Chapter 76

[English text for this chapter is available]

īśvara uvāca |
ṣaṭsaptatitamaṃ devamaruṇeśvarasaṃjñakam |
viddhi pāpaharaṃ devi darśanātkāmadaṃ nṛṇām || 1 ||
[Analyze grammar]

purā devayuge devi prajāpatisute śubhe |
āstāṃ bhaginyau rūpeṇa samupete'dbhute'naghe || 2 ||
[Analyze grammar]

te bhārye kaśyapasyāstāṃ kadrūśca vinatā tathā |
prādāttābhyāṃ varaṃ prītaḥ prajāpatisamaḥ patiḥ || 3 ||
[Analyze grammar]

kaśyapo dharmapatnībhyāṃ mudā paramayā yutaḥ |
varātisargaṃ śrutvaiva kaśyapāduttamaṃ tu te || 4 ||
[Analyze grammar]

harṣādabhyadhikāṃ prītiṃ prāpatuḥ sma varastriyau |
vavre kadrūḥ sutānnāgānsahasraṃ tulyavarcasaḥ || 5 ||
[Analyze grammar]

dvau putrau vinatā vavre kadrūputrādhikau bale |
ojasā tejasā caiva vikrameṇādhikau ca tau || 6 ||
[Analyze grammar]

tasyai bharttā varaṃ prādāllapsyase putrakottamau |
evamastviti tāṃ cāha kaśyapo vinatāṃ tadā || 7 ||
[Analyze grammar]

yathā ca prārthitaṃ labdhvā varaṃ tuṣṭā'bhavattadā |
kṛtakṛtyā tu vinatā labdhvā vīryādhikau sutau || 8 ||
[Analyze grammar]

kadrūśca labdhvā putrāṇāṃ sahasraṃ tulyatejasām |
dhāryau garbhau prayatnena ityuktvā sa mahātapāḥ || 9 ||
[Analyze grammar]

te bhārye varasaṃhṛṣṭe kaśyapo vanamāviśat |
kālena mahatā kadrūrnāgānāṃ sā śatīrdaśa |
janayāmāsa cārvaṃgī dve cāṃḍe vinatā tadā || 10 ||
[Analyze grammar]

tayoraṃḍāni nidadhuḥ prahṛṣṭāḥ paricārikāḥ |
sopasvedeṣu bhāṃḍeṣu paṃcavarṣaśatāni ca || 11 ||
[Analyze grammar]

tataḥ paṃcaśate kāle kadrūputrā vinirgatāḥ |
aṃḍabhyāṃ vinatāyāstu mithunaṃ na vyadṛśyata || 12 ||
[Analyze grammar]

tataḥ putrārthinī devī vrīḍitā sā tapasvinī |
aṃḍaṃ bibheda vinatā tatra putraṃ dadarśa ha || 13 ||
[Analyze grammar]

pūrvārddhakāyasaṃpannamitareṇā prakāśitam |
sa putro roṣasaṃrabdhaḥ śaśāpaināmiti śrutam || 14 ||
[Analyze grammar]

yo'hamevaṃ kṛto mātastvayā lobhaparītayā |
śarīreṇāsamagreṇa tasmāddāsī bhaviṣyasi || 15 ||
[Analyze grammar]

paṃcavarṣaśatānyasyā yayā visparddhase sadā |
eṣa te ca suto mātardāsyādvai mokṣayiṣyati || 16 ||
[Analyze grammar]

yadyenamapi mātastvaṃ māmivāṃḍavibhedanāt |
na kariṣyasyanaṃgaṃ vā putraṃ cāti tarasvinam || 17 ||
[Analyze grammar]

pratipālayitavyaste janmakālo'sya dhīrayā |
viśiṣṭabalamīpsaṃtyā paṃcavarṣaśatānyataḥ || 18 ||
[Analyze grammar]

evaṃ śaptvā tato devi vinatāṃ mātaraṃ svakam |
aruṇo vilalāpātha vāṣpaśokapariplutaḥ || 19 ||
[Analyze grammar]

hāhā mayā nṛśaṃsena mātā svajananī svakā |
śaptā vināparādhena kathaṃ yāsyāmi sadgatim |
mātā dehāraṇiḥ puṃsāṃ mātā duḥkhasahā parā || 20 ||
[Analyze grammar]

garbhakleśe paraṃ duḥkhaṃ mātā jānāti yādṛśam |
vātsalyaṃ cādhikaṃ māturdṛśyate na tu paitṛkam || 21 ||
[Analyze grammar]

gurūṇāmeva sarveṣāṃ mātā gurutarā smṛtā |
ekasyāpi sutasyaiva na dṛṣṭā niṣkṛtiḥ śrutau || 22 ||
[Analyze grammar]

yadi piṃḍapradānaṃ tu gayāyāṃ kurute sutaḥ |
gate pitari paṃcatvaṃ mātā putrasya nirvṛtiḥ |
na ca mātṛvihīnasya mamatvaṃ kurute pitā || 23 ||
[Analyze grammar]

vikalo mātṛhīnastu putro hi procyate tadā |
yadā sa vṛddho bhavati tadā bhavati duḥkhitaḥ |
tadā śūnyaṃ jagatsarvaṃ yadā mātā viyujyate || 24 ||
[Analyze grammar]

so'haṃ pāpasamācāro jāto mātṛvihiṃsakaḥ |
mariṣyāmi na saṃdehaḥ sādhayitvā hutāśanam || 25 ||
[Analyze grammar]

jāto'haṃ vikalāṃgastu prākkṛtenaiva karmaṇā |
na mātā kāraṇaṃ yasmātsvakīyaṃ karma bhujyate || 26 ||
[Analyze grammar]

evaṃ vilapatastasya kaśyapasya sutasya ca |
aruṇasya viśālākṣi nāradaḥ samupāgataḥ || 27 ||
[Analyze grammar]

dṛṣṭvāruṇaṃ suduḥkhārttaṃ vilapaṃtaṃ punaḥ punaḥ |
pratyuvāca prasannātmā nāradaḥ prahasanniva || 28 ||
[Analyze grammar]

aruṇo'yamaho rauti kaśyapasyātmasaṃbhavaḥ |
vinatāyāḥ suto jyeṣṭhaḥ saṃbhūtastapasāṃ nidhiḥ || 29 ||
[Analyze grammar]

utpādito'yamalpāhairarddhakāyo mahābalaḥ |
enamāśvāsayiṣyāmi vinatāgarbhasaṃbhavam |
mohena vilapaṃtaṃ ca śreyo me bhavitā dhuvam || 30 ||
[Analyze grammar]

iti saṃciṃtya manasi vākyairmadhvamṛtopamaiḥ |
pratyuvācāruṇaṃ tatra nārado dvijasattamaḥ || 31 ||
[Analyze grammar]

tāta kaśyapadāyāda vinatāgarbhasaṃbhava |
tejorāśe durādharṣa saṃtāpaṃ mā kṛthā vṛthā || 32 ||
[Analyze grammar]

bhāvino'rthā bhavaṃtīha duḥkhasya ca sukhasya ca |
yattvayā vinatā śaptā rahasyaṃ devanirmitam || 33 ||
[Analyze grammar]

yadi testi ghṛṇā citte śaptātmajananī tvayā |
tadā gaccha mamādeśānmahākālavanaṃ śubham || 34 ||
[Analyze grammar]

uttare devadevasya yātreśasya ca puṇyadam |
vidyate tridaśaiḥ pūjyaṃ sarvadā sarvadaṃ śivam || 35 ||
[Analyze grammar]

aruṇastvevamuktastu nāradena mahātmanā |
ājagāma kṣaṇārddhena mahākālavanaṃ śubham || 36 ||
[Analyze grammar]

dadarśa tatra talliṃgaṃ tejaḥkūṭopamaṃ śubham |
pūjayāmāsa vidhivatpuṣpairbhāvasamanvitaḥ || 37 ||
[Analyze grammar]

liṃgenokto'ruṇo devi sārathyaṃ kuru sarvadā |
sūryasya bhramatastasya tvattulyo nāsti sārathiḥ || 38 ||
[Analyze grammar]

mayā dattaṃ tu sāmarthyaṃ sūryasya purataḥ sadā |
udayaste'ruṇa prāgvai paścātsūrya udeṣyati || 39 ||
[Analyze grammar]

tvannāmnā triṣu lokeṣu khyāto'hamaruṇeśvaraḥ |
bhaviṣyāmi na saṃdeho nṛṇāmarthapradāyakaḥ || 40 ||
[Analyze grammar]

ye māṃ paśyaṃti satataṃ tvannāmnā cāruṇeśvaram |
te yāsyaṃti paraṃ sthānaṃ dāhapralayavarjitam || 41 ||
[Analyze grammar]

modiṣyaṃti kulaiḥ sārddhaṃ pitṛmātṛsamudbhavaiḥ |
kalpakoṭisahasraṃ tu ye paśyaṃti samāhitāḥ || 42 ||
[Analyze grammar]

na duḥkhaṃ jāyate teṣāṃ ye paśyaṃti raverddine |
saṃsārasāgarotthaṃ vai yāvadiṃdrāścaturdaśa || 43 ||
[Analyze grammar]

yaḥ paśyati caturdaśyāṃ kṛṣṇāyāmaruṇeśvaram || 44 ||
[Analyze grammar]

sa neṣyati pitṝnsvarge narakasthānna saṃśayaḥ |
saṃkrāṃtau ravivāre ca yaḥ paśyedaruṇeśvaram |
śuṃḍīrasvāmino yātrā kṛtā tena na saṃśayaḥ || 45 ||
[Analyze grammar]

ityuktastena liṃgena vinatānaṃdanastadā |
āgataḥ kṛtakṛtyātmā yatra devo divaspatiḥ || 46 ||
[Analyze grammar]

asya liṃgasya māhātmyātkaśyapasyātmasaṃbhavaḥ |
aruṇo dṛśyate vyomni sūryasya purataḥ sadā || 47 ||
[Analyze grammar]

eṣa te kathito devi prabhāvaḥ pāpanāśanaḥ |
aruṇeśvaradevasya puṣpavaṃteśvaraṃ śṛṇu || 48 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye'ruṇeśvaramāhātmyavarṇanaṃnāma ṣaṭsaptatitamo'dhyāyaḥ || 76 ||
[Analyze grammar]