Chapter 19

[English text for this chapter is available]

adhyāya || 19 ||
[Analyze grammar]

śrīmārkaṇḍeya uvāca |
tatastvekārṇave tasminmumūrṣurahamāturaḥ |
kākūcchvāsastaraṃstoyaṃ bāhubhyāṃ nṛpasattama || 1 ||
[Analyze grammar]

śṛṇomyarṇavamadhyastho niḥśabdastimite tadā |
ambhoravamanaupamyaṃ diśo daśa vinādinam || 2 ||
[Analyze grammar]

haṃsakudendusaṃkāśāṃ hāragokṣīrapāṇḍurām |
nānāratnavicitrāṅgīṃ svarṇaśṛṅgāṃ manoramām || 3 ||
[Analyze grammar]

suraiḥ pravālakamayairlāṅguladhvajaśobhitām |
pralambaghoṇāṃ nardantīṃ khurairarṇavagāhinīm || 4 ||
[Analyze grammar]

gāṃ dadarśāhamudvigno māmevābhimukhīṃ sthitām |
kiṃkiṇījālamuktābhiḥ svarṇaghaṇṭāsamāvṛtām || 5 ||
[Analyze grammar]

tasyāścaraṇavikṣepaiḥ sarvamekārṇavaṃ jalam |
vikṣiptaphenapuñjaughairnṛtyantīva samaṃ tataḥ || 6 ||
[Analyze grammar]

rarāsa salilotkṣepaiḥ kṣobhayantī mahārṇavam |
sā māmāha mahābhāga ślakṣṇagambhīrayā girā || 7 ||
[Analyze grammar]

mā bhaiṣīrvatsa vatseti mṛtyustava na vidyate |
mahādevaprasādena na mṛtyuste mamāpi ca || 8 ||
[Analyze grammar]

mamāśrayasva lāṅgūlaṃ tvāmatastārayāmyaham |
ghorādasmādbhayādvipra yāvatsaṃplavate jagat || 9 ||
[Analyze grammar]

kṣuttṛṣāpratighātārthaṃ stanau me tvaṃ pibasva ha |
payo'mṛtāśrayaṃ divyaṃ tatpītvā nirvṛto bhava || 10 ||
[Analyze grammar]

tasyāstadvacanaṃ śrutvā harṣātpīto mayā stanaḥ |
na kṣuttṛṣā pītamātre stane mahyaṃ tadābhavat || 11 ||
[Analyze grammar]

divyaṃ prāṇabalaṃ jajñe samudraplavanakṣamam |
tatastāṃ pratyuvācedaṃ kā tvamekārṇavīkṛte || 12 ||
[Analyze grammar]

bhramase brūhi tattvena vismayo me mahānhṛdi |
bhramato'tra mamārtasya mumūrṣoḥ prahatasya || 13 ||
[Analyze grammar]

tvaṃ hi me śaraṇaṃ jātā bhāgyaśeṣeṇa suvrate || 14 ||
[Analyze grammar]

gauruvāca |
kimahaṃ vismṛtā tubhyaṃ viśvarūpā maheśvarī |
narmadā dharmadā nḥṇāṃ svargaśarmabalapradā || 15 ||
[Analyze grammar]

dṛṣṭvā tvāṃ sīdamānaṃ tu rudreṇāhaṃ visarjitā |
taṃ dvijaṃ tārayasvārye mā prāṇāṃstyajatāṃ jale || 16 ||
[Analyze grammar]

gorūpeṇa vibhorvākyāttvatsakāśamihāgatā |
mā mṛṣāvacanaḥ śambhurbhavediti ca satvarā || 17 ||
[Analyze grammar]

evamuktastayāhaṃ tu indrāyudhanibhaṃ śubham |
lāṅgūlamavyayaṃ jñātvā bhujābhyāmavalambitaḥ || 18 ||
[Analyze grammar]

tato'taraṃ taṃ jaladhiṃ lāṅgūladhvajamāśritaḥ |
asau devo mahādeva iti māṃ pratyabhāṣata || 19 ||
[Analyze grammar]

tato yugasahasrāntamahaṃ kālaṃ tayā saha |
vyacaraṃ vai tamobhūte sarvataḥ salilāvṛte || 20 ||
[Analyze grammar]

mahārṇave tatastasmin bhramangoḥ pucchamāśritaḥ |
nirvāte cāndhakāre ca nirāloke nirāmaye || 21 ||
[Analyze grammar]

akasmātsalile tasminnatasīpuṣpasannibham |
vibhinnāṃjanasaṅkāśamākāśamiva nirmalam || 22 ||
[Analyze grammar]

nīlotpaladalaśyāmaṃ pītavāsasamavyayam |
kirīṭenārkavarṇena vidyudvidyotakāriṇā || 23 ||
[Analyze grammar]

bhrājamānena śirasā khamivātyantarūpiṇam |
kuṇḍaloddhaṣṭagallaṃ tu hāroddyotitavakṣasam || 24 ||
[Analyze grammar]

jāmbūnadamayairdivyairbhūṣaṇairupaśobhitam |
nāgopadhānaśayanaṃ sahasrādityavarcasam || 25 ||
[Analyze grammar]

anekabāhūrudharaṃ naikavaktraṃ manoramam |
suptamekārṇave vīraṃ sahasrākṣaśirodharam || 26 ||
[Analyze grammar]

jaṭājūṭena mahatā sphuradvidyutsamārciṣā |
ekārṇavaṃ jagatsarvaṃ vyāpya devaṃ vyavasthitam || 27 ||
[Analyze grammar]

grasitvā śaṅkaraḥ sarvaṃ sadevāsuramānavam |
prapaśyāmyahamīśānaṃ suptamekārṇave prabhum || 28 ||
[Analyze grammar]

sarvavyāpinamavyaktamanantaṃ viśvatomukham |
tasya pādatalābhyāśe svarṇakeyūramaṇḍitām || 29 ||
[Analyze grammar]

viśvarūpāṃ mahābhāgāṃ viśvamāyāvadhāriṇīm |
śrīmayīṃ hrīmayīṃ devīṃ dhīmayīṃ vāṅmayīṃ śivām || 30 ||
[Analyze grammar]

siddhiṃ kīrtiṃ ratiṃ brāhmīṃ kālarātrimayonijām |
tāmevāhaṃ tadātyantamīśvarāntikamāsthitām || 31 ||
[Analyze grammar]

adrākṣaṃ candravadanāṃ dhṛtiṃ sarveśvarīmumām || 32 ||
[Analyze grammar]

śāntaṃ prasuptaṃ navahemavarṇamumāsahāyaṃ bhagavantamīśam |
tamovṛtaṃ puṇyatamaṃ variṣṭhaṃ pradakṣiṇīkṛtya namaskaromi || 33 ||
[Analyze grammar]

tataḥ prasuptaḥ sahasā vibuddho rātrikṣaye devavaraḥ svabhāvāt |
vikṣobhayan bāhubhirarṇavāmbho jagatpraṇaṣṭaṃ salile vimṛśya || 34 ||
[Analyze grammar]

kiṃ kāryamityeva vicintayitvā vārāharūpo'bhavadadbhutāṅgaḥ |
mahāghanāmbhodharatulyavarcāḥ pralambamālāmbaraniṣkamālī || 35 ||
[Analyze grammar]

saśaṅkhacakrāsidharaḥ kirīṭī savedavedāṅgamayo mahātmā |
trailokyanirmāṇakaraḥ purāṇo devatrayīrūpadharaśca kārye || 36 ||
[Analyze grammar]

sa eva rudraḥ sa jagajjahāra sṛṣṭyarthamīśaḥ prapitāmaho'bhūt |
saṃrakṣaṇārthaṃ jagataḥ sa eva hariḥ sucakrāsigadābjapāṇiḥ || 37 ||
[Analyze grammar]

teṣāṃ vibhāgo na hi kartumarho mahātmanāmekaśarīrabhājām |
mīmāṃsāhetvarthaviśeṣatarkairyasteṣu kuryātpravibhedamajñaḥ || 38 ||
[Analyze grammar]

sa yāti ghoraṃ narakaṃ krameṇa vibhāgakṛddveṣamatirdurātmā |
yā yasya bhaktiḥ sa tayaiva nūnaṃ dehaṃ tyajan svaṃ hyamṛtatvameti || 39 ||
[Analyze grammar]

saṃmohayanmūrtibhiratra lokaṃ sraṣṭā ca goptā kṣayakṛtsa devaḥ |
tasmānna mohātmakamāviśeta dveṣaṃ na kuryātpravibhinnamūrtiḥ || 40 ||
[Analyze grammar]

vārāhamīśānavaro'pyato'sau rūpaṃ samāsthāya jagadvidhātā |
naṣṭe triloke'rṇavatoyamagne vimārgitoyaughamaye'ntarātmā || 41 ||
[Analyze grammar]

bhittvārṇavaṃ toyamathāntarasthaṃ viveśa pātālatalaṃ kṣaṇena |
jale nimagnāṃ dharaṇīṃ samastāṃ samaspṛśatpaṅkajapatranetrām || 42 ||
[Analyze grammar]

viśīrṇaśailopalaśṛṅgakūṭāṃ vasuṃdharāṃ tāṃ pralaye pralīnām |
daṃṣṭraikayā viṣṇuratulyasāhasaḥ samuddadhāra svayameva devaḥ || 43 ||
[Analyze grammar]

sā tasya daṃṣṭrāgravilambitāṅgī kailāsaśṛṅgāgragateva jyotsnā |
vibhrājate sāpyasamānamūrtiḥ śaśāṅkaśṛṅge ca taḍidvilagnā || 44 ||
[Analyze grammar]

tāmujjahārārṇavatoyamagnāṃ karī nimagnāmiva hastinīṃ haṭhāt |
nāvaṃ viśīrṇāmiva toyamadhyādudīrṇasattvo'nupamaprabhāvaḥ || 45 ||
[Analyze grammar]

sa tāṃ samuttārya mahājalaughātsamudramāryo vyabhajatsamastam |
mahārṇaveṣveva mahārṇavāmbho nikṣepayāmāsa punarnadīṣu || 46 ||
[Analyze grammar]

śīrṇāṃśca śailānsa cakāra bhūyo dvīpānsamastāṃśca tathārṇavāṃśca |
śailopalairye vicitāḥ samantācchiloccayāṃstānsa cakāra kalpe || 47 ||
[Analyze grammar]

anekarūpaṃ pravibhajya dehaṃ cakāra devendragaṇānsamastān |
mukhācca vahnirmanasaśca candraścakṣośca sūryaḥ sahasā babhūva || 48 ||
[Analyze grammar]

jajñe'tha tasyeśvarayogamūrteḥ pradhyāyamānasya surendrasaṅghaḥ |
vedāśca yajñāśca tathaiva varṇāstathā hi sarvauṣadhayo rasāśca || 49 ||
[Analyze grammar]

jagatsamastaṃ manasā babhūva yatsthāvaraṃ kiṃcidihāṇḍajaṃ vā |
jarāyujaṃ svedajamudbhijjaṃ vā yatkiṃcidā kīṭapipīlakādyam || 50 ||
[Analyze grammar]

tato vijajñe manasā kṣaṇena anekarūpāḥ sahasā maheśā |
cakāra yanmūrtibhiravyayātmā aṣṭābhirāviśya punaḥ sa tatra || 51 ||
[Analyze grammar]

līlāṃ cakārātha samṛddhatejā ato'tra me paśyata eva viprāḥ |
teṣāṃ mayā darśanameva sarvaṃ yāvanmuhūrtātsamakāri bhūpa || 52 ||
[Analyze grammar]

kṛtvā tvaśeṣaṃ kila līlayaiva sa devadevo jagatāṃ vidhātā |
sarvatradṛksarvaga eva devo jagāma cādarśanamādikartā || 53 ||
[Analyze grammar]

yattanmuhūrtādiha nāmarūpaṃ tāvatprapaśyāmi jagattathaiva |
dvīpaiḥ samudrairabhisaṃvṛtaṃ hi nakṣatratārādivimānakīrṇam || 54 ||
[Analyze grammar]

viyatpayodagrahacakracitraṃ nānāvidhaiḥ prāṇigaṇairvṛtaṃ ca |
tāṃ vai na paśyāmi mahānubhāvāṃ gorūpiṇīṃ sarvasureśvarīṃ ca || 55 ||
[Analyze grammar]

kva sāṃprataṃ seti vicintya rājanvibhrāntacittastvabhavaṃ tadaiva |
diśo vibhāgānavalokayānṛte punastāṃ kathamīśvarāṅgīm || 56 ||
[Analyze grammar]

paśyāmi tāmatra punaśca śubhrāṃ mahābhranīlāṃ śuciśubhratoyām |
vṛkṣairanekairupaśobhitāṅgīṃ gajaisturaṅgairvihagairvṛtāṃ ca || 57 ||
[Analyze grammar]

yathā purātīramupetya devyāḥ samāsthitaścāpyamarakaṇṭake tu |
tathaiva paśyāmi sukhopaviṣṭa ātmānamavyagramavāptasaukhyam || 58 ||
[Analyze grammar]

tathaiva puṇyā malatoyavāhāṃ dṛṣṭvā punaḥ kalpaparikṣaye'pi |
ambāmivāryāmanukampamānāmakṣīṇatoyāṃ virujāṃ viśokaḥ || 59 ||
[Analyze grammar]

evaṃ mahatpuṇyatamaṃ ca kalpaṃ paṭhanti śṛṇvanti ca ye dvijendrāḥ |
mahāvarāhasya maheśvarasya dine dine te vimalā bhavanti || 60 ||
[Analyze grammar]

aśubhaśatasahasraṃ te vidhūya prapannāstridivamamarajuṣṭaṃ siddhagandharvayuktam |
vimalaśaśinibhābhiḥ sarva evāpsarobhiḥ saha vividhavilāsaiḥ svargasaukhyaṃ labhante || 61 ||
[Analyze grammar]