Chapter 90

[English text for this chapter is available]

| adhyāya || 90 ||
[Analyze grammar]

śrīmārkaṇḍeya uvāca |
revāyā uttare kūle vaiṣṇavaṃ tīrthamuttamam |
jalaśāyīti vai nāma vikhyātaṃ vasudhātale || 1 ||
[Analyze grammar]

dānavānāṃ vadhaṃ kṛtvā suptastatra janārdanaḥ |
cakraṃ prakṣālitaṃ tatra devadevena cakriṇā |
sudarśanaṃ ca niṣpāpaṃ revājalasamāśrayāt || 2 ||
[Analyze grammar]

yudhiṣṭhira uvāca |
cakratīrthaṃ samācakṣva munisaṃghaiśca vanditam |
viṣṇoḥ prabhāvamatulaṃ revāyāścaiva yatphalam || 3 ||
[Analyze grammar]

śrīmārkaṇḍeya uvāca |
sādhu sādhu mahāprājña viraktastvaṃ yudhiṣṭhira |
guhyādguhyataraṃ tīrthaṃ nirmitaṃ cakriṇā svayam || 4 ||
[Analyze grammar]

tatte'haṃ sampravakṣyāmi kathāṃ pāpapraṇāśinīm |
āsītpurā mahādaityastālamegha iti śrutaḥ || 5 ||
[Analyze grammar]

tena devā jitāḥ sarve hṛtarājyā narādhipa |
yajñabhāgān svayaṃ bhuṅkte ahaṃ viṣṇurna saṃśayaḥ || 6 ||
[Analyze grammar]

dhanadasya hṛtaṃ cittaṃ hṛtaḥ śakrasya vāraṇaḥ |
indrāṇīṃ vāñchate pāpo hayaratnaṃ raverapi || 7 ||
[Analyze grammar]

tālameghabhayātpārtha ravirudrāḥ savāsavāḥ |
yamaḥ skando jaleśo'gnirvāyurdevo dhaneśvaraḥ || 8 ||
[Analyze grammar]

savākpatimaheśāśca naṣṭacittāḥ pitāmaham |
gatā devā brahmalokaṃ tatra dṛṣṭvā pitāmaham || 9 ||
[Analyze grammar]

tuṣṭuvurvividhaiḥ stotrairvāgīśapramukhāḥ surāḥ |
guṇatrayavibhāgāya paścādbhedamupeyuṣe || 10 ||
[Analyze grammar]

dṛṣṭvā devānnirutsāhān vivarṇānavanīpate |
prasādābhimukho devaḥ pratyuvāca divaukasaḥ || 11 ||
[Analyze grammar]

brahmovāca |
svāgataṃ surasaṅghasya kāntirnaṣṭā purātanī |
himakliṣṭaprabhāveṇa jyotīṃṣīva mukhāni vaḥ || 12 ||
[Analyze grammar]

praśamādarciṣāmetadanudgīrṇaṃ surāyudham |
vṛtrasya hantuḥ kuliśaṃ kuṇṭhitaśrīva lakṣyate || 13 ||
[Analyze grammar]

kiṃ cāyamaridurvāraḥ pāṇau pāśaḥ pracetasaḥ |
mantreṇa hatavīryasya phaṇino dainyamāśritaḥ || 14 ||
[Analyze grammar]

kuberasya manaḥśalyaṃ śaṃsatīva parābhavam |
apaviddhagato vāyurbhagnaśākha iva drumaḥ || 15 ||
[Analyze grammar]

yamo'pi vilikhanbhūmiṃ daṇḍenāstamitatviṣā |
kurute'sminnamogho'pi nirvāṇālātalāghavam || 16 ||
[Analyze grammar]

amī ca kathamādityāḥ pratāpakṣatiśītalāḥ |
citranyastā iva gatāḥ prakāmālokanīyatām || 17 ||
[Analyze grammar]

tadbrūta vatsāḥ kimitaḥ prārthayadhvaṃ samāgatāḥ |
kimāgamanakṛtyaṃ vo brūta niḥsaṃśayaṃ surāḥ || 18 ||
[Analyze grammar]

mayi sṛṣṭirhi lokānāṃ rakṣā yuṣmāsvavasthitā |
tato mandānilodbhūtakamalākaraśobhinā || 19 ||
[Analyze grammar]

guruṃ netrasahasreṇa prerayāmāsa vṛtrahā |
sa dvinetraṃ hareścakṣuḥ sahasranayanādhikam || 20 ||
[Analyze grammar]

vācaspatiruvācedaṃ prāñjalirjalajāsanam |
yuṣmadvaṃśodbhavastāta tālamegho mahābalaḥ || 21 ||
[Analyze grammar]

upatāpayate devāndhūmaketurivocchritaḥ |
tena devagaṇāḥ sarve duḥkhitā dānavena ca || 22 ||
[Analyze grammar]

tālamegho daityapatiḥ sarvānno bādhate balī |
tasmāttvāṃ śaraṇaṃ prāptāḥ śaraṇaṃ no vidhe bhava || 23 ||
[Analyze grammar]

tataḥ prasanno bhagavān vedhāstānabravīdvacaḥ || 24 ||
[Analyze grammar]

brahmovāca |
tālameghena vo madhye balī tena samaḥ surāḥ |
vinā mādhavadevena sādhyo me naiva dānavaḥ || 25 ||
[Analyze grammar]

tataḥ suragaṇāḥ sarve viriñcipramukhā nṛpa |
kṣīrodaṃ prasthitāḥ sarve duḥkhitāstena vairiṇā || 26 ||
[Analyze grammar]

tvaritāḥ prasthitā devāḥ keśavaṃ draṣṭukāmyayā |
kṣīrodaṃ sāgaraṃ gatvāstuvaṃste jalaśāyinam || 27 ||
[Analyze grammar]

devā ūcuḥ |
jagadādiranādistvaṃ jagadanto'pyanantakaḥ |
jaganmūrtiramūrtistvaṃ jaya gīrvāṇapūjita || 28 ||
[Analyze grammar]

jaya kṣīrodaśayana jaya lakṣmyā sadā vṛta |
jaya dānavanāśāya jaya devakinandana || 29 ||
[Analyze grammar]

jaya śaṅkhagadāpāṇe jaya cakradhara prabho |
iti devastutiṃ śrutvā prabuddho jalaśāyyatha || 30 ||
[Analyze grammar]

uvāca madhurāṃ vāṇīṃ meghagambhīranisvanām |
kimarthaṃ bodhito brahman samarthairvaḥ surāsuraiḥ || 31 ||
[Analyze grammar]

brahmovāca |
tālameghabhayātkṛṣṇa samprāptāstava mandiram |
na vadhyaḥ kasyacitpāpastālamegho janārdana || 32 ||
[Analyze grammar]

tvameva jahi taṃ duṣṭaṃ mṛtyuṃ yāsyati nānyathā || 33 ||
[Analyze grammar]

śrīkṛṣṇa uvāca |
svasthānaṃ gamyatāṃ devāḥ svakīyāṃ labhata prajām |
duṣṭātmānaṃ haniṣyāmi tālameghaṃ mahābalam || 34 ||
[Analyze grammar]

sthānaṃ bruvantu me devā vasedyatra sa dānavaḥ || 35 ||
[Analyze grammar]

devā ūcuḥ |
himācalaguhāyāṃ sa vasate dānaveśvaraḥ |
caturviṃśatisāhasraiḥ kanyābhiḥ parivāritaḥ || 36 ||
[Analyze grammar]

turaṅgaiḥ syandanaiḥ kṛṣṇa saṃkhyā tasya na vidyate |
naṭā nānāvidhāstatra asaṃkhyātaguṇā hare || 37 ||
[Analyze grammar]

dviradāḥ parvatākārā hayāśca dviradopamāḥ |
mahābalo vasettatra gīrvāṇabhayadāyakaḥ || 38 ||
[Analyze grammar]

śrutvā devo vacasteṣāṃ devānāmāturātmanām |
acintayadgarutmantaṃ śatrusaṅghavināśanam || 39 ||
[Analyze grammar]

cakraṃ kareṇa saṃgṛhya gadācakradharaḥ prabhuḥ |
śārṅgaṃ ca muśalaṃ sīraṃ karairgṛhya janārdanaḥ || 40 ||
[Analyze grammar]

ārūḍhaḥ pakṣirājendraṃ vadhārthaṃ dānavasya ca |
dānavasya pure peturutpātā ghorarūpiṇaḥ || 41 ||
[Analyze grammar]

gomāyurgṛdhramadhye tu kapotaiḥ samamāviśat |
vinā vātena tasyaiva dhvajadaṇḍaḥ papāta ha || 42 ||
[Analyze grammar]

sarpasūṣakayoryuddhaṃ tathā kesarināgayoḥ |
unmārgāḥ saritastatrāvahanraktavimiśritāḥ |
akālatarupuṣpāṇi dṛśyante sma samantataḥ || 43 ||
[Analyze grammar]

tataḥ prāpto jagannātho himavantaṃ nageśvaram |
pāñcajanyaśvasahasā pūritaḥ purasannidhau || 44 ||
[Analyze grammar]

tena śabdena mahatā hyārūḍho dānaveśvaraḥ |
uvāca ca tadā vākyaṃ tālamegho mahābalaḥ || 45 ||
[Analyze grammar]

tālamegha uvāca |
ko'yaṃ mṛtyuvaśaṃ prāpto hyajñātvā mama vikramam |
dhundhumārājñayā hyāśu svasainyaparivāritaḥ || 46 ||
[Analyze grammar]

balādānaya taṃ baddhvā mamāgre bahuśālinam || 47 ||
[Analyze grammar]

dhundhumāra uvāca |
ānayāmi na sandehaḥ suro yakṣo'tha kinnaraḥ |
syandanaughaiḥ samāyukto gajavājibhaṭaiḥ saha || 48 ||
[Analyze grammar]

hṛṣṭastato jagadyoniḥ suparṇastho mahābalaḥ |
gṛhyatāṃ gṛhyatāmeṣa ityuktāstena kiṃkarāḥ || 49 ||
[Analyze grammar]

caturdikṣu pradhāvanta itaścetaśca sarvataḥ |
suparṇenāgnirūpeṇa dagdhāste śalabhā yathā || 50 ||
[Analyze grammar]

dhundhumāro'pi kṛṣṇena śaraghātena tāḍitaḥ |
hato vakṣaḥsthale pāpo mṛtāvastho rathopari || 51 ||
[Analyze grammar]

hāhākāraṃ tataḥ sarve dānavāścakrurāturāḥ |
tālameghastataḥ kruddho rathārūḍho vinirgataḥ |
dadṛśe keśavaṃ pārtha śaṅkhacakragadādharam || 52 ||
[Analyze grammar]

tālamegha uvāca |
anye te dānavāḥ kṛṣṇa ye hatāḥ samare tvayā |
hiraṇyakaśipuprakhyānapumāṃso hi te'cyuta || 53 ||
[Analyze grammar]

ityuktvā dānavaḥ pārtha varṣayāmāsa sāyakaiḥ |
dānavasya śarānmuktān chedayāmāsa keśavaḥ || 54 ||
[Analyze grammar]

garutmānavadhītsainyamavadhyaṃ yatsurāsuraiḥ |
kṛṣṇena dviguṇāstasya preṣitāḥ svaśilīmukhāḥ || 55 ||
[Analyze grammar]

dviguṇaṃ dviguṇīkṛtya preṣayāmāsa dānavaḥ |
tānapyaṣṭaguṇaiḥ kṛṣṇaśchādayāmāsa sāyakaiḥ || 56 ||
[Analyze grammar]

tataḥ kruddhena daityena hyāgneyaṃ bāṇamuttamam || 57 ||
[Analyze grammar]

vāruṇaṃ preṣayāmāsa tvāgneyaṃ śamitaṃ tataḥ |
vāruṇenaiva vāyavyaṃ tālamegho vyasarjayat || 58 ||
[Analyze grammar]

sārpaṃ caiva hṛṣīkeśo vāyavyasya praśāntaye |
nārasiṃhaṃ nṛsiṃho'pi preṣayāmāsa pāṇḍava || 59 ||
[Analyze grammar]

nārasiṃhaṃ tato dṛṣṭvā tālamegho mahābalaḥ |
uttīrya syandanācchīghraṃ gṛhītvā khaḍgacarmaṇī || 60 ||
[Analyze grammar]

kṛṣṇa tvāṃ preṣayiṣyāmi yamamārgaṃ sudāruṇam |
ityuktvā dānavaḥ pārtha āgataḥ keśavaṃ prati || 61 ||
[Analyze grammar]

khaḍgenātāḍayaddaityo gadāpāṇiṃ janārdanam |
maṇḍalāgraṃ tato gṛhya keśavo hṛṣṭamānasaḥ || 62 ||
[Analyze grammar]

jaghanoraḥsthale pārtha tālameghaṃ mahāhave |
janārdanastadā daityaṃ daityo harimahanmṛdhe || 63 ||
[Analyze grammar]

janārdanastataḥ kruddhastālameghāya bhārata |
amoghaṃ cakramādāya muktaṃ tasya ca mūrdhani || 64 ||
[Analyze grammar]

nipapāta śirastasya parvatāśca cakampire |
samudrāḥ kṣubhitāḥ pārtha nadya unmārgagāminīḥ || 65 ||
[Analyze grammar]

puṣpavṛṣṭiṃ tato devā mumucuḥ keśavopari |
avadhyaḥ surasaṅghānāṃ sūditaḥ keśava tvayā || 66 ||
[Analyze grammar]

svasthāścaiva tato devāstālameghe nipātite |
janārdano'pi kaunteya narmadātaṭamāśritaḥ || 67 ||
[Analyze grammar]

kṣīrodāṃ narmadāṃ matvā anantabhujagopari |
lakṣmyā samanvitaḥ kṛṣṇo nilīnaścottare taṭe || 68 ||
[Analyze grammar]

cakraṃ vibhīṣaṇaṃ martye jvālāmālāsamanvitam |
patitaṃ narmadātoye jalaśāyisamīpataḥ || 69 ||
[Analyze grammar]

nirdhūtakalmaṣaṃ jātaṃ narmadātoyayogataḥ |
tālameghavadhotpannaṃ yatpāpaṃ nṛpanandana || 70 ||
[Analyze grammar]

tatsravaṃ kṣālitaṃ sadyo narmadāṃbhasi bhārata |
tadāprabhṛti loke'smiñjalaśāyī mahīpate || 71 ||
[Analyze grammar]

cakratīrthaṃ vadantyanye kecitkālāghanāśanam |
vikhyātaṃ bhārate varṣe narmadāyāṃ mahīpate || 72 ||
[Analyze grammar]

tattīrthasya prabhāvo'yaṃ śrūyatāmavanīpate |
yathā'nanto hi nāgānāṃ devānāṃ ca janārdanaḥ || 73 ||
[Analyze grammar]

māsānāṃ mārgaśīrṣo'sti nadīnāṃ narmadā yathā |
māsi mārgaśire pārtha hyekādaśyāṃ site'hani || 74 ||
[Analyze grammar]

gatvā yo manujo bhaktyā kāmakrodhavivarjitaḥ |
vaiṣṇavīṃ bhāvanāṃ kṛtvā jaleśaṃ tu vrajeta vai || 75 ||
[Analyze grammar]

ekabhuktaṃ ca naktaṃ ca tathaivāyācitaṃ nṛpa |
upavāsaṃ tathā dānaṃ brāhmaṇānāṃ ca bhojanam || 76 ||
[Analyze grammar]

karoti ca kuruśreṣṭha na sa yāti yamālayam |
yamalokabhayādbhītā ye lokāḥ pāṇḍunandana || 77 ||
[Analyze grammar]

te paśyantu śriyaḥ kāntaṃ nāgaparyaṅkaśāyinam |
gopījanasamāvṛttaṃ yoganidrāṃ samāśritam |
viśvarūpaṃ jagannāthaṃ saṃsārabhayanāśanam || 78 ||
[Analyze grammar]

snāpayetparayā bhaktyā kṣaudrakṣīreṇa sarpiṣā |
khaṇḍena toyamiśreṇa jagadyoniṃ janārdanam || 79 ||
[Analyze grammar]

snāpyamānaṃ ca paśyanti ye lokā gatamatsarāḥ |
te yānti paramaṃ lokaṃ surāsuranamaskṛtam || 80 ||
[Analyze grammar]

ghṛtena bodhayeddīpamathavā tailapūritam |
rātrau jāgaraṇaṃ kṛtvā daivasyāgre vimatsarāḥ || 81 ||
[Analyze grammar]

ye kathāṃ vaiṣṇavīṃ bhaktyā śṛṇvanti ca nṛpottama |
brahmahatyādipāpāni naśyante nātra saṃśayaḥ || 82 ||
[Analyze grammar]

pradakṣiṇanti ye martyā jalaśāyijagadgurum |
pradakṣiṇīkṛtā taistu saptadvīpā vasuṃdharā || 83 ||
[Analyze grammar]

tataḥ prabhāte vimale pitḥn saṃtarpayejjalaiḥ |
śrāddhaṃ ca brāhmaṇaistatra yogyaiḥ pāṇḍava mānavāḥ || 84 ||
[Analyze grammar]

svadāranirataiḥ śāntaiḥ paradāravivarjakaiḥ |
vedābhyasanaśīlaiśca svakarmanirataiḥ śubhaiḥ || 85 ||
[Analyze grammar]

nityaṃ yajanaśīlaiśca trisandhyāparipālakaiḥ |
śraddhayā kārayecchrāddhaṃ yadīcchecchreya ātmanaḥ || 86 ||
[Analyze grammar]

te dhanyā mānuṣe loke vandyā hi bhuvi mānavāḥ |
ye vasanti sadākālaṃ pādapadmāśrayā hareḥ || 87 ||
[Analyze grammar]

jalaśāyaṃ prapaśyanti pratyakṣaṃ suranāyakam |
pakṣopavāsaṃ pārākaṃ vrataṃ cāndrāyaṇaṃ śubham || 88 ||
[Analyze grammar]

māsopavāsamugraṃ ca ṣaṣṭhānnaṃ pañcamaṃ vratam |
tatra tīrthe tu yaḥ kuryātso'kṣayāṃ gatimāpnuyāt || 89 ||
[Analyze grammar]

śrīmārkaṇḍeya uvāca |
ataḥ paraṃ pravakṣyāmi tiladhenośca yatphalam |
yathā yasminyadā deyā dāne tasyāḥ śubhaṃ phalam || 90 ||
[Analyze grammar]

etatkathāntaraṃ puṇyamṛṣerdvaipāyanātpurā |
śrutaṃ hi naimiṣe puṇye nāradādyairanekadhā || 91 ||
[Analyze grammar]

idaṃ paramamāyuṣyaṃ maṅgalyaṃ kīrtivardhanam |
viprāṇāṃ śrāvayanvidvānphalānantyaṃsamaśnute || 92 ||
[Analyze grammar]

bahubhyo na pradeyāni gaurgṛhaṃ śayanaṃ striyaḥ |
vibhaktadakṣiṇā hyetā dātāraṃ nāpnuvanti ca || 93 ||
[Analyze grammar]

ekametatpradātavyaṃ na bahūnāṃ yudhiṣṭhira |
sā ca vikrayamāpannā dahatyāsaptamaṃ kulam || 94 ||
[Analyze grammar]

yathālābhā tu sarveṣāṃ caturdroṇā tu gauḥ smṛtā |
droṇasya vatsakaḥ kāryo bahūnāṃ vāpi kāmataḥ || 95 ||
[Analyze grammar]

yasmindeśe tu yanmānaṃ viṣaye vā vicāritam |
tena mānena tāṃ kurvannakṣayaṃ phalamaśnute || 96 ||
[Analyze grammar]

sukhapūrvaṃ śucau bhūmau puṣpadhūpākṣataistathā |
karṇābhyāṃ ratne dātavye dīpau netradvaye tathā || 97 ||
[Analyze grammar]

śrīkhaṇḍamurasi sthāpyaṃ tābhyāṃ caiva tu kāñcanam |
ūrdhve madhu ghṛtaṃ deyaṃ kuryātsarṣaparomakam || 98 ||
[Analyze grammar]

kambale kambalaṃ dadyācchroṇyāṃ madhu ghṛtaṃ tathā |
yavasaṃ pāyasaṃ dadyādghṛtaṃ kṣaudrasamanvitam || 99 ||
[Analyze grammar]

svarṇaśṛṅgī rūpyaśiphārukmalāṅgūlasaṃyutā |
ratnapṛṣṭhī tu dātavyā kāṃsyapātrāvadohinī || 100 ||
[Analyze grammar]

yatsyādbālyakṛtaṃ pāpaṃ yadvā kṛtamajānatā |
vācā kṛtaṃ karmakṛtaṃ manasā yadvicintitam || 101 ||
[Analyze grammar]

jale niṣṭhīvitaṃ caiva muśalaṃ vāpi laṅghitam |
vṛṣalīgamanaṃ caiva gurudāraniṣevaṇam || 102 ||
[Analyze grammar]

kanyāyā gamanaṃ caiva suvarṇasteyameva ca |
surāpānaṃ tathā cānyattiladhenuḥ punāti hi || 103 ||
[Analyze grammar]

ahorātropavāsena vidhivattāṃ visarjayet |
yā sā yamapure ghore nadī vaitaraṇī smṛtā || 104 ||
[Analyze grammar]

vālukāyo'śmasthalā ca pacyate yatra duṣkṛtī |
avīcirnarako yatra yatra yāmalaparvatau || 105 ||
[Analyze grammar]

yatra lohamukhāḥ kākā yatra śvāno bhayaṃkarāḥ |
asipattravanaṃ caiva yatra sā kūṭaśālmalī || 106 ||
[Analyze grammar]

tānsukhena vyatikramya dharmarājālayaṃ vrajet |
dharmarājastu taṃ dṛṣṭvā sūnṛtaṃ vakti bhārata || 107 ||
[Analyze grammar]

vimānamuttamaṃ yogyaṃ maṇiratnavibhūṣitam |
atrāruhya naraśreṣṭha prayāhi paramāṃ gatim || 108 ||
[Analyze grammar]

mā ca cāṭu bhaṭe dehi maiva dehi purohite |
mā ca kāṇe virūpe ca nyūnāṅge na ca devale || 109 ||
[Analyze grammar]

avedaviduṣe naiva brāhmaṇe sarvavikraye |
mitraghne ca kṛtaghne ca mantrahīne tathaiva ca || 110 ||
[Analyze grammar]

vedāntagāya dātavyā śrotriyāya kuṭumbine |
vedāntagasute deyā śrotriye gṛhapālake || 111 ||
[Analyze grammar]

sarvāṅgarucire vipre sadvṛtte ca priyaṃvade |
pūrṇimāyāṃ tu māghasya kārttikyāmatha bhārata || 112 ||
[Analyze grammar]

vaiśākhyāṃ mārgaśīrṣyāṃ vāṣāḍhyāṃ caitryāmathāpi vā |
ayane viṣuve caiva vyatīpāte ca sarvadā || 113 ||
[Analyze grammar]

ṣaḍaśītimukhe puṇye chāyāyāṃ kuṃjarasya vā |
eṣa te kathitaḥ kalpastiladhenormayānagha || 114 ||
[Analyze grammar]

vrajanti vaiṣṇavaṃ lokaṃ dattvā pādaṃ yamopari |
prāṇatyāgātparaṃ lokaṃ vaiṣṇavaṃ nātra saṃśayaḥ |
bhittvāśu bhāskaraṃ yānti nātra kāryā vicāraṇā || 115 ||
[Analyze grammar]

etatte sarvamākhyātaṃ cakratīrthaphalaṃ nṛpa |
yacchrutvā mānavo bhaktyā sarvapāpaiḥ pramucyate || 116 ||
[Analyze grammar]