Chapter 29

[English text for this chapter is available]

| sūta uvāca |
evaṃ sarveṣu tīrtheṣu saṃsthiteṣu dvijottamāḥ |
tatkṣetraṃ khyātimāpannaṃ samaste dharaṇītale || 1 ||
[Analyze grammar]

samastebhyastato'dūrānmunayaḥ śaṃsitavratāḥ |
saṃśrayaṃti tato bhūpāstapo'rthaṃ jarayā'nvitāḥ || 2 ||
[Analyze grammar]

tathā te liṃgino dāntāḥ siddhikāmāḥ samaṃtataḥ |
samāśrayaṃti tatkṣetraṃ savartīrthasamā śrayam || 3 ||
[Analyze grammar]

tatra siddheśvaraṃnāma liṃgamasti dvijottamāḥ |
sarvasiddhipradaṃ nṛṇāṃ svayaṃ siddhipradāyakam || 4 ||
[Analyze grammar]

nirvidya bhūtale śarvaḥ sarvavyāpī sadā śivaḥ |
hāṭakeśvarasaṃjñe'sminkṣetre devaḥ svayaṃ sthitaḥ || 5 ||
[Analyze grammar]

liṃgarūpeṇa bhagavānprādurbhūtaḥ svayaṃ haraḥ |
smaraṇāddarśanāccaiva sarvasiddhipradaḥ sadā || 6 ||
[Analyze grammar]

siddhenārādhito yasmāttasmātsiddheśvaraḥ smṛtaḥ |
tasyaiva varadānāddhi atraivāvasthito haraḥ || 7 ||
[Analyze grammar]

yastaṃ paśyati sadbhaktyā śuciḥ spṛśati vā naraḥ |
vāṃchitaṃ labhate sadyo yadyapi syātsudurlabham || 8 ||
[Analyze grammar]

tatra siddhiṃ gatāḥ pūrvaṃ śataśaḥ puruṣā bhuvi |
darśanātsparśanāccānye praṇāmādapare narāḥ || 9 ||
[Analyze grammar]

dakṣiṇāmūrtimāsādya mantraṃ tasya ṣaḍakṣaram |
yo japecchraddhayopetastasyāyuḥ saṃpravardhate || 10 ||
[Analyze grammar]

yāvatsaṃkhyaṃ japenmatraṃ tāvatsaṃkhyānyahāni saḥ |
āyuṣaḥ parato martyo jīvate nātra saṃśayaḥ || 11 ||
[Analyze grammar]

ṛṣaya ūcuḥ || atyāścaryamidaṃ sūta yattvayā parikīrtitam |
āyuṣo'pyadhikaṃ martyo jīvate yadi mānavaḥ || 12 ||
[Analyze grammar]

sūta uvāca ||
atra vaḥ kīrtayiṣyāmi svayameva mayā śrutam |
vadatastatsamuddiśya yadvatsasya mahātmanaḥ || 13 ||
[Analyze grammar]

purā me vasamānasya purato'tra piturgṛhe |
āyātaḥ sa munistatra vatso nāma mahādyutiḥ || 14 ||
[Analyze grammar]

vahamāno yuvāvasthāṃ dvādaśārkasa madyutiḥ |
aṃgaiḥ sarvaistu rūpāḍhyaḥ kāmadeva ivāparaḥ || 15 ||
[Analyze grammar]

matpitrā sa tadā dṛṣṭastato bhaktyā'bhivāditaḥ |
arghyaṃ dattvā tataḥ prokto viśrāṃto vinayena ca || 16 ||
[Analyze grammar]

svāgataṃ tava vipreṃdra kutastvamiha cāgataḥ |
ādeśo dīyatāṃ mahyaṃ kiṃ karomi yathocitam || 17 ||
[Analyze grammar]

vatsa uvāca |
tavāśramapade sūta cāturmāsyasamudbhavam |
kartumicchāmyanuṣṭhānaṃ śuśrūṣāṃ cetkaroṣi me || 18 ||
[Analyze grammar]

lomaharṣaṇa uvāca |
evaṃ vipra kariṣyāmi tavādeśamasaṃśayam |
dhanyo'smyanugṛhīto'smi yastvaṃ me gṛhamāgataḥ || 19 ||
[Analyze grammar]

evamuktātha māmāha sa pitā dvijasattamāḥ |
tvayā vatsasya kartavyā śuśrūṣā nityameva hi || 20 ||
[Analyze grammar]

tato'haṃ vinayopetastasya kṛtyāni kṛtsnaśaḥ |
karomi sa ca me rātrau citrāḥ kīrtayate kathāḥ || 21 ||
[Analyze grammar]

rājarṣīṇāṃ purāṇānāṃ devadānavarakṣasām |
dvīpānāṃ parvatānāṃ ca svayaṃ dṛṣṭvā sahasraśaḥ || 22 ||
[Analyze grammar]

ekadā tu mayā pṛṣṭaḥ kathāṃte prāpya kautukam |
vismayāviṣṭacittena sa dvijo dvijasattamāḥ || 23 ||
[Analyze grammar]

bhagavansukumāraṃ te śarīraṃ prathamaṃ vayaḥ |
dvīpānāṃ ca karoṣi tvaṃ kathā ścitrāḥ pṛthakpṛthak || 24 ||
[Analyze grammar]

kathaṃ sarvaṃ dharāpṛṣṭhaṃ sasamudraṃ nirīkṣitam |
svalpena vayasā tāta vistarato vada || 25 ||
[Analyze grammar]

tvayā ye kīrtitā dvīpāḥ samudrāḥ parvatāstathā |
manasāpi na śakyāste gantuṃ martyaiḥ kathaṃcana || 26 ||
[Analyze grammar]

atra kautūhalaṃ jātamaśraddheyaṃ vacastathā |
śrutvā śraddheyavākyasya tasmātsatyaṃ prakīrtaya || 27 ||
[Analyze grammar]

tapasaḥ kiṃ prabhāvo'yaṃ kiṃ vā maṃtraparākramaḥ |
yena pṛthvītalaṃ kṛtsnaṃ tvayā dṛṣṭaṃ munīśvara || 28 ||
[Analyze grammar]

kiṃ vā devaprasādastu tavauṣadhikṛto'thavā |
tacca puṇyatamaṃ tāta tvaṃ me brūhi savistaram || 29 ||
[Analyze grammar]

atha māṃ sa muniḥ prāha vihasya munisattamāḥ |
satyametattvayā jñātaṃ mama maṃtraparākramam || 30 ||
[Analyze grammar]

sadāhamaṣṭasaṃyuktaṃ sahasraṃ śivasannidhau |
japāmi śivamaṃtrasya ṣaḍakṣaramitasya ca || 31 ||
[Analyze grammar]

trikālaṃ tena me jātaṃ susthiraṃ yauvanaṃ mune |
atītānāgataṃ jñānaṃ jīvitaṃ ca sukhodayam || 32 ||
[Analyze grammar]

mama varṣasahasrāṇi bahūni prayutāni ca |
saṃjātāni mahābhāga dṛśyate prathamaṃ vayaḥ || 33 ||
[Analyze grammar]

atra te kīrtayiṣyāmi vistareṇa mahāmate |
yathā siddhirmayā prāptā prasādācchaṃkarasya ca || 34 ||
[Analyze grammar]

ahaṃ hi brāhmaṇo nāmnā vatsaḥ khyāto mahītale |
nānāśāstrakṛtābhyāsaḥ purā'saṃ vedapāragaḥ || 35 ||
[Analyze grammar]

etasminneva kāle tu menakā ca varāpsarāḥ |
vasaṃtasamaye prāptā martyaloke yadṛcchayā || 36 ||
[Analyze grammar]

sā gatā bhramamāṇātha kāmyakaṃnāma tadvanam |
mattakokilanādāḍhyaṃ manojñadrumasaṃ kulam || 37 ||
[Analyze grammar]

yatrāste muniśārdūlo devarāta iti smṛtaḥ |
vratasvādhyāyasaṃpannastapasā dhvastakilviṣaḥ || 38 ||
[Analyze grammar]

upaviṣṭo nadītīre devatārccāparā yaṇaḥ |
śraddhayā parayā yukta ekākī nirjane vane || 39 ||
[Analyze grammar]

atha sā paśyatastasya vivastrā prāviśajjalam |
divyarūpasamopetā gharmārtā varavarṇinī || 40 ||
[Analyze grammar]

atha tasya munīṃdrasya retaścaskanda tatkṣaṇāt |
dṛṣṭvā tāṃ cārusarvāṃgīṃ jalamadhyaṃ samāśritām || 41 ||
[Analyze grammar]

etasminnaṃtare prāptā sāraṃgī supipā sitā |
jalamiśraṃ tayā retaḥ pītaṃ sarvamaśeṣataḥ || 42 ||
[Analyze grammar]

atha sā'pi dadhe garbhaṃ mānuṣaṃ vai prabhāvataḥ |
amogharetaso māse suṣuve daśame tataḥ || 43 ||
[Analyze grammar]

janayāmāsa dīptāṃgī kanyāṃ padmadalekṣaṇām |
tasminneva jale puṇye devarātāśramaṃ prati || 44 ||
[Analyze grammar]

atha tāṃ sa munirjñātvā svajñānena svavīryajām |
kṛpayā parayāviṣṭo jagrāha ca pupoṣa ca || 45 ||
[Analyze grammar]

snehena mahatā yuktaḥ kṛtakautukamaṃgalaḥ |
rakṣamāṇo vane caināṃ śvāpadebhyaḥ prayatnataḥ || 46 ||
[Analyze grammar]

ājahāra sumṛṣṭāni tatkṛte suphalāni saḥ |
svayaṃ gatvā sudūraṃ ca kānane śvāpadākule || 47 ||
[Analyze grammar]

tatrasthā vavṛdhe sā ca nāmnā khyātā mṛgāvatī |
śuklapakṣe yathā vyomni kaleva śaśalakṣmaṇaḥ || 48 ||
[Analyze grammar]

atha sā bhramamāṇena mayā dṛṣṭā mṛgekṣaṇā |
tato'haṃ kāmabāṇena tatkṣaṇāttāḍito hṛdi || 49 ||
[Analyze grammar]

vijñāya ca kumārīṃ tāṃ savarṇāṃ cāruhāsinīm |
ādareṇa gṛhaṃ gatvā sa muniryācitastataḥ || 50 ||
[Analyze grammar]

prayacchaināṃ mama brahmanpatnyarthaṃ nija kanyakām |
yathātmā poṣayiṣyāmi bhojanācchādanādibhiḥ || 51 ||
[Analyze grammar]

tatastena pradattā me tatkṣaṇādeva sundarī |
vidhinā śāstradṛṣṭena nakṣatre bhaga daivate || 52 ||
[Analyze grammar]

tataḥ katipayāhasya mayoḍhā sā suvismitā |
sakhījanasamāyuktā phalārthaṃ nirgatā vane || 53 ||
[Analyze grammar]

atha vīrudhasaṃchanne vane tasmi nsusaṃsthite |
tayā nyastaṃ padaṃ mūrdhni tṛṇācchannasya bhoginaḥ || 54 ||
[Analyze grammar]

sā daṣṭā sahasā tena patitā vasudhātale |
viṣārditā gataprāṇā tatkṣaṇādeva bhāminī || 55 ||
[Analyze grammar]

atha sakhyaḥ samāgatya tasyā duḥkhena duḥkhitāḥ |
śaśaṃsustā yathāvṛttaṃ rudantyo mama sūtaja || 56 ||
[Analyze grammar]

tato'haṃ satvaraṃ gatvā dṛṣṭvā tāṃ patitāṃ bhuvi |
vilāpānkṛtavāndīno ruditaṃ karuṇasvaram || 57 ||
[Analyze grammar]

iyaṃ me suviśālākṣī manaḥprāṇasamā priyā |
mṛtā bhūmau yayā hīno nāhaṃ jīvitumutsahe || 58 ||
[Analyze grammar]

so'hamadya gamiṣyāmi paralokaṃ sahānayā |
priyārahitaharmyasya jīvitasya ca kiṃ phalam || 59 ||
[Analyze grammar]

putrapautravadhūbhiśca bhṛtyavargayutasya ca |
patnīhīnāni no rejurgṛhāṇi gṛhamedhinām || 60 ||
[Analyze grammar]

yadīyaṃ karṇanetrāṃtā tanvaṃgī madhurasvarā |
na jīvati pṛthuśroṇī mariṣye' hamasaṃśayam || 61 ||
[Analyze grammar]

evaṃ vilapamānasya mama sūta kulodvaha |
āgatāḥ suhṛdaḥ sarve ruruduste'pi duḥkhitāḥ || 62 ||
[Analyze grammar]

ruditvā suciraṃ tatra taiḥ samaṃ mahatīṃ citām |
kṛtvā tāṃ saṃnidhāyātha pradatto havyavāhanaḥ || 63 ||
[Analyze grammar]

tata ādāya māṃ kṛcchrānninyuśca svagṛhaṃ prati |
rudantaṃ praskhalantaṃ ca muhyamānaṃ padepade || 64 ||
[Analyze grammar]

tato niśāvaśeṣe'hamutthāya tvarayā'nvitaḥ |
kāṃtāduḥkhaparītātmā gato'raṇyaṃ tadeva hi || 65 ||
[Analyze grammar]

kāmenonmattatāṃ prāpto bhramamāṇa itastataḥ |
vilapanneva duḥkhārto vane janavivarjite || 66 ||
[Analyze grammar]

kva gatāsi viśālākṣi vijane'sminvihāya mām |
nāhaṃ gṛhaṃ gamiṣyāmi mama duḥkhāya nirdayaḥ || 67 ||
[Analyze grammar]

eṣo'ruṇakarasparśātsvābhāṃ tyajati caṃdramāḥ |
niśākṣaye nirutsāho yathāhaṃ vidhinā kṛtaḥ || 68 ||
[Analyze grammar]

ayaṃ tanuḥ samāyāti savitā raktamaṃḍalaḥ |
nigadiṣyati me vārtāṃ nūnaṃ kaccittvadudbhavām || 69 ||
[Analyze grammar]

gaganaṃ vyāpayansūryaḥ saṃtāpayati māṃ bhṛśam |
bāhye cābhyaṃtare kāmaḥ kathaṃ vakṣyāmi jīvitam || 70 ||
[Analyze grammar]

karīṃdaḥ svayamabhyeti tatkucābhau samudvahan |
kumbhau gatvā tu pṛcchāmi yadi śaṃsati tāṃ priyām || 71 ||
[Analyze grammar]

evaṃ pralapamānasya mama moho mahānabhūt |
bhāskarāṃśuprataptasya madanākulitasya ca || 72 ||
[Analyze grammar]

yaṃyaṃ paśyāmi tatrāhaṃ bhramamāṇo mahāvane |
vṛkṣaṃ vā prāṇino vāpi taṃtaṃ pṛcchāmi mohataḥ || 73 ||
[Analyze grammar]

tvaddaṃtamusalaprakhyaṃ yasyā ūruyugaṃ gaja |
tāṃ bālāṃ vada ceddṛṣṭā dayāṃ kṛtvā mamopari || 74 ||
[Analyze grammar]

tvayā jaṃbūka ceddṛṣṭā biṃbāphalanibhādharā |
dayitā mama tadbrūhi śreyaste bhavitā mahat || 75 ||
[Analyze grammar]

athavā bilva śaṃsa tvaṃ yadi bilvopamastanī |
bhramamāṇā vane dṛṣṭā mama prāṇasamā priyā || 76 ||
[Analyze grammar]

tvatpuṣpasadṛśāṃgī sā mama bhāryā manasvinī |
sa tvaṃ caṃpaka jānīṣe yadi tvaṃ śaṃsa me drutam || 77 ||
[Analyze grammar]

madhūka tava puṣpeṇa dayitāyāḥ samau śubhau |
kapolau pāṃḍuracchāyau dṛṣṭvā tvāṃ smṛtimāgatau || 78 ||
[Analyze grammar]

kadalīstaṃbha suvyaktaṃ priyāyāśca sukomalau |
ūrū tvatto'pi tanvaṃgyāḥ satyenātmānamālabhe || 79 ||
[Analyze grammar]

bhobho mṛga na me bhāryā tvayā dṛṣṭā'tra kānane |
tvatsame locane spaṣṭe kajjalena samāvṛte || 80 ||
[Analyze grammar]

tṛṇādo'pi suvṛddho'pi vane vṛddho'pi yaḥ paśuḥ |
so'pi kāṃtāparityakto na mṛgo ramate kṣaṇam || 8 ||
[Analyze grammar]

kāṃtāyāḥ purato nityaṃ vidhatteṃ'gaṃ kalāpakṛt |
vihaṃgayoni jāto'pi vṛddhyarthaṃ puṣpadhanvanaḥ || 82 ||
[Analyze grammar]

yo'yaṃ saṃdṛśyate haṃso haṃsīmanusmaratyasau |
gatistādṛṅna cāpyasya matpriyāyāśca yādṛśī || 83 ||
[Analyze grammar]

eka eva sudhanyo'yaṃ cakravāko vihaṃgamaḥ |
muhūrtamapi yo'bhīṣṭāṃ na tyajeccakravākikām || 84 ||
[Analyze grammar]

ya eṣa śrūyate rāvo vibhramaṃ janayanmama |
kiṃvā pikasamuttho 'yaṃ kiṃ vā me dayitodbhavaḥ || 85 ||
[Analyze grammar]

māṃ dṛṣṭvā'yaṃ mṛgo yāti taṃ mṛgī yāti pṛṣṭhataḥ |
dhāvamānā mamāpyevamanuyāti purā priyā || 86 ||
[Analyze grammar]

vāraṇo'yaṃ priyāṃ kāṃtāmanurāgānuyāyinīm |
sparśayatyagrahastena mama saṃsmārayanpriyāma || 87 ||
[Analyze grammar]

hā priye mṛgaśāvākṣi taptakāṃcanasaṃnibhe |
kathaṃ māṃ na vijānāsi bhramaṃtamiha kānane || 88 ||
[Analyze grammar]

kva sā bhaktiḥ kva sā prītiḥ kva sā tuṣṭiḥ kva sā dayā |
nigadantaṃ sudīnaṃ māṃ saṃbhāṣayasi no yataḥ || 89 ||
[Analyze grammar]

evaṃ pralapamānasya mama prāptāḥ suhṛjjanāḥ |
anveṣaṃtaḥ padaṃ tatra vaneṣu viṣameṣu ca || 90 ||
[Analyze grammar]

tatastaiḥ koparaktākṣaiḥ prokto'haṃ sūtanaṃdana |
bhartsadbhiḥ paruṣairvākyairdhiktvāṃ kāmamayādhunā || 91 ||
[Analyze grammar]

tvaṃ kiṃ śocasi mūḍhātmannaśocyaṃ jīvitaṃ nṛṇām |
yatastvāmapi śocaṃtaṃ śocayiṣyaṃti cāpare || 92 ||
[Analyze grammar]

yūyaṃ vayaṃ tathā cānye saṃjātāḥ prāṇino bhuvi |
sarva eva mariṣyāmastatra kā paridevanā || 93 ||
[Analyze grammar]

adarśanātpriyā prāptā punaścādarśanaṃ gatā |
na sā tava na tasyāstvaṃ vṛthā kimanuśocasi || 94 ||
[Analyze grammar]

nāyamatyaṃtasaṃvāsaḥ kasyacitkenacitsaha |
api svena śarīreṇa kimutānyairvṛthā janaiḥ || 95 ||
[Analyze grammar]

mṛtaṃ vā yadi vā naṣṭaṃ yotītamanuśocati |
sa duḥkhena labhedduḥkhaṃ dvāvanartho prapadyate || 96 ||
[Analyze grammar]

evaṃ saṃbodhayitvā māṃ gṛhītvā te muhurjanaiḥ |
ninyu rgṛhaṃ tataḥ sarve vanāttasmātsudāruṇāt || 97 ||
[Analyze grammar]

tato mama gṛhasthasya smaramāṇasya tāṃ priyām |
utpannaḥ sumahānkopaḥ sarpānprati mahāmate || 98 ||
[Analyze grammar]

tataḥ kopaparītena pratijñātaṃ mayā sphuṭam |
sarpānuddiśya yatsarvaṃ tannibodhaya dāruṇam || 99 ||
[Analyze grammar]

adyaprabhṛti cennāhaṃ sarpaṃ dṛṣṭivaśaṃ gatam |
nihanmi daṇḍaghātena tatpāpaṃ syāddhruvaṃ mama || 100 ||
[Analyze grammar]

yacca nikṣepahartṝṇāṃ yacca viśvāsaghātinām |
tanme syādyadi no hanmi sarpaṃ dṛṣṭivaśaṃ gatam || 101 ||
[Analyze grammar]

yatpāpaṃ sādhuniṃdāyāṃ mātāpitṛvadhe ca yat |
tanme syādyadi no hanmi sarpaṃ dṛṣṭivaśaṃ gatam || 102 ||
[Analyze grammar]

paradāraratānāṃ ca yatpāpaṃ jīvaghātinām |
tanme syādyadi no hanmi sarpaṃ dṛṣṭivaśaṃ gatam || 103 ||
[Analyze grammar]

uktau cābhiratānāṃ ca yatpāpaṃ garadāyinām |
tanme syādyadi no hanmi sarpaṃ dṛṣṭivaśaṃ gatam || 104 ||
[Analyze grammar]

kṛtaghnānāṃ ca yatpāpaṃ paravittāpahāriṇām |
tanme syādyadi no hanmi sarpaṃ dṛṣṭivaśaṃ gatam || 105 ||
[Analyze grammar]

yatpāpaṃ śastrakartṛṇāṃ tathā vahnipradāyinām |
tanme syādyadi no hanmi sarpaṃ dṛṣṭivaśaṃ gatam || 106 ||
[Analyze grammar]

vratabhaṃgena yatpāpaṃ vratināṃ niṃdayāpi yat |
tanme syādyadi no hanmi sarpaṃ dṛṣṭivaśaṃ gatam || 107 ||
[Analyze grammar]

yatpāpaṃ bhrūṇahatyāyāṃ mṛṣṭamāṃsāśināṃ ca yat |
tanme syādyadi no hanmi sarpaṃ dṛṣṭivaśaṃ gatam || 108 ||
[Analyze grammar]

vṛkṣaccheda prasaktānāṃ yatpāpaṃ śalyakāriṇām |
tanme syādyadi no hanmi sarpaṃ dṛṣṭivaśaṃ gatam || 109 ||
[Analyze grammar]

pākhaṃḍināṃ ca yatpāpaṃ nāstikānāṃ ca yadbhavet |
tanme syādyadi no hanmi sarpaṃ dṛṣṭivaśaṃ gatam || 110 ||
[Analyze grammar]

māṃsamadyaprasaktānāṃ yatpāpaṃ viṭabhojinām |
tanme syādyadi no hanmi sarpaṃ dṛṣṭivaśaṃ gatam || 111 ||
[Analyze grammar]

mṛṣāvādaprasaktānāṃ pararaṃdhrāvalokinām |
tanme syādyadi no hanmi sarpaṃ dṛṣṭivaśaṃ gatam || 112 ||
[Analyze grammar]

yatpāpaṃ sākṣyakartṛṇāṃ dhānyasaṃgrahakāriṇām |
tanme syādyadi no hanmi sarpaṃ dṛṣṭivaśaṃ gatam || 113 ||
[Analyze grammar]

ākheṭakaratānāṃ ca yatpāpaṃ pāśadāyinām |
tanme syādyadi no hanmi sarpaṃ dṛṣṭivaśaṃ gatam || 114 ||
[Analyze grammar]

nityaṃ preṣaṇakartṝṇāṃ yatpāpaṃ madhujīvinām |
tanme syādyadi no hanmi sarpaṃ dṛṣṭivaśaṃ gatam || 115 ||
[Analyze grammar]

adṛṣṭadevavaktrāṇāṃ yatpāpaṃ matsyajīvinām |
tanme syādyadi no hanmi sarpaṃ dṛṣṭivaśaṃ gatam || 116 ||
[Analyze grammar]

vivāde pṛcchamānānāṃ pakṣapātena jalpatām |
bhayādvā yadi vā lobhāddveṣādvā kāmato'pi vā || 117 ||
[Analyze grammar]

yatpāpaṃ tu bhavetteṣāṃ nirdayānāṃ durātmanām |
tanme syādyadi no hanmi sarpaṃ dṛṣṭivaśaṃ gatam || 118 ||
[Analyze grammar]

kanyāvikrayakartṛṇāṃ yatpāpaṃ pāpasaṃginām |
tanme syādyadi no hanmi sarpaṃ dṛṣṭivaśaṃ gatam || 119 ||
[Analyze grammar]

vidyāvikrayakartṝṇāṃ yatpāpaṃ samudāhṛtam |
tanme syādyadi no hanmi sarpaṃ dṛṣṭivaśaṃ gatam || 120 ||
[Analyze grammar]

evaṃ mayā pratijñāya kopāviṣṭena sūtaja |
gṛhīto laguḍaḥ sthūlo vadhārthaṃ pavanāśinām || 121 ||
[Analyze grammar]

tataḥprabhṛtyahaṃ bhūmau bhramāmi laguḍāyudhaḥ |
brāhmīṃ vṛttiṃ parityajya mārgamāṇo bhujaṃga mān || 122 ||
[Analyze grammar]

mayā kopaparītena bahavaḥ pannagā hatāḥ |
viṣolbaṇā mahākāyāstathānye madhyamādhamāḥ || 123 ||
[Analyze grammar]

ekadāhaṃ vanaṃ prāpto gahanaṃ lagu ḍāyudhaḥ |
śayānaṃ tatra cāpaśyaṃ jalasarpaṃ vayo'dhikam || 124 ||
[Analyze grammar]

tato'haṃ daṃḍamudyamya kāladaṃḍopamaṃ ruṣā |
hanmi taṃ yāvadevāhaṃ sa māṃ provāca pannagaḥ || 125 ||
[Analyze grammar]

nāparādhyāmi te kiṃcidahaṃ brāhmaṇasattama |
saṃraṃbhāttatkimarthaṃ māṃ jighāṃsasi vayo'dhikam || 126 ||
[Analyze grammar]

tato mayā sa saṃproktaḥ kopātsali lapannagaḥ |
mahāmanyuparītena smṛtvā bhāryāṃ mṛgāvatīm |
mama bhāryā priyā pūrvaṃ sarpeṇāsīdvināśitā || 127 ||
[Analyze grammar]

tato'haṃ tena vaireṇa sūdayāmi maho ragān |
adya tvāmapi neṣyāmi vaivasvatagṛhaṃ prati |
hatvā daṃḍaprahāreṇa tasmādiṣṭatamaṃ smara || 128 ||
[Analyze grammar]

tataḥ sa māṃ punaḥ prāha bhayena mahatāvṛtaḥ |
śṛṇu tāvadvaco'smākaṃ tataḥ kuru yathocitam || 129 ||
[Analyze grammar]

anye te pannagā vipra ye daśaṃtīha mānavān |
vayaṃ salilasaṃbhūtā nirviṣāḥ sarparūpiṇaḥ || 130 ||
[Analyze grammar]

evaṃ prajalpamāno'pi sa daṃḍena mayā hataḥ |
sūta tatsūdanārthāya nirvikalpena cetasā || 131 ||
[Analyze grammar]

athāsau laguḍasparśāttatkṣaṇādeva pannagaḥ |
dvādaśārka pratīkāśo babhūva puruṣo mahān || 132 ||
[Analyze grammar]

tadāścaryaṃ samālokya tato'haṃ vismayānvitaḥ |
uktavāṃstaṃ praṇamyoccaiḥ kṣamyatāmiti sādaram || 133 ||
[Analyze grammar]

ko bhavānkimidaṃ rūpaṃ kṛtaṃ sarpamayaṃ vibho |
kiṃ vā te brahmaśāpo'yaṃ kiṃ vā krīḍā sadedṛśī || 134 ||
[Analyze grammar]

tataḥ provāca māṃ hṛṣṭaḥ sa naraḥ praśrayānvitaḥ |
śṛṇuṣvāvahito bhūtvā vṛttāṃtaṃ svaṃ vadāmi te || 135 ||
[Analyze grammar]

ahamāsaṃ purā vipra camatkārapurottame |
yuvā paramatejasvī dhanavānsusamṛddhibhāk || 136 ||
[Analyze grammar]

tatraiva nagare ramye hyasti puṇyaṃ śivālayam |
siddheśvarasya devasya patākābhiralaṃkṛtama || 37 ||
[Analyze grammar]

kasyacittvatha kālasya tatra yātrā vyajāyata |
tatra vāditraghoṣeṇa nāditaṃ bhuvanatrayam || 138 ||
[Analyze grammar]

atha tatra samāyātā munayaḥ saṃśitavratāḥ |
devasya darśanārthāya śataśo'tha sahasraśaḥ || 139 ||
[Analyze grammar]

śaivāḥ pāśupatāścaiva tathā kāpālikāśca ye |
mahāvratadharāścānye śivabhaktiparāyaṇāḥ || 140 ||
[Analyze grammar]

ekāhārā nirāhārā vāyubhakṣāstathāpare |
abbhakṣāḥ phala bhakṣāśca śīrṇaparṇāśinastathā || 141 ||
[Analyze grammar]

te'bhivandya yathānyāyaṃ devadevaṃ maheśvaram |
upāviṣṭāḥ purastasya kathāścakruḥ pṛthagvidhāḥ || 142 ||
[Analyze grammar]

rājarṣīṇāṃ purāṇānāṃ devendrāṇāṃ ca harṣitāḥ |
dayādharmasamopetāstathānye'pi ca bhūriśaḥ || 143 ||
[Analyze grammar]

kecittatra pranṛtyaṃti gāyaṃti ca tathā'pare |
sādhavo bhaktisaṃyuktā vādyaṃ cakruśca bhūriśaḥ || 94 ||
[Analyze grammar]

anye dānāni yacchaṃti dhaninaḥ śraddhayānvitāḥ |
dīnāṃdhakṛpaṇebhyaśca tapasvibhyo viśeṣataḥ || 45 ||
[Analyze grammar]

evaṃ mahotsave tatra vartamāne mahodaye |
āgato bahubhiḥ sārdhamahaṃ yauvanagarvitaḥ || 146 ||
[Analyze grammar]

śivadarśanavidveṣī tamasā saṃvṛtāśayaḥ |
yātrotsava vināśāya prerito'nyaiḥ sudurjanaiḥ || 147 ||
[Analyze grammar]

jalasarpaṃ samādāya sudīrghaṃ bhīṣaṇākṛtim |
lelihānaṃ muhurjihvāṃ jarayā parayā vṛtam || 148 ||
[Analyze grammar]

tataśca kṣiptavāṃstatra mahājanasamāgame |
taṃ dṛṣṭvā vidrutāḥ sarve janā mṛtyubhayārditāḥ || 149 ||
[Analyze grammar]

tatrāsīttāpaso nāmnā suprabhaḥ śaṃsitavrataḥ |
samādhisthaḥ suśiṣyāḍhyastapasā dagdhakilbiṣaḥ || 150 ||
[Analyze grammar]

niṣkaṃpāṃ sudṛḍhāmṛjvīṃ nātistabdhāṃ na kuṃcitām |
grīvāṃ dadhatsthirāṃ yatnādgātrayaṣṭiṃ ca sarvataḥ || 151 ||
[Analyze grammar]

saṃpaśyannāsikāgraṃ svaṃ diśaścānavalokayan |
tālumadhyagatenaiva jihvāgreṇācalena ca || 152 ||
[Analyze grammar]

āvartapaṃkajāṃtaḥsthamaṣṭapatra madhomukham |
tanmadhyakarṇikāsaṃsthaṃ saṃpaśyanravimaṃḍalam || 583 ||
[Analyze grammar]

tasyāpi madhyataścānyaṃ naramaṃguṣṭhamātrakam |
dvādaśārkapratīkāśamapratarkyatamākṛtim || 54 ||
[Analyze grammar]

paśyanpadmāsanasthaṃ ca vaidanāthaṃ maheśvaram |
yamakṣaraṃ vadaṃtyeva sarvagaṃ sarvavedinam || 155 ||
[Analyze grammar]

aniṃdyaṃ cāpyabhedyaṃ ca jarāmaraṇavarjitam |
pulakāṃcitasarvāṃgo yoganidrāvaśaṃgataḥ || 156 ||
[Analyze grammar]

ānaṃdāśrupariklinnaḥ saṃniruddheṃdriyākṛtiḥ |
kuṃbhayitvodarāṃtaḥsthaṃ svabhyāsādvāyupañcakam || 57 ||
[Analyze grammar]

aṃguṣṭhatarjanīyogaṃ kṛtvā hṛdayasaṃgatam |
evaṃ tatropaviṣṭasya sa sarpastasya vigraham || 158 ||
[Analyze grammar]

veṣṭayāmāsa bhogena niścalasya mahātmanaḥ |
etasminnaṃtare śiṣyastasyāsītsutapo'nvitaḥ || 159 ||
[Analyze grammar]

śrīvardhanaitikhyāto nānāśāstrakṛtaśramaḥ |
sa dṛṣṭvā sarpabhogena samaṃtādveṣṭitaṃ gurum || 160 ||
[Analyze grammar]

nātidūrasthitaṃ māṃ ca jñātvā tatkarmakāriṇam |
uvāca paruṣaṃ vākyaṃ kopasaṃraktalocanaḥ || 161 ||
[Analyze grammar]

sphuratādharayugmena bāṣpagadgadayā girā |
mayā cetsutapastaptaṃ guruśuśrūṣayā sadā || 162 ||
[Analyze grammar]

nirvikalpena cittena yadi dhyāto maheśvaraḥ |
tena satyena duṣṭo'yaṃ pāpātmā brāhmaṇādhamaḥ |
īdṛkkāyo bhavatvāśu gururme yena dharṣitaḥ || 163 ||
[Analyze grammar]

athāhaṃ sarpatāṃ prāptastatkṣaṇādeva dāruṇām |
paśyatāṃ sarvalokānāṃ vadatāṃ sādhusādhviti || 164 ||
[Analyze grammar]

atha gatvā samādheḥ sa paryaṃtaṃ saṃyato muniḥ |
dadarśa nija gātrasthaṃ dvijihvaṃ dāruṇākṛtim || 165 ||
[Analyze grammar]

atha sarpākṛtiṃ māṃ ca duḥkhena mahatānvitam |
taṭasthaṃ bhayasaṃtrastaṃ tathā sarvajanaṃ tadā || 166 ||
[Analyze grammar]

tato vijñāya tatsarvaṃ sa munirjñānacakṣuṣā |
abravītkṛpāyāviṣṭaḥ śiṣyaṃ śrīvardhanaṃ ruṣā || 67 ||
[Analyze grammar]

na me priyaṃ kṛtaṃ śiṣya tvayaitatkarma kurvatā |
śapatā brāhmaṇaṃ dīnaṃnaiṣa dharmastapasvinām || 168 ||
[Analyze grammar]

samo māne'pamāne ca samaloṣṭāśmakāṃcanaḥ |
tapasvī siddhimāyāti suhṛcchatrusamākṛtiḥ || 169 ||
[Analyze grammar]

tasmādajānatā vatsa śapto'yaṃ brāhmaṇastvayā |
bālyabhāvātprasādo'sya bhūyoyukto mamājñayā || 170 ||
[Analyze grammar]

atha śrīvardhanaḥ prāha praṇipatya nijaṃ gurum |
amarṣavaśamāpannaḥ kṛtāṃjalipuṭaḥ sthitaḥ || 171 ||
[Analyze grammar]

ajñānādyadivā jñānānmayā yadvyāhṛtaṃ vacaḥ |
tattathaiva na saṃdehastasmānmaunaṃ guro kuru || 172 ||
[Analyze grammar]

na mṛṣā vacanaṃ proktaṃ svaireṇāpi guro mayā |
kiṃ punaryattavārthāya tasmānmaunaṃ samācara || 173 ||
[Analyze grammar]

paścādudayate sūryaḥ śoṣaṃ yāti mahārṇavaḥ |
api meruśca śīryeta na me syādanyathā vacaḥ || 174 ||
[Analyze grammar]

tamuvāca guruḥ śiṣyaṃ sa punaḥ ślakṣṇayā girā |
jānāmyahaṃ na te vāṇī kathaṃcijjāyate'nyathā || 175 ||
[Analyze grammar]

sadā śiṣyo vayaḥsthopi śāsanīyaḥ prayatnataḥ || |
kiṃ punarbāla eva tvaṃ tena tvāṃ vacmi bhūriśaḥ || 176 ||
[Analyze grammar]

dharmaṃ na vyayate ko'pi munīnāṃ pūrvasaṃcitam |
tapodharmavihīnānāṃ gatisteṣāṃ na vidyate || 177 ||
[Analyze grammar]

kṣamaikā siddhidā proktā yatīnāṃ ca viśeṣataḥ || 3 ||
[Analyze grammar]

tasmātkṣamāṃ puraskṛtya vartitavyaṃ tapasvibhiḥ || 178 ||
[Analyze grammar]

na pāpaṃ prati pāpaḥ syādbuddhireṣā sanātanī |
ātmanaiva hataḥ pāpo yaḥ pāpaṃ tu samācaret || 179 ||
[Analyze grammar]

dagdhaḥ sa dahate bhūyo hatamevanihaṃti ca |
samyagjñānaparityakto yaḥ pāpe pāpamācaret || 180 ||
[Analyze grammar]

upakāriṣu yaḥ sādhuḥ sādhutve tasya ko guṇaḥ |
apakāriṣu yaḥ sādhuḥ kīrtyate janaiḥ || 181 ||
[Analyze grammar]

evamuktvā sa taṃ śiṣyaṃ tato māmidamabravīt |
dayayā parayā yuktaḥ suvrataḥ śaṃsitavrataḥ || 182 ||
[Analyze grammar]

nānyathā vacanaṃ bhāvi mama śiṣyasya pannaga |
kañcitkālaṃ pratīkṣasva tasmātsarpavapuḥsthitaḥ || 183 ||
[Analyze grammar]

sarpa uvāca |
kasminkāle muniśreṣṭha śāpo me'stamupaiṣyati |
prasādaṃ kuru dīnasya śāpasyājñāninastathā || 184 ||
[Analyze grammar]

suvrata uvāca |
muhūrtamapi gītādi yaḥ karoti śivālaye |
na tasya śakyate kartuṃ saṃkhyā dharmasya bhadraka || 185 ||
[Analyze grammar]

muhūrtamapi yo vighnaṃ karoti ca mahotsave |
tasya pāpasya no saṃkhyā kartuṃ śakyā hi kenacit || 186 ||
[Analyze grammar]

tasmāttvaṃ pāpako vipro naiva muktimavāpsyasi |
vārtāsaṃgena durbuddhe tasmācchṛṇu vaco mama || 87 ||
[Analyze grammar]

śaivaṃ ṣaḍakṣaraṃ maṃtraṃ yojapecchraddhayānvitaḥ |
api brahmavadhā tpāpaṃ jātaṃ tasya praṇaśyati || 188 ||
[Analyze grammar]

daśabhirdinajaṃ pāpaṃ viṃśatyā vatsarodbhavam |
ṣaḍakṣarasya jāpyena pāpaṃ kṣālayate naraḥ || 189 ||
[Analyze grammar]

tasmāttvaṃ jalamadhyasthastaṃ maṃtraṃ japa sādaram |
yena pāpaṃ kṣayaṃ yāti kṛtamapyanyajanmani || 190 ||
[Analyze grammar]

yadā tvāṃ jalamadhyasthaṃ vatsonāma dvijo ruṣā |
tāḍayiṣyati daṇḍena tadā mokṣamavāpsyasi || 191 ||
[Analyze grammar]

tasmādgaccha drutaṃ sarpa sthānādasmājjalāśaye |
kiñcidiṣṭaṃ mayā prokto virarāma sa sanmuniḥ || 192 ||
[Analyze grammar]

tato'haṃ duḥkhasaṃyuktaḥ saṃprāpto'tra jalāśaye |
ṣaḍakṣaraṃ japanmantraṃ nityameva vyavasthitaḥ || 193 ||
[Analyze grammar]

tvatprasādādahaṃ muktaḥ sarpatvādbrāhmaṇottama |
kiṃ karomi priyaṃ te'dya tasmācchīghrataraṃ vada || 194 ||
[Analyze grammar]

vatsonāma na sandehaḥ sa tvaṃ yaḥ kīrtito mama |
suvratena vimānaṃ me paśyaitadupasarpati || 195 ||
[Analyze grammar]

tataḥ prokto mayā samyaksa sarpo divyarūpadhṛk |
bhagavannupadeśaṃ me kiñciddehi śubhāva ham || 196 ||
[Analyze grammar]

yena no jāyate duḥkhaṃ priyalopasamudbhavam |
na dāridyaṃ na ca vyādhirna ca śatruparābhavaḥ || 197 ||
[Analyze grammar]

athovāca sa māṃ bhūyaḥ sotsukaḥ puruṣottamaḥ |
praśnabhāraḥ samākhyātastvayā mama dvijottama || 198 ||
[Analyze grammar]

na caitacchakyate vaktuṃ vimāne samupasthite |
vistarāttu tato vacmi saṃkṣepeṇa tava dvija || 199 ||
[Analyze grammar]

śaivaḥ ṣaḍakṣaro mantro nṛṇāmaśubhahārakaḥ |
sa tvayā śaktito vipra japanīyo divāniśam || 200 ||
[Analyze grammar]

tataḥ prāpsyatyasaṃdigdhaṃ yadyadvāṃchasi cetasā |
svargaṃ vā yadi vā mokṣaṃ vimuktaḥ sarvapātakaiḥ || 201 ||
[Analyze grammar]

mayā hi sumahatpāpaṃ sarvadā samanuṣṭhitam |
tatrāpi maṃtramāhātmyātprāptā lokā mahodayāḥ || 202 ||
[Analyze grammar]

eko dānāni sarvāṇi yacchati śraddhayānvitaḥ |
ṣaḍakṣaraṃ japenmaṃtramanyastābhyāṃ samaṃ phalam || 203 ||
[Analyze grammar]

sarvatīrthābhiṣekaṃ ca kurute'nyo naro dvija |
ṣaḍakṣaraṃ japenmaṃtramanyastābhyāṃ samaṃ phalam || 204 ||
[Analyze grammar]

cāṃdrāyaṇasahasraṃ tu kurute'nyo yathocitam |
ṣaḍakṣaraṃ japedanyo maṃtraṃ tābhyāṃ samaṃ phalam || 205 ||
[Analyze grammar]

varṣāsvākāśaśāyī ca hemaṃte salilāśayaḥ |
pañcāgnisādhako grīṣme yāvadvarṣaśataṃ naraḥ || 206 ||
[Analyze grammar]

anyaḥ ṣaḍakṣaraṃ mantraṃ śuciḥ śraddhāsamanvitaḥ |
japedaharniśaṃ martyaḥ phalaṃ tābhyāṃ samaṃ smṛtam || 207 ||
[Analyze grammar]

pitṛpakṣe sadā caiko gayāyāṃ śrāddhamācaret |
anyaḥ ṣaḍakṣaraṃ mantraṃ japettābhyāṃ samaṃ phalam || 208 ||
[Analyze grammar]

gosahasraṃ dadātyekaḥ kārtikyāṃ jyeṣṭhapuṣkare |
ṣaḍakṣaraṃ japenmaṃtramanyastābhyāṃ samaṃ phalam || 209 ||
[Analyze grammar]

saṃnihityāṃ naraḥ snāti rāhugraste divākare |
eko anyastu japenmantraṃ ṣaḍarṇaṃ tulyameva tat || 210 ||
[Analyze grammar]

some somagrahe'nyastu somanāthaṃ prapaśyati |
anyaḥ ṣaḍakṣaraṃ mantraṃ japettābhyāṃ samaṃ phalam || 211 ||
[Analyze grammar]

ekaścaṇḍīśvaraṃ paśyedayane cottare naraḥ |
anyaḥ ṣaḍakṣaraṃ mantraṃ japettābhyāṃ samaṃ phalam || 212 ||
[Analyze grammar]

bhṛgupātaṃ patedekaḥ kedāraṃ vīkṣya bhaktitaḥ |
anyaḥ ṣaḍakṣaraṃ maṃtraṃ japettābhyāṃ samaṃ phalam || 213 ||
[Analyze grammar]

karīṣaṃ sādhayedanyo dattvā sarvasvamāditaḥ |
ṣaḍakṣaraṃ japenmaṃtramanyastābhyāṃ samaṃ phalam || 214 ||
[Analyze grammar]

sarva saṃgaparityāgaṃ kṛtvaiko jñānamāpnuyāt |
anyaḥ ṣaḍakṣaraṃ mantraṃ japettābhyāṃ samaṃ phalam || 215 ||
[Analyze grammar]

etatte paramaṃ guhyaṃ mayā vipra prakīrtitam |
nāstikāya na dātavyaṃ bhaktihīnāya naiva ca || 216 ||
[Analyze grammar]

tathānyadapi vakṣyāmi hitabuddhyā dvijottama |
mama vākyaṃ kuruṣvādya yadīcchasi parāṃ gatim || 217 ||
[Analyze grammar]

ahiṃsā paramo dharmaḥ sarvavede prakīrtitaḥ |
brāhmaṇasya viśeṣeṇa tasmātsarpavadhaṃ tyaja || 218 ||
[Analyze grammar]

ahiṃsakāni bhūtāni yo hinasti sunirdayaḥ |
sa yāti narakaṃ ghoraṃ yāvadābhūtasaṃplavam || 219 ||
[Analyze grammar]

carācarāṇāṃ bhūtānāmabhayaṃ yaḥ prayacchati |
sarvadā sarvasaukhyāḍhyo jāyate divi ceha ca || 220 ||
[Analyze grammar]

nāsti bhargasamo devo nāsti gaṃgāsamā nadī |
nāsti hiṃsāsamaṃ pāpaṃ nāsti dharmo dayāparaḥ || 221 ||
[Analyze grammar]

athāhamabruvaṃ taṃ ca tacchrutvā tasya jalpitam |
ahiṃsālakṣaṇaṃ dharmaṃ paralokabhayāturaḥ || 222 ||
[Analyze grammar]

manyate vṛddhalokānāmetadvākyaṃ śrutaṃ mayā |
bhūpaterneva doṣaḥ syādvane vyāpāditairmṛgaiḥ || 223 ||
[Analyze grammar]

pravadaṃti tathā vaidyā vaidyaśāstravicakṣaṇāḥ |
bhavaṃti puṣṭisaṃyukā māṃsādāścirajīvinaḥ || 224 ||
[Analyze grammar]

tadatra viṣaye brūhi paraṃ niḥśreyasaṃ vacaḥ |
sarvaṃ kartāsmyasaṃdigdhaṃ tava vaktrādvinirgatam || 225 ||
[Analyze grammar]

atha māṃ sa punaḥ prāha vada maivaṃ dvijottama |
matametada sādhūnāṃ pāpānāṃ māṃsagṛddhinām || 226 ||
[Analyze grammar]

aho śocyatamā loke pāpātmānaḥ sunirdayāḥ |
sarvadoṣākaraṃ māṃsaṃ mūḍhāḥ svādaṃti ye narāḥ || 227 ||
[Analyze grammar]

na māṃsamāyuṣo heturārogyasya balasya vā |
sarvametadasatyaṃ syācchraṇuṣvādya nidarśanam || 228 ||
[Analyze grammar]

māṃsāśino'pi dṛśyaṃte rogārtā durbalāstathā |
svalpāyuṣaśca matvaivaṃ māṃsaṃ varjaya dūrataḥ || 229 ||
[Analyze grammar]

amāṃsādā api kṣmāyāṃ dṛśyaṃte rogavarjitāḥ |
cirāyuṣaśca pīnāṃgāsta smānmāṃsaṃ vivarjayet || 230 ||
[Analyze grammar]

yo bhakṣayati māṃsāni sattvānāṃ jīvitaiṣiṇām |
sa yāti narakaṃ ghoraṃ tatrastho bhakṣyate ca taiḥ || 231 ||
[Analyze grammar]

na hi māṃsaṃ tṛṇātkāṣṭhādupalādapi jāyate |
hate jaṃtau bhavenmāṃsaṃ tasmāttatparivarjayet || 232 ||
[Analyze grammar]

etadeva hi dṛṣṭāṃtaṃ māṃsasya parivarjane |
yadaṃgaṃ hriyate svaṃ ca kaṃṭakenāpi vikṣatam || 233 ||
[Analyze grammar]

ātmaupamyena bhūtāni tasmātsarvāṇi paṃḍitaiḥ |
draṣṭavyāni na hiṃsyāni rakṣaṇīyāni śaktitaḥ || 234 ||
[Analyze grammar]

haṃtā caivānumaṃtā ca viśastā krayavikrayī |
saṃskartā copahartā ca khādakaścāṣṭa ghātakāḥ || 235 ||
[Analyze grammar]

dhanena krayakṛddhaṃti bhakṣaṇena ca khādakaḥ |
ghātako vadhabaṃdhābhyāmityanyastrividho vadhaḥ || 236 ||
[Analyze grammar]

karmaṇā manasā vācā yo hinasti na kiṃcana |
sa prāpnoti paraṃ sthānaṃ jarā maraṇavarjitam || 237 ||
[Analyze grammar]

śākamūlaphalāhāro brahmacaryaparāyaṇaḥ |
na tasya phalamāpnoti yadi hiṃsāparo naraḥ || 238 ||
[Analyze grammar]

eko varṣaśataṃ sāgraṃ tapastapati dustaram |
ahiṃsānirato yastu tayoḥ śreṣṭho dayānvitaḥ || 239 ||
[Analyze grammar]

yaṃyaṃ kāmayate kāmaṃ duṣprāpamapi mānavaḥ |
taṃ tamāpnotyasaṃdigdhaṃ yadi syātsudayānvitaḥ || 240 ||
[Analyze grammar]

kāmagena vimānena divyastrīśatasevitaḥ |
devavanmodate svarge savabhūtābhayapradaḥ || 241 ||
[Analyze grammar]

evamuktvā mahātmā sa paśyato mama sūtaja |
vimānavaramāruhya gataśca tridivālayam || 242 ||
[Analyze grammar]

gandharvairgīyamānastu stūyamānaśca kinnaraiḥ |
ṣaḍakṣarasya maṃtrasya māhātmye na mahāmate || 243 ||
[Analyze grammar]

tasmingate tadā svargaṃ duḥkhaṃ me samupasthitam |
smṛtvā pūrvaṃ hatānsarpānbhagnagātro'bhavaṃ tadā || 244 ||
[Analyze grammar]

tato'haṃ kṛtavāṃstatra vipralāpānanekaśaḥ |
svakarmabhayasaṃtrastastasminneva mahāvane || 245 ||
[Analyze grammar]

aho mayā nṛśaṃsena bahavaḥ prāṇino hatāḥ |
ninditaśca mahādevo nara kārtirbhaviṣyati || 246 ||
[Analyze grammar]

so'haṃ hiṃsāṃ parityajya cariṣyāmi mahattapaḥ |
śivadīkṣāṃ samāsādya pūjayiṣye maheśvaram || 247 ||
[Analyze grammar]

yatkiṃcittriṣu lokeṣu prārthayaṃti narāḥ sukham |
tatsarvaṃ tapasā sādhyaṃ tasmātkāryaṃ mayā tapaḥ || 248 ||
[Analyze grammar]

adhunaiko'hamekāhamekaikasminvanaspatau |
caranbhaikṣaṃ munirmaunī cariṣyāmyāśramānimān || 249 ||
[Analyze grammar]

pāṃsunā samavacchannaḥ śūnyāgārapratiśrayaḥ |
vṛkṣamūlaniketo vā tyaktasarvapriyāpriyaḥ || 250 ||
[Analyze grammar]

evaṃ vilapya yatnena mayā sūtakulodvaha |
gṛhītaṃ bhaktiyuktena śivadīkṣāvrataṃ tataḥ || 251 ||
[Analyze grammar]

ṣaḍakṣarasya maṃtrasya ayutaṃ prajapāmyaham |
trisandhyaṃ śraddhayā yuktaḥ siddheśvarasamīpataḥ || 252 ||
[Analyze grammar]

tatprabhāvena me sthairyaṃ saṃjātaṃ yauvanodbhavam |
tathā lokātaṃrajñānaṃ khecaratvaṃ ca sūtaja || 253 ||
[Analyze grammar]

siddheśvaraṃ prayāsyāmi dvāparāṃte hyavasthite |
sadāśivaṃ prayāsyāmi satyametanmayoditam || 254 ||
[Analyze grammar]

etatte sarvamākhyātaṃ mayā sūtaja mokṣadam |
ṣaḍakṣarasya māhātmyaṃ sarvapāpapraṇāśanam || 255 ||
[Analyze grammar]

yaścaitacchṛṇuyānnityaṃ samyakchraddhāsamanvitaḥ |
ājanmamaraṇātpāpātso'pi mucyeta mānavaḥ || 256 ||
[Analyze grammar]

tasmāttvaṃ hi mahābhāga mantramenaṃ sadā japa |
saṃprāpsyasi parānkāmānmanasā vāṃchitānsadā || 257 ||
[Analyze grammar]

sūta uvāca |
etacchrutaṃ mayā pūrvaṃ sakāśāttasya sadguroḥ |
ṣaḍakṣarasya māhātmyaṃ yadyuṣmākaṃ prakīrtitam || 258 ||
[Analyze grammar]

dhanyaṃ yaśasyamāyuṣyaṃ śatrupakṣakṣayāvaham |
paṭhatāṃ śṛṇvatāṃ nityaṃ sarvakāmābhayapradam || 259 ||
[Analyze grammar]