Chapter 1

[English text for this chapter is available]

| oṃnamaḥ puruṣottamāya |
atha skānde mahāpurāṇe ṣaṣṭhanāgarakhaṇḍaprārambhaḥ |
vyāsa uvāca |
sa dhūrjaṭi jaṭājūṭo jāyatāṃ vijayāya vaḥ |
yatraikapalitabhrāṃtiṃ karotyadyāpi jāhnavī || 1 ||
[Analyze grammar]

ṛṣaya ūcuḥ |
harasya pūjyate liṃgaṃ kasmādatanmahāmate |
viśeṣātsaṃparityajya śeṣāṃgāni surāsuraiḥ || 2 ||
[Analyze grammar]

tasmādetanmahābāho yathāvadvaktumarhasi |
sāṃprataṃ sūta kārtsnyena paraṃ kautūhalaṃ hi naḥ || 3 ||
[Analyze grammar]

sūta uvāca |
praśnabhāro mahāneṣa yo bhavadbhirudāhṛtaḥ |
kīrtayiṣye tathāpyenaṃ namaskṛtya svayaṃbhuve || 4 ||
[Analyze grammar]

ānartaviṣaye cāsti vanaṃ munijanāśrayam |
manojñaṃ sarvasattvānāṃ sarvartuphalitadrumam || 5 ||
[Analyze grammar]

tatrāśramapadaṃ ramyaṃ saumyasattvaniṣevitam |
asti tāpasasaṃkīrṇaṃ vedadhvanivirājitam || 6 ||
[Analyze grammar]

abbhakṣairvāyubhakṣaiśca śīrṇaparṇāśibhistathā |
dantolūkhalibhirvipraiḥ sevitaṃ cāśmakuṭṭakaiḥ || 7 ||
[Analyze grammar]

snānahomaparaiścaiva japasvādhyāyatatparaiḥ |
vānaprasthaistridaṇḍaiśca haṃsaiścāpi kuṭīcaraiḥ || 8 ||
[Analyze grammar]

snātakairyatibhirdāntaistathā paṃcāgnisādhakaiḥ |
kasyacittvatha kālasya bhagavāṃstripurāṃtakaḥ || 9 ||
[Analyze grammar]

satīviyogasaṃtapto bhramamāṇa itastataḥ |
tasminvane samāyātaḥ saumyasattvaniṣevite || 10 ||
[Analyze grammar]

krīḍaṃti nakulā yatra sārdhaṃ sarpaiḥpraharṣitāḥ |
pañcānanāśca mātaṃgairvṛṣadaṃśāstathākhubhiḥ |
kākāḥ kauśikasaṃghaiśca vairabhāvavivarjitāḥ || 11 ||
[Analyze grammar]

tataśca bhagavānrudro dṛṣṭvāśramapadaṃ tadā |
nagnaḥ kapālamādāya bhikṣārthaṃ praviveśa saḥ || 12 ||
[Analyze grammar]

atha tasya samālokya rūpaṃ gātrasamudbhavam |
adṛṣṭapūrvaṃ tāpasyaḥ sarvāḥ kāmavaśaṃ gatāḥ || 13 ||
[Analyze grammar]

gṛhakarma parityajya guruśuśrūṣaṇāni ca |
mithaḥ saṃbhāṣaṇaṃ cakruḥ sthānesthāne ca tāḥ sthitāḥ || 14 ||
[Analyze grammar]

ekā sā kāpi dhanyā yā cakre tasyāvagūhanam |
viśrabdhā sarvagātreṣu tāpasasya mahātmanaḥ || 15 ||
[Analyze grammar]

tathānyāḥ kautukāviṣṭā dhāvaṃtyaḥ sarvatodiśam |
dṛśyaṃte taṃ samuddiśya vistāritavilocanāḥ || 16 ||
[Analyze grammar]

kāścidarddhānuliptāṃgyaḥ kāścidekāṃjitekṣaṇāḥ |
ardhasaṃyamitaiḥ kaiśaistathānyāstyaktabālakāḥ || 17 ||
[Analyze grammar]

evamālokyamānaḥ sa kāminībhirmaheśvaraḥ |
babhrāma rājamārgeṇa bhikṣāṃ dehīti kīrtayan || 18 ||
[Analyze grammar]

atha te munayo dṛṣṭvā taṃ tathā vigatāṃbaram |
kāmodbhavakaraṃstrīṇāṃ procuḥ kopāruṇekṣaṇāḥ || 19 ||
[Analyze grammar]

yasmātpāpa tvayāsmākamāśramo'yaṃ viḍaṃbitaḥ |
tasmālliṃgaṃ patatvāśu tavaiva vasudhātale || 20 ||
[Analyze grammar]

etasminnaṃtare bhūmau liṃgaṃ tasya papāta tat |
bhittvātha dharaṇīpṛṣṭhaṃ pātālaṃ praviveśa ha || 21 ||
[Analyze grammar]

so'pi liṃgaparityakto lajjāyukto maheśvaraḥ |
gartāṃ gurvīṃ samāśritya bhrūṇarūpaḥ samāviśat || 22 ||
[Analyze grammar]

atha liṃgasya pātena trailokyabhayaśaṃsinaḥ |
utpātā dāruṇāstasthuḥ sarvatra dvijasattamāḥ || 23 ||
[Analyze grammar]

śīryate giriśṛṅgāṇi pataṃtyulkā divāpi ca |
tyajaṃti sāgarāḥ sarve maryādāṃ ca śanaiḥ śanaiḥ || 24 ||
[Analyze grammar]

atha devagaṇāḥ sarve bhayasaṃtrastamānasāḥ |
śakraviṣṇumukhā jagmuryatra devaḥ pitāmahaḥ || 25 ||
[Analyze grammar]

procuśca praṇatāḥ stutvā stotraiḥ suśrutisaṃbhavaiḥ |
trailokye sṛṣṭirūpaṃ yatkamalāsanasaṃsthitam || 26 ||
[Analyze grammar]

kimidaṃ kimidaṃ deva vartate hyadharottaram |
trailokyaṃ sakalaṃ yena vyākulatvamupāgatam || 27 ||
[Analyze grammar]

pralayasyeva cihnāni dṛśyaṃte padmasaṃbhava |
kiṃ sāṃpratamakāle'pi bhaviṣyati parikṣayaḥ || 28 ||
[Analyze grammar]

sarveṣāṃ suramartyānāṃ daityānāṃ mantrakovidaḥ |
gatirbhayārtadehānāṃ sarvalokapitāmahaḥ || 29 ||
[Analyze grammar]

teṣāṃ tadvacanaṃ śrutvā devānāṃ caturānanaḥ |
uvāca suciraṃ dhyātvā jñātvā divyena cakṣuṣā || 30 ||
[Analyze grammar]

pralayasya na kālo'yaṃ sāṃprataṃ surasattamāḥ |
śṛṇudhvaṃ yannimittotthā mahotpātā bhavantyamī || 31 ||
[Analyze grammar]

ṛṣibhiḥ pātitaṃ liṃgaṃ devadevasya śūlinaḥ |
śāpenānartake deśe kalatrārthe mahātmabhiḥ || 32 ||
[Analyze grammar]

tenaitadvyākulībhūtaṃ trailokyaṃ sacarācaram |
tasmādgacchāmahe tatra yatra devo maheśvaraḥ || 33 ||
[Analyze grammar]

yenāsmadvacanācchīghraṃ talliṃgaṃ nidadhāti saḥ |
no cedbhaviṣyati vyaktamakāle cāpi saṃkṣayaḥ |
trailokyasyāpi kṛtsnasya satyametanmayoditam || 34 ||
[Analyze grammar]

atha devagaṇāḥ sarve brahmaviṣṇupuraḥsarāḥ |
ādityā vasavo rudrā viśvedevāstathāśvinau || 35 ||
[Analyze grammar]

prajagmustvaritāstatra yatra devo maheśvaraḥ |
gartāmadhyagataḥ supto lajjayā parayā vṛtaḥ || 36 ||
[Analyze grammar]

devā ūcuḥ |
namaste devadeveśa bhaktānāmabhayaprada |
namaste jagadādhāra śaśirājitaśekhara || 37 ||
[Analyze grammar]

tvaṃ yajñastvaṃ vaṣaṭkārastvamāpastvaṃ mahī vibho |
tvayā sṛṣṭamidaṃ sarvaṃ trailokyaṃ sacarācaram || 38 ||
[Analyze grammar]

tvaṃ pāsi ca suraśreṣṭha tathā nāśaṃ nayiṣyasi |
tvaṃ viṣṇustvaṃ caturvaktrastvaṃ caṃdrastvaṃ divākaraḥ || 39 ||
[Analyze grammar]

tvayā vinā mahādeva na kiṃcidiha vidyate |
api kṛtvā mahatpāpaṃ naro deva dharātale || 40 ||
[Analyze grammar]

tava nāmāpi saṃkīrtya prayāti tridivālayam |
mahādeva mahādeva mahādeveti kīrtanāt || 41 ||
[Analyze grammar]

koṭayo brahmahatyānāmagamyāgamakoṭayaḥ |
sadyaḥ pralayamāyāṃti mahādeveti kīrtanāt || 42 ||
[Analyze grammar]

vipro yathā manuṣyāṇāṃ nadīnāṃ vā mahārṇavaḥ |
tathā tvaṃ sarvadevānāmādhipatye vyavasthitaḥ || 43 ||
[Analyze grammar]

nakṣatrāṇāṃ yathā caṃdraḥ pradīptānāṃ divākaraḥ |
tathā tvaṃ sarvadevānāmādhipatye vyavasthitaḥ || 44 ||
[Analyze grammar]

dhātūnāṃ kāṃcanaṃ yadvadgaṃdharvāṇāṃ ca nāradaḥ |
tathā tvaṃ sarvadevānāmādhipatye vyavasthitaḥ || 45 ||
[Analyze grammar]

oṣadhīnāṃ yathā sasyaṃ nagānāṃ hemaparvataḥ |
tathā tvaṃ sarvadevānāmādhipatye vyavasthitaḥ || 46 ||
[Analyze grammar]

tasmātkuru prasādaṃ naḥ sarveṣāṃ ca nṛṇāṃ vibho |
saṃdhāraya punarliṃgaṃ svakīyaṃ surasattama || 47 ||
[Analyze grammar]

nocejjagattrayaṃ deva nūnaṃ nāśamamupeṣyati |
yadyetadbhūtale liṅgaṃ patati sthāsyati prabho || 48 ||
[Analyze grammar]

sūta uvāca |
teṣāṃ tadvacanaṃ śrutvā bhagavānbṛṣabhadhvajaḥ |
provāca praṇatānsarvāṃstāndevānvrīḍayānvitaḥ || 49 ||
[Analyze grammar]

mayā satīviyogārtiyuktena surasattama |
liṃgametatparityaktaṃ śāpavyājāddvijanmanām || 50 ||
[Analyze grammar]

ko'laṃ pātayituṃ liṃgaṃ mamaitadbhuvanatraye |
devo vā brāhmaṇo vāpi vettha yūyamapi sphuṭam || 51 ||
[Analyze grammar]

tasmānnaiva dhariṣyāmi liṃgametaddharātalāt |
kimanena kariṣyāmi bhāryayā parivarjitaḥ || 52 ||
[Analyze grammar]

devā ūcuḥ |
tava kāṃtā satī nāma yā mṛtā prāksurottama |
sā jātā menakāgarbhe gaurī nāma himācalāt || 53 ||
[Analyze grammar]

bhaviṣyati punarbhāryā tavaiva tripurāṃtaka |
tasmālliṃgaṃ samādāya kuru kṣemaṃ divaukasām || 54 ||
[Analyze grammar]

devadeva uvāca |
adyaprabhṛti me liṃgaṃ yadi devā dvijātayaḥ |
pūjayaṃti prayatnena tarhīdaṃ dhārayāmyaham || 55 ||
[Analyze grammar]

brahmovāca |
ahaṃ tava svayaṃ liṃgaṃ pūjayiṣyāmi śaṃkara |
tathānye vibudhāḥ sarve kiṃ punarbhuvi mānavāḥ || 56 ||
[Analyze grammar]

tataḥ praviśya pātālaṃ devaiḥ sārdhaṃ pitāmahaḥ |
svayamevākarotpūjāṃ tasya liṃgasya bhaktitaḥ || 57 ||
[Analyze grammar]

tasmādanaṃtaraṃ viṣṇuḥ śraddhāpūtena cetasā |
tathānye vibudhāḥ sarve śakrādyāḥ śraddhayānvitāḥ || 58 ||
[Analyze grammar]

tatastuṣṭo mahādevaḥ pitāmahamidaṃ vacaḥ |
provāca vāsudevaṃ ca vinayāvanataṃ sthitam || 59 ||
[Analyze grammar]

bhavadbhyāṃ parituṣṭo'smi tasmānmattaḥ pragṛhyatām |
varamiṣṭaṃ mahābhāgau yadyapi syātsudurlabham || 60 ||
[Analyze grammar]

tāvūcatuḥ |
yadi tuṣṭosi deveśa tribhāgena samāśrayam |
āvābhyāṃ dehi liṃgena yenaikatrāśrayo bhavet || 61 ||
[Analyze grammar]

sūta uvāca |
sa tatheti pratijñāya liṃgamādāya ca prabhuḥ |
sthāne niyojayāmāsa sarvadevādhipūjitam || 62 ||
[Analyze grammar]

tato hāṭakamādāya tadākāraṃ pitāmahaḥ |
kṛtvā liṃgaṃ svayaṃ tatra sthāpayāmāsa harṣitaḥ || 63 ||
[Analyze grammar]

provāca cātha bho viprāḥ sādhunādena nādayan |
lokatrayaṃ samastānāṃ śṛṇvatāṃ tridivaukasām || 64 ||
[Analyze grammar]

mayā hyādyaṃ tvidaṃ liṃgaṃ hāṭakena vinirmitam |
khyātiṃ yāsyati sarvatra pātāle hāṭakeśvaram || 65 ||
[Analyze grammar]

tathānye manujā ye ca hāṭakādīni bhaktitaḥ |
maṇimuktāsuratnaiśca kṛtvā liṃgāni kṛtsnaśaḥ || 66 ||
[Analyze grammar]

trikālaṃ pūjayiṣyaṃti te yāsyaṃti parāṃ gatim |
mṛnmayaṃ saṃparityajya nīcadhātumayaṃ tathā || 67 ||
[Analyze grammar]

evamuktvā caturvaktraḥ saha sarvairdivālayaiḥ |
jagāma tridivaṃ so'pi kailāsaṃ śaśiśekharaḥ || 68 ||
[Analyze grammar]

etasmātkāraṇālliṃgaṃ pūjyate'tra surāsuraiḥ |
harasya cottamāṃgāni parityajya viśeṣataḥ || 69 ||
[Analyze grammar]

tataḥ prabhṛti talliṃgaṃ svayaṃ brahmā vyavasthitaḥ |
bhagavānvāsudevaśca tena pūjyaṃ śivaṃ hi tat || 70 ||
[Analyze grammar]

yastu pūjayate nityaṃ śraddhāyuktena cetasā |
tryaṃbakācyutabrahmādyāstena syuḥ pūjitāstrayaḥ || 71 ||
[Analyze grammar]

tasmātsarvaprayatnena śivaliṃgaṃ prapūjayet |
sparśayedīkṣayennityaṃ kīrtayecca dvijottamāḥ || 72 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye liṃgotpattivarṇanaṃ nāma prathamo'dhyāyaḥ || 1 ||
[Analyze grammar]