Chapter 78

[English text for this chapter is available]

| ṛṣaya ūcuḥ |
brahmaṇā katame sthāne tatra sūta kṛtaṃ tapaḥ |
vālakhilyaiśca taiḥ sarvairmunibhiḥ śaṃsitavrataiḥ || 1 ||
[Analyze grammar]

sūta uvāca |
tasyā vāyavyadigbhāge haravedyā dvijottamāḥ |
samyakchraddhāprayatnena brahmaṇā vihitaṃ tapaḥ || 2 ||
[Analyze grammar]

paścime vālakhilyaiśca japasnānaparāyaṇaiḥ |
tatrāścaryamabhūdyadvai pūrvaṃ brāhmaṇa sattamāḥ |
āśrame caturāsyasya tadvo vakṣyāmi sāṃpratam || 3 ||
[Analyze grammar]

tatra duścāriṇī kācidrātrau brāhmaṇavaṃśajā |
devadattaṃ samāsādya vallabhaṃ ramate sadā || 4 ||
[Analyze grammar]

ajñātā patinā mātrā tathānyairapi bāṃdhavaiḥ |
kṛṣṇapakṣaṃ samāsādya vijane hṛṣṭamānasā || 5 ||
[Analyze grammar]

kasyacittvatha kālasya dṛṣṭā sā kenaci ddvijāḥ |
tatrasthā jārasaṃyuktā svabhartuśca niveditā || 6 ||
[Analyze grammar]

athāsau kopasaṃyuktastasyā bhartā suniṣṭhuraiḥ |
vākyaistāṃ garhayāmāsa prahāraiścāpya tāḍayat || 7 ||
[Analyze grammar]

atha sā dhārṣṭyamāsādya strīsvabhāvaṃ samāśritā |
provāca bāṣpapūrṇākṣī dīnāṃjalipuṭā sthitā || 8 ||
[Analyze grammar]

kiṃ māṃ durjanavākyena tvaṃ tāḍayasi niṣṭhuraiḥ |
prahārairdoṣanirmuktāṃ tvatpādapraṇatāṃ vibho || 9 ||
[Analyze grammar]

ahaṃ tvāṃ śapathaṃ kṛtvā bhakṣayitvā'tha vā viṣam |
praviśya havyavāhaṃ vā kariṣye pratyayānvitam || 10 ||
[Analyze grammar]

atha tāṃ brāhmaṇaḥ prāha yadi tvaṃ pāpavarjitā |
purato devaviprāṇāṃ kuru divyagrahaṃ svayam || 11 ||
[Analyze grammar]

sā tatheti pratijñāya sāhasena samanvitā |
divyagrahaṃ tataścakre yathoktavidhinā satī || 12 ||
[Analyze grammar]

śuddhiṃ ca prāptā sarveṣāṃ bandhūnāṃ ca dvijanmanām |
purataśca gurūṇāṃ ca devānāmapi pāpakṛt || 13 ||
[Analyze grammar]

etasminnantare tasyāḥ sādhuvādo mahānabhūt |
dhikchabdaśca tathā patyuḥ sarvairdattaḥ sugarhitaḥ || 14 ||
[Analyze grammar]

aho pāpasamācāro duṣṭo'yaṃ brāhmaṇādhamaḥ |
apāpāṃ dharmapatnīṃ yo mithyādoṣeṇayojayet || 15 ||
[Analyze grammar]

evaṃ sa nindyamānastu sarvalokairdvijottamāḥ |
kopaṃ cakre tato vahniṃ samuddiśya saduḥkhitaḥ || 16 ||
[Analyze grammar]

śāpaṃ dātuṃ matiṃ cakre tato vahneḥ suduḥkhitaḥ |
abravītparuṣaṃ vākyaṃ nindamānaḥ punaḥpunaḥ || 17 ||
[Analyze grammar]

mayā svayaṃ pradṛṣṭeyaṃ jāreṇa saha saṃgatā |
tvayā vahne supāpeyaṃ na kasmādbhasmasātkṛtā || 18 ||
[Analyze grammar]

tasmāttvāṃ pāpakarmāṇamasatyapakṣapātinam |
asaṃdigdhaṃ śapiṣyāmi raudraśāpena sāṃpratam || 19 ||
[Analyze grammar]

sūta uvāca |
tasya tadvacanaṃ śrutvā saṃkruddhasya dvijanmanaḥ |
saptārcirbhayasaṃtrastaḥ kṛtāṃjaliruvāca tam || 20 ||
[Analyze grammar]

agniruvāca |
naiṣa doṣo mama brahmanyanna dagdhā tava priyā |
kṛtāgasā'pi me vākyaṃ śṛṇuṣvātra sphuṭeritam || 21 ||
[Analyze grammar]

anayā parakāṃtena kṛtaḥ saha samāgamaḥ |
ciraṃ kālaṃ dvija śreṣṭha tvayā jñātādya vāsare || 22 ||
[Analyze grammar]

paraṃ yasmādviśuddhaiṣā mayā dagdhā na sā dvija |
kāraṇaṃ tacca te vacmi śṛṇuṣvaikamanāḥ sthitaḥ || 23 ||
[Analyze grammar]

yatrānayā kṛtaḥ saṃgaḥ parakāṃtena vai dvija |
tasminnāyatane brahmā rudraśīrṣo vyavasthitaḥ || 24 ||
[Analyze grammar]

tatra kṛtvā rataṃ citraṃ parakāṃtasamaṃ tadā |
paśyati sma tato rudraṃ brahmamastakasaṃsthitam || 25 ||
[Analyze grammar]

tataḥ prakṣālayatyaṃgaṃ kuṇḍe tatrāgrataḥ sthite |
kṛtapāpāpi tenaiṣā śuddhiṃ yāti śucismitā || 26 ||
[Analyze grammar]

atra pūrvaṃ vipāpmā'bhūdbrahmā lokapitāmahaḥ |
satīvaktraṃ samālokya kāmārto'pi sa pāpakṛt || 27 ||
[Analyze grammar]

tasmānnāstyatra me doṣaḥ svalpo'pi dvijasattama |
rudraśīrṣaprabhāvo'yaṃ tasya kuṇḍodakasya ca || 28 ||
[Analyze grammar]

tasmādenāṃ samādāya saṃśuddhāṃ pāpavarjitām |
gṛhaṃ gaccha dvijaśreṣṭha satyametanmayo ditam || 29 ||
[Analyze grammar]

brāhmaṇa uvāca |
yā mayā sahasā dṛṣṭā svayameva hutāśana |
parakāṃtena tāṃ nādya śuddhāmapi gṛhaṃ naye || 30 ||
[Analyze grammar]

ityuktvā ca dvijaśreṣṭhastāṃ tyaktvāpi śucivrataḥ |
jagāma svagṛhaṃ paścāttathā jagmurjanā gṛhān || 31 ||
[Analyze grammar]

sāpi tena parityaktā patinā hṛṣṭamānasā |
jñātvā tattīrthamāhātmyaṃ vaiśvānaramukheritam || 32 ||
[Analyze grammar]

tenaiva parakāṃtena viśeṣeṇa ratikriyām |
tasminnāyatane cakre kuṇḍe toyāvagāhanam || 33 ||
[Analyze grammar]

athānye paralokasya bhītyā'tīva vyavasthitāḥ |
vimukhāḥ paradāreṣu nāryaścāpi pativratāḥ || 34 ||
[Analyze grammar]

dūrato'pi samabhyetya te sarve tatra maṃdire |
rudraśīrṣābhidhānaṃ ca pracakruḥ suratotsavam || 35 ||
[Analyze grammar]

nimajjaṃti tataḥ kuṇḍe tasminpātakanāśane |
bhavaṃti pāpanirmuktā rudraśīrṣāvalokanāt || 36 ||
[Analyze grammar]

etasminnaṃtare naṣṭo dharmaḥ patnīsamudbhavaḥ |
puruṣāṇāṃ tataḥ strīṇāṃ nijakāṃtāsamudbhavaḥ || 37 ||
[Analyze grammar]

yo yāṃ paśyati rūpāḍhyāṃ nārīmapi kulodbhavām |
sa tatrānīya saṃhṛṣṭo bhajate dvijasattamāḥ || 38 ||
[Analyze grammar]

tathā nārī surūpāḍhyaṃ yaṃ paśyati naraṃ kvacit |
sāpi tatra samānīya kurute suratotsavam || 39 ||
[Analyze grammar]

lipyate na ca pāpena kathaṃcittakṛtena ca |
naro vā yadi vā nārī tattīrthasya prabhāvataḥ || 40 ||
[Analyze grammar]

kasyacittvatha kālasya tatra rājā vidūrathaḥ |
ānarttaviṣaye jajñe vārdhakyaṃ ca kramādyayau || 41 ||
[Analyze grammar]

tasya bhāryā'bhavattanvī taruṇī vararūpadhṛk |
paścime vayasi prāpte prāṇebhyo'pi garīyasī || 42 ||
[Analyze grammar]

na tasyāḥ sa jarāgrastaścitte vasati pārthivaḥ |
tasmiṃstīrthe samāgatya vāṃchitaṃ ramate naraḥ || 43 ||
[Analyze grammar]

pārthivo'pi parijñāya tasyāstacca viceṣṭitam |
kopāviṣṭastato gatvā tasminkṣetre suśobhane || 44 ||
[Analyze grammar]

tatkuṇḍaṃ pūrayāmāsa tataḥ pāṃśūtkarairdrutam |
babhaṃja taṃ ca prāsādaṃ tataḥ provāca dāruṇam || 45 ||
[Analyze grammar]

yaścaitatpūritaṃ kuṇḍaṃ pāṃśunā nikhaniṣyati |
prāsādaṃ ca punaścainaṃ kariṣyati punarnavam || 46 ||
[Analyze grammar]

paradārakṛtaṃ pāpaṃ tasya saṃpatsyate'khilam |
yadatra prakariṣyaṃti mānavāḥ kāmamohitāḥ || 47 ||
[Analyze grammar]

sūta uvāca |
evaṃ sa pārthivaḥ procya tāmādāya tataḥ priyām |
jagāma svagṛhaṃ paścātprahṛṣṭenāṃtarātmanā || 48 ||
[Analyze grammar]

atha tāṃ viratāṃ jñātvā so'nyacittāṃ priyāṃ nṛpaḥ |
yatnena rakṣayāmāsa viśvāsaṃ naiva gacchati || 49 ||
[Analyze grammar]

anyasmindivase śastraṃ sūkṣmaṃ veṇyāṃ nidhāya sā |
jagāma śayanaṃ tasya vadhārthaṃ varavarṇinī || 50 ||
[Analyze grammar]

tatastena samaṃ hāsyaṃ kṛtvā kṣatriyabhāvajam |
surataṃ rucirairbhāvairhāvairbhūribhireva ca || 51 ||
[Analyze grammar]

tato nidrāvaśaṃ prāptaṃ taṃ nṛpaṃ sā nṛpapriyā |
svaveṇyāḥ śastramādāya nijaghāna sunirdayā || 52 ||
[Analyze grammar]

evaṃ tasya phalaṃ jātaṃ sadyastīrthasya bhaṃgajam |
ānartādhipate raudraṃ sarvalokavigarhitam || 53 ||
[Analyze grammar]

adyāpi tatra deveśo rudraśīrṣaḥ sa tiṣṭhati |
liṃgabhedabhayāttena na sa bhagno dvijottamāḥ || 54 ||
[Analyze grammar]

yastasya purataḥ sthitvā japedrudraśiraḥ śuciḥ |
māghaśuklacaturdaśyāṃ pūjayitvā sragādibhiḥ || 55 ||
[Analyze grammar]

vāṃchitaṃ labhate cāśu tasyeśasya prabhāvataḥ |
aṣṭottaraśataṃ yāvadyo japetpurataḥ sthitaḥ || 56 ||
[Analyze grammar]

rudraśīrṣaṃ na saṃdehaḥ sa yāti paramāṃ gatim |
ekavāraṃ naro yo vā tatpuraḥ paṭhati dvijaḥ || 57 ||
[Analyze grammar]

nityaṃ dinakṛtātpāpānmucyate dvijasattamāḥ |
etadvaḥ sarvamākhyātaṃ rudraśīrṣasamudbhavam || 58 ||
[Analyze grammar]

māhātmyaṃ sarvapāpānāṃ sadyo nāśanakārakam |
maṃgalaṃ paramaṃ hyetadāyuṣyaṃ kīrtivardhanam |
rudraśīrṣasya māhātmyaṃ tasmācchrotavyamādarāt || 59 ||
[Analyze grammar]