Chapter 163

[English text for this chapter is available]

sūta uvāca |
atha te nāgarāḥ sarve dṛṣṭvā tadvittabhājanam |
na kenāpi grahītavyaṃ sarvānkāmānnirasya ca || 1 ||
[Analyze grammar]

tataste samayaṃ kṛtvā samānīya ca madhyagam |
tasyāsyena tataḥ procurbrahmasthāne vyavasthi tāḥ || 2 ||
[Analyze grammar]

anena lobhayuktena tiraskṛtya dvijottamān |
puṣpavittamupādāya prāyaścittaṃ prakīrtitam || 3 ||
[Analyze grammar]

tathā caiva tu ṣaḍbhāgo gṛhīto vibhavasya ca |
tasmādeṣa samastānāṃ bāhyabhūto bhaviṣyati || 4 ||
[Analyze grammar]

nāgarāṇāṃ dvijedrāṇāṃ yathānyaḥ prākṛtastathā || 5 ||
[Analyze grammar]

adyaprabhṛti cānena yaḥ saṃbaṃdhaṃ kariṣyati |
so'pi bāhyastu sarveṣāṃ nāgarāṇāṃ bhaviṣyati || 6 ||
[Analyze grammar]

bhojanaṃ vātha pānīyaṃ yo'sya sadmani karhicit |
kariṣyati sa cā'pyevaṃ patitaḥ saṃbhaviṣyati || 7 ||
[Analyze grammar]

evamuktvā tatastena dattaṃ tālatrayaṃ dvijāḥ |
brahmasthāne dvijaśreṣṭhāḥ kṛtvā puṣpasamaṃ ca tam || 8 ||
[Analyze grammar]

atha te brāhmaṇāḥ sarve jagmuḥ svaṃsvaṃ niveśanam |
caṃḍaśarmā sa codvignaḥ puṣpapārśvaṃ tadā gataḥ || 9 ||
[Analyze grammar]

eteṣāmeva sarveṣāṃ saṃmatena mayā tava |
prāyaścittaṃ tadā dattaṃ tathā pi patitaḥ kṛtaḥ || 10 ||
[Analyze grammar]

tasmādahaṃ patiṣyāmi susamiddhe hutāśane |
naiva jīvitumicchāmi svajanaiḥ parivarjitaḥ || 11 ||
[Analyze grammar]

puṣpa uvāca |
na viṣādastvayā kāryaḥ kārye'smidvijasattama |
vittārthaṃ dūṣitastvaṃhi yato brāhmaṇasattamaiḥ || 12 ||
[Analyze grammar]

nāgarāṃstoṣayiṣyāmi tānahaṃ vividhairdhanaiḥ |
yācayiṣyaṃti yanmātraṃ tava gātraviśuddhaye || 13 ||
[Analyze grammar]

tāvanmātraṃ pradāsyāmi tebhyo hi tava kāraṇāt |
evamuktvā samāgatya brahmasthānaṃ tvarānvitaḥ || 14 ||
[Analyze grammar]

cātuścaraṇamānīya madhyagāsyena so'bravīt |
caṃḍaśarmā dvijo yaśca madarthe patitaḥ kṛtaḥ || 15 ||
[Analyze grammar]

yuṣmābhirvittalobhena tadvittaṃ vo dadāmyaham |
samastaṃ madgṛhe yacca kriyatāṃ vacanaṃ dvijaiḥ || 16 ||
[Analyze grammar]

atha te kupitāḥ procuḥ sarva eva dvijottamāḥ |
sītkārānvividhānkṛtvā krodha saṃraktalocanāḥ || 17 ||
[Analyze grammar]

dhigdhikpāpasamācāra jihvā te śatadhā tataḥ |
kiṃ na yāti yadevaṃ tvaṃ prajalpasi vigarhitam || 18 ||
[Analyze grammar]

patito'yaṃ kṛto 'smābhirnaiva vittasya kāraṇāt |
prāyaścittaṃ yato dattamekenāpi durātmanā || 19 ||
[Analyze grammar]

smṛtayo dūṣitāstena purāṇāni viśeṣataḥ |
sthānaṃ caivāsma dīyaṃ ca karma caitatprakurvatā || 20 ||
[Analyze grammar]

prāyaścittaṃ pradātavyaṃ caturbhiraparaiḥ saha |
saṃmantrya manunā proktametadeva dvijottamāḥ || 21 ||
[Analyze grammar]

tvadīyaṃ pātakaṃ cāsya śarīre'dya vyavasthitam |
ekākinā yato dattaṃ tenāyaṃ patitaḥ sthitaḥ || 22 ||
[Analyze grammar]

sūta uvāca |
evamuktvā dvijāḥ sarve jagmuḥ svaṃsvaṃ niketanam |
puṣpopi ca samudvigno vailakṣyaṃ paramaṃ gataḥ || 23 ||
[Analyze grammar]

jagāmātha nijāvāsaṃ niḥśvasannurago yathā || 24 ||
[Analyze grammar]

tataḥ sa cintayāmāsa yāvanno sāhasaṃ kṛtam |
tāvatsiddhirmanuṣyāṇāṃ na kathaṃcitprajāyate || 25 ||
[Analyze grammar]

tasmādahaṃ kariṣyāmi caṇḍaśarmakṛte mahat |
kṛtaghnatā yathā na syātproktaṃ caiva yato budhaiḥ || 26 ||
[Analyze grammar]

brahmaghne ca surāpe ca caure bhagnavrate tathā |
niṣkṛtirvihitā sadbhiḥ kṛtaghne nāsti niṣkṛtiḥ || 27 ||
[Analyze grammar]

evaṃ niścitya manasā sūryavāreṇa saptamī |
yadā'yātā dvijaśreṣṭhāstadā cāṣṭottaraṃ śatam || 28 ||
[Analyze grammar]

pradakṣiṇāḥ kṛtāstena puṣpādityasya dhīmatā |
tīkṣṇaṃ śastraṃ samādāya pūrvoktavidhinā tataḥ |
chittvāchittvā nijāṃgāni juhuyājjātavedasi || 29 ||
[Analyze grammar]

tataḥ pūrṇāhutiṃ yāvatkāyaśeṣeṇa yacchati |
tāvatpratyakṣatāṃ gatvā sa prokto bhāsvatā svayam || 30 ||
[Analyze grammar]

puṣpa mā sāhasaṃ kārṣīḥ parituṣṭo'smi te'nagha |
bhūya eva mahābhāga brūhi kiṃ te dadāmyaham || 31 ||
[Analyze grammar]

puṣpa uvāca |
caṇḍaśarmā dvijendro'yaṃ madarthe patitaḥ kṛtaḥ |
samastairnāgarairdeva taṃ tairnaya samānatām || 32 ||
[Analyze grammar]

śāstraṃ dṛṣṭvā pradattaṃ me prāyaścittaṃ mahātmanā |
tathāpi dūṣitaḥ kṣudraiḥ samastairasahiṣṇubhiḥ || 33 ||
[Analyze grammar]

bhagavānuvāca |
ekasyāpi vaco naiva śakyate kartumanyathā |
nāgarasya dvijaśreṣṭha samastānāṃ ca kiṃ punaḥ || 34 ||
[Analyze grammar]

parameṣa dvijaḥ pūtaścaṃḍaśarmā bhaviṣyati |
brāhmo'yaṃ nāgaraḥ khyātaḥ samaste dharaṇītale || 35 ||
[Analyze grammar]

etasya ye sutāścaiva bhaviṣyaṃti dharātale |
vikhyātiṃ te'pi yāsyaṃti mānyāḥ pūjyā mahībhṛtām || 36 ||
[Analyze grammar]

ye cāpi bāṃdhavā ścāsya suhṛdaśca samāgamam |
kariṣyaṃti samaṃ te'pi bhaviṣyaṃti suśobhanāḥ || 37 ||
[Analyze grammar]

tvaṃ cāpi matprasādena saṃpūrṇāṃgo bhaviṣyasi || 38 ||
[Analyze grammar]

evamuktvā sahasrāṃśustataścādarśanaṃ gataḥ |
puṣpo'pi cākṣatāṃgatvaṃ tatkṣaṇātsamapadyata || 39 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgararakhaṇḍe hāṭakeśvarakṣetramāhātmye brāhmanāgarotpattivṛttāṃtavarṇanaṃnāma triṣaṣṭyuttaraśatatamo'dhyāyaḥ || 163 ||
[Analyze grammar]