Chapter 24

[English text for this chapter is available]

| sūta uvāca |
tatra viṣṇupadaṃ nāma tīrthaṃ tīrthe śubhe sthitam |
aparaṃ brāhmaṇaśreṣṭhāḥ sarvapātakanāśanam || 1 ||
[Analyze grammar]

ayane dakṣiṇe prāpte yastatpūjya samāhitaḥ |
nivedayettathātmānaṃ samyakchraddhāsamanvitaḥ || 2 ||
[Analyze grammar]

sa mṛto'pyayane yāmye tadviṣṇoḥ paramaṃ padam |
prāpnoti nātra saṃdehastatprabhāvāddvijottamāḥ || 3 ||
[Analyze grammar]

tathā caivottare prāpte pūjayitvā yathāvidhi |
samyaṅnivedayedbhaktyā ātmānaṃ yaḥ samāhitaḥ |
so'pi viṣṇoḥ padaṃ puṇyaṃ prāpya saṃjāyate sukhī || 4 ||
[Analyze grammar]

ṛṣaya ūcuḥ |
kathaṃ tatra padaṃ jātaṃ viṣṇoravyaktajanmanaḥ |
kathaṃ nivedyate tatra samyagātmā' yanadvaye || 5 ||
[Analyze grammar]

tasmindṛṣṭe'thavā spṛṣṭe yatphalaṃ labhyate naraiḥ |
tatsarvaṃ sūtaja brūhi paraṃ kautṛhalaṃ hi naḥ || 6 ||
[Analyze grammar]

sūta uvāca |
balirbaddho yadā tena viṣṇunā prabhaviṣṇunā |
tadā kramaistribhirvyāptaṃ trailokyaṃ sacarācaram || 7 ||
[Analyze grammar]

hāṭakeśvaraje kṣetre saṃnyastaḥ prathamaḥ kramaḥ |
maharloke dvitī yastu tadā tena mahātmanā || 8 ||
[Analyze grammar]

tṛtīyasya samudyogaṃ yadā cakre sa cakradhṛk |
tadā bhinnaṃ dvijaśreṣṭhā brahmāṃḍaṃ laghutāṃ gatam || 9 ||
[Analyze grammar]

pādāgreṇātha saṃbhinne brahmāṃḍe nirmalaṃ jalam |
aṃguṣṭhāgreṇa saṃprāptaṃ krameṇa dharaṇītale || 10 ||
[Analyze grammar]

brahmalokaṃ tadā kṛtsnaṃ plāvayitvā jalaṃ hi tat |
śuddhasphaṭikasaṃkāśaṃ kundendusadṛśadyuti |
matsyakacchapasaṃkīrṇaṃ grāhayūthaiḥ samākulam || 11 ||
[Analyze grammar]

tataḥ prabhṛti sā loke gaṃgā viṣṇupadī smṛtā |
pavitramapi tatkṣetraṃ nayantī sā pavitratām || 12 ||
[Analyze grammar]

evaṃ viṣṇoḥ padaṃ tatra saṃjātaṃ munisattamāḥ |
sarvapāpaharaṃ puṃsāṃ tadā viṣṇupadī smṛtā || 13 ||
[Analyze grammar]

yastasyāṃ śraddhayā yuktaḥ snānaṃ kṛtvā yathoditam |
sparśayettatpadaṃ viṣṇoḥ sa yāti paramaṃ padam || 14 ||
[Analyze grammar]

yastatrakurute śrāddhaṃ samyakchraddhāsamanvitaḥ |
snātvā viṣṇupadītoye gayāśrāddhaphalaṃ labhet || 15 ||
[Analyze grammar]

māghamāse naraḥ snānaṃ prātarutthāya tatra yaḥ |
karoti satataṃ martyaḥ sa prayāgaphalaṃ labhet || 16 ||
[Analyze grammar]

athavā vatsaraṃ yāvatkṣaṇaṃ kṛtvātra bhaktitaḥ |
tatra snānaṃ ca yaḥ kuryātsa muktiṃ labhate naraḥ || 17 ||
[Analyze grammar]

yasyāsthīni jale tatra kṣipyaṃte manujasya ca |
api pāpa samācāraḥ sa prāpnoti parāṃ gatim || 18 ||
[Analyze grammar]

api pakṣipataṃgā ye paśavaḥ kṛmayo mṛgāḥ |
praviṣṭāḥ salile tasmiṃstṛṣārtā bhaktivarjitāḥ || 19 ||
[Analyze grammar]

te'pi pāpavinirmuktā dehāṃte cātidurlabham |
cakriṇastatpadaṃ yāṃti jarāmaraṇavarjitam || 20 ||
[Analyze grammar]

kiṃ punaḥ śraddhayopetāḥ parvakāla upasthite |
dattvā dānaṃ dvijendrāṇāṃ narā vedavidāṃ dvijāḥ || 21 ||
[Analyze grammar]

tatra gāthā purā gītā nāradena maharṣiṇā |
viṣṇupadyāḥ samālokya prabhāvaṃ pāpanāśanam || 22 ||
[Analyze grammar]

kiṃ vratairniyamairvāpi tapobhirvividhairmakhaiḥ |
kṛtairviṣṇupadītoye saṃsthite dharaṇītale || 23 ||
[Analyze grammar]

ekaḥ sarveṣu tīrtheṣu snānaṃ martyaḥ samācaret |
eko viṣṇupadītoye snāti dvābhyāṃ samaṃ phalam || 24 ||
[Analyze grammar]

eko dānāni sarvāṇi brāhmaṇebhyaḥ prayacchati |
eko viṣṇupadītoye snāti dvābhyāṃ samaṃ hi tat || 25 ||
[Analyze grammar]

pañcāgnisādhako grīṣme varṣāsvākāśamāśritaḥ |
jalāśrayaśca hemaṃta ekaḥ syātpuruṣaḥ kṣitau || 26 ||
[Analyze grammar]

anyo viṣṇupadītoye snātvā viṣṇupadaṃ spṛśet |
tāvubhāvapi nirdiṣṭau samau puruṣasattamau || 27 ||
[Analyze grammar]

ekāṃtaropavāsī ya ekaḥ syājjīvitāvadhi |
ekoviṣṇupadītoye snāti dvābhyāṃ samaṃ phalam || 28 ||
[Analyze grammar]

trirātropoṣitastveko yāvadvarṣaśataṃ naraḥ |
eko viṣṇupadītoye snāti dvābhyāṃ samaṃ phalam || 29 ||
[Analyze grammar]

sūta uvāca |
evamuktvā muniśreṣṭho nārado dvijasattamāḥ |
virarāma munīnāṃ sa bahūnāṃ purato'sakṛt || 30 ||
[Analyze grammar]

tasmātsarva prayatnena snānaṃ tatra samācareta |
saṃspṛśecca padaṃ viṣṇorya icchecchreya ātmanaḥ || 31 ||
[Analyze grammar]

ṛṣaya ūcuḥ |
yadetadbhavatā proktamātmānaṃ vinivedayet |
viṣṇoḥ padasya saṃprāpte ayane dakṣiṇottare || 32 ||
[Analyze grammar]

tatkena vidhinā sūta mantraiśca vada satvaram |
vayaṃ yena ca tatkurmaḥ sarvaṃ bhaktisamanvitāḥ || 33 ||
[Analyze grammar]

sūta uvāca |
dakṣiṇe cottare cāpi saṃprāpte cāyanadvaye |
pūjayitvā padaṃ viṣṇorimaṃ mantramudīrayet || 34 ||
[Analyze grammar]

ṣaṇmāsābhyaṃtare mṛtyuryadyakasmādbhavenmama |
tatte padaṃ gatirme syādahaṃ te bhṛtyatāṃ gataḥ || 35 ||
[Analyze grammar]

evaṃ procya hariṃ paścātpūjayedbrāhmaṇāṃstataḥ |
atha taiḥ samamaśnīyāttataḥ prāpnoti sadgatim || 36 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye viṣṇupadītīrthotpattivarṇanaṃnāma caturviṃśo'dhyāyaḥ || 24 ||
[Analyze grammar]