Chapter 159

[English text for this chapter is available]

śrīmārkaṇḍeya uvāca |
tato gacchenmahārāja tīrthaṃ paramapāvanam |
narmadāyāṃ suduṣprāpaṃ siddhaṃ hyanarakeśvaram || 1 ||
[Analyze grammar]

tasmiṃstīrthe naraḥ snātvā pāpakarmāpi bhārata |
na paśyati mahāghoraṃ narakadvārasaṃjñikam || 2 ||
[Analyze grammar]

yudhiṣṭhira uvāca |
śubhāśubhaphalaistāta bhuktabhogā narāstviha |
jāyante lakṣaṇairyaistu tāni me vada sattama || 3 ||
[Analyze grammar]

yathā nirgacchate jīvastyaktvā dehaṃ na paśyati |
tathā gacchanpunardehaṃ pañcabhūtasamanvitaḥ || 4 ||
[Analyze grammar]

tvagasthimāṃsamedo'sṛkkeśasnāyuśataiḥ saha |
viṇmūtraretaḥsaṅghāte kā saṃjñā jāyate nṛṇām || 5 ||
[Analyze grammar]

evamuktaḥ sa mārkaṇḍaḥ kathayāmāsa yogavit |
dhyātvā sanātanaṃ sarvaṃ devadevaṃ maheśvaram || 6 ||
[Analyze grammar]

mārkaṇḍeya uvāca |
śṛṇu pārtha mahāpraśnaṃ kathayāmi yathāśrutam |
sakāśādbrahmaṇaḥ pūrvamṛṣidevasamāgame || 7 ||
[Analyze grammar]

gururātmavatāṃ śāstā rājā śāstā durātmanām |
iha pracchannapāpānāṃ śāstā vaivasvato yamaḥ || 8 ||
[Analyze grammar]

acīrṇaprāyaścittānāṃ yamaloke hyanekadhā |
yātanābhirviyuktānāmanekāṃ jīvasantatim || 9 ||
[Analyze grammar]

gatvā manuṣyabhāve tu pāpacihnā bhavanti te |
tatte'haṃ sampravakṣyāmi śṛṇuṣvaikamanā nṛpa || 10 ||
[Analyze grammar]

sahitvā yātanāṃ sarvāṃ gatvā vaivasvatakṣayam |
vistīrṇayātanā ye tu lokamāyānti cihnitāḥ || 11 ||
[Analyze grammar]

gadgado'nṛtavādī syānmūkaścaiva gavānṛte |
brahmahā jāyate kuṣṭhī śyāvadantastu madyapaḥ || 12 ||
[Analyze grammar]

kunakhī svarṇaharaṇādduḥścarmā gurutalpagaḥ |
saṃyogī hīnayoniḥ syāddaridro'dattadānataḥ || 13 ||
[Analyze grammar]

grāmaśūkaratāṃ yāti hyayājyayājako nṛpa |
kharo vai bahuyājī syācchvānimantritabhojanāt || 14 ||
[Analyze grammar]

aparīkṣitabhojī syādvānaro vijane vane |
vitarjako'tha mārjāraḥ khadyotaḥ kakṣadāhataḥ || 15 ||
[Analyze grammar]

avidyāṃ yaḥ prayaccheta balīvardo bhaveddhi saḥ |
annaṃ paryuṣitaṃ vipre dadānaḥ klībatāṃ vrajet || 16 ||
[Analyze grammar]

mātsaryādatha jātyandho janmāndhaḥ pustakaṃ haran |
phalānyāharato'patyaṃ mriyate nātra saṃśayaḥ || 17 ||
[Analyze grammar]

mṛto vānaratāṃ yāti tanmukto'tha galāḍavān |
adattvā bhakṣayaṃstāni hyanapatyo bhavennaraḥ || 18 ||
[Analyze grammar]

haranvastraṃ bhavedgodhā garadaḥ pavanāśanaḥ |
pravrājī gamanādrājan bhavenmarupiśācakaḥ || 19 ||
[Analyze grammar]

vātako jalahartā ca dhānyahartā ca mūṣakaḥ |
aprāptayauvanāṃ gacchan bhavetsarpa iti śrutiḥ || 20 ||
[Analyze grammar]

gurudārābhilāṣī ca kṛkalāso bhavecciram |
jalaprasravaṇaṃ yastu bhindyānmatsyo bhavennaraḥ || 21 ||
[Analyze grammar]

avikreyān vikrayan vai vikaṭākṣo bhavennaraḥ |
ayonigo vṛko hi syādulūkaḥ krayavañcanāt || 22 ||
[Analyze grammar]

mṛtasyaikādaśāhe tu bhuñjānaḥ śvopajāyate |
pratiśrutya dvijāyārthamadadanmadhuko bhavet || 23 ||
[Analyze grammar]

rājñīgamādbhavedduṣṭataskaro viḍvarāhakaḥ |
parivādī dvijātīnāṃ labhate kācchapīṃ tanum || 24 ||
[Analyze grammar]

vrajeddevalako rājanyoniṃ cāṇḍālasaṃjñitām |
durbhagaḥ phalavikretā vṛściko vṛṣalīpatiḥ || 25 ||
[Analyze grammar]

mārjāro'gniṃ padā spṛṣṭvā rogavānparamāṃsabhuk |
sodaryāgamanātṣaṇḍho durgandhaśca sugandhahṛt || 26 ||
[Analyze grammar]

grāmabhaṭṭo divākīrtirdaivajño gardabho bhavet |
kupaṇḍitaḥ syānmārjāro bhaṣaṇo vyāsa eva ca || 27 ||
[Analyze grammar]

sa eva dṛśyate rājanprakāśātparamarmaṇām |
yadvā tadvāpi pārakyaṃ svalpaṃ vā yadi vā bahu || 28 ||
[Analyze grammar]

kṛtvā vai yonimāpnoti tairaścīṃ nātra saṃśayaḥ |
evamādīni cānyāni cihnāni nṛpasattama || 29 ||
[Analyze grammar]

svakarmavihitānyeva dṛśyante yaistu mānavāḥ |
tato janma tato mṛtyuḥ sarvajantuṣu bhārata || 30 ||
[Analyze grammar]

jāyate nātra sandehaḥ samībhūte śubhāśubhe |
strīpuṃsoḥ samprayogeṇa viṣuddhe śukraśoṇite || 31 ||
[Analyze grammar]

pañcabhūtasamopetaḥ saṣaṣṭhaḥ parameśvaraḥ |
indriyāṇi manaḥ prāṇā jñānamāyuḥ sukhaṃ dhṛtiḥ || 32 ||
[Analyze grammar]

dhāraṇaṃ preraṇaṃ duḥkhamicchāhaṅkāra eva ca |
prayatna ākṛtirvarṇaḥ svaradveṣau bhavābhavau || 33 ||
[Analyze grammar]

tasyedamātmanaḥ sarvamanāderādimicchataḥ |
prathame māsi sa kledabhūto dhātuvimūrchitaḥ || 34 ||
[Analyze grammar]

māsyarbudaṃ dvitīye tu tṛtīye cendriyairyutaḥ |
ākāśāllāghavaṃ saukṣmyaṃ śabdaṃ śrotrabalādikam |
vāyostu sparśanaṃ ceṣṭāṃ dahanaṃ raukṣyameva ca || 35 ||
[Analyze grammar]

pittāttu darśanaṃ paktimauṣṇyaṃ rūpaṃ prakāśanam |
salilādrasanāṃ śaityaṃ snehaṃ kledaṃ samārdavam || 36 ||
[Analyze grammar]

bhūmergandhaṃ tathā ghrāṇaṃ gauravaṃ mūrtimeva ca |
ātmā gṛhṇātyajaḥ pūrvaṃ tṛtīye spandate ca saḥ || 37 ||
[Analyze grammar]

daurhṛdasyāpradānena garbho doṣamavāpnuyāt |
vairūpyaṃ maraṇaṃ vāpi tasmātkāryaṃ priyaṃ striyāḥ || 38 ||
[Analyze grammar]

sthairyaṃ caturthe tvaṅgānāṃ pañcame śoṇitodbhavaḥ |
ṣaṣṭhe balaṃ ca varṇaśca nakharomṇāṃ ca sambhavaḥ || 39 ||
[Analyze grammar]

manasā cetanāyukto nakharomaśatāvṛtaḥ |
saptame cāṣṭame caiva tvacāvān smṛtivānapi || 40 ||
[Analyze grammar]

punargarbhaṃ punardhātrīmenastasya pradhāvati |
aṣṭame māsyato garbho jātaḥ prāṇairviyujyate || 41 ||
[Analyze grammar]

navame daśame vāpi prabalaiḥ sūtimārutaiḥ |
nirgacchate bāṇa iva yantracchidreṇa sajvaraḥ || 42 ||
[Analyze grammar]

śarīrāvayavairyukto hyaṅgapratyaṅgasaṃyutaḥ |
aṣṭottaraṃ marmaśataṃ tatrāsthā tu śatatrayam || 43 ||
[Analyze grammar]

sapta śiraḥkapālāni vihitāni svayambhuvā |
tisraḥ koṭyo'rdhakoṭī ca romṇāmaṅgeṣu bhārata || 44 ||
[Analyze grammar]

dvāsaptatisahasrāṇi hṛdayādabhinisṛtāḥ |
hitānāma hi tā nāḍyastāsāṃ madhye śaśiprabhā || 45 ||
[Analyze grammar]

evaṃ pravartate cakraṃ bhūtagrāme caturvidhe |
utpattiśca vināśaśca bhavataḥ sarvadehinām || 46 ||
[Analyze grammar]

gatirūrdhvā ca dharmeṇa hyadharmeṇa tvadhogatiḥ |
jāyate sarvavarṇānāṃ svadharmacalanānnṛpa || 47 ||
[Analyze grammar]

devatve mānavatve ca dānabhogādikāḥ kriyāḥ |
dṛśyante yā mahārāja tatsarvaṃ karmajaṃ phalam || 48 ||
[Analyze grammar]

svakarma vihite ghore kāmaksodhārjite śubhe |
nimajjennarake ghore yasyottāro na vidyate || 49 ||
[Analyze grammar]

uttāraṇāya jantūnāṃ narmadātaṭasaṃsthitam |
evametanmahātīrthaṃ narakeśvaramuttamam || 50 ||
[Analyze grammar]

narakāpahaṃ mahāpuṇyaṃ mahāpātakanāśanam |
tattīrthaṃ sarvatīrthānāmuttamaṃ bhuvi durlabham || 51 ||
[Analyze grammar]

tatra tīrthe tu yaḥ snātvā pūjayeta maheśvaram |
mahāpātakayukto'pi narakaṃ naiva paśyati || 52 ||
[Analyze grammar]

tatra tīrthe tu yo dadyāddhenuṃ vaitaraṇīṃ śubhām |
sa mucyate sukhenaiva vaitaraṇyāṃ na saṃśayaḥ || 53 ||
[Analyze grammar]

yudhiṣṭhira uvāca |
yamadvāre mahāghore yā sā vaitaraṇī nadī |
kiṃrūpā kiṃpramāṇā sā kathaṃ sā vahati dvija || 54 ||
[Analyze grammar]

kathaṃ tasyāḥ pramucyante keṣāṃ vāsastu saṃtatam |
keṣāṃ tu sānukūlā sā hyetadvistarato vada || 55 ||
[Analyze grammar]

śrīmārkaṇḍeya uvāca |
dharmaputra mahābāho śṛṇu sarvaṃ mayoditam |
yā sā vaitaraṇī nāma yamadvāre mahāsarit || 56 ||
[Analyze grammar]

agādhā pārarahitā dṛṣṭamātrā bhayāvahā |
pūyaśoṇitatoyā sā māṃsakardamanirmitā || 57 ||
[Analyze grammar]

tattoyaṃ bhramate tūrṇaṃ tāpīmadhye ghṛtaṃ yathā |
kṛmibhiḥ saṅkulaṃ pūyaṃ vajratuṇḍairayomukhaiḥ || 58 ||
[Analyze grammar]

śiśumāraiśca makarairvajrakartarisaṃyutaiḥ |
anyaiśca jalajīvaiḥ sā suhiṃsrairmarmabhedibhiḥ || 59 ||
[Analyze grammar]

tapanti dvādaśādityāḥ pralayānta ivolbaṇāḥ |
patanti tatra vai martyāḥ krandanto bhṛśadāruṇam || 60 ||
[Analyze grammar]

hā bhrātaḥ putra hā mātaḥ pralapanti muhurmuhuḥ |
asipattravane ghore patantaṃ yo'bhirakṣati || 61 ||
[Analyze grammar]

prataranti nimajjanti glāniṃ gacchanti jantavaḥ |
caturvidhaiḥ prāṇigaṇairdraṣṭavyā sā mahānadī || 62 ||
[Analyze grammar]

taranti tasyāṃ saddānairanyathā tu patanti te |
mātaraṃ ye na manyante hyācāryaṃ gurumeva ca || 63 ||
[Analyze grammar]

avajānanti mūḍhā ye teṣāṃ vāsastu saṃtatam |
pativratāṃ sādhuśīlāmūḍhāṃ dharmeṣu niścalām || 64 ||
[Analyze grammar]

parityajanti ye pāpāḥ saṃtataṃ tu vasanti te |
viśvāsapratipannānāṃ svāmimitratapasvinām || 65 ||
[Analyze grammar]

strībālavṛddhadīnānāṃ chidramanveṣayanti ye |
pacyante tatra madhye vai krandamānāḥ supāpinaḥ || 66 ||
[Analyze grammar]

śrāntaṃ bubhukṣitaṃ vipraṃ yo vighnayati durmatiḥ |
kṛmibhirbhakṣyate tatra yāvatkalpaśatatrayam || 67 ||
[Analyze grammar]

brāhmaṇāya pratiśrutya yo dānaṃ na prayacchati |
āhūya nāsti yo brūte tasya vāsastu saṃtatam || 68 ||
[Analyze grammar]

agnido garadaścaiva rājagāmī ca paiśunī |
kathābhaṅgakaraścaiva kūṭasākṣī ca madyapaḥ || 69 ||
[Analyze grammar]

vajravidhvaṃsakaścaiva svayaṃdattāpahārakaḥ |
sukṣetrasetubhedī ca paradārapradharṣakaḥ || 70 ||
[Analyze grammar]

brāhmaṇo rasavikretā vṛṣalīpatireva ca |
gokulasya tṛṣārtasya pālībhedaṃ karoti yaḥ || 71 ||
[Analyze grammar]

kanyābhidūṣakaścaiva dānaṃ dattvā tu tāpakaḥ |
śūdrastu kapilāpānī brāhmaṇo māṃsabhojanī || 72 ||
[Analyze grammar]

ete vasanti satataṃ mā vicāraṃ kṛthā nṛpa |
sānukūlā bhavedyena tacchṛṇuṣva narādhipa || 73 ||
[Analyze grammar]

ayane viṣuve caiva vyatīpāte dinakṣaye |
anyeṣu puṇyakāleṣu dīyate dānamuttamam || 74 ||
[Analyze grammar]

kṛṣṇāṃ vā pāṭalāṃ vāpi kuryādvaitaraṇīṃ śubhām |
svarṇaśṛṅgīṃ rūpyakhurāṃ kāṃsyapātrasya dohinīm || 75 ||
[Analyze grammar]

kṛṣṇavastrayugācchannāṃ saptadhānyasamanvitām |
kuryātsadroṇaśikhara āsīnāṃ tāmrabhājane || 76 ||
[Analyze grammar]

yamaṃ haimaṃ prakurvīta lohadaṇḍasamanvitam |
ikṣudaṇḍamayaṃ baddhvā hyuḍupaṃ paṭṭabandhanaiḥ || 77 ||
[Analyze grammar]

uḍupopari tāṃ dhenuṃ sūryadehasamudbhavām |
kṛtvā prakalpayedvidvāñchattropānadyugānvitām || 78 ||
[Analyze grammar]

aṅgulīyakavāsāṃsi brāhmaṇāya nivedayet |
imamuccārayenmantraṃ saṃgṛhyāsyāśca pucchakam || 79 ||
[Analyze grammar]

oṃ yamadvāre mahāghore yā sā vaitaraṇī nadī |
tartukāmo dadāmyenāṃ tubhyaṃ vaitaraṇi namaḥ |
ityadhivāsanamantraḥ || 80 ||
[Analyze grammar]

gāvo me cāgrataḥ santu gāvo me santu pṛṣṭhataḥ |
gāvo me hṛdaye santu gavāṃ madhye vasāmyaham || 81 ||
[Analyze grammar]

oṃ viṣṇurūpa dvijaśreṣṭha bhūdeva paṅktipāvana |
sadakṣiṇā mayā dattā tubhyaṃ vaitaraṇi namaḥ |
iti dānamantraḥ || 82 ||
[Analyze grammar]

brāhmaṇaṃ dharmarājaṃ ca dhenuṃ vaitaraṇīṃ śivām |
sarvaṃ pradakṣiṇīkṛtya brāhmaṇāya nivedayet || 83 ||
[Analyze grammar]

pucchaṃ saṃgṛhya surabheragre kṛtvā dvijaṃ tataḥ || 84 ||
[Analyze grammar]

dhenuke tvaṃ pratīkṣasva yamadvāre mahābhaye |
uttitīrṣurahaṃ dheno vaitaraṇyai namo'stu te |
ityanuvrajamantraḥ || 85 ||
[Analyze grammar]

anuvrajeta gacchantaṃ sarvaṃ tasya gṛhaṃ nayet |
evaṃ kṛte mahīpāla saritsyātsukhavāhinī || 86 ||
[Analyze grammar]

tārayate tayā dhenvā sā sarijjalavāhinī |
sarvānkāmānavāpnoti ye divyā ye ca mānuṣāḥ || 87 ||
[Analyze grammar]

rogī rogādvimuktaḥ syācchāmyanti paramāpadaḥ |
svasthe sahasraguṇitamāture śatasaṃmitam || 88 ||
[Analyze grammar]

mṛtasyaiva tu yaddānaṃ parokṣe tatsamaṃ smṛtam |
svahastena tato deyaṃ mṛte kaḥ kasya dāsyati |
iti matvā mahārāja svadattaṃ syānmahāphalam || 89 ||
[Analyze grammar]

ityevamuktaṃ tava dharmasūno dānaṃ mayā vaitaraṇīsamuttham |
śṛṇoti bhaktyā paṭhatīha samyaksa yāti viṣṇoḥ padamaprameyam || 90 ||
[Analyze grammar]

śrīmārkaṇḍeya uvāca |
prāpte cāśvayuje māsi tasminkṛṣṇā caturdaśī |
snātvā kṛtvā tataḥ śrāddhaṃ sampūjya ca maheśvaram || 91 ||
[Analyze grammar]

pitṛbhyo dīyate dānaṃ bhaktiśraddhāsamanvitaiḥ |
paścājjāgaraṇaṃ kuryātsatkathāśravaṇādibhiḥ || 92 ||
[Analyze grammar]

tataḥ prabhātasamaye snātvā vai narmadājale |
tarpaṇaṃ vidhivatkṛtvā pitḥṇāṃ devapūrvakam || 93 ||
[Analyze grammar]

sauvarṇe ghṛtasaṃyuktaṃ dīpaṃ dadyāddvijātaye |
paścātsaṃbhojayedviprān svayaṃ caiva vimatsaraḥ || 94 ||
[Analyze grammar]

evaṃ kṛte naraśreṣṭha na janturnarakaṃ vrajet |
avaśyameva manujairdraṣṭavyā nārakī sthitiḥ || 95 ||
[Analyze grammar]

anena vidhinā kṛtvā na paśyennarakānnaraḥ |
tatra tīrthe mṛtānāṃ tu narāṇāṃ vidhinā nṛpa || 96 ||
[Analyze grammar]

manvantaraṃ śive loke vāso bhavati durlabhe |
vimānenārkavarṇena kiṃkiṇīśataśobhinā || 97 ||
[Analyze grammar]

sa gacchati mahābhāga sevyamāno'psarogaṇaiḥ |
bhunakti vividhānbhogānuktakālaṃ na saṃśayaḥ || 98 ||
[Analyze grammar]

pūrṇe caiva tataḥ kāla iha mānuṣyatāṃ gataḥ |
sarvavyādhivinirmukto jīvecca śaradāṃ śatam || 99 ||
[Analyze grammar]

prāpya cāśvayuje māsi kṛṣṇapakṣe caturdaśīm |
ahorātroṣito bhūtvā pūjayitvā maheśvaram |
mahāpātakayukto'pi mucyate nātra saṃśayaḥ || 100 ||
[Analyze grammar]

aṣṭāviṃśatikoṭyo vai narakāṇāṃ yudhiṣṭhira |
vimuktā narakairduḥkhaiḥ śivalokaṃ vrajanti te || 101 ||
[Analyze grammar]

tatra bhuktvā mahābhogāndivyaiśvaryasamanvitān |
labhante mānuṣaṃ janma durlabhaṃ bhuvi mānavāḥ || 102 ||
[Analyze grammar]