Chapter 33

[English text for this chapter is available]

| adhyāya || 33 ||
[Analyze grammar]

śrīmārkaṇḍeya uvāca |
tato gacchettu rājendra agnitīrthamanuttamam |
yatra saṃnihito hyagnirgataḥ kāmena mohitaḥ || 1 ||
[Analyze grammar]

yudhiṣṭhira uvāca |
kathaṃ devo jagaddhātā kāmena kaluṣīkṛtaḥ |
kathaṃ ca nityadā vāsa ekasthāneṣu jāyate || 2 ||
[Analyze grammar]

etattvāścaryamatulaṃ sarvalokeṣvanuttamam |
kathayasva mahābhāga paraṃ kautūhalaṃ mama || 3 ||
[Analyze grammar]

śrīmārkaṇḍeya uvāca |
sādhu sādhu mahāprājña pṛṣṭaḥ praśnastvayānagha |
kathayāmi yathāpūrvaṃ śrutametanmaheśvarāt || 4 ||
[Analyze grammar]

āsītkṛtayuge rājā nāmnā duryodhano mahān |
hastyaśvarathasampūrṇo medinīparipālakaḥ || 5 ||
[Analyze grammar]

rūpayauvanasampannaṃ dṛṣṭvā taṃ pṛthivīpatim |
divyopabhogasampannaṃ prārthayāmāsa narmadā || 6 ||
[Analyze grammar]

sa tu tāṃ cakame kanyāṃ tyaktvā'nyaṃ pramadājanam |
mudā paramayā yukto māhiṣmatyāḥ patirnṛpa || 7 ||
[Analyze grammar]

ramate sa tayā sārddhaṃ kāle vai nṛpasattama |
narmadā janayāmāsa kanyāṃ padmadalekṣaṇām || 8 ||
[Analyze grammar]

aṅgapratyaṅgasampannā yasmāllokeṣu viśrutā |
tasyāṃ pitā ca mātā ca cakratuḥ premabandhanam || 9 ||
[Analyze grammar]

kālenātisudīrgheṇa yauvanasthā varāṅganā |
prārthyamānāpi rājanvai nātmānaṃ dātumicchati || 10 ||
[Analyze grammar]

tato'nyadivase vahnirdvijarūpo mahātapāḥ |
rājānaṃ prārthayāmāsa raho gatvā śanaiḥ śanaiḥ || 11 ||
[Analyze grammar]

bhobho raghukulaśreṣṭha dvijo'haṃ mandasantatiḥ |
daridro hyasahāyaśca bhāryārthe varayāmi tām || 12 ||
[Analyze grammar]

kanyā sudarśanā nāma rūpeṇāpratimā bhuvi |
tāṃ dadasva mahābhāga vardhate tava mandire || 13 ||
[Analyze grammar]

brahmacaryeṇa nirviṇṇa ekākī kāmapīḍitaḥ |
yācamānasya me tāta prasādaṃ kartumarhasi || 14 ||
[Analyze grammar]

rājovāca |
nāhaṃ dravyavihīnasya asavarṇasya karhicit |
dāsyāmi svāṃ sutāṃ śubhrāṃ gamyatāṃ dvijapuṃgava || 15 ||
[Analyze grammar]

evamuktastadā vahniḥ parāṃ pīḍāmupāgataḥ |
na kiṃciduktvā rājānaṃ tatraivāntaradhīyata || 16 ||
[Analyze grammar]

gate cādarśanaṃ vipre rājā mantripurohitaiḥ |
mantrayitvātha kāle tu tuṣṭo makhamukhe sthitaḥ || 17 ||
[Analyze grammar]

yajataśca makhe bhaktyā brāhmaṇaiḥ saha bhārata |
tataścādarśanaṃ vahniḥ sarveṣāṃ paśyatāmagāt || 18 ||
[Analyze grammar]

viprā durmanaso bhūtvā gatā rājño hi mandiram |
vahnināśaṃ vimanaso rājānamidamabruvan || 19 ||
[Analyze grammar]

brāhmaṇā ūcuḥ |
duryodhana mahārāja śrūyatāṃ mahadadbhutam |
na śrutaṃ na ca dṛṣṭaṃ vā kautukaṃ nṛpapuṃgava || 20 ||
[Analyze grammar]

agnikāryapravṛttānāṃ sarveṣāṃ vidhivannṛpa |
kenāpi hetunā vahnirdṛśyate na jvalatyuta || 21 ||
[Analyze grammar]

tacchrutvā vipriyaṃ ghoraṃ rājā vipramukhāccyutam |
āsanātpatito bhūmau chinnamūla iva drumaḥ || 22 ||
[Analyze grammar]

āśvasya ca muhūrtena unmatta iva saṃstadā |
nirīkṣya ca diśaḥ sarvā idaṃ vacanamabravīt || 23 ||
[Analyze grammar]

kimetadāścaryaparamiti bhobho dvijottamāḥ |
kathyatāṃ kāraṇaṃ sarvaṃ śāstradṛṣṭyā vibhāvya ca || 24 ||
[Analyze grammar]

mama vā duṣkṛtaṃ kiṃcidutāho bhavatāmiha |
yena naṣṭo'gniśālāyāṃ hutabhukkena hetunā || 25 ||
[Analyze grammar]

mantracchidramathānyadvā naiva kiṃcidadakṣiṇam |
kriyāhīnaṃ kṛtaṃ vātha kena vahnirna dṛśyate || 26 ||
[Analyze grammar]

annahīno dahedrāṣṭraṃ mantrahīnastu ṛtvijaḥ |
dātāraṃ dakṣiṇāhīno nāsti yajñasamo ripuḥ || 27 ||
[Analyze grammar]

brāhmaṇā ūcuḥ |
na mantrahīnā hi vayaṃ na ca rājanvrataistathā |
dravyeṇa ca na hīnastvamanyatpāpaṃ vicintyatām || 28 ||
[Analyze grammar]

rājovāca |
tathāpi yūyaṃ sahitā upāyaṃ cintayantviti |
yena śreyo bhavennityamiha loke paratra ca || 29 ||
[Analyze grammar]

evamuktāstataḥ sarve brāhmaṇāḥ kṛtaniścayāḥ |
nirāhārāḥ sthitāḥ śarve yatra naṣṭo hutāśanaḥ || 30 ||
[Analyze grammar]

tataḥ svapne mahātejā hutabhugbrāhmaṇāṃstadā |
uvāca śrūyatāṃ sarvairmama nāśasya kāraṇam || 31 ||
[Analyze grammar]

prārthito'yaṃ mayā rājā sutāṃ dātuṃ na cecchati |
tena naṣṭo'gniśaraṇādahaṃ bho dvijasattamāḥ || 32 ||
[Analyze grammar]

yadi me svasutāṃ rājā dadāti paramārcitām |
tadāsya jvalamāno'haṃ gṛhe tiṣṭhāmi nānyathā || 33 ||
[Analyze grammar]

tacchrutvā vacanaṃ viprā vaiśvānaramukhodgatam |
vismayotphullanayanā rājānamidamabruvan || 34 ||
[Analyze grammar]

bhavato matamājñāya sarve gatvāgnimandiram |
nirāhārāḥ sthitā rātrau paśyāmo jātavedasam || 35 ||
[Analyze grammar]

tenoktāḥ svasutāṃ cettu rājā me dātumicchati |
tato'sya bhūyo'pi gṛhe jvale'haṃ nānyathā dvijāḥ || 36 ||
[Analyze grammar]

evaṃ jñātvā mahārāja svasutāṃ dātumarhasi || 37 ||
[Analyze grammar]

rājovāca |
bhavatāṃ tasya vā kāryaṃ devasya vacanaṃ hṛdi |
samayaṃ kartumicchāmi kanyādāne hyanuttamam || 38 ||
[Analyze grammar]

mama saṃnihito nityaṃ gṛhe tiṣṭhatu pāvakaḥ |
dadāmi rucirāpāṅgīṃ nānyathā karavāṇi vai || 39 ||
[Analyze grammar]

evaṃ te brāhmaṇāḥ śrutvā tathāgniṃ prāpya satvaram |
kathayitvā vivāhena yojayāmāsurāśu vai || 40 ||
[Analyze grammar]

sudarśanāyā lābhena parituṣṭo hutāśanaḥ |
jvalate sannidhau nityaṃ māhiṣmatyāṃ yudhiṣṭhira || 41 ||
[Analyze grammar]

tataḥ prabhṛti tattīrthamagnitīrthaṃ pracakṣate |
ye tatra pakṣasandhau tu snānadānaistu bhāvitāḥ || 42 ||
[Analyze grammar]

tarpayanti pitṝn devāṃste'śvamedhaphalairyutāḥ |
suvarṇaṃ ye prayacchanti tasmiṃstīrthe narādhipa || 43 ||
[Analyze grammar]

pṛthvīdānaphalaṃ tatra jāyate nātra saṃśayaḥ |
anāśakaṃ tu yaḥ kuryāttasmiṃstīrthe narādhipa || 44 ||
[Analyze grammar]

sa mṛto hyagniloke tu krīḍate surapūjitaḥ |
eṣa te hyagnitīrthasya sambhavaḥ kathito mayā || 45 ||
[Analyze grammar]

sarvapāpaharaḥ puṇyaḥ śrutamātro narottama |
dhanyaḥ pāpaharo nityamityevaṃ śaṅkaro'bravīt || 46 ||
[Analyze grammar]