Chapter 31

[English text for this chapter is available]

agastya uvāca |
dharmatīrthasya māhātmyaṃ kīdṛgdevena śaṃbhunā |
skaṃda devyai samākhyātaṃ tadākhyāhi kṛpāṃ kuru || 1 ||
[Analyze grammar]

skaṃda uvāca |
viṃdhyonnatihṛdākhyāmi dharmatīrthasamudbhavam |
ākarṇaya mahāprājña yathā devena bhāṣitam || 2 ||
[Analyze grammar]

vṛtraṃ nihatya vṛtrārirbrahmahatyāmavāptavān |
anutaptotha papraccha prāyaścittaṃ purohitam || 3 ||
[Analyze grammar]

bṛhaspatiruvāca |
yadi tvaṃ devarājemāṃ brahmahatyāṃ sudustyajām |
apānunutsustadyāhi kāśīṃ viśveśapālitām || 4 ||
[Analyze grammar]

nānyatkiṃcitkvaciddṛṣṭaṃ brahmahatyāmahauṣadham |
rājadhānīṃ parityajya śakra viśveśituḥ parām || 5 ||
[Analyze grammar]

bhairavasyāpihastāgrādapatadvaidhasaṃ śiraḥ |
yatrānaṃdavane tatra vṛtraśatro vraja drutam || 6 ||
[Analyze grammar]

sīmānamapi saṃprāpya śakrānaṃdavanasya hi |
brahmahatyā palāyeta vepamānā nirāśrayā || 7 ||
[Analyze grammar]

anyeṣāmapi pāpānāṃ mahāpāpajuṣāmapi |
nāśayitrī parā kāśī viśveśa samadhiṣṭhitā || 8 ||
[Analyze grammar]

mahāpātakato muktiḥ kāśyāme va śatakrato |
mahāsaṃsārato muktiḥ kāśyāmeva na cānyataḥ || 9 ||
[Analyze grammar]

nirvāṇanagarī kāśī kāśī sarvāghasaṃghahṛt |
viśveśituḥ priyā kāśī dyauḥ kāśī sadṛśī nahi || 10 ||
[Analyze grammar]

brahmahatyābhayaṃ yasya yasya saṃsārato bhayam |
jātucittena na tyājyā kāśikā muktikāśikā || 11 ||
[Analyze grammar]

jaṃtūnāṃ karmabījānāṃ yatra dehavisarjane |
na jātucitprarohosti haradṛṣṭyāptaśuṣmaṇām || 12 ||
[Analyze grammar]

tāṃ kāśīṃ prāpya vṛtrāre vṛtrahatyāpanuttaye |
samārādhaya viśveśaṃ viśvamuktipradāyakam || 13 ||
[Analyze grammar]

bṛhaspateriti vaco niśamya sa sahasradṛk |
āyāddrutataraṃ kāśīṃ mahāpātakaghātukām || 14 ||
[Analyze grammar]

snātvottaravahāyāṃ ca dharmeśaṃ paritaḥ sthitaḥ |
ārādhayanmahādevaṃ brahmadvatyāpa nuttaye || 15 ||
[Analyze grammar]

mahārudrajapāsaktaḥ sutrāmātha trilocanam |
dadarśa liṃgamadhyasthaṃ svabhāsā dīpitāṃbaram || 16 ||
[Analyze grammar]

punastuṣṭāva vedoktai rudrasūktairanekadhā |
viniṣkramya tato liṃgādāvirbhūya bhavovadat || 17 ||
[Analyze grammar]

śacīpate prasannosmi varaṃ varaya suvrata |
kiṃ deyaṃ drutamākhyāhi dharmapīṭhakṛtāspada || 18 ||
[Analyze grammar]

śrutveti devadevasya sa premavacanaṃ hariḥ |
sarvajña kiṃte'viditaṃ tamuvāceti vṛtrahā || 19 ||
[Analyze grammar]

tatastatkṛpayānunno dharmapīṭhaniṣevaṇāt |
niṣpādya tīrthaṃ tatreśo'tra snāhīṃdreti cābravīt || 20 ||
[Analyze grammar]

tatreṃdraḥ snānamātreṇa divyagaṃdho'bhavatkṣaṇāt |
avāpa ca ruciṃ cāruṃ prāktanīṃ śātayājñikīm || 21 ||
[Analyze grammar]

tadāścaryamatho dṛṣṭvā munayo nāradādayaḥ |
parisasnurmudāyuktā dharmatīrthe'ghahāriṇi || 22 ||
[Analyze grammar]

atarpayanpitṝndivyānvyadhuḥ śrāddhāni śraddhayā |
dharmeśaṃ snāpayāmāsustattīrthāmbubhṛtairghaṭaiḥ || 23 ||
[Analyze grammar]

tadā prabhṛti tattīrthaṃ dharmāṃdhuriti viśrutam |
brahmahatyādi pāpānāmakleśaṃ kṣālanaṃ param || 24 ||
[Analyze grammar]

yatphalaṃ tīrtharājasya snānena parikīrtyate |
sahasraguṇitaṃ tatsyāddharmāṃdhu snānamātrataḥ || 25 ||
[Analyze grammar]

gaṃgādvāre kurukṣetre gaṃgāsāgarasaṃgame |
yatphalaṃ labhate martyo dharmatīrthe tadāpnuyāt || 26 ||
[Analyze grammar]

narmadāyāṃ sarasvatyāṃ gautamyāṃ siṃhage gurau |
snātvā yatphalamāpyeta dharmakūpe tadāpnuyāt || 27 ||
[Analyze grammar]

mānase puṣkare caiva dvārike sāgare tathā |
tīrthe snātvā phalaṃ yatsyāttatsyāddharmajalāśaye || 28 ||
[Analyze grammar]

kārtikyāṃ sūkarakṣetre caitryāṃ gaurīmahāhrade |
śaṃkhoddhāre haridine yatphalaṃ tatphalaṃ tviha || 29 ||
[Analyze grammar]

tīrthadvayaṃ pratīkṣaṃte sisnāsūnpitaro narān |
gaṃgāyāṃ dharmakūpe ca piṃḍanirvapaṇāśayā || 30 ||
[Analyze grammar]

pitāmahasamīpe vā dharmeśasyāgratotha vā |
phalgau ca dharmakūpe ca mādyaṃti prapitāmahāḥ || 31 ||
[Analyze grammar]

dharmakūpe naraḥ snātvā paritarpya pitāmahān |
gayāṃ gatvā kimadhikaṃ kartā pitṛmudāvaham || 32 ||
[Analyze grammar]

yathā gayāyāṃ tṛptāḥ syuḥ piṃḍadāne pitāmahāḥ |
dharmatīrthe tathaiva syurna nyūnaṃ naiva cādhikam || 33 ||
[Analyze grammar]

te dhanyāḥ pitṛbhaktāste prīṇitāstaiḥ pitāmahāḥ |
paitrādṛṇāddharmatīrthe niṣkṛtiryaiḥ kṛtā sutaiḥ || 34 ||
[Analyze grammar]

tattīrthasya prabhāveṇa niṣpāpobhūtkṣaṇena ca |
praṇamya devadeveśamiṃdro'gādamarāvatīm || 35 ||
[Analyze grammar]

apāro mahimā tasya dharmatīrthasya kuṃbhaja |
tatkūpe svaṃ nirīkṣyāpi śrāddhadānaphalaṃ labhet || 36 ||
[Analyze grammar]

tatrāpi kākiṇī mātraṃ yacchetpitṛmude naraḥ |
akṣayaṃ phalamāpnoti dharmapīṭhaprabhāvataḥ || 37 ||
[Analyze grammar]

tatra yo bhojayedviprānyatinotha tapasvinaḥ |
sikthe sikthe labhetsotha vājapeyaphalaṃ sphuṭam || 38 ||
[Analyze grammar]

prāpyāmarāvatīṃ śakrastato diviṣadāṃ puraḥ |
dharmapīṭhasya māhātmyaṃ mahatkāśyāmavarṇayat || 39 ||
[Analyze grammar]

āgatya punarapyatra śaṃbhorānaṃdakānane |
munivṛṃdārakaiḥ sārdhaṃ liṃgamasthāpayaddhariḥ || 40 ||
[Analyze grammar]

tārakeśātpaścimata iṃdreśvaramitīritam |
tasya saṃdarśanātpuṃsāmaiṃdraloko na dūrataḥ || 41 ||
[Analyze grammar]

taddakṣiṇe śacīśaśca svayaṃ śacyā pratiṣṭhitaḥ |
śacīśārcanataḥ strīṇāṃ saubhāgyamatulaṃ bhavet || 42 ||
[Analyze grammar]

tatsamīpesti raṃbheśo bahusaukhyasamṛddhidaḥ |
iṃdreśvarasya parito lokapāleśvaro paraḥ || 43 ||
[Analyze grammar]

tadarcanātprasīdaṃti lokapālāḥ samṛddhidāḥ |
dharmeśātpaścimāśāyāṃ dharaṇīśaḥ prakīrtitaḥ |
taddarśanena dhairyaṃ syādrājye rājakulādiṣu || 44 ||
[Analyze grammar]

dharmeśāddakṣiṇe pūjyaṃ tattveśākhyaṃ paraṃ naraiḥ |
tattvajñānaṃ pravarteta talliṃgasya samarcanāt || 45 ||
[Analyze grammar]

dharmeśātpūrvadigbhāge vairāgyeśaṃ samarcayet |
nivṛttiścetasastasya liṃgasya sparśanādapi || 46 ||
[Analyze grammar]

jñāneśvaraṃ tathaiśānyāṃ jñānadaṃ sarvadehinām |
aiśvaryeśamudīcyāṃ ca liṃgāddharmeśvarācchubhāt || 47 ||
[Analyze grammar]

taddarśanādbhavennṛṇāmaiśvaryaṃ manasepsitam |
paṃcavaktrasya rūpāṇi liṃgānyetāni kuṃbhaja || 48 ||
[Analyze grammar]

etānyavaśyaṃ saṃsevya naraḥ prāpnoti śāśvatam |
anyattatraiva yadvṛttaṃ tadākhyāmi mune śṛṇu || 49 ||
[Analyze grammar]

yacchrutvāpi naro ghore saṃsārābdhau na majjati |
kadaṃbaśikharo nāma viṃdhyapādo mahāniha || 50 ||
[Analyze grammar]

damasya putrastatrāsīddurdamo nāma pārthivaḥ |
pitaryuparate rājyaṃ saṃprāpyāvijiteṃdriyaḥ || 51 ||
[Analyze grammar]

haretpuraṃdhrīḥ prasabhaṃ paurāṇāṃ kāmamohitaḥ |
asādhavaḥ priyāstasya sādhavo'priyatāṃ yayuḥ || 52 ||
[Analyze grammar]

adaṃḍyāndaṃḍayāṃcakre daṃḍyeṣvāsītparāṅamukhaḥ |
sadaiva mṛgayāśīlaḥ so'bhūnmṛgayu saṃgataḥ || 53 ||
[Analyze grammar]

vivāsitāḥ svaviṣayāttena sanmatidāyinaḥ |
dharmādhikāriṇaḥ śūdrā brāhmaṇāḥ karadīkṛtāḥ || 54 ||
[Analyze grammar]

paradāreṣusaṃtuṣṭaḥ svadāreṣu parāṅmukhaḥ |
ānarca jātucinnaiva devau duḥkhāṃtakāriṇau || 55 ||
[Analyze grammar]

hāriṇau sarvapāpānāṃ sarvavāṃchitadāyinau |
sarveṣāṃ jagatīsārau śrīkaṃṭhaśrīpatīpatī || 56 ||
[Analyze grammar]

svaprajāsveka udito dhūmaketurivāparaḥ |
durdamo nāma bhūpālaḥ kṣayāyā kāṃḍa eva hi || 57 ||
[Analyze grammar]

sa kadācinmṛgayubhiḥ pāpardhi vyasanāturaḥ |
sārdhaṃ viveśāraṇyāni gṛṣṭipṛṣṭhānugo hayī || 58 ||
[Analyze grammar]

ekākī daivayogena durdamaḥ so'vanīpatiḥ |
dhanvī turaṃgamāruḍho'viśadānaṃdakānanam || 59 ||
[Analyze grammar]

sa vilokyātha sarvatra pādapā navakeśinaḥ |
succhāyāṃśca suvistārāngataśrama ivābhavat || 60 ||
[Analyze grammar]

sugaṃdhena suśītena sumadena suvāyunā |
kṣaṇaṃ saṃvījito rājā pallavavyajanaiḥ kujaiḥ || 63 ||
[Analyze grammar]

kevalaṃ mṛgayā jātastatkhedo na vyapāvrajat |
ājanmajanitaḥ khedo niragāttadvanekṣaṇāt || 62 ||
[Analyze grammar]

madhye vanaṃ sa cāpaśyatprāsādaṃ cuṃbitāṃbaram |
mahāratnaśalākānāṃ ramyamekamivākaram || 63 ||
[Analyze grammar]

athāvaruhya turagātsa bhūpālotivismitaḥ |
dharmeśamaṃḍapaṃ prāpya svātmānaṃ praśaśaṃsa ha || 64 ||
[Analyze grammar]

dhanyosmyahaṃ prasannosmi dhanye medya vilocane |
dhanyamadyatanaṃ cāharyadapaśyamimāṃ bhuvam || 65 ||
[Analyze grammar]

punarniniṃda cātmānaṃ dharmapīṭha prabhāvataḥ |
dhiṅmāṃ durjanasaṃsargaṃ tyaktasajjanasaṃgamam || 66 ||
[Analyze grammar]

jaṃtūdvegakaraṃ mūḍhaṃ prajāpīḍanapaṃḍitam |
paradāraparadravyāpahṛtyāsukhamāninam || 67 ||
[Analyze grammar]

adyayāvanmama gataṃ vṛthājanmālpamedhasa |
dharmasthānānīdṛśāni yaddṛṣṭāni na kutracit || 68 ||
[Analyze grammar]

evaṃ bahu viniṃdya svaṃ natvā dharmeśvaraṃ vibhum |
āruhyāśvaṃ yayau rājā durdamo viṣayaṃ svakam || 69 ||
[Analyze grammar]

tatomātyānsamāhūya kramāyātāṃściraṃtanān |
navīnānparinirvāsya paurāṃścāpi samāhvayat || 70 ||
[Analyze grammar]

brāhmaṇāṃścanamaskṛtya tebhyo vṛttīḥ pradāya ca |
putre rājyaṃ samāropya prajādharme niveśya ca || 71 ||
[Analyze grammar]

paridaṃḍya ca daṃḍārhānsādhūṃśca paritoṣya ca |
dārānapi parityajya viṣayeṣu parāṅmukhaḥ || 72 ||
[Analyze grammar]

samāgacchadathaikākī kāśīṃ śreyovikāsinīm |
dharmeśvaraṃ samārādhya kālānnirvāṇamāptavān || 73 ||
[Analyze grammar]

dharmeśadarśanānnityaṃ tathābhūtaḥ sa durdamaḥ |
babhūva damināṃ śreṣṭhaḥ prāṃte mokṣaṃ ca labdhavān || 74 ||
[Analyze grammar]

itthaṃ dharmeśa māhātmyaṃ mayā svalpaṃ nirūpitam |
dharmapīṭhasya māhātmyaṃ samyakko veda kuṃbhaja || 79 ||
[Analyze grammar]

idaṃ dharmeśvarākhyānaṃ yaḥ śroṣyati narottamaḥ |
ājanmasaṃcitātpāpātsa mukto bhavati kṣaṇāt || 76 ||
[Analyze grammar]

śrāddhakāle viśeṣeṇa dharmeśākhyānamuttamam |
śrāvayedbrāhmaṇāndhīmānpitṝṇāṃ tṛptikāraṇam || 77 ||
[Analyze grammar]

dharmākhyānamidaṃ śṛṇvannapi dūrasthitaḥ sudhīḥ |
sarvapāparvinirmukto gaṃtāṃte śivamaṃdiram || 78 ||
[Analyze grammar]

iti śrīskāṃde mahāpurāṇe ekāśītisāhasryāṃ saṃhitāyāṃ caturthe kāśīkhaṃḍe uttarārdhe dharmeśvarākhyānanāmaikāśītitamodhyāyaḥ || 81 ||
[Analyze grammar]