Chapter 28

[English text for this chapter is available]

pārvatyuvāca |
ānaṃdakānane śaṃbho yalliṃgaṃ puṇyavardhanam |
yannāmasmaraṇādeva mahāpātakasaṃkṣayaḥ || 1 ||
[Analyze grammar]

yatsevyaṃ sādhakairnityaṃ yatra prītiranuttamā |
yatra dattaṃ hutaṃ japtaṃ dhyātaṃ bhavati cākṣayam || 2 ||
[Analyze grammar]

yasya saṃsmaraṇādeva yalliṃgasya vilokanāt |
yalliṃgapraṇateścāpi yasya saṃsparśanādapi || 3 ||
[Analyze grammar]

paṃcāmṛtādi snapanapūrvādyasyārcanādapi |
talliṃgaṃ kathayeśāna bhavecchreyaḥ paraṃparā || 4 ||
[Analyze grammar]

skaṃda uvāca |
iti devīsamuditaṃ samākarṇya vaṭodbhava |
sarvajñena yadākhyātaṃ tadākhyāsyāmi te śṛṇu || 9 ||
[Analyze grammar]

devadeva uvāca |
ume bhavatyā yatpṛṣṭaṃ bhavabaṃdhavimokṣakṛt |
tato'haṃ kathayiṣyāmi liṃgaṃ sthiramanā bhava || 6 ||
[Analyze grammar]

ānaṃdakānane cātra rahasyaṃ paramaṃ mama |
na mayā kasyacitkhyātaṃ na praṣṭuṃ vetti kaścana || 7 ||
[Analyze grammar]

saṃti liṃgānyanekāni mamānaṃdavane priye |
paraṃ tvayā yathā pṛṣṭaṃ yathāvattadbravīmi te || 8 ||
[Analyze grammar]

yatra muktisvarūpā tvaṃ svayaṃ tiṣṭhasi viśvage |
yatra te naṃdanaścāsti kṣetraṃ vighnavighātakṛt || 9 ||
[Analyze grammar]

mamāpi yena tripuraṃ samare jayakāṃkṣiṇaḥ |
jayāśā pūritā stutyā bahumodakadānataḥ || 10 ||
[Analyze grammar]

yatrāsti tīrthamaghahṛtpitṛprītivivardhanam |
yatsnānādvṛtrahā vṛtravadhapāpādvimuktavān || 11 ||
[Analyze grammar]

dharmādhikaraṇaṃ yatra dharmarājopyavāptavān |
suduṣkaraṃ tapastaptvā parameṇa samādhinā || 12 ||
[Analyze grammar]

pakṣiṇopi hi yatrāpurjñānaṃ saṃsāramocanam |
ramyo hiraṇmayo yatra babhūva bahupāddrumaḥ || 13 ||
[Analyze grammar]

yalliṃgadarśanādeva durdamo nāma pārthivaḥ |
udvejakopi lokānāṃ kṣaṇāddharmamatistvabhūt || 14 ||
[Analyze grammar]

tasya liṃgasya māhātmyamāvirbhāvaṃ ca suṃdari |
niśāmayābhidhāsyāmi mahāpātaka nāśanam || 15 ||
[Analyze grammar]

dharmapīṭhaṃ taduddiṣṭamatrānaṃdavane mama |
tatpīṭhadarśanādeva naraḥ pāpaiḥ pramucyate || 16 ||
[Analyze grammar]

purā vivasvataḥ putro yamaḥ paramasaṃyamī |
tapastatāpa vipulaṃ viśālākṣi tavāgrataḥ || 17 ||
[Analyze grammar]

śiśire jalamadhyastho varṣāsvabhrāvakāśakaḥ |
tapartau paṃcavahnisthaḥ kadāciditi taptavān || 18 ||
[Analyze grammar]

pādāgrāṃguṣṭhabhūsparśī bahukālaṃ sa tasthivān |
ekapādasthitaḥ sopi kadācidbahvanehasam || 19 ||
[Analyze grammar]

samīrābhyavahartāsīdbahudiṣṭaṃ sadiṣṭavān |
papau sa tu pipāsuḥ sankuśāgrajalavipruṣaḥ || 20 ||
[Analyze grammar]

divyāṃ caturyugīmitthaṃ sa nināya tapaścaran |
caturguṇaṃ didṛkṣurmāṃ parameṇa samādhinā || 21 ||
[Analyze grammar]

tatohaṃ tasya tapasā saṃtuṣṭaḥ sthiracetasaḥ |
yayau tasmai varāndātuṃ śamanāya mahātmane || 22 ||
[Analyze grammar]

vaṭaḥ kāṃcanaśākhākhyo yastapastāpasaṃtatim |
dūrīcakāra succhāyo bahudvijasamāśrayaḥ || 23 ||
[Analyze grammar]

maṃdamada marullola pallavaiḥ karapallavaiḥ |
yodhvagānadhvasaṃtaptānāhvaye divatāpahṛt || 24 ||
[Analyze grammar]

svānurāgaiḥ surabhibhiḥ svādubhiśca pacelimaiḥ |
prīṇayedarthisārthaṃ yo vṛttairnijaphalairalam || 25 ||
[Analyze grammar]

tadadhastātparaṃ vīkṣya tamahaṃ tapanāṃgajam |
sthāṇuniścala varṣmāṇaṃ nāsāgranyastalocanam || 26 ||
[Analyze grammar]

tapastejobhirudyadbhiḥ paritaḥ paridhīkṛtam |
bhānumaṃtamivākāśe sunīle svena tejasā || 27 ||
[Analyze grammar]

svākhyāṃkitaṃ mahāliṃgaṃ pratiṣṭhāpyātibhaktitaḥ |
svaccha sūryopalamayatejaḥ puṃjairivārcitam || 28 ||
[Analyze grammar]

sākṣīkṛtyeva talliṃgaṃ tapyamānaṃ mahattapaḥ |
pratyavocaṃ dharmarājaṃ varaṃ brūhīti bhāskare || 29 ||
[Analyze grammar]

alaṃ taptvā mahābhāga prasannosmi śubhavrata |
niśamya śamanaśceti dṛṣṭvā māṃ praṇanāma ha || 30 ||
[Analyze grammar]

cakāra stavanaṃ cāpi parihṛṣṭeṃdriyeśvaraḥ |
nirvyājaṃ sa samādhiṃ ca visṛjya bradhnanaṃdanaḥ || 31 ||
[Analyze grammar]

dharma uvāca |
namonamaḥ kāraṇakāraṇānāṃ namonamaḥ kāraṇavarjitāya |
namonamaḥ kāryamayāya tubhyaṃ namonamaḥ kāryavibhinnarūpa || 32 ||
[Analyze grammar]

arūparūpāya samastarūpiṇe parāṇurūpāya parāparāya |
apārapārāya parābdhipāra pradāya tubhyaṃ śaśimaulaye namaḥ || 33 ||
[Analyze grammar]

anīśvarastvaṃ jagadīśvarastvaṃ guṇātmakastvaṃ guṇavarjitastvam |
kālātparastvaṃ prakṛteḥ parastvaṃ kālāya kālātprakṛte namaste || 34 ||
[Analyze grammar]

tvameva nirvāṇapada pradosi tvameva nirvāṇamanaṃtaśakte |
tvamātmarūpaḥ paramātmarūpastvamaṃtarātmāsi carācarasya || 35 ||
[Analyze grammar]

tvatto jagattvaṃ jagadevasākṣājjagattvadīyaṃ jagadekabaṃdho |
hartāvitā tvaṃ prathamo vidhātā vidhātṛviṣṇvīśa namo namaste || 36 ||
[Analyze grammar]

mṛḍastvameva śrutivartmageṣu tvameva bhīmo'śrutivartmageṣu |
tvaṃ śaṃkaraḥ somasubhaktibhājāmugrosi rudra tvamabhaktibhājām || 37 ||
[Analyze grammar]

tvameva śūlī dviṣatāṃ tvameva vinamraceto vacasāṃ śivosi |
śrīkaṃṭha ekaḥ svapadaśritānāṃ durātmanāṃ hālahalograkaṃṭhaḥ || 38 ||
[Analyze grammar]

namostu te śaṃkara śāṃtaśaṃbho namostu te caṃdrakalāvataṃsa |
namostu tubhyaṃ phaṇibhūṣaṇāya pinākapāṇeṃ'dhakavairiṇe namaḥ || 39 ||
[Analyze grammar]

sa eva dhanyastava bhaktibhāgyastavārcako yaḥ sukṛtī sa eva |
tavastutiṃ yaḥ kurute sadaiva sa stūyate duścyavanādi devaiḥ || 40 ||
[Analyze grammar]

kastvāmiha stotumanaṃtaśakte śaknoti mādṛglaghubuddhivaibhavaḥ |
prācāṃ na vācāmihagocaro yaḥ stutistvayīyaṃ natireva yāvat || 41 ||
[Analyze grammar]

skaṃda uvāca |
udīrya sūryasya sutotibhaktyā namaḥ śivāyeti samuccaransaḥ |
ilāmilanmauliratīva hṛṣṭaḥ sahasrakṛtvaḥ praṇanāma śaṃbhum || 42 ||
[Analyze grammar]

tataḥ śivastaṃ tapasātikhinnaṃ nivārya tābhyaḥ praṇatibhya īśvaraḥ |
varāndadau saptaturaṃgasūnave tvaṃ dharmarājo bhava nāmatopi || 43 ||
[Analyze grammar]

tvameva dharmādhikṛtau samasta śarīriṇāṃ sthāvarajaṃgamānām |
mayā niyuktodya dinādikṛtyaḥ praśādhi sarvānmama śāsanena || 44 ||
[Analyze grammar]

tvaṃ dakṣiṇāyāśca diśodhināthastvaṃ karmasākṣī bhava sarvajaṃtoḥ |
tvaddarśitādhvāna ito vrajaṃtu svakarmayogyāṃ gatimuttamādhamāḥ || 45 ||
[Analyze grammar]

tvayā yadetanmamabhaktibhājā liṃgaṃ samārādhitamatra dharma |
taddarśanātsparśanato'rcanācca siddhirbhaviṣyatyacireṇa puṃsām || 46 ||
[Analyze grammar]

dharmeśvaraṃ yaḥ sakṛdeva martyo vilokayiṣyatyavadātabuddhiḥ |
snātvā puraste'tra ca dharmatīrthe na tasya dūre puruṣārthasiddhiḥ || 47 ||
[Analyze grammar]

kṛtvāpyaghānāmiha yaḥ sahasraṃ dharmeśvaraṃ paśyati daivayogāt |
sahetano jātu sa nārakīṃ vyathāṃ kathāṃ tadīyāṃ divikurvatemarāḥ || 48 ||
[Analyze grammar]

yo dharmapīṭhaṃ pratilabhya kāśyāṃ svaśreyase no yatate'tra martyaḥ |
kathaṃ sa dharmatvamivātitejāḥ kariṣyati svaṃ kṛtakṛtyameva |
tvayā yathāptā iha dharmarāja manorathāste gurubhistapobhiḥ |
tathaiva dharmeśvarabhaktibhājāṃ kāmāḥ phaliṣyaṃti na saṃśayotra || 50 ||
[Analyze grammar]

kṛtvāpyaghānyeva mahāṃtyapīha dharmeśvarārcāṃ sakṛdeva kurvan |
kuto bibheti priyabaṃdhureva tava tvadīyārcita liṃgabhaktaḥ || 51 ||
[Analyze grammar]

patreṇa puṣpeṇa jalena dūrvayā yo dharmadharmeśvaramarcayiṣyati |
samarcayiṣyaṃtyamṛtāṃdhasastaṃ maṃdāramālābhiratiprahṛṣṭāḥ || 52 ||
[Analyze grammar]

tvatto vibheṣyaṃti kṛtainaso ye bhayaṃ na teṣāṃ bhavitā kadācit |
dharmeśvarārcā racanāṃ kariṣyatāṃ hariṣyatāṃ baṃdhutayāmanaste || 53 ||
[Analyze grammar]

yadatra dāsyaṃti hi dharmapīṭhe narā dyunadyāṃ kṛtamajjanāśca |
tadakṣayaṃ bhāvi yugāṃtarepi kṛtapraṇāmāstava dharmaliṃge || 54 ||
[Analyze grammar]

ye kārtike māsi sitāṣṭamī tithau yātrāṃ kariṣyaṃti narā upoṣitāḥ |
rātrau ca vai jāgaraṇaṃ mahotsavairdharmeśvare tena punarbhavā bhuvi || 55 ||
[Analyze grammar]

stutiṃ ca ye vai tvadudīritāmimāṃ narāḥ paṭhiṣyaṃti tavāgrataḥ kvacit |
nirenasaste mama lokagāminaḥ prāpsyaṃti te vaibhavataḥ sakhitvam || 56 ||
[Analyze grammar]

punarvaraṃ brūhi yathepsitaṃ dade tejonidhernaṃdana dharmarāja |
adeyamatrāsti na kiṃcideva te vidhehi vāgudyamamātrameva || 57 ||
[Analyze grammar]

prasannamūrtiṃ sa vilokya śaṃkaraṃ kāruṇyapūrṇaṃ svamanorathābhidam |
ānaṃdasaṃdohasaronimagno vaktuṃ kṣaṇaṃ naiva śaśāka kiṃcit || 58 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ caturthe kāśīkhaṃḍa uttarārdhe dharmeśamahimākhyānaṃ nāmāṣṭasaptatitamo'dhyāyaḥ || 78 ||
[Analyze grammar]