Chapter 36

[English text for this chapter is available]

śrīhara uvāca |
mārkaṇḍeyeśvaraṃ viddhi ṣaṭtriṃśattamamīśvaram |
yasya darśanamātreṇa putravāñjāyate naraḥ || 1 ||
[Analyze grammar]

brahmavaṃśasamutpanno mṛkaṇḍonāma tāpasaḥ |
vedādhyayanasaṃpannaḥ sa cāputro babhūva ha || 2 ||
[Analyze grammar]

putrārthaṃ cintayāmāma kathaṃ putro bhavediti |
aputrasya kuto loka iti vedeṣu paṭhyate || 3 ||
[Analyze grammar]

tasmāttapaḥ kariṣyāmi yena me tanayo bhavet |
evaṃ saṃcitya bahudhā sa jagāma himālayam || 4 ||
[Analyze grammar]

cakāra vasatiṃ cāpi tapase bhāvitātmavān |
vāyubhakṣoṃbubhakṣaśca nirāhārordhvapādakaḥ || 5 ||
[Analyze grammar]

śākamūlaphalāhāraḥ parṇāśyekadviparṇabhuk |
evamādīni cānyāni tapāṃsi subahūnyapi || 6 ||
[Analyze grammar]

cakāra sa munistatra varṣāṇi dvādaśaiva tu |
na tuṣṭo'haṃ tadā devi tapasā duṣkareṇa tu || 7 ||
[Analyze grammar]

tato jñātvā matiṃ tasya vijñapto'haṃ tadā tvayā |
karotyeva tapaḥ krūraṃ putrahetormunirmahān || 8 ||
[Analyze grammar]

tejasā dīpayañchailaṃ śoṣayansalilāśayān |
tapasā duṣkareṇaiva kṣubhitā nākavāsinaḥ || 9 ||
[Analyze grammar]

samudrāḥ kṣubhitāḥ sarve candrādityau tathaiva ca |
ṛṣayo vismṛtiṃ prāptāḥ kaṃpete cāpi rodasī |
akālapralayo deva bhaviṣyati na saṃśayaḥ || 10 ||
[Analyze grammar]

munaye tanmṛkaṇḍāya putro vai dīyatāmiti |
mayā proktaṃ varārohe putramicchatyayonijam || 11 ||
[Analyze grammar]

akṣayaṃ suviśālākṣi sahasrākṣamivāparam |
candrābhaṃ candravadanaṃ candravadbhuvanapriyam || 12 ||
[Analyze grammar]

nīlotpaladalaśyāmaṃ nīlotpaladalekṣaṇam |
viśālacārujaghanaṃ cārukuṇḍalamaṃḍitam |
putramicchati deveśi mṛkaṇḍo'yaṃ mahāmuniḥ || 13 ||
[Analyze grammar]

tvayāpyuktaṃ punardevi kāruṇyādbhaktivatsale |
na dadāsi muneḥ putraṃ tapyato viṣamaṃ tapaḥ || 14 ||
[Analyze grammar]

phalasya dātā tapasāṃ kathaṃ tvaṃ gīyase budhaiḥ |
kastvāṃ nu śaraṇaṃ gacchellokānāṃ sambhavaṃ bhavam || 15 ||
[Analyze grammar]

karoṣi sarvadaityānāṃ sarvadevākulākulam |
tvayāhaṃ suciraṃ devaṃ satkṛtā karuṇākara || 16 ||
[Analyze grammar]

nānyo māmanukampārthaṃ prayacchetpravaraṃ varam |
sa tvaṃ sarvajagannātha prabhuḥ karttā praśāsitā || 17 ||
[Analyze grammar]

hetuḥ svāmī maheśāno dayālurbhaktavatsalaḥ |
sarveśvara stuto'bhīṣṭaṃ kiṃ na viprāya dīyate || 18 ||
[Analyze grammar]

tapasā kṣīṇapāpasya brahmatve bhāvitātmanaḥ |
asya putrapradānaṃ tvaṃ kuru madvacanācchiva || 19 ||
[Analyze grammar]

mayā tvaṃ varṇitā devi snehākṣarapadaiḥ śubhaiḥ |
lolapaṃkajapatrākṣi gauri bhūdharagātraje || 20 ||
[Analyze grammar]

skaṃdamātaḥ kalāpūrṇacaṃdrabimbanibhānane |
kṛśodari viniḥspṛṣṭacāmīkaranibhadyute || 21 ||
[Analyze grammar]

tvayoktaṃ prakariṣyāmi vākyaṃ dviradagāmini |
tvaṃ siddhiḥ sādhakā sādhyaṃ tvaṃ kriyā prakramāśrayā || 22 ||
[Analyze grammar]

tvaṃ māyā śrīrdyutiḥ śrīmacchraddhārucirasaṃtatiḥ |
kṛtvā mānaṃ bahuvidhaṃ mayaiva saha sundari || 23 ||
[Analyze grammar]

bhrājase vividhākārā mohayitvākhilaṃ jagat |
tvayāpyuktaṃ punardevi kriyatāṃ tu vaco mama || 24 ||
[Analyze grammar]

munaye'smai tapaḥkṣīṇasarvagātrāya sāṃpratam |
varaḥ pradīyatāmasmai brāhmaṇāya maheśvara || 25 ||
[Analyze grammar]

mayāpyuktaṃ viśālākṣi śrūyatāṃ vacanaṃ mama |
asau gacchatu vipreṃdro mahākālavanottame || 26 ||
[Analyze grammar]

pattaneśvarapūrve tu tatrāste liṃgamuttamam |
putrapradaṃ viśālākṣi mahāpātakanāśanam || 27 ||
[Analyze grammar]

madīyaṃ vacanaṃ śrutvā tvayāpyukto dvijottamaḥ |
mahākālavanaṃ gaccha putrārthamṛṣi sattama |
tatra liṃgaṃ samārādhya lapsyase putramuttamam || 28 ||
[Analyze grammar]

tvayā saṃprerito viprastatheti kṛtaniścayaḥ |
āśayā parayā yuktaḥ putrakāmo jagāma saḥ || 29 ||
[Analyze grammar]

tatra dṛṣṭvā mahāliṃgaṃ putradaṃ pāpanāśanam |
bhaktyā saṃsevayāmāsa tapasā duṣkareṇa tu || 30 ||
[Analyze grammar]

atha kenāpi kālena niḥsṛto'haṃ tvayā saha |
liṃgamadhyādvarārohe sa ca prokto dvijottamaḥ || 31 ||
[Analyze grammar]

śarvo'hamiti jānīhi brūhi kiṃ karavāṇi te |
āvāṃ purā prasannau te jñātaṃ tava viceṣṭitam || 32 ||
[Analyze grammar]

yamicchasi varaṃ brahmaṃstadadya pradadāmi te |
mayā proktaḥ prasannena muniḥ paramavismitaḥ || 33 ||
[Analyze grammar]

prahvaḥ prāha suhṛdaye sa hṛṣṭo muni sattamaḥ |
apatyahetordeveśau kimalabhyaṃ bhavenmama || 34 ||
[Analyze grammar]

mayā proktastadā devi mṛkaṇḍo munisattamaḥ |
ayonijaste tanayo mānuṣo vai bhavi ṣyati |
aiśvaryajñānasaṃpanno dīrghāyuḥ sarvavitsudhīḥ || 35 ||
[Analyze grammar]

etasminnaṃtare devi prādurbhūto mahātapāḥ |
putraḥ paramadharmātmā mārkaṇḍeyo mahāmuniḥ || 36 ||
[Analyze grammar]

sa jātamātro dharmātmā tatraiva tapasi sthitaḥ |
devamārādhayāmāsa sa tuṣṭo'tha varaṃ dadau || 37 ||
[Analyze grammar]

tvayāhaṃ jātamātreṇa tapasā toṣito yataḥ |
tasmātkhyātiṃ gamiṣyāmi tvannāmnā dvijasattama || 38 ||
[Analyze grammar]

ye māṃ paśyaṃti vipreṃdra bhaktyā paramayā yutāḥ |
prāpnuvaṃti gatiṃ nityaṃ te sadānaṃda dāyinīm || 39 ||
[Analyze grammar]

prasaṃgādye gamiṣyaṃti te sadā duḥkhavarjitāḥ |
devadevaṃ samārādhya modiṣyaṃti hi te narāḥ || 40 ||
[Analyze grammar]

tryakṣā gaṇeśvarāḥ siddhāḥ siddhagaṃdharvasevitāḥ |
te bhaviṣyaṃti satataṃ mama bhaktāśca ye narāḥ || 41 ||
[Analyze grammar]

ye māṃ saṃpūjayiṣyaṃti hṛdyaiḥ puṣpaiḥ sugaṃdhibhiḥ |
dīrghāyuṣo bhaviṣyaṃti sadā duḥkhavivarjitāḥ || 42 ||
[Analyze grammar]

ityukte tena liṃgena mārkaṇḍeyo mahātapāḥ |
tapaścacāra tatraiva mahākālavane sthitaḥ || 43 ||
[Analyze grammar]

prabhāvaḥ kathito devi mārkaṃḍeyeśvarasya ca |
śiveśvarasya devasya māhātmyaṃ śṛṇu sāṃpratam || 44 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṇḍe caturaśītiliṅgamāhātmye mārkaṃḍeyeśvaramāhātmyavarṇanaṃnāma ṣaṭtriśo'dhyāyaḥ || 36 ||
[Analyze grammar]