Chapter 143

[English text for this chapter is available]

sūta uvāca |
tathānyo'pi ca tatrāsti devaścitreśvaro dvijāḥ |
citrapīṭhasya madhyasthaścitrasaukhyaprado nṛṇām || 1 ||
[Analyze grammar]

yaṃ dṛṣṭvā pūjayitvā ca snāpayitvāthavā naraḥ |
mucyate paradārotthaiḥ pātakaiścopapātakaiḥ || 2 ||
[Analyze grammar]

dharṣayitvā guroḥ patnīṃ kanyāṃ vā nijavaṃśajām |
nīcāṃ vā vratayuktāṃ vā kāmāsaktena cetasā || 3 ||
[Analyze grammar]

caitraśuklacaturdaśyāṃ yastaṃ pūjayate naraḥ |
sa tatpāpaṃ nihatyāśu svargalokaṃ tato vrajet || 4 ||
[Analyze grammar]

tathā citrāṃgadastatra jābālisahito nṛpaḥ |
kumāryā sahitaḥ sārddhaṃ nagnayā tatsamutthayā |
santiṣṭhate tadagre tu śapto jābālinā purā || 5 ||
[Analyze grammar]

trayāṇāmapi yasteṣāṃ tasminnahani nirvapet |
sa iṣṭāṃ labhate nārīṃ siddhiṃ ca manasi sthitām || 6 ||
[Analyze grammar]

ṛṣaya ūcuḥ |
kasmājjābālinā śaptaḥ pūrvaṃ citrāṃgado yuvā |
sā ca tattanayā kasmātkumārī vastravarjitā || 7 ||
[Analyze grammar]

adyāpi tiṣṭhate tatra viruddhaṃ rūpamāśritā |
janahāsya karaṃ nityaṃ tasmātsūta vadasva naḥ || 8 ||
[Analyze grammar]

sūta uvāca |
ārsotpūrvaṃ munirnāmnā jābāliriti viśrutaḥ |
kaumārabrahmacaryeṇa yena cīrṇaṃ tapaḥ sadā || 9 ||
[Analyze grammar]

hāṭakeśvarajaṃ kṣetraṃ samāsādya sa saddvijāḥ |
bālye'pi vayasi prāpte samārebhe mahattapaḥ || 10 ||
[Analyze grammar]

kṛcchracāṃdrāyaṇādīni pārākāṇi śanaiḥśanaiḥ |
kurvatā tena te devāḥ saṃnītā bhayagocaram || 11 ||
[Analyze grammar]

tataḥ śakrādayo devāḥ saṃtrastā merumūrdhani |
militvā cakrire maṃtraṃ tasya vighnakṛte mithaḥ || 12 ||
[Analyze grammar]

yadyasya tapaso vṛddhirevaṃ yāsyati nityaśaḥ |
cyāvayiṣyati tannūnaṃ svargarājyācchatakratum || 13 ||
[Analyze grammar]

tasmādgacchatu raṃbhākhyā tatpārśve 'psarasāṃ varā |
brahmacaryavighātāya tasyarṣerbhāvitātmanaḥ || 14 ||
[Analyze grammar]

brahmacaryaṃ tapomūlaṃ yataḥ saṃkīrtitaṃ dvijaiḥ |
tasyābhāvātparikleśaḥ kevalaṃ na phalaṃ vrate || 15 ||
[Analyze grammar]

evaṃ te niścayaṃ kṛtvā samāhūya tataḥ param |
raṃbhāmūcurmaheṃdreṇa sarve devāstadādarāt || 16 ||
[Analyze grammar]

gaccha śīghraṃ mahābhāge jābāliryatra tiṣṭhati |
hāṭakeśvaraje kṣetre tapovighnāya tasya vai || 17 ||
[Analyze grammar]

te te bhāvāḥ prayoktavyāḥ kathāstāstā manoharāḥ |
vardhayaṃtī tathā citte tasya kāmaṃ nirargalam || 18 ||
[Analyze grammar]

raṃbhovāca |
sa munirna vijānāti kāmadharmaṃ sureśvara |
arasajñaṃ kathaṃ deva kariṣyāmi smarānvitam || 19 ||
[Analyze grammar]

indra uvāca |
eṣa yāsyati madvākyādvasaṃtastasya sannidhau |
asya saṃdarśanādeva bhaviṣyati sa sasmaraḥ || 20 ||
[Analyze grammar]

tasmādgaccha drutaṃ tatra sahānena varānane |
saṃsiddhirjāyate yena devakṛtyaṃ bhaveddrutam || 21 ||
[Analyze grammar]

atha sā taṃ praṇamyoccaiḥ prasthitā dharaṇītalam |
vasaṃtena samāyuktā jābāliryatra tiṣṭhati || 22 ||
[Analyze grammar]

athākasmādaśokasya saṃjātaḥ puṣpasaṃcayaḥ |
tilakasya ca cūtasya maṃjaryaḥ samupasthitāḥ || 23 ||
[Analyze grammar]

śiśire ca sarojāni vikāsaṃ prāpureva hi |
vavau ca surabhirvāyurdākṣiṇātyaḥ sukāmadaḥ || 24 ||
[Analyze grammar]

etasminnaṃtare prāptā raṃbhā tatra varāpsarāḥ |
salilāśayatīrastho jābāliryatra tiṣṭhati || 25 ||
[Analyze grammar]

akṣamālādhṛtakaro japanmaṃtramanekadhā |
abhīṣṭaṃ śraddhayā yukto vidhāya pitṛtarpaṇam || 26 ||
[Analyze grammar]

atha saṃpaśyatastasya muktvā vastraparigraham || 1 ||
[Analyze grammar]

snānārthaṃ tajjalaṃ sā'tha praviveśa varāpsarāḥ || 27 ||
[Analyze grammar]

vivastrāṃ tāṃ samālokya so'pi yauvanaśālinīm |
yāmyānilena ca spṛṣṭaḥ kāmasya vaśago 'bhavat || 28 ||
[Analyze grammar]

tatastasyābhavatkaṃpastatkṣaṇādeva sanmune |
akṣamālā karāgrācca papāta dharaṇītale || 29 ||
[Analyze grammar]

pulakaḥ sarvagātreṣu saṃjajñe'tīva dāruṇaḥ |
aśrupātāḥ pataṃti sma koṣṇāḥ plāvitabhūtalāḥ || 30 ||
[Analyze grammar]

atha taṃ kṣubhitaṃ jñātvā cittajñā sā varāpsarāḥ |
nirgatya salilāttasmāccakre vastraparigraham || 31 ||
[Analyze grammar]

tatastasyāṃtike gatvā praṇipatya kṛtādarā |
provāca madhuraṃ vākyaṃ varddhaṃtī tasya tanmatam || 32 ||
[Analyze grammar]

āśrame sakalaṃ brahmankaccitte kuśalaṃ mune |
svādhyāye tapasi prājña śiṣyeṣu mṛgapakṣiṣu || 33 ||
[Analyze grammar]

muniruvāca || 9 ||
[Analyze grammar]

kuśalaṃ me varārohe sarvatraivādhunā sthitam |
viśeṣeṇātra saṃprāptā sarvalakṣaṇalakṣitā || 34 ||
[Analyze grammar]

kā tvaṃ vada mahābhāge mama manmathavardhanī |
kiṃ devī vāsurī vā kiṃ pannagī kiṃ tu mānuṣī || 35 ||
[Analyze grammar]

nivedaya śarīre me kiṃ na paśyasi vepathum |
nirargalaśca romāṃco bāṣpapūraśca netrajaḥ || 36 ||
[Analyze grammar]

raṃbhovāca |
kiṃ te gātrasvabhāvo'yam kiṃ vānyo vyādhisaṃbhavaḥ |
kaccideva na te svāsthyaṃ prapaśyāmi śarīrajam || 37 ||
[Analyze grammar]

muniruvāca |
na me gātrasvabhāvo na vyādhibhiśca sulocane |
śṛṇuṣva kāraṇaṃ kṛtsnaṃ yenedṛksaṃsthitaṃ vapuḥ || 38 ||
[Analyze grammar]

yāvatī vartate velā tava darśanasaṃbhavā |
tāvatkālamidaṃ rūpaṃ mama gātrasamudbhavam || 30 ||
[Analyze grammar]

tadahaṃ manmathāviṣṭo darśanāttava śobhane |
brahmacaryaparopītthaṃ mahāvratadharo'pi ca || 40 ||
[Analyze grammar]

raṃbhovāca ||
yadyevaṃ brāhmaṇaśreṣṭha māṃ bhajasva yathāsukham |
nātra kaścidbhaveddoṣaḥ paṇyanārī yato'smyaham || 41 ||
[Analyze grammar]

sādhāraṇā vayaṃ vipra yataḥ sṛṣṭāḥ svayaṃbhuvā |
sarveṣāmeva lokānāṃ viśeṣeṇa dvijanmanām || 42 ||
[Analyze grammar]

ahaṃ cāpi samālokya tvāṃ mune manmathopamam |
hatā kāmaśaraistīkṣṇairna ca gaṃtuṃ samutsahe || 43 ||
[Analyze grammar]

mayā dṛṣṭāḥ surāḥ pūrvaṃ yakṣā vidyādharāstathā |
siddhāśca kiṃnarā nāgā guhyakāḥ kimu mānuṣāḥ || 44 ||
[Analyze grammar]

nedṛgrūpaṃ vapusteṣāmekasyāpi vilokitam |
madhye brāhmaṇaśārdūla tasmādbhaktāṃ bhajasva mām || 45 ||
[Analyze grammar]

yo nārīṃ kāmasaṃtaptāṃ svayaṃ prāptāṃ parityajet |
sa mūrkhaḥ pacyate ghore narake śāśvatīḥ samāḥ || 46 ||
[Analyze grammar]

evamuktvā tayā so'tha pariṣvakto mahāmuniḥ |
anicchannapi vākyena hṛdayena ca saspṛhaḥ || 47 ||
[Analyze grammar]

tato latāni kuṃje taṃ samānīya munīśvaram |
kāmaśāstroditairbhāvai rarāma kṛtrimairmunim || 48 ||
[Analyze grammar]

evaṃ tayā samaṃ tatra sthito yāvaddinakṣayam |
kāmadharmasamāsaktaḥ saṃtyaktāśeṣakarmakaḥ || 49 ||
[Analyze grammar]

tato niṣkāmatāṃ prāpto lajjayā parivāritaḥ |
visasarja ca tāṃ raṃbhāṃ śaucaṃ cakre tataḥ param || 50 ||
[Analyze grammar]

sāpi tena vinirmuktā kṛtakṛtyā vilāsinī |
prahṛṣṭā prayayau tatra yatra devāḥ savāsavāḥ || 51 ||
[Analyze grammar]

iti śrīskāṃde mahāpurāṇa ekāśītisāhasryāṃ sahitāyāṃ ṣaṣṭhe nāgarakhaṇḍe hāṭakeśvarakṣetramāhātmye jābālikṣobhaṇonāma tricatvāriṃśaduttaraśatatamo'dhyāyaḥ || 143 ||
[Analyze grammar]