Chapter 180

[English text for this chapter is available]

ṛṣaya ūcuḥ |
atyadbhutamidaṃ sūta yattvayā samudāhṛtam |
brahmaṇā yatkṛto yajñastatra kṣetre mahātmanā || 1 ||
[Analyze grammar]

agniṣṭomādayo yajñā ye vartante dharātale |
yaṣṭavyasteṣu yajñeṣu sa eva hi sureśvaraḥ || 2 ||
[Analyze grammar]

tenaiva yajatā tatra ko hīṣṭaḥ prabravīhi naḥ |
ṛtvijaḥ ke sthitāstatra yaistatkarma makhodbhavam |
tatpratyakṣe kṛtaṃ sarvametannaḥ kautukaṃ param || 3 ||
[Analyze grammar]

kā caiva dakṣiṇā dattā tena teṣāṃ dvijanmanām |
ko'dhvaryurvihitastatra yena tadyajanaṃ kṛtam || 4 ||
[Analyze grammar]

ko hotā kaśca vā'gnīdhraḥ ko brahmā tatra saṃsthitaḥ |
udgātā kaḥ sthitastatra hyācāryo yajñakarmaṇi || 5 ||
[Analyze grammar]

sūta uvāca |
ahaṃ vaḥ kīrtayiṣyāmi sarvaṃ yajñasya saṃbhavam |
vṛttāṃtaṃ yacca tatrastha māścaryaṃ dvijapuṃgavāḥ || 6 ||
[Analyze grammar]

ye sadasyāḥ sthitāstatra ṛtvijaśca dvijottamāḥ |
dakṣiṇā yāḥ pradattāśca tebhyastena mahātmanā || 7 ||
[Analyze grammar]

yajatā devadevena brahmaṇā'mitatejasā |
yajñakāmaṃ caturvaktraṃ jñātvā devaḥ śatakratuḥ || 8 ||
[Analyze grammar]

sarvaiḥ suragaṇaiḥ sārdhaṃ sāhāyyārthamupāgataḥ |
tathā ca bhagavāñchaṃbhuḥ sarvadevagaṇaiḥ saha || 9 ||
[Analyze grammar]

tāndṛṣṭvā'bhyāgatānbrahmā martyadharmasamāśritān |
provāca vinayopetaḥ kṛtāṃjalipuṭaḥ sthitaḥ || 10 ||
[Analyze grammar]

svāgataṃ vaḥ suraśreṣṭhāḥ prasādaḥ kriyatāṃ mama |
niviśyatāṃ yathānyāyaṃ sthāneṣu rucireṣu ca || 11 ||
[Analyze grammar]

dhanyo'smyanugṛhīto'smi yadyūyaṃ svayamāgatāḥ |
maṃtrāhūtā yathā kṛcchrātsarvasatreṣu gacchatha || 12 ||
[Analyze grammar]

devā ūcuḥ |
yena yaccātra kartavyaṃ tacchīghraṃ vada padmaja |
yajñe tava mahābhāga tasya tattvaṃ samādiśa || 13 ||
[Analyze grammar]

brahmovāca |
viśvakarmandrutaṃ gaccha yajñamaṇḍapasiddhaye |
patnīśālāṃ tataścaiva yajñavedīstathaiva ca || 14 ||
[Analyze grammar]

kuṇḍāni caiva sarvāṇi yathāsthāneṣu kāraya |
yajñapātrāṇi sarvāṇi grahāśca camasāstathā || 15 ||
[Analyze grammar]

yūpāśca yatpramāṇena kartavyāḥ sacaṣālakāḥ |
pacanārthaṃ tathā gartāḥ kartavyā yatpramāṇataḥ || 16 ||
[Analyze grammar]

iṣṭikānāṃ sahasrāṇi daśa cāṣṭaśatāni ca |
kartavyāni tvayā śīghraṃ cayanānīti satvaram || 17 ||
[Analyze grammar]

tathā hiraṇmayaścāpi puruṣaḥ kārya eva hi |
tathetyuktā tatastvaṣṭā śīghrācchīghrataraṃ yayau || 18 ||
[Analyze grammar]

tatastu padmajaḥ prāha devācāryaṃ bṛha spatim |
bṛhaspate tvamānīhi yajñārhānṛtvijo'khilān || 19 ||
[Analyze grammar]

yāvatṣoḍaśasaṃkhyāśca nānyasyaitaddhi yujyate |
tvayā śakra sadā kāryā śuśrūṣā ca dvijanmanām || 20 ||
[Analyze grammar]

hastapādāvamarddaśca śrāṃtānāṃ pṛṣṭhamarddanam |
dhanādhyakṣa tvayā deyā dakṣiṇā kālasaṃbhavā || 21 ||
[Analyze grammar]

suvastrāṇi hiraṇyaṃ ca tathānyadvāpi vāṃchitam |
tvayā viṣṇo sadā kāryaṃ kṛtyākṛtyaparīkṣaṇam || 22 ||
[Analyze grammar]

yuktaṃ kṛtamatho naiva sāvadhānena sarvadā |
lokapālāśca ye sarve rakṣaṃtu sakalā diśaḥ |
bhūtapretapiśācānāṃ praveśaṃ rākṣasodbhavam || 23 ||
[Analyze grammar]

yo yaṃ kāmayate kāmaṃ kiṃcidvastraṃ dhanaṃ ca vā |
vicārya tasya taddeyaṃ sarvayajñādhipena tu || 24 ||
[Analyze grammar]

ādityā vasavo rudrā viśvedevā marudgaṇāḥ |
bhavaṃtu pariveṣṭāro bhoktukāmajanasya ca || 25 ||
[Analyze grammar]

etasminnaṃtare prāpto viśvakarmā tvarānvitaḥ |
abravītpaṃkajabhavaṃ saṃsiddho yajñamaṇḍapaḥ || 26 ||
[Analyze grammar]

sarvamanyatsamādiṣṭaṃ yattvayoktaṃ caturmukha || 27 ||
[Analyze grammar]

tato bṛhaspatiḥ prāha samabhyetya pitāmaham |
samānītā mayā deva brāhmaṇā yajñakarmaṇi || 28 ||
[Analyze grammar]

viprāḥ ṣoḍaśasaṃkhyāśca ṛtvikkarmaṇi yojaya |
svayaṃ parīkṣya deveśa yajñakarmaprasiddhaye || 29 ||
[Analyze grammar]

tato brahmā svayaṃ dṛṣṭvā tānparīkṣya prayatnataḥ |
ṛtviktve ca niyojyātha tataścakre tadarhaṇam || 30 ||
[Analyze grammar]

ṛṣaya ūcuḥ |
ṛtvijāṃ caiva sarveṣāṃ sūta nāmāni kīrtaya |
yena yo vihitastatra padārthaḥ sūta taṃ vada || 31 ||
[Analyze grammar]

sūta uvāca |
bhṛgurhautre tatastena vṛto brāhmaṇasattamāḥ |
maitrāvaruṇasaṃjñastu tathaiva cyavano muniḥ || 32 ||
[Analyze grammar]

acchāvāko marīciśca grāvastudgālavo muniḥ |
pulastyaśca tathā 'dhvaryuḥ prasthātātriśca saṃsthitaḥ || 33 ||
[Analyze grammar]

tatra raibhyo munirneṣṭā tatronnetā sanātanaḥ |
brahmā ca nārado gargo brāhmaṇācchaṃsireva ca || 34 ||
[Analyze grammar]

āgnīdhraśca bharadvājo hotā pārāśarastathā |
tathaiva tatra kṣetre ca udgātā gobhilo muniḥ || 35 ||
[Analyze grammar]

tathaiva kauthumo jajñe prastautā yajñakarmaṇi |
śāṃḍilyaḥ pratiharttā ca subrahmaṇyastathāṃgirāḥ || 36 ||
[Analyze grammar]

tasya yajñasya siddhyarthamityete ṣoḍaśartvijaḥ |
vastrābharaṇaśobhāḍhyā vinayena kṛtāśca te || 37 ||
[Analyze grammar]

tataḥ kṛtvā svayaṃ brahmā sarveṣāmarhaṇakriyām |
gṛhyoktena vidhānena tataḥ provāca sādaram || 38 ||
[Analyze grammar]

eṣo'ha śaraṇaṃ prāpto yuṣmākaṃ dvijasattamāḥ |
anugṛhṇīta māṃ sarve dīkṣāyai yajñakarmaṇaḥ || 39 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe brahmayajñopākhyāne yajñamaṇḍa paprāptabrāhmaṇasatkārapūrvakartvigādisthānayojanāpūrvakādhvarakarmāraṃbhonāmāśītyuttaraśatatamo'dhyāyaḥ || 180 ||
[Analyze grammar]