Chapter 168

[English text for this chapter is available]

| adhyāya || 168 ||
[Analyze grammar]

śrīmārkaṇḍeya uvāca |
narmadādakṣiṇe rodhasyaṅkūreśvaramuttamam |
tīrthaṃ sarvaguṇopetaṃ triṣu lokeṣu viśrutam || 1 ||
[Analyze grammar]

yatra siddhaṃ mahārakṣa ārādhya tu maheśvaram |
śaṅkaraṃ jagataḥ prāṇaṃ smṛtimātrāvahāriṇam || 2 ||
[Analyze grammar]

yudhiṣṭhira uvāca |
kiṃ tadrakṣo dvijaśreṣṭha kiṃnāma kasya vānvaye |
etadvistarataḥ sarvaṃ kathayasva mamānagha || 3 ||
[Analyze grammar]

ajñānatimirāndhā ye pumāṃsaḥ pāpakāriṇaḥ |
yuṣmadvidhairdīpabhūtaiḥ paśyanti sacarācaram || 4 ||
[Analyze grammar]

dharmaputravacaḥ śrutvā mārkaṇḍeyo munīśvaraḥ |
smitaṃ kṛtvā babhāṣe tāṃ kathāṃ pāpapraṇāśanīm || 5 ||
[Analyze grammar]

mārkaṇḍeya uvāca |
mānaso brahmaṇaḥ putraḥ pulastyo nāma pārthiva |
vedaśāstrapravaktā ca sākṣādvedhā ivāparaḥ || 6 ||
[Analyze grammar]

tṛṇabindusutā tasya bhāryāsītparameṣṭhinaḥ |
tasya dharmaprasaṅgena putro jāto mahāmanāḥ || 7 ||
[Analyze grammar]

yasmādvedetihāsaiśca saṣaḍaṅgapadakramāḥ |
viśrāntā brahmaṇā dattā nāma viśravaseti ca || 8 ||
[Analyze grammar]

kasmiṃścidatha kāle ca bharadvājo mahāmuniḥ |
svasutāṃ pradadau rājanmudā viśravase nṛpa || 9 ||
[Analyze grammar]

sa tayā ramate sārdhaṃ paulomyā maghavā iva |
mudā paramayā rājanbrāhmaṇo vedavittamaḥ || 10 ||
[Analyze grammar]

kenacittvatha kālena putraḥ putraguṇairyutaḥ |
jajñe viśravaso rājannāmnā vaiśravaṇaḥ śrutaḥ || 11 ||
[Analyze grammar]

so'pi maunavrataṃ kṛtvā bālabhāvādyudhiṣṭhira |
sarvabhūtābhayaṃ dattvā cacāra paramaṃ vratam || 12 ||
[Analyze grammar]

tasya tuṣṭo mahādevo brahmā brahmarṣibhiḥ saha |
sakhitvaṃ ceśvaro dattvā dhanadatvaṃ jagāma ha || 13 ||
[Analyze grammar]

yamendravaruṇānāṃ ca caturthastvaṃ bhaviṣyasi |
brahmāpyuktvā jagāmāśu lokapālatvamīpsitam || 14 ||
[Analyze grammar]

tatastvanantare kāle kaikasī nāma rākṣasī |
pātālaṃ bhūtalaṃ tyaktvā viśravaṃ cakame patim || 15 ||
[Analyze grammar]

putro'tha rāvaṇo jātastasyā bharatasattama |
kumbhakarṇo mahārakṣo dharmātmā ca vibhīṣaṇaḥ || 16 ||
[Analyze grammar]

kumbhaścaiva vikumbhaśca kumbhakarṇasutāvubhau |
mahābalau mahāvīryau mahāntau puruṣottama || 17 ||
[Analyze grammar]

aṅkūro rākṣasaśreṣṭhaḥ kumbhasya tanayo mahān |
vibhīṣaṇaṃ ca guṇavaddṛṣṭvaivaṃ rākṣasottamaḥ || 18 ||
[Analyze grammar]

tataḥ sa yauvanaṃ prāpya jñātvā rakṣaḥ pitāmaham |
paraṃ nirvedamāpannaścacāra sumahattapaḥ || 19 ||
[Analyze grammar]

dakṣiṇaṃ paścimaṃ gatvā sāgaraṃ pūrvamuttaram |
narmadāyāṃ prasaṅgena hyaṅkūro rākṣaseśvaraḥ || 20 ||
[Analyze grammar]

tapaścacāra sumahaddivyaṃ varṣaśataṃ kila |
tatastuṣṭo mahādevaḥ sākṣātparapuraṃjayaḥ || 21 ||
[Analyze grammar]

vareṇa chandayāmāsa rākṣasaṃ vṛṣaketanaḥ |
varaṃ vṛṇīṣva bhadraṃ te tava dāsyāmi suvrata || 22 ||
[Analyze grammar]

provāca rākṣaso vākyaṃ devadevaṃ maheśvaram |
varadaṃ so'grato dṛṣṭvā praṇamya ca punaḥpunaḥ || 23 ||
[Analyze grammar]

yadi tuṣṭo mahādeva varado'si sureśvara |
durlabhaṃ sarvabhūtānāmamaratvaṃ prayaccha me || 24 ||
[Analyze grammar]

mama nāmnā sthito'nena vareṇa tripurāntaka |
sadā saṃnihito'pyatra tīrthe bhavitumarhasi || 25 ||
[Analyze grammar]

īśvara uvāca |
yāvadvibhīṣaṇamataṃ yāvaddharmaniṣevaṇam |
kariṣyasi dṛḍhātmā tvaṃ tāvadetadbhaviṣyati || 26 ||
[Analyze grammar]

evamuktvā yayau devaḥ sarvadaivatapūjitaḥ |
vimānenārkavarṇena kailāsaṃ dharaṇīdharam || 27 ||
[Analyze grammar]

gate cādarśanaṃ deve snātvācamya vidhānataḥ |
sthāpayāmāsa rājendra hyaṅkūreśvaramuttamam || 28 ||
[Analyze grammar]

gandhapuṣpaistathā dhūpairvastrālaṅkārabhūṣaṇaiḥ |
patākaiścāmaraiśchatrairjayaśabdādimaṃgalaiḥ || 29 ||
[Analyze grammar]

pūjayitvā sureśānaṃ stotrairhṛdyaiḥ supuṣkalaiḥ |
jagāma bhavanaṃ rakṣo yatra rājā vibhīṣaṇaḥ || 30 ||
[Analyze grammar]

pūjitaḥ sa yathānyāyaṃ dānasanmānagauravaiḥ |
saudarye sthāpito bhāve so'vātsītparayāmudā || 31 ||
[Analyze grammar]

tatra tīrthe tu yaḥ snātvā pūjayetparameśvaram |
aṅkūreśvaranāmānaṃ so'śvamedhaphalaṃ labhet || 32 ||
[Analyze grammar]

māṇḍavyakhātamārabhya saṅgamaṃ vāpi yacchubham |
revāyā āmalakyāśca devakṣetraṃ maheśvaram || 33 ||
[Analyze grammar]

māṇḍavyakhātātpaścimatastīrthaṃ tadaṅkūreśvaram |
tatra tīrthe naraḥ snātvā śuciḥ prayatamānasaḥ || 34 ||
[Analyze grammar]

sandhyāmācamya yatnena japaṃ kṛtvātha bhārata |
tarpayitvā pitḥndevānmanuṣyān bharatarṣabha || 35 ||
[Analyze grammar]

sacailaḥ klinnavasano maunamāsthāya saṃyataḥ |
aṣṭamyāṃ vā caturdaśyāmupoṣya vidhivannaraḥ || 36 ||
[Analyze grammar]

pūjāṃ yaḥ kurute rājaṃstasya puṇyaphalaṃ śṛṇu |
sāgraṃ tu yojanaśataṃ tīrthānyāyatanāni ca || 37 ||
[Analyze grammar]

bhavanti tāni dṛṣṭāni tataḥ pāpaiḥ pramucyate |
tatra tīrthe tu yaddānaṃ devamuddiśya dīyate || 38 ||
[Analyze grammar]

snātvā tu vidhivatpātre tadakṣayamudāhṛtam |
homāddaśaguṇaṃ proktaṃ phalaṃ jāpye tato'dhikam || 39 ||
[Analyze grammar]

triguṇaṃ copavāsena snānena ca caturguṇam |
saṃnyāsaṃ kurute yastu prāṇatyāgaṃ karoti vā || 40 ||
[Analyze grammar]

anivartikā gatistasya rudralokādasaṃśayam |
kṛmikīṭapataṅgānāṃ tatra tīrthe yudhiṣṭhira |
aṅkūreśvaranāmākhye mṛtānāṃ sugatirbhavet || 41 ||
[Analyze grammar]

etatte kathitaṃ rājannaṅkūreśvarasambhavam |
tīrthaṃ sarvaguṇopetaṃ paramaṃ pāpanāśanam || 42 ||
[Analyze grammar]

ye'pi śṛṇvanti bhaktyedaṃ kīrtyamānaṃ mahāphalam |
labhante nātra sandehaḥ śivasya bhuvanaṃ hi te || 43 ||
[Analyze grammar]