Chapter 54

[English text for this chapter is available]

|  adhyāya || 54 ||
[Analyze grammar]

īśvara uvāca |
tataścānantaraṃ rājā jagāmodvegamuttamam |
kathaṃ yāmi gṛhaṃ tvadya vārāṇasyāmahaṃ punaḥ || 1 ||
[Analyze grammar]

brahmahatyāsamāviṣṭo juhomyagnau kalevaram |
athavā tasya vākyena taṃ gacchāmyāśramaṃ prati || 2 ||
[Analyze grammar]

kathayāmi yathāvṛttaṃ gatvā tasya mahāmuneḥ |
evaṃ saṃcintya rājāsau jagāmāśramasannidhau || 3 ||
[Analyze grammar]

ṛkṣaśṛṅgasya cāsthīni gṛhītvā sa nṛpottamaḥ |
dṛṣṭimārge sthitastasya maharṣerbhāvitātmanaḥ || 4 ||
[Analyze grammar]

dīrghatapā uvāca |
āgaccha svāgataṃ te'stu āsane'tropaviśyatām |
arghaṃ dadāmyahaṃ yena madhuparkaṃ saviṣṭaram || 5 ||
[Analyze grammar]

citrasena uvāca |
arghasyāsya na yogyo'haṃ maharṣe nāsmi bhāṣaṇe |
mṛgamadhyasthito viprastava putro mayā hataḥ || 6 ||
[Analyze grammar]

putraghnaṃ viddhi māṃ vipra tīvradaṇḍena daṇḍaya |
mṛgabhrāntyā hato vipra ṛkṣaśṛṅgo mahātapāḥ || 7 ||
[Analyze grammar]

iti matvā muniśreṣṭha kuru me tvaṃ yathocitam |
mātā tadvacanaṃ śrutvā gṛhānniṣkramya vihvalā || 8 ||
[Analyze grammar]

hā hatāsmītyuvācedaṃ papāta dharaṇītale |
vilalāpa suduḥkhārtā putraśokena pīḍitā || 9 ||
[Analyze grammar]

hā hatā putra putreti karuṇaṃ kurarī yathā |
vilalāpāturā mātā kva gato māṃ vihāya vai |
mukhaṃ darśaya cātmīyaṃ mātaraṃ māṃ hi mānaya || 10 ||
[Analyze grammar]

śrutādhyayanasampannaṃ japahomaparāyaṇam |
āgataṃ tvāṃ gṛhadvāre kadā drakṣyāmi putraka || 11 ||
[Analyze grammar]

lokoktyā śrūyate caitaccandanaṃ kila śītalam |
putragātrapariṣvaṅgaścandanādapi śītalaḥ || 12 ||
[Analyze grammar]

kiṃ candanena pīyūpabindunā kiṃ kimindunā || 13 ||
[Analyze grammar]

putragātrapariṣvaṅgapātraṃ gātraṃ bhavedyadi || 14 ||
[Analyze grammar]

pariṣvajitumicchāmi tvāmahaṃ putra supriya |
pañcatvamanuyāsyāmi tvadvihīnādya duḥkhitā || 15 ||
[Analyze grammar]

evaṃ vilapatī dīnā putraśokena pīḍitā |
mūrchitā vihvalā dīnā nipapāta mahītale || 16 ||
[Analyze grammar]

bhāryāṃ ca patitāṃ dṛṣṭvā putraśokena pīḍitām |
cukopa sa munistatra citrasenāya bhūbhṛte || 17 ||
[Analyze grammar]

dīrghatapā uvāca |
yāhi yāhi mahāpāpa mā mukhaṃ darśayasva me |
kiṃ tvayā ghātito vipro hyakāmācca suto mama || 18 ||
[Analyze grammar]

brahmahatyā bhaviṣyanti bahvyaste vasudhādhipa |
sakuṭumbasya me tvaṃ hi mṛtyureṣa upasthitaḥ || 19 ||
[Analyze grammar]

evamuktvā tato vipro vicintya ca punaḥpunaḥ |
parityajya tadā krodhaṃ munibhāvājjagāda ha || 20 ||
[Analyze grammar]

dīrghatapā uvāca |
udvegaṃ tyaja bho vatsa duruktaṃ gadito mayā |
putraśokābhibhūtena duḥkhataptena mānada || 21 ||
[Analyze grammar]

kiṃ karoti naraḥ prājñaḥ preryamāṇaḥ svakarmabhiḥ |
prāgeva hi manuṣyāṇāṃ buddhiḥ karmānusāriṇī || 22 ||
[Analyze grammar]

anenaiva vidhānena pañcatvaṃ vihitaṃ mama |
hatyāstava bhaviṣyanti pūrvamuktā na saṃśayaḥ || 23 ||
[Analyze grammar]

brahmakṣatraviśāṃ madhye śūdracaṇḍālajātiṣu |
kastvaṃ kathaya satyaṃ me kasmācca nihato dvijaḥ || 24 ||
[Analyze grammar]

citrasena uvāca |
vijñāpayāmi viprarṣe kṣantavyaṃ te mamopari |
nāhaṃ vipro'smi vai tāta na vaiśyo na ca śūdrajaḥ || 25 ||
[Analyze grammar]

na vyādhaścāntyajāto vā kṣatriyo'haṃ mahāmune |
kāśīrājo mṛgān hantumāgato vanamuttamam || 26 ||
[Analyze grammar]

bhrāntyā nipātito hyeṣa mṛgarūpadharo muniḥ |
idānīṃ tava pādānte saṃśritaḥ pātakānvitaḥ || 27 ||
[Analyze grammar]

kiṃ kartavyaṃ mayā vipra upāyaṃ kathayasva me || 28 ||
[Analyze grammar]

dīrghatapā uvāca |
brahmahatyā na śakyetāpyekā nistarituṃ prabho |
daśaikā ca kathaṃ śakyāstāḥ śṛṇuṣva nareśvara || 29 ||
[Analyze grammar]

catvāro me sutā rājan sabhāryā mātṛpūrvakāḥ |
mayā saha na jīvanti ṛkṣaśṛṅgasya kāraṇe || 30 ||
[Analyze grammar]

upāyaṃ śobhanaṃ tāta kathayiṣye śṛṇuṣva tam |
śakro'pi yadi taṃ kartuṃ sukhopāyaṃ nareśvara || 31 ||
[Analyze grammar]

sakuṭumbaṃ samastaṃ māṃ dāhayitvānale nṛpa |
asthīni narmadātoye śūlabhede vinikṣipa || 32 ||
[Analyze grammar]

narmadādakṣiṇe kūle śūlabhedaṃ hi viśrutam |
sarvapāpaharaṃ tīrthaṃ sarvaduḥkhaghnamuttamam || 33 ||
[Analyze grammar]

śucirbhūtvā mamāsthīni tatra tīrthe vinikṣipa |
mokṣyase sarvapāpaistvaṃ mama vākyānna saṃśayaḥ || 34 ||
[Analyze grammar]

rājovāca |
ādeśo dīyatāṃ tāta kariṣyāmi na saṃśayaḥ |
samastaṃ me'sti yatkiṃcidrājyaṃ kośaḥ suhṛtsutāḥ || 35 ||
[Analyze grammar]

tavādhīnaṃ mahāvipra prayacchāmi prasīda me |
parasparaṃ vivadatorvipra rājñostadā nṛpa || 36 ||
[Analyze grammar]

sphuṭitvā hṛdayaṃ śīghraṃ munibhāryā mṛtā tadā |
putraśokasamāviṣṭā nirjīvā patitā kṣitau || 37 ||
[Analyze grammar]

putrāśca mātṛśokena sarve pañcatvamāgatāḥ |
snuṣāścaiva tadā sarvā mṛtāśca saha bhartṛbhiḥ || 38 ||
[Analyze grammar]

pañcatvaṃ ca gatāḥ sarve munimukhyā nṛpottama |
viprānāhvāpayāmāsa ye tatrāśramavāsinaḥ || 39 ||
[Analyze grammar]

tebhyo nivedayāmāsa yathāvṛttaṃ nṛpottamaḥ |
sa taistadābhyanujñātaḥ kāṣṭhānyādāya yatnataḥ || 40 ||
[Analyze grammar]

dāhaṃ saṃcayanaṃ cakre citraseno mahīpatiḥ |
ṛkṣaśṛṅgādisarveṣāṃ gṛhītvāsthīni yatnataḥ || 41 ||
[Analyze grammar]

yāmyāśāṃ prasthito rājā pādacārī mahīpate |
na śaknoti yadā gantuṃ chāyāmāśritya tiṣṭhati || 42 ||
[Analyze grammar]

viśramya ca punargacchedbhārākrānto mahīpatiḥ |
sacailaṃ kurute snānaṃ muktvāsthīni pade pade || 43 ||
[Analyze grammar]

pibejjalaṃ nirāhāraḥ sa gacchan dakṣiṇāmukhaḥ |
acireṇaiva kālena saṃgato narmadātaṭam || 44 ||
[Analyze grammar]

āśramasthān dvijān dṛṣṭvā papraccha pṛthivīpatiḥ || 45 ||
[Analyze grammar]

citrasena uvāca |
kathyatāṃ śūlabhedasya mārgaṃ me dvijasattamāḥ |
yena yāmi mahābhāgāḥ svakāryārthasya siddhaye || 46 ||
[Analyze grammar]

munaya ūcuḥ |
itaḥ krośāntarādarvāktīrthaṃ paramaśobhanam |
narmadādakṣiṇe kūle tato drakṣyasi nānyathā || 47 ||
[Analyze grammar]

ṛṣivākyena rājāsau śīghraṃ gatvā nareśvaraḥ |
sa dadarśa tataḥ śīghraṃ bahudvijasamākulam || 48 ||
[Analyze grammar]

bahudrumalatākīrṇaṃ bahupuṣpopaśobhitam |
ṛkṣasiṃhasamākīrṇaṃ nānāvratadharaiḥ śubhaiḥ || 49 ||
[Analyze grammar]

ekapādāsthitāḥ kecidapare sūryadṛṣṭayaḥ |
ekāṅguṣṭha sthitāḥ kecidūrdhvabāhusthitāḥ pare || 50 ||
[Analyze grammar]

dinaikabhojanāḥ kecitkecitkandaphalāśanāḥ |
trirātrabhojanāḥ kecitparākavratino'pare || 51 ||
[Analyze grammar]

cāndrāyaṇaratāḥ kecitkecitpakṣopavāsinaḥ |
māsopavāsinaḥ kecitkecidṛtvantapāraṇāḥ || 52 ||
[Analyze grammar]

yogābhyāsaratāḥ kecitkeciddhyāyanti tatpadam |
śīrṇaparṇāśinaḥ kecitkecicca kaṭukāśanāḥ || 53 ||
[Analyze grammar]

śaivālabhojanāḥ kecitkecinmārutabhojanāḥ |
gārhasthye ca sthitāḥ kecitkeciccaivāgnihotriṇaḥ || 54 ||
[Analyze grammar]

evaṃvidhān dvijān dṛṣṭvā jānubhyāmavaniṃ gataḥ |
praṇamya śirasā rājanrājā vacanamabravīt || 55 ||
[Analyze grammar]

citrasena uvāca |
kasmindeśe ca tattīrthaṃ satyaṃ kathayata dvijāḥ |
yenābhivāñchitā siddhiḥ saphalā me bhaviṣyati || 56 ||
[Analyze grammar]

ṛṣaya ūcuḥ |
dhanvantaraśataṃ gaccha bhṛgutuṅgasya mūrdhani |
kuṇḍaṃ drakṣyasi tatpūrṇaṃ vistīrṇaṃ payasā śivam || 57 ||
[Analyze grammar]

teṣāṃ tadvacanaṃ śrutvā gataḥ kuṇḍasya sannidhau |
dṛṣṭvā caiva tu tattīrthaṃ bhrāntirjātā nṛpasya vai || 58 ||
[Analyze grammar]

tato vismayamāpannaścintayanvai muhurmuhuḥ |
ākāśasthaṃ dadarśāsau sāmiṣaṃ kuraraṃ nṛpaḥ || 59 ||
[Analyze grammar]

bhramamāṇaṃ gṛhītāhiṃ vadhyamānaṃ nirāmiṣaiḥ |
parasparaṃ ca yuyudhuḥ sarve'pyāmiṣakāṅkṣayā || 60 ||
[Analyze grammar]

hataścañcuprahāreṇa sa tataḥ patito'ṃbhasi |
śūlena śūlinā yatra bhūbhāgo bheditaḥ purā || 61 ||
[Analyze grammar]

tattīrthasya prabhāveṇa sa sadyaḥ puruṣo'bhavat |
vimānasthaṃ dadarśāsau pumāṃsaṃ divyarūpiṇam || 62 ||
[Analyze grammar]

gandharvāpsaraso yakṣāstaṃ yāntaṃ tuṣṭuvurdivi |
apsarogīyamāne tu gate sūryasya mūrdhani |
citrasenastatastasminnāścaryaṃ paramaṃ gataḥ || 63 ||
[Analyze grammar]

ṛṣiṇā kathitaṃ yadvattadvattīrthaṃ na saṃśayaḥ |
hṛṣṭaromābhavaddṛṣṭvā prabhāvaṃ tīrthasambhavam || 64 ||
[Analyze grammar]

mamādya divaso dhanyo yasmādatra samāgataḥ |
asthīni bhūmau nikṣipya snānaṃ kṛtvā yathāvidhi || 65 ||
[Analyze grammar]

tilamiśreṇa toyenātarpayatpitṛdevatāḥ |
gṛhyāsthīni tato rājā cikṣepāntarjale tadā || 66 ||
[Analyze grammar]

kṣaṇamekaṃ tato vīkṣya rājorddhvavadanaḥ sthitaḥ |
tān dadarśa punaḥ sarvān divyarūpadharāñchubhān || 67 ||
[Analyze grammar]

divyavastraiśca saṃvītān divyābharaṇabhūṣitān |
vimānairvividhairdivyairapsarogaṇasevitaiḥ || 68 ||
[Analyze grammar]

pṛthagbhūtāṃśca tān sarvān vimāneṣu vyavasthitān |
utpattivatsamālokya rājā saṃharṣī so'bhavat || 69 ||
[Analyze grammar]

ṛṣirvimānamārūḍhaścitrasenamathābravīt |
bhobhoḥ sādho mahārāja citrasena mahīpate || 70 ||
[Analyze grammar]

tvatprasādānnṛpaśreṣṭha gatirdivyā mamedṛṣī |
jāteyaṃ yattvayā kāryaṃ kṛtaṃ paramaśobhanam || 71 ||
[Analyze grammar]

svasuto'pi na śaknoti pitḥṇāṃ kartumīdṛśam |
madīyavacanāttāta niṣpāpastvaṃ bhaviṣyasi || 72 ||
[Analyze grammar]

phalaṃ prāpsyasi rājendra kāmikaṃ manasepsitam |
āśīrvādāṃstato dattvā citrasenāya dhīmate |
svargaṃ jagāma sasutastato dīrghatapā muniḥ || 73 ||
[Analyze grammar]