Chapter 66

[English text for this chapter is available]

īśvara uvāca |
ṣaṭṣaṣṭitamakaṃ viddhi devaṃ jalpeśvaraṃ priye |
yasya darśanamātreṇa mahāpāpaṃ śamaṃ vrajet || 1 ||
[Analyze grammar]

jalponāma mahādevi rājābhūdbhuvi viśrutaḥ |
sadā jalparato nityaṃ jalpa vādapravartakaḥ || 2 ||
[Analyze grammar]

vikalpabahulo nityaṃ saṃsāragaticiṃtakaḥ |
subāhupramukhāḥ paṃca putrā jātā mahābalāḥ || 3 ||
[Analyze grammar]

tasya rājño varārohe mūrtāḥ paṃcāgnayo yathā |
subāhuḥ śatrumarddī ca jayo vijaya eva ca |
vikrāṃtaḥ paṃcamaḥ putraḥ sarve śastrāstrapāragāḥ || 4 ||
[Analyze grammar]

pitrā jalpena te rājñā pṛthagrājye pratiṣṭhitāḥ |
pṛthakputrā hi te sarve pṛthagdeśādhipāḥ kṛtāḥ || 5 ||
[Analyze grammar]

prācyāṃ subāhurnṛpatiryāmyāṃ vai śatrumardanaḥ |
paścimāyāṃ jayo rājā uttare vijayo nṛpaḥ || 6 ||
[Analyze grammar]

madhye vikrāṃtasaṃjñastu svapade viniyojitaḥ |
vyavasthāmīdṛśīṃ kṛtvā svayameva vanaṃ yayau || 7 ||
[Analyze grammar]

babhūvurmaṃtriṇasteṣāṃ hitā vaṃśakramāgatāḥ |
bubhujuḥ svasvarājyāni maṃtribhiḥ sahitāstadā || 8 ||
[Analyze grammar]

vikrāṃtasya ca yo maṃtrī vikalpaikaparāyaṇaḥ |
tenoktaṃ vijane deśe vikrāṃtasya mahībhṛtaḥ || 9 ||
[Analyze grammar]

yasyaiṣā pṛthivī kṛtsnā sa samarthaḥ prakīrtitaḥ |
udyamena padaṃ labdhaṃ vāsavena mahātmanā || 10 ||
[Analyze grammar]

tridaśaiścāmṛtaṃ labdhamudyamena mahīpate || 11 ||
[Analyze grammar]

hīnodyamā mānavā ye kṣattriyāśca viśeṣataḥ |
te hāsyāspadatāṃ yāṃti hīnavīryā dinedine || 12 ||
[Analyze grammar]

snehaṃ ca kurute bhrātā rājyalubdho'rthakāraṇāt |
arthavīryeṇa tenaiva saṃtoṣaṃ kurute nṛpaḥ |
kriyate na kimarthaṃ tu bhūpa maṃtraparigrahaḥ |
bhujyate sakalaṃ rājyaṃ mayā te maṃtriṇā balāt || 14 ||
[Analyze grammar]

paro'pi hitavānbandhurbandhurapyahitaḥ paraḥ |
ahito dehajo vyādhirhitamāraṇyamauṣadham || 15 ||
[Analyze grammar]

bhūmimete nirgilaṃti sarpā bilaśayāniva |
rājānamaviroddhāraṃ brāhmaṇaṃ cāpravāsinam || 16 ||
[Analyze grammar]

māyayā mohitaṃ sarvaṃ ko vā kasya ca bāṃdhavaḥ |
udyamaḥ kriyatāṃ tasmādbhrātṝṇāṃ nigrahe drutam || 17 ||
[Analyze grammar]

bhrātṛbhirbhrātaraḥ sarve nihatā rājyakāraṇāt |
dharmaṃ ca śāśvataṃ jñātvā nihatāścāsurāḥ suraiḥ || 18 ||
[Analyze grammar]

iti maṃtrivacaḥ śrutvā sa rājā vismayānvitaḥ |
hasitvā pratyuvācedaṃ mamāyaṃ śatrurāgataḥ || 19 ||
[Analyze grammar]

vikrānta uvāca |
vayaṃ ca bhrātaraḥ paṃca pṛthivīṃ kāmayāmahe |
atuṣṭāḥ pṛthagaiśvaryaṃ kathaṃ kṛtsnā bhaviṣyati || 20 ||
[Analyze grammar]

jyeṣṭho bhrātā subāhuśca dvitīyaḥ śatrumardanaḥ |
jayaśca vijayaścaiva teṣāṃ laghurahaṃ yataḥ || 21 ||
[Analyze grammar]

maṃtryuvāca || |
rājye sthitaṃ pūjayaṃti jyeṣṭhaṃ pūjārhaṇairvaraiḥ |
kaniṣṭhajyeṣṭhatā keyaṃ rājyaṃ prārthayatāṃ nṛṇām || 22 ||
[Analyze grammar]

tatheti ca pratijñāte vikrāṃtena mahībhṛtā |
sa maṃtrī kārayāmāsa abhicāravidhiṃ tadā || 23 ||
[Analyze grammar]

atharvaṇena maṃtreṇa purodhāḥ pracakāra ha |
jñātaṃ purohitaisteṣāṃ te'pi cakruḥ samāhitāḥ || 24 ||
[Analyze grammar]

atha kṛtyā samutpannā paścātkṛtyācatuṣṭayam |
sapurohitabhṛtyāṃstānagrasaṃstu samaṃ tadā || 25 ||
[Analyze grammar]

tataḥ samastalokasya vismayaścābhavanmahān |
yadaika kālaṃ neśuste pṛthakpuranivāsinaḥ || 26 ||
[Analyze grammar]

tataḥ śrutvā ca nidhanaṃ putrāṇāṃ jalpako nṛpaḥ |
vane vaśiṣṭhaṃ papraccha kimetadbhagavanprabho || 27 ||
[Analyze grammar]

tenāpi kathitaṃ sarvaṃ vaśiṣṭhena mahātmanā |
divyajñānena vṛttāṃtaṃ vikalpaṃ cākaronnṛpaḥ || 28 ||
[Analyze grammar]

rājovāca |
nimitto'haṃ vināśasya dhigdhi gjanma madīyakam |
sārddhaṃ tvamātyaputraiśca mṛtaṃ brāhmaṇapaṃcakam || 29 ||
[Analyze grammar]

matto'nyaḥ kaḥ pāparato bhaviṣyati mahānbhuvi |
yadi janma madīyaṃ syā nna ca jātu mahītale || 30 ||
[Analyze grammar]

tataste na vinaśyeyurmama putrapurohitāḥ |
dhigrājyaṃ dhikca me janma bhūbhujāṃ ca mahākule || 31 ||
[Analyze grammar]

kāraṇatvaṃ gato yo'haṃ vināśasya dvijanmanām |
kurvantaḥ svāminaste'rthaṃ putrāṇāṃ mama yājakāḥ |
nāśaṃ yayurna duṣṭāste duṣṭo'haṃ nāśakāraṇe || 32 ||
[Analyze grammar]

itthamudvignahṛdayaḥ sa jalpaḥ pṛthivīpatiḥ |
papraccha ca punaḥ prahvo vaśiṣṭhaṃ jñānināṃ varam || 33 ||
[Analyze grammar]

rājovāca |
bhagavanbrūhi me tīrthamaviyogakaraṃ sadā |
sadyaḥ pāpaharaṃ vipra liṃgaṃ vā kathaya prabho || 34 ||
[Analyze grammar]

tasya tadvacanaṃ śrutvā jalpasya pṛthivīpateḥ |
vaśiṣṭhaḥ kathayāmāsa divyajñānena pārvati || 35 ||
[Analyze grammar]

gaccha jalpa mamādeśānmahākālavanottamam |
kṛtvā niḥ kṣatriyāṃ pṛthvīṃ yatra rāmastapasyati |
tatra liṃgamanādyaṃ ca kukkuṭeśvarapaścime || 36 ||
[Analyze grammar]

tadārādhaya rājeṃdra jāmadagnyāśrame sthitaḥ |
vaśiṣṭhasya vacaḥ śrutvā jalpo'sau pṛthivīpatiḥ || 37 ||
[Analyze grammar]

devadāruvanaṃ tyaktvā mahākālavanaṃ gataḥ |
dadarśa tatra talliṃgamanādyaṃ devasaṃstutam |
pūjayāmāsa vidhivatparameṇa samādhinā || 38 ||
[Analyze grammar]

tatra vāṇī samutpannā liṃgamadhyādvarānane |
na tvaṃ pāpasamācāro na tvaṃ maraṇakāraṇam |
putrāṇāṃ nṛpaviprāṇāmadṛṣṭaṃ tatra kāraṇam || 39 ||
[Analyze grammar]

vipākena svakīyena gatā vaivasvataṃ puram |
mā śokaṃ kuru rājeṃdra gahanā karmaṇo gatiḥ || 40 ||
[Analyze grammar]

anena śuddhabhāvena tuṣṭo'haṃ nṛpasattama |
yadabhīṣṭaṃ varaṃ brūhi tatte dāsyāmi nānyathā || 41 ||
[Analyze grammar]

rājovāca |
yadi tuṣṭo'si me deva yadi deyo varo mama |
saṃsārasāgare ghore mā bhavenmama janma ca || 42 ||
[Analyze grammar]

akṣayāṃ dehi me kīrttiṃ nāmnā me viśruto bhuvi |
ayaṃ jalpeśvaro devo jalpenārādhito vibhuḥ || 43 ||
[Analyze grammar]

vadaṃtu tridaśāḥ sarve eṣa me durlabho varaḥ |
ye tvāṃ paśyaṃti manujā mannāmnā khyātimāgatam |
teṣāṃ viyogo mā bhūyātputrato dhanato'pi vā || 44 ||
[Analyze grammar]

na saṃsārabhayaṃ teṣāṃ dasyuto naiva rājataḥ |
na bhūtagraharogebhyo bhayamastu kadācana || 45 ||
[Analyze grammar]

śivamastu sadā teṣāṃ yeṣāṃ tvaṃ darśanaṃ gataḥ |
te dhanyā mānuṣe loke ye tvāṃ śaraṇamāgatāḥ || 46 ||
[Analyze grammar]

sarvatīrthābhiṣekaistu yatpuṇyaṃ prāpyate naraiḥ |
tatsarvamadhikaṃ deva labhyate tava darśanāta || 47 ||
[Analyze grammar]

tāvatpataṃti saṃsāre ghore duḥkhaśatākule |
yāvanna dṛśyate devaḥ saṃsārārṇavatārakaḥ || 48 ||
[Analyze grammar]

yadā pāpakṣayaḥ puṃsāṃ tadā te darśanaṃ bhavet |
mahatā sukṛtenaiva nālpena tapasā prabho || 49 ||
[Analyze grammar]

evaṃ bhaviṣyatītyuktvā tena liṃgena pārvati |
paśyatāṃ sarvadevānāṃ svatanau saṃniveśitaḥ || 50 ||
[Analyze grammar]

tasmiṃlliṃge layaṃ prāpte nṛpe jalpe varānane |
devo jalpeśvaraḥ khyāto devairukto mahītale |
bhuktido muktidaścaiva sadābhīṣṭakaraḥ smṛtaḥ || 51 ||
[Analyze grammar]

eṣa te kathito devi prabhāvaḥ pāpanāśanaḥ |
jalpeśvarasya devasya śṛṇu kedārasaṃjñakam || 52 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye jalpeśvaramāhātmyavarṇanaṃnāma ṣadaṣaṣṭitamo'dhyāyaḥ || 66 ||
[Analyze grammar]