Chapter 85

[English text for this chapter is available]

| adhyāya || 85 ||
[Analyze grammar]

śrīmārkaṇḍeya uvāca |
tato gacchettu rājendra narmadāyāḥ purātanam |
brahmahatyāharaṃ tīrthaṃ vārāṇasyā samaṃ hi tat || 1 ||
[Analyze grammar]

yudhiṣṭhira uvāca |
āścaryaṃ kathyatāṃ brahmanyadvṛttaṃ narmadātaṭe |
vārāṇasyā samaṃ kasmādetatkathaya me prabho || 2 ||
[Analyze grammar]

nimagno duḥkhasaṃsāre hṛtarājyo dvijottama |
yuṣmadvāṇījalasnāto nirduḥkhaḥ saha bāndhavaiḥ || 3 ||
[Analyze grammar]

śrīmārkaṇḍeya uvāca |
sādhu sādhu mahābāho somavaṃśavibhūṣaṇa |
pṛṣṭo'smi durlabhaṃ tīrthaṃ guhyādguhyataraṃ param || 4 ||
[Analyze grammar]

ādau pitāmahastāvatsamastajagataḥ prabhuḥ |
manasā tasya saṃjātā daśaiva ṛṣipuṃgavāḥ || 5 ||
[Analyze grammar]

marīcimatryaṅgirasau pulastyaṃ pulahaṃ kratum |
pracetasaṃ vasiṣṭhaṃ ca bhṛguṃ nāradameva ca || 6 ||
[Analyze grammar]

jajñe prācetasaṃ dakṣaṃ mahātejāḥ prajāpatiḥ |
dakṣasyāpi tathā jātāḥ pañcāśadduhitāḥ kila || 7 ||
[Analyze grammar]

dadau sa daśa dharmāya kaśyapāya trayodaśa |
tathaiva sa mahābhāgaḥ saptaviṃśatimindave || 8 ||
[Analyze grammar]

rohiṇī nāma yā tāsāmabhīṣṭā sābhavadvidhoḥ |
śeṣāsu karuṇāṃ kṛtvā śapto dakṣeṇa candramāḥ || 9 ||
[Analyze grammar]

kṣayarogyabhavaccandro dakṣasyāyaṃ prajāpateḥ |
sa ca śāpaprabhāveṇa nistejāḥ śarvarīpatiḥ || 10 ||
[Analyze grammar]

gataḥ pitāmahaṃ somo vepamāno'mṛtāṃśumān |
padmayone namastubhyaṃ vedagarbha namo'stu te |
śaraṇaṃ tvāṃ prasanno'smi pāhi māṃ kamalāsana || 11 ||
[Analyze grammar]

brahmovāca |
nistejāḥ śarvarīnātha kalāhīnaśca dṛśyase |
udvignamānasastāta saṃjātaḥ kena hetunā || 12 ||
[Analyze grammar]

soma uvāca |
dakṣaśāpena me brahmannistejastvaṃ jagatpate |
nirhāraścāsya śāpasya kathyatāṃ me pitāmaha || 13 ||
[Analyze grammar]

brahmovāca |
sarvatra sulabhā revā triṣu sthāneṣu durlabhā |
oṅkāre'tha bhṛgukṣetre tathā caivaurvasaṃgame || 14 ||
[Analyze grammar]

tatra gaccha kṣapānātha yatra revāntaraṃ taṭam |
tvarito'sau gatastatra yatra revaurvisaṃgamaḥ || 15 ||
[Analyze grammar]

kāṣṭhāvasthaḥ sthitaḥ somo dadhyau tripuravairiṇam |
yāvadvarṣaśataṃ pūrṇaṃ tāvattuṣṭo maheśvaraḥ || 16 ||
[Analyze grammar]

pratyakṣaḥ somarājasya vṛṣāsana umāpatiḥ |
sāṣṭāṅgaṃ praṇipatyoccairjaya śambho namo'stu te || 17 ||
[Analyze grammar]

jaya śaṅkara pāpaharāya namo jaya īśvara te jagadīśa namaḥ |
jaya vāsukibhūṣaṇadhāra namo jaya śūlakapāladharāya namaḥ || 18 ||
[Analyze grammar]

jaya andhakadehavināśa namo jaya dānavavṛndavadhāya namaḥ |
jaya niṣkalarūpa sakalāya namo jaya kāla kāmadahāya namaḥ || 19 ||
[Analyze grammar]

jaya mecakakaṇṭhadharāya namo jaya sūkṣmanirañjanaśabda namaḥ |
jaya ādiranādirananta namo jaya śaṅkara kiṃkaramīśa bhaja || 20 ||
[Analyze grammar]

evaṃ stuto mahādevaḥ somarājena pāṇḍava |
tuṣṭastasya nṛpaśreṣṭha śivayā śaṅkaro'bravīt || 21 ||
[Analyze grammar]

īśvara uvāca |
varaṃ prārthaya me bhadra yatte manasi vartate |
sādhu sādhu mahāsattva tuṣṭo'haṃ tapasā tava || 22 ||
[Analyze grammar]

soma uvāca |
dakṣaśāpena dagdho'haṃ kṣīṇasattvo maheśvara |
śāpasyopaśamaṃ deva kuru śarma mama prabho || 23 ||
[Analyze grammar]

īśvara uvāca |
tava bhaktigṛhīto'hamumayā saha toṣitaḥ |
niṣpāpaḥ somanāthastvaṃ saṃjātastīrthasevanāt || 24 ||
[Analyze grammar]

ityūce devadeveśaḥ kṣaṇaṃ dhyātvendunā tataḥ |
sthāpitaṃ paramaṃ liṅgaṃ kāmadaṃ prāṇināṃ bhuvi |
sarvaduḥkhaharaṃ tattu brahmahatyāvināśanam || 25 ||
[Analyze grammar]

yudhiṣṭhira uvāca |
somanāthaprabhāvaṃ me saṃkṣepātkathaya prabho |
duḥkhārṇavanimagnānāṃ trātā prāpto dvijottama || 26 ||
[Analyze grammar]

śrīmārkaṇḍeya uvāca |
śṛṇu tīrthaprabhāvaṃ te saṃkṣepātkathayāmyaham |
yadvṛttamuttare kūle revāyā urisaṃgame || 27 ||
[Analyze grammar]

śambaro nāma rājābhūttasya putrastrilocanaḥ |
trilocanasutaḥ kaṇvaḥ sa pāparddhiparo'bhavat || 28 ||
[Analyze grammar]

vane nityaṃ bhramanso'tha mṛgayūthaṃ dadarśa ha |
mṛgayūthaṃ hataṃ tattu trilocanasutena ca || 29 ||
[Analyze grammar]

mṛgarūpī dvijo madhye carate nirjane vane |
sa hatastena saṅgena kaṇvena munisattama || 30 ||
[Analyze grammar]

brahmahatyānvitaḥ kaṇvo nistejā vyacaranmahīm |
vyacaraṃścaiva samprāpto narmadāmurisaṃgame || 31 ||
[Analyze grammar]

kiṃśukāśokabahale jambīrapanasākule |
kadambapāṭalākīrṇe bilvanāraṅgaśobhite || 32 ||
[Analyze grammar]

ciñciṇīcampakopete hyagastitaruchādite |
prabhūtabhūtasaṃyuktaṃ vanaṃ sarvatra śobhitam || 33 ||
[Analyze grammar]

citrakairmṛgamārjārairhiṃsraiḥ śambaraśūkaraiḥ |
śaśairgavayasaṃyuktaiḥ śikhaṇḍikharamaṇḍitam || 34 ||
[Analyze grammar]

praviṣṭastu vane kaṇvastṛṣārtaḥ śramapīḍitaḥ |
snāto revājale puṇye saṅgame pāpanāśane || 35 ||
[Analyze grammar]

arcitaḥ parayā bhaktyā somanātho yudhiṣṭhira |
papau suvimalaṃ toyaṃ sarvapāpakṣayaṃkaram || 36 ||
[Analyze grammar]

phalāni ca vicitrāṇi cakhāda saha kiṃkaraiḥ |
suptaḥ pādapacchāyāyāṃ śrānto mṛgavadhena ca || 37 ||
[Analyze grammar]

tāvattīrthavaraṃ vipraḥ snānārthaṃ saṅgamaṃ gataḥ |
mārgago brāhmaṇo harṣodyuktastadgatamānasaḥ || 38 ||
[Analyze grammar]

abalā tamuvācedaṃ tiṣṭha tiṣṭha dvijottama |
trasto nirīkṣate yāvaddiśaḥ sarvā nareśvara || 39 ||
[Analyze grammar]

tāvadvṛkṣasamārūḍhāṃ striyaṃ raktāmbarāvṛtām |
raktamālyāṃ tadā bālāṃ raktacandanacarcitām |
raktābharaṇaśobhāḍhyāṃ pāśahastāṃ dadarśa ha || 40 ||
[Analyze grammar]

stryuvāca |
saṃdeśaṃ śrūyatāṃ vipra yadi gacchasi saṅgame |
madbhartā tiṣṭhate tatra śīghrameva visarjaya || 41 ||
[Analyze grammar]

ekākinī ca te bhāryā tiṣṭhate vanamadhyagā |
ityākarṇya gato vipraḥ saṅgamaṃ suradurlabhe || 42 ||
[Analyze grammar]

vṛkṣacchāyānvitaḥ kaṇvo brāhmaṇenāvalokitaḥ |
uvāca taṃ prati tadā vacanaṃ brāhmaṇottamaḥ || 43 ||
[Analyze grammar]

brāhmaṇa uvāca |
vanāntare mayā dṛṣṭā bālā kamalalocanā |
raktāmbaradharā tanvī raktacandanacarcitā || 44 ||
[Analyze grammar]

raktamālyā suśobhāḍhyā pāśahastā mṛgekṣaṇā |
vṛkṣārūḍhāvadadvākyaṃ madbhartā preṣyatāmiti || 45 ||
[Analyze grammar]

kaṇva uvāca |
kasminsthāne tu viprendra vidyate mṛgalocanā |
kasya sā kena kāryeṇa sarvametadvadāśu me || 46 ||
[Analyze grammar]

brāhmaṇa uvāca |
saṅgamādardhakrośe sā udyānānte hi vidyate |
vacanādbrahmaṇasyaiṣā na jñātā pārthivena tu || 47 ||
[Analyze grammar]

tadā sa kaṇvabhūpālaḥ svakaṃ dūtaṃ samādiśat ||
kaṇva uvāca |
gaccha tvaṃ pṛcchatāṃ tāṃ kvāgatā kvaca gamiṣyasi |
preṣitastvarito dūto gato nārīsamīpataḥ || 48 ||
[Analyze grammar]

vṛkṣasthāṃ dadṛśo bālāmuvāca nṛpasattama |
mannāthaḥ pṛcchati tvāṃ tu kāsi tvaṃ kva gamiṣyasi || 49 ||
[Analyze grammar]

kanyovāca |
gururātmavatāṃ śāstā rājā śāstā durātmanām |
iha pracchanna pāpānāṃ śāstā vaivasvato yamaḥ || 50 ||
[Analyze grammar]

brahmahatyā ca saṃjātā mṛgarūpadharadvijāt |
mayā yukto'pi te rājā muktastīrthaprabhāvataḥ || 51 ||
[Analyze grammar]

ardhakrośāntarānmadhye brahmahatyā na saṃviśet |
somanāthaprabhāvo'yaṃ vārāṇasyāḥ samaḥ smṛtaḥ || 52 ||
[Analyze grammar]

gaccha tvaṃ preṣyatāṃ rājā śīghramatra na saṃśayaḥ |
gato bhṛtyastataḥ śīghraṃ vepamānaḥ suvihvalaḥ || 53 ||
[Analyze grammar]

samastaṃ kathayāmāsa yadvṛttaṃ hi purātanam |
tasya vākyādasau rājā patito dharaṇītale || 54 ||
[Analyze grammar]

bhṛtya uvāca |
kasmāttvaṃ śocase nātha pūrvopāttaṃ śubhāśubham |
ityākarṇya vacastasya rājā vacanamabravīt || 55 ||
[Analyze grammar]

prāṇatyāgaṃ kariṣyāmi somanāthasamīpataḥ |
śīghramānīyatāṃ vahnirindhanāni bahūni ca || 56 ||
[Analyze grammar]

ānītaṃ tatkṣaṇātsarvaṃ bhṛtyaistadvaśavartibhiḥ |
snānaṃ kṛtvā śubhe toye saṅgame pāpanāśane || 57 ||
[Analyze grammar]

arcitaḥ parayā bhaktyā somanātho mahībhṛtā |
triḥpradakṣiṇataḥ kṛtvā jvalantaṃ jātavedasam || 58 ||
[Analyze grammar]

praviṣṭaḥ kaṇvarājāsau hṛdi dhyātvā janārdanam |
pītāmbaradharaṃ devaṃ jaṭāmukuṭadhāriṇam || 59 ||
[Analyze grammar]

śriyā yuktaṃ suparṇasthaṃ śaṅkhacakragadādharam |
surārisūdanaṃ dadhyau sugatirme bhavatviti || 60 ||
[Analyze grammar]

papāta puṣpavṛṣṭistu sādhu sādhu nṛpātmaja |
āścaryamatulaṃ dṛṣṭvā nirīkṣya ca parasparam || 61 ||
[Analyze grammar]

mṛtaṃ taiḥ pāvake bhṛtyairhṛdi dhyātvā gadādharam |
vimānasthāstataḥ sarve saṃjātāḥ pāṇḍunandana || 62 ||
[Analyze grammar]

niṣpāpāste divaṃ yātāḥ somanāthaprabhāvataḥ |
brāhmaṇe saṅgame tatra dhyāyamāne vṛṣadhvajam || 63 ||
[Analyze grammar]

śrīmārkaṇḍeya uvāca |
somanāthaprabhāvo'yaṃ śṛṇuṣvaikamanā vidhim |
aṣṭamyāṃ vā caturdaśyāṃ sarvakālaṃ raverdine || 64 ||
[Analyze grammar]

viśeṣācchuklapakṣe cetsūryavāreṇa saptamī |
upoṣya yo naro bhaktyā rātrau kurvīta jāgaram || 65 ||
[Analyze grammar]

pañcāmṛtena gavyena snāpayetparameśvaram |
śrīkhaṇḍena tato guṇṭhya puṣpadhūpādikaṃ dadet || 66 ||
[Analyze grammar]

ghṛtena bodhayeddīpaṃ nṛtyaṃ gītaṃ ca kārayet |
somavāre tathāṣṭamyāṃ prabhāte pūjayeddvijān || 67 ||
[Analyze grammar]

jitakrodhānātmavataḥ paranindāvivarjitān |
sarvāṅgarucirāñchastān svadāraparipālakān || 68 ||
[Analyze grammar]

gāyatrīpāṭhamātrāṃśca vikarmaviratān sadā |
punarbhūvṛṣalīśūdrī careyuryasya mandire || 69 ||
[Analyze grammar]

dūrato'sau dvijastyājya ātmanaḥ śreya icchatā |
hīnāṅgānatiriktāṅgān yeṣāṃ pūrvāparaṃ na hi || 70 ||
[Analyze grammar]

vrate śrāddhe tathā dāne dūratastān vivarjayet |
āyasī taruṇī tulyā dvijāḥ svādhyāyavarjitāḥ || 71 ||
[Analyze grammar]

ātmānaṃ saha yājyena pātayanti na saṃśayaḥ |
śālmalīnāvatulyāḥ syuḥ ṣaṭkarmaniratā dvijāḥ || 72 ||
[Analyze grammar]

dātāraṃ ca tathātmānaṃ tārayanti taranti ca |
śrāddhaṃ someśvare pārtha yaḥ kuryādgatamatsaraḥ || 73 ||
[Analyze grammar]

pretāstasya hi suprītā yāvadābhūtasamplavam |
annaṃ vastraṃ hiraṇyaṃ ca yo dadyādagrajanmane || 74 ||
[Analyze grammar]

sa yāti śāṅkare loka iti me satyabhāṣitam |
hayaṃ yo yacchate tatra sampūrṇaṃ taruṇaṃ sitam || 75 ||
[Analyze grammar]

raktaṃ vā pītavarṇaṃ vā sarvalakṣaṇasaṃyutam |
kuṅkumena viliptāṅgāvagrajanmahayāvapi || 76 ||
[Analyze grammar]

sragdāmabhūṣitau kāryau sitavastrāvaguṇṭhitau |
aṅghriḥ pradīyatāṃ skandhe madīye hayamāruha || 77 ||
[Analyze grammar]

ārūḍhe brāhmaṇe brūyādbhāskaraḥ prīyatāmiti |
sa yāti śāṃkaraṃ lokaṃ sarvapāpavivarjitaḥ || 78 ||
[Analyze grammar]

uparāge tu somasya tīrthaṃ gatvā jitendriyaḥ |
satyalokāccyutaścāpi rājā bhavati dhārmikaḥ || 79 ||
[Analyze grammar]

tasya vāsaḥ sadā rājanna naśyati kadācana |
dīrghāyurjāyate putro bhāryā ca vaśavartinī || 80 ||
[Analyze grammar]

jīvedvarṣaśataṃ sāgraṃ sarvaduḥkhavivarjitaḥ |
sopavāso jitakrodho dhenuṃ dadyāddvijanmane || 81 ||
[Analyze grammar]

savatsāṃ kṣīrasaṃyuktāṃ śvetavastrāvalokitām |
śabalāṃ pītavarṇāṃ ca dhūmrāṃ vā nīlakarburām || 82 ||
[Analyze grammar]

kapilāṃ vā savatsāṃ ca ghaṇṭābharaṇabhūṣitām |
rūpyakhurāṃ kāṃsyadohāṃ svarṇaśṛṅgīṃ nareśvara || 83 ||
[Analyze grammar]

śvetayā vardhate vaṃśo raktā saubhāgyavardhinī |
śabalā pītavarṇā ca duḥkhaghnyau saṃprakīrtite || 84 ||
[Analyze grammar]

kapilā nāśayetpāpaṃ saptajanmasamudbhavam |
satyalokamavāpnoti gopradāyī nareśvara || 85 ||
[Analyze grammar]

pakṣānte'tha vyatīpāte vai dhṛtau ravisaṃkrame |
dinakṣaye gajacchāyāṃ grahaṇe bhāskarasya ca || 86 ||
[Analyze grammar]

ye vrajanti mahātmānaḥ saṅgame suradurlabhe |
mṛdāvaguṇṭhayitvā tu cātmānaṃ saṅgame viśet || 87 ||
[Analyze grammar]

hṛdayāntarjale jāpyā prāṇāyāmo'thavā nṛpa |
gāyatrī vaiṣṇavī caiva saurī śaivī yadṛcchayā |
te'pi pāpaiḥ pramucyanta ityevaṃ śaṅkaro'bravīt || 88 ||
[Analyze grammar]

jagatīṃ somanāthasya yastu kuryātpradakṣiṇām |
pradakṣiṇīkṛtā tena saptadvīpā vasuṃdharā || 89 ||
[Analyze grammar]

brahmahatyā surāpānaṃ gurudāraniṣevaṇam |
bhrūṇahā svarṇahartā ca mucyante nātra saṃśayaḥ || 90 ||
[Analyze grammar]

tīrthākhyānamidaṃ puṇyaṃ yaḥ śṛṇoti jitendriyaḥ |
vyādhito mucyate rogī cārogī sukhamāpnuyāt || 91 ||
[Analyze grammar]

yatte saṃdahyate cetaḥ śṛṇu tanme yudhiṣṭhira |
naikāpi nṛpa loke'smin bhrūṇahatyā sudustyajā || 92 ||
[Analyze grammar]

kimu ṣaḍviṃśatiṃ pārtha prāpa yāḥ kṣaṇadākaraḥ |
so'pi tīrthamidaṃ prāpya tapastaptvā suduścaram || 93 ||
[Analyze grammar]

vimuktaḥ sarvapāpebhyaḥ śītaraśmirabhūtsukhī |
śrūyate nṛpa paurāṇī gāthā gītā maharṣibhiḥ || 94 ||
[Analyze grammar]

liṅgaṃ pratiṣṭhitaṃ hyekaṃ daśabhrūṇahanaṃ bhavet |
ato liṅgatrayaṃ somaḥ sthāpayāmāsa bhārata || 95 ||
[Analyze grammar]

revaurisaṃgame hyādyaṃ dvitīyaṃ bhṛgukacchake |
tataḥ siddhiṃ parāṃ prāpya prabhāse tu tṛtīyakam || 96 ||
[Analyze grammar]

iti te kathitaṃ sarvaṃ tīrthamāhātmyamuttamam |
dharmyaṃ yaśasyamāyuṣyaṃ svargyaṃ saṃśuddhikṛnnṛṇām || 97 ||
[Analyze grammar]

putrārthī labhate putrānniṣkāmaḥ svargamāpnuyāt |
mucyate sarvapāpebhyastīrthaṃ kṛtvā paraṃ nṛpa || 98 ||
[Analyze grammar]

etatte sarvamākhyātaṃ somanāthasya yatphalam |
śrutvā putramavāpnoti snātvā cāṣṭau na saṃśayaḥ || 99 ||
[Analyze grammar]