Chapter 50

[English text for this chapter is available]

śrīmahādeva uvāca |
śṛṇu devi prayatnena paṃcāśattamamīśvaram |
yasya darśanamātreṇa grahabādhā na jāyate || 1 ||
[Analyze grammar]

saṃjñānāma raverbhāryā sā sutā viśvakarmaṇaḥ |
bharttustejo'sahaṃtyātha kadāciccaiva saṃjñayā |
chāyāmayī cātmanastu nirmitā tarasā tayā || 2 ||
[Analyze grammar]

sā proktā sādareṇaiva sthīyatāṃ sūryasaṃnidhau |
pṛṣṭyāpi na vācyaṃ te madīyaṃ gamanaṃ raveḥ || 3 ||
[Analyze grammar]

ityuktvā sā tadā saṃjñā jagāma bhavanaṃ pituḥ |
saṃjñeyamiti manvāno dvitīyāyāṃ divaspatiḥ |
janayāmāsa tanayaṃ nāmato yaḥ śanaiścaraḥ || 4 ||
[Analyze grammar]

tasmiñjāte bhayaṃ jagmuḥ sadevāsuramānuṣāḥ |
trailokyaṃ jātamātreṇa ākrāṃtaṃ sacarācaram || 5 ||
[Analyze grammar]

indro'pi bhayasaṃtrasto brahmāṇaṃ śaraṇaṃ gataḥ |
sūryaputrasya vṛttāṃtaṃ kathayāmāsa gadgadam || 6 ||
[Analyze grammar]

bhinnaṃ tu rohiṇīcakraṃ vyāptaṃ nakṣatramaṃḍalam |
jātamātreṇa cākrāṃtaṃ trailokyaṃ ravisūnunā || 7 ||
[Analyze grammar]

vāsavasya vacaḥ śrutvā brahmā lokapitāmahaḥ |
āhūya sahasā sūryaṃ vacanaṃ cedamabravīt || 8 ||
[Analyze grammar]

maryādā kriyatāṃ bhāno vāryatāṃ putra aurasaḥ |
ākrāṃtaṃ tejasā tena trailokyaṃ bhūbhuvādikam || 9 ||
[Analyze grammar]

brahmaṇo vacanaṃ śrutvā raviṇā proktamīdṛśaḥ |
asādhyo'yaṃ mama suto vāryatāṃ svayameva tam || 10 ||
[Analyze grammar]

paśya me caraṇau dagdhau dṛṣṭimātreṇa līlayā |
brahmāpi bhayasaṃtrasto jagāma manasā harim || 11 ||
[Analyze grammar]

sūryasya vacanaṃ śrutvā hariḥ prāptastu tatkṣaṇāt |
brahmaṇo vacanaṃ śrutvā bhītaḥ kṛṣṇo'bravīdidam || 12 ||
[Analyze grammar]

gamyatāṃ tatra yatrāste devadevo maheśvaraḥ |
kṛṣṇasya vacanātsarve mamāṃtikamupāgatāḥ || 13 ||
[Analyze grammar]

vṛttāṃtaḥ kathitaḥ sarvo raviputrasya pārvati |
mayā smṛtastu saṃprāptaḥ sūryaputrastu tatkṣaṇāt || 14 ||
[Analyze grammar]

adhodṛṣṭirmayā dṛṣṭo vakrāṃgo rūpato'sitaḥ |
sthairyaṃ kṛtvā namaskṛtya vijñapto'haṃ śanaiḥśanaiḥ || 15 ||
[Analyze grammar]

kimarthaṃ vai smṛto deva dehyājāṃ mama śaṃkara |
ādeśe tava tiṣṭhāmi kiṃ karomi praśādhi mām || 16 ||
[Analyze grammar]

ityukto'haṃ tadā tena raviputreṇa pārvati |
mayā sa vārito'tyarthaṃ mā pīḍaya jagattrayam || 17 ||
[Analyze grammar]

tenoktaṃ dehi me sthānaṃ pānamāhārameva ca |
mayā dattaṃ viśālākṣi pūjārthaṃ sthānamuttamam || 18 ||
[Analyze grammar]

meṣādirāśisaṃsthaḥ saṃstriṃśanmāsānprapīḍaya |
mānuṣānkramaśo vatsa tatra tṛptimavāpsyasi || 19 ||
[Analyze grammar]

aṣṭamaśca caturthaśca dvitīyo janmasaṃsthitaḥ |
dvādaśarāśisaṃstho'pi viruddho bhava sarvadā || 20 ||
[Analyze grammar]

ekādaśo vā ṣaṣṭho vā tṛtīya sthānagothavā |
bhava bhavyataro nṝṇāmataḥ pūjā bhaviṣyati || 21 ||
[Analyze grammar]

paṃcamo navamaścaiva udāsīnastu saptamaḥ |
bhava rāśigato nityaṃ mānuṣe karma bhiryute || 22 ||
[Analyze grammar]

pūjāṃ prāpsyasi cātyarthaṃ grahāṇāmadhikaṃ sadā |
gatiḥ sthirā bhavitrī te varaḥ śreṣṭhobhidhīyate || 23 ||
[Analyze grammar]

ataste sthāvaraṃ nāma bhaviṣyati mahītale |
śanaiścarastvaṃ rāśistho grahāṇāmadhiko yataḥ || 24 ||
[Analyze grammar]

ataḥ śanaiścaronāma bhaviṣyasi sadā bhuvi |
gajagaṇḍanibhākāro mama kaṇṭhasamopi ca || 25 ||
[Analyze grammar]

varṇato hyasito nāma bhaviṣyasi mahītale |
grahamadhye hyadhodṛṣṭirgatirmaṃdā bhaviṣyati |
tuṣṭo dadāsi rājyaṃ ca ruṣṭo vai harasi kṣaṇāt || 26 ||
[Analyze grammar]

devāsuramanuṣyāśca siddhavidyādharoragāḥ |
tvatkrūradṛṣṭinihatā nāśaṃ yāsyaṃti nānyathā || 27 ||
[Analyze grammar]

tava prasādātprāpsyaṃti mano'bhīṣṭaṃ sudurllabham |
anyacca te pradāsyāmi sthānaṃ guhyaṃ manoharam || 28 ||
[Analyze grammar]

manobhīṣṭakaraṃ puṇyaṃ devadānavadurlabham |
pralaye'pyakṣayaṃ proktaṃ mahākālavanaṃ param || 29 ||
[Analyze grammar]

tatra gaccha mamādeśattvapṛthukeśvarapaścime |
vidyate tatra yalliṃgaṃ tatte nāmnā bhaviṣyati || 30 ||
[Analyze grammar]

kīrttireṣā tvadīyāpi trailokye bhavitā dhuvam || 31 ||
[Analyze grammar]

ityuktaḥ sthāvaro devi mamājñāpālakastadā |
jagāma tvarito ramyaṃ mahākālavanaṃ śubham || 32 ||
[Analyze grammar]

dṛṣṭvā tatraiva talliṃgaṃ sthānaṃ labdhaṃ suśobhanam |
talliṃgaṃ bhuvane khyātaṃ nāmataḥ sthāvareśvaram || 33 ||
[Analyze grammar]

śaninoktaṃ tadā devi ye'tra drakṣyaṃti bhaktitaḥ |
mayā prapūjitaṃ liṃgaṃ vikhyātaṃ sthāvareśvaram |
teṣāṃ pīḍā madīyā tu na bhaviṣyati karhicit || 34 ||
[Analyze grammar]

madīye ca dine yo vai niyamena prapaśyati |
tasyāhaṃ sakalāṃ bādhāṃ śamayiṣyāmyasaṃśayam || 35 ||
[Analyze grammar]

dhakṣyāmi satataṃ pīḍāmanyagrahakṛtāmapi |
madīyaṃ ca bhayaṃ tasya svapne'pi na bhaviṣyati || 36 ||
[Analyze grammar]

na grahā na piśācāśca na yakṣā na ca rākṣasāḥ |
vighnaṃ kurvaṃti tasyāpi mayi tuṣṭe na saṃśayaḥ || 37 ||
[Analyze grammar]

saṃkrāṃtau śanivāre ca vyatīpāte'yane tathā |
ye paśyaṃti narā bhaktyā liṃgaṃ vai sthāvareśvaram |
bhaviṣyatyakṣayasteṣāṃ sthiro vāsastriviṣṭape || 38 ||
[Analyze grammar]

niyamena prapaśyaṃti mama vāre'tra ye narāḥ |
na teṣāṃ duṣkṛtaṃ kiṃcidduṣkṛtotthā na cāpadaḥ || 39 ||
[Analyze grammar]

bhaviṣyati na dāridryaṃ na caiveṣṭaviyojanam |
dāsyāmi putrakāmasya phalaṃ putrakṛtaṃ sadā || 40 ||
[Analyze grammar]

adhanasya dhanaṃ caiva bhayārttasyābhayaṃ tathā |
svargaṃ vai svargakāmasya prayacchāmi ca vāṃchitam || 41 ||
[Analyze grammar]

ityuktvā pūjayāmāsa bhūyo liṃgaṃ śanaiścaraḥ |
pūjayitvā śubhaiḥ puṣpairbhaktyā tatraiva saṃsthitaḥ || 42 ||
[Analyze grammar]

eṣa te kathito devi prabhāvaḥ pāpanāśanaḥ |
sthāvareśvaradevasya śūleśvaramatho śṛṇu || 43 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmye sthāvareśvaramāhātmya varṇanaṃnāma paṃcāśattamo'dhyāyaḥ || 50 ||
[Analyze grammar]