Chapter 32

[English text for this chapter is available]

| sūta uvāca |
tathānyo'sti dvijaśreṣṭhāstasminkṣetre śubhāvahe |
saptarṣīṇāṃ suvikhyāta āśramaḥ sarvakāmadaḥ || 1 ||
[Analyze grammar]

tatra śrāvaṇamāsasya paṃcadaśyāṃ samāhitaḥ |
yaḥ karoti naraḥ snānaṃ sa labhedvāṃchitaṃ phalam || 2 ||
[Analyze grammar]

kandamūlaphalaiḥ śākairyastatra śrāddhamācaret |
sa prāpnoti phalaṃ kṛtsnaṃ rājasūyāśvamedhayoḥ || 3 ||
[Analyze grammar]

paṃcamyāṃ śuklapakṣe tu māsi bhādrapade dvijāḥ |
yastānpūjayate bhaktyā puṣpadhūpānulepanaiḥ |
vidhinānena viprendrāḥ sarvāneva yathākramam || 4 ||
[Analyze grammar]

oṃ atraye namaḥ |
oṃ vasiṣṭhāya namaḥ |
oṃ kaśyapāya namaḥ |
oṃ bharadvājāya namaḥ |
oṃ gautamāya namaḥ |
oṃ kauśikāya namaḥ |
oṃ jamadagnaye namaḥ |
oṃ aruṃdhatyai namaḥ |
pūjāmaṃtraḥ |
jahnukanyāpavitrāṃgā gṛhītajapamālikāḥ |
gṛhṇaṃtvarghaṃ mayā dattamṛṣayaḥ sarvakāmadāḥ || 5 ||
[Analyze grammar]

ṛṣaya ūcuḥ |
tatra saptarṣibhistīrthaṃ kasminkāle vyavasthitam |
vistarātsūtaja brūhi paraṃ kautūhalaṃ hi naḥ || 6 ||
[Analyze grammar]

sūta uvāca |
anāvṛṣṭiḥ purā jātā loke dvādaśavārṣikī |
sarvoṣadhikṣayo jātastato lokāḥ kṣayārditāḥ || 7 ||
[Analyze grammar]

asthiśeṣā nirutsāhāstyaktadharmavratakriyāḥ |
abhakṣyabhakṣaṇaparāstathaivāpeyapāyinaḥ || 8 ||
[Analyze grammar]

tyajaṃti mātaraḥ putrānkalatrāṇi tathā narāḥ |
bhṛtyānsvānapi vitteśāḥ kā kathānyasamudbhavān || 9 ||
[Analyze grammar]

saṃtyaktānyagnihotrāṇi brāhmaṇairyājakairapi |
vratāni vratibhirdāṃtairapi vṛddhatamairdvijāḥ || 10 ||
[Analyze grammar]

dṛśyate caiva yatraiva sasyaṃ vāpi kathaṃcana |
hriyate lajjayā hīnaistatra kṣutkṣāmakairnaraiḥ || 11 ||
[Analyze grammar]

evamannakṣaye jāte pīḍite dharaṇītale |
saptarṣayaḥ kṣudhāviṣṭā babhramustatratatra ca || 12 ||
[Analyze grammar]

atriścaiva vasiṣṭhaśca kaśyapaḥ sumahātapāḥ |
bharadvājastathā cānyo gautamaḥ saṃśitavrataḥ |
kauśiko jamadagniśca tathaivāruṃdhatī satī || 13 ||
[Analyze grammar]

atha teṣāṃ samastānāṃ caṃḍābhūtparicārikā |
paśuvaktrastathā bhṛtyo vinayena samavitaḥ || 14 ||
[Analyze grammar]

tataste viṣayaṃ prāptā vṛṣādarbhimahīpateḥ |
kṣutkṣāmā munayo'tyarthaṃ deśe cānartasaṃjñake || 15 ||
[Analyze grammar]

tatra bhikṣākṛte bhrāṃtāstataścaiva gṛhādgṛham |
na grāsamapi sasyasya prāpnuvaṃste dvijottamāḥ || 6 ||
[Analyze grammar]

tatastaiḥ patito bhūmau dṛṣṭo mṛtakumārakaḥ |
maṃtrayitvā mithaḥ paścādgṛhīto bhakṣaṇāya ca || 17 ||
[Analyze grammar]

apacanyāvadagnau taṃ kṣudhayā paripīḍitāḥ |
vṛṣādarbhirnṛpaḥ prāptaḥ śrutvā teṣāṃ viceṣṭitam || 18 ||
[Analyze grammar]

vṛṣādarbhiruvāca |
kimidaṃ garhitaṃ karma kriyate munisattamāḥ |
rākṣasānāmayaṃ dharmo mahāmāṃsasya bhakṣaṇam || 19 ||
[Analyze grammar]

so'haṃ sasyaṃ pradāsyāmi grāmānvrīhīnyavānapi |
mama vākyādasaṃdigdhaṃ tyajardhvaṃ mṛtabālakam || 20 ||
[Analyze grammar]

ṛṣaya ūcuḥ |
prāyaścittaṃ samādiṣṭaṃ mahāmāṃsasya bhakṣaṇāt |
pratigrahasya bhūpālā dāpatkāle'pi no nṛpa || 21 ||
[Analyze grammar]

paścāttapaścariṣyāmo mahāmāṃsasamudbhavam |
pātakaṃ nāśayiṣyāmo bhakṣayāmo vayaṃ tataḥ || 22 ||
[Analyze grammar]

vṛṣādarbhi ruvāca |
pratigraho dvijātīnāṃ proktā vṛttiraniṃditā |
grāhyo mattastataḥ sarvairnātra kāryā vicāraṇā || 23 ||
[Analyze grammar]

ṛṣaya ūcuḥ |
rāja pratigraho ghoro madhvāsvādo viṣopamaḥ |
sa dūrādbrāhmaṇaistyājyo viśeṣātkṛtibhirnṛpa || 24 ||
[Analyze grammar]

daśasūnāsamaścakrī daśacakrisamo dhvajī |
daśa dhvajisamā veśyā daśaveśyāsamo nṛpaḥ || 25 ||
[Analyze grammar]

daśasūnāsahasreṇa tulyo rājapratigrahaḥ |
kastasya pratigṛhṇāti lobhāḍhyo brāhmaṇo yathā || 26 ||
[Analyze grammar]

rauravādiṣu sarveṣu narakeṣu sa pacyate |
tasmādgaccha gṛhe bhūpa svasti te'stu sadaiva hi || 27 ||
[Analyze grammar]

vayamanyatra yāsyāmo grahīṣyāmo na te dhanam |
evamuktvātha te sarve munayaḥ śaṃsitavratāḥ || 28 ||
[Analyze grammar]

parityajya kumāraṃ taṃ mṛtaṃ tamapi bhūmipam |
camatkārapuraṃ kṣetraṃ samuddiśya tato yayuḥ || 29 ||
[Analyze grammar]

so'pi rājā tatastaistu bhartsito'tiruṣānvitaḥ |
jijñāsārthaṃ tatasteṣāṃ cakre karma dvijottamāḥ || 30 ||
[Analyze grammar]

tataḥ suvarṇapūrṇāni vidhāyodumbarāṇi ca |
teṣāṃ mārgāgrato bhūmau samaṃtādatha cākṣipat || 31 ||
[Analyze grammar]

sūta uvāca |
atha te munayo dṛṣṭvā patitāni dharātale |
udumbarāṇi saṃdṛṣṭvā jagṛhuḥ kṣudhayārditāḥ || 32 ||
[Analyze grammar]

atha tāni samālakṣya gurūṇi munisattamāḥ |
atrirekaṃ parisphoṭya suvarṇaṃ vīkṣya cābravīt || 33 ||
[Analyze grammar]

atriruvāca |
nāsmākaṃ munayo'jñānaṃ nāsmākaṃ gṛhabuddhayaḥ |
haimānimānvijānaṃto grahīṣyāma udumbarān || 34 ||
[Analyze grammar]

tasmādetāni saṃtyajya hemagarbhāṇi dūrataḥ |
udumbarāṇi yāsyāmaḥ phalāni vigataspṛhāḥ || 35 ||
[Analyze grammar]

sārvabhaumo mahīpāla eko'nyaśca nirīhakaḥ |
subhagastu tayornityaṃ bhūyādbhūyo nirīhakaḥ || 36 ||
[Analyze grammar]

dharmārthamapi viprāṇāṃ saṃcayo'rthasya garhitaḥ |
prakṣālanāddhi paṃkasya dūrādasparśanaṃ varam || 37 ||
[Analyze grammar]

tyajataḥ saṃcayānsarvānyāṃti hānimupadravāḥ |
na hi sarvārthavānkaściddṛśyate nirupadravaḥ || 38 ||
[Analyze grammar]

nirdhanatvaṃ tathā rājyaṃ tulāyāṃ dhārayedbudhaḥ |
akiṃcanatvamadhikaṃ jāyate saṃmatirmama || 39 ||
[Analyze grammar]

kaśyapa uvāca |
anartho'yaṃ mune prāpto yadarthasya parigrahaḥ |
arthaiśvaryavimūḍhātmā śreyasā mucyate hi saḥ || 40 ||
[Analyze grammar]

arthasaṃpadvimohāya vimoho narakāya ca |
tasmādarthaṃ prayatnena śreyo'rthī dūratastyajet || 41 ||
[Analyze grammar]

yorthena sādhyate dharmaḥ kṣayiṣṇuḥ sa prakīrtitaḥ |
yaḥ punastapasā sādhyaḥ sa mokṣāyeti me matiḥ || 42 ||
[Analyze grammar]

bharadvāja uvāca |
jīryaṃti jīryataḥ keśā daṃtā jīryaṃti jīryataḥ |
cakṣuḥ śrotre tathā puṃsastṛṣṇaikā taruṇāyate || 43 ||
[Analyze grammar]

sūcyā sūtraṃ yathā vastraṃ saṃcārayati sūcikā |
tadvatsaṃsārasūtraṃ ca vāṃchayātmā nayatyasau || 44 ||
[Analyze grammar]

yathā śṛṃgaṃ hi kāyena varddhamānena vardhate |
tadvattṛṣṇāpi vittena varddhamānena varddhate || 45 ||
[Analyze grammar]

anaṃtapārā duṣpūrā tṛṣṇā duḥkhaśatāvahā |
adharmabahulā caiva tasmāttāṃ parivarjayet || 46 ||
[Analyze grammar]

gautama uvāca |
saṃtuṣṭaḥ kena cālyo'sti phalairapi vivarjitaḥ |
sarvopīndriyalaulyena saṃkaṭe bhramati dvijāḥ || 47 ||
[Analyze grammar]

sarvatra saṃpadastasya saṃtuṣṭaṃ yasya mānasam |
upānadgūḍhapādasya nanu carmāstṛteva bhūḥ || 48 ||
[Analyze grammar]

saṃtoṣāmṛtatṛptānāṃ yatsukhaṃ śāṃtacetasām |
kutastaddhanalubdhānāmitaścetaśca dhāvatām || 49 ||
[Analyze grammar]

asaṃtoṣaḥ paraṃ duḥkhaṃ saṃtoṣaḥ paramaṃ sukham |
sukhārthī puruṣastasmātsaṃtuṣṭaḥ satataṃ bhavet || 50 ||
[Analyze grammar]

viśvāmitra uvāca |
kāmaṃ kāmayamānasya yadi kāmaḥ sa sidhyati |
tathānyo jāyate puṃsastatkṣaṇādeva kalpitaḥ || 51 ||
[Analyze grammar]

na jātu kāmī kāmānāṃ sahasrairapi tuṣyati |
haviṣā kṛṣṇavartmeva vāṃchā tasya vivardhate || 52 ||
[Analyze grammar]

kāmānabhilaṣanmohānna naraḥ sukhamāpnuyāt |
śyenālayatarucchāyāṃ vrajanniva kapiñjalaḥ || 53 ||
[Analyze grammar]

nityaṃ sāgaraparyantāṃ yo bhuṅkte pṛthivīmimām |
tulyāśmakāścanaścaiva sa kṛtārtho mahīpateḥ || 54 ||
[Analyze grammar]

jamadagniruvāca |
yo'rthaṃ prāpyādhamo vipraḥ śocitavyepi hṛṣyati |
na ca paśyati mandātmā narakaṃ cā kutobhayaḥ || 55 ||
[Analyze grammar]

pratigrahasamarthānāṃ nivṛttānāṃ pratigrahāt |
ya eva dadatāṃ lokāsta evāpratigṛhṇatām || 56 ||
[Analyze grammar]

arundhatyuvāca |
bisataṃturyathā'nanto nālamāsādya saṃsthitaḥ |
tṛṣṇā caivamanādyantā sthitā dehe śarīriṇām || 57 ||
[Analyze grammar]

yā dustyajā durmatibhiryā na jīryati jīryataḥ |
yā'sau prāṇāntiko rogastāṃ tṛṣṇāṃ tyajataḥ sukham || 58 ||
[Analyze grammar]

caṇḍovāca || sarpādivaddhanādyasmādbibhyatīme mameśvarāḥ |
yatastato viśeṣeṇa kasmāttasmādbhayaṃ mama || 56 ||
[Analyze grammar]

paśumukha uvāca || yadācaranti vidvāṃsaḥ sadā dharmaparāyaṇāḥ |
tadeva viduṣā kāryamātmano hitamicchatā || 60 ||
[Analyze grammar]

sūta uvāca |
ityuktvā hemagarbhāṇi tyaktvā tāni phalāni ca |
ṛṣayo jagmuranyatra sarva eva dṛḍhavratāḥ || 6 ||
[Analyze grammar]

camatkārapurekṣetre viviśuste tataḥ param |
dadṛśuḥ sahasā prāptaṃ parivrājaṃ śunomukham || 62 ||
[Analyze grammar]

tenaiva sahitāstatra gatvā kiñcidvanāntaram |
dṛṣṭavantastato hṛdyaṃ saraḥ paṃkajaśobhitam || 63 ||
[Analyze grammar]

tato bubhukṣayāviṣṭā bisānyādāya bhūriśaḥ |
tīre nikṣipya sarasaścakruḥ puṇyāṃ jala kriyām || 64 ||
[Analyze grammar]

athottīryajalātsarve te sametya parasparam |
bisāni tānyapaśyanta idaṃ vacanamabruvan || 65 ||
[Analyze grammar]

ṛṣaya ūcuḥ |
kena kṣudhābhitaptānāmasmākaṃ nirdayātmanā |
mṛṇālāni samastāni sthānādasmāddhṛtāni ca || 66 ||
[Analyze grammar]

te śaṃkamānā anyonyamṛṣayaḥ śaṃsitavratāḥ |
pracakruḥ śapathānraudrānātmanaḥ praviśuddhaye || 67 ||
[Analyze grammar]

kaśyapa uvāca |
sarvabhakṣaḥ sadā so'stu nyāsalobhaṃ karotu vā |
kūṭasākṣitvamabhye tu bisastainyaṃ karoti yaḥ || 68 ||
[Analyze grammar]

dharmaṃ karotu daṃbhena rājānaṃ copasevatām |
madhumāṃsaṃ sadāśnātu bisastainyaṃ karoti yaḥ || 69 ||
[Analyze grammar]

vasiṣṭha uvāca |
anṛtau maithunaṃ yātu divā vāpyatha parvaṇi |
atithiḥ syāttato'nyonyaṃ bisastainyaṃ karoti yaḥ || 70 ||
[Analyze grammar]

bharadvāja uvāca |
yodhigamya guroḥ śāstraṃ niṣkrayaṃ na prayacchati |
tasyainasā sa yuktostu bisastainyaṃ karoti yaḥ || 71 ||
[Analyze grammar]

nṛśaṃso'stu sa sarvatra samṛddhyā cāpyahaṃkṛtaḥ |
matsarī piśunaścaiva bisastainyaṃ karoti yaḥ || 72 ||
[Analyze grammar]

viśvāmitra uvāca |
ekākī mṛṣṭama śnātu praśaṃsyādatha cātmanaḥ |
vedavikrayakartāstu bisastainyaṃ karoti yaḥ || 73 ||
[Analyze grammar]

jamadagniruvāca |
kanyāṃ yacchatu vṛddhāya sa bhūyādvṛṣalī patiḥ |
astu vārdhuṣiko nityaṃ bisastainyaṃ karoti yaḥ || 74 ||
[Analyze grammar]

gautama uvāca |
sa gṛhṇātvavikādānaṃ karotu hayavikrayam |
prakaro tu gurorniṃdāṃ bisastainyaṃ karoti yaḥ || 75 ||
[Analyze grammar]

atriruvāca |
mātaraṃ pitaraṃ nityaṃ durmatiḥ so'vamanyatām |
śūdraṃ pṛcchatu dharmārthaṃ bisastainyaṃ karoti yaḥ || 76 ||
[Analyze grammar]

pratiśrutya na yo dadyādbrāhmaṇāya gavādikam |
tasyainasā sa yujyeta bisastainyaṃ karoti yaḥ |||| 77 ||
[Analyze grammar]

aruṃdhatyuvāca |
karotu patyuḥ pūrvaṃ sā bhojanaṃ śayanaṃ tathā |
nārī duṣṭasamācārā bisastainyaṃ karoti yā || 78 ||
[Analyze grammar]

caṇḍovāca |
svāminaḥ pratikūlāstu dharmadveṣaṃ karotu ca |
sādhudveṣaparā caiva bisastainyaṃ karoti yā || 79 ||
[Analyze grammar]

paśumukha uvāca |
svāmidroharato nityaṃ sa bhūyātpāpakṛnnaraḥ |
sādhu dveṣaparaścaiva bisastainyaṃ karoti yaḥ || 80 ||
[Analyze grammar]

śunomukha uvāca |
vedānsa paṭhatu nyāyādgṛhasthaḥ syātpriyātithiḥ |
satyaṃ vadatu cājasraṃ bisastainyaṃ karoti yaḥ || 81 ||
[Analyze grammar]

ṛṣaya ūcuḥ |
iṣṭa eva dvijātīnāṃ yastvayā śapathaḥ kṛtaḥ |
bisastainyaṃ hi cāsmākaṃ tannūnaṃ bhavatā kṛtam || 82 ||
[Analyze grammar]

śunomukha uvāca |
mayā hṛtāni sarveṣāṃ bisānīmāni vo dvijāḥ |
dharmānvai śrotukāmena māṃ jānīta puraṃdaram || 83 ||
[Analyze grammar]

yuṣmākaṃ parituṣṭo'smi lobhābhāvāddvijottamāḥ |
tasmātsvargaṃ mayā sārddhaṃ śīghramāgamyatāmiti |ा || 84 ||
[Analyze grammar]

ṛṣaya ūcuḥ |
mokṣamārgaṃ samāsaktā na vayaṃ svargalipsavaḥ |
tasmāttapaścariṣyāmaḥ sarasīha vimuktaye || 85 ||
[Analyze grammar]

pūrṇā sāgaraparyaṃtāṃ caritvā pṛthivī mimām |
prāṇayātrāṃ prakurvāṇā mṛṇālairmunisattamāḥ |
tasmādgaccha tava śreyo bhūyādasmātsamāgamāt || 86 ||
[Analyze grammar]

śakra uvāca |
na vṛthā darśanaṃ me syātkadācidapi suvratāḥ |
tasmādgṛhṇīta yaccitte sadābhīṣṭaṃ vyavasthitam || 87 ||
[Analyze grammar]

ṛṣaya ūcuḥ ||
āśramo'yaṃ suvikhyāto bhūyācchakra mahītale |
nāmnāsmākaṃ tathā nṛṇāṃ sarvapātakanāśanaḥ || 88 ||
[Analyze grammar]

vayaṃ sthāsyāmahe nityamatraiva surasattama |
tapo'rthaṃ bhāvitātmāno yāvanmokṣagatirdhruvā || 89 ||
[Analyze grammar]

indra uvāca |
trailokye'pi suvikhyāta āśramo vo bhaviṣyati |
tathā kāmapradaścaiva lokānāṃ saṃbhaviṣyati || 90 ||
[Analyze grammar]

yo yaṃ kāmamabhidhyāya śrāddhamatra kariṣyati |
śrāvaṇe paurṇamāsyāṃ ca sa taṃ sarvamavā psyati || 91 ||
[Analyze grammar]

niṣkāmo vā naro yastu śrāddhaṃ dānamathāpi vā |
prakariṣyati mokṣaṃ sa samavāpsyatyasaṃśayam || 92 ||
[Analyze grammar]

ye cātra dehaṃ tyakṣyaṃti yuṣmākaṃ cāśrame śubhe |
api pāpasamāyuktāste yāsyaṃti parāṃ gatim || 93 ||
[Analyze grammar]

iṃgudairbadarairvāpi bilvairbhallātakairapi |
pitṝnuddiśya yaḥ śrāddhaṃ kariṣyati samāhitaḥ || 94 ||
[Analyze grammar]

sa yāsyati parāṃ siddhiṃ durlabhāṃ tridaśairapi |
sarvapāpavinirmuktaḥ stūyamānaśca kiṃnaraiḥ || 95 ||
[Analyze grammar]

sūta uvāca |
evamuktvā sahasrākṣastaiḥ sarvairabhinaṃditaḥ || 0 ||
[Analyze grammar]

jagāmādarśanaṃ te'pi sthitāstatra dvijottamāḥ || 96 ||
[Analyze grammar]

tataḥ kāle gate te'pi kṛtvā tīvraṃ mahattapaḥ |
saṃprāptāḥ paramaṃ sthānaṃ jarāmaraṇavarjitam || 97 ||
[Analyze grammar]

taistatra sthāpitaṃ liṅgaṃ devadevasya śūlinaḥ |
tasya saṃdarśanādeva naraḥ pāpādvimucyate || 98 ||
[Analyze grammar]

yastalliṃgaṃ punarbhaktyā puṣpadhūpānulepanaiḥ |
arcayetsa dhruvaṃ muktiṃ prāpnoti dvijasattamāḥ || 99 ||
[Analyze grammar]

etatpavitra māyuṣyaṃ sarvapātakanāśanam |
saptarṣoṇāṃ samākhyātamāśramasyānukīrtanam || 100 ||
[Analyze grammar]