Chapter 144

[English text for this chapter is available]

sūta uvāca |
sā gatvā tridivaṃ paścātsahasrākṣaṃ surairyutam |
provāca bhagavandiṣṭyā kṣobhito'sau mahāmuniḥ || 1 ||
[Analyze grammar]

tapastasya hataṃ kṛtsnaṃ yatkṛcchreṇa samācitam |
tathā nistejasatvaṃ ca nītastvaṃ sukhabhāgbhava || 2 ||
[Analyze grammar]

evamuktvā'tha sā raṃbhā śaṃsitā nikhilaiḥ suraiḥ |
amogharetasastasya dadhre garbhaṃ nijodare || 3 ||
[Analyze grammar]

jābālirapi kṛtvā ca paścāttāpamanekadhā |
bhūyastu tapasi sthitvā sthitastatraiva cāśrame || 4 ||
[Analyze grammar]

tatastu daśame māsi saṃprāpte suṣuve śubhām |
kanyāṃ sarojapatrākṣīṃ divyalakṣaṇalakṣitām || 5 ||
[Analyze grammar]

atha tāṃ mānuṣodbhūtāṃ matvā tasyaiva cāśramam |
gatvā mumoca pratyakṣaṃ tasyarṣeścedamabravīt || 6 ||
[Analyze grammar]

tava vīryasamudbhūtāmenāṃ majjaṭharoṣitām |
kanyakāṃ muniśārdūla tasmātpālaya sāṃpratam || 7 ||
[Analyze grammar]

na svarge vidyate vāso mānuṣāṇāṃ kathaṃcana |
etasmātkāraṇāttubhyaṃ mayā brahmansamarpitā || 8 ||
[Analyze grammar]

evamuktvā yayau raṃbhā satvaraṃ tridaśālayam |
jābālirapi tāṃ dṛṣṭvā kanyakāṃ snehamāviśat || 9 ||
[Analyze grammar]

tatastāṃ kanyakāṃ kṛtvā suṣṭhu gupte latāgṛhe |
rasairmiṣṭaphalodbhūtaiḥ pupoṣa ca divāniśam || 10 ||
[Analyze grammar]

sāpi kanyā parāṃ vṛddhiṃ śanairyāti dinedine |
śuklapakṣaṃ samāsādya yathā candrakalā divi || 11 ||
[Analyze grammar]

yathāyathātha sā yāti vṛddhiṃ kamalalocanā |
tathātathāsya susneho jābālerapyavardhata || 12 ||
[Analyze grammar]

sā śiśutve mṛgaiḥ sārddhaṃ pakṣibhiśca suśobhanā |
krīḍāṃ cakre suviśrabdhairvardhayaṃtī munermudam || 13 ||
[Analyze grammar]

tato bālyaṃ parityaktvā valkalāvṛtagātrikā |
tasyarṣeḥ sarvakṛtyeṣu sāhāyyaṃ prakaroti ca || 14 ||
[Analyze grammar]

samitkuśādi yatkiṃcitphalapuṣpasamanvitam |
vanāttadānayāmāsa tasya prītimavardhayat || 15 ||
[Analyze grammar]

tataḥ katipayāhasya phalārthaṃ sā mṛgekṣaṇā |
nidāghasamaye dūraṃ svāśramātprajagāma ha || 16 ||
[Analyze grammar]

etasminnaṃtare tatra vimānavaramāśritaḥ |
prāptaścitrāṃgadonāma gandharvastridivaukasām || 17 ||
[Analyze grammar]

tena sā vijane bālā pūrṇacandranibhānanā |
dṛṣṭā cāṃdramasī lekhā patiteva dharātale || 18 ||
[Analyze grammar]

tataḥ kāmaparītāṃgaḥ sovatīrya dharātalam |
vimānānmadhurairvākyaistāmuvāca kṛtāṃjaliḥ || 19 ||
[Analyze grammar]

kā tvaṃ kamalagarbhābhā nirjane'tha mahāvane |
bhramasyekākinī bāle vanamadhye sulocane || 20 ||
[Analyze grammar]

kanyovāca |
ahaṃ phalavatīnāma jābālerduhitā mune |
phalapuṣpārthamāyātā tadarthamiha kānane || 21 ||
[Analyze grammar]

citrāṃgada uvāca |
kumārabrahmacārī sa śrūyate munisattamaḥ |
tatkathaṃ tasya vāmoru tvaṃ jātā bhāryayā vinā || 22 ||
[Analyze grammar]

kanyovāca |
satyametanmahābhāga nāsti dāraparigrahaḥ |
tasyarṣeḥ kiṃ tu saṃjātā yathā tanme'vadhāraya || 23 ||
[Analyze grammar]

raṃbhā nāmāpsarāstena purā dṛṣṭā surāṃganā |
tataḥ kāmaparītena sevitā ca yathāsukham || 24 ||
[Analyze grammar]

tatastadudarājjātā devaloke mahattare |
tayāpi ceha tasyarṣerbhūya eva niyojitā || 25 ||
[Analyze grammar]

evaṃ sa me pitā jāto jābālirmunisattamaḥ |
poṣitā'haṃ tatastena nānāphalasamudravaiḥ || 26 ||
[Analyze grammar]

tataḥ phalavatī nāma kṛtaṃ tena mahātmanā |
mamānurūpametaddhi yanmāṃ tvaṃ paripṛcchasi || 27 ||
[Analyze grammar]

citrāṃgada uvāca |
tava rūpaṃ samālokya kāmasyāhaṃ vaśaṃ gataḥ |
tasmādbhajasva māṃ bhīru no cedyāsyāmi saṃkṣayam || 28 ||
[Analyze grammar]

ahaṃ citrāṃgadonāma gandharvastridivaukasām |
tīrthayātrākṛte prāptaḥ kṣetre'smiñchraddhayā'nvitaḥ || 29 ||
[Analyze grammar]

kanyovāca |
kumāradharmiṇī cāhamadyāpi vaśagā pituḥ |
kāmadharmaṃ na jānāmi citrāṃgada kathaṃcana || 30 ||
[Analyze grammar]

tasmātprārthaya me tātaṃ sa māṃ tubhyaṃ pradāsyati |
anurūpāya yogyāya taruṇāya manasvinīm || 31 ||
[Analyze grammar]

mamāpi rucitaṃ citte tava vākyamidaṃ śubham |
dhanyāhaṃ yadi te kaṇṭhamāliṃgāmi yathecchayā || 32 ||
[Analyze grammar]

citrāṃgada uvāca |
na śaknomi mahābhāge tāvatkālaṃ pratīkṣitum |
māṃ dahatyeṣa gātrotthaḥ sumahānkāmapāvakaḥ || 33 ||
[Analyze grammar]

tasmātkuru prasādaṃ me ratidānena śobhane |
ko jānāti hi taccittaṃ kīdṛgrūpaṃ bhaviṣyati || 34 ||
[Analyze grammar]

kanyovāca |
evaṃ te vartamānasya mama tātaḥ prakopataḥ |
dahiṣyati na saṃdehaḥ śāpaṃ dattvā sudāruṇam || 35 ||
[Analyze grammar]

citrāṃgada uvāca |
tava tātaḥ sa kālena māṃ dahiṣyati mānade |
kāmānalaḥ punaḥ sadya eṣa bhasma kariṣyati || 36 ||
[Analyze grammar]

evamuktvā'tha tāṃ bālāṃ vepamānāṃ trapāvatīm |
gṛhītvā dakṣiṇe pāṇau praviveśa surālayam || 37 ||
[Analyze grammar]

tatra tāṃ ramayāmāsa tadā kāmaprapīḍitaḥ |
tatkālajātarāgāṃdhāṃ nirlajjatvamupāgatām || 38 ||
[Analyze grammar]

evaṃ tasyāḥ samaṃ tena sthitāyā divaso gataḥ |
nimeṣavanmuniśreṣṭhāstataścāstaṃ gato raviḥ || 39 ||
[Analyze grammar]

etasminnaṃtare vipro jābālirduḥkha saṃyutaḥ |
anāyātāṃ sutāṃ jñātvā paribabhrāma sarvataḥ || 40 ||
[Analyze grammar]

aho sā duhitā mahyaṃ kimu vyālaiḥ prabhakṣitā |
vṛkṣaṃ kaṃcitsamārūḍhā patitā dharaṇī tale || 41 ||
[Analyze grammar]

kiṃ vā jalāśayaṃ kaṃcitprāpya gādhamajānatī |
nimagnā tatra sā bālā saṃpraviṣṭā jalārthinī || 42 ||
[Analyze grammar]

evaṃ sa pralapanvipro babhrāma gahane vane |
kuśakaṇṭakaviddhāṃgaḥ kṣutpipāsāsamākulaḥ || 43 ||
[Analyze grammar]

yaṃyaṃ śṛṇoti śabdaṃ sa mṛgapakṣisamudbhavam |
rajanyāṃ tatra niryāti matvā phalavatīṃ ca tām || 44 ||
[Analyze grammar]

atha kramātsamāyāto haraharmyaṃ sa sanmuniḥ |
yatra citrāṃgadopetā sā saṃtiṣṭhati kanyakā || 45 ||
[Analyze grammar]

niḥśaṃkā jalpamānā ca rāgavākyānyanekaśaḥ |
anarhāṇi kumārīṇāṃ brahmajānāṃ viśeṣataḥ || 46 ||
[Analyze grammar]

tataḥ sa suciraṃ śrutvā dūrastho vismayānvitaḥ |
kumāryāśceṣṭitaṃ dṛṣṭvā kopasaṃraktalocanaḥ || 47 ||
[Analyze grammar]

atha dudrāva vegena gṛhya kāṣṭhasamuccayam |
dvābhyāmeva vināśāya bhartsamāno muhurmuhuḥ || 48 ||
[Analyze grammar]

dhigdhikpāpasamācāre kaumāryaṃ dūṣitaṃ tvayā |
lāṃchanaṃ ca samānītaṃ mama lokatraye'pi ca || 49 ||
[Analyze grammar]

nitarāṃ patimāsādya karmaṇānena cādhame |
tasmādanena pāpena yuktāṃ tvāṃ nāśayāmyaham || 50 ||
[Analyze grammar]

evamuktvā prahāraṃ sa yāvatkṣipati sanmuniḥ |
tāvaccitrāṃgado naṣṭo vyomamārgeṇa satvaram || 51 ||
[Analyze grammar]

vivastrā sāpi tatraiva khinnāṃgī kāmasevayā |
na śaśāka kvacidgaṃtuṃ samutthāya tataḥ kṣitau || 52 ||
[Analyze grammar]

tataḥ kāṣṭhaprahāroghairhatvā tāṃ patitāṃ kṣitau |
mṛtāmiti parijñāya sa krodhaparivāritaḥ || 53 ||
[Analyze grammar]

tataścitrāṃgadasyāpi dadau śāpaṃ sudāruṇam |
sa dṛṣṭvā'kāśamārgeṇa gacchamānaṃ bhayāturam || 54 ||
[Analyze grammar]

ya eṣa kanyakāṃ mahyaṃ dharṣayitvā samutpatet |
sa patatvacirātpāpaśchinnapakṣa ivāṃḍajaḥ || 55 ||
[Analyze grammar]

kuṣṭhavyādhisamāyuktaścalituṃ naiva ca kṣamaḥ |
etasminnantare bhūmau sa papāta nabhastalāt || 56 ||
[Analyze grammar]

kuṣṭhavyādhisamāyuktaḥ sa ca citrāṃgado yuvā |
tatastaṃ sa muniḥ prāha kāṣṭhodyatakaraḥ krudhā || 57 ||
[Analyze grammar]

kastvaṃ pāpasamācāra yena me dharṣitā balāt |
kumārī tannayāmyeṣa tvāmadya yama śāsanam || 58 ||
[Analyze grammar]

citrāṃgada uvāca |
ahaṃ citrāṃgadonāma gandharvastridivaukasām |
tīrthayātrāprasaṃgena kṣetre'sminsamupāgataḥ || 59 ||
[Analyze grammar]

tatastu kanyakāṃ dṛṣṭvā kāmadevavaśaṃ gataḥ || 60 ||
[Analyze grammar]

tataḥ sevitavānatra latāharmye janacyute |
tasmātkuru kṣamāṃ mahyaṃ dīnasya praṇatasya ca || 61 ||
[Analyze grammar]

yathā vyādherbhavennāśo yathā syādgagane gatiḥ |
bhūyo'pi tvatprasādena svalpaḥ kopo hi sādhuṣu || 62 ||
[Analyze grammar]

jābāliruvāca |
īdṛgrūpadharastvaṃ hi mama vākyādbhaviṣyasi |
eṣāpi matsutā pāpā vastrahīnā sadedṛśī || 63 ||
[Analyze grammar]

bhaviṣyati na saṃdeho jīvayiṣyati cetkvacit |
yadyeṣā dhāsyati kvāpi vastraṃ gātre nije kvacit || 64 ||
[Analyze grammar]

tannūnaṃ ca śiro'pyasyāḥ phaliṣyati na saṃśayaḥ |
evamuktvā vikopaśca sa jagāma nijāśramam || 65 ||
[Analyze grammar]

citrāṃgado'pi tatraiva tayā sārdhaṃ tathā sthitaḥ |
kasyacittvatha kālasya tatra kṣetre samāyayau || 66 ||
[Analyze grammar]

caitraśuklacaturdaśyāṃ bhagavāñchaśiśekharaḥ |
gantuṃ citreśvare pīṭhe gaṇai raudraiḥ samāvṛtaḥ |
yoginībhiḥ pracaṇḍābhiḥ sārdhaṃ prāpte niśāmukhe || 67 ||
[Analyze grammar]

atha prāpte niśārdhe tu yoginyastāḥ sudāruṇāḥ |
mahāmāṃsaṃ mahāmāṃsamityūcurbhakṣaṇāya vai || 68 ||
[Analyze grammar]

nṛtyamānāḥ purastasya devadevasya śūlinaḥ |
saspardhā gaṇamukhyaistairnartamānaiḥ samaṃtataḥ || 69 ||
[Analyze grammar]

yastatra samaye tāsāṃ mahāmāṃsaṃ prayacchati |
maṃtrapūtaṃ sa saṃsiddhiṃ samavāpnoti vāṃchitām || 70 ||
[Analyze grammar]

madyaṃ māṃsaṃ tathā cānyannaivedyaṃ vā phalādikam |
tasya siddhiḥ samādiṣṭā yathā svahṛdaye sthitā || 71 ||
[Analyze grammar]

etasminnaṃtare kanyā sā jābālisamudbhavā |
sa ca citrāṃgadastatra gatvā provāca sādaram || 72 ||
[Analyze grammar]

asmadīyamidaṃ māṃsaṃ yoginyo harṣasaṃyutāḥ |
bhakṣayantu yathāsaukhyaṃ svayameva prakalpitam || 73 ||
[Analyze grammar]

atha taṃ puruṣaṃ dṛṣṭvā kuṣṭhavyādhisamāvṛtam |
vivastrāṃ kanyakāṃ tāṃ ca sarvāstā vismayānvitāḥ || 74 ||
[Analyze grammar]

te ca sarve gaṇā raudrāḥ sa ca devastrilocanaḥ |
papraccha kautukāviṣṭastatra citrāṃgadaṃ prabhuḥ || 75 ||
[Analyze grammar]

kastvaṃ dhairyasamāyukto mahatsattve vyavasthitaḥ |
yaḥ prayacchasi jīvaṃ tvaṃ kīṭasyāpi suvallabham || 76 ||
[Analyze grammar]

keyaṃ ca vasanaiṃrhīnā tvayā sārdhaṃ gatavyathā |
prayacchati nijaṃ dehaṃ yaddeyaṃ naiva kasyacit || 77 ||
[Analyze grammar]

sūta uvāca |
tataḥ sa kathayāmāsa sarvamātmaviceṣṭitam |
yathā kanyāsamaṃ saṃgaḥ kṛtaḥ śāpaśca sanmuneḥ || 78 ||
[Analyze grammar]

tataścitrāṃgadaṃ dṛṣṭvā sa gandharvaṃ divaukasām |
tathārūpaṃ kṛpāviṣṭastataḥ provāca śaṃkaraḥ || 79 ||
[Analyze grammar]

mama saṃdarśanaṃ prāpya na mṛtyurjāyate kvacit |
na vṛthā darśanaṃ caitattasmātprārthaya sādaram || 80 ||
[Analyze grammar]

citrāṃgada uvāca || |
vyādhinā'haṃ sunirviṇṇastena devātra cāgataḥ |
yena vyādhikṣayo bhāvī dehanāśena śaṃkara || 81 ||
[Analyze grammar]

tasmātkuru kṣayaṃ vyādheryadi yacchasi me varam |
khecaratvaṃ punardehi yena svargaṃ vrajāmyaham || 82 ||
[Analyze grammar]

śrīśaṃkara uvāca |
tvaṃ sthāpayātra malliṃgaṃ pīṭhe gandharvasattama |
tataścārādhaya prītyā yāvadvarṣamupasthitam || 83 ||
[Analyze grammar]

yathāyathā supūjāṃ tvaṃ malliṃgasya kariṣyasi |
dinedine tathā vyādhestava nāśo bhaviṣyati || 84 ||
[Analyze grammar]

tatastu khe gatiṃ prāpya punaḥ svargaṃ prayāsyasi |
matprasādānna sandehaḥ satyametanmayoditam || 85 ||
[Analyze grammar]

eṣāpi kanyakā yasmātpraviṣṭā pīṭhamadhyataḥ |
tasmātphalavatīnāma yoginī sambhaviṣyati || 86 ||
[Analyze grammar]

anenaiva tu rūpeṇa nagnatvena vyavasthitā |
mukhyāmavāpsyate pūjāṃ vāṃchitaṃ ca pradāsyati |
pūjakānāṃ sthitaṃ citte śatasaṃkhyaguṇaṃ tadā || 87 ||
[Analyze grammar]

etāṃ saṃpūjayenmartyaḥ pīṭhametattataḥ param |
pūjayiṣyati tasyeṣṭā siddhirevaṃ bhaviṣyati || 88 ||
[Analyze grammar]

evamuktvā tataḥ sā'tha harṣeṇa mahatā'nvitā |
yoginīvṛṃdamadhyasthā nṛtyaṃ cakre tataḥ param || 89 ||
[Analyze grammar]

evaṃ babhūva sā tatra yoginī ca varāṃganā |
tathā cakre paraṃ nṛtyaṃ yathā tuṣṭo maheśvaraḥ || 90 ||
[Analyze grammar]

tataḥ provāca tāṃ hṛṣṭaḥ sarvayoginisaṃnidhau |
anena tava nṛtyena gītena ca viśeṣataḥ || 91 ||
[Analyze grammar]

parituṣṭosmi te vatse tasmācchṛṇu vaco mama |
niśīthe'dya dine prāpte yaste pūjāṃ kariṣyati || 92 ||
[Analyze grammar]

surā māṃsānnasatkārairmaṃtrairāgamasaṃbhavaiḥ |
sa bhaviṣyati tatkālaṃ śāpānugrahaśaktimān || 93 ||
[Analyze grammar]

baṃdhanaṃ mohanaṃ cāpi śatroruccāṭanaṃ tathā |
kariṣyati na sandeho vaśīkaraṇameva ca || 94 ||
[Analyze grammar]

trikoṇaṃ kuṇḍamāsthāya diśāṃ pālānprapūjayet |
kṣetrapālaṃ ca sarvāstā devatā gamanodbhavāḥ || 95 ||
[Analyze grammar]

tathā catvarapūjāṃ ca prakṛtvā vidhipūrvakam |
paścāttvāṃ pūjayitvā ca homaṃ yaśca kariṣyati || 96 ||
[Analyze grammar]

śatruvāmapadotthena spṛṣṭena rajasā'thavā |
guggulena sahasrāṃtaṃ staṃbhanaṃ ca kariṣyati || 97 ||
[Analyze grammar]

yaśca śatruṃ hṛdi sthāpya śatrūdvartanasaṃbhavam |
malaṃ dhātrīphalaiḥ sārdhaṃ mohanaṃ sa kariṣyati || 98 ||
[Analyze grammar]

yaḥ śatroḥ snānajaṃ toyaṃ gṛhītvā cātha kardamam |
śivanirmālyasaṃyuktaṃ juhvayiṣyati pāvake || 99 ||
[Analyze grammar]

tavāgre sa naro nūnaṃ śatrumuccāṭayiṣyati |
eṣopi tava saṃgena tava citrāṃgadaḥ priyaḥ |
saṃprāpsyati ca satpūjāmanuṣaṃgāttvadudbhavāt || 100 ||
[Analyze grammar]

phalavatyuvāca |
yadi deva prasanno me tathānyamapi sadvaram || 101 ||
[Analyze grammar]

hṛdisthaṃ dehi me saukhyaṃ yena saṃjāyate'khilam |
pitā mamaiṣa jābālirnirmukto vasanaiḥ sadā || 102 ||
[Analyze grammar]

ahaṃ yathā tathātraiva saṃtiṣṭhatu divāniśam |
yena saṃtāpamāyāti paśyanmama virodhinīm || 103 ||
[Analyze grammar]

krīḍāṃ brāhmaṇavaṃśasya madyamāṃsasamudbhavām |
madyagandhaṃ samāghrāti māṃsaṃ paśyati saṃskṛtam |
māṃ svacchaṃdaratāṃ nityaṃ duḥkhaṃ yāti dinedine || 104 ||
[Analyze grammar]

śrībhagavānuvāca |
evaṃ bhaviṣyati proktaṃ saṃjātaṃ cādhunā śubhe |
ahaṃ yāsyāmi kailāsaṃ tvaṃ tiṣṭhātra yathoditā || 105 ||
[Analyze grammar]

sūta uvāca |
evaṃ sa bhagavānproktvā gataścādarśanaṃ haraḥ |
yoginyaścaiva tāḥ sarvāḥ svesve sthāne vyavasthitāḥ || 106 ||
[Analyze grammar]

citrāṃgadopi tatraiva kṛtvā prāsādamuttamam |
liṃgaṃ saṃsthāpayāmāsa devadevasya śūlinaḥ || 107 ||
[Analyze grammar]

tataścārādhayāmāsa divārātramataṃdritaḥ || 108 ||
[Analyze grammar]

tataḥ saṃvatsarasyāṃte vyādhimuktaḥ surūpadhṛk |
vimānavaramārūḍho jagāma tridaśālayam |
so'pi jābālināmātha vivastra samapadyata || 109 ||
[Analyze grammar]

janahāsyakaro loke sthitastatraiva sarvadā |
paśyamāno vikārāṃstānduḥkhitaḥ svasutodbhavān || 110 ||
[Analyze grammar]

tataśca garhayāmāsa strīṇāṃ janma mahāmuniḥ |
tasminpīṭhe samāsādya duḥkhena mahatā'nvitaḥ || 111 ||
[Analyze grammar]

aho pāpātmanāṃ puṃsāṃ saṃbhaviṣyaṃti yoṣitaḥ |
yāsāmīdṛksamācāro dvijavaṃśodbhavāsvapi || 112 ||
[Analyze grammar]

sakṛdeva mayā saṃgaḥ kṛto nāryā samanvitaḥ |
ājanmamaraṇaṃ yāvatpāpaṃ prāptaṃ yathedṛśam || 113 ||
[Analyze grammar]

ye punastāsu saṃsaktāḥ sadaiva puruṣādhamāḥ |
kā teṣāṃ jāyate loke gatirvedmi na ciṃtayan || 114 ||
[Analyze grammar]

evaṃ tasya bruvāṇasya yoginyastāḥ krudhānvitāḥ |
tamūcurbrāhmaṇaṃ tatra ghṛṇayā parivāritam || 115 ||
[Analyze grammar]

yoginya ūcuḥ |
mā niṃdāṃ kuru mūḍhātmaṃstvaṃ strīṇāṃ yogamāśritaḥ |
etaccarācaraṃ viśvaṃ strībhiḥ saṃdhāryate yataḥ || 116 ||
[Analyze grammar]

yābhiḥ saṃjanitaḥ śeṣaḥ kūrmaśca tadanaṃtaram |
yābhyāṃ saṃdhāryate pṛthvī yasyāṃ viśvaṃ pratiṣṭhitam || 117 ||
[Analyze grammar]

dhanyeyaṃ te sutā mūḍha yā prāptā yogamuttamam |
prāptā ca paramaṃ sthānaṃ stokairevātra vāsaraiḥ || 118 ||
[Analyze grammar]

tvaṃ punarmūrkhatāṃ prāptaśchāṃdasaṃ mārgamāsthitaḥ |
avidyayā samāyuktaḥ saṃsāre'tra bhramiṣyasi || 119 ||
[Analyze grammar]

muniruvāca |
striyo niṃdyatamāḥ sarvāḥ sarvāvasthāsu duḥkhadāḥ |
ihaloke pare caiva tābhyaḥ saukhyaṃ na labhyate || 120 ||
[Analyze grammar]

yadarthaṃ nihataḥ śumbho niśumbhaśca mahāsuraḥ |
rāvaṇo daṇḍabhūpaśca tathānye'pi sahasraśaḥ || 121 ||
[Analyze grammar]

prāpya tādṛgdvijaṃ kāṃtaṃ gautamaṃ strīsvabhāvataḥ |
ahilyā śakramāsādya cakame śīlavarjitā || 122 ||
[Analyze grammar]

kanyovāca |
yacca niṃdasi mūḍhātmansaṃti niṃdyāśca yoṣitaḥ |
tadvadasva mayā sārdhaṃ yena tvāṃ bodhayāmyaham || 123 ||
[Analyze grammar]

na te'sti hṛdaye buddhirna lajjā na dayā mune |
kimaṃtyajo'pi tatkarma kurute yattvayā kṛtam || 124 ||
[Analyze grammar]

ahaṃ tāvatprahāreṇa tvayā vyāpāditā'dhama |
strīhatyodbhavapāpasya na cintā vidhṛtā hṛdi || 125 ||
[Analyze grammar]

viśeṣeṇa sutāyāśca kopāviṣṭena cetasā |
gacchaṃti pātakānyatra prāyaścittaiḥ pṛthagvidhaiḥ || 126 ||
[Analyze grammar]

strīvadhotthaṃ punaryāti yadi tattvaṃ prakīrtaya |
etanme na ca duḥkhaṃ syādyaddhatāsmi dvijādhama || 127 ||
[Analyze grammar]

yacchaptā nagnasadbhāvaṃ nītā tatpātakaṃ ca te |
kalpāṃte'pi sudurbuddhe na saṃyāsyati kutracit || 128 ||
[Analyze grammar]

tasmādbhuṃkṣva suduḥkhārtaḥ sthito'traiva mayā saha |
na bhūyo niṃdasi prāyo na ca vyāpādayiṣyasi || 129 ||
[Analyze grammar]

aniṃdyā yoṣitaḥ sarvā naitā duṣyaṃti karhicit |
māsimāsi rajo hyāsāṃ duṣkṛtānyapakarṣati || 130 ||
[Analyze grammar]

muni ruvāca |
striyaḥ pāpasamācārā naitāḥ śudhyaṃti karhicit |
parakāṃte ratiryāsāmaṃtyajatvaṃ prayacchati || 131 ||
[Analyze grammar]

kanyovāca |
mā maivaṃ vada mūḍhātmannamedhyā iti yoṣitaḥ |
atra ślokaḥ purā gīto manunā taṃ nibodha me || 132 ||
[Analyze grammar]

brāhmaṇāḥ pādato medhyā gāvo medhyāstu pṛṣṭhataḥ |
ajāśvā mukhato medhyā striyo medhyāśca sarvataḥ || 133 ||
[Analyze grammar]

muniruvāca |
brāhmaṇāḥ sarvato medhyā gāvo medhyāśca sarvataḥ |
ajāśvā mukhato medhyā na medhyāśca striyaḥ kvacit || 134 ||
[Analyze grammar]

kanyovāca |
tasya ciṃtāmaṇirhaste tasya kalpadrumo gṛhe |
kuberaḥ kiṃkarastasya yasya syātkāminī gṛhe || 135 ||
[Analyze grammar]

muniruvāca |
tasyāpado'khilā duḥkhaṃ duḥkhaṃ tasyākhilaṃ gṛhe |
narakaḥ sarvatastasya yasya syātkāminīgṛhe || 136 ||
[Analyze grammar]

kanyovāca |
yāni kānyatra saukhyāni bhogasthānāni yāni ca |
dharmārthakāmajātāni tāni strībhyo bhavaṃti hi || 137 ||
[Analyze grammar]

muniruvāca |
yāni kāni suduḥkhāni kleśāni yāni dehinām ||
yāni kaṣṭānyaniṣṭāni strībhyastāni bhavaṃti ca || 138 ||
[Analyze grammar]

kanyovāca |
dharmārthakāmamokṣānstrī caturo'pi catasṛbhiḥ |
vahnipradakṣiṇābhistānvivāhe'pi pradarśayet || 139 ||
[Analyze grammar]

muniruvāca |
saṃsārabhramaṇaṃ nārī prathame'pi samāgame |
vahnipradakṣiṇānyāyavyājenaiva pradarśayet || 140 ||
[Analyze grammar]

kanyovāca |
ke nāma na virajyaṃti jñānāḍhyā api mānavāḥ |
karṇāṃtalagnanetrāṃtāṃ dṛṣṭvā pīna payodharām || 141 ||
[Analyze grammar]

muniruvāca |
ke nāma na vinaśyaṃti mūḍhajñānā nitaṃbinīm |
ramyabuddhyopasarpaṃti ye jvālāḥ śalabhā iva || 142 ||
[Analyze grammar]

kanyovāca |
nirmukhau ca kaṭhorau ca proddhatau ca manoramau |
strīstanau sevate dhanyo madhumāṃse viśeṣataḥ || 143 ||
[Analyze grammar]

muniruvāca |
ābhoginau maṃḍalinau tatkṣaṇānmuktakaṃcukau |
varamāśīviṣau spṛṣṭau na tu patnyāḥ payodharau || 144 ||
[Analyze grammar]

kanyovāca |
na cāsāṃ racanāmātraṃ kevalaṃ ramyamaṃgibhiḥ |
pariṣvaṃgo'pi rāmāṇāṃ saukhyāya pulakāya ca || 145 ||
[Analyze grammar]

muniruvāca |
na cāsāṃ racanāmātraṃ ramyaṃ syātpāpadaṃ dṛśaḥ |
vapuḥ spṛṣṭaṃ vināśāya strīṇāṃ pretya narakāya ca || 146 ||
[Analyze grammar]

kanyovāca |
ko nāma na sukhī loke ko nāma sukṛtī na ca |
spṛhaṇīyatamaḥ ko na strījano yasya rajyate || 147 ||
[Analyze grammar]

muniruvāca |
ko na muktiṃ vrajettatra ko na śasyataro bhavet |
ko na syātkṣemasaṃyuktaḥ strījane yo na rajyate || 148 ||
[Analyze grammar]

kanyovāca |
saṃsārāṃtaḥ prasuptasya kīṭasyāpi prarocate |
strīśarīraṃ narasyātra kiṃ punarna vivekinaḥ || 149 ||
[Analyze grammar]

muniruvāca |
amedhyajā tasya yathā tathā tadrocanaṃ kṛmeḥ |
tathā saṃsārasūtasya strīśarīraṃ ca kāminaḥ || 150 ||
[Analyze grammar]

kanyovāca |
saukhyasthānaṃ nṛṇāṃ kiṃcidvedhasā 'nyadapaśyatā |
śāśvataṃ ciṃtayitvātha strīratnamidamāhṛtam || 151 ||
[Analyze grammar]

muniruvāca |
baṃdhanaṃ jagataḥ kiṃcidvedhasā'nyadapaśyatā |
strīrūpeṇa tataḥ kopi pāśo'yaṃ strīmayaḥ kṛtaḥ || 152 ||
[Analyze grammar]

sūta uvāca |
evaṃ sa muniśārdūlastayātīva samāgame |
niruttarīkṛto yāvattataḥ prāha nijāṃ sutām || 153 ||
[Analyze grammar]

muniruvāca |
tvayā saha na saṃvādo mayā kāryo'dhunā kvacit |
yā tvaṃ bālāpi māmevaṃ niṣedhayasi sarvataḥ || 154 ||
[Analyze grammar]

tasmāddhanyataraṃ manye ahamātmānamadya vai |
yasya me tvaṃ sutā īdṛgīdṛkchāstravicakṣaṇā || 155 ||
[Analyze grammar]

tasmānna me mahābhāge kopaḥ svalpo'pi vidyate |
tasmādyathecchayā krīḍāṃ kuru yoginimadhyagā || 156 ||
[Analyze grammar]

tataḥ sā lajjitā dṛṣṭvā pitaraṃ snehavatsalam |
praṇipatya punaḥprāha yoginīmadhyasaṃsthitā || 157 ||
[Analyze grammar]

ajñānādyadi vā jñānāttvaṃ niṣiddho mayā prabho |
kṣaṃtavyaṃ sakalaṃ me'dya vālikāyā viśeṣataḥ || 158 ||
[Analyze grammar]

atra pīṭhe samāgatya prathamaṃ te dvijottamāḥ |
pūjāṃ sarve kariṣyaṃti mānavā bhaktitatparāḥ |
paścācca sarvapīṭhasya yāsyaṃti ca parāṃ gatim || 159 ||
[Analyze grammar]

evaṃ sā tatra saṃjātā jābālimunisaṃbhavā |
jābāliśca muniśreṣṭhastathā citrāṃgadeśvaraḥ || 160 ||
[Analyze grammar]

trayāṇāmapi yasteṣāṃ pūjāṃ martyaḥ samācaret |
divasedivase tatra sa siddhiṃ samavāpnuyāt || 161 ||
[Analyze grammar]

nāsādhyaṃ vidyate kiṃcittāvadatra dharātale |
pūjyate bhūmipālādyairbhogāndivyāṃstathā labhet || 162 ||
[Analyze grammar]

tasmātsarvaprayatnena sa muniḥ sā ca kanyakā |
pūjanīyā viśeṣeṇa sa devo'tha maheśvaraḥ || 163 ||
[Analyze grammar]

etadvaḥ sarvamākhyātamākhyānaṃ sarvakāmadam |
paṭhatāṃ śṛṇvatāṃ caiva ihaloke paratra ca || 164 ||
[Analyze grammar]