Chapter 11

[English text for this chapter is available]

| adhyāya || 11 ||
[Analyze grammar]

yudhiṣṭhira uvāca |
aho mahatpuṇyatamā viśiṣṭā kṣayaṃ na yātā iha yā yugānte |
tasmātsadā sevyatamā munīndrairdhyānārcanasnānaparāyaṇaiśca || 1 ||
[Analyze grammar]

yāmāśritya gatā mokṣamṛṣayo dharmavatsalāḥ |
ye tvayoktāstu niyamā ṛṣīṇāṃ vedanirmitāḥ || 2 ||
[Analyze grammar]

mokṣāvāptirbhavedyeṣāṃ niyamaiśca pṛthagvidhaiḥ |
daśadvādaśabhirvāpi ṣaḍbhiraṣṭābhireva vā || 3 ||
[Analyze grammar]

tribhistathā caturbhirvā varṣairmāsaistathaiva ca |
mucyante kalidoṣaiste deveśānasamarcanāt || 4 ||
[Analyze grammar]

brahmāṇaṃ vā suraśreṣṭha keśavaṃ vā jagadgurum |
arcayanpāpamakhilaṃ jahātyeva na saṃśayaḥ || 5 ||
[Analyze grammar]

etadvistarataḥ sarvaṃ kathayasva mamānagha |
yasminsaṃsāragahane nimagnāḥ sarvajantavaḥ |
te kathaṃ tridivaṃ prāptā iti me saṃśayo vada || 6 ||
[Analyze grammar]

śrīmārkaṇḍeya uvāca |
janmāntarairanekaistu mānuṣyamupalabhyate |
bhaktirutpadyate cātra kathaṃcidapi śaṅkare || 7 ||
[Analyze grammar]

tīrthadānopavāsānāṃ yajñairdevadvijārcanaiḥ |
avāptirjāyate puṃsāṃ śraddhayā parayā nṛpa || 8 ||
[Analyze grammar]

tasmācchraddhā prakartavyā mānavairdharmavatsalaiḥ |
īśo'pi śraddhayā sādhyastena śraddhā viśiṣyate || 9 ||
[Analyze grammar]

anyathā niṣphalaṃ sarvaṃ śraddhāhīnaṃ tu bhārata |
tasmātsamāśrayedbhaktiṃ rudrasya parameṣṭhinaḥ || 10 ||
[Analyze grammar]

teṣāṃhi saphalaṃ janma yeṣāṃ bhaktiracañcalā |
sā caiva trividhā bhaktiḥ sāttvikī rājasī tathā || 11 ||
[Analyze grammar]

tāmasī sarvalokasya trividhaṃ ca phalaṃ labhet |
te karmaphalasaṃyogādāvartante punaḥpunaḥ || 12 ||
[Analyze grammar]

janmāntaraśataisteṣāṃ jñānināṃ devayājinām |
devatraye bhavedbhaktiḥ kṣayātpāpasya karmaṇaḥ || 13 ||
[Analyze grammar]

īśānāttu punarmokṣo jāyate chinnasaṃśayaḥ |
ye punarnarmadātīramāśritya dvijapuṃgavāḥ || 14 ||
[Analyze grammar]

trayīmārgamasandigdhāste yānti paramāṃ gatim |
ekāgramanaso ye tu śaṅkaraṃ śivamavyayam || 15 ||
[Analyze grammar]

arcayantīha niratāḥ kṣipraṃ sidhyanti te janāḥ |
kālena mahatā siddhirjāyate'nyatra dehinām || 16 ||
[Analyze grammar]

narmadāyāḥ punastīre kṣipraṃ siddhiravāpyate |
ṣaḍbhirvarṣaistu sidhyanti ye tu sāṃkhyavido janāḥ || 17 ||
[Analyze grammar]

vaiṣṇavā jñānasampannāste'pi sidhyanti cāgrataḥ |
sarvayogavido ye ca samudramiva sindhavaḥ || 18 ||
[Analyze grammar]

ekībhavanti kalpānte yoge māheśvare gatāḥ |
sarveṣāmeva yogānāṃ yogo māheśvaro varaḥ || 19 ||
[Analyze grammar]

tamāsādya vimucyante ye'pi syuḥ pāpayonayaḥ |
śivamarcya nadīkūle jāyante te na yoniṣu || 20 ||
[Analyze grammar]

gatireṣā durārohā sarvapāpakṣayaṃkarī |
mucyante maṅkṣu saṃsārādrevāmāśritya jantavaḥ || 21 ||
[Analyze grammar]

tasmātsnāyī bhavennityaṃ tathā bhasmavilepanaḥ |
narmadātīramāsādya kṣipraṃ siddhimavāpnuyāt || 22 ||
[Analyze grammar]

trikālaṃ pūjayecchānto yo naro liṅgamādarāt |
sarvarogavinirmuktaḥ sa yāti paramāṃ gatim || 23 ||
[Analyze grammar]

ṣaḍbhiḥ sidhyati masaistu yadyapi syātsa pāpakṛt |
ye punaḥ śuddhamanaso māsaiḥ śudhyanti te tribhiḥ || 24 ||
[Analyze grammar]

yathā dinakaraspṛṣṭaṃ himaṃ śailādviśīryante |
tadvadvilīyate pāpaṃ spṛṣṭaṃ bhasmakaṇaiḥ śubhaiḥ || 25 ||
[Analyze grammar]

vainateyabhayatrastā yathā naśyanti pannagāḥ |
tadvatpāpāni naśyanti bhasmanābhyukṣitāni ha || 26 ||
[Analyze grammar]

narmadātoyapūtena bhasmanoddhūlayanti ye |
sadyaste pāpasaṅghācca mucyante nātra saṃśayaḥ || 27 ||
[Analyze grammar]

vrataṃ pāśupataṃ bhaktayā yathoktaṃ pālayanti ye |
śūdrānnena vihīnāstu te yānti paramāṃ gatim || 28 ||
[Analyze grammar]

amṛtaṃ brāhmaṇasyānnaṃ kṣatriyānnaṃ payaḥ smṛtam |
vaiśyānnamannameva syācchūdrānnaṃ rudhiraṃ smṛtam || 29 ||
[Analyze grammar]

śūdrānnarasasaṃpuṣṭā ye mriyante dvijottamāḥ |
te tapojñānahīnāstu kākā gṛdhrā bhavanti te || 30 ||
[Analyze grammar]

duṣkṛtaṃ hi manuṣyāṇāmannamāśritya tiṣṭhati |
yo yasyānnaṃ samaśnāti sa tasyāśnāti kilbiṣam || 31 ||
[Analyze grammar]

viśeṣādyatidharmeṇa tapolaulyaṃ samāśritāḥ |
narakaṃ yāntyasandigdhamityevaṃ śaṅkaro'bravīt || 32 ||
[Analyze grammar]

īdṛgrūpāśca ye viprāḥ pāśupatye vyavasthitāḥ |
te mahatpāpasaṃghātaṃ dahantyeva na saṃśayaḥ || 33 ||
[Analyze grammar]

viḍambena ca saṃyuktā laulupyena ca pīḍitāḥ |
asaṃgrāhyā ityevaṃ śrutinodanā || 34 ||
[Analyze grammar]

mātāpitṛkṛtairdoṣairanye kecitsvakarmajaiḥ |
naṣṭā jñānāvalepena ahaṅkāreṇa'pare || 35 ||
[Analyze grammar]

śāṅkare prasthitā dharme ye smṛtyarthabahiṣkṛtāḥ |
kliśyamānāstu kalena te yānti paramāṃ gatim || 36 ||
[Analyze grammar]

aśraddadhānāḥ puruṣā mūrkhā dambhavivardhitāḥ |
na sidhyanti durātmānaḥ kudṛṣṭāntārthakīrtanāḥ || 37 ||
[Analyze grammar]

mahābhāgye'pi tīrthasya śāṅkaraṃ vratamāsthitāḥ |
viyoniṃ yāntyasandigdhaṃ laulupyena samanvitāḥ || 38 ||
[Analyze grammar]

na tīrthairna ca dānaiśca duṣkṛtaṃ hi vilupyate |
ajñānācca pramādācca kṛtaṃ pāpaṃ vinaśyati || 39 ||
[Analyze grammar]

evaṃ jñātvā tu vidhinā vartitavyaṃ dvijātibhiḥ |
paraṃ brahma japadbhiśca vārtitavyaṃ muhurmuhuḥ || 40 ||
[Analyze grammar]

ūrdhvarūpaṃ virūpākṣaṃ yo'dhīte rudrameva ca |
īśānaṃ paśyate sākṣātṣaṇmāsātsaṅgavarjitaḥ || 41 ||
[Analyze grammar]

saṃhitāyā daśāvṛttīryaḥ karoti susaṃyataḥ |
narmadātaṭamāśritya sa mucyetsarvapātakaiḥ || 42 ||
[Analyze grammar]

purāṇasaṃhitāṃ vāpi śaivīṃ vā vaiṣṇavīmapi |
yaḥ paṭhennarmadātīre śivāgre sa śivātmakaḥ || 43 ||
[Analyze grammar]

ā bhūtasaṃkṣayaṃ yāvatsvargaloke mahīyate |
saṃsākhyasanaṃ hātuṃ purā proktaṃ tu nandinā || 44 ||
[Analyze grammar]

devarṣisiddhagandharvasamavāye śivālaye |
nandigītāmimāṃ rājañchṛṇuṣvaikamanāḥ śubhām || 45 ||
[Analyze grammar]

svargamokṣapradāṃ puṇyāṃ saṃsārabhayanāśinīm || 46 ||
[Analyze grammar]

saṃsāragahvaraguhāṃ pravihātumetāṃ cedicchatha pratipadaṃ bhavatāpakhinnāḥ |
nānāvidhairnijakṛtairbahukarmapāśairbaddhāḥ sukhāya śṛṇutaikahitaṃ mayoktam || 47 ||
[Analyze grammar]

śakra vakragatiṃ mā gā mā kṛthā yama yātanām |
cetaḥ pracetaḥ śamaya laulupyaṃ tyaja vittapa || 48 ||
[Analyze grammar]

dīnānāthaviśiṣṭebhyo dhanaṃ sarvaṃ parityaja |
yadi saṃsārajaladhervīcīpreṅkhollanāturaḥ || 49 ||
[Analyze grammar]

janmodvignaṃ mṛtestrastaṃ grastaṃ kāmādibhirnaram |
srastaṃ yo na yamādibhyaḥ pinākī pāti pāvanaḥ || 50 ||
[Analyze grammar]

mā dhehi garvaṃ kīnāśa hāsyaṃ yāsyasi pīḍayan |
prāṇinaṃ sarvaśaraṇaṃ tadbhāvi śaraṇaṃ tava || 51 ||
[Analyze grammar]

kālaḥ karālako bālaḥ ko mṛtyuḥ ko yamādhamaḥ |
śivaviṣṇuparāṇāṃ hi narāṇāṃ kiṃ bhayaṃ bhavet || 52 ||
[Analyze grammar]

bhavabhārārtajantūnāṃ revātīranivāsinām |
bhargaśca bhagavāṃścaiva bhavabhītivibhedanau || 53 ||
[Analyze grammar]

śivaṃ bhaja śivaṃ dhyāya śivaṃ stuhi śivaṃ yaja |
śivaṃ nama varāka tvaṃ jñānaṃ mokṣaṃ yadīcchasi || 54 ||
[Analyze grammar]

paṭha pañcānanaṃ śāstraṃ mantraṃ pañcākṣaraṃ japa |
dhehi pañcātmakaṃ tattvaṃ yaja pañcānanaṃ param || 55 ||
[Analyze grammar]

kiṃ taiḥ karmagaṇaiḥ śocyairnānābhāvaviśeṣitaiḥ |
yadi pañcānanaḥ śrīmān sevyate sarvathā śivaḥ || 56 ||
[Analyze grammar]

kiṃ saṃsāragajonmattabṛṃhitairnibhṛtairapi |
yadi pañcānano devo bhāvagandhopasevitaḥ || 57 ||
[Analyze grammar]

re mūḍha kiṃ viṣādena prāpya karmakadarthanām |
bhavānīvallabhaṃ bhīmaṃ japa tvaṃ bhayanāśanam || 58 ||
[Analyze grammar]

narmadātīranilayaṃ duḥkhaughavilayaṃkaram |
svargamokṣapradaṃ bhargaṃ bhaja mūḍha sureśvaram || 59 ||
[Analyze grammar]

vihāya revāṃ surasindhusevyāṃ tattīrasaṃsthaṃ ca haraṃ hariṃ ca |
unmattavadbhāvavivarjitastvaṃ kva yāsi re mūḍha digantarāṇi || 60 ||
[Analyze grammar]

bhaja revājalaṃ puṇyaṃ yaja rudraṃ sanātanam |
japa pañcākṣarīṃ vidyāṃ vraja sthānaṃ ca vāñchitam || 61 ||
[Analyze grammar]

kleśayitvā nijaṃ kāyamupāyairbahubhistu kim |
bhaja revāṃ śivaṃ prāpya sukhasādhyaṃ paraṃ padam || 62 ||
[Analyze grammar]

evaṃ kailāsamāsādya nadīṃ sa śivasannidhau |
jagau yallokapālānāṃ tanmayoktaṃ tavādhunā || 63 ||
[Analyze grammar]

mārkaṇḍeya uvāca |
snānadānaparo yastu nityaṃ dharmamanuvrataḥ |
narmadātīramāśritya mucyate sarvapātakaiḥ || 64 ||
[Analyze grammar]

vidhihīno japennityaṃ vedānsarvāñchataṃ samāḥ |
mṛtyulāṅgalajāpyena samo yo'pyadhiko guṇaiḥ || 65 ||
[Analyze grammar]

bījayonyaviśuddhastu yathā rudraṃ na vindati |
tathā lāṅgalamantro'pi na tiṣṭhati gatāyuṣi || 66 ||
[Analyze grammar]

gāyatrījapasaṃyuktaḥ saṃyamī hyadhiko guṇaiḥ |
agnimīḍe iṣetvo vā agna āyāhi nityadā || 67 ||
[Analyze grammar]

śanno devīti kūlastho japenmucyeta kilbiṣaiḥ || 68 ||
[Analyze grammar]

sāṅgopāṅgāṃstathā vedāñjapannityaṃ samāhitaḥ |
na tatphalamavāpnoti gāyatryā saṃyamī yathā || 69 ||
[Analyze grammar]

rudrādhyāyaṃ sakṛjjaptvā vipro vedasamanvitaḥ |
mucyate sarvapāpebhyo viṣṇulokaṃ sa gacchati || 70 ||
[Analyze grammar]

anyadvai japyasaṃsthānaṃ sūktamāraṇyakaṃ tathā |
mucyate sarvapāpebhyo viṣṇulokaṃ sa gacchati || 71 ||
[Analyze grammar]

yatkiṃcitkriyate jāpyaṃ yacca dānaṃ pradīyate |
narmadājalamāśritya tatsarvaṃ cākṣayaṃ bhavet || 72 ||
[Analyze grammar]

evaṃvidhairvratairnityaṃ narmadāṃ ye samāśritāḥ |
te mṛtā vaiṣṇavaṃ yānti padaṃ vā śaivamavyayam || 73 ||
[Analyze grammar]

satyalokaṃ narāḥ kecitsūryalokaṃ tathāpare |
apsarogaṇasaṃvītā yāvadābhūtasamplavam || 74 ||
[Analyze grammar]

evaṃ vai vartamāne'smiṃlloke tu nṛpapuṃgava |
ṛṣīṇāṃ daśakoṭyastu kurukṣetranivāsinām || 75 ||
[Analyze grammar]

mayā saha mahābhāga narmadātaṭamāśritāḥ |
phalamūlakṛtāhārā arcayantaḥ sthitāḥ śivam || 76 ||
[Analyze grammar]

tacca varṣaśataṃ divyaṃ kālasaṃkhyānumānataḥ |
ṣaḍviṃśatisahasrāṇi tāni mānuṣasaṃkhyayā || 77 ||
[Analyze grammar]

tatastasyāmatītāyāṃ sandhyāyāṃ nṛpasattama |
śeṣaṃ mānuṣyamekaṃ tu kāle varṣaśataṃ sthitam || 78 ||
[Analyze grammar]

tato'bhavadanāvṛṣṭirlokakṣayakarī tadā |
yayā yātaṃ jagatsarvaṃ kṣayaṃ bhūyo hi dāruṇam || 79 ||
[Analyze grammar]

ye pūrvamiha saṃsiddhā ṛṣayo vedapāragāḥ |
teṣāṃ prabhāvādbhagavān vavarṣa balavṛtrahā || 80 ||
[Analyze grammar]

mahatī bhūrisalilā samantādvṛṣṭirāhitā |
tato vṛṣṭyā tu teṣāṃ vai vartanaṃ samajāyata || 81 ||
[Analyze grammar]

punaryugānte samprāpte kiṃciccheṣe kalau yuge |
niḥśeṣamabhavatsarvaṃ śuṣkaṃ sthāvarajaṅgamam || 82 ||
[Analyze grammar]

nirvṛkṣauṣadhagulmaṃ ca tṛṇavīrudvivarjitam |
anāvṛṣṭihataṃ sarvaṃ bhūmaṇḍalamabhūdbhṛśam || 83 ||
[Analyze grammar]

tataste ṛṣayaḥ sarve kṣuttṛṣārtāḥ sahasraśaḥ |
yugasvabhāvamāviṣṭā hīnasattvā abhavannṛpa || 84 ||
[Analyze grammar]

naṣṭahomasvadhākāre yugānte samupasthite |
kiṃ kāryaṃ kva nu yāsyāmaḥ ko'smākaṃ śaraṇaṃ bhavet || 85 ||
[Analyze grammar]

tānahaṃ pratyuvācedaṃ mā bhaiṣṭeti punaḥpunaḥ |
īdṛgvidhā mayā dṛṣṭā bahavaḥ kālaparyayāḥ || 86 ||
[Analyze grammar]

narmadātīramāśritya te sarve gamitā mayā |
eṣā hi śaraṇaṃ devī samprāpte hi yugakṣaye || 87 ||
[Analyze grammar]

nānyā gatirihāsmākaṃ vidyate dvijasattamāḥ |
janitrī sarvabhūtānāṃ viśeṣeṇa dvijottamāḥ || 88 ||
[Analyze grammar]

pitāmahā ye pitaro ye cānye prapitāmahāḥ |
te samastā gatāḥ svargaṃ samāśritya mahānadīm || 89 ||
[Analyze grammar]

bhṛgvādyāḥ sapta ye tvāsanmama pūrvapitāmahāḥ |
dhaumṛṇī ca mahābhāgā mama bhāryā śucismitā |
manasvatī ca yā matā bhārgavo'ṅgirasastathā || 90 ||
[Analyze grammar]

pulastyaḥ pulahaścaiva vasiṣṭhātreyakāśyapāḥ |
tathānye ca mahābhāgā niyamavratacāriṇaḥ |
anye ca śatasāhasrā atra siddhiṃ samāgatāḥ || 91 ||
[Analyze grammar]

tasmādiyaṃ mahābhāgā na moktavyā kadācana |
nānyā kācinnadī śaktā lokatrayaphalapradā || 92 ||
[Analyze grammar]

dvandvairanekairbahubhiḥ kṣuttṛṣādyairmahābhayaiḥ |
mucyante te narāḥ sadyo narmadātīravāsinaḥ || 93 ||
[Analyze grammar]

tasmātsarvaprayatnena sevitavyā saridvarā |
vāñchadbhiḥ paramaṃ śreya iha loke paratra ca || 94 ||
[Analyze grammar]