Chapter 54

[English text for this chapter is available]

| sūta uvāca |
carmamuṃḍā tathā devī tasminsthāne vyavasthitā |
nalena sthāpitā pūrvaṃ svayameva mahātmanā || 1 ||
[Analyze grammar]

abhyarcayati tāṃ bhaktyā yo mahānavamī dine |
sa kāmānvāṃchitāṃllabdhvā padaṃ prāpnoti śāśvatam || 2 ||
[Analyze grammar]

vīrasenasutaḥ pūrvaṃ nalonāma mahīpatiḥ |
āsītsarvaguṇopetaḥ sarva śatrukṣayāvahaḥ || 3 ||
[Analyze grammar]

bhāryā tasyābhavatsādhvī prāṇebhyopi garīyasī |
damayaṃtīti vikhyātā vidarbhādhipateḥ sutā || 4 ||
[Analyze grammar]

athāsau kalināviṣṭo dyūtaṃ cakre mahīpatiḥ |
puṣkareṇa samaṃ viprā dāyādena divāniśam || 5 ||
[Analyze grammar]

tataḥ sa vyasanāsakto vāryamāṇo'pi sajjanaiḥ |
hārayāmāsa saptāṃgaṃ rājyaṃ muktvā ca tāṃ priyām || 6 ||
[Analyze grammar]

atha tāṃ sa samādāya praviṣṭo gahanaṃ vanam |
nirjalaṃ lajjayāviṣṭo duḥkhavyākuliteṃdriyaḥ || 7 ||
[Analyze grammar]

tataḥ sa ciṃtayāmāsa yadyeṣā bhīmamaṃdire |
yāti tanmucyate kaṣṭādvanavāsasamudbhavāt || 8 ||
[Analyze grammar]

na mayā tatra gaṃtavyaṃ kathaṃcidapi māninā |
tasmādenāṃ parityajya rātrau gacchāmi dūrataḥ || 9 ||
[Analyze grammar]

yena tyaktā mayā sādhvī kuṇḍinaṃ yāti tatpuram |
sa evaṃ niścayaṃ kṛtvā sukhasuptāṃ vihāya tām |
prajagāma vanaṃ ghoraṃ vanyaśvāpadasaṃkulam || 10 ||
[Analyze grammar]

pratyūṣe cāpi sotthāya yāvatpaśyati bhābhinī |
tāvatpaśyatiśūnyaṃ svaṃ pārśvaṃ yatra nalaḥ sthitaḥ || 11 ||
[Analyze grammar]

tato vilapya duḥkhārtā karuṇaṃ tatra kānane |
jagāma mārgamāśrittha piturharmyaṃ śanaiḥśanaiḥ || 12 ||
[Analyze grammar]

nalo'pi ca vane tasminbhramamāṇo mahīpatiḥ |
ekākī vṛkṣakuṃjāni sevayāmāsa sarvadā || 13 ||
[Analyze grammar]

tatastadvanamutsṛjya jagāmānyanmahāvanam |
nānāvṛkṣagaṇairyuktaṃ bahuśvāpadasaṃkulam || 14 ||
[Analyze grammar]

evaṃ sa pṛthivīpālo bhramamāṇovanādvanam |
hāṭakeśvarajaṃ kṣetramāsasāda tataḥ param || 15 ||
[Analyze grammar]

etasminnaṃtare prāptaṃ tanmahānavamīdinam |
viśeṣādyatra bhūpālāḥ pūjayanti sureśvarīm || 16 ||
[Analyze grammar]

tataḥ sa mṛnmayīṃ kṛtvā carmamuṇḍadharāṃ nṛpaḥ |
vibhavābhāvataḥ paścātphalamūlairatarpayat || 17 ||
[Analyze grammar]

tatastasyāḥ stutiṃ kṛtvā puraḥ sthitvā kṛtāṃjaliḥ |
śraddhayā parayā yukto niṣadhādhipatiḥ svayam || 18 ||
[Analyze grammar]

jaya sarvagate devi carmamuṇḍadhare vare |
jaya daityakulocchedadakṣe dakṣātmaje śubhe || 19 ||
[Analyze grammar]

kālarātri jayācintye navamyaṣṭamivallabhe |
trinetre tryaṃbakābhīṣṭe jaya devi surārcite || 20 ||
[Analyze grammar]

bhīmarūpe surūpe ca mahāvidye mahābale |
mahodaye mahākāye jayadevi mahāvrate || 21 ||
[Analyze grammar]

nityarūpe jagaddhātri surāmāṃsavasāpriye |
vikarāli mahākāli jaya pretajanānuge || 22 ||
[Analyze grammar]

śavayānarate ramye bhujaṃgābharaṇānvite |
pāśahaste mahāhaste rudhiraughakṛtāspade || 23 ||
[Analyze grammar]

phetkārā ravaśobhiṣṭhe gītavādyavirājite |
jayānādye jaya dhyeye bhargadehārdhasaṃśraye || 24 ||
[Analyze grammar]

tvaṃ ratistvaṃ dhṛtistuṣṭistvaṃ gaurī tvaṃ sureśvarī |
tvaṃ lakṣmīstvaṃ ca sāvitrī gāyatrī tvamasaṃśayam || 25 ||
[Analyze grammar]

yatkiṃcittriṣu lokeṣu strīrūpaṃ devi dṛśyate |
tatsarvaṃ tvanmayaṃ nātra vikalpo'sti mama kvacit || 26 ||
[Analyze grammar]

yena satyena tena tvamatrāvāsaṃ drutaṃ kuru |
sānnidhyaṃ bhaktitastuṣṭā surāsuranamaskṛte || 27 ||
[Analyze grammar]

sūta uvāca |
evaṃ stutā ca sā devī nalena pṛthivībhujā |
provāca darśanaṃ gatvā taṃ nṛpaṃ bhaktavatsalā || 28 ||
[Analyze grammar]

śrīdevyuvāca |
parituṣṭā'smi te vatsa stotreṇānena sāṃpratam |
tasmādgṛhāṇa mattastvaṃ varaṃ manasi saṃsthitam || 29 ||
[Analyze grammar]

nala uvāca |
damayantīti me bhāryā prāṇebhyo'pi garīyasī |
sā mayā nirjane muktā |
vane vyālagaṇānvite || 30 ||
[Analyze grammar]

akhaṇḍaśīlāṃ nirdoṣāṃ yathāhaṃ tvatprasādataḥ |
labhe bhūyo'pi tāṃ devi tathātra kuru satvaram || 31 ||
[Analyze grammar]

stotreṇānena yo devi stutiṃ kuryātpurastava |
tatraiva divase tasmai tvayā deyaṃ manogatam || 32 ||
[Analyze grammar]

sūta uvāca |
sā tatheti pratijñāya jagāmādarśanaṃ tataḥ |
so'pi pārthivaśārdūlo lebhe sarvaṃ tayoditam || 33 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye nalanirmitacarmamuṇḍāmāhātmyavarṇanaṃnāma catuṣpañcāśattamo'dhyāyaḥ || 54 ||
[Analyze grammar]