Chapter 18

[English text for this chapter is available]

| śrīśiva uvāca |
devamaṣṭādaśaṃ viddhi khyātaṃ kalakaleśvaram |
yasya darśanamātreṇa kalaho naiva jāyate || 1 ||
[Analyze grammar]

sarvaduḥkhopaśamanaṃ sarvapāpa pramocanam |
vyādhisarpāgnicaurāṇāṃ śamanaṃ vāṃchitapradam || 2 ||
[Analyze grammar]

mama devi tvayā sārddhaṃ kalahaḥ samapadyata |
purā vistarato vacmi śṛṇvekāgramanāḥ śubhe || 3 ||
[Analyze grammar]

yadā tvaṃ himaśailasya duhitā varavarṇini |
tadā vivāhitaṃ kāṃte yathoktavidhinā mayā || 4 ||
[Analyze grammar]

vinivṛtte vivāhe ca tvayā sārddhaṃ varānane |
mahākālīti nāmnā vai varṇenāpi ca tādṛśī || 5 ||
[Analyze grammar]

nīlotpalanibhaprakhyā nīlakuṃcitamūrddhajā |
apyekasmiṃstadā tvaṃ hi mātṝṇāṃ maṃḍape śubhe |
madhye samupaviṣṭāsi kṛṣṇāṃjanasamaprabhā || 6 ||
[Analyze grammar]

kāli suṃdari matpārśve vallabhe tvamupāviśa |
śarīre mama tanvaṃgi site bhāsyasitadyutiḥ || 7 ||
[Analyze grammar]

bhujaṃgīvāsitā śubhre saṃśliṣṭā caṃdane tarau |
rajanīvāsite pakṣe dṛṣṭidoṣaharāsi me || 8 ||
[Analyze grammar]

ityuktāsi mayā devi girije cāruhāsini |
tadā proktaṃ tvayā vākyaṃ māmuddiśya sagadgadam || 9 ||
[Analyze grammar]

yadā tvayā madarthe hi preritā vedapāragāḥ |
saptarṣayo mahābhāgāḥ kiṃkṛte na tadāttha mām || 10 ||
[Analyze grammar]

tadā tvayā madarthe'pi prārthito janako mama |
himādrirājo yatnena kiṃ kālī na tadāttha mām || 11 ||
[Analyze grammar]

yadāpyuktaṃ tvayā dainyānmadarthe gaccha nārada |
prārthyatāṃ pārvatī śīghraṃ kiṃ kālī na tadāttha mām || 12 ||
[Analyze grammar]

satyeyaṃ laukikī gāthā na vṛthā parijāyate |
svakṛtena janaḥ sarvo jāḍyena pari bhūyate || 13 ||
[Analyze grammar]

avaśyamarthī prāpnoti khaṃḍanāṃ tuṃḍamuṃḍanām |
tapotidīrghacārairtayattvāṃ prārthitavatyaham || 14 ||
[Analyze grammar]

tasyā me niyatastveṣa hyavamānaḥ padepade |
naivāsmi kuṭilā raudrā viṣamā na ca dhūrjaṭe || 15 ||
[Analyze grammar]

nākulīnā vṛthācārā na duṣṭā na samatsarā |
saviṣastvaṃ yataḥ khyāto vyaktaṃ doṣā karāśrayaḥ || 16 ||
[Analyze grammar]

akulīno vṛthācāro mātsaryeṇāśritaḥ sadā |
nāhaṃ muṣṇāmi nayane tatra haṃtā tvameva ca || 17 ||
[Analyze grammar]

ādityastvāṃ vijānātu bhagavāndvādaśātmakaḥ |
mayā notpāṭitā daṃtāḥ kasyāpi nirapatrapa || 18 ||
[Analyze grammar]

pūṣādevo vijānāti dvādaśātmā divākaraḥ |
mūrdhni śūlaṃ tava yataḥ svaidoṣairmāmadhikṣipaḥ || 19 ||
[Analyze grammar]

yattu māmāha kṛṣṇeti mahākāleti viśrutaḥ |
ityathāpi pravādo'yaṃ pravaraḥ khyāmi te hara || 20 ||
[Analyze grammar]

nidarśanārthaṃ na dveṣācchrutvā taṃ kṣaṃtumarhasi |
virūpo yāvadādarśe nātmanaḥ paśyate mukham || 21 ||
[Analyze grammar]

manyate tāvadātmānamanyebhyo rūpavattamam |
yadā tu mukhamādarśe vikṛtaṃ so'bhivīkṣate || 22 ||
[Analyze grammar]

tadetaraṃ vijānāti hyātmānaṃ netaraṃ janam |
satyadharmacyutātpuṃsaḥ kṣudrādāśīviṣādiva || 23 ||
[Analyze grammar]

sa nāstikopyudvijate janaḥ kiṃ punarāstikaḥ |
ityukto'haṃ tvayā devi mayā kolāhalaḥ kṛtaḥ || 24 ||
[Analyze grammar]

anātmajñāsi girije mṛḍe paṃḍitamānini |
satyaṃ sarvairavayavaiḥ stuto'pi sadṛśaḥ pituḥ || 25 ||
[Analyze grammar]

kāṭhinyaṃ kaṣṭamabhyeti dhātubhyo bahughātitā |
kuṭilatvaṃ ca sarvebhyo'sevyatvaṃ ca himādiva || 26 ||
[Analyze grammar]

ityuktā'si mayā devi punaḥ proktaṃ tvayā vacaḥ |
tathāpi duṣṭasaṃsargātsaṃkrāṃtaṃ sarvameva hi || 27 ||
[Analyze grammar]

vyālebhyo'nekajihvatvaṃ bhasmataḥ snehavarjanam |
hṛtkāluṣyaṃ śaśāṃkādvai durbodhatvaṃ vṛṣādapi || 28 ||
[Analyze grammar]

śmaśānavāsādbhīrutvaṃ nagnatvaṃ ca na lajjayā |
nirghṛṇatvaṃ kapālācca dayā te vigatā ciram || 29 ||
[Analyze grammar]

evaṃ tadābhavadraudraḥ kalaho bhayakṛcchubhe |
evaṃ pravṛtte tu tadā kaṃpitaṃ bhuvanatrayam || 30 ||
[Analyze grammar]

bhītāśca devagaṃdharvā yakṣagaṃdharvarākṣasāḥ |
tasmātkolāhalo bhūmiṃ bhittvā liṃgamabhūttadā || 31 ||
[Analyze grammar]

liṃgamadhyātsamutpannā vāṇī sukhakarī śubhā |
āśvāsayaṃtī devānvai trailokyaṃ sacarācaram || 32 ||
[Analyze grammar]

nāmāsya cakrurdeveśāstadā kalakaleśvaram |
svaranāmāsau tato'bhūcchaṅkaro bhuvi viśrutaḥ || 33 ||
[Analyze grammar]

yastamarcayate bhaktyā devaṃ kalakaleśvaram |
na rākṣasāḥ piśācāśca na bhūtā na vināyakāḥ |
vipraṃ kuryurvarārohe kalaho na bhavedgṛhe || 34 ||
[Analyze grammar]

suśīlā gṛhiṇī tasya surūpā subhagā priye |
bahuputrā bahudhanā jāyate darśanāttathā || 35 ||
[Analyze grammar]

ye paśyaṃti caturddaśyāṃ devaṃ kalakaleśvaram |
na duḥkhaṃ na jarāvyādhirnākālamaraṇaṃ tathā || 36 ||
[Analyze grammar]

na ca śatrubhayaṃ teṣāṃ jāyate giriputrake |
loko'kṣayo bhaveddevi yāvadiṃdrāścaturddaśa || 37 ||
[Analyze grammar]

eṣa te kathito devi prabhāvaḥ pāpanāśanaḥ |
yasya śravaṇamātreṇa kṣemamatra paratra ca || 38 ||
[Analyze grammar]