Chapter 162

[English text for this chapter is available]

sūta uvāca |
evaṃ nāmni kṛte tasya bhāskarasyāṃśumālinaḥ |
dvijānāṃ purataḥ puṣpaḥ kathayāmāsa ceṣṭitam || 1 ||
[Analyze grammar]

ātmīyaṃ kutsitaṃ teṣāṃ maṇibhadravadho yathā |
vihito vihitā patnī tasya vyājena kṛtsnaśaḥ || 2 ||
[Analyze grammar]

tataste brāhmaṇāḥ procustacchrutvā kopasaṃyutāḥ |
sītkārānpracurānkṛtvā dhiktvāṃ pāpa pragamyatām || 3 ||
[Analyze grammar]

ātmīyaṃ hema cādāya na te śuddhirbhaviṣyati || 4 ||
[Analyze grammar]

brahmaghnastvaṃ yataḥ proktāstrayo varṇā dvijottamāḥ |
brāhmaṇaḥ kṣatriyo vaiśyaḥ smṛtiśāstraprapāṭhakaiḥ || 5 ||
[Analyze grammar]

sūta uvāca |
tatastu duḥkhitaḥ puṣpo bāṣpasaṃpūritekṣaṇaḥ |
brahmasthānādvinirgatya praruroda suduḥkhitaḥ || 6 ||
[Analyze grammar]

rorūyamāṇamālokya tataste nāgarā dvijāḥ |
dayāṃ ca mahatīṃ kṛtvā tataḥ procuḥ parasparam || 7 ||
[Analyze grammar]

nānāvidhāni śāstrāṇi smṛtayaśca pṛthagvidhāḥ |
purāṇāni samastāni vīkṣadhvaṃ susamāhitāḥ || 8 ||
[Analyze grammar]

kutracitkvacidevāsya kathaṃcicchuddhirasti cet |
na tacca vidyate śāstramasminsthāne na cāsti yat || 9 ||
[Analyze grammar]

na smṛtirna purāṇaṃ ca vedāṃtaṃ vā dvijottamāḥ |
na cāsti brāhmaṇaḥ so'tra sarvajñapratimo na yaḥ || 10 ||
[Analyze grammar]

tasmāccintayata kṣipramasya śuddhipradaṃ hi yat |
tacca pramāṇatāṃ nītvā śuddhirasya pradīyate || 11 ||
[Analyze grammar]

athaiko brāhmaṇaḥ prāha caṃḍaśarmeti viśrutaḥ |
mayā skāṃdapurāṇe'sminpuraścaraṇasaṃśritā || 12 ||
[Analyze grammar]

paṭhitā saptamī yā ca puraścaraṇasaṃjñitā |
puraścaraṇataḥ pāpaṃ vihitaṃ tu yathā vrajet || 13 ||
[Analyze grammar]

samyaktathāpi vipreṃdrāstato yāti na saṃśayaḥ |
tasmātkarotu tāmeṣa puraścaraṇasaptamīm || 14 ||
[Analyze grammar]

aparaṃ bhūbhujādeśānmaṇibhadro nipātitaḥ |
vadhakaistasya tatpāpaṃ yadi pāpaṃ prajāyate || 15 ||
[Analyze grammar]

rājā bhūtvā na yaḥ samyagvicārayati vādinam |
tasya tatpātakaṃ ghoraṃ rājñaścaiva prajāyate || 16 ||
[Analyze grammar]

tathāsya patnyāstatpāpaṃ jānaṃtyā yattayoditam |
matpitrā brāhmaṇairdatto'yaṃ purā vahnisaṃnidhau || 17 ||
[Analyze grammar]

viḍaṃbitena cānena kṛtapratikṛtaṃ kṛtam |
tasmānna cāsya doṣaḥ syādyataḥ proktaṃ munīśvaraiḥ || 18 ||
[Analyze grammar]

kṛte pratikṛtaṃ kuryāddhiṃsane pratihiṃsanam |
na tatra jāyate doṣo yo duṣṭe duṣṭamācaret || 19 ||
[Analyze grammar]

brāhmaṇā ūcuḥ |
yadyevaṃ vada viprāsya puraścaraṇasaṃjñitām |
saptamīmadya vipreṃdra varākasya viśuddhaye || 20 ||
[Analyze grammar]

sūta uvāca |
athāsya kathayāmāsa saptamīṃ tāṃ dvijottamāḥ |
caṃḍaśarmābhidhānastu kṛtvā tasyopari kṛpām || 21 ||
[Analyze grammar]

tenāpi vihitā samyagyathā tasya mukhācchrutā |
tataḥ saṃvatsarasyāṃte vipāpmā samapadyata || 22 ||
[Analyze grammar]

ṛṣaya ūcuḥ |
puraścaraṇasaṃjñāṃ tu saptamīṃ vada sūtaja |
vidhinā kena kartavyā kasminkāla upasthite || 23 ||
[Analyze grammar]

sūta uvāca |
ahaṃ vaḥ kīrtayiṣyāmi rohitāśvasya bhūpateḥ |
mārkaṃḍena purā proktā pṛcchayamānena bhaktitaḥ || 24 ||
[Analyze grammar]

saptakalpasmaro viprā mārkaṃḍākhyo mahāmuniḥ |
rohitāśvena pṛṣṭaḥ sa hariścaṃdrātmajena ca || 25 ||
[Analyze grammar]

rohitāśva uvāca |
ajñānājjñānato vāpi yatpāpaṃ kurute naraḥ |
upāyaṃ tasya nāśāya kiṃcinme vada sanmune || 26 ||
[Analyze grammar]

mārkaṃḍeya uvāca |
mānasaṃ vācikaṃ caiva kāyikaṃ ca tṛtīyakam |
trividhaṃ pātakaṃ loke narāṇāmiha jāyate || 27 ||
[Analyze grammar]

tatropāyā vināśāya tasya saṃparikīrtitāḥ |
tānahaṃ te pravakṣyāmi śṛṇuṣva nṛpasattama || 28 ||
[Analyze grammar]

mānasaṃ caiva yatpāpaṃ narāṇāmiha jāyate |
paścāttāpe kṛte tasya tatkṣaṇādeva naśyati || 29 ||
[Analyze grammar]

vācikaṃ caiva yatpāpaṃ nābhuktvā tatpraṇaśyati |
puraścaraṇabāhyaṃ tu satyametanmayoditam || 30 ||
[Analyze grammar]

nivedya brāhmaṇeṃdrāṇāṃ taduktaṃ ca samācaret |
prāyaścittaṃ yathoktaṃ tu tataḥ śuddhimavāpnuyāt || 31 ||
[Analyze grammar]

athavā pārthivo jñātvā kurute tasya nigra ham |
tena śuddhimavāproti yadyapi syātsa kilviṣī || 32 ||
[Analyze grammar]

lajjayā brāhmaṇeṃdrāṇāṃ yo na brūte kathaṃcana |
na ca rājā vijānāti śarīrasthena yo mriyet |
tasya nigrahakartā ca svayaṃ vaivasvato yamaḥ || 33 ||
[Analyze grammar]

tasmātsarvaprayatnena kṛtvā pāpaṃ vijānatā |
prāyaścittaṃ tu kartavyaṃ yathoktaṃ brāhmaṇo ditam || 34 ||
[Analyze grammar]

rohitāśva uvāca |
sarveṣāmeva pāpānāṃ vihitānāṃ munīśvara |
kiṃcidvrataṃ samācakṣva dānaṃ vā homameva vā |
vipāpmā jāyate yena puraścaraṇavarjitam || 35 ||
[Analyze grammar]

nityaṃ pāpāni kurute naraḥ sūkṣmāṇi sarvataḥ |
prāyaścittāni sarveṣāṃ kartuṃ śaktiḥ kathaṃ bhavet || 36 ||
[Analyze grammar]

mārkaṃḍeya uvāca |
asti rājanvrataṃ puṇyaṃ puraścaraṇasaṃjñitam |
puraścaraṇasaṃjñā tu saptamī sūryavallabhā || 37 ||
[Analyze grammar]

yayā saṃcīrṇayā rāja nkāyastho yamasaṃbhavaḥ |
vicitro mārjayetpāpaṃ kṛtaṃ janmani saṃcitam || 38 ||
[Analyze grammar]

tasmātkuru mahārāja tathāśu vacanaṃ mama |
yena vā mucyate pāpā tsarvasmātkāyasaṃbhavāt || 39 ||
[Analyze grammar]

rohitāśva uvāca |
puraścaraṇasaṃjñā tu saptamī munisattama |
vidhinā kena kartavyā kasminkāle vada sva me || 40 ||
[Analyze grammar]

mārkaṃḍeya uvāca |
māghamāse site pakṣe makarasthe divākare |
sūryavāreṇa saptamyāṃ vratametatsamācaret || 41 ||
[Analyze grammar]

pākhaṃḍaiḥ patitaiḥ sārdhaṃ tasminnahani nālapet |
bhakṣayitvā nṛpaśreṣṭha prabhāte dantadhāvanam |
maṃtreṇānena paścācca kartavyo niyamo nṛpa || 42 ||
[Analyze grammar]

puraścaraṇakṛtyāyāṃ saptamyāṃ divasādhipa |
upavāsaṃ kariṣyāmi adya tvaṃ śaraṇaṃ mama || 43 ||
[Analyze grammar]

tato'parāhṇasamaye snātvā dhautāṃbaraḥ śuciḥ |
pratimāṃ pūjayedbhaktyā dinādhipasamudbhavām || 44 ||
[Analyze grammar]

raktaiḥ puṣpairmahāvīra pādādyaṃ pūjayettataḥ |
pataṃgāya namaḥ pādau mārtaṃḍāyeti jānunī || 45 ||
[Analyze grammar]

guhyaṃ divasanāthāya nābhiṃ dvādaśa mūrtaye |
bāhū ca padmahastāya hṛdayaṃ tīkṣṇadīdhite || 46 ||
[Analyze grammar]

kaṃṭhaṃ padmadalābhāya śirastejomayāya ca |
evaṃ saṃpūjya vidhivaddhūpaṃ karpūramādadet || 47 ||
[Analyze grammar]

guḍaudanaṃ ca naivedyaṃ raktavastrābhiveṣṭitam |
raktasūtreṇa dīpaṃ ca tathaivārārtikaṃ nṛpa || 48 ||
[Analyze grammar]

śaṃkhe toyaṃ samādāya raktacandanamiśritam |
saphalaṃ ca tataḥ kṛtvā arghyaṃ dadyāttataḥ param || 49 ||
[Analyze grammar]

kukṛtaṃ yatkṛtaṃ kiṃcidajñānājjñānato'pi vā |
prāyaścittaṃ kṛtaṃ deva mamārghyaśca pragṛhyatām || 50 ||
[Analyze grammar]

tataḥ saṃpūjayadvipraṃ gandhapuṣpānulepanaiḥ |
dattvā tu bhojanaṃ tasmai dakṣiṇāṃ ca svaśaktitaḥ |
prāśanaṃ kāyaśuddhyarthaṃ pañcagavyasya cācaret || 51 ||
[Analyze grammar]

kṛtāṃjalipuṭo bhūtvā samudvīkṣya divākaram |
divākaraṃ gataścaiva mantrametaṃ samuccaret || 52 ||
[Analyze grammar]

idaṃ vrataṃ mayā deva gṛhītaṃ puratastava |
avighnaṃ siddhimāyātu prasādāttava bhāskara || 53 ||
[Analyze grammar]

tataśca phālgune māsi saṃprāpte munisattama |
kundena pūjayeddevaṃ tenaiva vidhinā tataḥ || 54 ||
[Analyze grammar]

dhūpaṃ ca gugguluṃ dadyānnaivedyaṃ bhaktameva ca |
prāśanaṃ gomayaṃ proktaṃ sarvapāpaviśuddhaye || 55 ||
[Analyze grammar]

caitre māsi tu saṃprāpte surabhyā pūjyeddharim |
naivedyaṃ guṇikāḥ proktā dhūpaṃ sarjarasodbhavam || 56 ||
[Analyze grammar]

kuśodakaṃ ca saṃprāśya kāyaśuddhimavāpnuyāt |
vaiśākhe kiṃśukaiḥ pūjāṃ yathāvacca ghṛtāśanaiḥ || 57 ||
[Analyze grammar]

naivedyaṃ ca surāmāṃsaṃ dhūpaṃ ca vinivedayet |
dadhiprāśanamevātra kartavyaṃ kāyaśuddhaye || 58 ||
[Analyze grammar]

puṣpapāṭalayā pūjā vidhātavyā ravernṛpa |
naivedye saktavaḥ proktāḥ prāśanaṃ ca ghṛtaṃ smṛtam || 59 ||
[Analyze grammar]

kapilāyā mahāvīra sarvapāpaviśuddhaye |
āṣāḍhe munipuṣpaiśca pūjayedbhāskaraṃ nṛpa || 60 ||
[Analyze grammar]

naivedye ghārikā proktā prāśanaṃ madhusarpiṣoḥ |
dhūpaṃ caivāgaruṃ dadyātparayā śraddhayā yutaḥ || 61 ||
[Analyze grammar]

śrāvaṇe tu kadaṃbena pūjanaṃ tīkṣṇadīdhiteḥ |
naivedye modakāścaiva tagaraṃ dhūpa mādadet || 62 ||
[Analyze grammar]

gośṛṃgodakamādāya sadyaḥ pāpātpramucyate |
jātyā bhādrapade pūjā kṣīranaivedyamādadet || 63 ||
[Analyze grammar]

dhūpaṃ nakhasamudbhūtaṃ prāśanaṃ kṣīrameva ca |
āśvine kamalaiḥ pūjā naivedye ghṛtapūrikā || 64 ||
[Analyze grammar]

dhūpaṃ kuṃkumajaṃ proktaṃ karpūraprāśanaṃ smṛtam || 65 ||
[Analyze grammar]

tulasyā kārtike pūjā bhāskarasya prakīrtitā |
naivedye caiva khaṃḍākhyaṃ dhūpaṃ kausuṃbhikaṃ nṛpa || 66 ||
[Analyze grammar]

prāśanaṃ ca lavaṃgākhyaṃ sarvapāpaviśodhanam |
bhṛṃgarājena pūjā ca saumye māsi samācaret || 67 ||
[Analyze grammar]

naivedye pheṇikā deyā dhūpaṃ guḍasamudbhavam |
kaṃkolaprāśanaṃ caiva bhāskarasya pratuṣṭaye || 68 ||
[Analyze grammar]

śatapatrikayā pūjā pauṣe māsi raveḥ smṛtā |
sahajaṃ dhūpamādiṣṭaṃ naivedye śuṣkalī tathā || 69 ||
[Analyze grammar]

prāśane pūrvamuktāni sarvāṇyeva samācaret |
samāptau ca tato dadyātṣaḍbhāgaṃ gṛhasaṃbhavam || 70 ||
[Analyze grammar]

brāhmaṇāya nṛpaśreṣṭha sarvapāpaviśuddhaye |
iṣṭabhojyaṃ tataḥ kāryaṃ svaśaktyā pārthivottama || 71 ||
[Analyze grammar]

evaṃ tu kurute yo'tra saptamīṃ bhāskarodbhavām |
sarvapāpavinirmukto nirmalatvaṃ sa gacchati || 72 ||
[Analyze grammar]

brāhmaṇā ūcuḥ |
evaṃ purā vai kathitā rohitāśvāya dhīmate |
mārkaṃḍena mahābhāga tasmāttvamapi tāṃ kuru || 73 ||
[Analyze grammar]

yena saṃjāyate samyakpuraścaraṇameva te || 74 ||
[Analyze grammar]

sūta uvāca |
tasya tadvacanaṃ śrutvā puṣpo'pi dvijasattamāḥ |
tāṃ cakre saptamīṃ hṛṣṭo yathā tena niveditā || 75 ||
[Analyze grammar]

ṣaḍbhāgaṃ pradadau tasmai brāhmaṇāya mahātmane |
svavittasya gṛhasthasya kupyākupyasya kṛtsnaśaḥ || 76 ||
[Analyze grammar]

so'pi jagrāha tadvittaṃ prahṛṣṭenāṃtarātmanā |
suvarṇamaṇi ratnāni saṃkhyayā parivarjitam || 77 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye puraścaraṇasaptamīvratavidhānavarṇanaṃnāma dviṣaṣṭyuttaraśatatamo'dhyāyaḥ || 162 ||
[Analyze grammar]