Chapter 107

[English text for this chapter is available]

ṛṣaya ūcuḥ |
aṣṭaṣaṣṭiriyaṃ proktā yā tvayā sūtanandana |
kṣetrāṇāṃ devadevasya kathaṃ sā tatra saṃsthitā |
etatsarvaṃ samācakṣva paraṃ kautūhalaṃ hi naḥ || 1 ||
[Analyze grammar]

sūta uvāca |
praśnabhāro mahāneṣa yo bhavadbhiḥ prakīrtitaḥ |
tathāpi kīrtayiṣyāmi namaskṛtvā pinākinam || 2 ||
[Analyze grammar]

camatkārapure'vāsītpūrvaṃ brāhmaṇasattamaḥ |
vatsasyānvayasaṃbhūtaścitraśarmā mahāyaśāḥ || 3 ||
[Analyze grammar]

tasya buddhiriyaṃ jātā pātāle hāṭakeśvaram |
atrānīya tato bhaktyā pūjayāmi divāniśam || 4 ||
[Analyze grammar]

evaṃ sa niścayaṃ kṛtvā tapaścake tataḥ param |
niyato niyatāhāraḥ parāṃ niṣṭhāṃ samāśritaḥ || 5 ||
[Analyze grammar]

tasyāpi bhagavāñchaṃbhuḥ kālena mahatā tataḥ |
saṃtuṣṭo brāhmaṇa śreṣṭhāstataḥ provāca sādaram || 6 ||
[Analyze grammar]

varaṃ prārthaya viprendra yatte manasi vartate |
api trailokyarājyaṃ te tuṣṭo dāsyāmyasaṃśayam || 7 ||
[Analyze grammar]

tasmātprārthaya te nityaṃ yatra citte vyavasthitam |
durlabhaṃ sarvadevānāṃ manuṣyāṇāṃ viśeṣataḥ || 8 ||
[Analyze grammar]

citraśarmovāca |
yadi tuṣṭosi me deva varaṃ cenme prayacchasi |
tadatrāgaccha pātālālliṃgarūpī sureśvara || 9 ||
[Analyze grammar]

yatpātāle sthitaṃ liṃgaṃ brahmaṇā saṃpratiṣṭhitam |
hāṭakeśvarasaṃjñaṃ tu tadihāyātu satva ram || 10 ||
[Analyze grammar]

śrībhagavānuvāca |
acalaṃ sarvaliṃgaṃ syātsarvatrāpi dvijottama |
ki punaḥ prathamaṃ yacca brahmaṇā nirmitaṃ svayam || 11 ||
[Analyze grammar]

tasmātthāpaya liṃgaṃ taddhāṭakena dvijottama |
hāṭakeśvarasaṃjñaṃ tu loke khyātaṃ bhaviṣyati || 12 ||
[Analyze grammar]

somavāre catudaśyāṃ śuklāyāṃ śraddhayānvitaḥ |
yastadbhaktisamāyuktaḥ pūjayiṣyati mānavaḥ || 3 ||
[Analyze grammar]

ādyaliṃgodbhavaṃ śreyaḥ pūjayā lapsyate dvija |
evamuktvā'tha bhagavāṃstataścādarśanaṃ gataḥ || 4 ||
[Analyze grammar]

citraśarmā'pi kṛtvātha prāsādaṃ sumanoharam |
tatra hemamayaṃ liṃgaṃ sthāpayāmāsa bhaktitaḥ || 15 ||
[Analyze grammar]

śāstroktena vidhānena pūjāṃ cakre ca nityaśaḥ |
tatastrailokya vikhyātaṃ talliṃgaṃ tatra vai dvijāḥ || 16 ||
[Analyze grammar]

dūrādabhyetya lokāśca pūjayaṃti tataḥ param |
atha tatra dvijā ye'nye saṃsthitā guṇavattarāḥ || 17 ||
[Analyze grammar]

teṣāṃ spardhā tato jātā dṛṣṭvā tasya viceṣṭitam |
ekasthānaprasūtānāṃ sarveṣāṃ guṇaśālinām || 18 ||
[Analyze grammar]

ayaṃ guṇavihīno'pi prakhyāto bhuvanatraye |
harārādhanamāsādya yasmāttasmādvayaṃ haram |
tadarthe toṣayiṣyāmaḥ sāmyaṃ yena prajāyate || 19 ||
[Analyze grammar]

aṣṭaṣaṣṭiḥ smṛtā loke kṣetrāṇāṃ śūlapāṇinaḥ |
yatra sānnidhyamabhyeti trikālaṃ parameśvaraḥ || 20 ||
[Analyze grammar]

aṣṭaṣaṣṭiśca gotrāṇāmasmākaṃ cātra saṃsthitā |
etena mūḍhamanasā sārdhaṃ sāmānyalakṣaṇā || 22 ||
[Analyze grammar]

tasmādanena cārādhya bhagavantaṃ trilocanam |
tacca liṃgaṃ samānītamatra pātālasaṃsthitam || 22 ||
[Analyze grammar]

tathā sarvaiśca sarvāṇi kṣetraliṃgāni kṛtsnaśaḥ |
ānetavyāni cārādhya tapaḥśaktyā maheśvaram || 23 ||
[Analyze grammar]

eteṣāṃ sarvagotrāṇāmāneṣyati ca śaṃkaraḥ |
yadgotraṃ kṣetrasaṃyuktaṃ yaccānyadvā bhaviṣyati || 24 ||
[Analyze grammar]

tataste śarmasaṃyuktāḥ sarva eva dvijottamāḥ |
cakrustapaḥkriyāṃ sarve duṣkarāṃ sarvajantubhiḥ || 25 ||
[Analyze grammar]

japairhomopavāsaiśca niyamaiśca pṛthagvidhaiḥ |
balipūjopahāraiśca snānadānādibhistathā || 26 ||
[Analyze grammar]

liṃgaṃ saṃsthāpya devasya nāmnā khyātaṃ dvijeśvaram |
manoharatare procce prāsāde parvatopame || 27 ||
[Analyze grammar]

tyaktvā gṛhakriyāḥ sarvāstathā yajñasamudbhavāḥ |
anyāśca lokayātrotthāstoṣayaṃti maheśvaram || 28 ||
[Analyze grammar]

evamārādhyamāno'pi santoṣaṃ parameśvaraḥ |
nābhyagacchatparāṃ tuṣṭiṃ kathaṃcidapi sa dvijāḥ || 29 ||
[Analyze grammar]

tato varṣasahasrāṃte samārādhya maheśvaram |
na ca kiñcitphalaṃ prāptā yāvatkruddhāstato'khilāḥ || 30 ||
[Analyze grammar]

asya mūrkhatamasyā'pi tvaṃ śūliṃścitraśarmaṇaḥ |
sustokenā'pi kālena santoṣaṃ paramaṃ gataḥ || 31 ||
[Analyze grammar]

vayaṃ vārdhakyamāpannā bālyātprabhṛti śaṃkaram |
pūjayanto'pi no dṛṣṭastathā'pi parameśvara || 32 ||
[Analyze grammar]

tasmātsarve prakartavyaṃ havyavāhapraveśanam |
asmābhirniścayo hyeṣa tavāgre sāṃprataṃ kṛtaḥ || 33 ||
[Analyze grammar]

tataścāhṛtya kāṣṭhāni sarve te dvijasattamāḥ |
īśvaraṃ manasi dhyātvā citāścakruḥ pṛthagvidhāḥ || 34 ||
[Analyze grammar]

tathā sarvaṃ kriyākalpaṃ snānadānādikaṃ ca yat |
kṛtvā te brāhmaṇāḥ sarve susamiddhahutāśanam || 35 ||
[Analyze grammar]

yāvatkṛtvā sutaiḥ sārdhaṃ praviśaṃti samāhitāḥ |
tāvatsa bhagavāṃstuṣṭasteṣāṃ saṃdarśanaṃ yayau || 36 ||
[Analyze grammar]

abravīcca vihasyoccairmeghagambhīrayā girā |
sarvāṃstānbrāhmaṇaśreṣṭhānmṛtānsaṃjīvayanniva || 37 ||
[Analyze grammar]

bho bho brāhmaṇaśārdūlā mā maivaṃ sāhasaṃ mahat |
yūyaṃ kuruta madvākyātsaṃtuṣṭasya viśeṣataḥ || 38 ||
[Analyze grammar]

tasmādvadata yaccitte yuṣmākaṃ caiva saṃsthitam |
yena dattvā pragacchāmi svameva bhuvanaṃ punaḥ || 39 ||
[Analyze grammar]

brāhmaṇā ūcuḥ |
asminkṣetre suraśreṣṭha purasyāsya ca saṃnidhau |
kṣetrāṇāmaṣṭaṣaṣṭiryā dhanyā saṃkīrtyate janaiḥ || 40 ||
[Analyze grammar]

sadābhyaitu samaṃ liṃgaistairādyaiḥ surasattama |
yenāmarṣapraśāṃtirnaḥ sarveṣāmiha jāyate || 41 ||
[Analyze grammar]

eṣa saṃspardhate'smābhiḥ sarvairguṇavivarjitaḥ |
tvalliṃgasya prabhāvena tasmādetatsamācara || 42 ||
[Analyze grammar]

sūta uvāca |
etasminnaṃtare vipro jñātvā taṃ varadaṃ haram |
uvāca spardhayā yuktaścitraśarmā maheśvaram || 43 ||
[Analyze grammar]

citraśarmovāca |
etaiḥ prāṇaparityāgamārabhya tadanataram |
tuṣṭiṃ nīto'si devaśa kṛtvā ca sumahattapaḥ || 44 ||
[Analyze grammar]

mayā sparddhamānaiśca kevalaṃ guṇagarvitaiḥ |
tasmādeṣo na dātavyatvaṃ tvayā kiṃcitsureśvara || 46 ||
[Analyze grammar]

yadi tvaṃ māmatikramya saṃpradāsyasi vāṃchitam |
etaiḥ putrakalatraiśca sārdhaṃ pratyakṣatastava |
pāvakaṃ sādhayiṣyāmi tasmādyuktaṃ samācara || 46 ||
[Analyze grammar]

sūta uvāca |
tasya tadvacanaṃ śrutvā bhagavāñchaśiśekharaḥ |
cintayāmāsa cittena kimatra sukṛtaṃ bhavet || 47 ||
[Analyze grammar]

ete brāhmaṇaśārdūlā vināśaṃ yāṃti matkṛte |
eṣo'pi sarvasaṃsiddho gaṇatulyo dvijottamaḥ || 48 ||
[Analyze grammar]

tasmāddvābhyāṃ mayā kāryaṃ kṣetre saukhyaṃ yathā bhavet |
brāhmaṇānāṃ viśeṣeṇa tathā cātra nivāsinām || 49 ||
[Analyze grammar]

mamāpi sarvadā citte kṛtyametaddhi vartate |
eka sthāne karomyeva sarvakṣetrāṇi yāni me || 50 ||
[Analyze grammar]

bhaviṣyati tathā kālo raudraḥ kalisamudbhavaḥ |
tatra kṣetrāṇi tīrthāni nāśaṃ yāsyaṃti bhūtale || 51 ||
[Analyze grammar]

sattīrthaistadbhayātsarvaiḥ kṣetrametatsamāśritam |
ānayiṣyāmyahamapi svāni kṣetrāṇi kṛtsnaśaḥ || 52 ||
[Analyze grammar]

tatastaṃ citraśarmāṇaṃ prāha cedaṃ maheśvaraḥ |
śṛṇu madvacanaṃ kṛtsnaṃ kuruṣva tadanaṃtaram || 53 ||
[Analyze grammar]

atra kṣetrāṇi sarvāṇi madīyāni dvijottama |
samāgacchaṃtu viprāśca prabhavaṃtu praharṣitāḥ || 54 ||
[Analyze grammar]

tavāpi yogyatāṃ śreṣṭhāṃ kariṣyāmi mahāmate |
yadi me vartase vākye muktvā sparddhāṃ dvijodbhavām || 55 ||
[Analyze grammar]

turīyamapi te gotraṃ vedoktena krameṇa ca |
ādyatāṃ cāpi te sarve kīrtayiṣyaṃti te dvijāḥ || 56 ||
[Analyze grammar]

tathānyadapi sanmānaṃ tava yacchāmi ca dvija |
ācandrārkamasaṃdigdhaṃ putrapautrādikaṃ ca yat || 57 ||
[Analyze grammar]

tvadanvaye bhaviṣyaṃti putrapautrāstathā pare |
kṛtye śrāddhe tarpaṇe vā kriyamāṇe vidhānataḥ || 58 ||
[Analyze grammar]

ādyasya vatsasaṃjñasya nāma uccārya gotrajam |
tato nāmāni cāpyevaṃ kīrtayiṣyaṃti bhaktitaḥ || 59 ||
[Analyze grammar]

tataḥ saṃtarpayiṣyaṃti pitṝnatha pitāmahān |
tathānyānapi baṃdhūṃśca suhṛtsaṃbaṃdhibāṃdhavān || 60 ||
[Analyze grammar]

tvadanvaye vinā nāmnā tvadīyena vimohitāḥ |
ye pitṝṃstarpayiṣyaṃti teṣāṃ vyarthaṃ bhaviṣyati || 61 ||
[Analyze grammar]

śrāddhaṃ vā yadi vā dānaṃ tarpaṇaṃ vā tvadudbhavam |
tasmādahaṃkṛtiṃ muktvā māmārādhaya kevalam || 62 ||
[Analyze grammar]

yena siddho'pi saṃsiddhiṃ parāmāpnoṣi śāśvatīm |
evaṃ saṃbodhya taṃ vipraṃ kṛtvādyamapi paścimam || 63 ||
[Analyze grammar]

tatastānbrāhmaṇānāha prāsādaḥ kriyatāmiti |
gotraṃgotraṃ puraskṛtya sthāpyaṃ liṃgamanuttamam |
yena saṃkramaṇaṃ teṣu mama saṃjāyatedvijāḥ || 64 ||
[Analyze grammar]

atha te brāhmaṇāstatra bhūmibhāgānmanoharān |
dṛṣṭvādṛṣṭvā pracakruśca prāsādānharṣasaṃyutāḥ || 65 ||
[Analyze grammar]

aṣṭaṣaṣṭimitāndivyānkailāsaśikharopamān |
teṣu saṃsthāpayāmāsu liṅgāni vividhāni ca |
kṣetrekṣatre ca yannāma tattatsaṃjñāṃ pracakrire || 66 ||
[Analyze grammar]

atha teṣāṃ punardṛṣṭiṃ gatvā devastrilocanaḥ |
provāca madhuraṃ vākyaṃ kasmiṃścitkālaparyaye |
ārādhitastapaḥśaktyā liṃgasaṃsthāpanādanu || 67 ||
[Analyze grammar]

śrībhagavānuvāca |
parituṣṭo'smi vipreṃdrā yuṣmākamahamadya vai |
etanmama kṛtaṃ kṛtyaṃ bhavadbhirakhilaṃ tataḥ || 68 ||
[Analyze grammar]

asmadīyāni liṃgāni kṣetrāṇi ca kalerbhayāt |
tato mānyāśca me yūyaṃ nānyairetadbhaviṣyati || 69 ||
[Analyze grammar]

tasmāccittasthitaṃ śīghraṃ prārthayaṃtu dvijottamāḥ |
saṃprayacchāmi yenāśu yadyapi syātsudurlabham || 70 ||
[Analyze grammar]

brāhmaṇā ūcuḥ |
yadi deva prasannastvamasmākaṃ ca sureśvara |
paścimaścitraśarmā ca yathādyo bhavatā kṛtaḥ || 71 ||
[Analyze grammar]

asmadīyaṃ sadā nāma kīrtanīyamasaṃśayam |
śrāddhakṛtyeṣu sarveṣu yathā tena samā vayam |
bhavāmastvatprasādena sāṃprataṃ citraśarmaṇā || 72 ||
[Analyze grammar]

śrībhagavānuvāca |
yuṣmākamapi ye kecidvaśaṃ yāsyaṃti mānavāḥ |
yuvānaḥ śāstrasaṃyuktā vedavidyāviśāradāḥ || 73 ||
[Analyze grammar]

ānayiṣyatha tānyūyamāmuṣyāyaṇasaṃjñitān |
nityaṃ sthitāśca te kṣetre śrāddhasyākṣayyakārakāḥ || 74 ||
[Analyze grammar]

evamuktvātha deveśastataścādarśanaṃ gataḥ |
te'pi viprāḥ susaṃtuṣṭāstatra sthāne vyavasthitāḥ || 75 ||
[Analyze grammar]

evaṃ tatra samastāni kṣetrāṇyāyatanāni ca |
kalibhītāni vipreṃdrā nivasaṃti sadaiva hi || 76 ||
[Analyze grammar]

evaṃ te brāhmaṇāḥ prāpya siddhiṃ ceśvarapūjanāt |
khyātāḥ sarvatra bhuvane śrāddhasyākṣayyakārakāḥ || 77 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetra māhātmye brāhmaṇacitraśarmaliṃgasthāpanavṛttāṃtavarṇanaṃnāma saptottaraśatatamo'dhyāyaḥ || 107 ||
[Analyze grammar]