Chapter 37

[English text for this chapter is available]

agastya uvāca |
sarvajñasūno ṣaḍvaktra sarvārthakuśala prabho |
prādurbhāvaṃ niśamyaiṣāṃ liṃgānāṃ muktidāyinām || 1 ||
[Analyze grammar]

nitarāṃ paritṛptosmi sudhāṃ pītveva nirjaraḥ |
oṃkārapramukhairliṃgairidamānaṃdakānanam || 2 ||
[Analyze grammar]

ānaṃdamevajanayedapi pāpajuṣāmiha |
parānaṃdamahaṃ prāptaḥ śrutvaitalliṃgakīrtanam || 3 ||
[Analyze grammar]

jīvanmuktaivāsaṃ hi kṣetratattvaśruteraham |
skaṃdadakṣeśvarādīni liṃgānīha caturdaśa |
yānyuktāni samācakṣva tatprabhāvamaśeṣataḥ || 4 ||
[Analyze grammar]

yo dakṣo garhayāmāsa madhye devasabhaṃ vibhum |
sa kathaṃ liṃgamīśasya pratyasthāpayadadbhutam || 5 ||
[Analyze grammar]

iti śrutvā śikhirathaḥ kuṃbhayonerudīritam |
sūta saṃkathayāmāsa dakṣeśvara samudbhavam || 6 ||
[Analyze grammar]

skaṃda uvāca |
ākarṇaya mune vacmi kathāṃ kalmaṣahāriṇīm |
puraścaraṇakāmosau dakṣaḥ kāśīṃ samāyayau || 7 ||
[Analyze grammar]

chāgavaktro virūpāsyo dadhīci paridhikkṛtaḥ |
prāyaścittavidhānārthaṃ sūpadiṣṭaḥ svayaṃbhuvā || 8 ||
[Analyze grammar]

ekadā devadevasya sevārthaṃ śaśimaulinaḥ |
kailāsamagamadviṣṇuḥ padmayonipuraskṛtaḥ || 9 ||
[Analyze grammar]

iṃdrādayo lokapālā viśvedevā marudgaṇāḥ |
ādityā vasavo rudrāḥ sādhyā vidyādharoragāḥ || 10 ||
[Analyze grammar]

ṛṣayo'psarasoyakṣā gaṃdharvāḥ siddhacāraṇāḥ |
tairnato devadeveśaḥ parihṛṣṭatanūruhaiḥ || 11 ||
[Analyze grammar]

stutaśca nānā stutibhiḥ śaṃbhunāpi kṛtādarāḥ |
viviśuścāsanaśreṇyāṃ tanmukhāsaktadṛṣṭayaḥ || 12 ||
[Analyze grammar]

atha teṣūpaviṣṭeṣu śaṃbhunā viṣṭaraśravāḥ |
kṛtahastaparisparśamānaḥ pṛṣṭo mahādaram || 13 ||
[Analyze grammar]

śrīvatsalāṃchana hare daityavaṃśadavānala |
kaccitpālayituṃ śaktistrilokīmastyakuṃṭhitā || 14 ||
[Analyze grammar]

ditijāndanujānduṣṭānkaccicchāsi raṇāṃgaṇe |
api kuddhānmahīdevānmāmiva pratimanyase || 15 ||
[Analyze grammar]

bādhayā rahitā gāvaḥ kaccitsaṃti mahītale |
striyaḥ saṃti hi suśrīkāḥ pativrataparāyaṇāḥ || 16 ||
[Analyze grammar]

vidhiyajñāḥ pravartaṃte pṛthivyāṃ bahudakṣiṇāḥ |
nirābādhaṃ tapaḥ kaccidasti śaśvattapasvinām || 17 ||
[Analyze grammar]

niṣpratyūhaṃ paṭhaṃtyeva sāṃgānvedāndvijottamāḥ |
mahīpālāḥ prajāḥ kaccitpāṃti tvamivakeśava || 18 ||
[Analyze grammar]

sveṣu sveṣu ca dharmeṣu kaccidvarṇāśramāstathā |
niṣṭhāvaṃto hi tiṣṭhaṃti prahṛṣṭeṃdriyamānasāḥ || 19 ||
[Analyze grammar]

dhūrjaṭiḥ paripṛchyeti hṛṣṭaṃ vaikuṃṭhanāyakam |
brahmāṇaṃ cāpi papraccha brāhmaṃ tejaḥ samedhate || 20 ||
[Analyze grammar]

satyamaskhalitaṃ kaccidasti trailokyamaṃḍape |
tīrthāvarodho na kvāpi kenacitkriyate vidhe || 21 ||
[Analyze grammar]

iṃdrādayaḥ surāḥ kaccitsveṣu sveṣu pureṣvaho |
rājyaṃ praśāsati svasthāḥ kṛṣṇadordaṃḍapālitāḥ || 22 ||
[Analyze grammar]

pratyekaṃ paripṛcchayeśaḥ sarvānitthaṃ kṛtādarān |
pṛṣṭvā gamanakāryaṃ ca teṣāṃ kṛtvā manorathān || 23 ||
[Analyze grammar]

visasarjātha tānsarvāndevaḥ saudhaṃ samāviśat |
gateṣvatha ca deveṣu svasva dhiṣṇyeṣu hṛṣṭavat || 24 ||
[Analyze grammar]

madhye mārgaṃ sa ciṃtobhūddakṣaḥ satyāḥ pitā tadā |
anyadevasamānaṃ sa mānaṃ prāpa na cādhikam || 25 ||
[Analyze grammar]

atīva kṣubdhacittobhūnmaṃdarāghātato'bdhivat |
uvāca ca manasyetanmahākrodharayāṃdhadṛk || 26 ||
[Analyze grammar]

atīvagarvito jātaḥ satī me prāpya kanyakām |
kasyacinnāpyasau prāyo na kosyāpi kvacitpunaḥ || 27 ||
[Analyze grammar]

kiṃ vaṃśyastveṣa kiṃ gotraḥ kiṃ deśīyaḥ kimātmakaḥ |
kiṃ vṛttiḥ kiṃ samācāro vipā dī vṛṣavāhanaḥ || 28 ||
[Analyze grammar]

na prāyaśastapasvyeṣa kva tapaḥ kvāstradhāraṇam |
na gṛhastheṣu gaṇyosau śmaśānanilayo yataḥ || 29 ||
[Analyze grammar]

asau na brahmacārī syātkṛtapāṇigraha sthitiḥ |
vānaprasthyaṃ kutaścāsminnaiśvaryamadamohite || 30 ||
[Analyze grammar]

na brāhmaṇobhavatyeṣa yato vedo na vettyamum |
śastrāstradhāraṇātprāyaḥ kṣatriyaḥ syānna sopyayam || 31 ||
[Analyze grammar]

kṣatātsaṃtrāṇanātkṣatraṃ tatkvāsminpralayapriye |
vaiśyopi na bhavedeṣa sadā nirdhanaceṣṭanaḥ || 32 ||
[Analyze grammar]

śūdropi na bhavetprāyo nāgayajñopavītavān |
evaṃ varṇāśramātītaḥ kosau samyaṅnakīrtyate || 33 ||
[Analyze grammar]

sarvaḥ prakṛtyā jñāyeta sthāṇuḥ prakṛtivarjitaḥ |
prāyaśaḥ puruṣonāsāvardhanārīvapuryataḥ || 34 ||
[Analyze grammar]

yoṣāpi na bhavedeṣa yatosau śmaśrulānanaḥ |
napuṃsakopi na bhavelliṃgamasyayatorcyate || 35 ||
[Analyze grammar]

bālopi na bhavatyeṣa yato'yaṃ bahuvārṣikaḥ |
anādivṛddho lokeṣu gīyate cogra eṣa yat || 36 ||
[Analyze grammar]

ato yuvatvaṃ saṃbhāvyaṃ nātra nūnaṃ ciraṃtane |
vṛddho'pi na bhavatyeṣa jarāmaraṇavarjitaḥ || 37 ||
[Analyze grammar]

brahmādīnsaṃharetprāṃte tathāpi ca na pātakī |
puṇyaleśopi nāstyasminbrahmamaulicchidikrudhā || 38 ||
[Analyze grammar]

asthinepathyavati ca kva śucitvaṃ vivāsasi |
kiṃ bahūktena no kiṃcijjñāyate'sya viceṣṭitam || 29 ||
[Analyze grammar]

aho dhārṣṭyaṃ mahaddṛṣṭaṃ jaṭilasyādya cādbhutam |
yadāsanānnotthitosau dṛṣṭvā māṃ śvaśuraṃ gurum || 40 ||
[Analyze grammar]

evaṃbhūtā bhavaṃtyeva mātāpitṛvivarjitāḥ |
nirguṇā akulīnāśca karmabhraṣṭā niraṃkuśāḥ || 41 ||
[Analyze grammar]

svacchaṃdacāriṇo'nāthāḥ sarvatra svābhimāninaḥ |
akiṃcanā apiprāyastathāpīśvaramāninaḥ || 42 ||
[Analyze grammar]

jāmātṝṇāṃ svabhāvoyaṃ prāyaśo garvabhājanam |
kiṃcidaiśvayarmāsādya bhavatyeva na saṃśayaḥ || 43 ||
[Analyze grammar]

dvijarājaḥ sa garviṣṭho rohiṇīpremanirbharaḥ |
kṛttikādiṣu cāsnehī mayā śaptaḥ kṣayīkṛtaḥ || 44 ||
[Analyze grammar]

asyāhaṃ garvasarvasvaṃ hariṣyāmyeva śūlinaḥ |
yathāvamānitaścāhamanenāsya gṛhaṃ gataḥ || 45 ||
[Analyze grammar]

tathāsyāhaṃ kariṣyāmi mānahāniṃ ca sarvataḥ |
saṃpradhāryeti bahuśaḥ sa tu dakṣaḥ prajāpatiḥ || 46 ||
[Analyze grammar]

prāpya svabhavanaṃ devānājuhāva savāsavān |
ahaṃ yiyakṣuryūyaṃ me yajñasāhāyyakāriṇaḥ || 47 ||
[Analyze grammar]

bhavaṃtu yajñasaṃbhārānānayaṃtu tvarānvitāḥ |
śvetadvīpamatho gatvā cakre cakriṇamacyutam || 48 ||
[Analyze grammar]

mahākratūpadraṣṭāraṃ yajñapūruṣameva ca |
tasyartvijobhavansarva ṛṣayo brahmavādinaḥ || 49 ||
[Analyze grammar]

prāvartata tatastasya dakṣasya ca mahādhvaraḥ |
dṛṣṭvā devanikāyāṃśca tasmindakṣa mahādhvare || 50 ||
[Analyze grammar]

anīśvarāṃstato vedhā vyājaṃ kṛtvā gṛhaṃ yayau |
dadhīciratha saṃvīkṣya sarvāṃstrailokyavāsinaḥ || 51 ||
[Analyze grammar]

dakṣayajñe samāyātānsatīśvaravivarjitān |
prāptasaṃmānasaṃbhārānvāsolaṃkṛtipūrvakam || 52 ||
[Analyze grammar]

dakṣasya hi śubhodarkamicchanprovāca ceti vai |
dadhīciruvāca |
dakṣaprajāpate dakṣa sākṣāddhātṛsvarūpadhṛk || 53 ||
[Analyze grammar]

na cāsti tava sāmarthyaṃ kvāpi kasyāpi niścitam |
yādṛśaḥ kratusaṃbhārastava ceha samīkṣyate || 54 ||
[Analyze grammar]

na tādṛṅnedasi prāyaḥ kvāpi jñāto mahāmate |
kratustu naiva kartavyo nāsti kratusamo ripuḥ || 55 ||
[Analyze grammar]

kartavyaścettadākāryaḥ syāccetsaṃpatti rīdṛśī |
sākṣādagniḥ svayaṃ kuṃḍe sākṣādiṃdrādidevatāḥ || 56 ||
[Analyze grammar]

sākṣācca sarve maṃtrā vai sākṣādyajñapumānasau |
ācāryapadavīmeṣa devācāryaḥ svayaṃ caret |
sākṣādbrahmā svayaṃ caiṣa bhṛgurvai karmakāṃḍavit || 57 ||
[Analyze grammar]

ayaṃ pūṣā bhagastveṣa iyaṃ devī sarasvatī |
ete ca sarvadikpālā yajñarakṣākṛtaḥ svayam || 58 ||
[Analyze grammar]

tvaṃ ca dīkṣāṃ śubhāṃ prāpto devyā ca śatarūpayā |
jāmātā tveṣa te dharmaḥ patnībhirdaśabhiḥ saha || 59 ||
[Analyze grammar]

svayameva hi kurvīta dharmakāryaṃ prayatnataḥ |
oṣadhīnāmayaṃ nāthastava jāmātṛṣūttamaḥ || 60 ||
[Analyze grammar]

saptaviṃśatibhiḥ sārdhaṃ patnībhistava kāryakṛt |
oṣadhīḥ pūrayetsarvā dvijarājo mahāsudhīḥ || 61 ||
[Analyze grammar]

dīkṣito rājasūyasya dattatrailokyadakṣiṇaḥ |
mārīcaḥ kaśyapaścāsau prajāpatiṣu sattamaḥ |
trayodaśamitābhiśca bhāryābhistava kāryakṛt || 62 ||
[Analyze grammar]

haviḥ kāmadughā sūte kalpavṛkṣaḥ samitkuśān |
dārupātrāṇi sarvāṇi śakaṭaṃ maṃḍapādikam || 63 ||
[Analyze grammar]

viśvakarmāpyalaṃkārānkurutebhyāgatartvijām |
vasūni cā'pi vāsāṃsi vasavoṣṭau dadatyapi || 64 ||
[Analyze grammar]

svayaṃlakṣmīralaṃkuryādyāvai cātra suvāsinīḥ || 65 ||
[Analyze grammar]

sarve sukhāya me dakṣa vīkṣamāṇasya sarvataḥ |
ekaṃ duḥkhākarotyeva yattvaṃ vismṛtavānasi || 66 ||
[Analyze grammar]

jīvahīno yathā deho bhūṣitopi na śobhate |
tatheśvaraṃ vinā yajñaḥ śmaśānamiva lakṣyate || 67 ||
[Analyze grammar]

itthaṃ dadhīcivacanaṃ śrutvā dakṣaḥ prajāpatiḥ |
bhṛśaṃ jajvāla kopena haviṣā kṛṣṇavartmavat || 68 ||
[Analyze grammar]

pūrvastutyāti saṃhṛṣṭo dṛṣṭo yosau dadhīcinā |
sa eva cāpi kopāgnimudvamanvīkṣito mukhāt || 69 ||
[Analyze grammar]

pratyuvācātha taṃ vipraṃ vepamānāṃgayaṣṭikaḥ |
dakṣaḥ prajāpatī roṣājjighāṃsuriva taṃ dvijam || 70 ||
[Analyze grammar]

dakṣa uvāca |
brāhmaṇosi dadhīce tvaṃ kiṃ karomi tavātra vai |
dīkṣāmahamaho prāptaḥ kartuṃ nāyāti kiṃcana || 71 ||
[Analyze grammar]

bhavānkena samāhūto yadatrāgānmahājaḍaḥ |
āgatopi hi kena tvaṃ pṛṣṭa itthaṃ prabravīṣi yat || 72 ||
[Analyze grammar]

sarvamaṃgalamāṃgalyo yatra śrīmānayaṃ hariḥ |
svayaṃ vai yajñapuruṣaḥ sa makhaḥ kiṃ śmaśānavat || 73 ||
[Analyze grammar]

yatra vajradharaḥ śakraḥ śatayajñaikadīkṣitaḥ |
trayastriṃśatikoṭīnāmamarāṇāṃ patiḥ svayam || 74 ||
[Analyze grammar]

taṃ tvaṃcopamimīṣemuṃ śmaśānena mahāmakham |
dharmarāṭca svayaṃ yatra dharmādharmaikakovidaḥ || 75 ||
[Analyze grammar]

śrīdosti yatra śrīdātā sākṣādyatrāśuśukṣaṇiḥ |
taṃ yajñamupamāsi tvamamaṃgalabhuvātayā || 76 ||
[Analyze grammar]

devācāryaḥ svayaṃ yatra kratorācāryatāgataḥ |
abhimānavaśāttaṃ tvamākhyāsi pitṛkānanam || 77 ||
[Analyze grammar]

yatrārtvijyaṃ bhajaṃte'mī vasiṣṭhapramukharṣayaḥ |
tamadhvaraṃ samācakṣe maṃgaletarabhūmivat || 78 ||
[Analyze grammar]

niśamyeti muniḥ prāha dadhīcirjñānināṃ varaḥ |
sarvamaṃgalamāṃgalyo bhavedyajñapumānhariḥ || 79 ||
[Analyze grammar]

tathāpi śāṃbhavī śaktirvede viṣṇuḥ prapaṭhyate |
vāmāṃgaṃ sraṣṭurādyasya haristaditaradvidhiḥ || 80 ||
[Analyze grammar]

dīkṣito yośvamedhānāṃ śatasya kuliśāyudhaḥ |
durvāsasā kṣaṇenāpi nīto niḥśrīkatāṃ hi saḥ || 81 ||
[Analyze grammar]

punarārādhya bhūteśaṃ prāpaikāmamarāvatīm |
yastvayā dharmarājotra kathitaḥ kraturakṣakaḥ || 82 ||
[Analyze grammar]

balaṃ tasyākhilairjñātaṃ śvetaṃ pāśayataḥ purā |
dhanadastryaṃbakasakhastaccakṣuścāśuśukṣaṇiḥ || 83 ||
[Analyze grammar]

pārṣṇigrāhyabhavadrudro devācāryasya vai tadā |
yadā tārāmadhārṣītsa dvijarājo'tisuṃdarīm || 84 ||
[Analyze grammar]

taṃ vidaṃti vasiṣṭhādyāstavārtvijyaṃ bhajaṃti ye |
eko rudro na dvitīyaḥ saṃvidānā apīti hi || 85 ||
[Analyze grammar]

prāvartaṃtarṣayonyepi gauravāttava te kratau |
yadi me brāhmaṇasyaikaṃ śṛṇoṣi vacanaṃ hitam || 86 ||
[Analyze grammar]

tadā kratuphalādhīśaṃ viśveśaṃ tvaṃ samāhvaya |
vinā tena kraturasau kṛtopyakṛta eva hi || 87 ||
[Analyze grammar]

sati tasmnimahādeve viśvakarmaikasākṣiṇi |
tavāpi caiṣā sarveṣāṃ phaliṣyaṃti manorathāḥ || 88 ||
[Analyze grammar]

yathā jaḍāni bījāni na phalaṃti svayaṃ tathā |
jaḍāni sarvakarmāṇi na phalaṃtīśvaraṃ vinā || 89 ||
[Analyze grammar]

arthahīnā yathā vāṇī dharmahīnā yathā tanuḥ |
patihīnā yathā nārī śivahīnā tathā kriyā || 90 ||
[Analyze grammar]

gaṃgāhīnā yathā deśāḥ putrahīnā yathā gṛhāḥ |
dānahīnā yathā saṃpacchivahīnā tathā kriyā || 91 ||
[Analyze grammar]

maṃtrihīnaṃ yathā rājyaṃ śrutihīnā yathā dvijāḥ |
yoṣā hīnaṃ yathā saukhyaṃ śivahīnā tathā kriyā || 92 ||
[Analyze grammar]

darbhahīnā yathā saṃdhyā tilahīnaṃ ca tarpaṇam |
havirhīno yathā homaḥ śivahīnā tathā kriyā || 93 ||
[Analyze grammar]

itthaṃ dadhīcinākhyātaṃ jagrāha vacanaṃ na tat |
dakṣo dakṣopi tatraiva śaṃbhormāyā vimohitaḥ || 94 ||
[Analyze grammar]

provāca ca bhṛśaṃ kruddhaḥ kā ciṃtā tava me kratoḥ |
kratumukhyāni sarvāṇi yāni karmāṇi sarvataḥ || 95 ||
[Analyze grammar]

tāni siddhyaṃti niyataṃ yathārthakaraṇādiha |
ayathārthavidhānena siddhyetkarmāpi neśituḥ || 96 ||
[Analyze grammar]

svakarmasiddhaye cātha sarva eva hi ceśvaraḥ |
īśvaraḥ karmaṇāṃ sākṣī yattvayāpīti bhāṣitam || 97 ||
[Analyze grammar]

tattathāstu paraṃ sākṣī nārthaṃ dadyācca kutracit || 98 ||
[Analyze grammar]

jaḍāni sarvakarmāṇi na phalaṃtīśvaraṃ vinā |
yaduktaṃ bhavatā tatrāpyaho dṛṣṭāṃtayāmyaham || 99 ||
[Analyze grammar]

jaḍānyapi ca bījāni kālaṃ saṃprāpyavātmanaḥ |
aṃkūrayaṃti kālācca puṣpyaṃti ca phalaṃti ca || 100 ||
[Analyze grammar]

vināpīśaṃ tathā karma svayaṃ kālātphalatyaho |
kimīśvareṇa tenātra mahāmaṃgalamūrtinā || 1 ||
[Analyze grammar]

dadhīciruvāca |
yathārthakaraṇātsiddhamapi kāryaṃ kadācana |
īśvaraprātikūlyācca siddhamevāśu naśyati || 2 ||
[Analyze grammar]

īśvarecchā balātkarma kṛtamapyavidhānataḥ |
saṃsiddhyettadadhīnāśca kathaṃ sarva iheśvarāḥ || 3 ||
[Analyze grammar]

sāmānyasākṣivanneśaḥ sarveṣāṃ sarvakarmaṇām |
sākṣībhavedasaṃdigdhaḥ phalasya pratibhūrapi || 4 ||
[Analyze grammar]

bhūjalādisvarūpeṇa bījamāviśyasarvakṛt |
svayaṃ kālasvarūpeṇa vidadhyādaṃkurodayam || 5 ||
[Analyze grammar]

yattvayoktaṃ vināpīśaṃ kāle karmaphaletsvayam |
sa eva kālo bhagavānsarvakartā maheśitā || 6 ||
[Analyze grammar]

anyacca bhavatā proktaṃ tadekaṃ tathyameva tat |
kimīśvareṇa tenātra mahāmaṃgalamūrtinā || 7 ||
[Analyze grammar]

ye mahāṃto bhavaṃtyeva ye ca maṃgalamūrtayaḥ |
īśvarākhyā ca yeṣvasti kiṃ tairatra tavāṃtike || 8 ||
[Analyze grammar]

uttarāduttaraṃ ceti pratyuttarayati dvije |
dadhīcau cukrudhe'tyaṃtaṃ dakṣogarvātisuśriyā || 9 ||
[Analyze grammar]

ādideśa samīpasthānālokya paritastviti |
brāhmaṇāpasadaṃ cāmuṃ paridūrayatāśu vai || 110 ||
[Analyze grammar]

amuṣmādadhvaraśreṣṭhādavariṣṭhamanogatam |
itthaṃ dadhīcirākarṇya provāca prahasanniva || 11 ||
[Analyze grammar]

kiṃ māṃ dūrayase mūḍha dūrībhūto bhavānapi |
sarvebhyo maṃgalebhyaśca sarvairebhiḥ samaṃ dhruvam || 12 ||
[Analyze grammar]

akāṃḍe krodhajo daṃḍastava mūrdhni patiṣyati |
maheśitustrijagatī pariśāstuḥ prajāpate || 13 ||
[Analyze grammar]

ityuktvā nirjagāmāśu yajñavāṭāttato dvijaḥ |
tasminniryāti niryāto durvāsāścyavano bhavān || 14 ||
[Analyze grammar]

uttaṃka upamanyuśca ṛcīkoddālakāvapi |
māṃḍavyo vāmadevaśca gālavo gargagautamau || 15 ||
[Analyze grammar]

śivatattvavidonyepi dakṣayajñādviniryayuḥ |
gate dadhīcau sānaṃdaṃ prāvartata mahāmakhaḥ || 16 ||
[Analyze grammar]

ye sthitā brāhmaṇāstatra tebhyo dviguṇa dakṣiṇām |
prādātprajāpatirdakṣastvanyebhyopyadhikaṃ vasu || 17 ||
[Analyze grammar]

sarve jāmātarastena toṣitā bhūriśodhanaiḥ |
kanyāścālaṃkṛtāḥ sarvā mahāvibhavavistaraiḥ || 18 ||
[Analyze grammar]

ṛṣipatnyopi bahuśo devapatnyopyanekaśaḥ |
tathā purāṃganāḥ sarvāstena mānabhuvaḥ kṛtāḥ || 19 ||
[Analyze grammar]

brahmaghoṣeṇa tāreṇa vyomaśabdaguṇaṃ sphuṭam |
kāritaṃ tena dakṣeṇa viprāṇāṃ hṛṣṭacetasām || 120 ||
[Analyze grammar]

agnirmaṃdāgnirabhavattasmiñjuhvati dīkṣite |
haviḥ parimalenaiva paritṛptā digaṃganāḥ || 21 ||
[Analyze grammar]

svāhākārairvaṣaṭkāraiḥ surā jātāḥ picaṃḍilāḥ |
racitā girayastena sadannānāṃ padepade || 22 ||
[Analyze grammar]

ghṛtakulyāḥ kṛtāstena madhukulyāḥ sahasraśaḥ |
mahāsarāṃsi payasāṃ drapsasyāpi mahāhradāḥ || 23 ||
[Analyze grammar]

rāśayaśca dukūlānāṃ ratnānāṃ śikharāṇi ca |
yajñavāṭasya vasudhā svarṇarūpyamayīkṛtā || 24 ||
[Analyze grammar]

na labhyaṃte kratau tasya mārgitā api mārgaṇāḥ |
hṛṣṭāḥ puṣṭāḥ samabhavannapi tatparicārakāḥ || 25 ||
[Analyze grammar]

dhvanirmaṃgalagītānāṃ vyānaśe gaganāṃgaṇam |
jahṛṣe cāpsarovṛṃdairgaṃdharvairmumudetarām || 26 ||
[Analyze grammar]

vidyādharairnanaṃde ca vasudhā vavṛdhe bhṛśam |
mahāvibhavasaṃbhāre tasmindākṣe mahākratau |
itthaṃ pravṛtte'tha muniḥ kailāsaṃ nārado yayau || 127 ||
[Analyze grammar]