Chapter 109

[English text for this chapter is available]

| īśvara uvāca |
etatte sarvamākhyātaṃ yatpṛṣṭo'smi varānane |
sarveṣāmeva tīrthānāṃ sāraṃ tīrthasamuccayam || 1 ||
[Analyze grammar]

eteṣvahaṃ varārohe sarveṣveva vyavasthitaḥ |
nāmnā cānyeṣu tīrtheṣu tridaśānāṃ hitārthataḥ || 2 ||
[Analyze grammar]

yo māmeteṣu tīrtheṣu snātvā paśyati mānavaḥ |
kīrtayetkīrtanānnāmnā sa nūnaṃ mokṣamāpnuyāt || 3 ||
[Analyze grammar]

śrīdevyuvāca |
yeṣu tīrtheṣu yannāma kīrtanīyaṃ tava prabho |
tatkārtsyena mama brūhi yaccahaṃ tava vallabhā || 4 ||
[Analyze grammar]

īśvara uvāca |
vārāṇasyāṃ mahādevaṃ prayāge ca maheśvaram |
naimiṣe devadevaṃ ca gayāyāṃ prapitāmaham || 5 ||
[Analyze grammar]

kurukṣetre viduḥ sthāṇuṃ prabhāse śaśiśekharam |
puṣkare tu hyajāgandhiṃ viśvaṃ viśveśvare tathā || 6 ||
[Analyze grammar]

aṭṭahāse mahānādaṃ mahendre ca mahāvratam |
ujjayinyāṃ mahākālaṃ marukoṭe mahotkaṭam || 7 ||
[Analyze grammar]

śaṃkukarṇe mahātejaṃ gokarṇe ca mahābalam |
rudrakoṭyāṃ mahāyogaṃ mahāliṃgaṃ sthaleśvare || 8 ||
[Analyze grammar]

harṣite ca tathā harṣaṃ vṛṣabhaṃ vṛṣabhadhvaje |
kedāre caiva īśānaṃ śarvaṃ madhyamakeśvare || 9 ||
[Analyze grammar]

suparṇākṣaṃ sahasrākṣe susūkṣmaṃ kārtikeśvare |
bhavaṃ vastrāpathe devi hyugraṃ kanakhale tathā || 10 ||
[Analyze grammar]

bhadrakarṇe śivaṃ caiva daṇḍake daṇḍinaṃ tathā |
ūrdhvaretaṃ tridaṇḍāyāṃ caṇḍīśaṃ kṛmijāṃgale || 11 ||
[Analyze grammar]

kṛttivāsaṃ tathaikāmre chāgaleye kapardinam |
kāliñjare nīlakaṇṭhaṃ śrīkaṇṭhaṃ maṇḍaleśvare || 12 ||
[Analyze grammar]

vijayaṃ caiva kāśmīre jayantaṃ marukeśvare |
hariścandre haraṃ caiva puraścandre ca śaṃkaram || 13 ||
[Analyze grammar]

jaṭiṃ vāmeśvare vindyātsaumyaṃ vai kukkuṭeśvare |
bhūteśvaraṃ bhasmagātre oṃkāre'marakaṇṭakam || 14 ||
[Analyze grammar]

tryaṃbakaṃ ca trisaṃdhyāyāṃ virajāyāṃ trilocanam |
dīptamarkeśvare jñeyaṃ nepāle paśupālakam || 15 ||
[Analyze grammar]

yamaliṃgaṃ ca duṣkarṇe kapālī karavīrake |
jāgeśvare triśūlī ca śrīśaile tripurāṃtakam || 16 ||
[Analyze grammar]

rohaṇaṃ tu ayodhyāyāṃ pātāle hāṭakeśvaram |
kārohaṇe nakulīśaṃ devikāyāmumāpatim || 17 ||
[Analyze grammar]

bhairave bhairavākāramamaraṃ pūrvasāgare |
saptagodāvare bhīmaṃ svayaṃbhūrnirmaleśvare || 18 ||
[Analyze grammar]

karṇikāre gaṇādhyakṣaṃ kailāse tu gaṇādhipam |
gaṃgādvāre himasthānaṃ jala liṃge jalapriyam || 19 ||
[Analyze grammar]

analaṃ vāḍave'gnau ca bhīmaṃ badarikāśrame |
śreṣṭhe koṭīśvaraṃ caiva vārāhaṃ vindhyaparvate || 20 ||
[Analyze grammar]

hemakūṭe virūpākṣaṃ bhūrbhuvaṃ gandhamādane |
liṃgeśvare ca varadaṃ laṃkāyāṃ ca narāṃtakam || 21 ||
[Analyze grammar]

aṣṭaṣaṣṭiriyaṃ devi tavākhyātā viśeṣataḥ |
paṭhatāṃ śṛṇvatāṃ vāpi sarvapātakanāśinī || 22 ||
[Analyze grammar]

tasmātsarvaprayatnena kīrtanīyā vicakṣaṇaiḥ |
kālatraye'pi śucibhirviśeṣācchivadīkṣitaiḥ || 23 ||
[Analyze grammar]

likhitāpi varārohe yasyaiṣā tiṣṭhate gṛhe |
na tatra jāyate doṣo bhūtapretasamudbhavaḥ || 24 ||
[Analyze grammar]

na vyādherna ca sarpāṇāṃ na caurāṇāṃ varānane |
nānyeṣāṃ bhūbhujādīnāṃ kadācidapi kutracit || 25 ||
[Analyze grammar]