Chapter 38

[English text for this chapter is available]

īśvara uvāca |
aṣṭātriṃśattamaṃ viddhi kusumeśvarasaṃjñakam |
devaṃ svargapradaṃ devi mahāpātakanā śanam || 1 ||
[Analyze grammar]

purā vaivasvate kalpe prāpte vārāhasaṃjñake |
prādurbhūte viśālākṣi kailāsādahamāgataḥ || 2 ||
[Analyze grammar]

mahākālavane ramye ramamāṇasya pārvati |
tvayā sārddhaṃ mamākṣaiśca prādurāsīnmahāsvanaḥ || 3 ||
[Analyze grammar]

pṛṣṭo'haṃ ca tadā śrutvā śabdaṃ cātīva duḥsaham |
śabdotpattirmayā devi kathitā sā tvadagrataḥ || 4 ||
[Analyze grammar]

ete gaṇeśāḥ krīḍaṃti madhye vai vīrako gaṇaḥ |
kusumairbhūṣito'tyarthaṃ mamātīva suvallabhaḥ || 5 ||
[Analyze grammar]

kusumairhanyate'pyarthaṃ pūjyate kusumotkaraiḥ |
sa eva vīrako devi sadā me harṣadāyakaḥ || 6 ||
[Analyze grammar]

nānāścaryaguṇādhāro gaṇeśvaraśatārcitaḥ |
madīyaṃ vacanaṃ śrutvā tvayāpyuktaṃ varānane || 7 ||
[Analyze grammar]

na dṛśyate vinā puṇyaiḥ putrasyānanapaṃkajam |
īdṛśasya sutasyāpi mamotkaṇṭhā maheśvara || 8 ||
[Analyze grammar]

kadāhamīdṛśaṃ putraṃ drakṣyāmyānandadāyakam |
mayā tava vacaḥ śrutvā hasitvā ca punaḥpunaḥ |
proktaṃ pārvati putro'yaṃ pradatto vīrako'dhunā || 9 ||
[Analyze grammar]

eṣa eva sutastestu nayanānandadāyakaḥ |
tvayā mātrā kṛtārthastu vīrakaḥ kusumārcitaḥ || 10 ||
[Analyze grammar]

madīyaṃ vacanaṃ śrutvā preṣitā vijayā tvayā |
datto hareṇa me putro vijaye śīghramānaya || 11 ||
[Analyze grammar]

vijayovāca gaṇapaṃ gaṇamadhye ca varttinam |
ehi vīraka cāpalyāttvayā devaḥ prakopitaḥ |
kimunmattavadatyarthaṃ nṛtyarāgeṇa mohitaḥ || 12 ||
[Analyze grammar]

ityukto bhayasaṃtrastaḥ kusumairbhūṣitastadā |
tvatsamīpaṃ samāyāto vijayānugataḥ śanaiḥ || 13 ||
[Analyze grammar]

bhūṣitaṃ kusumairdṛṣṭvā bhayatrastaṃ ca vīrakam |
tvayā cākārito devi girā madhuravarṇayā || 14 ||
[Analyze grammar]

ehyehi jāto'si me putrakastvaṃ devena datto'dhunā vīrakosi |
uktavatyevamaṃke nidhāyātha taṃ paryacumbaḥ kapole kalaṃvādinam || 15 ||
[Analyze grammar]

mūrdhanyupāghrāya sammārjya gātrāṇi sā bhūṣayāmāsa divyaiḥ svayaṃ bhūṣaṇaiḥ |
kiṃkiṇīmekhalānūpuraiḥ sanmaṇīniṣkakeyūrahārotkaraiḥ sadguṇaiḥ || 16 ||
[Analyze grammar]

komalaiḥ pallavaiścitritaiścārubhirdivya mantrodbhavaistasya śubhraistataḥ |
bhūtibhiścākarormiśrasiddhārthakairaṃgarakṣāvidhīṃstasyatuṣṭā satī || 17 ||
[Analyze grammar]

evamādhāya covaktha kṛtvā srajaṃ mūrdhni gorocanāpatrabhaṃgojvalaiḥ |
vatsa gacchādhunā krīḍa sārddhaṃ gaṇairapramatto yathā bālacaryāṃ śanaiḥ || 18 ||
[Analyze grammar]

so'pi siddhyākule gaṇḍaśaile miladratnajāle vṛhacchā latālākule |
kṣaṇaṃ phullamālātamālālimāle kṣaṇaṃ vṛkṣamūle vilolālimāle || 19 ||
[Analyze grammar]

kṣaṇaṃ svalpapaṃke jale paṃkajāle kṣaṇaṃ vṛkṣakhaṇḍe śubhe niṣkalaṃke |
parikrīḍate bālako vai vihārī gaṇeśādhipo devatānandakārī || 20 ||
[Analyze grammar]

evaṃ vikrīḍatastasya vīrakasya gaṇasya ca |
saṃdhyā tamo mayī prāptā vijñapto'haṃ tvayā priye || 21 ||
[Analyze grammar]

aiśvaryaṃ dīyatāmasya mama putrasya śaṃkara |
śarīrārddhaṃ gaṇeśatvaṃ lokapālatvamagrataḥ || 22 ||
[Analyze grammar]

liṃgatvamakṣayatvaṃ ca sthānaṃ divyaṃ sudurllabham |
vaṃdyamānaṃ yathā deva siddhagandharvakiṃnaraiḥ |
brahmendravaruṇādityalokapāleśvareśvaraiḥ || 23 ||
[Analyze grammar]

etaireva gaṇaiḥ sārddhaṃ stūya mānaṃ mahātmabhiḥ |
alaṃkṛto mayā yasmātkusumairvividhaiḥ śubhaiḥ || 24 ||
[Analyze grammar]

kusumeśvarasaṃjñastu tasmātkhyāto bhavatviti |
mayāpyuktaṃ viśālākṣi vīrakaṃ dayitaṃ mama || 25 ||
[Analyze grammar]

matprabhāvasamaṃ divyaṃ sevitaṃ gaṇapaiḥ sadā |
śṛṇu gandharvagītānāṃ mādhuryamamṛtopamam || 26 ||
[Analyze grammar]

paśya kinnaranārīṇāṃ gāyantīnāṃ manoramam |
paśyāpsaraḥsamūhasyanṛtyametannirantaram || 27 ||
[Analyze grammar]

vidyādharaiḥ parivṛtaḥ kusumeśo varānane |
viśeṣato mayā devi prathamaṃ pramathe śvaraḥ |
kusumeśvaratāṃ nīto yadā kusumamaṃḍitaḥ || 28 ||
[Analyze grammar]

sthānaṃ dattaṃ viśālākṣi śivaliṃgasya cottare |
varo datto bahumato duṣprāpyastridaśairapi || 29 ||
[Analyze grammar]

ye tvāṃ drakṣyaṃti gaṇapa kusumeśvarasaṃjñakam |
na teṣāṃ jāyate pāpaṃ padmapatre yathā jalam || 30 ||
[Analyze grammar]

kusumairarcayiṣyaṃti ye narāḥ kusumeśvaram |
matsthānaṃ te samāsādya modiṣyaṃti gatavyathāḥ || 31 ||
[Analyze grammar]

yo'pyekaṃ divasaṃ marttyastvāṃ paśyati samāhitaḥ |
sa muktaḥ pātakaiḥ sarvairmama lokaṃ gamiṣyati || 32 ||
[Analyze grammar]

yaḥ pūjayati bhāvena kusumaiḥ kusumeśvaram |
sa prāpsyati paraṃ sthānaṃ punarāvṛttidurlabham || 33 ||
[Analyze grammar]

evamādivaraiḥ puṣṭaḥ kṛtoyaṃ kusu meśvaraḥ |
kṛtakṛtyo gaṇo devi liṃgeneśvaratāṃ gataḥ || 34 ||
[Analyze grammar]

kusumeśvaradevasya prabhāvaḥ kathitastvayam |
akrūreśasya devasya śrūyatāṃ tadanantaram || 35 ||
[Analyze grammar]