Chapter 11

[English text for this chapter is available]

| ṛṣaya ūcuḥ |
camatkāraḥ kathaṃ rājā muktaḥ kuṣṭhena sūtaja |
kathaṃ tena tapastaptaṃ kiyatkālaṃ ca bhūbhujā || 1 ||
[Analyze grammar]

katame brāhmaṇāste vai śaṃkhatīrthaṃ pradarśitam |
yaistasya rogamuktyarthaṃ duḥkhitasya mahātmanaḥ || 2 ||
[Analyze grammar]

katamaṃ śaṃkhatīrthaṃ tatkasminsthāne vyavasthitam |
kiṃprabhāvaṃ ca niḥśeṣaṃ sarvaṃ vistarato vada || 3 ||
[Analyze grammar]

sūta uvāca |
ahaṃ vaḥ kīrtayiṣyāmi kathāmetāṃ manoharām |
sarvapāpaharāṃ viprāścamatkāranṛpodbhavām || 4 ||
[Analyze grammar]

sa bhrāṃtaḥ sarvatīrthāni prabhāsādyāni kṛtsnaśaḥ |
tapasvī niyatāhāro bhikṣānnakṛtabhojanaḥ || 5 ||
[Analyze grammar]

pṛcchamāno bhiṣagmukhyānauṣadhāni muhurmuhuḥ |
maṃtrānmaṃtravidaścaiva roganāśāya nityataḥ || 6 ||
[Analyze grammar]

na lebhe kiṃcidiṣṭaṃ vā sa maṃtraṃ bheṣajaṃ ca vā |
tīrthaṃ vā nṛpaśārdūlo yena syādvyādhisaṃkṣayaḥ || 7 ||
[Analyze grammar]

tataśca pārthivaśreṣṭho vairāgyaṃ paramaṃ gataḥ |
ekākī yatacittātmā sarvasattvavirājite || 97 ||
[Analyze grammar]

nivāsamakarottasminkṣetre puṇyatame ciram |
śīrṇaparṇaphalāhāro bhūmau śete sadā niśi |
anya syā'nyasya vṛkṣasya madāhaṃkāravarjitaḥ || 9 ||
[Analyze grammar]

tataḥ katipayāhasya bhramamāṇo mahīpatiḥ |
so'paśyadbrāhmaṇaśreṣṭhāṃstīrthayātrāśrayānbahūn || 10 ||
[Analyze grammar]

tataḥ praṇamya tānviprānupaviṣṭāndharātale |
viśvāmitrāśramasyāṃte provāca vinayānvitaḥ || |
rājovāca |
ahaṃ nāmnā camatkāraḥ pārthivaḥ sūryavaṃśajaḥ |
ānarttādhipatirvyāptaḥ kuṣṭhena dvijasattamāḥ || 2 ||
[Analyze grammar]

asti kaścidupāyo'tra daivo vā mānuṣo'pi vā |
bheṣajaṃ vā'tha maṃtro vā yena kuṣṭhaṃ praśāmyati || 13 ||
[Analyze grammar]

mamopari dayāṃ kṛtvā vadadhvaṃ dvijasattamāḥ |
kuṣṭhagrastaśarīraṃ ca paraṃ kṛcchramupāgatam || 4 ||
[Analyze grammar]

athavā vittha no yūyaṃ tyakṣyāmīha kalevaram |
praviśyāgniṃ jalaṃ vā'pi bhakṣayitvā'tha vā viṣam || 15 ||
[Analyze grammar]

tasya tadvacanaṃ śrutvā sarve te dvijasattamāḥ |
procuḥ kṛpāsamāviṣṭāstatastaṃ pṛthivīśvaram || 16 ||
[Analyze grammar]

asti pārthivaśārdūla sthānādasmādadūrataḥ |
śaṃkhatīrthamiti khyātaṃ sarvarogakṣayāvaham || 17 ||
[Analyze grammar]

ye narā vyādhinā grastāḥ kāṇāścāṃdhāstathā jaḍāḥ |
hīnāṃgāścā'dhikāṃgāśca kurūpā vikṛtānanāḥ || 18 ||
[Analyze grammar]

te'pi caitrasya kṛṣṇādau snātāstatrākṛtāśanāḥ |
bhavaṃti nīrujaḥ sadyaścitrāsaṃsthe niśākare || 19 ||
[Analyze grammar]

asmābhiḥ śataśo dṛṣṭā dvādaśārkasamaprabhāḥ |
kāmadevasamākārāstejovīryasamāyutāḥ || 20 ||
[Analyze grammar]

rājovāca |
śaṃkhatīrthaṃ kathaṃ jñeyaṃ mayā brāhmaṇasattamāḥ |
kathaṃ caiva samutpannaṃ vadadhvaṃ mama vistarāt || 21 ||
[Analyze grammar]

brāhmaṇā ūtruḥ |
āsītpūrvaṃ muniśreṣṭho likhitākhyo mahītale |
śāṃḍilyasya muneḥ putrastapovīryasamanvitaḥ || 22 ||
[Analyze grammar]

atha tasyānujo jajñe śaṃkhākhyo dharmaśāstravit |
kandamūlaphalāhāraḥ sadaiva tapasi sthitaḥ || 23 ||
[Analyze grammar]

kasyacittvatha kālasya likhitasyā'śramaṃ yayau |
śaṃkhaḥ svāduphalārthāya pīḍitotibubhukṣayā || 24 ||
[Analyze grammar]

sa śūnyamāśramaṃ prāpya likhitasya mahātmanaḥ |
ātmīyānīti manvānaḥ phalāni jagṛhe tataḥ || 25 ||
[Analyze grammar]

bhakṣayāmāsa bhūrīṇi pakvāni madhurāṇi ca |
etasminnantare prāpto likhitaḥ śiṣyasaṃyutaḥ || 26 ||
[Analyze grammar]

sa gṛhītaphalaṃ dṛṣṭvā śaṃkhaṃ provāca kopataḥ || 27 ||
[Analyze grammar]

adattāni mayā pāpa phalāni hṛtavānasi |
kasmāttvaṃ cauryarūpeṇa nānubandhamavekṣase || 28 ||
[Analyze grammar]

śaṃkha uvāca || |
satyametaddvijaśreṣṭha yattvayā parikīrtitam |
phalāni pragṛhītāni vijane'tra tavāśrame || 29 ||
[Analyze grammar]

tasmātkuru yathārhaṃ me nigrahaṃ cauryasaṃbhavam || |
iha lokaḥ paraścaiva yena me syātsukhāvahaḥ || 30 ||
[Analyze grammar]

tataḥ sa hastamādāya haste śaṃkhasya tatkṣaṇāt |
cakarta kopamāviṣṭo vāryamāṇo'pi tāpasaiḥ || 31 ||
[Analyze grammar]

chinnahasto'pi śaṃkhastu tapaścakre sudāruṇam |
viśeṣeṇa samāsādya svāśrame bhūya eva tu || 32 ||
[Analyze grammar]

tatastuṣṭo mahādevastasya kālena kena cit |
provāca darśanaṃ gatvā taṃ ca śaṃkhamunīśvaram || 33 ||
[Analyze grammar]

maheśvara uvāca |
bhobho mune mahāsattva duṣkaraṃ kṛtavānasi |
varaṃ gṛhāṇa mattastvaṃ manasā samabhīpsitam || 34 ||
[Analyze grammar]

śaṃkha uvāca |
yadi tuṣṭosi me deva varaṃ cedyacchasi prabho |
syātāṃ me tādṛśau hastau bhūyo'pi surasattama || 35 ||
[Analyze grammar]

tathedaṃ mama nāmāṃkaṃ tīrthaṃ syātsurasattama |
vikhyātaṃ sarvalokeṣu sarvapāpaharaṃ nṛṇām || 36 ||
[Analyze grammar]

hīnāṃgo vādhikāṃgo vā vyādhinā grasta eva ca |
atra snānaṃ karotyāśu sa bhūyaḥ syātpunarnavaḥ || 37 ||
[Analyze grammar]

bhagavānuvāca |
etattīrthaṃ tu vikhyātaṃ tava nāmnā bhaviṣyati |
adyaprabhṛti viprendra dehināṃ pāpanāśanam || 38 ||
[Analyze grammar]

hīnāṃgo vādhikāṃgo vā yo'tra snānaṃ kariṣyati |
caitre śukle nirāhāraścitrāsaṃsthe niśākare |
suvarṇāṃgaḥ sa tejasvī bhaviṣyati na saṃśayaḥ || 39 ||
[Analyze grammar]

sakāmo yadi vipreṃdra dhyāyamānaḥ surūpatām |
niṣkāmo vā paraṃ sthānaṃ gami ṣyati śivātmakam || 40 ||
[Analyze grammar]

atra śrāddhe kṛte brahmaṃścaturdaśyāṃ niśākare |
citrāsthite prayāsyaṃti pitarastṛptimuttamām || 41 ||
[Analyze grammar]

adyaiva vipraśārdūla caitraśuklāṃta uttamaḥ |
aparāhṇe niśānāthaścitrāyogaṃ prayāsyati || 42 ||
[Analyze grammar]

tatropavāsayuktasya samyaksnātasya tatkṣaṇāt |
syātāṃ hastau surūpāḍhyau yathā pūrvaṃ tathā hi tau || 43 ||
[Analyze grammar]

evamuktvā sa bhagavāṃstataścādarśanaṃ gataḥ |
śaṃkho'pi kutape kāle tatra snānamathākarot || 44 ||
[Analyze grammar]

tataśca tatkṣaṇājjātau hastau tasya yathā purā |
raktotpalanibhau kāṃtau matsyacihnena cihnitau || 45 ||
[Analyze grammar]

brāhmaṇā ūcuḥ |
evaṃ taddharaṇīpṛṣṭhe tīrthaṃ jātaṃ nṛpottama |
prabhāvāddevadevasya caṃdrāṃkasya śubhāvaham || 46 ||
[Analyze grammar]

tasmāttvamapi rājeṃdra tatra snānaṃ samācara |
caitre śuklacaturdaśyāṃ citrāsaṃsthe niśākare || 47 ||
[Analyze grammar]

bhaviṣyasi na saṃdehaḥ sarvarogavivarjitaḥ |
vayaṃ te darśayiṣyāmaḥ prāpte kāle yathodite || 48 ||
[Analyze grammar]

sūta uvāca |
tataḥ katipayāhena caitrakṛṣṇādirāgataḥ |
citrāsaṃsthe niśānāthe saṃprāptā ca caturdaśī || 49 ||
[Analyze grammar]

tataste brāhmaṇā bhūpaṃ samādāya ca tatkṣaṇāt |
śaṃkhatīrthaṃ samuddiśya gatāstasya hitaiṣiṇaḥ || 50 ||
[Analyze grammar]

tataḥ sa manasi dhyātvā kuṣṭhavyādhiparikṣayam |
snānaṃ cakre yathānyāyaṃ śraddhayā parayā yutaḥ || 51 ||
[Analyze grammar]

tataḥ kuṣṭhavinirmukto dvādaśārkasamaprabhaḥ |
niṣkrāṃtaḥ salilāttasmāddharṣeṇa mahatānvitaḥ || 52 ||
[Analyze grammar]

tataḥ praṇamya tānsarvānbrāhmaṇānvedapāragān |
kṛtāṃjalipuṭo bhūtvā vākyametaduvāca ha || 53 ||
[Analyze grammar]

prasādena hi yuṣmākaṃ mukto'haṃ brāhmaṇottamāḥ |
kuṣṭhavyādhermahākālaṃ garhitosmyeva dehinām || 54 ||
[Analyze grammar]

tasmānnāhaṃ kariṣyāmi rājyaṃ brāhmaṇasattamāḥ |
tīrthe'traivādhunā nityaṃ cariṣyāmi mahattapaḥ || 55 ||
[Analyze grammar]

etadrājyaṃ ca deśaṃ ca hastyaśvādi tathāparam |
yatkiṃcidvidyate mahyaṃ tadgṛhṇaṃtu dvijottamāḥ || 56 ||
[Analyze grammar]

mamaivānugrahārthāya dayāṃ kṛtvā bṛhattarām |
dīnasya bhaktiyuktasya viraktasya viśeṣataḥ || 57 ||
[Analyze grammar]

brāhmaṇā ūcuḥ |
na vayaṃ rakṣituṃ śaktā rājyaṃ pārthivasattama |
tatkiṃ tena gṛhītena yena syādrājyaviplavaḥ || 58 ||
[Analyze grammar]

jāmadagnyena rāmeṇa purā dattā vasundharā |
triḥsapta kṣatriyairhīnāṃ kṛtvāsmākaṃ nṛpottama || 59 ||
[Analyze grammar]

sā bhūyopi hṛtā'smākaṃ kṣatriyairbalavattaraiḥ |
tiraskṛtya dvijānsarvāṃllīlayāpi muhurmuhuḥ || 60 ||
[Analyze grammar]

rājovāca |
ahaṃ vaḥ prakariṣyāmi rakṣāṃ brāhmaṇasattamāḥ |
tapasthito'pi kārye'tra na bhīḥ kāryā kathaṃcana || 61 ||
[Analyze grammar]

brāhmaṇā ūcuḥ |
avaśyaṃ yadi te śraddhā vidyate dānasaṃbhavā |
kṣetre'trāpi mahāpuṇye kṛtvā dehi purottamam || 62 ||
[Analyze grammar]

sarveṣāṃ brāhmaṇeṃdrāṇāṃ prākāraparikhānvitam |
sukhena yena tiṣṭhāmaḥ snātvā tīrthaiḥ pṛthagvidhaiḥ |
gṛhasthadharmiṇaḥ sarve svādhyāyaniratā sadā || 63 ||
[Analyze grammar]

sūta uvāca |
tacchrutvā sa mahīpālastathetyuktvā praharṣitaḥ |
nagaraṃ kalpayāmāsa sthāne tatra mahattamam || 64 ||
[Analyze grammar]

prākāreṇa sutuṃgena parikhādyena sarvataḥ |
āyāmavyāsataścaiva krośamātraṃ manoharam || 65 ||
[Analyze grammar]

trikacatvarasaṃśuddhaṃ śobhitaṃ sarvato dhvajaiḥ |
prāsādaiḥ pronnataiḥ kāntaiḥ samaṃtātsudhayā vṛtaiḥ || 66 ||
[Analyze grammar]

mattavāraṇakopetairbahubhirbhūbhireva ca |
saṃpūrṇaṃ satyakāmādyaiḥ sādhulokapraśaṃsitaiḥ || 67 ||
[Analyze grammar]

tato gṛhāṇi sarvāṇi pūrayitvā sa bhūmipaḥ |
suvarṇamaṇimuktādipadārthairaparairapi || 68 ||
[Analyze grammar]

brāhmaṇebhyaḥ kulīnebhyo vedavidbhyo viśeṣataḥ |
śrotriyebhyaśca dāṃtebhyaḥ sa tu śraddhāsamanvitaḥ || 69 ||
[Analyze grammar]

yathājyeṣṭhaṃ yathāśreṣṭhaṃ prakṣālya caraṇau tataḥ |
śāstroktena vidhānena pradadau dvijasattamāḥ || 70 ||
[Analyze grammar]

iti śrīskāṃde mahāpurāṇaekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye śaṃkhatīrthotpattimāhātmyavarṇane camatkārabhūpatinā vrāhmaṇebhyo nagaradānavarṇanaṃnāmaikādaśo'dhyāyaḥ || 11 ||
[Analyze grammar]