Chapter 40

[English text for this chapter is available]

| ṛṣaya ūcuḥ |
yadeṣā bhavatā proktā brāhmī tatra mahāśilā |
mokṣadā sarvajaṃtūnāṃ tathā pātakanāśinī || 1 ||
[Analyze grammar]

sā kathaṃ sthāpitā tatra kiṃprabhāvā ca sūtaja |
etanno brūhi niḥśeṣaṃ na hi tṛpyāmahe vayam || 2 ||
[Analyze grammar]

sūta uvāca |
brahmalokaniviṣṭasya brahmaṇo' vyaktajanmanaḥ |
purā'bhūnmahatī cintā tīrthayātrāsamudbhavā || 3 ||
[Analyze grammar]

sarveṣāmeva devānāṃ saṃti tīrthāni bhūtale |
muktvā māṃ tanmayā kāryaṃ tīrthamekaṃ dharātale || 4 ||
[Analyze grammar]

yatra trikālamāsādya karma saṃdhyāsamudbhavam |
martyalokaṃ samāsādya karomi tadanaṃtaram || 5 ||
[Analyze grammar]

tathānyadapi yatkiñcitkarma dharmyaṃ hitāvaham |
tatkaromi yathānye'pi cakrurdevāḥ śivādayaḥ || 6 ||
[Analyze grammar]

na svarge'sti hi kṛtyānāmadhikāro'tra kaścana |
śubhānāṃ karmaṇāmeva kevalaṃ bhujyate phalam || 7 ||
[Analyze grammar]

tasmādyatra dharāpṛṣṭhe śileyaṃ nipatiṣyati |
trisaṃdhyaṃ tatra gantavyamanuṣṭhānārthameva hi || 8 ||
[Analyze grammar]

evamuktvā suvistīrṇāṃ śilāṃ tāmā sanodbhavām |
pracikṣepa dharāpṛṣṭhaṃ samuddiśya pitāmahaḥ || 9 ||
[Analyze grammar]

atha sā patitā bhūmau sarvaratnamayī śilā |
camatkārapure kṣetre sarvakṣetramahodaye || 10 ||
[Analyze grammar]

tata āgatya lokeśaḥ svayameva dharātalam |
tatkṣetraṃ vīkṣayāmāsa vyāptaṃ tīrthaiḥ samantataḥ || 11 ||
[Analyze grammar]

tataḥ puṇyatame deśe dṛṣṭvā tāṃ samupasthitām |
śilāmānaṃdamāpannaḥ provāca tadanantaram || 12 ||
[Analyze grammar]

aho dhanyatamo matto nānyo'sti bhuvanatraye |
sarvatīrthamaye kṣetre yato jātātra saṃsthitiḥ || 3 ||
[Analyze grammar]

salilena vinā yasmānna kriyā saṃpravartate |
tasmādatra mayā kāryaḥ śucitoyo mahāhradaḥ || 14 ||
[Analyze grammar]

tataḥ saṃciṃtayāmāsa svasutāṃ ca sarasvatīm |
jana saṃsparśabhītyā ca pātālatalavāhinīm || 15 ||
[Analyze grammar]

atha bhūmitalaṃ bhittvā prādurbhūtā mahānadī |
tāṃ śilāmamalaistoyaiḥ kṣālayantī samaṃtataḥ || 16 ||
[Analyze grammar]

atha mūrtimatī bhūtvā provāca prapitāmaham |
kimarthaṃ saṃsmṛtā devamamādeśaḥ pradīyatām || 7 ||
[Analyze grammar]

brahmovāca |
tvayātraiva sadā stheyaṃ śilāyāṃ mama saṃnidhau |
saṃdhyātraye'pi tvattoyairyena kṛtyaṃ karomyaham || 18 ||
[Analyze grammar]

tathā ye mānavāḥ snānaṃ kariṣyaṃti jale tava |
te yāsyaṃti parāṃ siddhiṃ durlabhāṃ devā mānuṣaiḥ || 19 ||
[Analyze grammar]

sarasvatyuvāca |
ahaṃ kanyā suraśreṣṭha pātālatalavāhinī |
janasparśabhayādbhītā nāgacchāmi mahītale || 20 ||
[Analyze grammar]

tavādeśo'nyathā naiva mayā kāryaḥ kathaṃcana |
evaṃ matvā suraśreṣṭha yadyuktaṃ tatsamācara || 21 ||
[Analyze grammar]

brahmovāca |
tavārthe kalpayiṣyāmi sthāne'traiva mahāhradam |
agamyaṃ sarvamartyānāṃ tatra tvaṃ sthātumarhasi || 22 ||
[Analyze grammar]

evamuktvā sa deveśaścakhāna ca mahāhradam |
tataḥ sarasvatī tatra svasthānamakaro datha || 23 ||
[Analyze grammar]

tato dṛṣṭiviṣānsarpānādideśa pitāmahaḥ |
yuṣmābhiḥ sarvadā stheyaṃ hradesmiñchāsanānmama || 24 ||
[Analyze grammar]

yathā sarasvatīṃ martyā na spṛśaṃti kathaṃcana |
bhavadbhiḥ sarvathā kāryaṃ tathā pannagasattamāḥ || 25 ||
[Analyze grammar]

sūta uvāca |
evaṃ brahmā vyavasthāpya tatra kṣetre sarasvatīm |
tāṃ ca citraśilāṃ madhye brahmalokaṃ jagāma ha || 26 ||
[Analyze grammar]

atha maṃkaṇakonāma maharṣiḥ saṃśitavrataḥ |
kṣetre tatra samāyāto viṣavidyāvicakṣaṇaḥ || 27 ||
[Analyze grammar]

sakramādbhramamāṇastu tasminsarpābhirakṣite |
taṃ muniṃ veṣṭayāmāsurbabandhuścaiva pāśakaiḥ || 28 ||
[Analyze grammar]

so'pi vidyābalātsarpānnirviṣāṃstāṃścakāraha |
tatra snātvā śucirbhūtvā kṛtvā ca pitṛtarpaṇam |
niṣkrāṃtaḥ salilāttasmātkṛtakṛtyo mudānvitaḥ || 29 ||
[Analyze grammar]

tataścakre muniryāvatsamyakkuśaparigraham |
darbhāgreṇāsya hastāgraṃ pāṭitaṃ tāvadeva hi || 30 ||
[Analyze grammar]

atha tasmātkṣatājjātastasya śākaraso mahān |
taṃ dṛṣṭvā sa viśeṣeṇa harṣito vismayānvitaḥ || 31 ||
[Analyze grammar]

siddho'hamiti vijñāya nṛtyaṃ cakre tataḥ param |
brāhmīṃ śilāṃ samāruhya ānaṃdāśrupariplutaḥ || 32 ||
[Analyze grammar]

athaivaṃ nṛtyamānasya munestasya mahātmanaḥ |
lāsyaṃ cakre tataḥ sarvaṃ jagatsthāvarajaṃgamam || 33 ||
[Analyze grammar]

camatkārapuraṃ kṛtsnaṃ bhagnaṃ naṣṭā dvijottamāḥ |
prāsādairdhvaṃsitaistatra hāhākāro mahānabhūt || 34 ||
[Analyze grammar]

tato devagaṇāḥ sarve taddṛṣṭvā tasya ceṣṭitam |
lāsyasya vāraṇārthāya procurvṛṣabhavāhanam || 35 ||
[Analyze grammar]

anena nṛtyamānena jagatsthāvarajaṃgamam |
nṛtyaṃ karoti deveśa tasmādgatvā nivāraya || 36 ||
[Analyze grammar]

nānyaḥ śaktaḥ suraśreṣṭha munimenaṃ kathaṃcana |
niṣedhayitumīśāna tataḥ kuru jagaddhitam || 37 ||
[Analyze grammar]

atha teṣāṃ vacaḥ śrutvā bhagavānvṛṣabhadhvajaḥ |
kṛtvā rūpaṃ dvijeṃdrasya tatsakāśamupādravat || 38 ||
[Analyze grammar]

abravīcca mune kasmāttvayaitannṛtyate'dhunā |
tasmātkāryaṃ vadāśu tvaṃ paraṃ kautūhalaṃ hi naḥ || 39 ||
[Analyze grammar]

evamuktaḥ sa vipreṃdraḥ śaṃkareṇa dvijottamāḥ |
hastaṃ saṃdarśayāmāsa tasya śākarasānvitam || 40 ||
[Analyze grammar]

kiṃ napaśyasi me brahmankarācchākaraso mahān |
saṃjātaḥ kṣatavaktreṇa tasmātsiddhirupasthitā || 41 ||
[Analyze grammar]

etasmātkāraṇādvipra nṛtyametatkaromyaham |
ānaṃdaṃ paramaṃ prāpya siddhijaṃ siddhasattama || 42 ||
[Analyze grammar]

evaṃ tu vadatastasya bhagavānvṛṣabhadhvajaḥ |
aṃguṣṭhaṃ tāḍayāmāsa svāṃgulyagreṇa tatkṣaṇāt || 43 ||
[Analyze grammar]

niścakrāma tato bhasma himasphaṭikasaṃnibham |
kṣatāgrātsahasā tasya mahāvismayakārakam || 44 ||
[Analyze grammar]

tataḥ provāca taṃ vipraṃ sa devo dvijasattamāḥ |
yasyāṃguṣṭhāgrato mahyaṃ niṣkrāṃtaṃ bhasma pāṃḍuram || 45 ||
[Analyze grammar]

tathāpyahaṃ muniśreṣṭha na nṛtyaṃ kartumutsahe |
tvaṃ punarnṛtyase kasmādapi śākarasekṣaṇāt || 46 ||
[Analyze grammar]

virāmaṃ kuru tasmāttvaṃ nṛtyādasmādvigarhitāt |
tapaḥ kṣarati viprendra nṛtyagītāddvijanmanaḥ || 47 ||
[Analyze grammar]

athāsau tatsamudvīkṣya kṣatādbhasmavisarjanam |
nṛtyaṃ vrīḍānvitastyaktvā tasya cakre namaskṛtim || 40 ||
[Analyze grammar]

abravīttvāmahaṃ manye nānyaṃ devānmaheśvarāt |
tasmātkuru prasādaṃ me yathā na syāttapaḥkṣatiḥ || 49 ||
[Analyze grammar]

śrībhagavānuvāca |
tapaste matprasādena vṛddhiṃ śasyati nityaśaḥ |
sthāne'tra bhavatā sārdhamahaṃ sthāsyāmi sarvadā || 50 ||
[Analyze grammar]

ānanditena bhavatā prārthito'haṃ yato mune |
ānandeśvarasaṃjñastu khyātiṃ yāsyāmi bhūtale |
etatpuraṃ ca me nāmnā ānandākhyaṃ bhaviṣyati || 51 ||
[Analyze grammar]

evamuktvā mahādevo gataścādarśanaṃ tataḥ |
so'pi maṃkaṇakastatra tapastepe munīśvaraḥ || 52 ||
[Analyze grammar]

atha te pannagāḥ procuḥ praṇipatya munīśvaram |
bhagavannirviṣāḥ sarve vayaṃ hi bhavatā kṛtāḥ || 93 ||
[Analyze grammar]

tasmātkuru prasādaṃ no yathā syāddāruṇaṃ viṣam |
no cedvayaṃ gamiṣyāmaḥ sarvaloka parābhavam || 54 ||
[Analyze grammar]

maṃkaṇaka uvāca |
anṛtaṃ na mayā proktaṃ svaireṇāpi kadācana |
tasmādevaṃvidhāḥ sarve jalasarpā bhaviṣyatha || 55 ||
[Analyze grammar]

sūta uvāca |
tataḥprabhṛti saṃjātā jalasarpā mahītale |
tadvadrūpā dvijihvāśca kevalaṃ viṣavarjitāḥ || 56 ||
[Analyze grammar]

atha tasminhrade martyāḥ snātvā sārasvate śubhe |
spṛṣṭvā citraśilāṃ tāṃ ca prayāṃti paramāṃ gatim || 57 ||
[Analyze grammar]

atha bhītaḥ sahasrākṣo gatvā devaṃ pitāmaham |
yamena sahitastūrṇaṃ provācedaṃ vacastadā || 58 ||
[Analyze grammar]

tvatprasādātsamudvīkṣya gacchaṃti manujā divam |
pitāmaha mahātīrthaṃ yattvayā vihitaṃ kṣitau |
sārasvataṃ narāstatra snātvā yāṃti triviṣṭapam || 59 ||
[Analyze grammar]

api pāpasamācārāḥ sarvadharmabahiṣkṛtāḥ |
tatra snātvā śilāṃ spṛṣṭvā tadaivāyāṃti sadgatim || 60 ||
[Analyze grammar]

yama uvāca |
apramāṇaṃ vibho karma saṃprayātaṃ mamocitam |
śubhāśubhaparijñānaṃ sarveṣāmeva dehinām || 61 ||
[Analyze grammar]

tasmāttyaja tvaṃ māṃ deva yadvā tattīrthamuttamam |
yatprabhāvājjanairhīnāḥ saṃjātā narakā mama || 62 ||
[Analyze grammar]

tasya tadvacanaṃ śrutvā yamasya prapitāmahaḥ |
prāha pārśvasthitaṃ śakraṃ tattīrthaṃ naya saṃkṣayam || 63 ||
[Analyze grammar]

tataḥ śakro hradaṃ gatvā pūrayāmāsa pāṃsubhiḥ |
hradaṃ sārasvataṃ taṃ ca tāṃ ca citraśilāṃ dvijāḥ || 64 ||
[Analyze grammar]

adyāpi manujaḥ samyakta sminsthāne vyavasthitaḥ |
yaḥ karoti tapaścaryāṃ sa śīghaṃ siddhimāpnuyāt || 65 ||
[Analyze grammar]

so'pi maṃkaṇakastatra sārddhaṃ devena śaṃbhunā |
tiṣṭhatyadyāpi vipreṃdra pūritaṃ caiva pāṃsubhiḥ || 66 ||
[Analyze grammar]

liṃgaṃ maṃkaṇakanyastaṃ tatrāsti sumahodayam |
tatspṛṣṭvā mānavāḥ pāpairmucyaṃte dvijasattamāḥ || 67 ||
[Analyze grammar]

māgha śuklacaturdaśyāṃ yastaṃ pūjayate naraḥ |
sa pāpairapi saṃyuktaḥ śivaloke mahīyate || 68 ||
[Analyze grammar]