Chapter 153

[English text for this chapter is available]

sūta uvāca |
tathānyadapi tatrāsti rūpatīrthamanuttamam |
yatra snāto naraḥ samyagvirūpo rūpavānbhavet || 1 ||
[Analyze grammar]

pūrvaṃ bhagavatā tena brahmaṇā loka kartṛṇā |
sṛṣṭiṃ kṛtvā ca vistīrṇāṃ yathoktaṃ ca caturvidhām || 2 ||
[Analyze grammar]

tataḥ sa cintayāmāsa rūpasaṃcayasaṃyutām |
ekāmapsarasaṃ divyāṃ devamāyāṃ sṛjāmyaham || 3 ||
[Analyze grammar]

tataśca sarvadevānāṃ samādāya tilaṃtilam |
rūpaṃ ca nirmame paścādatyāścaryamayīṃ ca tām || 4 ||
[Analyze grammar]

yāṃ dṛṣṭvā kṣobhamāpannaḥ svayameva pitāmahaḥ || 5 ||
[Analyze grammar]

tatastāṃ preṣayāmāsa kailāsaṃ prati padmajaḥ |
gaccha devi mahādevaṃ praṇamasva śucismite || 6 ||
[Analyze grammar]

tataḥ sā satvaraṃ gatvā kailāsaṃ parvatottamam |
apaśyacchaṃkaraṃ tatra nirviṣṭaṃ pārvatīsamam || 7 ||
[Analyze grammar]

śaṃkaro'pi ca tāṃ dṛṣṭvā vismayaṃ paramaṃ gataḥ |
sudṛṣṭāṃ nākarodbhītyā pārśvasthāṃ vīkṣya pārvatīm |
tataḥ pradakṣiṇāṃ cakre sā praṇamya maheśvaram |
śraddhayā parayā yuktā kṛtāṃjalipuṭā sthitā || 9 ||
[Analyze grammar]

yāvaddakṣiṇapārśvasthā tāvadvaktraṃ sa dakṣiṇam |
pracakāra mahādevastadupākṛṣṭalocanaḥ || 10 ||
[Analyze grammar]

paścimāyāṃ yadā sā'bhūtpradakṣiṇavaśācchubhā |
paścimaṃ vadanaṃ tena tadarthaṃ ca kṛtaṃ tataḥ || 11 ||
[Analyze grammar]

evamuttarasaṃsthāyāṃ tasyāṃ devena śaṃbhunā |
uttaraṃ vadanaṃ klṛptaṃ gaurībhītena cetasā |
na grīvāṃ cālayāmāsa kathaṃcidapi sa dvijāḥ || 12 ||
[Analyze grammar]

etasminnaṃtare tatra nārado munipuṃgavaḥ |
abravītpārvatīṃ paścātpraṇipatya maheśvaram || 13 ||
[Analyze grammar]

nārada uvāca |
paśya pārvati te patyuśceṣṭitaṃ garhitaṃ yathā |
dṛṣṭvā rūpavatīṃ nārīṃ kṛtaṃ |mukhacatuṣṭayam || 14 ||
[Analyze grammar]

ahametadvijānāmi na tvayā sadṛśī kvacit |
asti nārī tathā'nyopi vijānāti sureśvari || 19 ||
[Analyze grammar]

hāsyasya padavīmadya tvaṃ gamiṣyasi pārvati |
sarvāsāṃ devapatnīnāṃ jñātvānyāsaktamīśvaram || 16 ||
[Analyze grammar]

etaddevi vijānāsi yādṛkcittaṃ śivodbhavam |
asyā upari veśyāyā niṃditāyā vicakṣaṇaiḥ || 17 ||
[Analyze grammar]

samādāya nije harmya etāṃ saṃsthāpayiṣyati |
paraṃ lajjāsamopeto na bravīti vacaḥ śubhe || 18 ||
[Analyze grammar]

sūta uvāca |
nāradasya vacaḥ śrutvā dṛṣṭvā kāṃtaṃ caturmukham |
krodhena mahatāviṣṭā vikṛtaṃ vīkṣya taṃ haram || 19 ||
[Analyze grammar]

tato nirodhayā māsa drutaṃ sā parvatātmajā |
sarvanetrāṇi devasya mahiṣīdharmamāśritā || 20 ||
[Analyze grammar]

etasminnaṃtare śailā viśīryaṃti samaṃtataḥ |
maryādāṃ saṃtyajaṃti sma sarve ca makarālayāḥ || 21 ||
[Analyze grammar]

pralayasya samutthānaṃ saṃjātaṃ dvijasattamāḥ |
tāvadbrahmadinaṃ prāptaṃ paramaṃ sṛṣṭilakṣaṇam || 22 ||
[Analyze grammar]

nimeṣeṇa punastasya pralayasya prajāpateḥ |
brahmaṇaḥ sā niśā proktā sarvaṃ toyamayaṃ bhavet || 23 ||
[Analyze grammar]

atha tatra gaṇāḥ sarve bhṛginaṃdipuraḥsarāḥ |
so'pi devamunirbhītastāmuvāca sureśvarīm || 24 ||
[Analyze grammar]

muṃcamuṃca surajyeṣṭhe devanetrāṇi saṃprati |
nocennāśaḥ samastasya lokasyāsya bhaviṣyati || 25 ||
[Analyze grammar]

evaṃ proktā'pi sā devī yāvacca na mumoca tam |
tāvaddevena lālāṭaṃ visṛṣṭaṃ locanaṃ param || 26 ||
[Analyze grammar]

kṛpāviṣṭena lokānāṃ yena rakṣā prajāyate |
na śakto vārituṃ devīṃ prāṇebhyo'pi garīyasīm || 27 ||
[Analyze grammar]

aṃbikāṃ vibudhāḥ prāhustryaṃbakāṇi yato dvijāḥ |
tasmātsaṃkīrtyate loke tryaṃbakaśca sureśvaraḥ || 28 ||
[Analyze grammar]

tataḥ saṃtyajya taṃ devaṃ devī parvataputrikā |
provāca koparaktākṣī puraḥsthāṃ tāṃ tilottamām || 29 ||
[Analyze grammar]

yasmānme dayitaḥ pāpe tvayā rūpādviḍaṃbitaḥ |
caturvaktraḥ kṛtastasmāttvaṃ virūpā bhava drutam || 30 ||
[Analyze grammar]

tataḥ sā sahasā bhūtvā tatkṣaṇādbhagnanāsikā |
śīrṇakeśā bṛhaddaṃtā cipiṭākṣī mahodarā || 31 ||
[Analyze grammar]

atha vīkṣya nijaṃ dehaṃ tathābhūtaṃ varāpsarāḥ |
provāca vepamānā sā kṛtāṃjalipuṭā sthitā || 32 ||
[Analyze grammar]

ahaṃ saṃpreṣitā devi praṇāmārthaṃ triśūlinaḥ |
brahmaṇā tena cāyātā yuṣmākaṃ ca viśeṣataḥ || 33 ||
[Analyze grammar]

nirdoṣāyā virāgāyāstasmādyuktaṃ na te bhavet |
śāpaṃ dātuṃ prasādaṃ me tasmāttvaṃ kartumarhasi || 34 ||
[Analyze grammar]

tasyāstadvacanaṃ śrutvā dīnaṃ satyaṃ ca pārvatī |
paścāttāpasamopetā tataḥ provāca supriyam || 35 ||
[Analyze grammar]

strīsvabhāvātsamāyātaḥ kopo'yaṃ tvāṃ prati drutam |
tasmādāgaccha gacchāvo mayā sārdhaṃ dharātale || 36 ||
[Analyze grammar]

tatrāsti rūpadaṃ tīrthaṃ mayā cotpāditaṃ svayam |
māghaśuklatṛtīyāyāṃ snānārthaṃ vimalodakam || 37 ||
[Analyze grammar]

yā nārī prātarutthāya tatra snānaṃ samācaret |
sā syādrūpavatī nūnamadṛṣṭe ravimaṃḍale || 38 ||
[Analyze grammar]

sadā māghe tṛtīyāyāṃ tatra snānaṃ karomyaham |
adya sā tatra yāsyāmi snānāya kṛtaniścayā || 39 ||
[Analyze grammar]

sūta uvāca |
evamuktvā samādāya sā devī tāṃ tilottamām |
hāṭakeśvaraje kṣetre rūpatīrthaṃ jagāma ca || 40 ||
[Analyze grammar]

tatra snānaṃ svayaṃ cakre vidhipūrvaṃ sureśvarī |
tasyā hyanantaraṃ sāpi bhaktiyuktā tilottamā || 41 ||
[Analyze grammar]

tataḥ kāṃtimatī jātā tatkṣaṇādeva bhāminī |
pūrvamāsīyadthārūpā tathāsā'bhūdviśeṣataḥ || 42 ||
[Analyze grammar]

atha tuṣṭisamāyuktā tāṃ praṇamya sureśvarīm |
provāca vismayāviṣṭā harṣagadgadayā girā || 43 ||
[Analyze grammar]

prāptaṃ rūpaṃ mahādevi tvatprasādāccirantanam |
brahmalokaṃ gamiṣyāmi māmanujñātumarhasi || 44 ||
[Analyze grammar]

gauryuvāca |
varaṃ yacchāmi te putri yatkiṃciddhṛdi saṃsthitam |
tasmātprārthaya viśrabdhā na vṛthā mama darśanam || 45 ||
[Analyze grammar]

tilottamovāca |
ahamatra kariṣyāmi kṣetre tīrthaṃ nijaṃ śubhe |
tvatprasādena taddevi yātu khyātiṃ dharātale || 46 ||
[Analyze grammar]

tvayā tatrāpi kartavyaṃ varṣāṃte snānameva hi |
hitārthaṃ sarvanārīṇāṃ rūpasaubhāgyadāyakam || 47 ||
[Analyze grammar]

gauryuvāca |
caitraśuklatṛtīyāyāṃ sadāhaṃ tvatkṛte śubhe |
snānaṃ tatra kariṣyāmi madhyāhne samupasthite || 48 ||
[Analyze grammar]

hitārthaṃ sarvanārīṇāṃ tava vākyādasaṃśayam |
yā tatra divase nārī tasmiṃstīrthe kariṣyati || 49 ||
[Analyze grammar]

snānaṃ sā saukhyasaṃyuktā bhaviṣyati sukhānvitā |
spṛhaṇīyā ca nārīṇāṃ sarvāsāṃ dharaṇītale || 50 ||
[Analyze grammar]

puruṣo'pi subhaktyā yastatra snānaṃ kariṣyati |
saptajanmāni rūpāḍhyaḥ sasaubhāgyo bhaviṣyati || 51 ||
[Analyze grammar]

sūta uvāca |
evamuktā tadā devyā sāpsarā dvijasattamāḥ |
cakre kuṇḍaṃ suvistīrṇaṃ vimalodaprapūritam || 52 ||
[Analyze grammar]

upakaṃṭhe tatastasya sthāpayāmāsa pārvatīm |
tato jagāma saṃhṛṣṭā brahmalokaṃ tilottamā || 53 ||
[Analyze grammar]

tataḥ prabhṛti saṃjātaṃ kuṇḍamapsarasā kṛtam |
snānamātrairnarairyatra saubhāgyaṃ labhyate dvijāḥ || 54 ||
[Analyze grammar]

nārībhiśca viśeṣeṇa putraprāptiranuttamā |
tathānyadapi yatkiṃcidvāṃchitaṃ hṛdaye sthitam || 55 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe śrīhāṭakeśvarakṣetramāhātmye'psaraḥkuṇḍotpattimāhātmyavarṇanaṃnāma tripaṃcāśaduttaraśatatamo'dhyāyaḥ || 153 ||
[Analyze grammar]