Chapter 2

[English text for this chapter is available]

| adhyāya || 2 ||
[Analyze grammar]

sūta uvāca || 1 ||
[Analyze grammar]

narmadāyāstu māhātmyaṃ kṛṣṇadvaipāyano'bravīt |
tatte'haṃ sampravakṣyāmi yattvayā paripṛcchitam || 2 ||
[Analyze grammar]

vistaraṃ narmadāyāstu tīrthānāṃ munisattama |
ko'nyaḥ śakto'sti vai vaktumṛte brahmāṇamīśvaram || 3 ||
[Analyze grammar]

etameva purā praśnaṃ pṛṣṭavāñjanamejayaḥ |
vaiśaṃpāyanasaṃjñaṃ tu śiṣyaṃ dvaipāyanasya ha || 4 ||
[Analyze grammar]

revātīrthāśritaṃ puṇyaṃ tatte vakṣyāmi śaunaka |
purā pārīkṣito rājā yajñādīkṣāsu dīkṣitaḥ || 5 ||
[Analyze grammar]

saṃbhṛte tu havirdravye vartamāneṣu karmasu |
āsīneṣu dvijāgryeṣu hūyamāne hutāśane || 6 ||
[Analyze grammar]

vartamānāsu sarvatra tathā dharmakathāsu ca |
śrūyamāṇe tathā śabde janairukte tvaharniśam || 7 ||
[Analyze grammar]

yajñabhūmau kulapate dīyatāṃ bhujyatāmiti |
vividhāṃśca vinodānvai kurvāṇeṣu vinodiṣu || 8 ||
[Analyze grammar]

evaṃvidhe vartamāne yajñe svargasadaḥsame |
vaiśaṃpāyanamāsīnaṃ papraccha janamejayaḥ || 9 ||
[Analyze grammar]

janamejaya uvāca |
dvaipāyanaprasādena jñānavānasi me mataḥ |
vaiśaṃpāyana tasmāttvāṃ pṛcchāmi ṛṣisannidhau || 10 ||
[Analyze grammar]

brūhi me tvaṃ purāvṛttaṃ pitṛṇāṃ tīrthasevanam |
ciraṃ nānāvidhānkleśān prāptāsta iti me śrutam || 11 ||
[Analyze grammar]

kathaṃ dyūtajitāḥ pārthā mama pūrvapitāmahāḥ |
āsamudrāṃ mahīṃ vipra bhramantastīrthalobhataḥ || 12 ||
[Analyze grammar]

kena te sahitāstāta bhūmibhāgānanekaśaḥ |
ceruḥ kathaya tatsarvaṃ sarvajño'si mato mama || 13 ||
[Analyze grammar]

vaiśaṃpāyana uvāca || 14 ||
[Analyze grammar]

kathayiṣyāmi bhūnātha yatpṛṣṭaṃ tu tvayā'nagha |
namaskṛtya virūpākṣaṃ vedavyāsaṃ mahākavim || 15 ||
[Analyze grammar]

pitāmahāstu te pañca pāṇḍavāḥ saha kṛṣṇayā |
uṣitvā brāhmaṇaiḥ sārdhaṃ kāmyake vana uttame || 16 ||
[Analyze grammar]

pradhānoddālake tatra kaśyapo'tha mahāmatiḥ |
vibhāṇḍakaśca rājendra muruścaiva mahāmuniḥ || 17 ||
[Analyze grammar]

pulastyo lomaśaścaiva tathānye putrapautriṇaḥ |
snātvā niḥśeṣatīrtheṣu gatāste vindhyaparvatam || 18 ||
[Analyze grammar]

te ca tatrāśramaṃ puṇyaṃ sarvairvṛkṣaiḥ samākulam |
campakaiḥ karṇakāraiśca punnāgairnāgakesaraiḥ || 19 ||
[Analyze grammar]

bakulaiḥ kovidāraiśca dāḍimairupaśobhitam |
puṣpitairarjunaiścaiva bilvapāṭalaketakaiḥ || 20 ||
[Analyze grammar]

kadambāmramadhūkaiśca nimbajambīratindukaiḥ |
nālikeraiḥ kapitthaiśca kharjūrapanasaistathā || 21 ||
[Analyze grammar]

nānādrumalatākīrṇaṃ nānāvallībhirāvṛtam |
sapuṣpaṃ phalitaṃ kāntaṃ vanaṃ caitrarathaṃ yathā || 22 ||
[Analyze grammar]

jalāśrayaistu vipulaiḥ padminīkhaṇḍamaṇḍitam |
sitotpalaiśca saṃchannaṃ nīlapītaiḥ sitāruṇaiḥ || 23 ||
[Analyze grammar]

haṃsakāraṇḍavākīrṇaṃ cakravākopaśobhitam |
āḍīkākabalākābhiḥ sevitaṃ kokilādibhiḥ || 24 ||
[Analyze grammar]

siṃhairvyāghrairvarāhaiśca gajaiścaiva mahotkaṭaiḥ |
mahiṣaiśca mahākāyaiḥ kuraṅgaiścitrakaiḥ śaśaiḥ || 25 ||
[Analyze grammar]

gaṇḍakaiścaiva khaḍgaiśca gomāyusurabhī yutam |
sāraṅgairmallakaiścaiva dvipadaiśca catuṣpadaiḥ || 26 ||
[Analyze grammar]

tathāca kokilākīrṇaṃ manaḥkāntaṃ suśobhitam |
jīvaṃjīvakasaṃghaiśca nānāpakṣisamāyutam || 27 ||
[Analyze grammar]

duḥkhaśokavinirmuktaṃ sattvotkaṭamanoramam |
kṣuttṛṣārahitaṃ kāntaṃ sarvavyādhivivarjitam || 28 ||
[Analyze grammar]

siṃhīstanaṃ pibantyatra kuraṃgāḥ snehasaṃyutam |
mārjāramūṣakau cobhāvavalehata unmukhau || 29 ||
[Analyze grammar]

pañcāsyāḥ potakebhāśca bhoginastu kalāpinaḥ |
dṛṣṭvā tadvipinaṃ ramyaṃ praviṣṭāḥ pāṇḍunandanāḥ || 30 ||
[Analyze grammar]

mārkaṇḍaṃ dṛṣṭavāṃstatra taruṇādityasannibham |
ṛṣibhiḥ sevyamānaṃ tu nānāśāstraviśāradaiḥ || 31 ||
[Analyze grammar]

kulīnaiḥ sattvasampannaiḥ śaucācārasamanvitaiḥ |
dhīsaṃgataiḥ kṣamāyuktaistrisaṃdhyaṃ japatatparaiḥ || 32 ||
[Analyze grammar]

ṛgyajuḥsāmavihitairmantrairhomaparāyaṇaiḥ |
kecitpañcāgnimadhyasthāḥ kecidekāntasaṃsthitāḥ || 33 ||
[Analyze grammar]

ūrdhvabāhunirālambā ādityabhramaṇāḥ pare |
sāyaṃprātarbhujaścānye ekāhārāstathā pare || 34 ||
[Analyze grammar]

dvādaśāhāttathā cānye anye māsārdhabhojanāḥ |
darśe darśe tathā cānye anye śaivālabhojanāḥ || 35 ||
[Analyze grammar]

piṇyākamapare'bhujan kecitpālāśabhojanāḥ |
apare niyatāhārā vāyubhakṣyāmbubhojanāḥ || 36 ||
[Analyze grammar]

evaṃbhūtaistathā vṛddhaiḥ sevyate munipuṃgavaiḥ |
tato dharmasutaḥ śrīmānāśramaṃ taṃ praviśya saḥ || 37 ||
[Analyze grammar]

dṛṣṭvā munivaraṃ śāntaṃ dhyāyamānaṃ paraṃ padam |
prādakṣiṇyena sahasā daṇḍavatpatito'grataḥ || 38 ||
[Analyze grammar]

bhaktyānupatitaṃ dṛṣṭvā cirādādāya locanam |
ko bhavānityuvācedaṃ dharmaṃ dhīmānapṛcchata || 39 ||
[Analyze grammar]

tasya tadvacanaṃ śrutvā dārakastatsamīpagaḥ |
āhāyaṃ dharmarājaste darśanārthaṃ samāgataḥ || 40 ||
[Analyze grammar]

tacchrutvādārakeṇoktaṃ vacanaṃ prāha sādaraḥ |
ehyehi vatsavatseti kiṃcitsthānāccalanmuniḥ |
taṃ tu snehādupāghrāya āsane upaveśayat || 41 ||
[Analyze grammar]

upaviṣṭe sabhāyāṃ tu pūjāṃ kṛtvā yathāvidhi |
vanyairdhānyaiḥ phalairmūlai rasaiścaiva pṛthagvidhaiḥ || 42 ||
[Analyze grammar]

pāṇḍavā brāhmaṇaiḥ sārddhaṃ yathāyogyaṃ prapūjitāḥ |
muhūrtādatha viśramya dharmaputro yudhiṣṭhiraḥ || 43 ||
[Analyze grammar]

pṛcchati sma muniśreṣṭhaṃ kautūhalasamanvitaḥ |
bhagavansarvalokānāṃ dīrghāyustvaṃ mato mama || 44 ||
[Analyze grammar]

saptakalpānaśeṣeṇa kathayasva mamānagha |
kalpakṣaye'pi lokasya sthāvarasyetarasya ca || 45 ||
[Analyze grammar]

na vinaṣṭo'si viprendra kathaṃ vā kena hetunā |
gaṅgādyāḥ saritaḥ sarvāḥ samudrāntāśca yā mune || 46 ||
[Analyze grammar]

tāsāṃ madhye sthitāḥ kāḥ svitkāścaiva pralayaṃ gatāḥ |
kā nu puṇyajalā nityaṃ kānu na kṣayamāgatā || 47 ||
[Analyze grammar]

etatkathaya me tāta prasannenāntarātmanā |
śrotumicchāmyaśeṣeṇa ṛṣibhiḥ saha bāndhavaiḥ || 48 ||
[Analyze grammar]

śrīmārkaṇḍeya uvāca |
sādhusādhu mahāprājña dharmaputra yudhiṣṭhira |
kathayāmi yathā nyāyaṃ yatpṛcchasi mamānagha || 49 ||
[Analyze grammar]

sarvapāpaharaṃ puṇyaṃ purāṇaṃ rudrabhāṣitam |
yaḥ śṛṇoti naro bhaktyā tasya puṇyaphalaṃ śṛṇu || 50 ||
[Analyze grammar]

aśvamedha sahasreṇa vājapeyaśatena ca |
tatphalaṃ samavāpnoti rājannāstyatra saṃśayaḥ || 51 ||
[Analyze grammar]

brahmaghnaśca surāpī ca steyī goghnaśca yo naraḥ |
mucyate sarvapāpebhyo rudrasya vacanaṃ yathā || 52 ||
[Analyze grammar]

gaṅgā tu saritāṃ śreṣṭhā tathā caiva sarasvatī |
kāverī devikā caiva sindhuḥ sālakuṭī tathā || 53 ||
[Analyze grammar]

sarayūḥ śatarudrā ca mahī carmilayā saha |
godāvarī tathā puṇyā tathaiva yamunā nadī || 54 ||
[Analyze grammar]

payoṣṇī ca śatadruśca tathā dharmanadī śubhā |
etāścānyāśca saritaḥ sarvapāpaharāḥ smṛtāḥ || 55 ||
[Analyze grammar]

kiṃ tu te kāraṇaṃ tāta vakṣyāmi nṛpasattama |
samudrāḥ saritaḥ sarvāḥ kalpe kalpe kṣayaṃ gatāḥ || 56 ||
[Analyze grammar]

saptakalpakṣaye kṣīṇe na mṛtā tena narmadā |
narmadaikaiva rājendra paraṃ tiṣṭhetsaridvarā || 57 ||
[Analyze grammar]

toyapūrṇā mahābhāga munisaṃghairabhiṣṭutā |
gaṃgādyāḥ saritaścānyāḥ kalpe kalpe kṣayaṃ gatāḥ || 58 ||
[Analyze grammar]

eṣā devī purā dṛṣṭā tena vakṣyāmi te'nagha || 59 ||
[Analyze grammar]