitam || 18 ||
[Analyze grammar]

tasmānmānuṣatāprāptyai mama dehe dayāṃ kuru |
rākṣasatvaṃ yathā yāti tathā nītirvidhīyatām || 19 ||
[Analyze grammar]

tacchrutvā jalpitaṃ tasya dayāṃ kṛtvā pitāmahaḥ |
pratiprasthātaraṃ sāmavākyametaduvāca ha || 20 ||
[Analyze grammar]

bālo'yaṃ mama pautrastu kṛtyākṛtyaṃ na vetti ca |
tasmāttvaṃ rākṣasaṃ bhāvaṃ harasvāsya dvijottama || 21 ||
[Analyze grammar]

tacchrutvā sa muniḥ prāha prāyaścittaṃ makhe tava |
anena janitaṃ deva gudaṃ dūṣayatā vibho || 22 ||
[Analyze grammar]

tasmādeṣa mayā śapto yajñavighnakaro mama |
nāhamasya hariṣyāmi rākṣasatvaṃ kathaṃcana || 23 ||
[Analyze grammar]

narmaṇāpi mayā proktaṃ kadācinnānṛtaṃ vacaḥ || 24 ||
[Analyze grammar]

brahmovāca |
prāyaścittaṃ kariṣye'haṃ yajñasyāsya prasiddhaye |
dakṣiṇā gauryathoktā ca kṛtvā homaṃ vidhānataḥ |
tvamasya rākṣasaṃ bhāvaṃ harasva mama vākyataḥ || 25 ||
[Analyze grammar]

so'bravīcchītalo vahniryadi syāduṣṇaguḥ śaśī |
tanme syādanyathā vākyaṃ vyāhṛtaṃ prapitāmaha || 26 ||
[Analyze grammar]

tasya tadvacanaṃ śrutvā jñātvā caiva tu niścitam |
viśvāvasuṃ vidhiḥ prāha tato rākṣasarūpiṇam || 27 ||
[Analyze grammar]

tvaṃ vatsānena rūpeṇa tiṣṭha tāvadvaco mama |
kuruṣva te prayacchāmi yena sthānamanuttamam || 28 ||
[Analyze grammar]

camatkārapurasyāsya paścimasthānamāśritāḥ |
santyanye rākṣasāstatra maryādāyāṃ vyavasthitāḥ || 29 ||
[Analyze grammar]

laṃkāyāṃ rākṣasāścaiva prārthayanto'tra sadgatim |
te cāgatya tamuddeśaṃ tapaḥ kurvaṃti suvratāḥ || 3 ||
[Analyze grammar]

tatra prabhutvamātiṣṭha nāgarāṇāṃ hite sthitaḥ |
rākṣasā bahavaḥ saṃti kūṣmāṃḍāśca piśācakāḥ || 31 ||
[Analyze grammar]

ye cānye rākṣasāḥ kecidduṣṭabhāvasamāśritāḥ |
tatra gacchaṃti ye sarve nigṛhṇaṃti ca tatkṣaṇāt || 32 ||
[Analyze grammar]

bhūtāḥ pretāḥ piśācāśca kūṣmāṃḍāśca viśeṣataḥ |
nāgaraṃ tu puro dṛṣṭvā tadbhayādyāṃti dūrataḥ || 33 ||
[Analyze grammar]

tadgaccha putra tatra tvaṃ sarveṣāmadhipo bhava |
rākṣasānāṃ mayā dattaṃ tava rājyaṃ ca sāṃpratam || 34 ||
[Analyze grammar]

rākṣasa uvāca |
ādhipatye sthitasyaivaṃ rākṣasānāṃ pitāmaha |
kiṃ mayā tatra bhoktavyaṃ tebhyo deyaṃ ca kiṃ vada || 35 ||
[Analyze grammar]

rājñā caiva yato deyaṃ bhṛtyānāṃ bhojanaṃ vibho |
tanmamācakṣva deveśa dayāṃ kṛtvā mamopari || 36 ||
[Analyze grammar]

na karoti ca yo rājā |bhṛtyavargasya poṣaṇam |
rauravaṃ narakaṃ yāti sa evaṃ hi śrutaṃ mayā || 37 ||
[Analyze grammar]

brahmovāca |
yacchrāddhaṃ dakṣiṇāhīnaṃ tilairdarbhairvivarjitam |
tatsarvaṃ te mayā dattaṃ yadyapi syātsutīrthagam || 38 ||
[Analyze grammar]

yacchrāddhaṃ sūkaraḥ paśyennārī vātha rajasvalā |
kauleyako'tha vāleyastatsarvaṃ te bhaviṣyati || 39 ||
[Analyze grammar]

vidhihīnaṃ tu yacchrāddhaṃ darbhervā mūlavarjitaiḥ |
vitasteradhikairvāpi tatsarvaṃ te bhaviṣyati || 40 ||
[Analyze grammar]

tilaṃ vā tailapakvaṃ vā śūkadhānyamathāpi vā |
na yatra dīyate śrāddhe tatte śrāddhaṃ bhaviṣyati || 41 ||
[Analyze grammar]

asnātairyatkṛtaṃ śrāddhaṃ yaccādhautāṃbaraiḥ kṛtam |
tailābhyaṃgayutaiścaiva tatte sarvaṃ bhaviṣyati || 42 ||
[Analyze grammar]

yadvā māhiṣiko bhuṃkte śvitrī vā kunakho'pi vā |
kuṣṭhī vātha dvijo bhuṃkte tatte śrāddhaṃ bhaviṣyati || 43 ||
[Analyze grammar]

hīnāṃgo vā'tha yadbhuṃkte'dhikāṃgo vātha niṃditaḥ |
mahāvyādhigṛhīto vā cauro vārddhuṣiko'pi vā |
yatra bhuṃkte'thavā śrāddhe tatte śrāddhaṃ bhaviṣyati || 44 ||
[Analyze grammar]

śyāvadantastu yadbhuṃkte yadbhuṃkte vṛṣalīpatiḥ |
vinagno vātha yadbhuṃkte tatte śrāddhaṃ bhaviṣyati || 45 ||
[Analyze grammar]

yo yajño dakṣiṇāhīno yaścāśaucayutaiḥ kṛtaḥ |
brahmacaryavihīnastu tatphalaṃ te bhaviṣyati || 46 ||
[Analyze grammar]

yasminnaivātithiḥ pūjyaḥ śrāddhe vā yajñakarmaṇi |
saṃprāpte vaiśvadevāṃte tatte sarvaṃ bhaviṣyati || 47 || || 1 ||
[Analyze grammar]

āvāhanātparaṃ yatra maunaṃ na śrāddhadaścaret |
brāhmaṇo vā'tha bhoktā ca tatte śrāddhaṃ bhaviṣyati || 48 ||
[Analyze grammar]

mṛnmayeṣu ca pātreṣu yaḥ śrāddhaṃ kurute naraḥ |
bhinnapātreṣu vā yacca tatte sarvaṃ bhaviṣyati || 49 ||
[Analyze grammar]

pratyakṣalavaṇaṃ yatra takraṃ vā vikṛtaṃ bhavet |
jātīpuṣpapradānaṃ ca tatte sarvaṃ bhaviṣyati || 50 ||
[Analyze grammar]

yajamāno dvijo vātha brahmacaryavivarjitaḥ |
tacchrāddhaṃ te mayā dattaṃ tripātreṇa vivarjitam || 51 ||
[Analyze grammar]

āyasena tu pātreṇa yatrānnaṃ ca pradīyate |
tacchrāddhaṃ te mayā dattaṃ tathānyadapi hīyate || 52 ||
[Analyze grammar]

maṃtrakriyābhyāṃ yatkicidrātrau dattaṃ hutaṃ tathā |
sakrāṃtisomaparvabhyāṃ vyati riktaṃ tu kutsitam || 53 ||
[Analyze grammar]

ityuktvā virarāmāśu brahmā lokapitāmahaḥ |
rākṣasaḥ so'pi tatrāpi lebhe sthānaṃ tu rākṣasam || 54 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭha nāgarakhaṇḍe hāṭakeśvarakṣetramāhātmye rākṣasaprāpyaśrāddhavarṇanaṃnāma saptāśītyuttaraśatatamo'dhyāyaḥ || 187 ||
[Analyze grammar]