Chapter 218

[English text for this chapter is available]

śrīmārkaṇḍeya uvāca |
tato gaccheddharādhīśa tīrthaṃ paramaśobhanam |
jamadagniriti khyātaṃ yatra siddho janārdanaḥ || 1 ||
[Analyze grammar]

yudhiṣṭhira uvāca |
kathaṃ siddho dvijaśreṣṭha vāsudevo jagadguruḥ |
mānuṣaṃ rūpamāsthāya lokānāṃ hitakāmyayā || 2 ||
[Analyze grammar]

etatsarvaṃ yathānyāyaṃ devadevasya cakriṇaḥ |
caritaṃ śrotumicchāmi kathyamānaṃ tvayānagha || 3 ||
[Analyze grammar]

śrīmārkaṇḍeya uvāca |
āsītpūrvaṃ mahārāja haihayādhipatirmahān |
kārtavīrya iti khyāto rājā bāhusahasravān || 4 ||
[Analyze grammar]

hastyaśvarathasampannaḥ sarvaśastrabhṛtāṃ varaḥ |
vedavidyāvratasnātaḥ sarvabhūtābhayapradaḥ || 5 ||
[Analyze grammar]

māhiṣmatyāḥ patiḥ śrīmānrājā hyakṣauhiṇīpatiḥ |
sa kadācinmṛgānhantuṃ nirjagāma mahābalaḥ || 6 ||
[Analyze grammar]

bahubhirdivasaiḥ prāpto bhṛgukacchamanuttamam |
jamadagnirmahātejā yatra tiṣṭhati tāpasaḥ || 7 ||
[Analyze grammar]

reṇukāsahitaḥ śrīmānsarvabhūtābhayapradaḥ |
tasya putro'bhavadrāmaḥ sākṣānnārāyaṇaḥ prabhuḥ || 8 ||
[Analyze grammar]

sarvakṣatraguṇairyukto brahmavidbrāhmaṇottamaḥ |
toṣayanparayā bhaktyā pitarau paramārthavat || 9 ||
[Analyze grammar]

taṃ tadā cārjunaṃ dṛṣṭvā jamadagniḥ pratāpavān |
carantaṃ mṛgayāṃ gatvā hyātithyena nyamantrayat || 10 ||
[Analyze grammar]

tatheti coktvā sa nṛpaḥ sabhṛtyabalavāhanaḥ |
jagāma cāśramaṃ puṇyamṛṣestasya mahātmanaḥ || 11 ||
[Analyze grammar]

tatkṣaṇādeva sampannaṃ śriyā paramayā vṛtam |
vismayaṃ paramaṃ tatra dṛṣṭvā rājā jagāma ha || 12 ||
[Analyze grammar]

gatamātrastu siddhena paramānnena bhojitaḥ |
sabhṛtyabalavānrājā brāhmaṇena yadṛcchayā |
kimetaditi papraccha kāraṇaṃ śaktimeva ca || 13 ||
[Analyze grammar]

kāmadhenoḥ prabhāvaṃ taṃ jñātvā prāha tato dvijam |
dakṣiṇāṃ dehi me vipra kalmaṣāṃ dhenumuttamām || 14 ||
[Analyze grammar]

śataṃ śatasahasrāṇāmayutaṃ niyutaṃ param |
bhūṣitānāṃ ca dhenūnāṃ dadāmi tava cārbudam || 15 ||
[Analyze grammar]

jamadagniruvāca |
ayutaiḥ prayutairnāhaṃ śatakoṭibhiruttamām |
kāmadhenumimāṃ tāta na dadmi pratigamyatām || 16 ||
[Analyze grammar]

evamuktaḥ sa rājendrastena vipreṇa bhārata |
krodhasaṃraktanayana idaṃ vacanamabravīt || 17 ||
[Analyze grammar]

yasyedṛśaḥ kāmacāro mayyapi dvijapāṃsana |
ahaṃ te paśyatastasmānnayāmi surabhiṃ gṛhāt || 18 ||
[Analyze grammar]

dvija uvāca |
kaḥ krīḍati saroṣeṇa nirbhayo hi mahāhinā |
mṛtyudṛṣṭotareṇāpi mama dhenuṃ nayeta yaḥ || 19 ||
[Analyze grammar]

evamuktvā mahādaṇḍaṃ brahmadaṇḍamivāparam |
gṛhītvā paramakruddho jamadagniruvāca ha || 20 ||
[Analyze grammar]

yasyāsti śaktistejo vā kṣatriyasya kulādhamaḥ |
dhenuṃ nayatu me sadyaḥ kṣīṇāyuḥ saparicchadaḥ || 21 ||
[Analyze grammar]

etacchrutvā vacaḥ krūraṃ haihayaḥ śataśo vṛtaḥ |
dhāvamānaḥ kṣititale brahmadaṇḍahato'patat || 22 ||
[Analyze grammar]

huṃkṛtena tato dhenvāḥ khaḍgapāśāsipāṇayaḥ |
nirgacchantaḥ pradṛśyante kalmaṣāyāḥ sahasraśaḥ || 23 ||
[Analyze grammar]

nāsāpuṭāgrādromāgrātkirātā māgadhā gudāt |
randhrāntareṣu cotpannāḥ śataśo'tha sahasraśaḥ || 24 ||
[Analyze grammar]

evamanyo'nyamāhatya haihayaṣṭaṅkaṇāndahan |
vināśaṃ saha vipreṇa gatā hyarjunatejasā || 25 ||
[Analyze grammar]

kārtavīryo jayaṃ labdhvā saṃkhye hatvā dvijottamam |
jagāma svāṃ purīṃ hṛṣṭaḥ kṛtāntavaśamohitaḥ || 26 ||
[Analyze grammar]

tatastvarānvitaḥ prāptaḥ paścādrāmo gate ripau |
ākrandamānāṃ jananīṃ dadarśa piturantike || 27 ||
[Analyze grammar]

rāma uvāca |
kenedamātmanāśāya hyajñānātsāhasaṃ kṛtam |
mama tātaṃ jighāṃsuryo draṣṭuṃ mṛtyumihecchati || 28 ||
[Analyze grammar]

tataḥ sā rāmavākyena gatasattveva vihvalā |
udaraṃ karayugmena tāḍayantī hyuvāca tam || 29 ||
[Analyze grammar]

arjunena nṛśaṃsena kṣatriyairaparaiḥ saha |
ihāgatya pitā tena nihato bāhuśālinā || 30 ||
[Analyze grammar]

taṃ paśya nihataṃ tātaṃ gatāsuṃ gatacetasam |
saṃskṛtya vidhivatputra tarpayasva yathātatham || 31 ||
[Analyze grammar]

etacchrutvā sa vacanaṃ jananīmabhivādya tām |
pratijñāmakarodyāṃ tāṃ śṛṇuṣva ca narādhipa || 32 ||
[Analyze grammar]

triḥsaptakṛtvaḥ pṛthivīṃ niḥkṣatriyakulānvayām |
snātvā ca teṣāmasṛjā tarpayiṣyāmi te patim || 33 ||
[Analyze grammar]

tasyāpi paraśunā bāhūn kārtavīryasya durmateḥ |
chittvā pāsyāmi rudhiramiti satyaṃ śṛṇuṣva me || 34 ||
[Analyze grammar]

evaṃ pratijñāṃ kṛtvāsau jāmadagnyaḥ pratāpavān |
krodhena mahatāviṣṭaḥ saṃskṛtya pitaraṃ tataḥ || 35 ||
[Analyze grammar]

māhiṣmatīṃ purīṃ rāmo jagāma krodhamūrchitaḥ |
chittvā bāhuvanaṃ tasya hatvā taṃ kṣatriyādhamam || 36 ||
[Analyze grammar]

jagāma kṣatriyāntāya pṛthivīmavalokayan |
saptadvīpārṇavayutāṃ saśailavanakānanām || 37 ||
[Analyze grammar]

pūrvataḥ paścimāmāśāṃ dakṣiṇottarataḥ kurūn |
samantapañcake pañca cakāra rudhirahradān || 38 ||
[Analyze grammar]

sa teṣu rudhirāmbhastu hradeṣu krodhamūrchitaḥ |
pitṝn saṃtarpayāmāsa rudhireṇeti naḥ śrutam || 39 ||
[Analyze grammar]

atharcīkādaya upetya pitaro brāhmaṇarṣabham |
taṃ kṣamasveti jagadustataḥ sa virarāma ha || 40 ||
[Analyze grammar]

teṣāṃ samīpe yo deśo hradānāṃ rudhirāmbhasām |
samaṃ tapaṃ cakramiti puṇyaṃ tatparikīrtitam || 41 ||
[Analyze grammar]

nivartya karmaṇastasmātpitḥn provāca pāṇḍava |
rāmaḥ paramadharmātmā yadidaṃ rudhiraṃ mayā || 42 ||
[Analyze grammar]

kṣiptaṃ pañcasu tīrtheṣu tadbhūyāttīrthamuttamam |
tathetyuktvā tu te sarve pitaro'dṛśyatāṃ gatāḥ || 43 ||
[Analyze grammar]

evaṃ rāmasya saṃsargo devamārge yudhiṣṭhira |
sarvapāpakṣayakaro darśanātsparśanānnṛṇām || 44 ||
[Analyze grammar]

reṇukāpratyayārthāya adyāpi pitṛdevatāḥ |
dṛśyante devamārgasthāḥ sarvapāpakṣayaṃkarāḥ || 45 ||
[Analyze grammar]

tatra tīrthe tu rājendra narmadodadhisaṅgame |
sthānaṃ kṛtvā vidhānena mucyante pātakairnarāḥ || 46 ||
[Analyze grammar]

kuśāgreṇāpi kaunteya na spṛṣṭavyo mahodadhiḥ |
anena tatra mantreṇa snātavyaṃ nṛpasattama || 47 ||
[Analyze grammar]

namaste viṣṇurūpāya namastubhyamapāṃ pate |
sānnidhyaṃ kuru deveśa sāgare lavaṇāmbhasi |
iti sparśanamantraḥ || 48 ||
[Analyze grammar]

agniśca tejo mṛḍayā ca dehe reto'tha viṣṇuramṛtasya nābhiḥ |
etadbruvan pāṇḍava satyavākyaṃ tato'vagāheta patiṃ nadīnām || 49 ||
[Analyze grammar]

pañcaratnasamāyuktaṃ phalapuṣpākṣatairyutam |
mantreṇānena rājendra dadyādarghaṃ mahodadheḥ || 50 ||
[Analyze grammar]

sarvaratnanidhānastvaṃ sarvaratnākarākaraḥ |
sarvāmarapradhāneśa gṛhāṇārghaṃ namo'stu te |
ityarghamantraḥ || 51 ||
[Analyze grammar]

ā janmajanitātpāpānmāmuddhara mahodadhe |
yāhyarcito ratnanidhe parvatān pārvaṇottama |
iti visarjanamantraḥ || 52 ||
[Analyze grammar]

ko'paraḥ sāgarāddevātsvargadvāravipāṭana |
tatra sāgaraparyantaṃ mahātīrthamanuttamam || 53 ||
[Analyze grammar]

jāmadagnyena rāmeṇa tatra devaḥ pratiṣṭhitaḥ |
yatra devāḥ sagandharvā munayaḥ siddhacāraṇāḥ || 54 ||
[Analyze grammar]

upāsate virūpākṣaṃ jamadagnimanuttamam |
reṇukāṃ caiva ye devīṃ paśyanti bhuvi mānavāḥ || 55 ||
[Analyze grammar]

priyavāse śive loke vasanti kālamīpsitam |
tatra snātvā naro rājaṃstarpayanpitṛdevatāḥ || 56 ||
[Analyze grammar]

tārayennarakādghorātkulānāṃ śatamuttaram |
snātvā dattvātra sahitāḥ śrutvā vai bhaktipūrvakam || 57 ||
[Analyze grammar]