Chapter 20

[English text for this chapter is available]

| sūta uvāca |
tatra dāśarathī rāmo vanavāsāya dīkṣitaḥ |
bhramamāṇo dharāpṛṣṭhe sītālakṣmaṇasaṃyutaḥ || 1 ||
[Analyze grammar]

samā'yāto dvijaśreṣṭhā yatra sā pitṛkūpikā |
tṛṣārtaśca śramārtaśca niṣasāda dharātale || 2 ||
[Analyze grammar]

etasminnaṃtare prāpto bhagavāndinanāyakaḥ |
astācalaṃ japāpuṣpasannibho dvijasattamāḥ || 3 ||
[Analyze grammar]

tataḥ plakṣanagādhastātparṇānyāstīrya bhūtale |
sāyaṃtanaṃ vidhiṃ kṛtvā suṣvāpa raghunandanaḥ || 4 ||
[Analyze grammar]

athā'valokayāmāsa svapne daśarathaṃ nṛpam |
yadvatpūrvaṃ priyā'lāpasaṃsaktaṃ hṛṣṭamānasam || 5 ||
[Analyze grammar]

tataḥ prabhāte vimale prodgate ravimaṇḍale |
viprānāhūya tatsarvaṃ kathayāmāsa rāghavaḥ || 6 ||
[Analyze grammar]

adya svapne mayā viprāḥ priyālāpaparaḥ pitā |
atihṛṣṭamanā dṛṣṭaḥ śvetamālyānulepanaḥ || 7 ||
[Analyze grammar]

tatkīdṛkpariṇāmo'sya svapnasya dvijasattamāḥ |
bhaviṣyati prajalpadhvaṃ paraṃ kautūhalaṃ yataḥ || 8 ||
[Analyze grammar]

brāhmaṇā ūcuḥ |
pitaraḥ śrāddhakāmā ye vṛddhiṃ paśyaṃti vā nṛpa |
te svapne darśanaṃ yāṃti putrāṇāmiti naḥ śrutam || 9 ||
[Analyze grammar]

tadasyāṃ kūpikāyāṃ ca svayameva gayā sthitā |
tena tvayā pitā dṛṣṭaḥ svapne śrāddhasya vāṃchakaḥ || 10 ||
[Analyze grammar]

tasmātkuru raghuśreṣṭha śrāddhamatra yathoditam |
nīvāraiḥ śāka mūlaiśca tathā'raṇyodbhavaistilaiḥ || 11 ||
[Analyze grammar]

athaivāmantrayāmāsa tānviprānraghusattamaḥ |
śrāddheṣu śraddhayā yuktaḥ prasādaḥ kriyatāmiti || 12 ||
[Analyze grammar]

bāḍhamityeva te coktvā snānārthaṃ dvijasattamāḥ |
gatāḥ sarve susaṃhṛṣṭā svakīyānāśramānprati va || 13 ||
[Analyze grammar]

atha teṣu prayāteṣu brāhmaṇeṣu raghūttamaḥ |
provāca lakṣmaṇaṃ pārśve vinayāvanataṃ sthitam || 14 ||
[Analyze grammar]

śākamūlaphalānyāśu śrāddhārthaṃ samupānaya |
saumitrānaya vaidehī svayaṃ pacati bhāminī || 15 ||
[Analyze grammar]

tacchrutvā lakṣmaṇastūrṇaṃ jagāmā'raṇyameva hi |
śrāddhārthamānināyā'śu phalāni vividhāni ca || 16 ||
[Analyze grammar]

dhātrīphalāni cā'mrāṇi cirbhaṭānīṃ gudāni ca |
karīrāṇi kapitthāni tathaivā'nyāni bhūriśaḥ || 17 ||
[Analyze grammar]

tataśca pācayāmāsa tadarthe janakodbhavā |
rāmādeśātsvayaṃ sādhvī vinayena samanvitā || 18 ||
[Analyze grammar]

tataśca kutape prāpte kāle te dvijasattamāḥ |
kṛtāhnikāḥ samāyātā rāmabhaktisamanvitāḥ || 19 ||
[Analyze grammar]

etasminnaṃtare sītā plakṣavṛkṣāṃtare sthitā |
ātmānaṃ gopayāmāsa yathā vetti na rāghavaḥ || 20 ||
[Analyze grammar]

sa tāṃ sīteti sīteti vyāhṛtyātha muhurmuhuḥ |
strīdharmiṇīti matvā tu lakṣmaṇaṃ cedamabravīt || 21 ||
[Analyze grammar]

vatsa lakṣmaṇa śuśrūṣāṃ viprāṇāṃ śrāddhasaṃbhavām |
pādaprakṣālanādyāṃ tvaṃ yathāvatkartumarhasi || 22 ||
[Analyze grammar]

bāḍhamityeva saṃprokto lakṣmaṇaḥ śubhalakṣaṇaḥ |
cakre sarvaṃ tathā karma yathā nārī vicakṣaṇā || 23 ||
[Analyze grammar]

tato nirvartite śrāddhe brāhmaṇeṣu gateṣvatha |
janakasya sutā sādhvī tatkṣaṇātsamupasthitā || 24 ||
[Analyze grammar]

tāṃ dṛṣṭvā rāghavaḥ sītāṃ kopasaṃraktalocanaḥ |
provāca paruṣairvākyairbhartsamāno muhurmuhuḥ || 25 ||
[Analyze grammar]

āyāteṣu dvijāteṣu śrāddhakāla upasthite |
kva gatā vada pāpe tvaṃ māṃ parityajya dūrataḥ || 26 ||
[Analyze grammar]

naitadyuktaṃ kulastrīṇāṃ viśeṣādatra kānane |
vihartuṃ dūrataḥ śūnye tasmāttyājyā'si maithili || 27 ||
[Analyze grammar]

tasya tadvacanaṃ śrutvā bhītā sā janakodbhavā |
uvāca vepamānāṃgī praskhalaṃtyā girā tataḥ || 28 ||
[Analyze grammar]

na māmarhasi kārye'smingarhituṃ raghusattama |
yasmādahamatikrāntā sthānādasmācchraṇuṣva tat || 29 ||
[Analyze grammar]

pitā tava mayā dṛṣṭaḥ sākṣāddaśarathaḥ svayam |
brāhmaṇasya śarīrastho dvitīyaśca pitāmahaḥ || 30 ||
[Analyze grammar]

pituḥ pitāmaho'nyasya tṛtīyasya raghūttama |
trayāṇāṃ ca tathānyeṣāṃ trayo'nye nṛpasaṃnibhāḥ || 31 ||
[Analyze grammar]

brāhmaṇānāṃ mayā dṛṣṭāḥ śarīrasthāḥ suharṣitāḥ |
mātāmahānahaṃ manye tānapi trīnahaṃ sphuṭam || 32 ||
[Analyze grammar]

tato 'haṃ lajjayā naṣṭā dṛṣṭvā śvaśurasaṃgamān |
yena bhuktāni bhojyāni purā mṛṣṭānyanekaśaḥ || 33 ||
[Analyze grammar]

tathā khādyāni lehyāni coṣyāṇi ca viśeṣataḥ |
pitā tava kathaṃ so'dya kaṣāyāṇi kaṭūni ca |
bhakṣayiṣyati dattāni svahastena mayā vibho || 34 ||
[Analyze grammar]

etasmātkāraṇānnaṣṭā tvatsamīpādahaṃ vibho |
śrāddhakāle'pi saṃprāpte satyenātmānamālabhe || 358 ||
[Analyze grammar]

tacchrutvā saṃprahṛṣṭātmā rāmo rājīvalocanaḥ |
sādhusādhviti tāṃ prāha pariṣvajya muhurmuhuḥ || 36 ||
[Analyze grammar]

tato bhuktvā svayaṃ rāmo lakṣmaṇena samanvitaḥ |
sāyāhne samanuprāpte saṃdhyākāryaṃ vidhāya ca || 37 ||
[Analyze grammar]

provāca lakṣmaṇaṃ vatsa parṇānyāstīrya bhūtale |
śayyāṃ kuru samānīya pādaśaucāya sajjalam || 38 ||
[Analyze grammar]

tataḥ kopaparītātmā saumitriḥ prāha rāghavam |
nāhaṃ śayyāṃ kariṣyāmi pādaprakṣālanaṃ na ca || 39 ||
[Analyze grammar]

tathā'nyadapi yatkiṃcitkarma svalpamapi prabho |
tvāṃ vā tyaktvā gamiṣyāmi kutracitpīḍito bhṛśam || 40 ||
[Analyze grammar]

preṣyatvena raghuśreṣṭha satyametanmayoditam |
sītāyāḥ kiṃ samādeśyaṃ na kiṃcitsaṃprayacchasi |
api svalpataraṃ rāma mayā tvaṃ kiṃ kariṣyasi || 41 ||
[Analyze grammar]

tasya tadvacanaṃ śrutvā vikṛtaṃ cāpi rāghavaḥ |
tūṣṇīṃ babhūva medhāvī hāsyaṃ kṛtvā manāktataḥ || 42 ||
[Analyze grammar]

tataḥ svayaṃ samutthāya kṛtvā svā starakaṃ śubham |
sītayā kṣālitāṃghristu suṣvāpa tadanaṃtaram || 43 ||
[Analyze grammar]

lakṣmaṇo'pi vidūrasthaḥ kopasaṃraktalocanaḥ |
vṛkṣamūlaṃ samāśritya suptaścitte vyaciṃtayat || 44 ||
[Analyze grammar]

hatvainaṃ rāghavaṃ suptaṃ sītāṃ patnīṃ vidhāya ca |
kiṃ gacchāmi nijaṃ sthānaṃ videśaṃ vā'pidūrataḥ || 45 ||
[Analyze grammar]

evaṃ ciṃtayatastasya bahudhā lakṣmaṇasya sā |
vyatikrāṃtā niśā viprāḥ kṛcchreṇa mahatā tataḥ || 46 ||
[Analyze grammar]

na tasya niścayo jajñe tasminkṛtye kathaṃcana |
kopātpraṇaṣṭanidrasya soṣṇaṃ niḥśvasato muhuḥ || 47 ||
[Analyze grammar]

tataḥ prabhāte vimale kṛtapūrvāhṇikakriyaḥ |
rāmaḥ sītāṃ samādāya prasthito dakṣiṇāṃ diśam || 48 ||
[Analyze grammar]

lakṣmaṇo'pi dhanuḥ sajyaṃ kṛtvā saṃdhāya sāyakam |
anuvrajati pṛṣṭhasthastasya cchidraṃ vilokayan || 49 ||
[Analyze grammar]

tato gokarṇamāsādya praṇamya ca maheśvaram |
pratasthe rāghavo yāvatsaumitristāvadāgataḥ || 50 ||
[Analyze grammar]

bāṣpaparyākulākṣaśca vrīḍayā'dhomukhaḥ sthitaḥ |
praṇamya śirasā rāmaṃ tataḥ prāha suduḥ khitaḥ || 51 ||
[Analyze grammar]

kuru me nigrahaṃ nātha svāmidrohasamudbhavam |
atipāpasya duṣṭasya kṛtaghnasya raghūttama || 52 ||
[Analyze grammar]

uttarāṇi viruddhāni tava dattāni bhūriśaḥ |
mayā vinā'parādhena vadhopāyaśca ciṃtitaḥ || 53 ||
[Analyze grammar]

tataśca taṃ pariṣvajya rāmo'pi nijabāṃdhavam |
bāṣpaklinnamukhaḥ prāha kṣāṃtaṃ vatsa mayā tava || 54 ||
[Analyze grammar]

na te tvanyaḥ priyaḥ kaścinmāṃ muktvā vedmyahaṃ sphuṭam |
tasmādāgaccha gacchāmo mārgaṃ velādhikā bhavet || 55 ||
[Analyze grammar]

lakṣmaṇa uvāca |
yadi me nigrahaṃ nātha na kariṣyasi sāṃpratam |
prāṇatyāgaṃ kariṣyāmi vahnāvātmaviśuddhaye || 56 ||
[Analyze grammar]

rāmalakṣmaṇayorevaṃ vadatostatra kānane |
ājagāma muniśreṣṭho mārkaṃḍa iti yaḥ smṛtaḥ || 57 ||
[Analyze grammar]

tataḥ praṇamya taṃ rāmaḥ sītālakṣmaṇasaṃyutaḥ |
provāca svāgataṃ testu kutaḥ prāpto'si sanmune || 58 ||
[Analyze grammar]

mārkaṃḍeya uvāca |
prabhāsādahamāyātaḥ sāṃprataṃ raghunaṃdana |
svamāśramaṃ gamiṣyāmi kṣetre'traiva vyavasthitam || 59 ||
[Analyze grammar]

mayā rāghava tatrā'sti sthāpitaḥ prapitāmahaḥ |
tasyā'dya divase yātrā bahuśreyaḥpradā smṛtā || 60 ||
[Analyze grammar]

tasmāttvamapi tatraiva tūrṇameva mayā saha |
mamāśramapade sthitvā paśya devaṃ pitāmaham || 61 ||
[Analyze grammar]

yena syāḥ sarvaśatrūṇāmagamyastvaṃ raghūdvaha |
jyeṣṭhapañcadaśīyoge jyeṣṭhaputraḥ samāhitaḥ || 62 ||
[Analyze grammar]

yastatra kurute snānaṃ tasya mṛtyubhayaṃ kutaḥ |
sā'dya paṃcadaśī rāma jyeṣṭhamāsasamudbhavā |
jyeṣṭhānakṣatrasaṃyuktā tasmātsnātuṃ tvamarhasi || 63 ||
[Analyze grammar]

tataḥ saṃprasthitaṃ rāmaṃ dṛṣṭvā provāca lakṣmaṇaḥ |
kuru me nigrahaṃ tāvadgaccha tīrthaṃ tataḥ prabho || 64 ||
[Analyze grammar]

rāma uvāca |
sthite'sminmuniśārdūle samīpe vatsa lakṣmaṇa |
anarhā niṣkṛtiḥ kartuṃ tasmādenaṃ prayācaya || 65 ||
[Analyze grammar]

lakṣmaṇa uvāca |
svāmidrohe kṛte brahmanprāyaścittaṃ yadīkṣyate |
tanme dehi sphuṭaṃ yena kāyaśuddhiḥ prajāyate || 66 ||
[Analyze grammar]

mārkaṃḍeya uvāca |
mamā'śramasamīpe'sti sutīrthaṃ bālamaṃḍanam |
svāmidroharatāḥ snātā mucyaṃte tatra pātakaiḥ || 67 ||
[Analyze grammar]

tatra śakro vipāpmābhūddhatvā garbhaṃ diteḥ purā |
viśvastāyā viśeṣeṇa mātuḥ kākutsthasattama |
tasmāttatra drutaṃ gatvā snānaṃ kuru mahāmate || 68 ||
[Analyze grammar]

tataḥ pramucyase pāpātsvāmidrohasamudbhavāt |
aparaṃ nāsti te doṣo manasā pātakaṃ kṛtam || 69 ||
[Analyze grammar]

manastāpena śudhyeta matametanmanīṣiṇām |
tvayā tu manasā drohaḥ kṛto rāmakṛte yataḥ || 70 ||
[Analyze grammar]

īdṛkṣānmanasastāpāttasmācchuddho'si lakṣmaṇa |
aparaṃ śṛṇu me vākyaṃ nāsti doṣastavā nagha || 71 ||
[Analyze grammar]

īdṛkkṣetraprabhāvo'yaṃ saubhrātreṇa vivarjitaḥ |
paṃcakrośātmake kṣetre ye vasantyatra lakṣmaṇa || 72 ||
[Analyze grammar]

api svalpaṃ na saubhrātraṃ teṣāṃ saṃjāyate kvacit || 73 ||
[Analyze grammar]

tāvatsnehaparo martyastāvadvadati komalam |
camatkārodbhavaṃ kṣetraṃ yāvanna spṛśateṃ'ghribhiḥ || 74 ||
[Analyze grammar]

ye'nyepi nivasaṃtyatra paśavaḥ pakṣiṇo mṛgāḥ |
te'pi sauhārddanirmuktāḥ sasparddhā itaretaram || 75 ||
[Analyze grammar]

kasyacitkenacitsārdhaṃ sauhārdaṃ naiva vidyate |
tasmānnaivāsti te doṣa īdṛkkṣe trasya saṃsthitiḥ || 76 ||
[Analyze grammar]

tathāpi yadi te kācicchaṃkā citte vyavasthitā |
tatsnānaṃ kuru gatvā tu tasmiṃstīrthe suśobhane || 77 ||
[Analyze grammar]

yatra śakro vipāpmā'bhūddrohaṃ kṛtvā sudāruṇam |
viśvastāyā diteḥ pūrvaṃ garbhapātasamudravam || 78 ||
[Analyze grammar]

evamuktastu saumitrirgatvā tatra dvijottamāḥ |
tīrthe snānācca saṃpanno viśuddhaḥ śakrasevite |
rāmo'pi tatra gatvāśu mārkaṃḍeyavarāśrame || 79 ||
[Analyze grammar]

snānaṃ kṛtvā yathānyāyaṃ dadarśā'tha pitāmaham |
jagāmā'tha diśaṃ yāmyāṃ sītālakṣmaṇasaṃyutaḥ || 80 ||
[Analyze grammar]

tatprabhāvājjaghānā'tha kharādīnrākṣasottamān |
tathā vai rāvaṇaṃ raudraṃ meghanādasamanvitam || 83 ||
[Analyze grammar]