Chapter 32

[English text for this chapter is available]

sanatkumāra uvāca |
athānyatsaṃpravakṣyāmi narādityaṃ divākaram |
yasya darśanamātreṇa sarvarogairvimucyate || 1 ||
[Analyze grammar]

sthāpanāṃ te pravakṣyāmi narādityasya yādṛśī |
yuddhe nivārite tasminraktasvedajayoḥ purā || 2 ||
[Analyze grammar]

naranārāyaṇau devāvavatīrṇau dharātale |
kuṃtyāṃ devyāṃ ca devakyāṃ mathurāyāmajāyatām || 3 ||
[Analyze grammar]

evaṃ tau vartitau loke kāṃtau vṛddhiṃ parāṃ gatau |
anyasmātkāraṇātkṛṣṇo 'nyasmājjāto dhanaṃjayaḥ || 4 ||
[Analyze grammar]

kaṃsādīndānavānsarvānnijaghāna raṇe hi saḥ |
svargaṃ gatastataḥ pārtho vāsavādastrasiddhaye || 5 ||
[Analyze grammar]

kṛtāstreṇa tu vīreṇa devarājasya dakṣiṇā |
saṃstutā devarājastu yayāce tāṃ hi dakṣiṇām || 6 ||
[Analyze grammar]

nivātakavacā hyugrā hiraṇyapuravāsinaḥ |
vadhyaṃtāmarjuna kṣiprameṣā me gurudakṣiṇā || 7 ||
[Analyze grammar]

arjunena pratijñāto vadhasteṣāṃ durātmanām |
aiṃdraṃ sa rathamāsthāya gṛhītvā saśaraṃ dhanuḥ || 8 ||
[Analyze grammar]

nihatya tāṃstataḥ pārthaḥ kṛtvā karma suduṣkaram |
prītimutpādayāmāsa sarveṣāṃ ca divaukasām || 9 ||
[Analyze grammar]

kṛtakāryaṃ tadā śakrastvarjunaṃ vākyamabravīt |
yatte'bhiruciraṃ vīra mṛtyuloke sudurlabham || 10 ||
[Analyze grammar]

manasā kāṃkṣitaṃ pārtha varaṃ tvaṃ varayottamam |
sa vavre pratime dve tu ye'rcite brahmaṇā svayam || 11 ||
[Analyze grammar]

brahmaṇā prītiyuktena dakṣāya pratipādite |
dakṣeṇāpi yugaṃ sāgraṃ pūjite timirāpahe || 12 ||
[Analyze grammar]

surāṇāmasurāṇāṃ ca vigrahe samupasthite |
dānavairnirjitaḥ śakro hṛtarājyo vanaṃ gataḥ || 13 ||
[Analyze grammar]

tapaścacāra durdharṣamekapādaḥ śatakratuḥ |
divyavarṣasahasraṃ tu dhiṣaṇastaṃ dadarśa ha || 14 ||
[Analyze grammar]

dṛṣṭvā tu devarājaṃ taṃ bṛhaspatiruvāca ha |
hitvā tridivamāyātaḥ kathaṃ śakra tvidaṃ vanam || 15 ||
[Analyze grammar]

ekākinā vanasthena na sādhyāḥ śatravastvayā |
jñātvaivaṃ devarāja tvaṃ śīghraṃ dakṣāśramaṃ vraja || 16 ||
[Analyze grammar]

pūjārthe brahmaṇā datte pārijātasamudbhave |
cakāra viśvakarmā ye te yācasva prajāpatim || 17 ||
[Analyze grammar]

śatrūṇāṃ ca kṣayo bhāvī prasādādarcayo stayoḥ |
gurostu tena vākyena hṛṣṭo devaḥ śatakratuḥ || 18 ||
[Analyze grammar]

jagāma satvarastatra yatra dakṣaḥ prajāpatiḥ |
vinayāvanato bhūtvā yayāce pratime śubhe || 19 ||
[Analyze grammar]

pūjite pratime vyāsa śakreṇa śaradāṃ śatam |
tayostu tejasā sarve vināśaṃ dānavā gatāḥ || 20 ||
[Analyze grammar]

pratime cocutuḥ śakraṃ varayasva varottamam |
bhaktyānayā paraṃ tuṣṭāvāvāṃ jānīhi vāsava || 21 ||
[Analyze grammar]

varaṃ vavre tadā śakraḥ prasannātmā dvijotma |
asmākaṃ pratipakṣā ye dānavāḥ pāpacetasaḥ || 22 ||
[Analyze grammar]

sarve te nāśamṛcchaṃtu vara eṣa mato mama |
yuvāṃ pūjitumicchāmi yāvadiṃdro bhavāmyaham || 23 ||
[Analyze grammar]

tatheti coktvā pratime te nākaṃ prati jagmatuḥ |
tattu yāce hyavaśyārthe varārthe pratimādvayam || 24 ||
[Analyze grammar]

iṃdra uvāca |
sādhu pārtha punaḥ sādhu yatretthaṃ pratitiṣṭhataḥ |
ime ca pratime pārtha śaṃkareṇa mahātmanā || 25 ||
[Analyze grammar]

suraktaiḥ śatapatraiśca pūjite brahmaṇo dinam || |
trailokyapālanārthāya pūjite viṣṇunā purā || 26 ||
[Analyze grammar]

nīlotpalaiḥ sugaṃdhaiśca sahasraparivatsarān |
tataḥ prajāpatiḥ sṛṣṭiṃ kartukāmaḥ samā hitaḥ || 27 ||
[Analyze grammar]

pūjayāmāsa pratime padmai raktotpalaiḥ śubhaiḥ |
tvameva hi kathaṃ pārtha mṛtyuloke nayiṣyati || 28 ||
[Analyze grammar]

etābhyāṃ rahitaḥ svargo mṛtyutulyo bhaviṣyati |
adātukāmaṃ deveṃdraṃ praṇipatya tamarjunaḥ || 29 ||
[Analyze grammar]

uvāca nāhamarthyasminvareṇānena vai prabho |
tataḥ śakraḥ punaḥ pārthamuvāca munipuṃgava || 30 ||
[Analyze grammar]

gṛhītvā tvamime vīra kuśasthalyāṃ niveśaya |
śiprāyā uttare tīre keśavārkaṃ tu keśavaḥ || 31 ||
[Analyze grammar]

prati tiṣṭhati vai yatra sarvapāpapraṇāśanaḥ |
saṃsthāpayasva vai tatra sarvapāpapraṇāśane |
bhaviṣyati tadā yātrā āṣāḍhī cātha kaumudī || 32 ||
[Analyze grammar]

āgamiṣyāmyahaṃ tatra sahito'psarasāṃ gaṇaiḥ |
marutaścāgamiṣyaṃti meghāścaiva savidyutaḥ || 33 ||
[Analyze grammar]

meghakhaṇḍe samudbhūte mayi tatra pravarṣati |
pravadiṣyaṃti vai lokāḥ prāpto devaḥ puraṃdaraḥ || 34 ||
[Analyze grammar]

bhāskaraṃ ca namaskṛtya brahmādyaiḥ pūjitaṃ vibhum |
pratiyāmi tu bībhatso punareva yathāgatam || 35 ||
[Analyze grammar]

evaṃ mṛrtidvayaṃ vyāsa dattvā pārthāya vāsavaḥ |
bhūrlokaṃ preṣayāmāsa sūtena saha pāṃḍavam || 36 ||
[Analyze grammar]

nārado dvārakāyāṃ tu kṛṣṇasyāhvānakāraṇāt |
devarājasya tadvākyaṃ sarahasyaṃ ca keśavam || 37 ||
[Analyze grammar]

śrāvayāmāsa vipreṃdraṃ ehi kṛṣṇa kuśasthalīm |
arcce hi pārijātasya viśvakarmasukārite || 38 ||
[Analyze grammar]

iṃdreṇātha pradatte vai te tubhyaṃ pāṃḍavāya ca |
śrutvā śauristu tadvākyaṃ pratasthe'vaṃtinīpurīm || 39 ||
[Analyze grammar]

avātaracca ākāśāttamāliṃgya ca pāṃḍavam |
prītaḥ provāca vacanaṃ pariṣvajya ca phālgunam || 40 ||
[Analyze grammar]

janma me saphalaṃ jātaṃ prītirme janitārjuna |
yato me prītiratulā kriyatāṃ kāryamuttamam || 41 ||
[Analyze grammar]

ityuktvā tau tadā vyāsa samāyātau kuśasthalīm |
pārthaṃ prāha tadā kṛṣṇaḥ susaṃpūrṇamanorathaḥ || 42 ||
[Analyze grammar]

gatvārjuna diśaṃ prācīṃ mūrtimekāṃ niveśaya |
pūrvāhne hi śubhaṃ lagnaṃ bhaviṣyati manoramam || 43 ||
[Analyze grammar]

ahamapyuttarāṃ yāmi sthāpanārthaṃ nadīṃ mune |
mama śaṃkhasya nādena pratitiṣṭha raviṃ prabhum || 44 ||
[Analyze grammar]

pūrvāṃ gatvā tataḥ pārtha śubhaṃ sthānaṃ vyalokayat |
vyāsa saṃsthāpayāmāsa dinanāthaṃ ca susthiram || 45 ||
[Analyze grammar]

arkaṃ devaṃ sthāpayāmi yāvaddadhyau ca pāṃḍavaḥ |
tāvatsa cābravīdenaṃ sthānaṃ kāraya śobhanam || 46 ||
[Analyze grammar]

kathayāmāsa pārthāya tejasā tena duḥsaham |
savyasācī tato bhīto dṛṣṭvārccāṃ tāṃ prajalpatīm || 47 ||
[Analyze grammar]

tejastvasahamāno vai devaṃ vacanamabravīt |
kva deva tvāṃ sthāpayāmi kiṃ sthānaṃ tava rocate || 48 ||
[Analyze grammar]

saumya rūpaḥ sudarśaśca prajābhyo bhava gopate |
divisaṃsthāśca ye devā nāgāḥ pātālasaṃśrayāḥ || 49 ||
[Analyze grammar]

bhuvisthā mānavāḥ pūtā bhavaṃtu tava darśanāt |
so'rjunamabravīddevo mā bhaistvaṃ mama darśanāt || 50 ||
[Analyze grammar]

dakṣiṇena kareṇātha hyabhayenābhayapradaḥ |
samāśvāsyātha taṃ śāṃtaṃ saumyamūrtirbabhūva ha || 51 ||
[Analyze grammar]

prabhākareṇa devena nijaṃ tejaḥ pradarśitama |
tataḥ sūryo'bravītsthānametadevācalaṃ mama || 52 ||
[Analyze grammar]

prāpte lagne ca hariṇā śaṃkhaścāpūrito mahān |
nareṇa ca sa vai sūryaḥ sthāpito'marasaṃstutaḥ || 53 ||
[Analyze grammar]

arjuna uvāca |
jayati kiraṇamālī bhāsuraḥ śrāṃtasaptiḥ sakalabhuvanadhāmā prāgdigaṃtāṭṭahāsaḥ |
bhavati vigatapāpaṃ kīrtanādeva yasya pracurakaluṣadoṣairgrastamaṃgaṃ narāṇām || 54 ||
[Analyze grammar]

brahmādyairmunibhirabhiṣṭutaṃ pataṃgaṃ kaḥ stotuṃ kavirabhivāṃchate prakāmam |
stoṣyehaṃ tadapi suvistarātsubuddhe kiṃ dīpo jvalati hi nodite śaśāṃke || 55 ||
[Analyze grammar]

śāstrārthakāmanipuṇairmunibhiḥ stutasya kiṃ vastu yanna racitaṃ vividhaiḥ prayogaiḥ |
dvaipāyanaprabhṛtibhirmunibhiḥ purāṇairāpītasāramiha bhāti jagatsamastam || 56 ||
[Analyze grammar]

kāmaṃ tathāpyahamatīva vicārya bruddhyā bhānostrilokagurupūjitapādayugmam |
vṛttaiḥ sphuṭārthamadhurākṣarasaṃdhiyuktaistvāṃ vai vicitragatibhiḥ parikīrtayiṣye || 57 ||
[Analyze grammar]

tāvajjagadbhavati niścalameva sarvaṃ tāvatkriyāśca vividhā na ca yāṃti siddhim |
yāvacca nātha kamalāmalamaṃḍala tvamuttiṣṭhase vyapanayankiraṇaistamāṃsi || 58 ||
[Analyze grammar]

tāvanna bhāṃti śikharāṇi mahīruhāṇāṃ gucchaistu phullavanamīlitalocanāni |
suptāni bodhayasi ṣaṭcaraṇākulāni yāvanna bhābhiramalābhiranuttamābhiḥ || 59 ||
[Analyze grammar]

udyaṃtamaṃbaratale surasiddhasaṃghāḥ sabrahmadaityamunikinnaranāgayakṣāḥ |
tvāmarcayaṃti vibudhāḥ praṇataiḥ śirobhiścañcatkirīṭamaṇibhābhiranuttamābhiḥ || 60 ||
[Analyze grammar]

astaṃ gate tvayi jagadbhavati prasuptaṃ bhūyastvayi pratapati pratibodhameti |
evaṃ sadā varada lokahitārthahetorekastvameva bhagavaṃstimirasya haṃtā || 61 ||
[Analyze grammar]

utsāhaśaktinayaśauryasamanvitānāṃ sevāprayogaracanāvidhitatparāṇām |
kāryāṇi yanna phaladāni bhavaṃti puṃsāṃ hetustvabhaktiriha nātha veti nūnam || 6262 ||
[Analyze grammar]

yatsaṃyugeṣu rathakuñjarakuntaśaktinārācacakraśaratomarabhīmakhaḍgaiḥ |
kṣipraṃ narāḥ samupayāṃti vijitya śatrūnsarvaṃ sadā praṇatavatsala veṣṭitaṃ te || 63 ||
[Analyze grammar]

kāṃtāradurgaviṣameṣvapi vartamānā ṛkṣebhasiṃhabahukaṇṭakataskareṣu |
tṛṣṇānvitāśca bahuśokavimūḍhacittāstvatkīrtanāddhi gatamṛtyu bhayā bhavaṃti || 64 ||
[Analyze grammar]

tejorāśistvamiha śaraṇaṃ sarvatoduḥkhitānāṃ |
tvattulyo'nyo jagati sakale nāsti kaściddayāluḥ |
tvayyekasminbhavati sakalā bhaktiranviṣyamāṇā |
tvāmāsādya prabhavati kuto vyādhiduḥkhaṃ narāṇām || 65 ||
[Analyze grammar]

kaḥ kuṣṭhābhihataḥ kva cāribhiratho ko vyādhibhiḥ pīḍitaḥ |
ke paṃgvaṃdhajaḍāḥ kva śīrṇacaraṇaḥ ko vā vipannakriyaḥ |
ityevaṃ prasamīkṣya deva kṛpayā doṣātparitrāyase |
kasyānyasya paropakāraniratā ceṣṭā yathaiṣā tava || 66 ||
[Analyze grammar]

dharmaḥ paratra kila tiṣṭhati sevito'sau |
kālāṃtareṇa vibudhā varadā bhavaṃti |
tvaṃ sevitaḥ praṇatavatsala bhūtikāmaiḥ |
sadyaḥ prayacchasi phalaṃ yadabhīpsitaṃ taiḥ || 67 ||
[Analyze grammar]

vibhrāṃtakāṃtahariṇīsadṛśekṣaṇābhiḥ |
kāṃtoruhāramaṇikuṇḍalamekhalābhiḥ |
teṣāṃ bhavaṃti bhavanāni vilāsinībhiryeṣāṃ nṛṇāṃ tvamasi vai varadaḥ prasannaḥ || 68 ||
[Analyze grammar]

yaistvaṃ naraiḥ sakṛdapi praṇataḥ kathaṃciddhyāto'thavā bhuvananātha tathāṃtakāle |
niṣkalmaṣā jagati duṣkṛtino bhavaṃti te nirmalāḥ sukṛtino gatimāpnuvaṃti || 69 ||
[Analyze grammar]

ye tvāṃ kutarkamatibhirna namaṃti bhaktyā romāṃcakaṃcukaśatākulitaiḥ śarīraiḥ |
te nirdhanāḥ paragṛheṣvavabhūtamannaṃ kṣutkṣāmakaṇṭhavadanāḥ paritarkayaṃti || 70 ||
[Analyze grammar]

udadhijalataraṃgakṣobhalolākṣiyugmaiḥ saphaṇimaṇimayūkhodbhāsitairlelihadbhiḥ |
praṇipatitaśirobhirnāgamukhyairajasraṃ śrutibhiranupamābhiḥ stūyase puṣkalābhiḥ || 71 ||
[Analyze grammar]

tava suravara gacchato'nusaraṃti tridaśanadīkamalodga tāni vātaiḥ |
kanakakamalareṇupiṃjaritāni bhramarakulāni pataṃga cāmarāṇi || 72 ||
[Analyze grammar]

tattvadhyānaṃ jalanidhinivahe sthitvā sthitvā caraṇanivahaiḥ |
ājīvārthaṃ pratapasi bhagavankaste tulyastribhuvanasamaye || 73 ||
[Analyze grammar]

udayādrinitaṃbasaṃsthitasya hyudayeṣvastamayeṣu cāvṛtasya |
kiraṇāstapanīyasaprabhāste vilasantastaḍito viḍaṃbayaṃti || 74 ||
[Analyze grammar]

yathāyathā vrajati rathastavāṃbare vipāṭayandhanatimiraughasaṃcayān |
tathātathā kṣubhitamahānilāsṛtaṃ pratīyate muhuriva dundubhiryathā || 75 ||
[Analyze grammar]

cārupadmavinimīlitekṣaṇāṃ cakravākakalahaṃsamekhalām |
kāminīmiva ratiśramālasāṃ tāṃ vibodhayasi padminīṃ karaiḥ || 76 ||
[Analyze grammar]

nīlalolamatikāntamutpalaṃ bhṛṃgatuṃgacaraṇākulīkṛtam |
tvatprabhābhiranurāgaraṃjitaṃ padmarāgamiva śobhate bhṛśam || 77 ||
[Analyze grammar]

sphuracchaśāṃkahāranirmalaṃ khaga tvadaṃkeṣvacaṃcalam |
vibhātyatīva kāṃtamaṃbaraṃ samaṃ bṛhaccaika pāṭalam || 78 ||
[Analyze grammar]

hariti ca tāvanmuhirniṣevitatamasyaśubhaṃ bhavati ca yāvadaiva kiraṇaistava pūjitataram |
ṛṣibhirmunibhirudāradhībhiḥ śāśva tamārgaparairvarada na śakyate tava guṇastutirāśrayitum || 79 ||
[Analyze grammar]

tvaṃ viṣṇustvaṃ śaśāṃkastvamasuramathanaḥ śaṇmukhastvaṃ dhaneśastvaṃ kālastvaṃ ca dhātā kṣitidharamalayāpāśrayastvaṃ hutāśaḥ |
oṃkārastvaṃ dvijānāṃ tvamiha jalanidhitvaṃ śarastvaṃ ca rudrastvaṃ mukhyastvaṃ payodo vratayamaniyamāstvaṃ jagatsarvameva || 80 ||
[Analyze grammar]

tvamaniṃdya gopate tripuramathana manmathadāhakarastvamasurabhīmadarpahā pāhi mām |
tridaśādhipakamalavarānanastvamiha devagururbhagavāṃ stribhuvanamaṇḍale'sti katamastava tulyaguṇaḥ || 81 ||
[Analyze grammar]

āditya bhāskara divākara saptasapte mārtaṃḍa sūrya haridaśvapate ca bhāno |
aśrāṃtavāhana kharūpa gabhastimāliṃstvāṃ lokanātha śaraṇaṃ pratipadyate'sau || 82 ||
[Analyze grammar]

prāgdigvadhūtilakabhāsurakarṇapūra maṃdākinīdayitanātha jagatpradīpa |
hemādritāpana nabhastalahāriratna sandhyāṃganāvadanarāga namonamaste || 83 ||
[Analyze grammar]

brahmaiva satya śubhamaṃgala lokanātha vyomāṃgaṇeśa munisaṃstuta viśvamūrte |
ārtasya śokahara kiṃkarapālakaśca tvaṃ me prasīda bhagavañcharaṇāgatasya || 84 ||
[Analyze grammar]

kṛtvāṃjaliṃ śirasi paṃkajakuḍmalābhaṃ yatsaṃstutastvamiha deva mayādya bhaktyā |
tena prabho bhava mamopari saumyamūrtirdharme matiṃ kuru sadā śriyamūrjitāṃ ca || 85 ||
[Analyze grammar]

namaḥ savitre jagadekacakṣuṣe jagatprasūtisthitināśahe tave |
trayīmayāya triguṇātmadhāraṇe viraṃcinārāyaṇaśaṃkarātmane || 86 ||
[Analyze grammar]

sūrya uvāca |
tuṣṭohamadhunā pārtha stotreṇānena suvrata |
varaṃ dāsyāmi yatnena yatte manasi vartate || 87 ||
[Analyze grammar]

maddarśanaṃ hi viphalaṃ na kadācitprajāyate |
śūrāṇāṃ ca viśeṣeṇa hyadeyaṃ nāsti yatnataḥ || 88 ||
[Analyze grammar]

arjuna uvāca |
eṣa eva varo mahyaṃ varāṇāmuttamottamaḥ |
atra saṃnihito deva sarvakālaṃ bhava prabho || 89 ||
[Analyze grammar]

ye ca tvāṃ mānavā bhaktyā sto ṣyaṃti praṇatāḥ sadā |
teṣāṃ dhanaṃ ca dhānyaṃ ca putradārādikaṃ vasu || 90 ||
[Analyze grammar]

manasaścepsitaṃ sarva dātavyaṃ hi varo mama |
sanatkumāra uvāca |
ādityo 'smai varaṃ dattvā hyuvāca vacanaṃ śubham || 91 ||
[Analyze grammar]

yastvatkṛtena stotreṇa māṃ stoṣyati narottamaḥ |
śriyā na vicyutistasya bhavedeṣa varo mama || 92 ||
[Analyze grammar]